Ավարտվեց Թուրքիայում ընթացող մինչև 16 տարեկան շախմատիստների համաշխարհային պատանեկան օլիմպիադայի 6-րդ տուրը: Ըստ մրցաշարի պաշտոնական կայքի տվյալների՝ Հայաստանի հավաքականը 2.5:1.5 հաշվով պարտության էր մատնել Ադրբեջանի ընտրանուն, սակայն ավելի ուշ հայտնի դարձավ, որ տեղի է ունեցել հակառակը՝ Հայաստանը զիջել է նվազագույն տարբերությամբ:

Աբասով-Գրիգորյան’ 1/2
Գաբուզյան-Բայարանի’ 1/2
Իզզաթ-Հարությունյան’ 1/2
Միքայելյան-Իսկանդարով’ 0:1

Ինչևէ, Հայաստանի հավաքականը շարունակում է գլխավորել մրցաշարային աղյուսակը. երկրորդ տեղում ընթացող Ռուսաստանի ընտրանին ընդամենը 1 միավորի տարբերությամբ է հաղթել վրացիներին:

Հաջորդ տուրում Հայաստանի մրցակիցը կլինի Իրանը, որն այս տուրում ջախջախել է Չեխիային։

Հ.Գ. Ահա թե ինչ կոպիտ սխալով էր լուսաբանվում Ադրբեջան-Հայաստան հանդիպումը օլիմպիադայի պաշտոնական կայքի LIVE բաժնում, ինչի հետևանքով հազարավոր մարզասերներ թուրիմացության մեջ ընկան:

Եկեղեցու շուրջ վերջին օրերին տեղի ունեցած խմորումներին պարզաբանում տալու նպատակով այսօր ասուլիսի էր հրավիրվել  Հայ Առաքելական եկեղեցու դիվանապետ Արշակ եպիսկոպոս Խաչատրյանը:

Նրա պատասխաններից կարելի էր ենթադրել, որ եկեղեցին Տիգրան Սարգսյանի կառավարման այս շրջանում իրեն ապահով է զգում. գտնվում է հատուկ արտոնությունների և ուշադրության կետրոնում և այդ իսկ պատճառով որոշել է օրինականացնել այն, ինչ 20 տարի շարունակ չի արել. այն է`ապօրինի կերպով չի վճարել հարկերը:

«Անկախության 20 տարիների ընթացքում Հայ Առաքելական եկեղեցին հողի և գույքի հարկ չի վճարել, որովհետեւ հարկվելու համար պետք է գնահատել շենքի և շինության կադաստրային արժեքը», -ասել է Արշակ սրբազանը` ի նկատի ունենալով, որ իրենց տրված շինությունները անարժեք են: Իսկ մյուս կողմում, ըստ նրա, բարերարների գումարներով գնված կառույցներն են. «Հարկումից ազատվում են այն կառույցները, որոնք ունեն պաշտամունքային, կրոնական, հոգեւոր, կրթական, բարեգործական եւ դաստիարակչական նշանակություն, շահութաբեր կառույցներին դա չի վերաբերում: Այդ ցանկում ներառված են նաեւ 133 նորակառույց եկեղեցիներ»:

Հարցին, թե ցուցակում տեղ գտած բնակարանները, առանձնատները, ֆուտբոլի դաշտերը կամ լիճն ի՞նչ հոգեւոր կրթադաստիարակչական նշանակություն ունեն եւ ինչո՞ւ պետք է ազատվեն հարկերից, եպիսկոպոսն ասել է. «Առանձնատուն ասվածը, դա ճաքճքած պատերով Բաղրամյան փողոցի վրա գտնվող Վազգեն Վեհափառի շրջանից նրա համար օգտագործվող երեք սենյականոց բնակարանն է: Առանձնատուն կոչվածները դրանք գյուղերում` այնտեղ, որտեղ քահանաներ են ծառայության կոչվում, բնակության համար պայմաններ չունեցող քահանաների համար  տներն են: Կիսաշեն տներն են, որոնք որ քահանաներն իրենց ապրելու ընթացքում նորմալ տեսքի են բերում: Իսկ ջրավազանը Ներսիսյան լիճն է , Ներսես կաթողիկոսի շրջանում կառուցված եւ կոմունիստական շրջանում, այդ 7-8 մետր խորությամբ լիճը կիսվեց, տակը մառաններ դրվեցին: Պարզապես այդ մառանները լճի անմասնատելի մասն են»:

Խեղճ հոգևորականներ`փլատակված, ճաքճքած տներում ապրող նվիրյալներ: Մինչ այս էլ եկեղեցին պնդում էր, որ իր սպասավորները պետք է ապահովված լինեն, որ հոտը պետք է պահի հովվին, սակայն այստեղ ևս, ինչպես պետական բուրգում ամեն ինչ կենտրոնացված է մի քանի հոգու ձեռքում, որոնք հսկայական, նույնիսկ հեքիաթային հարստություն ունեն, մինչդեռ շարքային հոգևորականը ճիշտ է քաղցած չէ, ինչպես իր հոտի շարքային անդամը բայցևայնպես ոգևորված էլ չէ իր առաքելությունն իրականացնելիս:

Արդարացի լինելու համար ասենք, որ նրանց մեջ էլ քիչ չեն բարոյական մարդիկ, ովքեր անտրտունջ տանում են իրենց բեռը. սպասավորներ, որոնց բաժին չի հասնում ոչ միայն եկեղեցու շքեղությունից, այլև վայելքների այն ցանկից, որոնք նախատեսված են սիրելիների համար:

«20 տարի եղել են օբյեկտիվ պատճառներ:Այդ  պատճառները նորից շարունակում են լինել»: Ըստ եպիսկոպոսի` «Սա պետության` եկեղեցու հանդեպ դրսեւորած բարոյական կեցվածքի դրսեւորումն է: Ումի՞ց եք վախենում, ինչի պետք է թաքնված լինի դա, ինչի՞ պետք է ստեղծվի եկեղեցու համար մի իրավիճակ, որ եկեղեցին ստիպված լինի այդ օրենքը շրջանցել»,- հարց է հնչեցրել հոգևորականը:

Նա եկել էր ասելու, որ Մայր Աթոռ Սուրբ Էջմիածինը ողջունում է օրենքներում համապատասխան այդ փոփոխությունների որդեգրումը, ինչն արտահայությունն է հայրենի պետության կարևոր զորակցության՝ Մայր Եկեղեցուն հայ ժողովրդի կյանքում դարերի իր հոգևոր առաքելության իրականացման ճանապարհին:

Ինչ վերաբերում է ԱԺ-ին ներկայացված Մայր Աթոռի անշարժ գույքի հրապարակված աշխատանքային ցուցակին և դրանում տեղ գտած տարակուսանք առաջացնող անուններով կառույցներին, ապա ըստ Արշակ սրբազանի, դրանք ներկայացված են այն անվանումներով, որոնցով փոխանցվել են Եկեղեցուն կամ ձեռք բերվել և դեռ արձանագրված են ՀՀ Անշարժ գույքի կադաստրի պետական կոմիտեում: Նշյալ կառույցներն այսօր եկեղեցու կողմից օգտագործվում են հոգևոր-կրթական, սոցիալական -բարեգործական տարբեր նպատակներով:

Սա, իհարկե, դժվար չէ ստուգելը: Չնայած նրան, որ Հայաստանյաց Առաքելական Եկեղեցին պնդում է, թե  շահութաբեր ձեռնարկություններ չունի, և Մայր Աթոռի եկամուտները գոյանում են մոմի, հոգևոր գրականության վաճառքի և ազգային հաստատությունների ու անհատների բարերարությունների շնորհիվ, եկեղեցին,այնուամենայնիվ, եկամտաբեր ու  շահույթ հետապնդող հիմնարկներ ունի, և կգտնվեն մարդիկ, ովքեր կարող են այդ  ապացուցել:

Հիշեցնենք, որ հարկային արտոնությունների ենթակա օբյեկտների շարքում ներկայացվել է 286 կառույցի ցանկ, այդ թվում հողատարածք` 20 հատ, հողամաս` 45 հատ, բնակարան` 35, առանձնատուն` 4, ճաշարան` 4, արոտ, արոտավայր` 4, վարելահող` 4, կինոթատրոն` 2, արտադրամաս` 4, ֆուտբոլի մարզադաշտ` շրջակա կառույցներով` 11, արհեստական լիճ և լճի տակ գտնվող մառան` 2 և այլն:

Հայաստանի մինչև 16 տարեկանների հավաքականը թուրքական Իզմիթում շարունակվող համաշխարհային շախմատային Օլիմպիադայի 5-րդ տուրում 1,5:2,5 հաշվով զիջեց Ռուսաստանի հավաքականին, սակայն շարունակում է պահպանել առաջատարի դիրքը: Մեր ընտրանին այժմ իր ակտիվում ունի 16,5 միավոր և 1,5 միավորով գերազանցում է երկրորդ տեղում հաստատված Ռուսաստանի հավաքականին: Վրացիները երրորդ տեղում են 13,5 միավոր արդյունքով:

6-րդ տուրում Հայաստանի պատանեկան ընտրանու մրցակիցն այսօր Ադրբեջանի թիմն է, որը հաշվետու տուրում 2:2 հաշվով ոչ-ոքի խաղաց Իրանի հավաքականի հետ և 13 միավորով հայտնվեց մրցաշարային աղյուսակի 4-րդ հորիզոնականում:

«Խոսքի իրավունք» միավորումը դեկտեմբերի վերջին իրականացնելու է ԻՆՏԵՐՆԵՏ ԵՎ ՀԱՍԱՐԱԿՈՒԹՅՈՒՆ առաջին մրցանականբաշխությունը:

«Ինտերնետի դերակատարումը մարդկանց կյանքում գնալով մեծանում է, սակայն Հայաստանում այս հասանելի է բնակչության մոտ 10 տոկոսին: Այն ծառայում է որպես թերթ, գիրք, հեռահաղորդակցման միջոց, հանրագիտարան, ժամանցի միջոց եւ այլն: Ինտերնետի բացասական դերակատարման մասին խոսել գոնե այս մրցանակաբաշխության չենք ուզում: «Խոսքի իրավունք» միավորումը ցանկանում է խրախուսել նրանց, ովքեր բիզնեսից բացի ինտերնետ դաշտում իրականացնում են սոցիականլան նշանակություն ունեցող նախագծեր: Մրցանակակիրները կարող են լինել կայքեր, քաղաքացիական նախաձեռություններ եւ խմբեր, լրագրողներ եւ այլն:

Ահա մոտավոր անվանակարգերը.

Լավագույն քաղաքացիական նախաձեռություն,

լավագույն հայրենասիրական խումբ

լավագույն մանկական կայք

ֆեյսբուքյան լավագույն խումբ

լավագույն սոցիալական հոդված կամ խորագիր

Սրանք խիստ մոտավոր անվանակարգեր էին: Առաջարկների,նաեւ մասնակցության հայտերի ընդունման համար կարող եք դիմել xosqiiravunqpress@gmail.com էլ.փոստին: նախագծին: Մեկ ամիս հետո կհայտարարվեն վերջնական անվանակարգերը:

«Խոսքի իրավունք» միավորումը դիմում է տարբեր անհատներին ՀԿ-ներին` քննարկելու հնարավոր համագործակցությունը»,- ասված է միավորման հաղորդագրության մեջ:

Ավարտվեց ֆուտբոլի մինչև 19 տարեկանների Եվրոպայի առաջնության ընտրական փուլը, որտեղ կայացած վերջին հանդիպման արդյունքում մեր հավաքականը, հաղթելով Անդորրայի հավաքականին, դուրս եկավ հաջորդ փուլ:

Հիշեցնենք, որ 81-րդ րոպեին Աղվան Պապիկյանը անվրեպ իրացրեց մեր ընտրանու լավագույն ռմբարկու Հովհաննես Հովհաննիսյանի վաստակած 11-մետրանոց հարվածը:

Թուրքիայի Կոջաելի քաղաքում ընթացող մինչև 16 տարեկան շախմատիստների համաշխարհային օլիմպիադայի մրցաշարային աղյուսակը միանձնյա գլխավորում է Հայաստանի շախմատի հավաքականը: Հայ պատանի շախմատիստները երեկ` 3-րդ փուլում, սպիտակ խաղաքարերով 3:1 հաշվով հաղթել են Հնդկաստանի թիմին եւ վաստակել 10,5 միավոր:

Այս փուլում Կարեն Գրիգորյանը հաղթել է Սահաջ Գրովերին, Հովհաննես Գաբուզյանը՝Կուշիկ Գիրիշին, Տիգրան Հարությունյանը՝Անտոնիո Վիանիին, իսկ Արման Միքայելյանը զիջել է Բայաջ Պրինսին:

Երկրորդ տեղում 10 միավորով Վրաստանի թիմն է , 3-րդը` Ադրբեջանի շախմատիստները՝ 9 միավորով:

Հայաստանի երիտասարդական հիմնադրամը եւ ԵՊՀ «Երիտասարդ համալսարանականների միավորում» ՀԿ-ն, հոկտեմբերի 25-ին, «Ես քո կենդանի սուրն եմ, հայրենիք» ծրագրի շրջանակներում կազմակերպել էին մոտ 30 ուսանողների այցելություն Վայոց ձորի մարզի սահմանամերձ Խաչիկ գյուղում տեղակայված հրաձգային գումարտակ:

Հայաստանի երիտասարդական հիմնադրամից հայտնում են, որ ուսանողները այնտեղ ծանոթացել են բանակային առօրյային, հայրենասիրական երգեր երգել: Երիտասարդները եղել են նաեւ հայ-ադրբեջանական սահմանագծում տեղակայված հենակետերից մեկում, զրուցել շուրջօրյա մարտական հերթապահություն իրականացնող զինվորների հետ եւ պարգեւատրել 10 ժամկետային զինծառայողների եւ 10 սպաների։

Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանը նշել է, որ հիմնադրամը ռազմահայրենասիրական ծրագրերի շրջանակներում պարբերաբար իրականացնում է այցելություններ զորամասեր, հատկապես այն զորամասեր, որոնք առնչվում են դիրքերում մեր սահմանների պաշտպանությանը։

Հոկտեմբերի 25-ին, ժամը 17.40-ի սահմաններում, Հրազդան-Հանքավան ճանապարհի 5-րդ կմ-ին «ՈւԱԶ» մակնիշի ավտոմեքենա է շրջվել և ընկել գետը: Ինչպես հայտնում են ոստիկանությունից, վարորդը և 3 ուղևորները մարմնական վնասվածքներով տեղափոխվել են հիվանդանոց: Կատարվում է քննություն:

Անգլիական «Լիվերպուլի» սպորտային տնօրեն Դամիեն Կոմոլին հայտնել է, որ «Մերսիսայդյան» ակումբը նոր ֆուտբոլիստների է փնտում Ասիայում.  «Ասիայում շատ մարդիկ են ապրում, իսկ երիտասարդ ֆուտբոլիստները այնտեղ բավական շատ են: Մենք վստահ ենք, որ այդ աշխարհամասը կարող է ֆուտբոլային մեծ տաղանդներ տալ: Հատկապես Չինաստանը, որտեղ ֆուտբոը շատ սիրված մարզաձև է: Մենք համագործակցության պայմանագիր ենք կնքել այդ երկրի հետ, ինչի արդյունքում չինացի շատ ֆուտբոլիստներ հնարավորություն կունենան փորցաշրջան անցնել «Լիվերպուլում»,-ասել է Կոմոլին: