Hraparak.am-ը գրում է․

«Շաբաթ օրը վարչապետ Նիկոլ Փաշինյանը՝ շքախմբով Գյումրի էր այցելել, որի շրջանակներում ծանոթացել է Գյումրու տարեցների խնամքի կենտրոնում իրականացվող աշխատանքներին: Նրան ուղեկցել են Աշխատանքի և սոցիալական հարցերի նախարար Նարեկ Մկրտչյանը և Շիրակի մարզպետ Նազելի Բաղդասարյանը:

Պաշտոնական հաղորդագրության մեջ նշված է, որ «Վարչապետը շրջայց է կատարել կենտրոնով` զրուցել նաև այստեղ բնակվող տարեցների հետ, ովքեր շնորհակալություն են հայտնել կառավարության ղեկավարին իրենց խնդիրներն ուշադրության կենտրոնում պահելու և լուծումներ գտնելու համար» եւ այլն: Պարզ է, որ այս հաղորդագրությունը տարածել են հենց վերը նշված նախադասության համար՝ տարեցները շնորհակալություն են հայտնել երկիրն աղետի եզրին հասցրած վարչապետին։

Բայց այս հաղորդագրության ետեւում այլ իրադարձություններ էլ են թաքնված։ Գյումրիի տարեցների խնամքի կենտրոնի, գյումրեցիների լեզվով ասած՝ ծերանոցի, հարեւանությամբ ապրող բնակիչներից մեկը մեզ պատմեց, որ վարչապետի այցից առաջ անվտանգության մեծ թվով աշխատակիցներ ներխուժել են ծերանոցին հարակից տները եւ ամեն ինչ տակնուվրա արել՝ զննելով իրենց բնակարանները եւ հատկապես՝ բնակարանների՝ դեպի ծերանոց նայող հատվածները։ Ասել են, որ ապահովում են Նիկոլ Փաշինյանի անվտանգությունը։ 

Պարզ է, որ վարչապետն ու իր անվտանգության ծառայությունն ամենուրեք զենք, զինամթերք, դիպուկահարներ, դավադրություն են տեսնում եւ բոլորովին անհարմար չեն զգում, երբ անհանգստացնում են շարքային քաղաքացիներին՝ ցուցադրելով իրենց վախն ու ապրումները»։

«Նրանք երբ եկան իշխանության,  առաջին օրվանից Փաշինյանի թիմը, նրա կինը, ինքը բոլորն ընդդեմ բանակի խոսեցին»,-  Ազատության հրապարակում լրագրողների հետ զրույցում ասաց 44-օրյա պատերազմում զոհված «Սև հովազ» ջոկատի հրամանատար Ռուստամ Գասպարյանի եղբայրը՝ Սերոբ Գասպարյանը։

Նա նշեց, որ վճռական պայքարի դուրս կգա ցանկացածի հետ, եթե վստահություն առաջացնեն։

Ս.Գասպարյանի խոսքով, ընդդիմությունը մի ձև պետք է գտներ օրենքով կամ որևէ այլ ձև, որպեսզի այսօրվա Ազգային ժողովը գոյություն չունենար․ «Այդ ԱԺ-ն, երբ նայում եմ՝ վաշխառուներ, առևտրականներ, անհայրենիքներ, կանգնած  ամբիոնից գորշ գայլի նշանն են ցույց տալիս ու խոսում են, նրանք իմ համար հայեր չեն։ Կասկած ունեմ շատերը գորշ գայլերի անդամներ են, իսկ մենք 90-ականներին գորշ գայլերին սատկացրել ենք» ։

Նա նշեց, որ Փաշինյանը շանտաժ է անում  հայերին, որ մեզ կսպանեն, բանակ չունենք, չենք կարող կռվել։

«Ես էլ ասում եմ մենք կարող ենք կռվել ու կարող ենք հաղթել»,- ասաց Ս. Գասպարյանը։

Նա նաև նշեց, որ հոկտեմբերի 3-ին հնարավոր էր կանգնեցնել պատերազմը. «Ջաբրայիլի դիմաց կուտակված ադրբեջանական, թուրքական բանակը, վարձկանները, մոտավորապես 20 հազար զորք էր կուտակված, ընդամենը  երկու սնարյադ էր պետք, պատերազմը կվերջանար։ Չարեցին, որովհետև խոստացել էին հանձնել, բայց Շուշին, Հադրութը էլի մերն է լինելու»։

Արցախը 100 տոկոսով՝ ի դեմս իր խորհրդարանի, և Հայաստանի խորհրդարանական ընդդիմությունը դեմ են այն մոտեցմանը, համաձայն որի՝ լղոզված, մանիպուլյացիաներով և այլ տարբերակներով փորձում են տարածել, որ իբր Արցախը պետք է լինի Ադրբեջանի կազմում: Այս մասին հայտարարեց ԱԺ «Հայաստան» խմբակցության պատգամավոր Անդրանիկ Թևանյանը։

«Մենք պետք է ամեն ինչ անենք, որ «Կոնսենսուս՝ մինուս Նիկոլ Փաշինյան» տարբերակը վերածվի քաղաքական արդյունքի, այսինքն՝ այս բանաձևը ենթարկվի քաղաքական կապիտալիզացիայի»,- ասաց Անդրանիկ Թևանյանը։

Մանրամասն՝ տեսանյութում:

Հայաստանում աղքատներն ավելի կաղքատանան, միջին խավի գնողունակությունը կընկնի, հարուստները քիչ կտուժեն ռուս-ուկրաինական ճգնաժամից:

«Կիզակետում Արկադի Գրիգորյանի հետ» հաղորդման ժամանակ նման տեսակետ է հայտնել ՀՀ ֆինանսների նախկին նախարար Վարդան Արամյանը։

«Մեր կանխատեսումներով տնտեսական աճը կտատանվի 0,5-ից մինչև մինուս 3 տոկոսի միջակայքում, գնաճը կկազմի 9 տոկոս, Համաշխարհային բանկը կանխատեսել է, որ աղքատությունը կհասնի 38 տոկոսի»,– նշել է Արամյանը։

Նման ճգնաժամային իրավիճակներում, ինչպես ռուս–ուկրաինական հակամարտությունն է և դրա ազդեցությունը մեր տնտեսության վրա, ըստ Վարդան Արամյանի, կառավարությունը պետք է ավելի հեռատես ու իրատես լինի։ 2022 թվականի համար կանխատեսված տնտեսական աճը ոչ թե խիստ լավատեսական է, այլ ոչ իրատեսական։

Նա առայժմ չի տեսնում կառավարության համարժեք արձագանքը, կամ ծրագրերի առկայությունը՝ մարտահրավերներին դիմակայելու համար։

Հարցազրույցն ամբողջությամբ՝ տեսանյութում․

Հայաստանի և Թուրքիայի հատուկ ներկայացուցիչների հաջորդ հանդիպումը կարող է տեղի ունենալ Վիեննայում, «Արմենպրես»-ի հարցին ի պատասխան այս մասին հայտնել է ՀՀ ԱԳՆ մամուլի քարտուղար Վահան Հունանյանը։

ԱԳՆ մամուլի քարտուղարը մեկնաբանել է նաև Թուրքիայի արտաքին գործերի նախարարի հայտարարությունները հանդիպումը Հայաստանում կամ Թուրքիայում անցկացնելու ցանկության և համարձակ քայլերի անհրաժեշտության վերաբերյալ։ 

ԱԳՆ մամուլի քարտուղարը հայտնել է, որ Հայաստանը Թուրքիային առաջարկել է բացել ցամաքային սահմանը դիվանագիտական անձնագրեր կրող անձանց համար, սակայն թուրքական կողմը հապաղում է։

Հարց․ Որտե՞ղ և երբ է նախատեսվում Հայաստանի ու Թուրքիայի հատուկ ներկայացուցիչների հաջորդ հանդիպումը:

Պատասխան․ Կողմերի միջև կա նախնական ըմբռնում, որ հաջորդ հանդիպումը կարող է տեղի ունենալ Վիեննայում։ Հանդիպման ժամկետի և վայրի վերջնական հաստատման պես հանրությունը պատշաճ կերպով կտեղեկացվի։

Հարց․ Թուրքիայի ԱԳ նախարարն իր հարցազրույցում նշել է, թե իրենք կցանկանային, որ հանդիպումը լիներ Հայաստանում կամ Թուրքիայում: Ի՞նչ դիրքորոշում ունի հայկական կողմն այս առումով:

Պատասխան․ Կարգավորման նախորդ փորձերի ժամանակ հանդիպումներ Հայաստանում և Թուրքիայում եղել են՝ թե՛ բանակցողների, թե՛ նույնիսկ նախագահների մակարդակով, բայց, ինչպես գիտեք, դրանք արդյունքի չեն հանգեցրել: Նկատի ունեմ՝ կարևորը կարգավորման հասնելու քաղաքական կամքն է և հստակ՝ առարկայական քայլերի գնալու պատրաստակամությունը: Մենք ցուցաբերում ենք երկուսն էլ, և նույնն ակնկալում ենք Թուրքիայից: Եթե կամքը լինի, հանդիպումների վայրը կդառնա զուտ տեխնիկական հարց։

Ավելին, հատուկ ներկայացուցիչների՝ Հայաստանում և Թուրքիայում հանդիպումներ ունենալու առաջարկը վկայում է, որ Թուրքիայի ընկալմամբ՝ գործընթացն ամբողջությամբ երկկողմ բնույթ ունի։ Այս պարագայում տրամաբանական կլիներ, որ Թուրքիայի ներկայացուցիչներից չլսեինք գրեթե ամենշաբաթյա հայտարարություններ այն մասին, թե իրենք գործընթացն առաջ են մղում Ադրբեջանի հետ համակարգմամբ։

Հարց․ Նախարար Չավուշօղլուն Հայաստան-Թուրքիա հարաբերությունների կարգավորման վերաբերյալ խոսելիս նշել է նաև համարձակ քայլերի անհրաժեշտության մասին: Ինչպե՞ս կմեկնաբանեք դա:

Պատասխան․ Հայկական կողմը լիովին համամիտ է համարձակ քայլեր կատարելու անհրաժեշտության հետ։ Մենք բազմիցս ցույց ենք տվել առաջ շարժվելու պատրաստակամությունը, այդ թվում՝ Անթալիայի դիվանգիտական ֆորումին ԱԳ նախարարի մասնակցությամբ, տնտեսական էմբարգոյի վերացմամբ: Հայաստանի ու Թուրքիայի միջև ավիաչվերթների վերականգնումը նույնպես երկկողմ կարևոր քայլ էր:

Համոզված ենք, որ առաջ շարժվելու միակ ճանապարհը ենթադրում է շարունակական հստակ քայլեր։ Օրինակ՝ մենք թուրքական կողմին առաջարկել ենք առաջին փուլով բացել ցամաքային սահմանը դիվանագիտական անձնագրեր կրող անձանց համար, սակայն թուրքական կողմը հապաղում է: Կարծում ենք՝ սա փոքր, բայց առարկայական, կարևորը՝ տրամաբանական քայլ կլինի: Հույս ունենք՝ հնարավոր կլինի այս հարցում հասնել արդյունքի:

«Պատիվ ունեմ» խմբակցության պատգամավոր Տիգրան Աբրահամյանը գրում է․

«Երասխի ուղղությամբ մարտական դիրքեր էի գնացել։ Հատկապես այսպիսի օրերին զինծառայողների հետ շփումները շատ կարևոր եմ համարում։

Այս այցերը ոչ միայն կարևոր են ընթացիկ խնդիրները հասկանալու, առաջնահերթությունները ճշգրտելու տեսանկյունից, այլ նաև մեր զինծառայողներին սատարելու և հիշեցնելու, որ ցանկացած իրավիճակում նրանց կողքին ենք։

Մյուս կողմից՝ մեր զինծառայողների վստահությունը, կամքը, համարձակությունը ուժ է փոխանցում և մշտապես հիշեցնում, որ բոլոր քաղաքական սխալների հետևանքներն անմիջական ազդեցություն են ունենում առաջին հերթին առաջնագծի վրա։

Այդ տապալումների հետևանքները, ցավոք, 2018 թվականից հետո անընդհատ հետապնդում են բոլորիս, իսկ դրա առաջին հարվածները հենց բանակն է ստանում։

Անկախ քաղաքական գործընթացներից, աշխարհաքաղաքական պրոցեսներից և նույնիսկ ԱԺ ամբիոնից ինքնախոստովանական ցուցմունքներ տվողների վարքագծից, մեր զինծառայողները ժայռերի վրա, գիշեր-ցերեկ, ձյուն թե անձրև մարտական հերթապահություն են կրում, ինչը նվազագույնը պետք է ընդունել ի գիտություն»։

Ես զրահապատ մեքենա չունեմ, ինձ երեք մեքենա չի ուղեկցում և այդ մեքենան չարժե 200․000 դոլար, արժե ավելի քիչ։ «Ազատություն TV»-ի հետ ֆեյսբուքյան ասուլիսի ժամանակ հայտարարել է ԱԺ նախագահ Ալեն Սիմոնյանը՝ պատասխանելով քաղաքացիներից մեկի հարցին՝ ինչո՞ւ է թանկարժեք մեքենաներ գնում պետբյուջեի հաշվին, եթե այդ գումարը կարող է հատկացվել բանակում որոշ խնդիրներ լուծելու համար.

«Ես ինձ մեքենա չեմ գնում, ես մեքենա չեմ վարում, այդ հնարավորությունը չունեմ և հաճախ այդ որոշումների հետ որևէ կապ չունեմ։ Կան չափանիշներ, որոնք պետք է լինեն բարձրաստիճան պաշտոնյաներին ուղեկցելիս, դա արագությունն է, մեքենայի ճկունությունն է և այլն։ Ինձ երեք մեքենա չի սպասարկում և չի ուղեկցում, պետությունը ունի որոշակի արարողակարգեր, ես փորձում եմ հրաժարվել գրեթե ամեն ինչից, ինչը օրենքը մեզ չի արգելում։ Ինձ սպասարկող մեքենան զրահապատ չէ, եթե լիներ զրահապատ, մեքենայի գինը կլիներ մոտ 550․000 դոլար, ես հրաժարվել զրահապատի գաղափարից»,-ասել է Սիմոնայնը:

Ալեն Սիմոնյանը հայտարարեց, որ պետական պաշտոնյա դառնալուց հետո իր կյանքի որակը փոխվել է դեպի վատը։

«Ընթացիկ խնդիրը լուծելուց 550 հազար դոլար տալու փոխարեն` ես իմ անվտանգությունը դրել եմ մի կողմ` չնայած նրան, որ ինձ ամեն օր սպառնում են սպանել, ես ասել եմ` կարևոր չի դա, դնենք մի կողմ, մենք չենք կարող մեզ շատ ավելի մեծ ծախս թույլ տալ», — ասաց Ալեն Սիմոնյանը:

Ապրիլի 8-ից ռուս խաղաղապահները ոչ միայն Փառուխի, այլև Քարագլխի հատվածում են։ Արցախի Հանրապետության կառավարության նիստում հայտարարել է նախագահ Արայիկ Հարությունյանը։

Նա նշել է, որ նման նախադեպ եղել է նախկինում՝ Եղծահողում, Մատաղիսի, Թաղավարդի  հատվածում։

«Լարված շփման գծի տարածքներում, որտեղ մենք հետագայում մեր դիրքերը փոխարինել են խաղաղապահ ուժերով, որոշակի կայունություն և ավելի հանգիստ իրավիճակ ենք ունենում։ Ըստ նոյեմբերի 9-ի համաձայնագրի, շփման գծի ամբողջ երկայնքով պետք է տեղակայվեն ռուս խաղաղապահները, այսինքն, ըստ այդ համաձայնագրի, դիրքեր չպետք է լինեն ոչ մեր կողմից, ոչ Ադրբեջանի, բայց քանի որ խաղաղապահ ուժերի քանակը բավարար չէ ամբողջ երկայնքով իրականացնել դա, իսկ ադրբեջանական ստորաբաժանումները շարունակում են ոչ միայն տեղակայվել, այլև մշտապես կրակի տակ պահել մեր շփման գիծը և դրա հարևանությամբ գտնվող բնակավայրերը՝ կանխելու առաջխաղացումը և վտանգները, մենք շարունակում ենք իրականացնել մարտական հերթապահություն»,- նշել է Արայիկ Հարությունյանը։

Նա ասել է, որ Փառուխում տեղակայված են խաղաղապահ ուժերը, Քարագլխի հիմնականում մի քանի բարձունքներում, ամենաբարձր կետում տեղակայված են Արցախի ՊԲ ստորաբաժանումները, կամավորականները, նաև ԱԱԾ ստորաբաժանումները։

«Լեռնաշղթայի որոշ բարձունքներում գտնվում են ադրբեջանական ստորաբաժանումներ, և արդեն երեկվանից նաև ռուս խաղաղապահներն են գտնվում ոչ միայն Փառուխի, այլև  Քարագլխի հատվածում։ Այսինքն այդ լեռնաշղթայի վրա տիրում է մի իրավիճակ, որտեղ հիմնականում մեր պաշտպանության բանակի ստորաբաժանումներն ու կամավորականներն են, այնտեղ կան խաղաղապահ ուժերի մասնակցությունը, նաև ադրբեջանական ուժերը որոշ բարձունքներին »,- նշել է Արցախի նախագահը։

Մանրամասն Արցախի Հանրային հեռուստաընկերության տեսանյութում։ 

Ադրբեջանի զինված ուժերը Սյունիքի մարզի Ներքին Հանդի տարածքում ինժեներական աշխատանքներ են իրականացրել ու վրաններ տեղադրել մարտի 3-ին։ Այս մասին «Փաստինֆո»-ի գրավոր հարցմանն ի պատասխան հայտնել են ՀՀ ՊՆ-ից՝ ըստ էության ընդունելով, որ տեղյակ լինելով ադրբեջանցիների՝ ՀՀ ինքնիշխան տարածքում տեղակայվելու մասին չեն նախազգուշացրել տեղի բնակիչներին՝ նրանց հսկողության տակ փոխանցված տարածք չգնալու ու գերեվարումից խուսափելու համար։

«Փաստինֆո»-ն ավելի վաղ տեղեկացրել է, որ ադրբեջանցիների՝ Ներքին Հանդում տեղակայվելու մասին գյուղացիները իմացել են հովիվից, որը փնտրելով արոտավայրում մնացած անասուններին՝ հանդիպել էր ադրբեջանցիների վրաններին։ Այդ մասին ԶԼՄ-ներին հայտնի է դարձել մարտի կեսերին։ՊՆ-ն շտապեց հայտարարել, թե նշված հատվածը գտնվում է ադրբեջանական վերահսկողության տակ, ադրբեջանական ստորաբաժանումներն ունեն մի քանի դիրք, որոնք կահավորված չլինելու պատճառով ձմեռային ժամանակահատվածում հնարավոր չէ օգտագործել։ Հիմա, կապված եղանակային պայմանների փոփոխության հետ, ադրբեջանական զինվորականներն ընդամենը վերադառնում են այդ դիրքեր։

«Փաստինֆո»-ն մարտի 15-ին գրավոր հարցում էր ուղարկել ՊՆ՝ խնդրելով հայտնել, թե ՀՀ զինված ուժերը երբ են արձանագրել, որ արդբեջանցիները տեղակայվել են Ներքին Հանդ գյուղի տարածքում, Եւս քանի դիրք կա, որոնք հանձնվել են ադրբեջանցիների հսկողությանը, սակայն նրանք դեռ չեն կահավորել ու ցանկացած պահի կարող են իրենց զինված ուժերին տեղակայել։ Արդյոք տարածքի բնակչությունը զգուշացվել էր ադրբեջանցիների տեղակայման մասին, թե, ի վերջո, ո՞ր հատվածներով է անցնում պայմանական սահմանը՝ օրինակ թշնամու կողմից չգերեվարվելու համար։

Սահմանամերձ դարձած Գեղարքունիքի, Արարատի, Տավուշի, Սյունիքի մարզերում կա՞ն արդյոք դիրքեր, որոնք փաստացի հանձնվել են ադրբեջանցիներին, երբ ու քանի դիրք է հանձնվել։

ՊՆ-ի պատասխանն առավել քան մտահոգիչ է՝ կասկածի տակ դնելով ՀՀ տարածքային ամբողջականությունը, ինչը ՀՀ քրեական օրենսգրքով նախատեսված հանցագործություն է։ Նախ նշել են, թե «Հանրապետության սահմանամերձ՝ Սյունիքի, Գեղարքունիքի, Տավուշի ու Արարատի մարզերում ադրբեջանական կողմին երբեւէ որեւէ դիրք չի հանձնվել։ ՀՀ ԶՈՒ կողմից նշված հատվածում տեղադրված են մարտական դիրքեր ու իրավիճակը վերահսկվում է ՀՀ ԶՈՒ կողմից»։ Եւ սա այն դեպքում, երբ 2020 ըվականի դեկտեմբերին Սյունիքի մարզի մի շարք ռազմավարական բարձունքներից հետ են քաշվել մեր ստորաբաժանումները ու թշնամին տեղակայվել է։ Ավելին, 2021 թվականի մայիսին ներխուժել են Սյունիքի, Գեղարքունիք ու դիրքավորվել ՀՀ ինքնիշխան տարածքում՝ոչ միայն զրկելով գյուղացուն իր դաշտերը մշակելու ու անասուններին արոտի տանելու հնարավորությունից, այլ նաեւ կրակային թիրախի տակ պահելով իր տանը ապրող հայ գյուղացուն։

ՀՀ ՊՆ-ն պաշտոնապես հրաժարվել է հայտնել, թե եւս քանի դիրք կա, որոնք այսօր գտնվում են թշնամու վերահսկողության տակ՝ ուղղակի չպատասխանելով այդ հարցին։ Փոխարենը նշել է, որ «2022 թվականի մարտի 3-ին ադրբեջանական ԶՈՒ զինծառայողների կողմից նախկինում սարքավորված խրամատում իրականացվել են ինժեներական աշխատանքներ, տեղադրվել վրաններ»։ Ընդ որում՝ ՊՆ-ն կրկին խուսափել է ասել, իսկ երբ է թշնամին այդտեղ խրամատավորվել։ Ավելին, փաստացի ընդունել է, որ Ներքին Հանդի բնակիչները չեն նախազգուշացվել ադրբեջանցիների տեղակայման մասին ու թե որտեղով է անցնում ենթադրյալ սահմանը՝ հարվածի տակ դնելով նրանց կյանքն ու անվտանգությունը։ Համենայն դեպս՝ «Փաստինֆո» հարցմանն ի պատասխան ՊՆ-ն չի հայտնել գյուղացիներին նախազգուշացնելու մասին։

Եթե Հայաստանն ունենար գլխավոր դատախազ՝ վստահաբար անմիջապես կհարուցեր քրեական գործ ու կհանձնարար ԱԱԾ-ին քննության առարկա դարձնել ՊՆ-ի իրավասու անձանց գործողությունների իրավաչափությունը։ Բայց Հայաստանը չունի գլխավոր դատախազ, այլ միայն քաղաքական ինչ-որ խմբակի շահերի սպասարկող անձ,որից որեւէ ակնկալիք ունենալը ուղղակի միամտություն է։

ԽՈՀ_____

Կարծում եմ՝ ինչքան ավելի ձգձգվի պատերազմական իրավիճակը Ուկրաինայում, այնքան մենք ավելի կմոտենանք երրորդ համաշխարհային պատերազմին։ Իսկ Ուկրաինան այսքան զոհերից և ավերածություններից հետո, /եթե նույնիսկ հաղթի/, երբ ժողովրդի մի հսկայական հատված ցրվել է Եվրոպայով մեկ, հազիվ թե կարողանա շուտ ուշքի գալ։ 

Ռուսաստանը իր որդեգրած քաղաքականության հետևանքով / հնարավորին չափ քիչ վնասել խաղաղ բնակչությանը/ ավելի արագ առաջանալու հնարավորությունից ինքն իրեն զրկել է։ Իսկ ինչքան ձգձգվում է պատերազմը, այնքան ավելի վտանգավոր է դառնում Արևմուտքի հռետորաբանությունը։ Սկսել են արդեն բացահայտ սպառնալիքներ հնչեցնել Ռուսաստանի հասցեին։ Իսկ որ անելանելի վիճակում հայտնված Ռուսաստանը ատոմային ռումբ կօգտագործի, ես համարյա չեմ կասկածում։ Հիշում եք Պուտինի խոսքերը «ում է պետք այն աշխարհը, որտեղ Ռուսաստանը չի լինելու»։

 Շատ բան կախված կլինի և Չինաստանի դիրքորոշումից։ Եթե արևմուտքը վստահ լինի, որ Չինաստանը հանդես չի գա Ռուսաստանի կողմից, ավելի մեծ վճռականություն կցուցաբերի։

Բայց դրանից Ուկրաինայի վիճակը միայն կվատթարանա, քանի որ կդառնա ավելի դաժան մրցակցության թատերաբեմ։ Վատ հարևանի անեկդոտը հիշում եք, երբ Աստված նրան ասում է.- Ինչ ուզես քեզ կտամ, բայց իմացի կրկնակին տալու եմ հարևանիդ։Եվ գիտեք ինչ է ցանկանում այդ մարդը.- Հանիր իմ մի աչքը,- ասում է, / որպեսզի հարևանը կուրանա։/

 Այնպես որ, սիրելի՛ բարեկամներ,կարծում եմ համաշխարհային աղետից, մեզ ընդամենը մի փոքր քայլ է բաժանում։ Իսկ հույս դնել սնափառությունից կուրացած համաշխարհային առաջնորդների խելամտության վրա /հիշենք Կարաիբյան ճգնաժամը, երբ վերջին պահին Քենեդին և Խրուշչևը համաձայնության եկան, և կանխվեց աղետը/այս դեպքում, հազիվ թե կարելի է… 

  Վարուժան ՂազանչյանԳրող, հրապարակախոս