Պայմանավորված եկամտի ավելացմամբ (օրինակ՝ աշխատավարձ, կենսաթոշակ կամ ամսական պարբերականությամբ վճարվող որևէ այլ եկամուտ) քաղաքացին կարող է դուրս մնալ անապահովության գնահատման համակարգից․ ընթացակարգը նոր չէ, գործում է համակարգի ներդրման պահից, այս մասին պարզաբանում է տարածել ՀՀ աշխատանքի և սոցիալական հարցերի նախարարության խոսնակ Զառա Մանուչարյանը։

«Անապահովության գնահատման համակարգում հաշվառված քաղաքացիներին տրամադրվող ընտանեկան/սոցիալական նպաստը երաշխավորված աջակցություն չէ, այն ընտանիքի եկամուտների հիմքով տրվող աջակցություն է՝ ի տարբերություն, օրինակ՝ կենսաթոշակների։

Համակարգից դուրս մնացած, բայց աջակցության կարիք ունեցող քաղաքացիները կարող են դիմել եռամսյակային հրատապ օգնություն ստանալու համար, որի չափը հավասար է սոցիալական նպաստի չափին (ամսական՝ 18 հազար դրամ):

Միաժամանակ տեղեկացնում ենք նաև, որ ընտանիքը կարող է չստանալ ընտանեկան կամ սոցիալական նպաստ, բայց կարող է շարունակել օգտվել այլ աջակցություններից։

Այս դեպքում, կենսաթոշակի բարձրացման հիմքով անապահովության գնահատման համակարգից դուրս մնացած ընտանիքները կշարունակեն օգտվել կոմունալ զեղչերից (նվազ սակագներ՝ բնական գազի, էլեկտրաէներգիայի, խմելու ջրի մատակարարման և ջրահեռացման ծառայությունների դիմաց)․ վերոնշյալ հնարավորությունից օգտվելու համար անհրաժեշտ է ունենալ ոչ թե «28.00», այլ՝ «20.00» միավոր, իսկ կենսաթոշակի չափի բարձրացումը միավորի կտրուկ փոփոխություն՝ «28.00»-ից «20.00» միավորի միջակայքում չի բերել։

Միաժամանակ տեղեկացնում ենք նաև, որ այս պահին ընտանեկան/սոցիալական նպաստ է ստանում շուրջ 72500 ընտանիք․ անապահովության գնահատման նոր համակարգի ներդրման ուղղությամբ նախարարության կողմից ինտենսիվ աշխատանքներ են տարվում», — գրել է Մանուչարյանը:

Էս քանի օր է՝ ուզում եմ հասկանալ նիկոլականների հրճվանքը ՀԱՊԿ նիստին իր ելույթի և էլ ավելի շատ՝ նրա այսպես կոչված թուղթ չստորագրելու հետ կապված: Չէ՞, որ մեզ էր պետք, որ ինչ-որ բանձև ընդունվի, ինչ-որ արդյունք լինի. հիմա դա չեղավ, այդ՝ իբր ամենից կարևոր 2 թուղթը չընդունվեց, Նիկոլն ասաց՝ մեր ուզածը չի, օքե՛յ:

Բա դրա ինչի՞ վրա եք ուրախացել, հպարտանում եք, որ ի՞նչ.

Փաստացի այդ՝ իբր շատ կարևոր բանաձևը այդպես էլ չընդունվեց. դա մե՛զ էր պետք, ո՛չ Պուտինին, ոչ էլ, հավատացեք, Լուկաշենկոյին, Տոկաևին և այլոց:

Այ որ բանաձև լիներ, մեր ուզածով լիներ, ընդունվեր միաձայն, այ էդ ժամանակ կարելի կլիներ գովալ, իբրև դիվանագիտական արդյունքի հասած: Թե չէ՝ վառած խորովածի չուտելը, ի՞նչ մի հերոսություն ա (Նենց օրինակ բերեմ, որ Նիկոլն էլ կհասկանա):

Արդեն մի քանի տարի է Ազգային հերոս Մոնթե Մելքոնյանի անվան հետ կապված գրառումների կամ հրապարակված լուսանկարների պատճառով «Ֆեյսբուք»-ը օգտահաշիվներ է արգելափակում։ Անկախ  «Ֆեյսբուք»-ի կողմից կիրառվող «պատժամիջոցներին», նոյեմբերի 25-ին՝ Մոնթե Մելքոնյանի ծննդյան օրը, քաղաքացիներն ակտիվ գրառումներ կատարեցին։ Իսկ թե ի՞նչ հետևանքներ են այն ունեցել կամ քանի օգտահաշիվ է փակվել Panorama.am-ը զրուցել է տեղեկատվական անվտանգության մասնագետ Սամվել Մարտիրոսյանի հետ։

Մասնագետի խոսքով ՝ Մոնթ Մելքոնյանի ծննդյան օրը կամ առհասարակ մեր ազգային հերոսի անվան կամ լուսանկարով գրառումների համար  բավականին շատ օգտահաշիվներ են փակվում։ Ստույգ տվյալներ չկան,թե քանի հաշիվ է փակվել, քանի որ արգելափակումը կարող է լինել նույնիսկ մեկ կամ մի քանի ամիս անց։

«Դժվար է ասել,թե քանի օգտահաշիվ է արգելափակվում։ Մարդը կարող է գրառում կատարել, բայց արգելափակվի երկու ամիս հետո։ Լինում են դեպքեր, երբ արգելափակվում են 5 տարի առաջ արված գրառման պատճառով։ Այն մարդիկ, որոնք այսօր կամ երեկ են գրառում արել Մոնթե Մելքոնյանի մասին, հնարավոր է  ավելի ուշ արգելափակվեն, հնարավոր է նույնիսկ արգելափակում չլինի»,- ասաց Մարտիրոսյանը։

Այս խնդիրը լուծում չի ստանում։ Լուծման ճանապարհը՝ դիվանագիտական հարթակն է։ Հայաստանի իշխանությունները պետք է «Ֆեյսբուք»-ի հետ բանակցությունների միջոցով խնդրին լուծում տան։ Սակայն,արդեն մի քանի տարի է, սայլը տեղից չի շարժվում, հետևապես՝ ակնհայտ է, որ բանակցություններն անօգուտ են անցնում։

«Իմ տեղեկություններով՝ ԱԳՆ-ն որոշ բանակցություններ վարում է, բայց լուծում երբ կլինի կամ ընդհանրապես կլինի,թե՝ ոչ, դժվար է ասել։ Չի բացառվում, որ «Ֆեյսբուք»-ը  ոչ մի լուծում էլ չտա։ Սա օդում կախված հարց է։ Նրանք այդ թեմայով ունեն սկզբունքային մոտեցում։ Գիտեք, արգելափակում են, քանի որ Մոնթեն կապ է ունեցել ԱՍԱԼԱ-ի հետ, իսկ ԱՍԱԼԱ-ն ԱՄՆ-ում պաշտոնապես ճանաչված է որպես ահաբեկչական կազմակերպություն։ Այս հիմքով էլ «Ֆեյսբուք»-ն արգելափակում է հաշիվները։ Հետևաբար, հնարավոր է,որ  այս հարցը հնարավոր է ամբողջական լուծում այդպես էլ չստանա»,- եզրափակեց տեղեկատվական անվտանգության մասնագետը։

Ի դեպ, թեև Panorama.am-ը լրատվամիջոց է,սակայն երեկ  Panorama.am-ի ֆեյսբուքյան էջն էլ ազգային հերոսի անունը հիշատակելու համար հայտնվել է վտանգի ներքո. ֆեյսբուքը սահմանափակել է նյութերի տարածումը, նվազեցրել դրանց հասանելիությունը։

Չհամաձայնելով որոշման հետ՝ Panorama.am-ը դիմել է ֆեյսբուքին.

«Panorama.am-ը  լրատվամիջոց է. Այն ֆեյսբուքյան հարթակում լուրեր է տարածում։ Եթե ինչ-ինչ բաներ սոցցանցին դուր չեն գալիս, թող նախօրոք կամ հրապարակի այն ցանկը, որոնց մասին չի կարելի գրել՝ այդպիսով ոտնաձգություն անելով խոսքի ազատության դեմ, կամ նկատի ունենա, որ լուրերում կարող են հանդիպել բառեր, որոնք, չգիտես ինչու ֆեյսբուքի սրտով չեն, թեև ոչ բռնություն են քարոզում, ոչ էլ այլ ոչ իրավական բան»։

ՀՀ նախկին ՄԻՊ, «Թաթոյան» հիմնադրամի տնօրեն Արման Թաթոյանը գրում է. «Սյունիքի մարզի Գորիսի Շուռնուխ գյուղի դպրոցի անմիջապես դիմաց ադրբեջանական անօրինական զինված տեղակայում է, որտեղ մեծ տառերով գրված է «Önce vatan»:
«Önce vatan»-ը թուրքական ազգայնամոլական (ընդ որում, ագրեսիվ) հիմնարար լոզունգներից է, որ ստեղծվել է Աթաթուրքի իշխանության շրջանում` 1930-ական թթ. և նշանակում է «Առաջ հայրենիք» կամ «Նախևառաջ հայրենիք»:
Այս լոզունգն անմիջականորեն կապված է պանթյուրքիզմի հետ: Այն հնարավոր չի համարում Թուրքիայում ապրող ոչ թուրք էթնիկ խմբերի կամ ազգերի ներկայացուցիչների հավասարությունը թուրքերի հետ, քանի որ ըստ թուրքական ազգայնամոլության` հայրենիքին հավասար կարևորվում է նաև ազգի՝ էթնիկապես թուրք միատարր ազգի ստեղծման գաղափարը: Ընդ որում, այս ազգայնամոլությունը հիմնվում էր երիտթուրքերի գաղափարաբանության՝ պանթյուրքիզմի վրա և ըստ էության դրա շարունակությունն էր:
Շուռնուխի դպրոցի` երեխաների անմիջապես տեղակայված այս ադրբեջանական դիրքում մշտապես հերթապահում են ծառայողներ, որոնք զինված հետևում են դպրոցին, երեխաներին: Այս զինված դիրքն ունի նաև տեսախցիկներ, որոնք նույնպես հետևում են մարդկանց տեղաշարժին, ապօրինաբար հավաքում են անձնական տվյալներ:
Այս փաստերը հայտնաբերեցինք Գարօ Ղազարեանի (Garo Ghazarian) և Գառնիկ Քերքոնեանի (Karnig Kerkonian) հետ միասին Սյունիք մեր հանատեղ այցի ընցացքում: Այնուհետև, ուսումնասիրությունններն իրականացրել է Իրավունքի և արդարության կենտրոն «Թաթոյան» հիմնադրամ/ “Tatoyan” foundation:
Հիմա հարց`
Ի՞նչ գործ ունի այս ազգայնամոլական լոզունգը, առավել ևս ադրբեջանական անօրինական զինված տեղակայումը Շուռնուխի դպրոցի անմիջապես դիմաց:
Պարզ է, որ թիրախավորում են անգամ երեխաների, փորձում են ահաբեկել ու ճնշում գործադրել մեր երեխաների նկատմամբ: Այն հատուկ արված է մեծ տառերով ու այնպես, որ երևում է երեխաներին:
Ակնհայտ է, որ սա արվել է խաղաղ բնակչությանը ագրեսիվություն ցուցադրելու համար:
Այս ամենը ևս մեկ անգամ նշանակում է, որ ադրբեջանական զինված տեղակայումները ոչ միայն լրջորեն վտանգում են մարդկանց ֆիզիկական անվտանգությունն ու կյանքը, այլ նպատակային արարքներով ամեն ինչ անում են, որ մարդկանց, անգամ երեխաներին պատճառեն հոգեկան զրկանքներ, նրանց պահեն անհանգստության ու լարվածության մեջ:
Ադրբեջանական զինված տեղակայումները պետք է հեռացվեն ոչ միայն ՀՀ ներխուժած տարածքներից, այլ նաև ՀՀ գյուղերի մոտից ու համայնքների միջև ճանապարհներից. պետք է լինի ապառազմականացված անվտանգության գոտի, որպեսզի վերականգնվի մարդկանց բնականոն կյանքը»:

ՀՀ ԱԺ նախագահը հայտարարություն է տարածել ԱԺ «Հայաստան» խմբակցության պատգամավոր Արամ Վարդևանյանի հրաժարականի դիմումի մասին.

«Ազգային ժողովի կանոնակարգ» սահմանադրական օրենքի 155-րդ հոդվածի 1-ին մասի համաձայն` Հայաստանի Հանրապետության Ազգային ժողովի պատգամավոր Արամ Վարդևանյանը 2022 թվականի նոյեմբերի 25-ին հրաժարականի դիմում է ներկայացրել:

«Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում եւ հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված»։ 

Արցախի Մարդու իրավունքների պաշտպան Գեղամ Ստեփանյանն ահազանգում է շահումով խաղերից և ինտերնետ շահումով խաղերից կախվածության, դրա հետևանքով ընտանիքների կործանմա մասին.

«Կարևոր թեմա, որին պետք է անդրադառնանք յուրաքանչյուրս, այն պահանջում է հանրային առավել մեծ ուշադրություն և համատեղված ջանքեր։

Թեև պատերազմից առաջ էլ արցախյան հասարակության մեջ բավականին տարածված էր շահումով խաղերից և ինտերնետ շահումով խաղերից կախվածությունը, և մեր շրջապատում մշտապես տեսնում էինք մարդկանց ու ընտանիքներ, որոնք ուղղակի մեր աչքի առաջ կործանվում էին, այնուամենայնիվ պատերազմից հետո պատկերն իրապես աղետալի է, ինչը միանշանակ կապված է նաև հասարակության ընդհանուր սոցիալ֊հոգեբանական խոցելի իրավիճակով։

Խաղամոլությամբ տառապող մարդիկ սոցիալ֊հոգեբանական անկայուն իրավիճակում հայտնում են վաշխառուների ձեռքում, որոնք մեծ տոկոսներով գումարներ են առաջարկում՝ վերջնականապես անդունդը գլորելով օգնության կարիք ունեցող անձին։

Քայքայվում են ընտանիքներ, խեղվում են այդ ընտանիքներում մեծացող երեխաների ճակատագրերը, որոնք լիարժեք ու համերաշխ ընտանիքում ապրելու իրավունք ունեն։ Եվ ի վերջո թուլանում է հասարակությունը։

Ընդորում այս կախվածության զոհ են դառնում ոչ միայն չափահասները, այլև հասարակության անչափահաս անդամները՝ վաղ տարիքում խրվելով պարտքերի մեջ ու հայտնվելով անելանելի իրավիճակում։ Նման իրավիճակներն էլ հոգեբանորեն անկայուն մարդուն դրդում են ամենատարբեր աղետալի գործողությունների։

Ցավալիորեն պետք է արձանագրենք, որ եթե նախկինում ազարտային, շահումով խաղերի նկատմամբ կախվածություն ունեին հիմնականում հասարակության արական սեռի ներկայացուցիչները, ապա այսօր այն տարածվում է նաև կանանց շրջանում։

Հաղթելու և հաջողության մեկ֊երկու օրինակներն էլ այնպիսիս արագությամբ են տարածվում արցախյան փոքր հասարակության շրջանում, որ գայթակղում և օրեցօր ծուղակն են գցում ավելի ու ավելի շատ մարդկանց։

Ինքնին պարզ է, որ ինտերնետ շահումով խաղերի կայքերի արգելափակումը միայն հարցի լուծում չէ՝ հաշվի առնելով նորագույն տեխնոլոգիաների ընձեռած հնարավորությունները։ Խնդիրը նման մեկ քայլանոց և մակերեսային լուծում չունի։

Այս մարտահրավերի դեմ պայքարի համապարփակ քայլեր են պետք՝ պետական մարմինների, հասարակական կազմակերպությունների, լրատվամիջոցների, հանրային ազդեցություն ունեցող անձանց, բժիշկների, հոգեբան֊մասնագետների ուժերի համատեղմամբ։

Պետք է ակտիվորեն խոսել այս բացասական երևույթի մասին՝ այն հասցեագրելով որպես հիվանդություն, և այդ հիվանդության բուժման ուղղությամբ իրականացնել թիրախային քայլեր։ Խաղամոլությունը, այո, հիվանդություն է, և այն հնարավոր է բուժել մասնագետի աջակցությամբ։

Պետք է խոսել շատ՝ օգտագործելով հանրային բոլոր հնարավորություններն ու հարթակները, ներգրավել հանրային խոսքի ազդեցություն ունեցող անձանց և դերակատարներին։ Պետք է խոսել դպրոցներում, համալսարաններում, կոլեկտիվներում և ամենուր։

Հոգեբան մասնագետների ակտիվ մասնակցությամբ ձևավորել հարթակ, որտեղ խաղամոլությամբ տառապող մարդիկ խորհրդապահական պայմաններում կարողանան հոգեբանական աջակցություն ստանալ։

Կազմակերպել հանրային միջոցառումներ՝ ցույց տալով խաղամոլության կործանարար հետևանքները և բացառել գովազդը։

Մեխանիզմներ ներդնել, որոնք օրինական ճանապարհով կզսպեն մարդկանց ներգրավվածությունը։

Մենք՝ որպես հասարակություն, պետք է օգնենք մարդկանց դուրս գալու այդ աղետալի շրջանից, որից տուժում է ինչպես անձն անհատապես, այնպես էլ հասարակությունն ընդհանուր առմամբ»։

Ամեն անգամ, երբ հայ-ադրբեջանական կամ արցախա-ադրբեջանական սահմանին լարվածություն, բախումներ կամ պատերազմ է սկսվում, սոցցանցերում ակտիվանում են ակնհայտորեն Ադրբեջանից ուղղորդվող կեղծ էջերը` փորձելով ոչ միայն մոլորեցնել հայերին, այլև թշնամություն հրահրել ՀՀ-ի հարևանների կամ դաշնակիցների միջև:

Այսպես, սեպտեմբերի 13-ից Հայաստանի և Ադրբեջանի միջև վերսկսված պատերազմի օրերին տեղեկություն տարածվեց, որ Վերին Շորժայում ադրբեջանցիները կրակել են ռուսական զորակազմի վրա` վնասելով մեքենաներ:

Տեղեկությունը որևէ պաշտոնական մեկնաբանության չարժանացավ, սակայն կայծակնային արագությամբ այն տարածվեց հայկական մեդիադաշտում` հղում անելով մեծ լսարան ունեցող թելեգրամյան որոշ ալիքներին:

Առիթից փորձեցին օգտվել ադրբեջանցիները. ակնհայտորեն ադրբեջանցիների կողմից ղեկավարվող թելեգրամյան կեղծ «Семён Пегов» էջը, որն ունի մոտ 18 հազար բաժանորդ, և հաճախ այդ ալիքի հրապարակումները մեծ տարածում են գտնում` հատկապես ռուսների շրջանում, հրապարակել է ռուսական վնասված մեքենաների լուսանկարները` գրելով, որ իբր հայերն են Արցախում կրակել ռուս խաղաղապահների վրա:

Ռուս ռազմական թղթակից Սեմյոն Պեգովը, ում պատկանում է թելեգրամյան WarGonzo ալիքը (մոտ 1 մլն-ից ավել բաժանորդ), բազմիցս` նաև վերջերս, հայտնել է, որ իր անունով բացված այդ էջը կեղծ է, իրեն չի պատկանում:

Հայաստանի Հանրապետության վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ը, որն առավել հայտնի է «ֆեյքերի ՊՈԱԿ» անվամբ, հատկապես ռազմական գործողությունների օրերին, երբ հայ հանրության շրջանում սխալ ինֆորմացիան կայծակնային արագությամբ է տարածվում` կապված մեդիագրագիտության պակասի, պաշտոնական ինֆորմացիայի սղության և բոլորից շուտ սենսացիոն տեղեկություն իմանալու և այլոց փոխանցելու ցանկության հետ, այս օրերին, փոխանակ զբաղվի հանրության շրջանում նմանատիպ կեղծ ինֆորմացիաները ճշտելով, հաստատելով կամ հերքելով, զբաղված է ֆեյքերին ուղղորդելով ընդդիմության ներկայացուցիչների կամ այս իշխանությանը քննադատողների դեմ` պաշտպանելով և  գովերգելով Հայաստանն ու Արցախը կործանման տանող պատուհաս այս իշխանություններին:

Aysor.am-ը գրում է․

Ադրբեջանական տելեգրամյան ալիքներից մեկում հայտնված տեսանյութից հարազատները ճանաչել էին ժամկետային զինծառայող, 2002թ․-ին ծնված Դավիթ Գիշյանին։ Տեսանյութից պարզ էր դարձել, որ վերջինս վիրավորում է ստացել ուսի շրջանում և հայտնվել գերության մեջ։

Երեկ, սակայն, հայտնի դարձավ, որ Դավիթ Գիշյանը սպանվել է։

Aysor.am-ի հարցմանն ի պատասխան՝ Միջազգային իրավական հարցերով ՀՀ ներկայացուցչության մամուլի խոսնակ Հասմիկ Սամվելյանը հայտնեց, որ Դավիթ Գիշյանը, փաստացի, սպանվել է գերության մեջ։

«Այսօր տեղեկացրել ենք Եվրոպական դատարան, որ Ադրբեջանը կոպտորեն խախտել է Մարդու իրավունքների Եվրոպական կոնվենցիայի 2-րդ հոդվածը։ Դիմել ենք նաև 3-րդ հոդվածով, որը պաշտպանում է անձին խոշտանգումներից ու նվաստացուցիչ վերաբերմունքից։

Պահանջում ենք Ադրբեջանի նկատմամբ արագ կիրառել հրատապ միջոց, ոչ թե ժամանակ խնդրել պատասխանի համար»,-հայտնեց Հասմիկ Սամվելյանը։

Նշենք նաև, որ այս նույն տեղեկությունը ուղարկվելու է ՄԱԿ-ի Արդարադատության միջազգային դատարան։

Հիշեցնենք՝ սեպտեմբերի 17-ին Ադրբեջանը Հայաստանին է հանձնել 32 հայ զինծառայողի մարմին, որոնց թվում էր նաև Գիշյանը։

Երեւանում արգելվում է պիրոտեխնիկական արտադրատեսակների կիրառումը ցանկացած տիպի շենքերում, պայթյունավտանգ օբյեկտների տարածքներում,  տանիքների, պատշգամբների, բեմերի վրա, ինչպես նաեւ ցույցերի եւ երթերի ժամանակ: Համապատասխան որոշումը նոյեմբերի 22-ին ընդունվել է Երեւանի ավագանու նիստում։

Պիրոտեխնիկական արտադրանքի կիրառման վայրերում չպետք է լինեն ծառեր, էլեկտրահաղորդման գծեր եւ այլ խոչընդոտներ: Երեւանում տեխնիկական եւ հատուկ նշանակության պիրոտեխնիկական արտադրատեսակների կիրառումն իրականացվելու է իրավաբանական անձանց եւ անհատ ձեռնարկատերերի կողմից, որոնք ստացել են քաղաքապետի համապատասխան թույլտվությունը: 

Պիրոտեխնիկական արտադրանքի կիրառումը թույլատրվում է Հանրապետության հրապարակում, Ազատության հրապարակում եւ հարակից տարածքներում տոնական օրերին կամ այլ հատուկ միջոցառումներ, օրինակ՝ Եվրատեսիլի ժամանակ։

Երեւանի փոխքաղաքապետ, նախկին փոխվարչապետ Տիգրան Ավինյանը պարզաբանեց, որ ֆիզիկական անձանց արգելվում է հրավառություն իրականացնելը։

Նա տեղեկացրեց, որ իշխանությունը նախաձեռնել է օրենսդրական փոփոխություններ, որոնցով պիրոտեխնիկական արտադրանքի ներմուծումը կարող են իրականացնել բացառապես լիցենզավորված ընկերությունները:

Երեւանի փոխքաղաքապետ Սուրեն Գրիգորյանը պարզաբանեց, որ պիրոտեխնիկական արտադրատեսակների կիրառումն առանց թույլտվության առաջին անգամ կպատժվի 300 հազար դրամից մինչեւ 1 մլն դրամ տուգանքով (750 դոլարից մինչեւ 2500 դոլար-խմբ.): Մեկ տարվա ընթացքում կրկնակի խախտման դեպքում տուգանքի չափը կկազմի 1,3 մլն դրամից մինչեւ 2 մլն դրամ (3200 դոլարից մինչեւ 5000 դոլար-խմբ.):

Ես խոսել եմ իր որդու հետ, Աշոտի, իր բառերից ելնելով՝ հասկացվեց, որ Աննային թվում է, թե ինքն իրավասու է առանց ինձ հարցնելու իմ ընտանիքի նկարները տեղադրի ու ինչ-որ անիմաստ աբսուրդ տեքստ գրի: Այս մասին լրագրողների հետ զրույցում ասաց 44-օրյա պատերազմում նահատակված Արման Ազատյանի հայրը՝ Վիգեն Ազատյանը՝ անդրադառնալով վարչապետ Նիկոլ Փաշինյանի տիկնոջ՝ Աննա Հակոբյանի ֆեյսբուքյան էջում իր ընտանիքի անդամների լուսանկարի հրապարակմանն ու կից արված գրառմանը:

«Ես իր բառերն եմ ասում. «ես ոչ մի վատ բան չեմ գրել, ես մեծարում եմ քո որդուն», իմ պատասխանը հետևյալն էր. «դու իրավունք չունես ոչ մեծարելու, մանավանդ՝ ոչ էլ պախարակելու»,- ասաց զոհվածի հայրը:

Նա նշեց, որ պատրաստվում է որոշ քայլեր իրականացնել, սակայն ավելին չմանրամասնեց:

Նշենք, որ վարչապետի տիկին Աննա Հակոբյանը ֆեյսբուքյան իր էջում գրառում է կատարել, որին կից հրապարակել է 44-օրյա պատերազում զոհված հերոս Արման Ազատյանի, նրա մոր և այս տարվա հուլիսին ծնված Արման Ազատյան կրտսերի լուսանկարը:

Ավելի ուշ Արման Ազատյանի հայրը՝ Վիգեն Ազատյանը, 168.am-ի հետ զրույցում ասել էր. «Ինքը պետք է ներողություն խնդրի իմ ընտանիքից։ Ներողություն պետք է խնդրի բոլոր որդեկորույս ընտանիքներից, որոնք ուժ են գտել իրենց մեջ ունենալ զավակ, որպեսզի իրենց տան ծուխը ծխա»: