Արցախի Հանրապետության պետական նախարար Գուրգեն Ներսիսյանը հանդես է եկել ուղերձով և հայտարարությամբ:

Ինչպես հաղորդում է «Արցախպրես»-ը, Գուրգեն Ներսիսյանը, ֆեյսբուքի իր էջի ուղիղ եթերի միջոցով անդրադառնալով հունիսի 15-ին Արցախն արտաքին աշխարհի հետ կապող միակ ճանապարհի՝ Բաքվի կողմից ամբողջությամբ շրջափակմանը՝ նշել է, որ երեկվանից ամբողջությամբ դադարեցված են ինչպես ռուսական խաղաղապահ զորակազմի միջոցով հումանիտար բեռների փոխադրումը, այնպես էլ բուժառուներին պատշաճ բուժօգնություն ապահովելու նպատակով Կարմի Խաչի միջազգային կոմիտեի միջոցով ՀՀ բուժհաստատություններ տեղափոխելու գործընթացը: 

Այս հանգամանքը հաշվի առնելով, ըստ Ներսիսյանի, պետական ապարատն ամբողջությամբ անցել է խնայողության ռեժիմի, հանրային սպասարկումն ապահովող կազմակերպություններին տրվել են համապատասխան հանձնարարություններ, կիրառվում են սահմանափակումներ: 

«Նկատի ունենալով, որ իրավիճակը կտրուկ փոխվել է, գործող մոտեցումներում կատարել ենք նկատելի փոփոխություններ:

Մասնավորապես՝ պետական կառավարման համակարգի ղեկավար կազմին խնդրում եմ վառելիքի և նմանատիպ այլ հարցերի դեպքում դիմել միայն ծայրահեղ անհրաժեշտության պարագայում, դադարեցնել կամ նվազագույնի հասցնել ծառայողական մեքենաների օգտագործումը:

Տարածքային կառավարման ու տեղական ինքնակառավարման մարմինները կապահովվեն անհրաժեշտ պարագաներով բնակչության սննդի, հացի մատակարարման գործընթացը կազմակերպելու համար: 

Առողջապահության նախարարությանը կապահովենք անհետաձգելի բուժօգնությունը կազմակերպելու համար անհրաժեշտ պայմաններով:

Առավելագույն չափով փորձելու ենք աջակցել գյուղատնտեսական աշխատանքների ընթացքին, որպեսզի պահպանենք դրանց անընդհատությունը: Այդ գործընթացն իրականացվելու է գյուղնախարարի անմիջական ղեկավարմամբ ու համակարգմամբ: 

Կշարունակեն գործել հասարակական տրանսպորտն ու կկազմակերպվեն միջշրջանային երթուղիները»,- ասել է Արցախի պետնախարարը: 

Գուրգեն Ներսիսյանը դիմել է նաև հանրությանը՝ նշելով, որ խնդրում, հորդորում, ինչ-որ տեղ պահանջում է գործել առավելապես խնայողաբար: 

«Այս պահին դադարեցված է ֆիզիկական անձանց վառելիքի տրամադրման գործընթացը, խնդրում եմ ըմբռնումով մոտենալ, անընդհատ չկուտակվել լցակայաններում և նման հարցերով դիմել ՏԻՄ մարմիններին՝ միայն ծայրահեղ անհրաժեշտության դեպքում:  

Նրանք, ովքեր ստացել էին վառելիք գնելու համար սահմանված կտրոն, առայժմ չեն կարող օգտվել դրանից: Իսկ ծայրահեղ անհրաժեշտության դեպքում պետք է դիմեն Արցախի կառավարության Վերահսկողական ծառայությանը՝ թույլտվություն ստանալու համար: 

Ավելորդ կամ անհիմն միջնորդություններով խնդրում եմ չծանրաբեռնել պետական մարմիններին: 

Տնտեսվարող սուբյեկտներին խնդրում եմ պատասխանատվությամբ վերաբերվել խանութներում մնացորդ ապրանքների իրացումն իրականացնելիս, և այն կազմակերպել ունեցած հնարավորությունների գնահատման ու հավասարաչափ բաշխման սկզբունքով: 

Այս ամենը չեմ ներկայացնում խուճապի մատնվելու համար, հատկապես վերջին շրջանում մենք համբերատար պատրաստվել ենք այսպիսի իրավիճակների: Մեր գյուղացիական տնտեսություններն ունակ են որոշակիորեն մեղմելու ստեղծված խնդիրները և ապահովելու ինքանաբավության թեկուզ նվազ հնարավորություն, բայց բոլոր դեպքերում պետք է լինել կազմակերպված, հավասարակշռված և զգոն»,- նշել է Արցախի պետնախարարը՝ եզրափակելով, որ իրավիճակի հետագա զարգացումների ու փոփոխությունների մասին կտրամադրվեն հավելյալ տեղեկություններ:

Հունիսի 15-ին Արցախ-Հայաստան սահմանագծին՝ Հակարիի կամրջի մոտ տեղի ունեցած ադրբեջանական սադրանքի պատճառով Քաշաթաղի (Լաչինի) միջանցքում ապօրինի գործող ադրբեջանական անցակետում երեկվանից արգելվել է, ի թիվս բոլոր հումանիտար փոխադրումների, Կարմիր խաչի միջազգային կոմիտեի կողմից արցախցի բուժառուների երկկողմանի տեղաշարժը, ինչի հետևանքով այս երկու օրվա ընթացքում հնարավոր չէ եղել կազմակերպել նախատեսված 102 անձի տեղափոխություն (52-ը՝ Արցախից Հայաստան, 50-ը՝ Հայաստանից Արցախ): Այս մասին հայտնում են Արցախի Հանրապետության առողջապահության նախարարությունից։ 

«Ինչպես արդեն տեղեկացրել ենք, երեկ առավոտյան ԿԽՄԿ մեքենաները 25 բուժառուի և նրանց հարազատների տեղափոխում էին Հայաստան, սակայն Քաշաթաղի միջանցքում գործող ապօրինի անցակետում ադրբեջանական կողմն արգելել է նրանց հետագա տեղաշարժը, ինչի հետևանքով մեքենաները վերադարձել են Ստեփանակերտ՝ միևնույն ժամանակ չկարողանալով կազմակերպել Գորիսից Ստեփանակերտ ևս 25 բուժառուների ու հարազատների վերադարձն Արցախ:

Այսօր նախատեսված էր նաև 27 բուժառուների և նրանց հարազատների տեղափոխումը ՀՀ մասնագիտական բժշկական կենտրոններ՝  անհապաղ բուժօգնություն ստանալու համար, ինչպես նաև 25 բուժառուների և նրանց հարազատների հետվերադարձը դեպի Արցախ:

Բոլոր հումանիտար բեռնափոխադրումների խափանման պայմաններում, բնականաբար, լրիվությամբ դադարել են նաև դեղորայքի ու բժշկական այլ պարագաների սահմանափակ մատակարարումները դեպի Արցախ, որոնք իրականացվում էին բացառապես Կարմիր խաչի կողմից: Արդյունքում, օրեցօր կրճատվում են բուժհաստատություններում առկա առանց այն էլ սուղ պաշարները՝ լրացուցիչ ռիսկի տակ դնելով քաղաքացիների պատշաճ բուժսպասարկումը»,- հայտնում են ԱՀ առողջապահության նախարարությունից։ 

Հայաստանիի զինանշանն արտացոլում է այն ամենը, ինչով հպարտանում է հայ ժողովուրդը՝ պատմություն, կրոն, պայքարելու եւ հաղթելու ունակություն։ Այս մասին Ազգային ժողովում, ավանդական ճեպազրույցի ժամանակ, հունիսի 16-ին ասել է Հայաստանի Հանրապետական կուսակցության անդամ, պատգամավոր Հայկ Մամիջանյանը՝ մեկնաբանելով վարչապետի այն հայտարարությունը, թե զինանշանը չի արտացոլում ժամանակակից Հայաստանի էությունը։

Նա ենթադրել է, որ այդ ելույթի նպատակը Հայաստանի Հանրապետության նոր զինանշանի ստեղծման մտադրության մասին հայտարարելն էր։ Նա այնուհետեւ առաջարկել է պատկերացնել, թե ինչպիսին պետք է լինի նոր զինանշանը, որպեսզի հարմար լինի Փաշինյանին։

Կարծում եմ, այնտեղ լինելու է «լայք» նշանը, սամոգոնի շիշ։ Մի քանի տարի առաջ ես կառավարության շենք բերեցի հաբեր։ Գուցե դա էլ պատկերեն։ Հետո վերեւում մեծ տառերով կգրվի «հողատու», իսկ ներքեւում՝ «կհանձնենք, որ ապրենք»։ Եվ իհարկե, նրանց կառավարման խորհրդանիշը՝ մեծ բանան»,- ասել է պատգամավորը։

Մամիջանյանը նաեւ ենթադրել է, որ հաջորդ փուլում Փաշինյանի գլխում «կփայլատակի» միտքը, թե արդյոք պետք են խաչերը եկեղեցիների վրա։

«Այս ամենն արվում է հանրության ուշադրությունը երկրի ներսում խնդիրներից շեղելու համար»,- ընդգծել է քաղաքական գործիչը։

Ազգային ժողովի նախագահ Ալեն Սիմոնյանը 2022 թվականի ընթացքում բնակարան է ձեռք բերել Երևանի Արշակունյաց պողոտայում կառուցվող «Բյուրեղ» բնակելի թաղամասում։ Այս մասին տեղեկանում ենք Ալեն Սիմոնյանի 2022 թվականի գույքի և եկամուտների տարեկան հայտարարագրից։ Այս մասին գրում է «Հետք»-ը։ 

Հիշեցնենք՝ «Բյուրեղ» բնակելի թաղամասը կառուցում է ՀՀԿ-ական նախկին պատգամավոր Աշոտ Արսենյանին պատկանող «Ջերմուկ Գրուպ» ՓԲԸ-ն։ Արսենյանն այժմ սերտ կապեր ունի իշխանության ներկայացուցիչների հետ։ Նրա որդին՝ Վահագն Արսենյանը, իշխող «Քաղաքացիական պայմանագիր» կուսակցության ցուցակով 2021թ․ դարձել է Ջերմուկի համայնքապետ։

Ինչպես նշված է ԱԺ նախագահ Ալեն Սիմոնյանի հայտարարագրում, նա 2022 թվականի ընթացքում «Ջերմուկ Գրուպ» ՓԲԸ-ին փոխառության է հանձնել 53 մլն 920 հազար դրամ, որն էլ կարելի է ասել՝ բնակարանի ձեռքբերման գործարքի արժեքն է։ Բնակարանի գնման համար Ալեն Սիմոնյանն ու իր կինը՝ Մարիամ Մարգարյանը, հիփոթեքային վարկ են վերցրել ՔՊ-ական գործարար պատգամավոր Խաչատուր Սուքիասյանի ընտանիքին պատկանող «Հայէկոնոմբանկից», վարկի գումարը կազմել է 48 մլն 325 հազար դրամ։ Գումարը հայտարարագրվել է որպես հաշվետու տարում ստացած եկամուտ։

2022 թվականի եկամուտներում Ալեն Սիմոնյանը հայտարարագրել է նաև 7 միլիոն դրամ՝ ստացված Անա Գեորգիից՝ որպես վարձակալության դիմաց ստացված վճար։ Ալեն Սիմոնյանը՝ որպես Ազգային ժողովի նախագահ, նախորդ տարի ստացել է 14 մլն 406 հազար դրամ աշխատավարձ։ Եկամուտների բաժնում ԱԺ նախագահը նշել է նաև «Այլընտրանք» ՀԿ համանախագահ Նարեկ Մանթաշյանից ստացված 374 հազար դրամը։ Դա այն գումարն է, որը դատարանը պարտավորեցրել է Մանթաշյանին փոխհատուցել Սիմոնյանին վիրավորելու և զրպարտելու համար։

Դրամական միջոցների բաժնում Ալեն Սիմոնյանը հայտարարագրել է իր բանկային հաշիվներին առկա 585 հազար դրամն ու 705 ԱՄՆ դոլարը։ Իսկ որպես կանխիկ դրամական միջոց՝ ԱԺ նախագահը հայտարարագրել է 24 մլն 65 հազար դրամ։

Որպես անշարժ գույք Ալեն Սիմոնյանը հայտարարագրել է Երևանի Կենտրոնում գտնվող, միանձնյա սեփականության իրավունքով իրեն պատկանող բնակարանը՝ ձեռք բերված 2019 թվականին։ ԱԺ նախագահը տրանսպորտային միջոցներ չի հայտարարագրել։

Ալեն Սիմոնյանի կինը՝ Մարիամ Մարգարյանը, իր հայտարարագրում նշել է 2014 թվականին ձեռք բերված բնակարանը Երևանի կենտրոնում, իսկ որպես տրանսպորտային միջոց՝ 2021 թվականի արտադրության Land Rover-ը՝ գնված 2021 թվականին։

Ինչպես արդեն նշեցինք, Ալեն Սիմոնյանն ու Մարիամ Մարգարյանը «Բյուրեղ» բնակելի թաղամասում բնակարան ձեռք բերելու համար «Հայէկոնոմբանկից» 48 մլն դրամ վարկ են վերցրել։ Այլ եկամուտներից ԱԺ նախագահի կինը նշել է 159 դոլար «Հայէկոնոմբանկից»՝ որպես տոկոս կամ այլ հատուցում, վարկ «Ամերիաբանկից»՝ 726 հազար դրամ, ինչպես նաև աշխատանքի վարձատրություն «Ֆրի Նյուզ» ՍՊԸ-ից՝ 11 մլն 285 հազար դրամի չափով և «Էֆէմէֆ Գրուպ» ՍՊԸ-ից՝ 8 մլն դրամի չափով։ «Ֆրի Նյուզ» ՍՊԸ-ում, որը ներկայացնում է նույնանուն լրատվամիջոցը, Մարիամ Մարգարյանը զբաղեցնում է տնօրենի պաշտոնը, իսկ «Էֆէմէֆ Գրուպում» նա, բացի տնօրեն լինելուց, նաև 100 տոկոս բաժնեմասի սեփականատերն է։ Այդ ընկերությունը, ըստ ՊԵԿ-ի տվյալների, զբաղվում է տեսաֆիլմերի և հեռուստատեսային ծրագրերի պատրաստմամբ։

Որպես անկանխիկ գումար Մարիամ Մարգարյանը տարեսկզբին նշել է 159 դոլար և 36 հազար դրամ, որոնք տարեվերջին այլևս չեն եղել, իսկ կանխիկ դրամով ԱԺ նախագահի կինը հայտարարագրել է 2100 դոլար և 2,5 միլիոն դրամ։

Հավելենք՝ Ալեն Սիմոնյանը իշխանության ներկայացուցիչներից միակը չէ, որը բնակարան է գնում «Բյուրեղ» բնակելի թաղամասում։ Ավելի վաղ, «Հետքը» գրել էր, որ այդ թաղամասում շուկայականից մի քանի անգամ ցածր գնով բնակարան էր գնել պաշտպանության նախարար Սուրեն Պապիկյանը։

«Բյուրեղ» թաղամասում բնակարան են գնել նաև վարչապետի աշխատակազմի ղեկավար Արայիկ Հարությունյանը, ԱՄՆ-ում Հայաստանի դեսպան Լիլիթ Մակունցը։ Այս տվյալները երևում են նրանց հայտարարագրերում։ Նշված բոլոր դեպքերում այս պաշտոնյաներին վարկավորել է Խաչատուր Սուքիասյանի «Հայէկոնոմբանկը»։

Միացյալ Նահանգները կոչ է անում Հայաստանում գտնվող իր քաղաքացիներին զգուշանալ ՀՀ սահմանային որոշ վայրեր այցելելուց։ Այս մասին դեսպանատունը ՀՀ-ում գտնվող ԱՄՆ քաղաքացիներին անվտանգային հերթական նախազգուշացումն է արել:

ԱՄՆ քաղաքացիների համար նախատեսված հաղորդագրությունում մասնավորապես ասվում է․

«Հայաստանում ամառային ճանապարհորդությունների սեզոնով պայմանավորված Երևանում ԱՄՆ դեսպանատունն ԱՄՆ քաղաքացիներին հիշեցնում է, որ Հայաստանի և Ադրբեջանի միջև շարունակվող հակամարտության պատճառով ԱՄՆ դեսպանատան աշխատակիցներին և նրանց ընտանիքներին արգելվում են անկարևոր ճանապարհորդությունները հետևյալ ուղղություններով, ինչն արտացոլում է մի փոքր մեղմացում, քանի որ սահմանափակումները սկսել են կիրառվել 2022 թվականի սեպտեմբեր ամսից»։

Դեսպանատան տարածած հաղորդագրության մեջ ներառված վայրերն են՝

• Տավուշի մարզի Վարագավանից արևելք՝ Հ37 ավտոճանապարհը,
• Տավուշի մարզի Նավուր գյուղից արևելք՝ Հ36 ավտոճանապարհը,
• Գեղարքունիքի մարզում Վարդենիսից արևելք,
• Արարատի մարզի Երասխ գյուղով երթևեկությունը թույլատրվում է, կանգառը՝ ոչ.
• Ճանապարհորդությունը դեպի Ջերմուկ, Վայոց ձորի մարզի Գետիկի կողքով Հ42 և Հ43 ճանապարհներով:
• Սյունիքի մարզ։
• Ճանապարհորդությունը դեպի Լեռնային Ղարաբաղ շարունակում է արգելված մնալ։

Դեսպանատունն իր քաղաքացիներին հորդորում է շարունակել զգուշանալ Հայաստանի և Ադրբեջանի միջև բոլոր միջազգային սահմաններից և խուսափել Լեռնային Ղարաբաղի հակամարտության գոտի և շփման գծի մերձակայք ճանապարհորդություններից։

«ԱՄՆ կառավարությունը չի կարող շտապօգնության ծառայություններ տրամադրել ԱՄՆ քաղաքացիներին Լեռնային Ղարաբաղում և նրա շրջակայքում, քանի որ մուտքն արգելված է»,-ասված է զգուշացման մեջ։

ԱՄՆ դիվանագիտական առաքելությունը հորդորում է ՝

• Գրանցվել Smart Traveler Enrollment Program-ում (STEP)՝ անվտանգության թարմացումներ ստանալու համար,
• Հետևել տեղական լրատվամիջոցներին թարմացումների համար,
• Խուսափել մարդաշատ վայրերից,
• Խուսափել ցույցերից,
• Տեղեկացրեք ընկերներին և ընտանիքին ձեր անվտանգության մասին,
• Զգոն եղեք շրջապատում,
• Զգույշ եղեք գիշերը քայլելիս կամ վարելիս:

Ոստիկանության կենտրոնական բաժնում փաստաբան Կարեն Ալավերդյանի նկատմամբ ոստիկանների կողմից ոչ միայն բռնություն է կիրառվել, այլ նաեւ ձերբակալվել է: Այս մասին այսօր՝ հունիսի 13-ին, լրագրողների հետ հանդիպմանն ասաց ինքը՝ Կարեն Ալավերդյանը:

Նա պատմեց, որ հունիսի 7-ին՝ ժամը 16:00-ին, ինքն իր պաշտպանյալի հետ Երեւան քաղաքի ընդհանուր իրավասության դատարանի Կենտրոն նստավայրում մասնակցել են քրեական գործով նշանակված դատական նիստի, որի ընթացքում պաշտպանյալի եւ նրա ընկերոջ միջեւ ընկերական նեղվածության հարցերի շուրջ առաջացել է խոսակցություն, որը, փաստաբանի գնահատմամբ, չի կարող պարունակել հանցակազմի հատկանիշներ.

«Դատական նիստը հետաձգվել է վկաների՝ չներկայանալու պատճառով: Նիստից հետո ես ու պաշտպանյալս հանգիստ քայլում էինք դատարանի դիմացի մայթով, երբ մեզ են մոտեցել 20-30 ոստիկաններ եւ պարեկներ՝ տարբեր բաժիններից: Նրանք ցուցաբերելով ոչ արհեստավարժ մոտեցում՝ տեւական ժամանակ չէին կարողանում բացատրել իրենց մոտենալու նպատակը, թե այդ մեծաքանակ ծառայողներից ով կոնկրետ ինչ դատավարական գործողություն է պատրաստվում իրականացնել եւ այլն: Ի վերջո հասկացա, որ ոստիկանները պաշտպանյալիս հրավիրում են ոստիկանական բաժին: Ես պահանջել եմ նրան կողմից կատարվող գործողությունների փաստական եւ իրավական հիմքերը, եւ որ ծառայողի հետ ենք գործ ունենալու, սակայն այդ ամենը պարզել չի հաջողվել, այնուհետեւ պաշտպանյալս ցանկություն է հայտնել ներկայանալ ոստիկանական բաժանմունք, եւ խնդրել է, որ ես՝ որպես փաստաբան հետեւեմ իրեն՝ իրավաբանական աջակցություն ցուցաբերելու նպատակով: Նա առանց հարկադրանքի նստել է պարեկային ծառայողների ավտոմեքենան: Հատկանշական է, որ գործողությունն իրականացրել են պարեկներ, որոնց վրա ամրակցված են տեսախցիկներ, եւ այդ ամենը ֆիքսված պետք է լինի: 5 րոպե անց ներկայացել եմ ոստիկանական բաժին, նշել եմ այցիս նպատակը, ներկայացրել վկայականը եւ այլն»:

Փաստաբանի խոսքով՝ բաժնում 5-10 րոպե ամեն կերպ արհեստական խոչընդոտներ են ստեղծել՝ իր պաշտպանյալի մոտ բարձրանալու համար. «Համառ պայքարից հետո ինձ հաջողվեց բարձրանալ նրա մոտ: Դրսից լսեցի պաշտպանյալիս գոռոցները, եւ իրեն չհարվածելու պահանջները: Նախ ոստիկանության երկու ծառայողներ փորձեցին ինձ խոչընդոտել, որ բացեմ աշխատասենյակի դուռը: Ես հաղթահարելով նրան արգելքները՝ բացեցի դուռը եւ հայտնաբերեցի պաշտպանյալիս՝ գետնին ընկած, ձեռնաշղթաները հետեւից ամրացված եւ ոստիկանության 5-6 ծառայողներ միաժամանակ նրան հարվածներ էին հասցնում: Մոտեցել եմ պաշտպանյալիս, նրան բարձրացրել եմ գետնից, փորձել եմ արգելել, կանգնել եմ ձեռքերս նրա վրա պարզած: Նրանց հորդորել եմ պաշտպանյալիս հետ երկխոսության մեջ չմտնել, քանի որ նրանց մոտեցման եւ խոսակցության մակարդակը նման էր փողոցային ռազբորկայի: Իմ պահանջով ոստիկանները դուրս եկան սենյակից, որ մնա դատավարական գործունեություն իրականացնող ծառայողը»:

Ալավերդյանը պատմեց, որ կարճ ժամանակ անց բռնությունը կրկնվել է. «Ես մի պահ ծխախոտ եմ ծխել, շատ հանկարծակի ոստիկանության նշված ծառայողը սկսել է գոռալ պաշտպանյալիս վրա եւ անմիջապես նորից դուռը բացվել է, ու այդ նույն խումբը մուտք է գործել աշխատասենյակ՝ ինձ մի կողմ հեռացնելով: Ինձ աշխատասենյակից դուրս բերելուց հետո ագրեսիվ պահանջներ են ներկայացրել՝ ոստիկանական շենքը թողնելու: Ես առարկել եմ ամեն կերպ, փորձել եմ վերադառնալ պաշտպանյալիս մոտ, իմ նկատմամբ հանկարծակի կիրառվել է անհարկի ֆիզիկական ուժ: Իմ կողմից որեւէ հակաիրավական գործողություն չի կատարվել, որի հիմնավոր կասկածով իմ նկատմամբ ձերբակալում իրականացվեր: Առանց որեւէ հիմքի իմ նկատմամբ իրականացվել է անհարկի ֆիզիկական ուժի գործադրում, ձերբակալվել եմ, կիրառվել է ձեռնաշղթա եւ հատուկ միջոցներ: Ինձ ձերբակալման գործընթացի հետ կապվաշ թույլ են տրվել բոլոր հնարավոր խախտումները: Կար հիմնավոր կասկածի բացակայություն, նշվում է փախուստի դիմելու մասը. ի՞նչ փախուստի մասին կարող է խոսք լինել, եթե ես ամեն կերպ փորձում էի վերադառնալ պաշտպանյալիս մոտ, ձերբակալման արձանագրությունը կազմվել է ինձ արգելանքի վերցնելուց 50 րոպե անց, այն պարագայում, երբ հետաքննական մարմնում եղել են բազմաթիվ աշխատակիցներ եւ որեւէ օբյեկտիվ պատճառ չի եղել ձերբակալման արձանագրությունը այդքան ժամանակային խզումով կազմելու համար, ինձ չի հանձնվել ձերբակալման պատճենը, Փաստաբանների պալատի նախագահին չի տեղեկացվել իմ ձերբակալման մասին եւ այլն»:

Նա հայտնեց, որ ձերբակալման առավելագույն 6 ժամը լրանալուց հետո քննիչն իրեն ազատ արձակելու մասին որոշում է կայացրել:

Նիկոլ Փաշինյանը, ըստ ներկայացված հայտարարագրի, չունի որևէ շարժական կամ անշարժ գույք, թանկարժեք իրեր։

Կոռուպցիայի կանխարգելման հանձնաժողովը հրապարակել է վարչապետի 2022 թ-ի գույքի, եկամուտների, ծախսերի և շահերի հայտարարագիրը։

Փաշինյանը ներկայացրել է միայն դրամական շարժ։  Բանկերից մեկում նա ունի 3 մլն 15 հազար դրամ ավանդ։ Վարչապետի եկամուտը կազմել է միայն նրա աշխատավարձը՝ 12,837,503 դրամ։

Տարբեր բանկային հաշիվների վրա Փաշինյանը տարեվերջին ունեցել է 114.7 դրամ, 27,701.8 դրամ, 3.84 ԱՄՆ դոլար և 154,562.5 դրամ։

Որպես կանխիկ գումար հայտարարագրել է 1800 դոլար, որը տարեվերջին նվազել է և դարձել 800 դոլար, և 790 հազար դրամ, որը տարեվերջին 10 հազար դրամով ավելացել է՝ կազմելով 800 հազար դրամ։

Փաշինյանը մասնակցություն ունի 1 առևտրային կազմակերպությունում՝ ի դեմս իր տիկնոջ՝ Աննա Հակոբյանի, որը «Մեր տպարանը» ՍՊԸ-ի 50 % բաժնեմասի սեփականատերն ու կազմակերպության տնօրենն է 2009 թ-ից ի վեր։

Օրվա իշխանությունը մեր երկրի համար կարևորագույն հարցերով 2021-ին հանդես է եկել մի տեսակետով և հիմա իրականացնում է լրիվ հակառակ քաղաքականությունը: Դրանով իսկ իշխանությունը հայտնվել է ոչ լեգիտիմության դաշտում: Այս մասին իր ֆեյսբուքյան էջում գրել է պատգամավոր Անդրանիկ Թևանյանը:

«1. Խոստացվել էր Արցախի ինքնորոշման իրավունքի հարցի պաշտպանություն՝ բացառելով Ադրբեջանի կազմում հայտնվելը: 2022-ի հոկտեմբերի 6-ից սկսած իշխանությունը որդեգրել է Արցախն Ադրբեջանինն է քաղաքականությունը՝ դրանով իսկ հնարավորություն տալով թշնամուն շրջափակել Արցախը և սպառնալ Հայաստանի գոյությանը:

2. Բացառվել էր Հայաստանի տարածքաների հանձնումը: Հիմա առնվազն չեն բացառում Հայաստանի գյուղերի ու ճանապարհների հանձնում Ադրբեջանին, ինչը վերջինիս ախորժակը բարձրացրել է մինչև «Հայաստանն Արևմտյան Ադրբեջան է» մակարդակի:

3. Խոստացվել է հայ-ռուսական դաշնակցային հարաբերությունների զարգացում, սակայն վարվում է ճիշտ հակառակ քաղաքականություն, ինչը լրջագույն սպառնալիք է մեր անվտանգությանը:

Ահա այս երեք ռազմավարական հարցերում տեղի է ունեցել մեծ խաբեություն (մյուս մանր ու միջին ստերը դեռ մի կողմ դրած): Սա նշանակում է, որ ունենք ոչ լեգիտիմ իշխանություն, որն ապօրինաբար հանդես է գալիս ժողովրդի ու պետության անունից: Սրա քաղաքական կապիտալիզացիան պետք է դրսևորվի իշխանափոխության ձևով:

Որքան էլ որ առաջին հայացքից պարզունակ թվա, իշխանափոխության աղբյուրը պետք է լինի ժողովուրդն իր հավաքական կամքով: Զուտ վերնախավային գործընթացով հնարավոր չէ լուծել ոչ լեգիտիմության խնդիրը: Ուստի՝ պետք է գնալ տնից տուն, բակից բակ, շփվել հանրության տարբեր շերտերի հետ, բացատրել իրականությունը, լսել մարդկանց կարծիքները՝ այն հստակ գիտակցությամբ, որ նոր իշխանության լեգիտիմությունը պետք է ստանալ ժողովրդից: «Մայր Հայաստան» շարժումն առաջնորդվում է այդ սկզբունքով ու աշխատում է այդ տրամաբանությամբ»,-գրել է Թևասնյանը:

Pատմական գիտությունների դոկտոր Հայկ Դեմոյանը բաց նամակով դիմել է ԿԳՄՍ նախարար Ժաննա Անդրեասյանին. 

«Քրեորեն հետապնդելի առնվազն երեք արարք՝ ԿԳՄՍ-ի կատարմամբ

ԲԱՑ ՆԱՄԱԿ – 2
ՀՀ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ ՏԻԿԻՆ ԺԱՆՆԱ ԱՆԴՐԵԱՍՅԱՆԻՆ

Հարգելի տիկին Անդրեասյան,

Անցյալ ամիս մամուլում հրապարակվեց «Հայոց պատմություն» առարկայի 9–րդ դասարանի դասագրքերի երկու հրատարակությունների իմ գրախոսականը, որի արդյունքում պարզ դարձավ, որի Կրթության, գիտության, մշակույթի և սպորտի նախարարությունը հանրակրթական դպրոցում կիրառելու համար երաշխավորել է երկու դասագրքեր, որոնք ի սկզբանե հանդիսացել են խոտան՝ թե բովանդակային առումով և թե որպես գրահրատարակչական միավոր։

2014 և 2019 թթ․ լույս տեսած «Հայոց պատմություն» առարկայի դպրոցական դասագրքերի նախապատրաստման ընթացքում կազմողները համապատասխան պահանջկոտություն չեն ցուցաբերվել ու չեն գիտակցել նման հրատարակության ռազմավարական ու կրթադաստիարակչական կարևորությունը։

Դասագրքերում առկա են բազմաթիվ սխալներ՝ փաստագրական ու լուսանկարչական նյութի մատուցման մեջ։ Դասագրքերը որեւէ քննություն չեն բռնում գեղագիտական պահանջների տեսանկյունից, քանզի դրանց թե՛ կազմերի, և թե՛ միջուկի ձեւավորումները սիրողական աշխատանքի տպավորություն են թողնում։ Ինչ վերաբերում է լուսանկարչական նյութի ընտրությանը, ապա դրանք կրել են կամայական, բայց ոչ տեսողական նյութի միջոցով աշակերտների շրջանում հավելյալ տեղեկություն ու հետաքրքրություն առաջացնելու նպատակ։ Լուսանկարների մեծ մասը վերցվել է Համացանցից, անորակ են, շատ դեպքերում էլ սխալ վերնագրված։

Մեղմ ասած, տարակուսանք է առաջացնում 2019 թ. վերահրատարակված դասագրքում որպես խմբագիր ակադեմիկոս Վլադիմիր Բարխուդարյանի անվան հիշատակումը, առանց որեւէ նշումի, որ վերջինս կապ չունի դասագրքում 2017 թ. հետո հիշատակվող իրադարձությունների, ի մասնավորի՝ այսպես կոչված «թավշյա հեղափոխության» հետ, քանի որ վերջինս մահացել է 2017 թ. մարտին։ Ակնհայտ է, որ դասագրքի հեղինակները թույլ են տվել բարոյականության տեսանկյունից անընդունելի քայլ, կոպտորեն խախտելով նաև հեղինակային իրավունքի միջազգային նորմերի ու պահանջների մի շարք դրույթներ։ 

Արդյունքում ունենք պետությանը հասցված խոշոր նյութական վնաս, որի քննությամբ պետք է զբաղվեն համապատասխան մարմինները։ Կատարվել է փնթի ու անպատասխանատու աշխատանք, պատշաճ կերպով չի իրականացվել գիտական ու լեզվական նյութի սրբագրման ու խմբագրական աշխատանքները։ Այս տեսքով երկու դասագրքերը տպագրության երաշխավորելով ԿԳՄՍ նախարարությունը թույլ է տվել առնվազն երեք քրեորեն հետապնդելի գործողություններ․
ա․ պետությանը հասցվել է զգալի նյութական վնաս, մսխվել են պետական միջոցներն ու հարկատուների գումարները,

բ․ կոպտորեն խախտվել են երեխաների իրավունքները, ի մասնավորի՝ նրանց հրամցնելով ոչ ճշմարտացի, հակագիտական նյութ, պարտադրելով նաև քաղաքական ներկա վարչախմբի պահանջով դասագիրք ներմուծված դրույթներ ու գնահատականներ,

գ․ կոպտորեն խախտվել են հեղինակային իրավունքի մի քանի միջազգային իրավական նորմեր։
Որպես գլխավոր երաշխավոր, ԿԳՄՍ նախարարությունը պատասխանատվություն պետք է կրի նման հրատարակությունը տպագրությունից առաջ անհրաժեշտ փորձաքննության չենթարկելու եւ այդ տեսքով վերահրատարակման երաշխավորելու համար։

Հայտնի է, որ  2019թ․ Կրթության և գիտության նախարար Արայիկ Հարությունյանի 82–Ա/2 հրամանով ստեղծվել է հանձնաժողով՝ 2014 թ․ հրատարակված այս դասագրքերը վերանայելու և առաջարկություններ ներկայացնելու նպատակով։ Արդյունքում դասագիրքն էլ ավելի խայտառակ տեսք է ունեցել՝ բազում սխալներով ու անճշտություններով լի։

Բազմաթիվ ծնողների ու ուսուցիչների անունից պահանջում եմ ներքին հետաքննություն սկսել նյութական ու բարոյական վնասի ճշգրտման ու հատուցման, ինչպես նաև մեղավորներին, այդ թվում՝ նախկին պաշտոնյաներին պատասխանատվության ենթարկելու համար։

Ավելորդ չեմ համարում նշել, որ նոր չափորոշիչներով այս տարվա ընթացքում նոր դասագրքեր հրատարակելու հանգամանքը բացարձակապես չի կարող կանխել իրավական գործընթացի իրականացումը և բոլորովին էլ չի չեղարկում պետությանը հասցված վնասի հատուցման արդարացի պահանջը։

 Գրախոսականին կարող եք ծանոթանալ «Առավոտ» օրաթերթի մայիս ամսին լույս տեսած երեք համարներում»։ 

Աշոտ Փաշինյանն ընդդեմ Գայանե Հակոբյանի դատական նիստից առաջ այսօր լրագրողների հարցին, թե զոհված զինվորի ծնողի առաջ գլուխ խոնարհո՞ւմ է, վարչապետի որդին պատասխանեց, որ՝ այո՝ միևնույն ժամանակ նշելով, որ օրենքը հավասար է բոլորի առաջ, և յուրաքանչյուր միջադեպ ՀՀ-ում պետք է օրենքին համապատասխան գնահատական ստանա:

Հարցին՝ դատարանի բակում ինչո՞ւ է մոտեցել ծնողներին, Աշոտ Փաշինյանն արձագանքեց՝ նրանք են իրեն մոտեցել:about:blank about:blank

«Ես իմ համար քայլում էի, ինչպես ամեն օր եմ անում, իրենք ինձ մոտեցան»,- ասաց նա:

Դիտարկմանը՝ կարող էր հեռանալ այդտեղից, ոչ թե մեքենան նստել, վերջինս նկատեց. «Անկեղծ ասած՝ զոհված զինվորների ծնողների հետ տարբեր առիթներով շփվել եմ, տիկին Գայանեի հետ՝ ոչ, բայց այնտեղ ներկա մյուս ծնողների հետ շփվել եմ: Շատ փոխադարձ հարգանքով խոսակցություն է եղել, այդ պատճառով չեմ կարծել, որ կարող է որևիցե տգեղ միջադեպ տեղի ունենալ»:

Հարցին, թե ի՞նչ պիտի աներ իրեն Գայանե Հակոբյանը «Եռաբլուր»-ում, Աշոտ Փաշինյանն ասաց. «Թե ինչ կարող էր տեղի ունենալ «Եռաբլուր»-ում, ես դրա մասին որևիցե հայտարարություն չեմ արել և չեմ անում»:

Հիշեցնենք, որ հունիսի 5-ին Երևանի ընդհանուր իրավասության դատարանը որոշեց Աշոտ Փաշինյանի առևանգման համար մեղադրվող Գայանե Հակոբյանի նկատմամբ նույն օրը ընտրված տնային կալանքը փոխել. նա կալանավորվեց 1 ամիս 15 օր ժամկետով: Նրա պաշտպանները հայտարարել էին, որ պատրաստվում են բողոքարկել որոշումը: