ՀՀ Պաշտպանության նախարարությունում կառուցվածքային փոփոխություններ են տեղի ունեցել, որի արդյունքում ձևավորվել է ՊՆ Զինծառայողների առողջապահական, սոցիալական պաշտպանության և վետերանների հարցերով գլխավոր վարչությունը (ՀՀ ՊՆ կանոնադրություն, հաստատված ՀՀ վարչապետի 25.07.2019թ. N 992-Լ որոշմամբ), որի կազմում ներառվել է նաև նախկին Զինծառայողների սոցիալական պաշտպանության վարչությունը՝ վերանվանվելով Սոցիալական պաշտպանության վարչություն։

Այս մասին NEWS.am-ի հետ զրույցում ասաց ՊՆ մամուլի քարտուղար Շուշան Ստեփանյանը։

«Զինծառայողների առողջապահական, սոցիալական պաշտպանության և վետերանների հարցերով գլխավոր վարչության պետ է նշանակվել գնդապետ Ալեքսանդր Ավետիսյանը, ով նախկինում զբաղեցրել է ՊՆ Մարդու իրավունքների և բարեվարքության կենտրոնի պետի պաշտոնը։ Սերժ Առուշանյանը նշանակվել է ԶԱՍՊ և ՎՀ գլխավոր վարչության Սոցիալական պաշտպանության վարչության պետ»,- տեղեկացրեց ՊՆ մամուլի քարտուղարը։

Ավելի վաղ «Ժողովուրդ» օրաթերթը գրել էր, որ այս օրերին ՀՀ պաշտպանության նախարարության ներսում հետաքրքիր վերադասավորումների շրջան է. պաշտոնատար անձանց փոփոխությունների բուռն ալիք է սպասվում, եւ այդ գործընթացն արդեն մեկնարկել է: Օրաթերթը նաեւ տեղեկացրել էր, որ ՀՀ ՊՆ զինծառայողների սոցիալական պաշտպանության վարչության պետ Սերժ Առուշանյանին հեռացրել են աշխատանքից եւ նրա փոխարեն այդ պաշտոնին նշանակել են Ալիկ Ավետիսյանին, որը եղել է Պաշտպանության նախարարության բարեվարքության բաժնի պետը: Սակայն այսքանով ներքին գործընթացները չեն ավարտվելու, եւ առաջիկայում ականատես կլինենք նոր փոփոխությունների ու վերադասավորումների:

Իշխանությունն իրոք թակարդի մեջ է, շատ դժվար է որոշում ընդունել։ Այս մասին Tert.am-ի հետ զրույցում ասաց «Հանուն կայուն մարդկային զարգացման» ՀԿ նախագահ, բնապահպան Կարինե Դանիելյանը՝ անդրադառնալով Ամուլսարի խնդրին։

«Մի կողմից էկոլոգիական ռիսկերը շատ բարձր են, մյուս կողմից ֆինանսական ռիսկերը մեծ են, տուգանք պետք է մուծվի, բավականին գումարներ Լիդիանը ծախսել է արդեն, ծրագրեր է իրականացրել»,-ասաց նա և իշխանությանը խորհուրդ տվեց հավաքել բոլոր մասնագետներին՝ տնտեսագետների, իրավաբաններին, որոնք կգտնեն լուծում ստեղծված իրավիճակում։

«Պետք է քննարկել այդ հարցը և, եթե իրոք սկզբունքորեն հնարավոր է գոնե կրճատեն այդ տուգանքները, ուրեմն պետք է կանգնեցնել գործընթացը և թույլ չտալ աշխատանքներ իրականացնել»,-ասաց նա։ Ըստ բնապահպանի՝ ամեն դեպքում բնապահպանական շահը պետք է գերակա լինի։

«Առանց այն էլ եղած հանքարդյունաբերությունը, մետաղային հանքերը մեզանում էկոլոգիական դժբախտություն են, իսկ այս հանքը սպեցիֆիկ է և այս առումով վտանգը շատ մեծ է՝ ինչ տեխնոլոգիա, ինչ տեխնիկա էլ ուզում ես օգտագործի»,-ասաց նա։ Ինչ վերաբերում է նորանշանակ նախարարի աշխատանքին, ապա Կարինե Դանիելյանը նշեց, որ նախարարին չի ճանաչում, երբևէ ոլորտի խնդիրների հարցում չի շփվել հետը։

Կարիեն Դանիելյանը ասաց, որ եթե գործարկվի հանքը, ապա ժամանակի ընթացքում կունենանք վնաս՝ և՛ Ջերմուկի համար, և՛ Սևանի համար։ Ինչ վերաբերում է բնապահպանների, ակտիվիստների գործողություններին, ապա նա ասաց․ «Էլ ինչ անենք մնացել է բռնենք կախվենք»։ Նա կոչ արեց շարունակել պայքարը։

Հայաստանում օգոստոսի 5-ին՝ ժամը 11:00-ի դրությամբ նոր կորոնավիրուսով վարակվելու 371 նոր դեպք է գրանցվել: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Ընդհանուր առմամբ՝ հաստատվել է կորոնավիրուսային հիվանդության ընդհանուր 39586 դեպք, որոնցից 30850-ն` առողջացած, 770-ը` մահվան ելքով (երկուսը մահացել են երեկ): Կորոնավիրուսային հիվանդությամբ այս պահին փաստացի բուժում է ստանում 7738 պացիենտ: Ընդհանուր առմամբ կատարվել է 170012 թեստավորում: Վերջին մեկ օրում կատարվել է 1848 նոր թեստավորում:

Այսպիսով` կորոնավիրուսային հիվանդությամբ հաստատված 196 նոր դեպք է գրանցվել, և 511 քաղաքացի առողջացել է, վեց մարդ մահացել է:

«Այլ հիվանդություններից» մահացած քաղաքացիների թիվը ՝ 228 չի փոխվել: Այսպիսով, մահերի ընդհանուր թիվը կազմել է 998:

RT-ի գլխավոր խմբագիր Մարգարիտա Սիմոնյանը Facebook-ի իր էջում մեկնաբանել է Հայաստանի վարչապետ Նիկոլ Փաշինյանի հոդվածը, որը նա հրապարակել է իր կողմից ղեկավարվող «Հայկական ժամանակ» թերթում:

Սիմոնյանը մեջբերել է հոդվածի մի մասի ռուսերեն թարգմանությունը.

«Եկեք դադարենք մեր նախնիներին գովաբանել եւ շատ պրագմատիկ հարց տանք մեզ. իսկ ի՞նչ են այդ նախնիները մեզ ժառանգել, ի՞նչ են թողել իրենց հետեւից: Ոչինչ, ավելի քան ոչինչ: Որովհետեւ ոչինչը այն է, երբ դու պետք է սկսես զրոյից, իսկ մենք պետք է սկսենք մինուս չգիտեմ քանիսից, որովհետեւ մեր նախնիները մեզ ժառանգել են ընդամենը ցեղասպանությունների, ստորացումների, դավաճանությունների եւ անբարոյականության մի այնպիսի պաշար, որը հաղթահարելը, ինչպես պարզվում է, դժվար է, չափազանց դժվար:

Ես դատապարտում եմ մեր նախնիներին, նզովում եմ նրանց, որովհետեւ նրանք ոչինչ չեն արել, որ մենք այսօր ապրենք ավելի արժանապատիվ ու ավելի հպարտ: Մեր նախնիները իրենց սերունդների համար հոգ չեն տարել գոնե այնքան, ինչքան կենդանիներն են հոգ տանում իրենց բնազդով: Ես դատապարտում եմ բոլոր նրանց, ովքեր գովքն են անում մեր նախնիների»։

Նիկոլ Փաշինյան, 2005թ․

«Նենեգա՝ իմ ոսկե մեծ տատ, ով վերապրել է Ցեղասպանությունը եւ ինձ մեծացրել է պատմության մեջ աննախադեպ արյունալի կոտորածի զոհերի հիշատակի նկատմամբ ակնածանքով,  լավ է, դու սա չես տեսնում, սիրելիս:

Դու չգիտես, որ Հայաստանում ղեկավարման են դրել մարդու, որը քեզ, Նենեգա, քեզ, ում աչքի առաջ ամբողջ ընտանիքը կոտորվել է յաթաղանով եւ միայն մեծ քույրն է ինքն իրեն խեղդել, որ ողջ չընկնի ենիչերիների ձեռքը, նա ՔԵԶ մեղադրում է «ցեղասպանության ու անբարոյականության մեջ»։

Հիմա ես հասկանում եմ, թե ինչու իմ գրառումը այդքան աղմուկ բարձրացրեց Հայաստանում: Ես իսկապես այն հասարակության մի մաս չեմ, որը ունակ է ուրախանալ ինչ-որ մեկի իշխանությամբ, որը արհամարհում է հայոց մեծ պատմությունը, հայհոյում է նախնիներին եւ չի հարգում ցեղասպանության զոհերի հիշատակը: Խայտառակ եւ մանկուրտ: Իմ Նենեգան կթքեր նրա աչքերի մեջ: Ամոթ»,- գրել է Մարգարիտա Սիմոնյանը։

Առողջապահության նախարար Արսեն Թորոսյանը Կառավարությանն է ներկայացել որոշման մի նախագիծ, որով առաջարկվում է 1 մլն ԱՄՆ դոլար արժեքով դրամաշնորհային ծրագրի իրականացումը, որը վերաբերում է առողջապահության առաջնային օղակում ոչ վարակիչ հիվանդությունների կանխարգելմանն ու վերահսկման կատարելագործմանը, վերցնել ծրագրում ընդգրկված «Սուրբ Գրիգոր Լուսավորիչ բժշկական կենտրոն» բժշկական կենտրոնից և տալ «Վ.Ա․ Ֆանարջյանի անվան ուռուցքաբանության ազգային կենտրոն»-ին։

Նկատենք, որ այս վարկային համաձայնագիրը ստորագրվել է նախորդ իշխանության օրոք՝ 03․04․2018թ․ և ուժի մեջ է մտել 21․09․2018թ․։

Թե ինչու նպատակահարմար չէ, որ ծրագիրն իրականացնի «Սուրբ Գրիգոր Լուսավորիչ բժշկական կենտրոնը», Առողջապահության նախարարությունը հիմնավորել է նրանով, որ «Ֆանարջյանի անվան ուռուցքաբանության ազգային կենտրոնը», որը նախկինում ընդգրկված է եղել «Պետական գույքի մասնավորեցման 2017-2020 թվականների» ծրագրում, դուրս է հանվել, և համաձայն Կառավարության 22․08․2019թ․ թիվ 1064-Ա որոշման՝ վերջինի բաժնետոմսերի կառավարման լիազորությունները 100 տոկոսով վերապահվել են Առողջապահության նախարարությանը։

Սրան զուգահեռ՝ 1 մլն դոլարի ծրագիրը 100 տոկոսով իր ենթակայության տակ գտնվող բժշկական կենտրոնին հանձնելն Առողջապահության նախարարությունը հիմնավորել է նաև նրանով, որ «Ֆանարջյանի անվան ուռուցքաբանության ազգային կենտրոնը» (ՈՒԱԿ-ը) Հայաստանում միակ մասնագիտացված կազմակերպությունն է, որտեղ հնարավոր է իրականացնել ուռուցքային հիվանդությունների ամբողջական և բազմակողմանի բուժում/վարում, այդ թվում` հիվանդության ախտորոշում, քիմիաթերապիա, վիրահատական միջամտություն և ճառագայթային բուժում:

Նշենք, որ ծրագրի շրջանակներում նախատեսվում է ՀՀ սահմանամերձ 3 մարզերում՝ Լոռիում, Տավուշում և Սյունիքում, իրականացնել կրծքագեղձի մամոգրաֆիկ սքրինինգային հետազոտություններ կանանց 50-69 տարիքային խմբում՝ ապահովելով առնվազն 50% ընդգրկվածություն։

Ներկա պահին, սքրինինգային ծրագրերի իրականացման նպատակով ձեռք է բերվել շարժական մամոգրաֆիայի սարքավորում, որն արդեն Հայաստանում է։

Բնակչությանը ծրագրի վերաբերյալ հնարավորինս տեղեկացնելու նպատակով իրականացվել են հանրային իրազեկման քարոզարշավի մի շարք նախապատրաստական աշխատանքներ, իսկ բժշկական և վարչական անձնակազմի վերապատրաստման նպատակով մշակվել են հետազոտությունների վարման համապատասխան ընթացակարգեր և գործառնական ձեռնարկներ, ներկայում ընթացքի մեջ է կարճաժամկետ վերապատրաստման դասընթացներ իրականացնող անհատ խորհրդատուի ընտրության գործընթացը։

Դրամաշնորհային ծրագրով նախատեսված սքրինինգային հետազոտությունները նախատեսվում է մեկնարկել 2020թ․երկրորդ կիսամյակում։

Հայաստանում օգոստոսի 1-ին՝ ժամը 11:00-ի դրությամբ նոր կորոնավիրուսով վարակվելու 291 նոր դեպք է գրանցվել: Այս մասին հայտնում է ՀՀ ԱՆ հիվանդությունների եւ վերահսկման եւ կանխարգելման ազգային կենտրոնը:

Ընդհանուր առմամբ՝ օգոստոսի 1-ին հաստատվել է կորոնավիրուսի 38841 դեպք:

Ընդհանուր թեստերի թիվը կազմում է 165656, վերջին մեկ օրում` 1920 նոր թեստավորում:

Փաստացի այս պահին բուժվում է 8307 պացիենտ, պակասել է 280-ով:

Վերջին տվյալներով ապաքինվել է 29557 անձ` վերջին մեկ օրում 560 անձ:

Ընդհանուր առմամբ, 749 պացիենտ մահացել է (ավելացել է 11-ով):

Բաց տարածքներում դիմակի կրումը պետք է լինի կամավոր` ֆիզիկական հեռավորության պահպանման անհնարինության ժամանակ։ Այս մասին իր ֆեյսբուքյան էջում գրել է բժիշկ-համաճարակաբան Էդուարդ Հովհաննիսյանը:

«ԲԱՑ ՏԱՐԱԾՔՆԵՐՈՒՄ դիմակի պարտադիր կրման որոշում կայացնողները նշում են, որ հիմնվում են միջազգային փորձի և երկրի ներսում մասնագետների հետ քննարկումների վրա։

ՀԱՇՎԻ ԱՌՆԵԼՈՎ ԱՅՆ,

որ համաձայն ՀՀ ՍԱՅՄԱՆԱԴՐՈՒԹՅԱՆ և Բնակչության սանիտարահամաճարակային անվտանգության ապահովման մասին ՀՀ ՕՐԵՆՔԻ՝

• Յուրաքանչյուր ոք, օրենքին համապատասխան, ունի առողջության պահպանման իրավունք:

• Քաղաքացիներն ունեն`

• բարենպաստ շրջակա միջավայրի և սանիտարահամաճարակային անվտանգության ապահովման իրավունք.

• շրջակա միջավայրի սանիտարահամաճարակային իրադրության վերաբերյալ հավաստի և ամբողջական տեղեկատվության և իրազեկման իրավունք.

ՊԱՀԱՆՋՈՒՄ ԵՄ․

1) հրապարակել բաց տարածքներում դիմակի պարտադիր կրման որոշման գիտական հիմքերը,

2) մարդկանց առողջության վրա բաց տարածքներում դիմակի պարտադիր կրման հնարավոր դրական և բացասական ազդեցությունների վերլուծությունները,

3) երկրի ներսում քննարկումներին մասնակցած մասնագետների անունները և քննարկումների արձանագրությունները։

ԲԱՑ ՏԱՐԱԾՔՆԵՐՈՒՄ դիմակի կրումը պետք է լինի կամավոր` ֆիզիկական հեռավորության պահպանման անհնարինության ժամանակ։

ՀՀ Քաղաքացի, բժիշկ-համաճարակաբան Էդուարդ Հովհաննիսյան»: