Այս պահին բեռնատարների 11 վարորդ մնացել են Վրաստանի և Ռուսաստանի սահմանների միջև` չեզոք գոտում: Այս մասին հայտնում է պետական եկամուտների կոմիտեն։

«ՌԴ սահմանապահ ծառայության պարզաբանմամբ` վարորդներն ունեն մինչև 3 տարի վաղեմությամբ չվճարված վարչական տույժեր` Ռուսաստանի Դաշնության տարածքում ճանապարհային երթևեկության կանոնները խախտելու համար, ինչի մասին նրանք ծանուցվել են:

ՌԴ սահմանապահ ծառայության կայքում նշված է, որ դեպի Ռուսաստան բեռ տեղափոխող այս վարորդներն իրավունք չունեն մուտք գործել Ռուսաստանի Դաշնության տարածք:

Ստեղծված դրությունը գնահատելուց հետո` ՊԵԿ-ը լուծման երեք տարբերակ է առաջարկում:

1.Այս իրավիճակում հայտնված վարորդներ ունեցող բեռնափոխադրումներով զբաղվող այն կազմակերպությունները, որոնք ունեն Ռուսաստան բեռ տեղափոխած և հետ վերադարձող մեկ այլ վարորդ, կարող են այդ բեռնատարի վարորդի միջոցով կազմակերպել չեզոք գոտում հայտնված բեռնատարով բեռի տեղափոխումը ՌԴ: Իսկ չեզոք գոտում մնացած վարորդը կարող է դատարկ բեռնատարով վերադառնալ Հայաստան: Սակայն դրա համար նախ անհրաժեշտ է ապրանքների միջազգային փոխադրումների ժամանակ կիրառվող տրանսպորտային բեռնագրում (CMR) լրացուցիչ գրել վարորդների անունները, որպեսզի վրացական կողմը թույլատրի չեզոք գոտում հայտնված վարորդի վերադարձը մյուս վարորդի բեռնատարով և համապատասխան CMR-ով, իսկ ռուսական կողմը թույլ տա, որպեսզի դեպի ՌԴ մեկնող վարորդը բեռով մտնի Ռուսաստան:

2.ՊԵԿ-ը նաև բեռնափոխադրում իրականացնող կազմակերպություններին հորդորում է, որ վարորդներին Ռուսաստան գործուղելուց առաջ ՌԴ ներքին գործերի նախարարության և Դատական կարգադրիչների կայքերից նախապես ճշտեն` արդյոք նրանք ունեն չվճարված տուգանքներ: Միայն տուգանքը վճարելուց և հավաստիանալուց հետո, որ այն հանված է, կարելի է այդ վարորդների միջոցով կազմակերպել բեռնափոխադրումը:

3.Կազմակերպությունները կարող են նաև երկու բեռնատարների CMR-ներում նախապես խաչաձև լրացնել մյուս բեռնատարի վարորդի անունը, որպեսզի ՌԴ մտնելու արգելքին բախվելու դեպքում լուծման առաջին եղանակով հնարավոր լինի կազմակերպել միաժամանակ և՛ վարորդի վերադարձը, և՛ բեռի տեղափոխումը նշանակման վայր:

Նոր տեղեկություններ ի հայտ գալու դեպքում ՊԵԿ-ը լրացուցիչ կտեղեկացնի:

ՀՀ արտաքին գործերի նախարարությունը խստագույնս դատապարտում է Մեխակավան (Ջաբրայիլ) բնակավայրի մոտ գտնվող Զորավոր Սուրբ Աստվածածին եկեղեցու հիմնահատակ ավերումը։ ԱԳՆ մամուլի քարտուղար Աննա Նաղդալյանը հայտարարությամբ է հանդես եկել, որը հրապարակվել է արտգործնախարարության կայքում։

«Խստագույնս դատապարտելի է Ադրբեջանի կողմից կրոնական ատելության հիմքով իրականացված հանցագործության հերթական այս դեպքը»,– շեշտել է Նաղդալյանը։ 

Նրա խոսքով` առավել անհանգստացնող է ադրբեջանական ղեկավար շրջանակների կողմից կատարված բարբարոսությունը հիմնավորելու փորձերը, ինչը ցույց է տալիս, որ վանդալիզմի հերթական դրսևորումն ունեցել է միտումնավոր բնույթ և իր կազմակերպվածությամբ հիշեցնում է Նախիջևանի պատմամշակութային ժառանգության համակարգված ոչնչացումը:

«Վերջին պատերազմից հետո պաշտամունքի վայրի ոչնչացման այս դեպքն առանձին դրվագ չէ: Արցախի Հանրապետության Շուշի քաղաքի` ավելի քան 200 տարվա պատմություն ունեցող «Կանաչ ժամ» եկեղեցու ավերումը փաստում է, որ ադրբեջանական կողմից իրականացվող մշակութային վանդալիզմը հիմվում է միայն մեկ չափանիշի վրա, և այդ չափանիշը քրիստոնյա հայ ժողովրդի հանդեպ ատելությունն է: Ի հեճուկս աշխարհին որպես «հանդուրժողականության և բազմամշակութայնության կենտրոն» ներկայանալու ջանքերին՝ Ադրբեջանն առ այսօր ամրագրել է իր դիրքը՝ որպես քրիստոնեական ժառանգության ոչնչացման առաջամարտիկ»,–նշել է Նաղդալյանը:

ԱԳՆ մամուլի խոսնակը շեշտել է, որ հայկական պատմամշակութային և կրոնական ժառանգության ոչնչացումը ևս մեկ անգամ ի ցույց է դնում ադրբեջանական իշխանությունների՝ քրիստոնեական մշակութային արժեքների պահպանման վերաբերյալ հավաստիացումների սին լինելը:

Միջազգային հանրությունը պետք է օր առաջ միջոցներ ձեռնարկի Ադրբեջանի կողմից նախորդ տարվա սեպտեմբերի 27-ից սկսված և մինչ օրս շարունակվող հանցագործությունների, այդ թվում՝ մշակութային ցեղասպանության դադարեցման և դատապարտման ուղղությամբ:

Նշենք, որ Զորավոր Սուրբ Աստվածածին հայկական եկեղեցին, որի օծման և բացման հանդիսավոր արարողությունը տեղի է ունեցել 2017 թվականի հոկտեմբերի 1-ին՝ Տ. Վրթանես եպիսկոպոս Աբրահամյանի հանդիսապետությամբ, ամբողջությամբ ավերվել է արցախյան վերջին պատերազմի հետևանքով ադրբեջանական վերահսկողության տակ անցնելուց հետո։

Էջմիածնի N զորամասից Զանգելան տեղափոխված եւ անհետ կորած համարվող զինծառայողների հարազատներն այցելել են դիահերձարաններ ու արձանագրել, որ Զանգելանում ամիսներ առաջ հայտնաբերված հայ զինվորների մարմինները, մասունքները դեռ պահվում են պարկերի մեջ:

Դեռեւս հունվար ամսին հայտնի դարձավ, որ հարազատների պահանջով Զանգելանի դպրոցի մոտ կատարված որոնողական աշխատանքների ժամանակ հայտնաբերվել են այրված մարմիններ, որոնց ադրբեջանցիները հուղարկավորել էին նույն վայրում։

Հայորդիների մարմինները տեղափոխվել էին պարկերով ու ծնողներն իրենք էին 2,5 ամիս առաջ սեփական ձեռքերով հավաքել զավակների մասունքները և փոխանցել դիահերձարան, բայց մինչ օրս նույնականացում չի արվել։ Ավելին՝ այսօր նրանք ստիպված են մասունքներն իրենց ձեռքերով մաքրել։

Էջմիածնի N զորամասի անհետ կորած զինծառայող Վարդան Ադոյանի մայրը՝ Անահիտ Ադոյանը «Փաստինֆո»-ի հետ զրույցում տեղեկացրեց՝ երկրորդ օրն է, ինչ այցելում են դիահերձարաններ ու վերահաստատում են՝ ոչինչ չի արվում զավակների աճյունները նույնականացնելու համար։

Ծնողներն առողջապահության նախարարությունում են եղել՝ զգուշացրել, եթե անգամ թույլտվություն չունենան, մուտք են գործելու դիահերձարաններ։ Նախարարությունից ծնողներին խնդրել են մի քանի օր սպասել, մինչև թույլտվություն կտրամադրեն, սակայն ծնողները պնդել են՝ միանգամից պայմանավորվածություն պետք է ձեռք բերեն, առանց վայրկյան կորցնելու, որպեսզի չկարողանան «տեղավորումներ» անել։ Բարձրացված աղմուկից հետո ծնողներին, ընդունել է նախարարը, եւ թույլտվությունն ստանալուց հետո ծնողները եղել են Արտաշատի, Էջմիածնի, Մասիսի դիահերձարանում։

«Արտաշատում լավ էր՝ տոպրակը բացել էին, ամեն մեկը մասունքները առանձնացրել, նմուշներ վերցրել։ Ֆոտոներով ամեն ինչ տեսել ենք։ Էջմիածնում էլ յուրահատուկ գործողություն են իրականացրել՝ մանրակրկիտ գործ են արել։ Բժիշկը մեզ շատ լավ բացատեց, որը մարմնի, որ հատվածն է, ոնց են նմուշ վերցրել ու որտեղից, որն է ավելի հիմնական, որ կարող է 100 տոկոս արդյունք տալ։ Ամբողջը նկարած՝ փաստերով ունեին ու մեզ տեղեկացրեցին»,- ասաց Անահիտ Ադոյանը։

Ծնողները, սակայն, մեղմ ասած դժգոհ էին Մասիսի դիահերձարանից ու «բարդակ» որակում այն, ինչ տեսել են։ Ադոյանը պատմեց, որ այնտեղ «անտերության են մատնել» դիերը, իրենք են լվացել մասունքները։

«Մտել ենք Մասիս՝ ոնց տոպրակը կար, այդպես էլ այնտեղ դրված էր։ Ասում է՝ «այստեղից այս ոսկորն ենք վերցրել, այնտեղից՝ ուրիշ կտոր»։ Հարցնում ենք՝ 8 կտոր պետք է լիներ, ինչո՞ւ են մեկը վերցրել, ասում է՝«այստեղ երկու ձեռք է, երկու ոտք ՝ ընդհանուր մեկը»։ Հարցնում ենք՝ ինչի՞ց վերցրեցիք, որ այդտեղ մեկ հոգի է, երեք պարկ կար, երեքում էլ բարդակ էր։ Մենք ենք ոսկորներ լվանում, որ հասկանանք՝ իրոք կան այնտեղ հերոս տղերք, թե չէ»։

Զինծառայողի մայրը հայտնեց, որ դիերը պահվում են սառնարաններում։ Գրեթե երեք ամիս առաջ դիերը դուրս բերելիս ծնողների հետ պատկան մարմնի ներկայացուցիչներ չեն եղել՝ ադրբեջանցիներն են դիերը փոխանցել։ Աճյունները դուրս բերելուց հետո Կապանում հայտնել են, որ մասունքները պետք է չորս տարբեր դիահերձարան ուղարկել՝ գործողություններն արագ անելու և պատասխանները շուտ իմանալու համար։

«Ինչքան արագ էր, որ 2,5 ամիս է բերել ենք մարմինները, հլը ոչ մի պատասխան չկա։ Ինձ օրինակ՝ ոտքի մասունք են տվել, բայց մորգում տեսա ոտքի ոսկորը՝ ընդամենը 10 սմ ոսկոր էր։ Հարցնում եմ՝ սա՞ եք ԴՆԹ-ի հանձնել և դա համընկե՞լ է։ Թող մարմինն ամբողջովին հավաքեն։ Երեխաներին տարածքում խփել են՝ 150-200 մ-ի վրա հավաքել, տարել նկարել են, 30 մետր հետ են բերել փոսի մեջ թաղել են։ Այնտեղ ոչ մեկից մազ չպետք է պակաս լիներ, բոլորը պետք է ամբողջովին լինեին՝ ինչո՞ւ են ձեռք ու ոտք տալիս։ Ի՞նչ են թաքցնում այս ժողովրդից։ Իսկ եթե թաքցնում են, տեսնում են, որ մինչև վերջ էլ գնալու եմ։ Թող ինձ ասեն Անահիտ ջան, պատերազմական վիճակ է, հանգիստ նստիր տանը՝ երեխեքը գալու են, ես էլ հասկանամ, ոչ թե ընկնեմ մորգերում ատամնաշար լվանամ, որ տեսնեմ դա ո՞ր մեկի երեխան կարող է լինել»։

Ադոյանը նաև նշեց՝ Էջմիածնի N զորամասի տղաների պատմությունը մեծ փուշ է դարձել բոլորի կոկորդին։ Ապացույցներ ունի, մինչև վերջ պայքարելու է, թույլ չի տալու, որ ԴՆԹ փորձանմուշները կեղծվեն։

«Այսօր ես ինչի պետք է զանգեմ ծնողներին՝ հարցնեմ ո՞ւմ երեխայի ատամնաշարը ինչ ձևի է։ Ես այդքանին պատրա՞ստ եմ՝ տեսնեմ ի՞նչ ատամնաշար ունեն, որ տեսնեմ, որի երեխան է եղունգ կրծում, որ հասկանամ հավանական պատասխանները։ Ես պե՞տք է անեմ այս ամենը»,- եզրափակեց Անահիտ Ադոյանը։

Խորհրդարանի ամբիոնից անկախ պատգամավոր Սոֆյա Հովսեփյանը բարձրաձայնեց վերջին ժամանակներում զոհված և անհետ կորած զինծառայողների ծնողների խնդիրները։ Դրանք վերաբերում են ընտանիքների վարկային պարտավորություններին, որոնք այս պահին որևէ կերպ աջակցություն չեն ստացել և վարկերի մարման հետ կապված խնդիրներ են առաջացել։

«Կարծես թե բանկերի հետ է իրենց առնչությունը, իսկ բանկերից պատասխանում են, որ կարող են զիջումներ անել, կամ տոկոսները, վարկը զրոյացնել, եթե վարկը զոհված կամ անհետ կորած զինծառայողի անունով լիներ, որը բառացիորեն անհնար երևույթ է»։

Պատգամավորը նշեց, որ 18 ամյա պատանուն, որը պատրաստվում էր բանակ գնալ, որևէ մեկը վարկ չէր տա և հավանականությունը փոքր է, թե որևէ ժամկետային զինծառայող կարող է ունենալ վարկ։

«Երբ 18-ամյա պատանին է գնացել, որևէ զիջումներ չեն կարող անել, քանի որ վարկերը հիմնականում ծնողների անունով է»։

Պատգամավորը դիմեց կառավարությանն այս հարցով՝ փոխանցելով ընտանիքիների խնդրանք-առաջարկը, որպեսզի հնարավոր ուշադրություն դարձնեն, բանկերի հետ որևէ քայլեր ձեռնարկեն։ Մասնավորապես այն ընտանիքները, որոնք դեռ անհայտ կորած զինծառայողներ ունեն և մինչև օրս չեն գտել զինվորներին, մեծ ծախսեր ունեն և որևէ մեկը չի կարող վարկային պարտավորությունները կատարել։

«Կամ ժամկետները պետք է երկարացվի բանկերի հետ համաձայնությամբ, կամ սուբսիդավորնվի, կամ որևէ տարբերակ գտնել, որպեսզի այս ընտանիքները չկանգնեն ծանր խնդիրների առաջ»։

Պատգամավորը նշեց՝ հույս ունի, որ կառավարությունում այս առաջնային հարցն ավելի կկարևորվի, քան ոչ առաջնային այլ հարցերը։

Դիլիջանի բժշկական կենտրոնում թեեւ դադարեցվել է Covid-19-ով վարակված հիվանդների բուժումը, սակայն ՀՀ վարչապետ Նիկոլ Փաշինյանի մորը, որի մոտ հաստատվել է կորոնավիրուսը, այնտեղ են տեղափոխել։ Այս մասին «Փաստինֆո»-ին ահազանգել են Դիլիջանի բնակիչները՝ մտահոգություն հայտնելով, որ դա կարող է նպաստել վարակի տարածմանը, քանի որ ԲԿ-ում կան տարբեր հիվանդներ, որոնք վարակվելու վտանգի առաջ են։ 

Քաղաքացիների ահազանգերի հետքերով «Փաստինֆո»-ն փորձեց տեղեկատվությունը ճշտել բժշկական կենտրոնից ու նաեւ պարզել, արդյոք ԲԿ-ն սպասարկում է կորոնավիրուսով հիվանդներին։

«Եթե չենք զբաղվում, ուրեմն չենք զբաղվում։ Հարցերին իրավասու է պատասխանել միայն տնօրենը, որը հիմա հասանելի չէ, իրավասու չենք մենք պատասխանել ձեր հարցերին։ Եթե հիվանդանոցը չի սպասարկում քովիդով հիվանդի, ոնց կարող է ունենալ քովիդով հիվանդ»,- «Փաստինֆո»-ի հարցին ի պատասխան հայտնեցին ԲԿ-ից։

Մարտի 8-ին առողջապահության նախարար Անահիտ Ավանեսյանը հայտնել էր, որ կորոնավիրուսով վարակվածների թվի աճով պայմանավորված ընդլայնվում է մահճակալային ֆոնդը։ Քովիդով վարակվածներին 6 բժշկական կենտրոն է սպասարկում, այդ թվում երկուսը Երևանից դուրս՝ Սպիտակում և Կապանում։ Հետաքրքրվեցինք ՝ արդյոք պատրաստվում են կրկին վերապրոֆիլավորվել, ինչին ի պատասխան աշխատակիցը նշեց.

«Երբ որ վերապրոֆիլավորվենք, այն ժամանակ երևի սպասարկենք, չեմ կարող հստակ պատասխանել, տնօրենը կպատասխանի ձեր հարցերին»։
Մեր զրուցակցին տեղեկացրեցինք, որ ահազանգեր ենք ստացել առ այն, որ Covid-19-ով վարակված Նիկոլ Փաշինյանի մայրը բուժում է ստանում կենտրոնում՝ վիրահատական բաժանմունքում, որտեղ այլ հիվանդներ եւս կան, ովքեր կորոնավիրոսային հիվանդություն չունեն։

«Չեմ ճանաչում այդ մարդուն, մեր մոտ նման անձնավորություն չկա։ Ձեր հացերին չենք պատասխանում»,- ասաց աշխատակիցը։

Սոցիալական ցանցում սպառնացել են իշխանություններին քննադատող, պատերազմին ժամանակ զոհված զինվորի հորը՝ Գեղամ Նազարյանին։  Այս մասին գրել է «Ճշմարտություն սերունդների համար» Հ/Կ նախագահ Գեղամ Նազարյանը.

«Այսօր՝ մարտի 22_ին Ando Grigoryan անուն, ազգանունով օգտատերը (https://www.facebook.com/ ando.grigoryan.520 ) նախ ֆեյսբուքյան ընդհանուր տիրույթում հայհոյախառն գրառում արեց իմ գրառման տակ, ապա արդեն մեսենջերով, անձնական նամակով սկսեց ոչ միայն սպառնալ, այլ հայհոյել ինձ, իմ ընտանիքին, դրանով փորձելով անարգել նաեւ Արցախում հերոսաբար զոհված իմ որդու՝ Աբգար Նազարյանի հիշատակը։

Նախ ինձ հրավիրելով Ավանի թաղապետարանի մոտ, ապա տեղեկացնելով, որ գիտի իմ հեռախոսահամարը, նա անդադար սպառնում էր հաշվեհարդար տեսնել իմ եւ ընտանիքիս նկատմամբ։ Իմ հորդորին, զանգել եւ արտահայտվել, նա ակնարկեց, որ իմ դեմ հարձակում են իրականացնելու կամ հարձակում է իրականացնելու հենց իմ բնակության վայրում, շենքի մուտքում։ Այս ամենից հետո նա ինձ արգելափակեց։ Դիմում եմ իրավապահ մարմիններին՝ ԱԱԾ_ին, ոստիկանությանը, դատախազությանը՝ միջոցներ ձեռնարկել այս օգտատիրոջը հայտնաբերելու համար եւ պարզելու հնարավոր կենտրոնը, որից ուղղորդվում է նրա գործողությունները։ Ես դիմում եմ իրավապահ մարմիններին ոչ այն պատճառով, որ վախեցած եմ։

Բոլորդ հասկանում եք, որ կրտսեր որդուս զոհվելուց հետո ես վախ չեմ կարող ունենալ, հատկապես նման սպառնալիքներից, բայց հորդորում եմ հայտնաբերել այս օգտատիրոջը, որ հանկարծ, պատահաբար ես նրան չհայտնաբերեմ։ Իմ հոգեվիճակում ես չեմ կարող երաշխավորել, որ նրա հետ հանդիպումը կսահմանափակվի միայն բացատրական զրույցով։ Անհրաժեշտության դեպքում կարող եմ տրամադրել այս օգտատիրոջ գրառման սքրին շոթերը՝ պատճենները»։

Ներազգային ռասիզմը Հայաստանում հասել է մտահոգիչ չափերի։ Այս մասին այսօր՝ մարտի 22-ին, ֆեյսբուքյան ուղիղ հեռարձակման ժամանակ հայտարարեց իրավապաշտպան Ռուբեն Մելիքյանը։

«Երեկ ինձ դիմեց մի քաղաքացի եւ ներկայացրեց արժանահավատ տեղեկություններ եւ ես չեմ վախենա այդ երեւույթն անվանել ներազգային ռասիզմ։ Երեկ երկու երիտասարդ կին «Յանդեքս» տաքսի են պատվիրել։ Օգտվելով այդ տաքսու ծառայություններից՝ մի կետից մյուսն են տեղափոխվել եւ ընթացքում մի հատվածն իրենց զրույցի խոսել են Արցախի բարբառով։ Տաքսիստը, դա նկատելով, անմիջապես կանգնել է եւ շատ կոպիտ ձեւով, վատ խոսքեր օգտագործելով այդ մարդկանց դուրս է հրավիրել։ Ասել է՝ թողեք, գնացեք ձեր Ղարաբաղը։ Ես շատ մեղմ եմ ասում, շատ ավելի կոպիտ է արտահայտվել»,- պատմեց Ռուբեն Մելիքյանը։

Ռուբեն Մելիքյանի խոսքով՝ իրենք փորձել են «Յանդեքսի» միջոցով վարորդին բերել ներողություն խնդրելու համար, ինչին տաքսի ծառայությունը պատասխանել է, որ իրենք շատ ցավում են, եւ որ կատարվածը չի համապատասխանում որակի իրենց ստանդարտներին։

«Կարելի է շատ ցավալ այն բանի համար, որ վարորդը տհաճ երաժշտություն է միացրել, ծխում է, մեքենան նորմալ վիճակում չի գտնվում, այ դա որակի ստանդարտներին չի համապատասխանում։ Ո՞նց կարող է որակի ստանդարտներին չհամապատասախանող համարել այն, ինչ ես թվարկեցի, եւ ռասիզմը։ Հենց այս տաքսի ծառայության մասով էլ մենք զբաղվելու ենք, քանի որ նրանք պետք է ունենան հակառասիստական կանոններ»,- նշեց Մելիքյանը։

Ռուբեն Մելիքյանը հայտնեց, որ այսօր Կենտրոնի ոստիկանական բաժանմունքում դեպքի առնչությամբ իրենք պատրաստվում են հաղորդում տալ ՔՕ իրավահավասարության խախտման հոդվածով։

«Մեր խնդիրն այդ թշվառ մարդուն՝ տաքսիստին, բանտ նստեցնելը չէ։ Ավելին՝ ես դեմ եմ լինելու, որ իր նկատմամբ խափանման միջոց կալանքն ընտրվի։ Մեր նպատակն այն է, որ մարդիկ հասկանան, որ պատասխանատվությունն անխուսափելի է։

Այս երեւույթը մեր իրականության մեջ ինչ-որ դրսեւորումներ ունի տարբեր առիթներով, բայց մենք պետք է խոսենք այդ մասին։ Արցախահայերի նկատմամբ այս երեւույթի տարածմանը նպաստում է նաեւ այդ դավաճան իշխանությունը։ Այս ներազգային ռասիզմի մասին մենք պետք է խոսենք, որպեսզի կարողանանք արմատախիլ անել։ Երբ արցախցիները ծայրահեղ փխրուն վիճակում են, այս դավաճան իշխանության պատճառով տուն են կորցրել, զոհեր եւ վիրավորներ ունեն, այս երեւույթն իրենց առավել մեծ այլանդակություն է ներկայացնում»,- ասաց Մելիքյանը։

Մելիքյանը կոչ արեց հասարակությանը ներազգային ռասիզմի հանդիպելու դեպքում անպայման արձագանքել․ «Խոսքը միայն արցախցիների նկատմամբ ռասիզմի մասին չէ։ Կարող է վերաբերել քաղաքին, մարզերին, կարեւորը, որ այս երեւույթն արմատախիլ արվի»։

ԳՇ նորանշանակ պետ Արտակ Դավթյանին ներկայացրեցի ԶՈՒ հրամկազմին: Այս մասին Facebook-ի իր էջում գրել է ՀՀ վարչապետ Նիկոլ Փաշինյանը, ով նաեւ տեսանյութ է հրապարակել:

Վարչապետ Փաշինյանն իր խոսքում, մասնավորապես, նշել է.

«Հարգելի պարոն նախարար,

հարգելի գործընկերներ,

պարոնայք գեներալներ և սպաներ,

Այսօր հավաքվել ենք, որպեսզի ներկայացնեմ գեներալ-լեյտենանտ Արտակ Դավթյանին՝ Զինված ուժերի գլխավոր շտաբի պետի պաշտոնում: Իհարկե նորություն չկա, որովհետև արդեն երկար ժամանակ բոլորս գիտենք, որ հենց պարոն Դավթյանն է փոխարինելու Օնիկ Գասպարյանին Գլխավոր շտաբի պետի պաշտոնում, բայց մեր օրենսդրության առանձնահատկություններից ելնելով ստիպված էինք որոշ ժամանակ սպասել:

Բոլորդ գիտեք, որ պարոն Դավթյանը Գլխավոր շտաբի պետի պաշտոնը թողել է ծառայության հետ կապ չունեցող պատճառներով և պետք է արձանագրեմ, որ մենք պարոն Դավթյանի հետ այս ընթացքում անընդհատ կապի մեջ ենք եղել ու պարզ է եղել, որ նրա ներուժը պետք է անպայման օգտագործենք մեր պետական գործերում, ներգրավենք նրան:

Այս ընթացքում պարոն Դավթյանը ստանձնել է Ռազմարդյունաբերական կոմիտեի նախագահի պարտականությունները, նաև պատերազմի ընթացքում ես նրան հրավիրել եմ Սյունիք՝ Սյունիքի ինքնապաշտպանությունը կազմակերպելու կամ ինքնապաշտպանության կազմակերպմանը մասնակցելու նպատակով: Նկատի ունեմ՝ պարոն Դավթյանն այս ընթացքում միշտ ներգրավված է եղել և ըստ էության կտրված չի եղել պետական գործերից: Համոզված եմ, որ իր առաքելությունը կշարունակի նույնպիսի բարձր մակարդակով, ինչպիսի բարձր մակարդակով սկսել էր: Իհարկե, առաքելությունը հեշտ չէ, չափազանց ծանր ժամանակներ ենք ապրում և խնդիրներն ավելի քան լուրջ են: Խնդիր մեկ՝ պաշտպանել բանակը, պաշտպանել Զինված ուժերը և խնդիր երկու՝ այնպես անել, որ Զինված ուժերում տեղի ունենան անհրաժեշտ բարեփոխումներ, որոնք կուժեղացնեն առաջին հերթին Զինված ուժերը, Հայաստանի արտաքին անվտանգության պաշտպանվածության մակարդակը, և իհարկե, մեր բոլորի վստահությունը Զինված ուժերի ու մեր անվտանգային համակարգի նկատմամբ:

Պարոն Դավթյան, շնորհավորում եմ Ձեզ այս բարձր կարգավիճակը վերստանձնելու առիթով: Թույլ տվեք համոզմունք հայտնել, որ մեզ կհաջողվի լուծել այն խնդիրները, որոնք բխում են մեր երկրի, մեր պետության, մեր ժողովրդի շահերից: Ամենայն հաջողություն եմ մաղթում Ձեզ այս պատասխանատու պաշտոնում և հույս ունեմ, որ մենք հնարավորինս արագ կհաղթահարենք այն բարդությունները, որոնք հայտնի հանգամանքների բերումով ծառացել են մեր առաջ:

Մի հանգամանք ևս ուզում եմ ընդգծել. ես 2018 թվականին Ձեզ ներկայացնելով Զինված ուժերի գլխավոր շտաբի պետի պաշտոնին՝ շատ կարևոր եմ համարել, որ Զինված ուժերի ապաքաղաքական լինելու հանգամանքը ճշգրտորեն պահպանվի և պետք է ասել, որ այդ խնդիրը նույնպես Դուք կատարել եք շատ բարձր մակարդակով:

Մենք 2018 թվականի դեկտեմբերին ունեցել ենք արտահերթ խորհրդարանական ընտրություններ և չի եղել մի ահազանգ, մի դեպք, երբ արձանագրվի, որ Զինված ուժերը որևէ ձևով ենթարկվել են քաղաքական ներգործության կամ ներքաշվել են քաղաքական գործընթացների մեջ: Սա չափազանց կարևոր է և համոզված եմ, որ նույնպիսի հստակ իրավիճակ մենք կունենանք նաև հետագայում, ապագայում:

Եվ ուզում եմ կրկնել ևս մեկ անգամ, որ այն իրադարձությունները, որ տեղի ունեցան փետրվարից մինչև այս կողմ, շատ պարամետրերով հասկանալի են: Ցանկանում եմ նշել, հավաստիացնել, որ որևէ մարդկային, քաղաքական հետք իմ մեջ դա չի թողել, ուղղակի պետք է խնդրեմ, պետք է պայմանավորվենք, որ Զինված ուժերի ապաքաղաքականացումը, հետագայում ապաքաղաքական լինելու սկզբունքը պետք է սրբորեն պահենք: Դա պետք է ոչ թե ինձ, դա պետք է ոչ թե կոնկրետ անհատի կամ խմբի, դա կարևոր սկզբունք է, որ առաջին հերթին պետք է Զինված ուժերին:

Զինված ուժերը դեպի թիկունք հայացք չպետք է ունենան ընդհանրապես, այլ բան, որ կան խնդիրներ, հարցեր, որ Զինված ուժերի բնականոն զարգացումը կառավարությունը պետք է ապահովի, մենք բոլորս պետք է ապահովենք, հատկապես այս իրավիճակում: Զինված ուժերը, որնքան էլ մի քիչ տարօրինակ հնչի, պետք է պաշտպանված զգա, բայց մյուս կողմից էլ պիտի չխուսափենք բարձրացված հարցերին պատասխանելուց, որովհետև դա պետք է առաջին հերթին մեզ: Որոշակի հետևություններ իհարկե պետք է արվեն, բայց այդ հետևությունները չպետք է լինեն այնպիսին, ինչի վերաբերյալ, ցավոք իմ համոզմամբ, հաջողվել էր մեր Զինված ուժերի մի շարք հարգելի ներկայացուցիչների համոզել»:

Արտակ Դավթյանը շնորհակալություն է հայտնել վարչապետին վստահության համար և նշել. «Իհարկե տրված ցուցումները վերցնում ենք ի կատարում և վստահ եմ, որ Զինված ուժերը քաղաքական որևէ գործընթացներում մասնակցություն չեն ունենալու, որը նախատեսված չէ Սահմանադրությամբ և օրենքներով: Միևնույն ժամանակ, Ձեր թույլտվությամբ պարոն վարչապետ, կցանկանայի նորից շեշտել և շնորհակալություն հայտնել գեներալ Գասպարյանին պատերազմի ընթացքում ղեկավարման, ինչպես գեներալ Գալստյանին՝ այս ընթացքում պարտականությունների կատարման համար: Հույս ունենք՝ համատեղ ջանքերով կկարողանանք լուծել այն բոլոր խնդիրները, որոնք ներկայում կան Զինված ուժերի առջև»:

Ամփոփելով՝ վարչապետ Փաշինյանը նշել է. «Ես ևս միանում եմ Ձեր խոսքերին, ևս մեկ անգամ Գեներալ-գնդապետ Օնիկ Գասպարյանին շնորհակալություն եմ հայտնում մատուցած ծառայությունների համար և պարոն Գալստյան իհարկե Ձեզ շնորհակալություն՝ այս ընթացքում Գլխավոր շտաբի պետի պարտականությունները կատարելու համար: Շնորհակալություն բոլորին, որովհետև իսկապես շատ բարդ, ծանր ժամանակաշրջանով ենք անցել և կարծում եմ, որ մենք, ի վերջո, այս ողջ ընթացքում կարողացանք անել առավելագույնը և արեցինք այն անհրաժեշտը, որպեսզի այս ամենից դուրս գանք ուժեղացած, համախմբված և, ի վերջո, ապագայի նկատմամբ լավատեսությունը նորոգած»:

Երեխաների իրավունքների պաշտպանության միջազգային փորձագետ, իրավաբանական գիտությունների թեկնածու, դոցենտ Դավիթ Թումասյանը, մեկնաբանեկով Նիկոլ Փաշինյանի հետ հանդիպմանը մեծաթիվ երեխաների ներկայությանը, մասնավորապես գրում է.

«ԵՐԵԽԱՅԻ ԱՆՎՏԱՆԳՈՒԹՅՈՒՆՆ ԱՌԱՋՆԱՅԻՆ Է

Երեխայի իրավունքների մասին կոնվենցիան չի բացառում երեխաների մասնակցությունը հավաքներին, և նշում, որ երեխան կարող է արտահայտել իր կարծիքը, ներառյալ՝ քաղաքական: Սակայն միևնույն ժամանակ Կոնվենցիան պահանջում է ապահովել երեխաների անվտանգությունը՝ այդ պարտականությունը դնելով պետության վրա և նշելով, որ «պետություններն ապահովում են երեխաների մասին հոգալու կամ նրանց պաշտպանելու համար պատասխանատու հիմնարկների, ծառայությունների և մարմինների համապատասխանությունը»: Պատկան մարմիններից բացի ընտանիքը նույնպես պետք է ապահովի երեխայի անվտանգությունը՝ անհրաժեշտության դեպքում դիմելով իրավասու մարմիններին:

Այն, որ բոլորիս հայտնի հավաքի ժամանակ վարչապետի անվտանգությունը գերպաշտպանված էր՝ ակնհայտ էր, իսկ այն որ երեխաների անվտանգությունը ոչ միայն անտեսված, այլ նաև ենթադրաբար վտանգված (հակառակ դեպքում՝ նման պաշտպանության ու անվտանգության միջոցներ չէին իրականացվի վարչապետի անձի առնչությամբ)՝ պահանջում է լուրջ ուսումնասիրություն և քննության իրականացում՝ երեխայի լավագույն շահի համատեքստում՝ մեղավորների արարքներին տալով պատշաճ իրավական գնահատական:

Հ.Գ. Հունիսմեկյան միջոցառում լիներ, որ երեխաների մասնակցությունը խիստ ցանկալի լիներ, դեռ կարելի էր մտորել անվտանգության հավասարակշռման հարցը (չնայած 2020թ.-ին ի թիվս այլ միջոցառումների դա էլ չիրականացվեց՝ ելնելով երեխաների անվտանգության առաջնահերթությունից), իսկ այս դեպքում երեխաների մասնակցության արդարացում դժվար թե գտնվի»։

«Հենակետ» վերլուծական կենտրոն ՀԿ ղեկավար, Արցախի նախագահի անվտանգության հարցերով նախկին խորհրդական Տիգրան Աբրահամյան ֆեյսբուքյան գրառում է արել, որում ասվում է․

«Առողջապահության նախարարությունը հաղորդագրություն-տեղեկանք է ներկայացրել երկրում կորոնավիրուսային վիճակի, դրա դինամիկայի, կանխման և անհրաժեշտ միջոցառումների վերաբերյալ։

Ռելիզում նշվում է, որ վարակի վերարտադրության ցուցանիշը (7 օրվա հաշվարկով) 16.03.2021-ի դրությամբ կազմում է 1.48, ինչը նշանակում է, որ եթե ինչպես բնակչության, այնպես էլ տնտեսվարող կազմակերպությունների կողմից չպահպանվեն անվտանգության կանոնները, մասնավորապես՝ դիմակի կրումը բաց և փակ տարածքներում, ձեռքերի ախտահանումը կամ լվացումը օճառով, ինչպես նաև սոցիալական հեռավորության պահպանումը առնվազն 1.5 մետր, ապա մոտակա 7 օրվա ընթացքում կարձանագրվի հիվանդության մոտ 6820 նոր դեպք, ինչը կազմում է այսօրվա բուժում ստացողների մոտավորապես 69%-ը:

Մասնագիտական առումով, բնականաբար շատ հեռու եմ նախարարության խորհուրդներին, կանխարգելիչ միջոցառումներին գնահատական տալուց, բայց որպես քաղաքացի, ով տեսնում է երկրի վարչապետի հաճախակիացող հավաք-հանդիպումները, ինձ մոտ նվազագույնը մեկ հարց է առաջանում՝ ինչո՞ւ է Նիկոլ Փաշինյանն այս պայմաններում բազմամարդ միջոցառումներ կազմակերպում։

Միամտություն կլինի կարծել, թե նա այս տեղեկատվությանը չի տիրապետում։ Իսկ տիրապետման պայմաններում մեծ խմբերի հետ տարբեր ձեաչափով հանդիպումներով վարչապետը ոչ միայն վտանգում է մարդկանց առողջությունը, այլ մարդկային նոր կորուստների իրական վտանգ ստեղծում։

Նկատենք, որ ոչ միայն իր կողքը բեմահարթակներին կանգնող, այլ հանդիպման մասնակիցների մի մասը առանց դիմակների է կամ սխալ կրմամբ, իսկ սոցիալայան հեռավորության մասին դեռ չեմ խոսում։

Ի՞նչն է դրդում Փաշինյանին շարունակելու մարդկային կյանքերի ընդհատման շղթան՝ պատերազմի 4-5 հզ զոհից մինչև նույնքան կորոնավիրուսային մահեր, թող անհրաժեշտ եզրակացություններ անեն դեռևս նրան սատարող մեր քաղաքացիները»։