Եթե Հայաստանի երկրորդ նախագահ Ռոբերտ Քոչարյանը դիմի դատարան, ապա հատուցում կստանա ՍԴ–ի կողմից անվավեր ճանաչված 300.1 հոդվածով  առաջադրված մեղադրանքի շրջանակում կալանքի տակ մնալու համար։ Այս մասին NEWS.am-ը տեղեկանում է hraparak.am-ի՝ ՍԴ նախկին անդամ Ալվինա Գյուլումյանի՝ տված հարցազրույցից։

Հարցազրույցն ամբողջությամբ ստորեւ՝

Սա ի՞նչ է ենթադրում, տիկին Գյուլումյան, ստացվում է՝ Մարտի 1-ի գործն ի չի՞ք է դառնում, այսինքն՝ բացի Քոչարյանին առնչվող հատվածից, մյուսների մասով եւս, որոնց այս հոդվածով մեղադրանք է առաջադրվել, գործը պետք է կարճվի՞։

Իհարկե։ Ստացվում է, որ այդ հոդվածն անվավեր է, եւ դրա հիման վրա ինչպե՞ս կարող է քրեական գործը շարունակվել։

Իսկ ինչ-որ մարդիկ պատասխանատվության ենթարկվելո՞ւ են դրա համար, որ երեք տարի մարդկանց ապօրինի կամ Սահմանադրությանը հակասող հոդվածով քրեական հետապնդման են ենթարկել։

Գիտե՞ք ինչ, հոդվածը եղել է, ապօրինի ասել, թե հակասահմանադրական, հենց դրա համար էլ Սահմանադրական դատարանը կա, որ քննարկի։ Եվ սա կոչվում է, այսպես ասած, հետագա վերահսկողություն։ Եվ էդ հետագա վերահսկողությամբ եթե պարզվել է, ապա Դուք ոչ մեկին չեք կարող մեղադրել, ասել՝ ի սկզբանե դուք ինչու էիք հակասահմանադրական հոդվածով հետապնդում։ Այլ բան է, որ ոչ օրինական հետապնդման համար որոշակի հատուցման իրավունք են ստանում այդ մարդիկ։ Սա լրիվ այլ խնդիր է։

Այսինքն՝ Ռոբերտ Քոչարյանը, Սեյրան Օհանյանը եւ բոլոր նրանք, որոնց առաջադրվել է այս հոդվածով մեղադրանք, պետք է հատուցո՞ւմ ստանան։

Չէ, նա, ով որ կալանքի տակ է եղել։ Մյուս հետապնդումների համար չկա։

Կալանքի տակ եղել է Ռոբերտ Քոչարյանը, այն էլ՝ երկու անգամ, եւ ինքը եթե դիմի, իրավունք ունի՞ հատուցում ստանալու, թե՞ անկախ դիմելուց՝ օրենքը պարտադրում է հատուցում։

Չէ, եթե դիմի, կստանա։

Իսկ ի՞նչ տեսակի պետք է լինի այդ հատուցումը։

Դժվար է ասել՝ ինչ տեսակի։

Տիկին Գյուլումյան, փաստորեն, նույնիսկ այդ դեպքում, որ փորձեցին Ձեզ եւ ՍԴ որոշ այլ անդամների չեզոքացնել, փոխել ՍԴ կազմը եւ իրենց «սրտի դատավորներին» բերել Սահմանադրական դատարան, բայց բոլոր դատավորները բարձր գտնվեցին քաղաքական նպատակներից։

Բոլորը բարձր գտնվեցին ու նաեւ ունեին Եվրոպական դատարանի խորհրդատվական եզրակացությունը, Վենետիկի հանձնաժողովի եզրակացությունը, եւ այս պայմաններում նույնիսկ «սրտի դատավորներն» արդեն, ըստ էության, կաշկանդված էին այլ վճիռ կայացնել։

Բայց հիմա նրանց վրա կա հարձակում, որ նախկիններին ծախված դատավորներ էին, այս իշխանությունը չկարողացավ վեթինգ անել եւ իրապես բարեփոխել դատական համակարգը եւ այսպես շարունակ։

Մենք առաջընթաց չենք ունենա, եթե չդադարենք ասել «նախկին» ու «ներկա»։ Ոչ մի առաջընթաց չի լինի ոչ մի բնագավառում։

Հավանական համարո՞ւմ եք, որ այս իշխանությունը մի նոր օրենք մոգոնի եւ արագ ընդունի, որով, ասենք, ՍԴ-ի այս որոշումն առոչինչ ճանաչվի։

Չեմ կարծում։ Եվ հետո, գիտե՞ք ինչ, այս որոշումը ձեռնտու է նաեւ այս իշխանությանը, չէ՞ որ անընդհատ հարց է դրվում, որ նրանք էլ են սահմանադրական կարգ խախտել։ Հետեւաբար, այս հոդվածը կիրառելի չի լինի նաեւ իրենց համար։

Գուցե պե՞տք էր այս իշխանությանը, որ ՍԴ-ն այսպիսի որոշում կայացներ։

Չեմ կարող ասել, բայց, համենայնդեպս, երաշխիք է նաեւ իրենց համար։

Հիշեցնենք, որ մարտի 26-ին Սահմանադրական դատարանը ՀՀ քրեական օրենսգրքի 300.1 հոդվածը Սահմանադրության 78-րդ (համաչափության սկզբունքը) եւ 79-րդ (որոշակիության սկզբունքը) հոդվածներին հակասող եւ անվավեր ճանաչեց։ 300.1 հոդվածով մեղադրվում էին ՀՀ նախկին նախագահ Ռոբերտ Քոչարյանը, ՀՀ ԶՈՒ գլխավոր շտաբի նախկին պետ Յուրի Խաչատուրովը, պաշտպանության նախկին նախարար Սեյրան Օհանյանը:

Ձվի խնդիրն ու ասֆալտի խնդիրը կլուծվեն մայիսի վերջին-հունիսի սկզբին՝ Նիկոլ Փաշինյանի նախընտրական թեժ շրջանում։ Այս մասին ֆեյսբուքյան իր էջում գրել է քաղաքագետ Աղասի Ենոքյանը:

«Ասֆալտը դեռ «նախկիններից» եկող նախընտրական հայտնի տրյուկ է։ Իսկ ձվի հարցին թերեւս կգումարվեն այլ արհեստական պրոբլեմներ, որոնք Նիկոլը քաջաբար կհաղթահարի ընտրություններին ընդառաջ։ Նա շատ լավ է հասկանում, որ ժողովուրդը կարճ հիշողություն ունի, եւ շնորհակալ է լուծումներ տվողին, մոռանալով, թե ով էր ստեղծել պրոբլեմները։

Նման հաջողված հնարքներից էր «եռակողմ հայտարարությունն» արդարացնող միֆը, թե դրանով 30 հազար զինվորի կյանք փրկվեց։ Ժեխը հավատաց դրան, բայցեւ չհարցրեց, թե ով սարքեց պատերազմը եւ ով զոհեց 5 հազար տղաներին։

Ի դեպ, ամենայն հավանականությամբ, Նիկոլին հումանիտար օգնություն կուղարկի նաեւ Իլհամը՝ ընտրությունների նախօրյակին մեծ թվով գերիներ ազատ արձակելով։ Նրա համար կարեւրագույն խնդիր է Նիկոլի հաղթանակը, եւ կարող է հրաժարվել գերիներին տարածքների հետ փոխանակելու գաղափարից, շատ լավ հասկանալով, որ Նիկոլի իշխանության շարունակվելու դեպքում նա դեռ շատուշատ տարածքներ կարող է վերցնել։ Չի բացառվում, որ բանավոր պայմանավորվածությունների շրջանակում հենց Նիկոլն է խնդրել Իլհամին գերիներին որոշ ժամանակ պահել իր մոտ եւ բաց թողնել ընտրությունների նախօրյակին, որպեսզի դա ներկայացնի որպես իր իմաստուն դիվանագիտության հաղթանակ»։

Գերագույն գլխավոր գելխեղդի հայտնի հայտարարությունից հետո թիմում բուռն ցանկություն կա՝ վերանվանել խմբակցությունը՝ կոչելով այն «Իմ Գայլը»։ Քայլելով էլ տեղ չես հասնի, միակ ճանապարհը մնաց խեղդելը։ Այս մասին գրում է Այլընտրանքային նախագծեր խմբի անդամ Մարինե Սուքիասյանը:

«Նոր իշխող ուժ՝ «Իմ Գայլը»

Գերագույն գլխավոր գելխեղդի հայտնի հայտարարությունից հետո թիմում բուռն ցանկություն կա՝ վերանվանել խմբակցությունը՝ կոչելով այն «Իմ Գայլը»։ Քայլելով էլ տեղ չես հասնի, միակ ճանապարհը մնաց խեղդելը։

Եթե նկատել եք, Նիկոլը դժվար է հարմարվում ուրբանիզացիային, էվոլյուցիոն ինչ-որ կանչ նրան անընդհատ ձգում է դեպի անտառ։ Մի ժամանակ, որպես իր պաշտոնավարման հաջողված փաստ, անդադար նշում էր Ենոքավանի անտառներում հայտնված ընձառյուծին։ Թե ինչ կապ ուներ այդ կենդանու հաջողությունների հետ ինքը, այդպես էլ հնարավոր չեղավ հասկանալ։ Հիմա էլ հետպատերազմյան Հայաստանի մոդեռնիզացիան և մեր երկրի աշխարհքաղաքական անվտանգության բանաձևը պատկերացնում է գելխեղդի աշխարհայացքով։ Ի դեպ, ասում են 100 գելխեղդից մեկն է կարողանում հաղթել գայլին։ Սովորաբար լրիվ հակառակն է լինում։ Ուղղակի գելխեղդը ճղճղան է ու իր արնաքամ պարտությունը փորձում է խլացնել։

Իսկ ընդհանրապես, Փաշինյանի արիստոկրատ կերտվածքում չափից շատ է արյունը։ Նույնիսկ հեռավոր գյուղի միտինգում ձգտում է խոսքի մեջ արյուն թափել։ Նրա քաղաքական և հումանիտար գոյության առանցքում անընդհատ արյունն է՝ իր մեղքով, իր շնորհիվ թափված արյունը։

Կարող էր, չէ՞, իրեն նույնականացնել մեկ այլ խաղաղ կամ խելացի տեսակի հետ՝ աղավնու, դելֆինի, փղի, կամ գոնե աշխատող ավանակի հետ, որոնք արյուն ու ողբերգություն հաստատ չեն ուզում։ Բայց չէ, նրան ձգում են արյան ելքով համեմատությունները։

Իսկ «Իմ Գայլը» խմբակցությունը դեռևս չի հասկանում, որ Փաշինյան-գելխեղդի վերջին զոհը լինելու են իրենք, երբ մի օր արթնանան ու տեսնեն, որ գելխեղդը բոլորին «քցել է»՝ փրկելով իր առաքինի հոգին»,- գրել է Սուքիասյանը։

Գորիսի փոխքաղաքապետ Իրինա Յոլյանն ահազանգում է.

«Երեկ գիշերն ադրբեջանցիները քարեր են նետել զոհված զինածայողների մարմինները տեղափոխող մեքենայի վրա, ջարդել ապակիները։

Վարորդը պատմում է, որ Ստեփանակերտից գիշերն է դուրս  եկել,  դեպի Գորիս ճանապարհվել,  թանձր մառախուղ է եղել, զգացել է, որ մեքենային  քարերով հարվածում են։ Դեպքը տեղի է ունեցել գիշերը, ժամը՝ 01։30-ին։

Վարորդը կանգ չի առել,  շարունակել է  վարել,  Գորիս է հասցրել զոհվածների մարմինները։

Սրանք փաստեր են թշնամու ագրեսիվ վարքի մասին, որոնք   պետք է արձանագրվեն և միջոցներ ձեռնարկվեն։ Խաղաղ բնակչի անվտանգ տեղաշարժի իրավունքը ի վերջո ո՞վ  պետք է վերջապես երաշախավորի»։

Ղարաբաղյան պատերազմը նաև ԵԱՀԿ Մինսկի խմբի համանախագահների գործունեության ձախողումն էր: Այս մասին Ազգային ժողովի արտաքին հարաբերությունների մշտական հանձնաժողովի նիստում հայտարարեց արտաքին գործերի նախարար Արա Այվազյանը:

«Պատերազմը ցույց տվեց, որ Մինսկի խմբի համանախագահները ձախողել են իրենց գործունեությունը: Նրանք կոչված էին և կոչված են ոչ միայն բարենպաստ մթնոլորտ ստեղծել բանակցությունների միջոցով հարցի կարգավորման համար, նրանք նաև պետք է բացառեին ռազմական լուծումները, իսկ սեպտեմբերի 27-ը ապացուցեց՝ իրենք ձախողել են իրենց այդ մանդատի ուղղությունը»,- ասաց Արա Այվազյանը:

Արտաքին գործերի նախարարի խոսքով Հայաստանը շահագրգիռ կողմ է հանդիսանում, որպեսզի բանակցություններն սկսվեն Մինսկի խմբի համանախագահների հովանու ներքո:

«Հայաստանին պետք է ուժեղ համանախագահություն, որը ոչ թե կարձանագրի ներկա իրավիճակը, այլ նաև կղեկավարի գործընթացը»,- նշեց ԱԳՆ նախարարը:

Արցախյան 44-օրյա պատերազմի ընթացքում հոսպիտալներում և հիվանդանոցներում զինծառայողների, ոստիկանների, ԱԱԾ սահմանապահ զորքերի, կամավորների շրջանում եղել է մինչև 11 հազար վիրավոր և հիվանդ։ Լրագրողների հետ զրույցում այս մասին հայտնեց ՀՀ ԶՈւ ռազմաբժշկական վարչության պետի տեղակալ, պլանավորման բաժնի պետ, գնդապետ Գեղամ Փաշիկյանը՝ ամփոփելով ռազմաբժշկական վարչության կատարած աշխատանքը պատերազմի ընթացքում։ Նա ընդգծեց, որ պատերազմի օրերին մեծ ծանրաբեռնվածությամբ է աշխատել բժշկական անձնակազմը։

«55 տոկոսը ունեցել են թեթև վիրավորումներ, 35 տոկոսը՝ միջին ծանրության վիրավորումներ, 7 տոկոսը՝ ծանր վիրավորումներ, 2 տոկոսը՝ ծայրահեղ ծանր  վիրավորումներ»,- ասաց Փաշիկյանը։

ՀՀ ԶՈւ ռազմաբժշկական վարչության պետ, գնդապետ Սահակ Օհանյանն իր հերթին նշեց, որ ներկայումս փաստացի բուժում է ստանում շուրջ 1500 զինծառայող, նրանք գտնվում են վերականգնողական արձակուրդում։

«Ներկայումս ունենք 885 արդեն իսկ առաջին, երկրորդ և երրորդ կարգի հաշմանդամներ։ Առաջին և երկրորդ կարգի հաշմանդամները օգտվում են զինծառայողների ապահովագրության հիմնադրամի աջակցությունից»,- տեղեկացրեց Օհանյանը։

Հիշեցնենք, որ Արցախյան 44-օրյա պատերազմում հայկական կողմի զոհերի, անհետ կորածների ու գերիների թվի վերաբերյալ առայսօր պաշտոնական տվյալներ չկան։ Մինչ այսօրվա ասուլիսը՝ չէր նշվում նաև վիրավորների թիվը։

«Պոլիտէկոնոմիա» հետազոտական ինստիտուտի ղեկավար Անդրանիկ Թևանյանը ֆեյսբույքան իր էջում գրել է.

«Կարսի անկումը պայմանավորված էր նաև այն բանով, որ հայ բոլշևիկները քեմալական Թուրքիային չէին համարում թշնամի և պատրաստ էին հայկական տարածքները զոհաբերել՝ հանուն համաշխարհային պրոլետարիատի հաղթանակի։ Դա ցեղասպանությունից հետո ազգային «ես»-ից փախչելու ենթագիտակցական մղում էր։

Հայ բոլշևիկներից, ավելի ճիշտ՝ թրքաբոլշևիկներից ոմանք սեփական ձեռքերով փող ու ոսկի էին հասցնում թուրքերին, որպեսզի «ապաշրջափակեն տարածաշրջանը», այն է՝ «կարմրած» Աթաթուրքի հետ եղբայրանան։ Կասյանը, Ղուկասյանը և մյուսներն այն օրերի հեղափոխականներն էին։ Մեր օրերի «թավշյա» հեղափոխականների հոգևոր հայրերը։

Քերիր ցանկացած հայ հեղափոխական-գլոբալիստի և տակից դուրս կգա հայ թրքաբոլշևիկը։ Ոչ մի նոր բան չկա։ Նժդեհը ճիշտ էր․ հայի տականք տեսակից ավելի տականք աշխարհում չես գտնի։

Հ․Գ․ Նիկոլական իշխանությունը ապրիլի 24-ից առաջ պրոթուրքական ագրեսիվ քարոզ է սկսել։ Ակնհայտ է, որ սրանք թուրքերի հետ ունեն ոչ հրապարակային շփումներ ու պայմանավորվածություններ»:

Հունիսի 20-ին տեղի կունենան խորհրդարանական արտահերթ ընտրությունները: Այդ ընտրությունները նրա մասին են, որ ժողովուրդը պետք է որոշում կայացնի անցյալի ու ապագայի վերաբերյալ: Այս մասին Արագած համայնքում հայտարարել է վարչապետ Նիկոլ Փաշինյանը։

«Դուք պետք է գնահատական տաք անցյալին ու որոշում կայացնեք ապագայի վերաբերյալ», — ասել է նա։
Փաշինյանն հայտարարեց, որ ապրիլին հրաժարական է տալու.

«Ինչո՞ւ, ոչ թե հրաժարական եմ տալու գնալու, այլ, որպեսզի տեղի ունենան արտահերթ խորհրդանական ընտրություններ, այդ ընթացքում շարունակելու եմ լինել վարչապետի պարտականությունները կատարող: Եթե դուք կվերահաստատեք ձեր մանդատը, ես, մեր թիմը կշարունակենք ծառայել ձեզ շատ ավելի լավ, քան նախկինում, եթե չէ, մենք խոնարհաբար իշխանությունը կփոխանցենք նրան, ում դուք կընտրեք, եթե դուք կընտրեք գելերին, ձեր ընտրությունն ա, մենք ի՞նչ կարանք անենք։ Մենք սխալվել ենք, բայց չենք խաբել», — ասաց Նիկոլ Փաշինյանը։

Տավուշի մարզպետ Հայկ Չոբանյանը ՀՀ նախկին վարչապետ Հրանտ Բագրատյանի դեմ ներկայացրած հայցով պահանջում է հերքել իր հասցեին հնչած արտահայտությունները եւ որպես փոխհատուցում պահանջում է մեկ մլն ՀՀ դրամ։ Այս մասին NEWS.am-ի հետ զրույցում ասաց Հրանտ Բագրատյանը։

«Այսօր եմ ստացել հայցը։ Մարզպետը հայցում նշել է, որ իր պատիվն ու արժանապատվությունը խաթարվելեն, երբ ես ֆեյսբուքյան գրառումներիցս մեկում իրեն անվանել եմ դավաճան։ Նա պահանջել է հերքում եւ մեկ միլիոն դրամի փոխհատուցում։ Իմ կարծիքով՝ ինքը վարչապետի հանձնարարությունն է կատարում, հակագրոհի են անցել»,– ասաց նախկին վարչապետը։

Նշենք, որ այսօր Տավուշի մարզպետ Հայկ Չոբանյանը լրագրողների հետ զրույցում ասել էր, որ հայց է ներկայացրել՝ ընդդեմ Հրանտ Բագրատյանի։

Մարզպետն անդրադառնալով նախկին վարչապետի՝ ավելի վաղ արված հայտարարությանը, թե «ադրբեջանցի «խաղաղապահ» զինվորները չափագրումներ են կատարում Տավուշի մարզի Ազատամուտ համայնքում, նախկին Բարխուդարլիի մերձակայքում», ասել էր, որ այդ հայտարարությունը բացասական ազդեցություն է ունեցել ներդրումային միջավայրի վրա։

«Անասնապահության ոլորտում 4 մլն դոլարի ներդրումային ծրագիր ունեինք, այն հիմա կանգնած է, իհարկե, կարծես թե մենք գտնվում ենք այդ խնդրի լուծման փուլում, բայց այդ խոսակցությունների ժամանակ կանգնեց, եւ ներդրողները ժամանակ ուզեցին, որպեսզի հասկանան՝ իրենց մասնակցությունը վերահաստատում են, թե ոչ։ Երկրորդ ծրագիրը խոշոր թռչնաբուծական համալիրի կառուցումն էր, որը եւս կանգնել է այդ պատճառով, եւ մենք փորձում ենք դա եւս վերագործարկել»,–ասել էր ՀայկՉոբանյանը։

Տավուշի մարզպետը նշել էր, թե այդ հայտարարությունը ոչ միայն ազդեցություն է ունեցել տնտեսական բաղադրիչի վրա, այլեւ այն անվտանգային նշանակություն ունի։

«Որովհետեւ այդտեղ ապրում են մարդիկ, որոնք տասնամյակներ շարունակ ապրել են իրական վտանգի տակ եւ ըստ էության պատերազմական վիճակում, եւ չի կարելի այդ մարդկանց հաշվին պոպուլիստական բաներ հավաքել»,–ասել էր նա ու հավելել նաեւ, որ «իրենք փոքր–փոքր քարերով ամրոց են կառուցում, իսկ այդպիսի հայտարարությունները ամբողջ պատը քանդում են»։

«Քաղաքական գործիչը իրավունք չունի՞, երբ որ իրադարձություն է տեղի ունենում… ձայն չհանի՞, որ Ղարաբաղը տվել են, Գորիսում սահմանները տվել են, թուրքը եկել է, գծի վրա է նստել, այսինքն՝ մենք սրա մասին չխոսենք՝ ինչ է, թե անասնապահական ծրագրերը կկանգնե՞ն։

Եթե մեր հայրենիքի հետ կապված խնդիրներ կան՝ անդորրը խանգարելը ո՞րն է։ Այսինքն՝ եթե հիմա մենք հայտարարում ենք, որ Ղարաբաղին դավաճանել են, հենց մեկն էլ ինքը, անդո՞րր ենք խանգարում։ Իրենց  ծրագրում գրած էր, որ Ղարաբաղը կդառնա անկախ պետություն, հիմա Ղարաբաղը չկա։ Ես հազար ու մի բացատրություն ունեմ գործող վարչակարգի դավաճանության մասով, այդ թվում՝ իր մասով։

Ինչ վերաբերում է անասնապահական եւ թռչնաբուծարանի ծրագրերի վերաբերյալ ասածին, ապա դա աբսուրդի ոլորտից է։ Դա միայն վկայում է, որ մեր հարցադրումները ճիշտ են, ու իրենք ինֆորմացիա չեն տալիս։ Իրենք նույնիսկ օրենք ընդունեցին, որի արդյունքում հիմա մոտենալ չի լինում սահմանին, որպեսզի տեսնենք՝ սահմանը որքանով է հեռացել, ինչքանով են տեղափոխել։ Ընդամենը Ազատամուտի բնակիչների արձագանքն ենք ասել, որոնք անհանգստացել էին դրանից։

Ղարաբաղը հանձնել եք, քիչ չի, անցնում եք դիկտատուրայի՞, դուք տեսեք՝ ինչքան պետք է մարդը ամոթ չունենա, որ ասի՝ անասնապահական ծրագիր կար, բայց չի լինում իրագործել, գուցե չի լինում իրագործել, որովհետեւ սահմանն այնքան մոտ է, որ մարդիկ վստահ չե՞ն զգում։ Գնացեք, ներդրողներին գտեք ու հարցրեք, թե ինչու չեք ցանկանում ներդրում կատարել։ Եթե ներդրողը հրաժարվել է ներդրումից, չի հրաժարվել այն պատճառով, որ Բագրատյանն է ասել, հնարավոր է հրաժարվել է այն պատճառով, որ համարում է՝ ֆիզիկապես այլեւս դա անհնար է»,– անդրադառնալով Տավուշի մարզպետի հայտարարություններին՝ ասաց Հրանտ Բագրատյանը։

Խաչատուր Սուքիասյանը, RAN Oil ընկերությունն իր տիրապետության տակ առնելուց հետո սկսել է ներկրել չափազանց ցածր գնով և անորակ վառելիք, ինչի հետևանքով հաճախորդների մեքենաների շարժիշները կարճ ժամանակ անց շարքից դուրս են գալիս։ Այս մասին հայտնում է Dejavu տելեգրամյան ալիքը։

«Վերջերս հայտնի օլիգարխ Խաչատուր Սուքիասյանը (մականունը Գռզո), որը փաստացի հանդիսանում է Նիկոլ Փաշինյանի ընտանիքի օլիգարխը, ձեռք է բերել “RAN Oil” ընկերությունը: Թվում էր, թե չմեծացող շուկայի պայմաններում, նա լուրջ մրցակցություն կստեղծի և դաշտում գործող այլ ընկերություններից հաճախորդներ կփախցնի, այդպիսով հարստացնելով իր և Փաշինյանի անկուշտ ընտանիքների ախորժակը: Սակայն, բենզինի և դիզվառելիքի շուկայում յուրահատուկ պարադոքսալ իրավիճակ է ստեղծվել: Իսկ իրականությունը և պարադոքսը կայանում է նրանում, որ այս ընթացքում, գրեթե բոլոր մրցակիցների մոտ, հաճախորդների աննախադեպ աճ է գրանցվել ( Ֆլեշ, CPS, Max oil): Խնդիրը նրանում է, որ Սուքիասյան Գռզոն, ընկերությունը իր տիրապետության տակ առնելուց հետո, սկսել է ներկրել չափազանց ցածր գնով և անորակ վառելիք, ինչի հետևանքով հաճախորդների մեքենաների շարժիշները կարճ ժամանակ անց շարքից դուրս են գալիս: Այդ ինֆորմացիան արագ տարածվում է վառորդների շրջանում և նրանք համատարած հրաժարվում են սպասարկվել “RAN Oil” բենզալցակայաններից: Սուքիասյանին և Փաշինյանին մեկ է, որ վարորդների մեքենաները շարքից դուրս են գալիս, իրենք իրենց եկամուտն են արագորեն հավաքում, որտեղից որքան կարող են, քանի Նիկոլը վարչապետ է»,- գրել է ալիքը։