Այսօր լրացել է Ադրբեջանի կողմից սանձազերծված 44 օրյա պատերազմի մեկնարկի մեկ տարին։ РБК հեռուստաալիքը անդրադարձել է 44 օրյա պատերազմի հետևանքներին, ՀՀ վարչապետի և Ադրբեջանի նախագահի այսօրվա ելույթներին։

Հաղորդավարուհին հիշեցրել է Ալիևի խոսքերը, թե պատերազմը մնացել է անցյալում և այն, որ շնորհակալություն է հայտնել Թուրքիային՝ աջակցության համար։ Հեռուստատեսության անդրադարձում հայտնել են, որ ադրբեջանցի զինվորականները զոհված ծառայողների լուսանկարներով քայլել են հրապարակում։ Հաղորդավարուհին հայտնել է նաև, որ Նիկոլ Փաշինյանն այսօր Զինվորի տանն էր, որտեղ հայրենիքի պաշտպանների հետ հարգել է 44-օրյա պատերազմի նահատակների հիշատակը՝ մեկ րոպե լռությամբ։

«Անցյալ տարվա սեպտեմբերին Լեռնային Ղարաբաղում վերսկսեցին ռազմական գործողությունները։ Կողմերը մի քանի փորձ արեցին՝ համաձայնություն կնքելու համար, սակայն վերջնականը հաջողվեց Ռուսաստանի մասնակցությամբ եռակողմ համաձայնագրով։ Այն ստորագրվել է նոյեմբերի 9-ին։ Հայաստանը Ադրբեջանին է փոխանցել Քարվաճառի, Լաչինի, Աղդամի շրջանի մի մասը, նաև Շուշի քաղաքը», — հայտարարել է РБК-ի հաղորդավարուհին։

Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Պատերազմի հետևանքով հայկական կողմը 3781 զոհ է ունեցել։ Անհայտ է 231 զինծառայողների ու 22 քաղաքացիական անձանց գտնվելու վայրը։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։

Պատերազմի 1-ամյակի նախօրեին մի քանի «սենսացիա» կգցեն դաշտ «30 տարվա թալանի» քարոզչական թեզը ուղեղներում վերապատվաստելու համար ու ևս մեկ տարի ոչ ոք անհարմար հարցեր չի տա պատերազմի խայտառակ սկզբի, ընթացքի և ավարտի մասին։Այս մասին ֆեյսբուքյան իր էջում գրել է ռազմական փորձագետ Կարեն Վրթանեսյանը:

«Պատերազմի 1-ամյակի նախօրեին մի քանի «սենսացիա» կգցեն դաշտ «30 տարվա թալանի» քարոզչական թեզը ուղեղներում վերապատվաստելու համար (լրիվ booster shot ա, էլի) ու ևս մեկ տարի ոչ ոք անհարմար հարցեր չի տա պատերազմի խայտառակ սկզբի, ընթացքի և ավարտի մասին։

Կողքից էլ դամ կպահեն «մենք բոլորս ենք մեղավոր աման-աման-աման» մուղամչիները…

Մենք այն ենք, ինչ ուտում ենք։ Տվյալ դեպքում ուտում ենք նիկոլական քարոզչամեքենայի կտերը…»,- գրել է Վրթանեսյանը:

Իրավապաշտպան Ավետիք Իշխանյանը «Հայկական արդարադատություն» վերնագրով գրառում է արել՝ անդրադառնալով հայտնի բժիշկ, ԱԺ «Հայաստան» խմբակցության պատգամավոր Արմեն Չարչյանի գործին։

«Հայաստանի անկախ, անաչառ դատարանը, դատավոր Վահե Միսակյանի նախագահությամբ, հանգամանալից քննելով պրոֆեսոր Արմեն Չարչյանի խափանման միջոցը փոխելու միջնորդությունը, հեռանալով խորհրդակցական սենյակ, առավել մանրամասն ուսումնասիրելով բերված փաստարկները, առանց կողմնակի միջամտության, կայացրեց խորիմաստ որոշում՝ նշանակելով դատաբժշկական փորձաքննություն։ Ծափահարություններ։

Այժմ ավելի լուրջ։ Արմեն Չարչյանի դեմ հարուցված քր․ գործը, մեղմ ասած շատ վիճահարույց է։ Սակայն, մի պահ ընդունենք, որ իսկապես, այն հիմնավոր է։ Բայց, արդյո՞ք, սա այն գործն է, որով արդարացվում է կալանքը։ Դեռ մի կողմ թողնենք Արմեն Չարչյանի հանրային հեղինակությունը, ավելորդ շահարկումներից զերծ մնալու համար, իսկապե՞ս դատավոր կոչեցյալը կասկածում է պրոֆեսորի առողջական ծանր վիճակի մասին փաստերին։ Ի՞նչ եք կարծում, Արմեն Չարչյանը շարքային կեղծարա՞ր է, զանազան քպական, պապիկ-տատիկներ կեղծողների պես։  Թե՞ ձեր կարծիքով,  պարոնայք իրավապահներ՝ քննիչներ, դատախազներ, դատավորներ, Արմեն Չարչյանն առավել վտանգավոր հանցագործ է, քան 2018թ․ փոխգնդապետ Արա Մխիթարյանին դաժան ծեծի ենթարկած սրիկա՞ն, կամ Օձունի համայնքապետին ծեծողնե՞րը։

Կատարելով վարչապետ-բռնապետիկի հանձնարարականները, դուք ձեր հոգուն դաջում եք ողորմելի  դահիճի խարանը։

Ամոթ է, ամոթ։ Ամոթ է բոլորիս, որ հանդուրժում ենք այսպիսի հայկական «արդարադատությունը»»,- գրել է Ա. Իշխանյանը։

Ադրբեջանցի քաղաքացիների խումբը փորձել է ներխուժել Լեռնային Ղարաբաղի՝ Ադրբեջանի ԶՈՒ հսկողության ներքո գտնվող Քարվաճառի շրջան:

Ադրբեջանի ՆԳՆ-ի հաղորդավրությունների համաձայն՝ նրանք փորձել են հայտնվել տարածքում, որն ամբողջովին ականազերծված չէ՝ շրջանցելով հսկիչ-անցագրային կետերը:

Հիքմեթ Շուքյուրովը, էլչին Ալիեւը, Նաթիգ Ջաբարովը, Քյամալեդին Գասիմովը, Սեյֆուլա Ջաբարովը, Զամին Գարաեւը, Ֆիրուզ Ախունդուվը, Նիյամեդին Սալախովը, Բախշեիշ Սամեդովը, Մուրադ Ալիեւը եւ Ռամիզ Ալիեւը բերման են ենթարկվել Քարվաճառի շրջանի ոստիկանության վարչության աշխատակիցների կողմից:

Մենք խաղաղություն չենք ունենալու, մենք ունենալու ենք հավերժական ստրկացում` թուրք-ադրբեջանական տանդեմի կողմից: «Փաստինֆո»-ի եթերում հայտարարել է պահեստազորի սպա Վոլոդյա Հովհաննիսյանը:

«Գիտեք ինչու՞ են վարունգը, լոլիկը թանկ շուկայում, որովհետև մինչև Նիկոլ Փաշինյանը Արարատյան դաշտավայրում 1 հեկտարը ջրվում էր 95 հազար դրամով, իսկ հիմա ջրվում է 135 հազար դրամով: Նիկոլ Փաշինյանը դա թանկացրել է 45 հազար դրամով, հետևաբար 40%-ով շուկայում պետք է թանկանա ՀՀ-ում արտադրվող ապրանքը»,-ասաց Վոլոդյա Հովհաննիսյանը:

Նա նաև հայտարարեց, որ ՔՊ պատգամավոր, գործարար Խաչատուր Սուքիասյանին պատկանող Ran oil-ում 25% փայատեր է նաև Նիկոլ Փաշինյանը.

«Բենզինը և վառելիքը թանկացել է, որովհետև Ramoli-ը գնել է Խաչատուր Սուքիասյանը, որի մեջ, ըստ օդում պտտվող տեղեկությունների, Նիկոլ Փաշինյանը 25% փայատեր է: Ramoil-ն էլ վառելիք ներկրող մոնոպոլիստ է Հայաստանում, այսօր էլ շարունակում է թանկանալ 30-50%-ով, գերշահույթի ապահովում է Նիկոլ Փաշինյանի և Խաչատուր Սուքիասյանի համար»,-ասաց Վոլոդյա Հովհաննիսյանը:

Հարցազրույցն ամբողջությամբ՝ «Փաստինֆո»-ի յութուբյան ալիքում։

Իրանը հարձակողական զինատեսակներ է մոտեցնում Ադրբեջանի հետ սահմանին՝ հիմնականում թալիշաբնակ հատվածներին․ սահմանային հատված են տեղափոխվել մեծաքանակ զրահամեքենաներ, հարձակողական պատերազմ վարելու համար նախատեսված տանկեր, զրահափոխադրիչներ և հրթիառհրետանային համակարգեր։ Իրանական լրատվամիջոցները նշում են, որ Թավիրզում տեղակայված ԻՀՊԿ օդատիեզերական ուժերին պատկանող երկու հրթիռային կայաններից բալիստիկ գերճշտգրիտ հրթիռներով հեշտությամբ կարելի է խոցել անգամ Բաքվի մոտակայքում գտնվող Քյուրդամիրի և այլ ռազմաբազաները։

Այս ամենը ադրբեջանաթուրքական սադրանքների հետևանք է՝ Yerkir.am-ի հետ հարցազրույցում ասաց իրանագետ Ահարոն Վարդանյանը։

Նրա դիտարկմամբ, Իրանի հետ հարաբերությունները լարվել են, քանի որ վերջին շրջանում հաճախակի զորավարժություններ են տեղի ունենում Ադրբեջանի և Թուրքիայի մասնակցությամբ՝ ներգրավելով նաև Պակիստանը։

«Նրանք նաև զորավարժություններ են անցկացնում Կասպից ծովում, ինչն Իրանի տեսանկյունից անթույլատրելի է, քանի որ կա Կասպից ծովի միջազգային կոնվենցիան և այնտեղ առափնյա երկրներից բացի այլ երկրներ իրավունք չունեն նման գործողություններ կատարել, սա կոնվենցիայի խախտում է, ինչը Իրանի կողմից կտրուկ արձագանքի է արժանացել, և այս ամենը ստիպել է, որպեսզի Իրանն ինքն էլ որոշակի պատասխան տա, և պատասխանը տալիս է ներկայումս դեռևս զորավարժությունների անցկացման տեսքով»,-ասաց իրանագետը։

Նա նկատեց, որ Ադրբեջան ներսում գտնվում են իրանամետ բնիկ ազգային փոքրամասնություններ և դրանցից մեկն էլ թալիշներն են, որոնք իրանական ժողովուրդ են՝ ունեն իրանական ընդգծված ինքնություն և Իրանը համարում են իրենց պատմական հայրենիքը։

«Հետաքրքիր է, որ այս օրերին դժգոհության ալիք է բարձրացել թալիշական հասարակական տարբեր խմբերում, տարբեր տիպի գործողություններ են իրականացվում։ Սրանք բավականին հետաքրքիր ազդակ են հենց Ադրբեջանի ներսից Իրանին։ Ադրբեջանում շիաական խմբերն կան, որոնք բավականին ակտիվ են, չնայած նրանց առաջնորդները ձերբակալված են և ներկայումս Ադրբեջանի բանտում են։ Ակնհայտ է, որ այստեղ կրկին Իրանի դեմ է գործողությունը և Իրանից վախ կա որոշակիորեն, որովհետև կարծում են, որ դրանք իրանական ազդեցության տակ են գտնվում՝ Ադրբեջանում այդպես են կարծում և նրանցից վախ են զգում»,-ասաց իրանագետը։

Նա նշեց, որ կա նաև թաթերի՝ կովկասյան պարսիկների խնդիրը, որոնք կրկին իրանական ժողովուրդներ են և ճնշված են Ադրբեջանի Հանրապետության ղեկավարութայն կողմից։ Այս ամենը կարող է որոշակիորեն ազդել կամ համապատասխան պահի պայթել։

«Ներկայում էլ քարոզչական մակարդակում իրանցի տարբեր տիպի գործիչներ՝ ազգայնական կամ ոչ, բավական կոշտ արձագանքում են Ադրբեջանի դիրքորոշմանը, ադրբեջանական տեսակետներին, այնտեղից հնչող արձագանքներին, որովհետև Ադրբեջանում տարբեր կոշտ հայտարարություններ են անում Իրանի նկատմամբ»,-ասաց Ահարոն Վարդանյանը։

Իրանում կարծում են, նշեց նա, որ սա ամենևին էլ միայն Ադրբեջանի ձեռքի գործը չէ, այլ այստեղ խառնված են Թուրքիան և այլ ուժեր։

«Այստեղ ներգրավված է նաև Թուրքիան, որովհետև չեմ կարծում, որ Ադրբեջանը, առանց որևէ տարածաշրջանային գերտերության աջակցության փորձեր Իրանի դեմ ինչ-որ քայլեր ձեռնարկել՝ թեկուզև քարոզչական մակարդակով։ Թուրքիան փորձում է հնարավոր բոլոր ճակատներով Հարավային Կովկասում իր ազդեցությունը ապահովել, և Թուրքիան փորձում է Իրանի հյուսիսային շրջաններում իր ներկայությունը էլ ավելի մեծացնել, որովհետև այդ հատվածներում կան նաև պանթյուրքիստական խմբավորումներ, որոնք փորձում են Իրանում ստեղծել անկայուն իրավիճակ՝ ինչպես Ադրբեջանի, այնպես էլ Թուրքիայի կողմից ֆինանսավորվելով»,-ասաց իրանագետը։

Վերջին շրջանում Իրանում հաճախակիացել են Թուրքիայից ահաբեկչական խմբավորումների թափանցումները, արձանագրեց նա, ճիշտ է՝ դրանք չեզոքացվում են, բայց դրանք կան, այս բոլոր քայլերով Թուրքիան փորձում է Իրանի խնդիրներն էլ ավելի շատացնել, և բանը հասցնել նրան, որ Իրանը այդ ժամանակը կամ ռեսուրսները չունենա խնդիրներին դիմակայելու։

«Քանի որ Թուրքիան Իրանին համարում է տարածաշրջանում իրեն մրցակից պետություն՝ փորձում է հնարավորինս բոլոր կողմերով չեզոքացնել, վնասել, թուլացնել իր մրցակից պետությանը։ Այլ հարց է, թե ինչքանով դա կիրականանա, բայց Թուրքիայի քայլերը պարզ են այս տեսանկյունից»,-ասաց Ահարոն Վարդանյանը։

Իրանագետի կարծիքով՝ Իրանը պատերազմ չի սկսի, բանը չի հասնի պատերազմի, Իրանը նպատակ չունի պատերազմ սկսելու, պարզապես ցանկանում է կողմերին իրենց տեղը ցույց տալ, որ տարածաշրջանում Իրանը կա և այնպես չէ, որ այսքան ժամանակ իրանական շահերին հարված է եղել թուրք-ադրբեջանական տանդեմի կողմից, ապա կարող է որևէ արձագանք չստանան։

Հայաստանի անելիքն այս իրավիճակում, Ահարոն Վարդանյանի կարծիքով, հստակ արձագանքելն է իր բարեկամ պետության՝ Իրանի, քայլերին և նշելը, որ այս ամենը Ադրբեջանի կողմից սադրիչ գործողություններ են և ամենևին միտված չեն խաղաղության, և ցույց են տալիս, որ նրանք ամենևին նպատակ չունեն տարածաշրջանում կայուն խաղաղություն հաստատել ինչպես սիրում են հիմա արտահայտվել, որովհետև խաղաղություն հաստատող ուժերը հաճախակի զորավարժություններ չեն անցկացնում, ընդ որում, բավական սադրիչ՝ հարձակողական, զորավարժություններ, զորավարժություններ Բերձորում, Կասպից ծովում, դրանք ամեն ինչի միտված են, բացի խաղաղությունից։

«Այլընտրանքային նախագծեր խումբ» նախաձեռնության անդամ Էլինար Վարդանյանը հոդված է հրապարակել՝ խոսելով կորոնավիրուսի դեմ պատվաստվելու խնդրի շուրջ առաջացած բազմաթիվ հարցերի մասին։

Հոդվածը ներկայացնում ենք ստորև․

Հոկտեմբերի 1-ից ուժի մեջ է մտնում որոշումը, ըստ որի գործատուներն աշխատակիցներից պետք է պահանջեն կորոնավիրուսի դեմ պատվաստված լինելու հավաստագիր կամ ամսական երկու անգամ ՊՇՌ թեստի բացասական արդյունք և կամ բժշկական տեղեկանք այն մասին, որ պատվաստվելու համար աշխատակիցը ունի հակացուցումներ։

Որոշումն արդարացիորեն առաջ է բերել հասարակության լայն զանգվածների դժգոհությունը, որովհետև այն բավարար չափով վերլուծված և պատշաճ կերպով կազմակերպված չէ։ Այս մոտեցումը հանգեցնելու է մի շարք խնդիրների, որոնք պետք է պարտադիր քննարկման առարկա դառնան.

1.Ամբողջ աշխարհն է գնում պատվաստման ճանապարհով, և դրան այլընտրանք դեռ չկա: Բայց պատվաստումը յուրաքանչյուրի գիտակցված որոշման արդյունք պետք է լինի։ Մարդիկ պետք է մանրամասն տեղեկացած լինեն պատվաստման դրական և բացասական հետևանքների մասին։ Այն, որ պատվաստումը փաստացի ուղղակի պարտադիր է դառնում, որքան էլ առողջապահական անկեղծ նպատակներ ունենա՝ չի կարող լինել իրավունքի գերակայությունից բխող: Չի կարող մի իրավունքի ապահովման նպատակով խախտվել մի շարք այլ իրավունքներ՝ օրինակ, աշխատանք ունենալու, սոցիալական պաշտպանվածության իրավունքը։

2. Չի հասկացվում ինչով է պայամանավորված ամսական երկու անգամ ՊՇՌ թեստ բացասական արդյունքի պահանջը: Եթե դա ուղղված է վարակի կանխմանը, ապա որն է երաշխիքը, որ թեստերի միջև ընկած ժամանակահատվածում թեստ ներկայացնողը չի լինի վարակակիր: Միաժամանակ այն մոտեցումը, որ ՊՇՌ թեստը քաղաքացին 15 օրը մեկ պետք է սեփական միջոցներով կատարի, անհամաչափ գործողություն է և ցույց է տալիս իշխանության՝ իր իսկ պարտականությունները կատարելուց խուսափելու և այն ժողովրդի վրա թողնելու վարքագիծը:

3.Պարտադիր պատվաստման պահանջը ոչ բարենպաստ պայմաններ է ստեղծելու գործատուի համար: Բազմաթիվ ընկերություններ պարբերաբար ենթարկվելու են տեսչական ստուգումների: Որոշման պատճառով գործատուն, որը չի կարողանալու հարկադրել աշխատողին պատվաստվել կա՛մ պետք է ստիպված լինի հոգալ աշխատողի ՊՇՌ թեստի ծախսերը, կա՛մ, կարգավորումների համաձայն, չթողնի աշխատողին աշխատանքի: Սա լրջագույն խնդրի առջև է կանգնեցնելու գործատուին:

4.Հայաստանում կիրառվող պատվաստանյութերից ոչ բոլորն են ճանաչվում եվրոպական և աշխարհի մի շարք երկրներում։ Օրինակ՝«Սպուտնիկ» պատվաստանյութով պատվաստված անձինք խնդիր են ունենում Եվրոպա մեկնելիս, իսկ «Astra Zeneca» -ով պատվաստման հարցում շատերն ունեն վերապահումներ։ Խնդրի լուծումը կարող էր լինել «Pfizer» պատվաստանյութով պատվաստվելը, բայց ինչպես պարզվում է Առողջապահության նախարարությունում չգիտեն, թե Հայաստանը երբ կստանա «Pfizer» պատվաստանյութ, թեև հայտարարել էին, որ այն Հայաստանում կլինի աշնանը՝ սեպտեմբեր-հոկտեմբեր ամիսներին։ Սա բնականաբար չի կարող իր բացասական ազդեցությունը չունենա պատվաստման գործընթացի վրա։ Մենք մարդկանց պարտադրում ենք պատվաստվել՝ առանց նախընտրելի պատվաստանյութերով ապահովելու։

5.Բազմաթիվ երկրներ գնում են կորոնավիրուսով վարակված և ապաքինված անձանց մեկ դեղաչափ պատվաստելու ճանապարհով։ Տպավորություն է, որՀայաստանում այդ մոտեցման մասին չեն էլ լսել:

6. Անթույլատրելի է տարբերակված մոտեցումը պատվաստվելու պահանջ ներկայացնելիս: Խտրականության արգելքը սահմանդրաիրավական նորմ է: Եվ չի կարող պատվաստման պահանջը չտարածվել բարձրաստիճան պաշտոնյաների վրա:

Հայաստանում իսկապես շատ դանդաղ է ընթանում պատվաստման գործընթացը՝ սեպտեմբերի 19-ի դրությամբ` կատարվել է 366779 պատվաստում, որից առաջին դեղաչափ` 237454, երկրորդ դեղաչափ` 129325, մինչդեռ աշխարհում պատվաստվել է բնակչության 32.4%-ը՝ 2519101512 մարդ։

Սակայն հանրային առողջությունը չի կարող փորձարկումների առարկա դառնալ: Ցանկացած որոշում պետք է լինի մանրամասն վերլուծված և հիմնավորված: Այն չի կարող կարգավորվել հապշտապ որոշումներով: Կարճ ժամանակ անց այս որոշումը կրկին վերանայելու կարիք է առաջանալու: Առավել արդյունավետ կլինի վերանայել այն՝ հաշվի առնելով բոլոր խոչընդոտները, որոնց բախվելու ենք այս որոշումն իրագործելիս:

Ինձ անհանգստացնում են Հայաստանի Գիտությունների ակադեմիայի ներկան ու ապագան, անհանգստացնում են հայկական գիտության ներկան ու ապագան։ Այս մասին Հայաստանի Գիտությունների ակադեմիայում, Բյուրականի աստղադիտարանի 75-ամյակին նվիրված նիստում սեպտեմբերի 22-ին ասաց հանրապետության նախագահ Արմեն Սարգսյանը։

Նրա խոսքով՝ Հայաստանի խնդիրներից մեկը հայկական գիտությունը իրական արդյունաբերության հետ կապելու անհրաժեշտությունն է։ Արմեն Սարգսյանը նշեց նաեւ Հայաստան արդի տեխնոլոգիաները եւ գիտության ձեռքբերումները բերելու անհրաժեշտության մասին, աշխարհի հետ կապը չկորցնելու անհրաժեշտության մասին, որը հաստատված էր բազում տարիների ընթացքում։

«Բյուրականի աստղադիտարանը պարզապես աստղադիտարան չէ, այն մեր գիտության լոկոմոտիվներից մեկն էր, շարժիչը, համաշխարհային կենտրոն էր, համաշխարհային արժեք է։ Աստղադիտարանի 100-ամյակին կհիշենք առաջին 50 տարինե՞րը, թե՞ կմտածենք գալիք 100 տարիների մասին։ Հարցն այն է, թե արդյոք մենք կամք ունենք, ուժ, հնարավորություններ, աջակցություն (այդ թվում ֆինանսական, վարչական, գիտական), որպեսզի Բյուրականի աստղադիտարանը ինչպես եղել է, այնպես էլ շարունակի մնալ աշխարհում լավագույնների ցուցակում։ Պետք է մտածել այն մասին, թե ինչպիսին կլինեն հաջորդ տարիները։ Մեր գիտությունը լոկոմոտիվների կարիք ունի, ինչպիսին կարող են դառնալ արհեստական ինտելեկտը, ժամանակակից մաթեմատիկան, կենսատեխնոլոգիաները՝ կապված գիտության էկոլոգիայի հետ, գիտությունն առողջ ապրելակերպի մասին»,- ավելացրեց նախագահը։

Հատուկ մանկավարժ Դավիթ Հարությունյանը, որը մոտ 4 տարի աշխատել է ՀՀ նախագահ Արմեն Սարգսյանի «Երևան իմ սեր» հիմնադրամում, բաց նամակ է հղել ՀՀ նախագահին, որում նշում է, որ իր հետ պայմանագիրը խզել են, ընդորում՝ ՊՆ-ի կողմից զորահավաքի հայտարարման ընթացքում: Ըստ նրա՝ աշխատակիցների արտահոսք կա, որի մասին հիմնադրամի խորհրդի նախագահ Արմեն Սարգսյանը տեղյակ չէ: Բաց նամակը ներկայացնում ենք ստորև․ 

«Քանի որ ՀՀ նախագահ, «Երևան իմ սեր» հիմնադրամի խորհրդի նախագահ Արմեն Սարգսյանին իր իսկ ենթակաները դարձնում են անձեռնմխելի անձ, ուստի ես՝ Երևան իմ սեր հիմնադրամի Լուսէ սոցիալ-վերականգնողական կենտրոնում մոտ 4 տարի աշխատած մասնագետս, որոշեցի այս կերպ՝ հրապարակային տեղեկացնել Հանրապետության նախագահին և բոլորին, թե իրականում ինչ է կատարվում  բարի համբավ ունեցող Լուսէ կենտրոնում՝ հույս ունենալով, որ Արմեն Սարգսյանն անձամբ հետամուտ կլինի խնդիրների կարգավորմանը:

Իմ աշխատանքային /քաղիրավական/ պայմանագիրը խզվել է ՊՆ-ի կողմից զորահավաքի հայտարարման ընթացքում:

Եղել են աշխատավարձից պահումներ՝ սկսած 3 հազար դրամից: Դրանք կրել են պարբերական բնույթ և կան գրավոր ապացույցներ: Անհրաժեշտության դեպքում կարող եմ ներկայացնել: Աշխատել ենք տոնական, հանգստյան և կամ ոչ աշխատանքային օրերին, ինչպես նաև արտաժամյա և մեզ չեն վճարել դրա դիմաց, այսինքն՝ վճարվել ենք սովորականի պես։

Ինձ և այլ աշխատակիցների ուղարկել են հարկադիր պարապուրդի, փոխարենը կենտրոնի տնօրենն ընտրողաբար աշխատանքի է կանչել բացառապես իր հետ մտերիմ աշխատակիցներին:

Առկա է աշխատակիցների արտահոսք, մասնագետների քանակի կրճատում: Օրինակ հիմա աշխատում է ընդամենը մեկ էրգոթերապիստ՝ նախկին երեքի փոխարեն, այն էլ՝ ոչ ամբողջ դրույքով: Երևան իմ սեր հիմնադրամի Լուսէ կենտրոնի տնօրեն Գոհար Գալստյանն աշխատանքից ազատում է երեխայի իմացական ոլորտի զարգացման համար պատասախանատու հատուկ մանկավարժին, ինչը մեծ դժգոհություն է առաջացրել Լուսէ կենտրոն այցելող երեխաների ծնողների մոտ: Ծնողների դժգոհություններն ապացուցող բազմաթիվ նամակագրություններ կան: Ավելին՝ կան ծնողներ, ովքեր պատրաստ են նույնիսկ տեսախցիկների առաջ խոսել բոլոր այն խնդիրների մասին, որոնք վերջին ամիսներին նկատում են Երևան իմ սեր հիմնադրամի մանկական կենտրոնում: Երաժշտության ոլորտում բարձր որակավորում ունեցող մասնագետը ևս լքեց Լուսէ կենտրոնը և հիմա բոլորովին նոր աշխատակցի են ընդունել աշխատանքի: Հոկտեմբերի 1-ին հերթական մասնագետն է հեռանում աշխատանքից: Ի դեպ, բոլորին զգուշացնում են՝ եթե դժգոհեք, միանաք նախագահին ուղղված նամակին, իրավական լուրջ խնդիրներ կունենաք: Կենտրոնի տնօրեն Գոհար Գալստյանը մեզ անվանում է բոնբոներկայով աշխատող մասնագետներ, բայց ծնողները պնդում են, որ ավելի մեծ տուփով շոկոլադներ էլ տալիս են հենց Գոհարին, նաև՝ գյուղից բերված խնձոր, տորթեր, նվերներ և այլն։

Երեխաների հետ աշխատող և որևէ մասնագետ չունի անձնական սանիտարական (բժշկական) գրքույկ, որը պարտադիր է տվյալ ոլորտում աշխատողների համար:

ՀՀ նախագահի տիկին Նունե Սարգսյանի, ՀՀ կառավարության անդամների, ԱԺ պատգամավորների և Հայաստանում հավատարմագրված դեսպանների այցի ժամանակ Զատիկ՚ երեխաների աջակցության կենտրոն ՊՈԱԿ-ից երեխաներ են տեղափոխում Լուսէ կենտրոն, որպեսզի ՀՀ նախագահի տիկնոջը, դեսպաններին, նախարարներին ու պատգամավորներին  ցույց տան մասնակից երեխաների մեծ քանակ՝ թե իբր Լուսէ կենտրոնում այս պահին այդքան երեխա է սոցիալ-վերկանգնողական ծառայություն ստանում: Իսկ թե ինչու հենց Զատիկից, որովհետև այնտեղի ղեկավարությունը Գոհար Գալստյանի հետ բավական մտերիմ է:

Խնդրել եմ տեղեկանք տրամադրել աշխատանքի վայրից, չեն տրամադրել՝ Երևան իմ սեր հիմնադրամի փոխտնօրենը պատճառաբանել է՝ տեղեկանք կտրամադրենք միայն այն դեպքում՝ եթե ստորագրես պայմանագրի լուծման համաձայնագիրը։

Կան հեռախոսային ձայնագրություններ, որտեղ Գոհար Գալստյանը ծնողին ստում է, թե ես մեկնել եմ Հայաստանից, ունենք փոխադարձ համաձայնություն՝ պայմանագրի լուծման մասին:

2020թ-ի ձմռանը Գոհար Գալստյանը ստիպել է նամակ գրել Երևան իմ սեր հիմնադրամի այն ժամանակվա տնօրեն Արշակ Կարապետյանի դեմ: Ես հրաժարվել եմ ստորագրել այդ նամակի տակ, որից հետո լարվեցին Գոհար Գալստյանի հարաբերություններն իմ և նամակին չմիացած այլ աշխատակիցների հետ:Նամակը ևս կարող եմ տրամադրել:

Երբեմն մեկ երեխան ստանում է նախատեսվածից ավելի՝ մի քանի եռամսյակ ծառայություններ, իսկ որոշ երեխաներ սպասում են տարիներ շարունակ, սակայն Մարդու իրավունքների պաշտպանին կամ որոշ պաշտոնատար անձանց դիմելուց հետո, խնդիրը լուծվում է և հնարավորություն են ստանում օգտվել թերապևտիկ ծառայություններից։ Փոխարենը Լուսէ կենտրոնի տնօրենը Երևան իմ սեր հիմնադրամն ընտանեկան հանգստի հրաշալի վայր է դարձրել: Ընտանիքի 4 անդամները՝ ներառյալ 3 երեխաները հաճախ են լինում հիմնադրամում, ուտում են, ժամանակ են անցկացնում, օգտագործում կենտրոնի ռեսուրսները, խաղերը, նույնիսկ քնում, երբեմն նաև՝ դայակի հետ։

Խնդիրների  մասին տեղյակ է եղել Երևան իմ սեր հիմնադրամի տնօրեն Գագիկ Արզումանյանը, որը նախկինում եղել է Ֆինանսների փոխնախարար, բայց նաև նրա անունը կապված է  Թեղուտի հանքավայրի շահագործման և ծառահատման հետ և հիմնադրամում ասում են, թե Գագիկ Արզումանյանը համակարգում է ՀՀ նախագահին պատկանող հայաստանյան բիզնեսները, դրա համար էլ հիմնադրամում առհասարակ չի լինում, ուստի նրան նամակ գրեցի, բայց Արզումանյանը նույնիսկ իրեն ուղղված իմ գրավոր որևէ նամակին չի պատասխանել այդ թվում՝ փոստային ծառայության պատվիրված նամակին: Խնդիրների մասին տեղյակ են նաև հիմնադրամի փոխտնօրենը,  կենցաղային հարցերով զբաղվող Կարեն Տեր-Մարտիրոսյանը և Արմեն Սարգսյանի գրասենյակի քարտուղարուհի Նաիրա Մակարյանը:

Երբ հիմնադրամի ղեկավարությանը տեղեկություններ են հասել, որ մտադիր եմ նախագահին դիմել բաց նամակով, փորձում են Լուսէ կենտրոն այցելող երեխաների ծնողներին հրավիրել, զրուցել, որ հանկարծ չդժգոհեն: Անգամ ջրծաղիկով հիվանդ երեխային են հրավիրում՝ ինչ-որ տեսանյութում նկարահանվելու պատրվակով:  

Հարգելի պարոն նախագահ՝ նամակում նշված բոլոր խնդիրների ապացույցները կարող եմ ներկայացնել: Խնդրում եմ ընթացք տալ այս նամակին»:

Ի՞նչ կտեսնենք, եթե նայենք մեր 30-ամյա պետությանը. կտեսնենք հաջողություններ ու անհաջողություններ, կտեսնենք հաղթանակներ ու պարտութուններ, արցունքներ ու բերկրանք, ոգեշնչում ու հուսահատություն, հիացմունք ու հիասթափություն, պատերազմներ, պատերազմում կրած հաղթանակ ու պարտություն: 2020 թ. 44-օրյա պատերազմում արտության ծանրությունը կախված է Հանրապետության հրապարակի վրա: Այս մասին Հանրապետության հրապարակում Անկախության 30-ամյակի տոնական միջոցառմանն ունեցած ելույթում հայտարարել է ՀՀ վարչապետ Նիկոլ Փաշինյանը:

«Ինչպե՞ս ապրել այդ աղետից հետո, ինչպե՞ս նայել զոհվածների հայրերի, մայրերի, այրիների ու զավակների աչքերին, ինչպե՞ս անել, որ նրանց զոհողությունն անիմաստ չդիտարկվի: Պետք է ձեւակերպել ապագայի ուղենիշն անկախ պետության առաջիկա տասնամյակների համար:

Պատմությունն ապացուցել է, որ պատերազմում հաղթանակը միշտ չի դարձել հաղթանակ, ինչպես որ պարտությունը միշտ պատրություն չի դարձել: Պատմությունը ցույց է տվել, որ հաղթելու համար պարտադիր չէ եւ երբեմն պետք չէ հաղթել ուրիշներին, հաղթել նշանակում է հաղթել հուսահատությաւնը, ճակատագրին, մահվանը, անելանելիութանը: Նահատակներն ընկան, որ Հայաստանն ապրի, որ Արցախը ապրի, եւ քանի Հայաստանը ապրում, քանի ապրում է Արցախը, նրանք կենդանի են: Երբ զարգանում է ՀՀ-ն եւ Արցախը, ուրեմն նրանց զոհողությունը հասել է իր նպատակին»,- նշել է վարչապետը: