Ոստիկանությունը զինել է Պարեկային ծառայողներին, այսուհետ երևանյան խցանումների  դեմ շվվոցով ու փայտիկով պայքարող պարեկային ծառայողների կոնքամասին նաև ավստրիական գլոկ տեսակի շքեղ ատրճանակ կամրակցվի:

Բայց ուշագրավ է գլոկի բաշխման կառավարության մոտեցումը: Պարզվում է՝ երիտասարդ պարեկների հանդեպ գործատուն մեծ անվստահություն ունի, արդեն մի քանի օր է՝ զենքերն ամրակցված են տղաներին՝ առանց փամփուշտի, և սա այն դեպքում, երբ օրենքի պահանջն է յուրաքանչյուրին ամրակցել ատրճանակ` երկու պահեստային պահունակով:

Ըստ Yerevan.Today-ի  ոստիկանության աղբյուրի՝ դիտավորյալ են դատարկ պարկուճներով զենքեր բաժանվել, որպեսզի խուսափեն «պատահաբար արձակվող կրակոցների ծանր հետևանքներից»:

«էդ տղերքը 18-35 տարեկան բարձրագույն կրթություն չունեցող, ոստիկանական ծառայության համար լրիվ անպատրաստ կադրեր են , աշխատանքի ընդունման պահանջն էր այդպիսին… հետևաբար  զենքի հետ վարվելու կանոններին վարժվել է պետք,  հետո նոր միայն փամփուշտներ կտրամադրվեն, որ անզգուշությամբ  կամ էմոցիոնալ բռնկումների ժամանակ հանկարծ ինքնավնասում-բան չանեն»,-ասում է աղբյուրը:

Ընդգծենք, խոսքը ամերիկյան մոդելի նոր ոստիկանական ծառայության ստորաբաժանումը համալրած ուրջ 700 նոր  կադրի մասին է, որոնց ծառայողական պարտականությունների մեջ են մտնում  ոչ միայն մեքենաների խցանումներով զբաղվելը, այլև օպերատիվ աշխատանք՝ հասարակական կարգն ու անվտանգություն ապահովելուց մինչև հանցագործություն կատարելու մեջ կասկածվող անձանց հետապնդում,  հանցագործի վնասազերծում ֆիզիկական ուժի, ընդհուպ հրազենի կիրառմամբ:

Ահա այսպես համարյա խաղալիք ատրճանակներով  մոդեռն ոստիկանները կպայքարեն հանցագործների դեմ:

Միշտ էլ Շուշիի հարցը եղել է, որովհետեւ Ադրբեջանը երբեք չի հրաժարվել այն մտքից, որ ադրբեջանցիները պետք է վերադառնան եւ բնակվեն Ղարաբաղում, իսկ որտե՞ղ պետք է բնակվեն: Այս մասին հայտարարել է ՀՀ վարչապետ Նիկոլ Փաշինյանը՝ Լիտվա պաշտոնական այցի շրջանակում երկրի հայ համայնքի ներկայացուցիչների հետ հոկտեմբերի 3-ին կայացած հանդիպմանը։

«Եվ հայկական կողմն էլ չի վիճարկել դա: Ավելին, երբ բանակցային սեղանի շուրջ եղել է հանրաքվեի կամ հարցման կամ պլեբիսցիտի տարբերակը, հայկական կողմն էլ է ընդունել, որ Ղարաբաղի ադրբեջանցիները դրան պետք է մասնակցեն որպես ԼՂ բնակիչ: Բա Լեռնային Ղարաբաղի ադրբեջանցի բնակիչները որտե՞ղ էին բնակվելու: Տրամաբանորեն այնտեղ, որտեղ բնակվել են: Շուշիի մասին այդքան խոսում են, 30 տարվա ընթացքում Շուշիում քանի՞ բնակելի շնք է կառուցվել, ոչ մի: Ինչի՞ չի կառուցվել, փող չեն ունեցե՞լ: Վստահ չեն եղել, որ մնալու է, ակնհայտ է պատասխանը»,-ասաց նա:

Անդրադառնալով Գորիս-Կապան ճանապարհի խնդրին, վարչապետն ասաց. «Սյունիքի ավագ սերնդի ներկայացուցիչները գիտեն, որ 1990-ականների կոնֆլիկտը երբ սկսել է, այդ ճանապարհը փակ է եղել: Անընդհատ բախումների թատերաբեմ է եղել հենց Էյվազլի եւ Չայզամի գյուղերի հատվածում, որոնք եղել են սովետական ադրբեջանական գյուղեր:

Ընդհանրապես, 30 տարվա մեր ամենամեծ խնդիրն այն է եղել, որ մենք իրականության հետ չենք առերեսվել: Մենք հավաքվել ենք ասել ենք փաստարկներ եւ երբեք հարց չենք տվել՝ իսկ դրսի հայացքից մեր ասածը ո՞նց է հնչում: Իսկ դրսում միջազգային հանրությունը մեր ասածը ոնց է ընկալում»:

Փաշինյանի խոսքով, այսօր շատերը հարցնում են, նաեւ միջազգային դիտորդները, այդ ո՞նց եղավ, որ այս պատերազմից հետո կառավարությունը նորից ընտրություններում հաղթեց. «Փառք Աստծո, ընտրությունների լեգիտիմություն ՀՀ-ից դուրս ոչ ոք կասկածի տակ չի դնում, Հայաստանի ներսում էլ կասկածի տակ են դնում այն ուժերը, որոնք… ժողովուրդն էլ կասկածի տակ չի դնում:

Պարզ պատճառով հաղթեց ՀՀ կառավարությունը, որովհետեւ մենք ժողովրդի հետ անկեղծ խոսեցինք, մեզ լսեց, մեր ասածը համադրեց իր տեսածի հետ»:

Կորոնավիրուսից բուժվող երիտասարդի հարազատներին համոզել են, որ վիճակը վիճակը ծայրահեղ ծանր է, բուժման համար անհրաժեշտ է 700.000 ՀՀ դրամ արժողությամբ «Ակտեմրա» դեղամիջոց, որը միջնորդը ձեռք է բերել «փողոցից», պատահական անհայտ անձից։

Փաստաբան Լուսինե Վիրաբյանը, որը ներկայացնում է գործով տուժողի շահերը, «Փաստինֆո»-ի հետ զրույցում հայտնեց, որ ըստ բժիշկների՝ դեղամիջոցը ներարկելու արդյունքում պետք է ջերմությունը բարձրանար, ապա՝ կտրուկ իջներ, սակայն դեղամիջոցի ընդունումից հետո երիտասարդի մոտ որևէ ազդեցություն, փոփոխություն չի եղել, կորոնավիրուսի բուժման բնականոն ընթացքը շարունակվել է։ Ավելին, պարզվում է, որ տղան ընդհանրապես տեղյակ չի եղել, որ իրեն ներարկել են նշված դեղամիջոցը և միայն հիվանդանոցից դուրս գրվելուց հետո է իմացել, որ իրեն ինչ-որ «բարդ» դեղամիջոց են ներարկել, ինչի արդյունքում ինքն ապաքինվել է։

«Շատ զարմացել է։ Հիվանդանոցում ինքը եղել է գիտակից վիճակում, ինչը փաստում է նաև բուժանձնակազմը և որևէ մեկն իրեն չի ասել, որ իրեն նշանակված բուժումից դուրս այլ դեղամիջոց են ներարկում, ինչը կարող է որոշակի ազդեցություն ունենալ »,- նշեց Վիրաբյանը՝ հավելելով, որ դեղամիջոցը բարդ է, ոչ բոլոր դեպքերում են կիրառում, իսկ կիրառելու դեպքում ուշադիր են լինում ընթացքին, իսկ երիտասարդի պարագայում որևէ փոփոխություն չի եղել, ինչից էլ կասկած է առաջացել, որ իրեն այդ դեղն առհասարակ չեն ներարկել, ի սկզբանե կասկած է եղել, որ դեղն ուղղակի մուտք չի եղել հիվանդանոց։
Փաստաբանի փոխանցմամբ՝ անձը, որն առաջարկել է «Ակտեմրա» դեղամիջոցը և միջնորդ է հանդիսացել հիվանդի հարազատների և բժիշկների միջև, հանդիսանում է դեղագործական ընկերության տնօրեն։

«Տվյալ անձը հիվանդի հարազատներին ներկայացրել է, որ իրենց տղան գտնվում է ծայրահեղ ծանր, մահամերձ վիճակում և եթե այդ դեղամիջոցը չներարկեն, տղան ուղղակի կմահանա, ընդ որում, դա այն պարագայում, երբ տղայի հայրը մեկ օր առաջ էր մահացել կորոնավիրուսից։

Հարազատները բնականաբար ամեն ինչ անում են, գումարը հայթայթում ու տալիս, որ դեղը ձեռք բերեն, բայց հիվանդը երբեք ծայրահեղ ծանր վիճակում չի եղել։ Թեև հոսպիտալացված է եղել, բայց նորմալ վիճակում, գիտակցությունը՝ տեղը՝ ի հակառակ տվյալ անձի պնդումների, թե երիտասարդն անգիտակից վիճակում է, պետք չէ զանգել, խոսել իր հետ, վիճակն ավելի կվատթարանա, մինչդեռ, առկա են հեռախոսազանգերի վերծանումները, համաձայն որի, երիտասարդը չի խոսել ընտանիքի անդամների հետ, բայց խոսել է ընկերների, բարեկամների հետ։ Չէր կարող ծայրահեղ ծանր վիճակում հիվանդն այդքան խոսել, հեռախոսը զբաղեցնել»,- պատմում է փաստաբանը։

Խարդախության հատկանիշներով քրեական գործ է հարուցվել, որի շրջանակներում հարցաքննվել է նաև միջնորդ հանդիսացող անձը, որը նշել է, որ չի կարող ՀԴՄ կտրոն ներկայացնել, քանի որ դեղամիջոցը դեղատնից չի ձեռք բերել և չի մատնանշել, թե ումից է ձեռք բերել։

Վիրաբյանը տեղեկացրեց, որ առերես հարցաքննության ընթացքում միջնորդ հանդիսացող անձը նշել է, թե հեռախոսով խոսել է, ինչ-որ մեկը լսել է, որ ինքը նման դեղ է փնտրում և ասել, որ ունի չօգտագործված դեղամիջոց, որը գնել էր հարազատի համար, մինչդեռ, նշված դեղամիջոցը հատուկ պայմաններում է պահվում և, եթե նույնիսկ դեղամիջոցը պետք է ներարկվի 10 րոպեի ընթացքում, դա պահվում է սառույցի մեջ։

«Ոչ ոք 700.000 դրամ չէր վճարի՝ ավելորդ դեղ գնելու, դա «Ասկոֆեն» չէ, որ մեկ կոճակը գրպանում շրջեն։ Հատուկ պայմաններում պահպանվող, նման արժեքի դեղը հնարավոր չէ ավելորդ գնել, հետո տալ ինչ-որ մեկին՝ առանց կտրոնի, առանց դեղատոմսի»,- նշեց փաստաբանը՝ հավելելով, որ առերեսման ընթացքում հետաքրքրվել է միջնորդից՝ արդյո՞ք պարզել է, թե սառույց եղել է, թե ոչ, ինչին ի պատասխան վերջինս նշել է, թե թեթև, սովորական դեղ է։

Բացի այդ՝ Վիրաբյանը նշեց, որ այդ օրն ընդամենը երեք անձ էր բուժվում այդ դեղամիջոցով, ուստի, անհրաժեշտ էր պարզել շրջանակը, թե արդյո՞ք այդ երեք անձանցից որևէ մեկը տվել է նշված դեղամիջոցը՝ տվյալ հիվանդին, սակայն քրեական գործով չի ապացուցվել, որ ինչ-որ մեկը հիվանդանոցից է փոխանցել դեղամիջոցը։

«Բացի դրանից՝ հիվանդները եղել են վերակենդանացման բաժանմունքում և ոչ մի հարազատ հնարավորություն չունի իր հիվանդի համար արդեն իսկ վերակենդանացման բաժանմունք մուտքագրված դեղը հետ պահանջել սառնարանից և փոխանցի ուրիշին, ինչը գոնե ինչ-որ մատյանով պետք է երևա »,- նշեց Վիրաբյանը՝ ընդգծելով, որ հիվանդի էպիկրիզում կան բոլոր դեղամիջոցները, բոլոր հակաբիոտիկներն ու վիտամինները՝ բացի այդ դեղից, «Ակտեմրա» դեղամիջոցի վերաբերյալ նշում չկա նաև տվյալ բաժանմունքի դեղերի ծախսի ցուցակում, միայն հետագայում, քրեական գործի ընթացքում մատյաններից մեկում՝ այլ, ակնհայտ տարբերվող գրիչով և ձեռագրով նշվել է «Ակտեմրա» դեղամիջոցի անունը։
Հարցին՝ արդյո՞ք դատաձեռագրաբանական փորձաքննություն նշանակվել է, փաստաբանը նշեց, որ փորձաքննություն չի նշանակվել, որովհետև քննիչին ձեռնտու չէր։

Փաստաբանը տեղեկացրեց, որ այս օրերի ընթացքում բազմաթիվ զանգեր է ստանում, որ հիվանդներին ներարկել են, ինչից հետո եղել են մահացության դեպքեր, ընդ որում, ներարկել են մահամերձ հիվանդներին։ Փաստաբանը մտահոգություն հայտնեց առ այն, որ տվյալ դեղամիջոցը չունի այն օգուտը, ինչը նկարագրում են բժիշկները և, տեսնելով, որ հիվանդն արդեն մահամերձ է, հիվանդի փրկությունը չի լինելու, ավելորդ անգամ հիվանդի հարազատին ֆինանսական բեռ են պատճառում՝ տվյալ դեղը ձեռք բերելու համար։ Փաստաբանի նման մտահոգությունները կապված են այս օրերին ստացված ահազանգերի վիճակագրությամբ։

Քրեական գործի շրջանակներում օպերատիվ-հետախուզական միջոցառումներ են իրականացվել, որի արդյունքում չի հայտնաբերվել այն անձը, ումից ձեռք է բերվել այդ դեղամիջոցը, թեև, ըստ փաստաբանի, նույնիսկ հեռախոսի վերծանումներով կարելի էր գտնել այդ անձին, եթե այդպիսին եղել է։ Քննիչի կողմից քրեական գործի վարույթը կարճելու որոշում է կայացրել՝ հանցակազմի բացակայության հիմքով, որը ստանալուց հետո փաստաբանը կվիճարկի այն։

«Ինչ աստիճանի աբսուրդ որոշում պետք է լինի, որ, այն պայմաններում, երբ քննությունը թերի է ընթացել, երբ կան բարձրացված հարցեր, որոնց լուծում չի տրվել, օպերատիվ-հետախուզական միջոցառումներն ընթացքում են, մինչև հոկտեմբերի 12-ը նախաքննության ժամկետը երկարացվել է, բայց քննիչը սեպտեմբերի 22-ին որոշում է կայացրել վարույթը կարճելու մասին »,- նշեց փաստաբանը։

Ադրբեջանի նախագահի սեպտեմբերի 27-ի ուղերձում էթնիկ թշնամանքին ավելացրած է կրոնականը, ուղերձը հիմնված է բացահայտ կեղծիքի վրա: Այս մասին ասվում է Հայաստանի մարդու իրավունքների պաշտպան Արման Թաթոյանի հայտարարությունում:

«Ադրբեջանի նախագահի սեպտեմբերի 27-ի ուղերձում էթնիկ թշնամանքին ավելացրած է կրոնականը, ուղերձը հիմնված է բացահայտ կեղծիքի վրա

Ադրբեջանի նախագահն 2021թ. սեպտեմբերի 27-ի հայտարարված «Հիշատակի օրվա» իր ուղերձում բացահայտ բորբոքում է կրոնական թշնամանք՝ էթնիկ ատելությանն ու թշնամանքին զուգահեռ, օգտագործում է կեղծ փաստեր։

Մասնավորապես, ուղերձում բացահայտ կեղծելով փաստերը՝ նա նշում է. «կիսաքանդ մզկիթներում նենգ թշնամին անասուններ՝ կովեր և խոզեր էր պահում ՝ մեզ և ողջ աշխարհի մուսուլմաններին անարգելու համար: Վստահ եմ, որ աշխարհի մուսուլմանները համարժեք պատասխան կտան: Այս խնդրի վերաբերյալ նամակներ եմ ստանում բազմաթիվ մահմեդական երկրներից: Մենք (…) հայկական վայրագությունների, հայկական ֆաշիզմի վերաբերյալ մենք իրազեկում և իրազեկելու ենք ամբողջ աշխարհին: (…) մեր հաղթանակը (…) հաղթանակ է հայկական ֆաշիզմի դեմ»: Այնուհետև, նա խոսում է Հայաստանում հաստատված իբր իսլամաֆոբիայի մասին:

Այս ամենը բացահայտ կեղծիք է, հիմնված է անիրական տվյալների վրա:

Եթե հայերն ունեն իսլամաֆոբիա, բա ինչպե՞ս է ստացվում, որ Երևանի կենտրոնում կա գործող մզկիթ, իսկ Բաքվի Սուրբ Գրիգոր Լուսավորիչ հայկական եկեղեցին պղծված է՝ վերածված է գրադարանի պահոցի, գմբեթից իջեցված է խաչը, ոչնչացված են գերեզմանաքարերը, որ կային եկեղեցու հարևանությամբ:

Եթե Հայաստանում ու Արցախում կա իսլամաֆոբիա, ապա ինչպե՞ս էին Արցախում կանգուն մնացել ու պահպանվում, օրինակ, Շուշիի Վերին ու Ներքին մզկիթները, հիմնովին վերանորոգվել էին Վերին մզկիթն ու մեդրեսի՝ հոգևոր վարժարանի շենքը, կառուցվել էր պուրակ կամ ինչպե՞ս բացատրել ադրբեջանական զինված ուժերի կողմից վերջին պատերազմից հետո Շուշիի Սուրբ Ամենափրկիչ Ղազանչեցոց և Կանաչ ժամ եկեղեցիների հրթիռակոծումն ու պղծումը, Արցախում Մեխակավանի Զորավոր Սուրբ Աստվածածին եկեղեցու ոչնչացումը կամ Մատաղիսի Սուրբ Եղիշե եկեղեցու պղծումը, հայկական խաչքարերի ոչնչացումը Շուշիում և Հադրութում և այլն: Կամ ինչպե՞ս է ստացվում, որ իսլամ դավանող աշխարհի բազմաթիվ ժողովուրդների հետ հայերն ապրում են՝ որպես բարեկամներ:

Ակնհայտ է, որ իրականում գործ ունենք քրիստոնեության նկատմամբ բացահայտ ատելության ու թշնամանքի հետ:

Սեպտեմբերի 27-ի ուղերձում Ադրբեջանի նախագահն ասում է. «ադրբեջանցիների նկատմամբ ատելությունը այնտեղ [Հայաստանում] հաստատվել է որպես պաշտոնական գաղափարախոսություն»:

Այս խոսքերը նույնպես բացահայտ կեղծիք են, հիմնված են հորինված պատմությունների վրա:

Ադրբեջանի նախագահը նորից ողջ հայ ժողովրդին անվանում է ֆաշիստներ, իրեն թույլ է տալիս արժանապատվությունը վիավորող արտահայտություններ:

Բայց նրա այս և մյուս ելույթները բացահայտ են ապացուցում, որ իրականում հենց ինքն է ֆաշիստական գաղափարներ առաջ տանում, ինքն է բորբոքում քրիստոնեության նկատմամբ կրոնական թշնամանք:

Որպես Հայաստանի մարդու իրավունքների պաշտպան, միանշանակ վստահությամբ միջազգային ողջ հանրությանը հավաստում եմ, որ ՀՀ որևէ իշխանություն կամ Կառավարություն, Ադրբեջանի ժողովրդի դեմ երբևէ ատելության կամ թշնամանքի հովանավորչության քաղաքականություն չի տարել: Այլ կրոնների, այդ թվում՝ իսլամի նկատմամբ մշտապես տարվել է հանդուրժողականության ու հարգանքի քաղաքականություն՝ դպրոցական ծրագրերից սկսած:

ՀՀ մարդու իրավունքների պաշտպանի աշխատակազմն այս անգամ էլ առանձնացրել է Ադրբեջանի նախագահի ուղերձի էթնիկ ու կրոնական ատելություն, թշնամանք բորբոքելու հատվածները: Հայերեն ու անգլերեն տարբերակներով այս մասերն ուղարկվում են միջազգային կառույցներին՝ թիրախային վայրեր, ինչպես նաև ՀՀ Ազգային ժողով, գործադիր իշխանության ու իրավապահ մարմինների, ինչպես նաև ՀԿ-ներին:

Մարդու իրավունքների պաշտպանի աշխատակազմը բոլոր նյութերն ուսումնասիրում է առաջնային աղբյուրներից՝ ադրբեջաներենով:

Ուսումնասիրությունը վկայում է, որ այդ ելույթներն ու ուղերձները գեներացնում են ատելություն ողջ հայ ժողովրդի, Հայաստանի և Արցախի բնակչության նկատմամբ՝ հասնելով ֆաշիզմի։

Առկա է հստակ պատճառական կապ դրանց ու հայ զինծառայողներին և քաղաքացիական անձանց ադրբեջանական զինված ուժերի կողմից խոշտանգելու, քաղաքացիական բնակավայրերի ու եկեղեցիների նկատմամբ վայրագությունների, ՀՀ սահմանային բնակչության իրավունքների կոպիտ խախտումների միջև:

ՀՀ մարդու իրավունքների պաշտպանի աշխատկազն այս ամենն իրականացնում է իրավունքների խախտումները կանխարգելելու, ոտնահարումները վերացնելու նպատակով:

Ադրբեջանական նման քաղաքականությունը, երբ հայատյացությունն ու հայասպանությունը խրախուսվում են պետական մակարդակով, լրջորեն վտանգում է մարդկանց խաղաղ կյանքն ու անվտանգությունը, երկու ժողովուրդների խաղաղ գոյակցության հեռանկարները»:

Հայաստանի վարչապետ Նիկոլ Փաշինյանը վերահաստատել է Ադրբեջանի նախագահ Իլհամ Ալիևի հետ հանդիպելու պատրաստակամությունը և անդրադարձել գերիներին վերադարձնելու ու ականապատ տարածքների քարտեզների հարցին: Այս հայտարարությունը կառավարության ղեկավարն արել է Վիլնյուսում հայ համայնքի ներկայացուցիչների հետ հանդիպմանը` պատասխանելով ներկաներից մեկի հարցին:

«Տեսեք, Ադրբեջանի նախագահը հայտարարել է, որ պատրաստ է ինձ հետ հանդիպել։ Ասեմ, որ դեռ հուլիսին եմ հայտարարել, որ մենք պատրաստ ենք և՛ բարձր, և՛ բարձրագույն մակարդակում հանդիպել, այսինքն՝ դա թարգմանաբար նշանակում է, և արտգործնախարարների մակարդակով, և վարչապետ-նախագահ մակարդակով պատրաստ ենք հանդիպել: Վերջերս ՄԱԿ-ի Գլխավոր ասամբլեայում ունեցած ելույթում հայտարարել եմ, որ Լեռնային Ղարաբաղի հարցը սպասում է իր լուծմանը, և կարող եմ ասել, որ մի քանի ագամ արդեն ողջունել ենք ԵԱՀԿ Մինսկի խմբի համանախագահների հայտարարությունները, որտեղ նրանք մի քանի անգամ արձանագրում են Լեռնային Ղարաբաղի հակամարտությունը լուծելու ու այս նպատակով խաղաղ գործընթացը վերականգնելու անհրաժեշտությունը»,- ասել է Նիկոլ Փաշինյանը:

Այս համատեքստում, վարչապետը նշել է, որ ինչպես նախկինում, այնպես էլ հիմա է հայտարարում, որ պատրաստ է հանդիպել Ադրբեջանի նախագահի հետ։ «Ձեր կոնկրետ նշած հարցին կարող եմ տալ հետևյալ պատասխանը ենթադրվող առաջիկա հանդիպմանը ես պատրաստ եմ ինձ հետ տանել այն քարտեզները, որոնց մասին խոսվում է, իսկ խոսվում է այն քարտեզների մասին, որոնք Հայատանի և Ադրբեջանի զինված ուժերին իրարից չեն բաժանում, այսինքն՝ դրանք ռազմական գործնական անվտանգային նշանակություն չունեն, այլ ունեն միայն հումանիտար նշանակություն, որովհետև գտնվում են Ադրբեջանի զինված ուժերի թիկունքում։

Ես պատրաստ եմ մեր ունեցած բոլոր քարտեզներն ինձ հետ տանել և Ադրբեջանի նախագահին կոչ եմ անում իր հետ բերել մեր բոլոր գերիներին։

Այս համատեքստում, վարչապետը նշել է, որ ինչպես նախկինում, այնպես էլ հիմա է հայտարարում, որ պատրաստ է հանդիպել Ադրբեջանի նախագահի հետ։ «Ձեր կոնկրետ նշած հարցին կարող եմ տալ հետևյալ պատասխանը․ ենթադրվող առաջիկա հանդիպմանը ես պատրաստ եմ ինձ հետ տանել այն քարտեզները, որոնց մասին խոսք է գնում, իսկ խոսք է գնում այն քարտեզների մասին, որոնք Հայատանի և Ադրբեջանի զինված ուժերին իրարից չեն բաժանում, այսինքն՝ դրանք ռազմական գործնական անվտանգային նշանակություն չունեն, այլ ունեն միայն հումանիտար նշանակություն, որովհետև գտնվում են Ադրբեջանի զինված ուժերի թիկունքում։

Ես պատրաստ եմ մեր ունեցած բոլոր քարտեզներն ինձ հետ տանել և Ադրբեջանի նախագահին կոչ եմ անում իր հետ բերել մեր բոլոր գերիներին։

Տեսեք, Ադրբեջանի նախագահը բողոքում է, որ այդ քարտեզների որակը, որ նախկինում փոխանցել ենք, լավը չեն: Տեսեք, մենք երկու արձանագրում ենք անում` առաջինը. մենք տվել ենք այն քարտեզները, որ ունենք, այսինքն այնպես չէ, որ լավ որակի քարտեզները պահել ենք դարակում, վատ որակի քարտեզները տվել ենք։ Ես չեմ բացառում և նաև գիտեմ, որ քարտեզների որակի հետ կապված խնդիր կա, ինչո՞ւ, որովհետև քարտեզի որակը կախված է քարտեզագրողի որակից, նրա պրոֆեսիոնալ հմտությունից, ինչ քարտեզագրել է, այն էլ ունենք։ Եվ մենք այստեղ անկեղծ ենք, բաց ենք, ու որևէ մեկին խաբելու մտադրություն չունենք, որովհետև այստեղ խոսքը ոչ միայն Ադրբեջանի մասին է, այլև մեր միջնորդ գործընկերների, որոնք մեր բարեկամ երկրներն են, մեր գործընկերներն են։ Սա պատվաբեր չի լինի, ուղղակի այդ իրավիճակում փորձ անել որևէ այլ բան այլ կերպ անել։

Մենք տվել ենք այն քարտեզները, որ ունենք, մենք ուրիշ քարտեզներ, նկատի ունեմ, արդեն իսկ փոխանցված տեղանքի առումով, ուրիշ քարտեզներ ուղղակի չունենք։ Եվ սա փաստ է, ու սա պետք է արձանագրել որպես իրողություն։ Ինչ վերաբերում է վստահությանը, պարզ է, որ այս իրավիճակում Ադրբեջանը մեզ չի վստահում, մենք Ադրբեջանին չենք վստահում և ամբողջ խնդիրն այն է, որ փորձենք փոքր քայլերով այնպես շարժվենք առաջ, որ գոնե ինչ որ վստահություն ձևավորվի։ Այդ վստահությունն ինչո՞ւ է կարևոր, որ կարողանանք, այո, նաև հումանիտար հարցերն ավելի արագ լուծել, և մեր գերեվարված եղբայրներին օր առաջ վերադարձնել իրենց ընտանիքներ»,- նշել է վարչապետ Փաշինյանը։

Օրերս ԱՄՆ Հայ դատի հանձնախմբի երիտասարդական թևի ներկայացուցիչները ցույց էին կազմակերպել ԱՄՆ-ում Հայաստանի դեսպանության առջև։ Համայնքի բողոքների հիմնական պատճառներն են՝ հայ-թուրքական մերձեցման նոր գործընթացի և հայ ռազմագերիների առկայության ֆոնին որևէ տոնակատարության կազմակերպում։ Հատուկ բողոք էր ներկայացվել Լիլիթ Մակունցի դեսպան նշանակման դեմ, որի կարգախոսն էր, որ Հայաստանն արժանի է ավելի պրոֆեսիոնալ պաշտոնյաների։

Հատկանշանակ է, որ Լիլիթ Մակունցը խնդիրներ ունի ոչ միայն համայնքային ավանդական կազմակերպությունների, այլ նաև Հայ առաքելական եկեղեցու հետ․ բանն այն է, որ Մակունցին դեմ են արտահայտվել նաև եկեղեցու սպասավորները և ծխի անդամները՝ բացահայտ ասելով, որ վերջինիս ներկայությունը ու ՀՀ պաշտոնյաների համար նախատեսված պատվավոր տեղը զբաղեցնելը ողջունելի չէ։ Նա կարող է միայն պատարագների մասնակցել որպես համայնքի շարքային ներկայացուցիչ։

Սա միակ նորարարությունը չէ, որ Լիլիթ Մակունցի նշանակմամբ տեղի է ունեցել։ ԱՄՆ Հայ դատի հանձնախմբի ներկայացուցիչների ցույցից «վախեցած դեսպանը» փորձել է պաշտպանվել ամերիկյան ոստիկանությամբ, որի ներկայացուցիչները ամբողջ ընթացքում ներկա են եղել։ Նշենք, որ 2018թ․, երբ Հայաստանում տեղի ունեցող հեղափոխության ժամանակ հայ համայնքի ներկայացուցիչները ցույց էին կազմակերպել ԱՄՆ-ում ՀՀ դեսպանության առջև, ոչ միայն չի եղել ամերիկյան ոստիկանության կամ անվտանգության որևէ ներկայացուցիչ, այլ հայկական դեսպանության դռները բացվել են բողոքի ակցիայի մասնակիցների առաջ և վերջիններիս հետ հանդիպել են դեսպանության աշխատակիցները։ Փաստորեն, ժողովրդի պահանջով և մանդատով իշխանության եկան անձինք այժմ օտարերկրյա ոստիկանությամբ պաշտպանվում են այդ նույն ժողովրդից։

Գորիս-Կապան ճանապարհին ոստիկանական անցակետ տեղադրած ադրբեջանցները հարակից տարածքում նաև շինարարություն են սկսել։ Ճանապարհով երթևեկողների համար աշխատանքները տեսանելի են անզեն աչքով։ Նախնական տվյալներով՝ ճանապարհն օկուպացրած ադրբեջանցիները կառուցում են բենզալցակայան։ «Փաստինֆո»-ի հետ զրույցում տեղեկությունը հաղորդել է Գորիսի փոխքաղաքապետ Կարեն Քոչարյանը։

Նրա խոսքով, ադրբեջանցիներին այդ հատվածում մեծ շինարարություն են անում, որը  երևում է անզեն աչքով։

Ճանապարհին կից հատվածում, որտեղ հայկական հողերին ու շինություններն են, ադրբեջանցիները նոր շունչ են որոշել հաղորդել։ Փոխքաղաքապետը հայտնեց, որ ամիսներ առաջ կորցրեց իրեն պատկանող հողատարածքը, հիմա էլ տեսնում է՝ ինչպես է թշնամին թարմացնում որդու կառուցած լցակայանը։

«Բենզալցակայանը սարքում են այն ժամանակ ինձ պատկանող հողատարածքում։ Որդուս սարքած տարածքն է, որտեղ նախկինում էլ լցակայան է եղել, հիմա իրենք ավելի են մեծացրել և թարմացնում են, ավելի մեծն են սարքում՝ ինչի՞ համար, ո՞ւմ համար՝ չգիտեմ։ 30 տարվա մեր պապական տարածքն է, GPS-ով ընկել է իրենց։ Դա անմիջապես ճանապարհի հարևանությամբ է գտնվում»,-ասել է նա։

Միևնույն ժամանակ՝ Գորիս-Կապան ճանապարհով երթևեկելու համար քաղաքացիները սպասում են երկու ժամ։ Ազգային անվտանգության ծառայությունը կանգնեցնում է Որոտանի հատվածով անցնող մեքենաները, կազմում շարասյուն, որից հետո ռուս սահմանապահների ուղեկցությամբ մեքենաներն առաջ են շարժվում։

Կարևոր է ոչ միայն բանակի պաշտպանական կարողությունների արդիականացումը, այլև ՀՀ-ի շուրջ բարենպաստ արտաքին միջավայրի ձևավորումը, տարածաշրջանի համար խաղաղ զարգացման դարաշրջան բացելու օրակարգի հետևողական իրագործումը։ Կառավարության նիստի ժամանակ այս մասին ասաց ՀՀ վարչապետ Նիկոլ Փաշինյանը։

Վարչապետը կարևորեց տարածաշրջանային տնտեսական և տրանսպորտային ենթակառուցվածքների վերաբացումն ու զարգացումը, որը կարող է որակապես փոխել ՀՀ-ի տնտեսության բովանդակությունն ու կառուցվածքը, լրացուցիչ խթան դառնալ ներհայաստանյան ենթակառուցվածքների զարգացման համար, ապահովել երկարաժամկետ ներառական տնտեսական աճ՝ ՀՀ քաղաքացիների համար ստեղծելով հավասար պայմաններ տնտեսական գործունեության մեջ ներգրավվելու համար։

«Այս համատեքստում առանցքային նշանակություն ունի կրթության զարգացումը, ուստի կրթության հասանելիությունը, ներառական զարգացումը և բովանդակային բարեփոխումը մեր երկարաժամկետ առաջնահերթությունն է։ Մեր նպատակն է՝ անձի կրթությունը և շարունակական զարգացումը դարձնել կենսակերպ։ Գիտության և տեխնոլոգիական ոլորտի զարգացումն այս պրոցեսի տրամաբանական շարունակությունն է և այստեղ էլ կառավարությունն արդեն ներդնում է ֆինանսավորման նոր բանաձևեր»,-նշեց Նիկոլ Փաշինյանը։

Նրա խոսքով 2022թ.-ի բյուջեում ձգտել են զգուշորեն բալանսավորել կառավարության առաջնահերթությունները և միաժամանակ ապահովել տարատեսակ ֆիսկալ ռիսկերի կառավարելիությունը։

Դավիթ Տոնոյանը արժանի է իր նկատմամբ իշխանության պատվերով ճնշումներին։ Նրա նման արժանի են Նիկոլ Փաշինյանի կողքին կանգնած բոլոր նրանք, ովքեր հանուն պաշտոնի ուրացան պետականության բարձրագույն արժեքը։ Այս մասին ֆեյսբուքյան իր էջում գրել է վերլուծաբան, լրագրող Նաիրի Հոխիկյանը։ 

«Դավիթ Տոնոյանը արժանի է իր նկատմամբ իշխանության պատվերով ճնշումներին։ Նրա նման արժանի են Նիկոլ Փաշինյանի կողքին կանգնած բոլոր նրանք, ովքեր հանուն պաշտոնի ուրացան պետականության բարձրագույն արժեքը։

Մինչև պատերազմը նույն Դավիթ Տոնոյանն էր հպարտանում ժամանակակից հզոր զենքով ու նոր տարածքներ թշնամուց վերցնելու հեռանկարով, ինչն էլ հաստատվում էր վարչապետի կողմից։ Հիշո՞ւմ եք, Փաշինյանն էր ասում’ ՊՆ նախարարը չի կարող անել այդպիսի հայտարարություն առանց վարչապետի հետ համաձայնեցնելու։ Իսկ հիշո՞ւմ եք, երբ ՍՈՒ-երն էին բերում, ոնց էր վարչապետը գովում Տոնոյանին ու կրկին ասում, որ բոլոր ռազմական պայմանավորվածությունները միասին են անում։

Հիմա ինչպե՞ս ստացվեց, որ Դավիթ Տոնոյանը դարձավ մեղավոր ու ձերբակալվեց։ Չե՞ք կարծում արդյոք, որ Փաշինյանը շոու է սարքում’ թեման շեղելով իրենից։

Ընդհանրապես, այդ մարդը ունակ է և պատրաստ է զոհաբերել անգամ իր ամենամոտ, իր համար ամենալավ ծառայած մարդկանց, միայն թե փրկի իրեն։ Չզարմանաք, եթե այդպես մի օր էլ Նիկոլ Փաշինյանը զոհաբերի Սուրեն Պապիկյանին, Արարատ Միրզոյանին, Արայիկ Հարությունյանին, նույնիսկ իր աներձագին, կնոջն ու երեխաներին, միայն թե ինքը մաքուր երևա։ Ընդամենը երևա… շոու։

Դավիթ Տոնոյանը, Օնիկ Գասպարյանը և պատերազմի ժամանակ ռազմական բարձր պաշտոն զբաղեցրած մյուսները գոնե հիմա պետք է խոսեն։ Մարդիկ պետք է իմանան ճշմարտությունը, անգամ եթե դա արժենա 2-3 գեներալի կյանք։

Հասկանում եմ, որ նշածս գործիչները վախենում են սեփական կյանքի ու անվտանգության համար, ինչպես որ վախենում էր իմ հրեա ընկերը, բայց գոնե հայերը պետք է հասկանան, որ կարող են փրկել մեր պետականությունը, եթե խոսեն քաղաքական իշխանության հանցանքների և իրենց ստացած դավաճանական հրահանգների մասին։

Գիտեմ, որ Դավիթ Տոնոյանը ասելու շատ բան ունի ինչպես պատերազմից առաջ, այնպես էլ ընթացքում եղած հարցերի, Արցախի նախագահ Արայիկ Հարությունյանի նամակի ու Նիկոլ Փաշինյանի պատասխանի, Թաղավարդի անտառների, Հադրութի զորամասում տեղակայված 300 հոգանոց գնդի միտումնավոր անգործության, գնդապետ Սերգեյ Շաքարյանի տարօրինակ մահվան, Շուշիի անհասկանալի հանձնման մասին։
Եթե չխոսեց, ինչպես եղավ Ջալալի դեպքում, ապա հավասար դավաճաններ են»,- գրել է Հոխիկյանը։

42 քաղաքացիական անձինք սպանվել են ադրբեջանական զինված ուժերի հեռահար հարվածների՝ ներառյալ՝ հրթիռակոծության, հրետակոծության, ռմբակոծության, դիվերսիոն խմբերի հրազենային կրակոցների հետևանքով, իսկ 38 քաղաքացիական անձինք սպանվել են ադրբեջանական գերության կամ առնվազն վերահսկողության ներքո՝ ֆիզիկական բռնության, դանակահարության, գլխատման, հրազենային մերձակա կրակոցի և այլ անմիջական միջոցների կիրառմամբ: 80 քաղաքացիական զոհերից 68-ը տղամարդիկ են, 12-ը կանայք։ 52 քաղաքացիական անձ սպանվել է բնակության վայրում, 15-ը` հասարակական վայրում, 11-ը` աշխատանքի վայրում, 1 հոգի` ադրբեջանական բանտում։ Այս մասին ֆեյսբուքյան իր էջում գրել է ԱՀ ՄԻՊ Գեղամ Ստեփանյանը՝ հրապարակելով քաղաքացիական անձանց սպանության դեպքերի վերաբերյալ զեկույցի թարմացված տարբերակը՝ դեպքերի հակիրճ նկարագրություններով։

«Արցախի Հանրապետության մարդու իրավունքների պաշտպանը հրապարակել է ադրբեջանական զինված ուժերի կողմից Արցախի քաղաքացիական անձանց սպանության դեպքերի վերաբերյալ զեկույցի թարմացված տարբերակը։
Զեկույցում ամփոփվել են 2020թ. սեպտեմբերի 27-ից մինչև 2021թ․սեպտեմբերի 27-ը ընկած ժամանակահատվածում Արցախի մարդու իրավունքների պաշտպանի աշխատակազմի փաստահավաք աշխատանքների արդյունքում հավաքագրված տվյալները Ադրբեջանի զինված ուժերի կողմից Արցախի քաղաքացիական բնակավայրերի թիրախավորման և ներխուժման հետևանքով զոհված քաղաքացիական անձանց վերաբերյալ։ Ներկայացվել են միայն անառարկելի հիմքերով ապացուցված դեպքերը։ Յուրաքանչյուր քաղաքացիական զոհի սպանության հանգամանքների վերաբերյալ զեկույցում ներկայացված է հակիրճ նկարագրություն։
Մինչև 2021թ․ սեպտեմբերի 27-ը հավաքագրված տվյալներով պարզվել է Ադրբեջանի զինված ուժերի կողմից սպանված 80 քաղաքացիական անձանց ինքնությունը։ 42 քաղաքացիական անձինք սպանվել են ադրբեջանական զինված ուժերի հեռահար հարվածների՝ ներառյալ՝ հրթիռակոծության, հրետակոծության, ռմբակոծության, դիվերսիոն խմբերի հրազենային կրակոցների հետևանքով, իսկ 38 քաղաքացիական անձինք սպանվել են ադրբեջանական գերության կամ առնվազն վերահսկողության ներքո՝ ֆիզիկական բռնության, դանակահարության, գլխատման, հրազենային մերձակա կրակոցի և այլ անմիջական միջոցների կիրառմամբ: 80 քաղաքացիական զոհերից 68-ը տղամարդիկ են, 12-ը կանայք։ 52 քաղաքացիական անձ սպանվել է բնակության վայրում, 15-ը` հասարակական վայրում, 11-ը` աշխատանքի վայրում, 1 հոգի` ադրբեջանական բանտում։ Քաղաքացիական զոհերի թվում մեծամասնություն են կազմում 63 և ավելի տարիք ունեցող անձինք։
Մարդու իրավունքների պաշտպանն արձանագրել է նաև 163 քաղաքացիական անձի վիրավորման դեպք, որոնց զգալի մասը տեղի է ունեցել այլ անձանց մահվան հանգեցրած հարվածների հետևանքով: Ադրբեջանական օկուպացիայի տակ հայտնված տարածքներից երկու տասնյակ քաղաքացիական անձանց ճակատագիրը դեռևս մնում է անհայտ։
Զեկույցը պատրաստվել է փակ և հրապարակային տարբերակով։ Փակ զեկույցում ավելացված են բազմաթիվ լուսանկարներ՝ ներկայացնելով զոհերին մահից առաջ ու հետո: Հրապարակային զեկույցը պատրաստվել է առանց լուսանկարների՝ հաշվի առնելով դրանցում առկա դաժան ու զգայուն պատկերները:
Զեկույցի փակ տարբերակն ուղղարկվել է միջազգային համապատասխան կառույցներին, հրապարակային տարբերակը հասանելի է հետևյալ հղմամբ՝ https://artsakhombuds.am/hy/document/785»,- գրել է Ստեփանյանը։