Հայաստանի ԱԳ նախարար Էդվարդ Նալբանդյանն ապրիլի 29-30-ին, պաշտոնական այցով կմեկնի Թեհրան:

ԱԳՆ մամուլի ծառայությունից հայտնում են, որ այնտեղ Է. Նալբանդյանը հանդիպումներ կունենա Իրանի բարձրաստիճան ղեկավարության հետ:

Թիվ 23 ընտրատարածքն ընգգրկող  Գեղարքունիքի մարզի Վարդենիս, ճամբարակ ,Սևան բնակավայրերում ընտրապայքարը բավականին թեժ է: Այստեղ հիմնական մրցակցությունը  Համամասնական ընտրակարգով  ԲՀԿ-ի և ՀՀԿ-ի միջև է: Դաշնակցությունը համարյա չի խառնվում, ՀԱԿ ը ևս ակտիվ չէ, ժառանգությունը թեև ինչ որ բան անում է, սակայն դա ընդհանուր շիկացած մթնոլորտում կարծես եղանակ չի փոխում:

Իսկ մեծամասնականով առաջադրված թեկնածուներից ընտրապայքարի առաջին գծում են ԲՀԿ թեկնածու Էդուարդ Սահակյանը և ՕԵԿ-ից Կարեն Բոթոյանը: Նրանց կարգախոսները և առհասարակ ընտրողի նկատմամբ մոտեցումները բավականին տարբեր են.

Կարեն Բոթոյանը,  առաջնայինը համարում է մարդկանց հավատի վերականգնումը:  

-Իսկ  դա ինչպե՞ս եք պատկերացնում

— Այո, նախևառաջ պետք է վերականգնել հավատը, այսօրվա, ու ինչու չէ, վաղվա հանդեպ: Հանդիպումների ընթացքում մարդիկ հաճախ են ասում՝  նախկիններն  ի՞նչ արեցին, որ ձեզանից ինչ սպասենք: Մարդիկ  ուշադրության կարիք ունեն: Իրենց  սոցիալ — տնտեսական խնդիրների , դարդ ու ցավի լուծումն են ուզում, որը  կարծում  եմ,  մի օրվա գործ չէ, և դա միանգամից այդքան էլ հեշտ չէ լուծելը , միայն խոստումներով չէ, պետք է հետևողական լինել: Ես վստահ եմ, որ եթե ես լինեմ  Աժ –ում, բաց ճակատով կմտնեմ իմ  ընտրատարածք:

— Որո՞նք են այն խնդիրները որոնք ավելի շատ են բարձրացնում  ընտրողները:

— Խնդիրները  որոնք բարձրաձայնվում են շատ –շատ են, օրինակ՝ գյուղերի բնակիչները հարցնում են՝  ինչո՞ւ պետք է իմ երեխան վառարանով տաքանա, ինչո՞ւ մեր բնակավայրը գազաֆիկացված չէ  ու կամ  ճանապարհների հարցը, ու էլի հարցեր, որոնց  պատասխանը  ես այսօր չունեմ: Լուծման տարբերակներ գտնել կարելի է, բայց աշխատանք ու ժամանակ է պետք:

Այսօր երկրում գլոբալ խնդիր է համարվում արտագաղթը: Իմ ընտրատարածքում արտագաղթն  ավելի զգալի է, քանի որ այստեղ կան սահմանամերձ գյուղեր: Իսկ սա նշանակում է, որ կա ազգային անվտանգության  խնդիր: Պետությունը դեմքով շրջվել է դեպի գյուղ, մենք էլ շատ անելիք ունենք:

-Առաջադրված թեկնածու — մրցակիցների կողմից  սև PR կիրառվում է՞

— Ի սկզբանե մենք որդեգրել ենք hանդարտ, խաղաղ քաղաքակիրթ մրցապայքար, սակայն մրցակիցների կողմից արվել և արվում են քայլեր, իմ անունը սևացնելու համար:  Իմ անվան հետ կապված ասեկոսեներ  են տարածվում: Սակայն կարծում եմ, որ ժողովուրդն իմաստուն է և շատ լավ գիտի,  ով  ով  է ու վստահ եմ, որ ցույց կտա իր կատարած ընտրությամբ:

«Ադրբեջան պետության գործելաոճի մեջ փոփոխություն կա` նպատակաուղղված ագրեսիա քաղաքացիական բնակչության դեմ: Սա մեզ խորհելու տեղիք է տալիս»,-այս մասին այսօր լրագրողների հետ  հանդիպման ժամանակ ասաց   Ռազմական փորձագետ Դավիթ Ջամալյանը: 

Նա կարծում է, որ Ադրբեջանի վերջին կրակահերթերը վկայում են, որ այդ երկիրը փոխել է իր գործելաոճը` թիրախում ունենալով հասարակ քաղաքացիներին:

Տավուշի մարզի Դովեղ գյուղում երեկ շուրջ երկու ժամ տևած կրակը, որն ուղղված է եղել գյուղի մանկապարտեզի վրա, նպատակաուղղված ագրեսիայի դրսևրում է և ոչ թե հենակետում կանգնած զինվերի քմահաճույք:

«Ադրբեջանական բանակը նպատակաուղղված կրակ է բացել խաղաղ բնակավայրի և ընդ որում ոչ միայն խաղաղ բնակավայրի, այլ հատկապես մանկապարտեզի դեմ»,- ասաց նա և հավելեց. «Ասել, թե դա հենակետում կանգնածի քմահաճույքն է, չի կարելի գործ ունենք նպատակաուղղված ագրեսիայի դրսևորման հետ»:

Նույն ագրեսիվ քաղաքականության հետևանք են, ըստ նրա, նաև այսօր առավոտյան հայկական սանիտարական մեքենայի վրա ադրբեջանական կողմի արձակած կրակոցները, որոնց հետևանքով երկու մարդ վիրավորվել է:

Ջամալյանի կարծիքով՝ հատկանշական է նաև, որ այս դեպքերը տեղի են ունենում Հայոց ցեղասպանության 97-րդ տարելիցից հետո, ինչը լրացուցիչ ցինիզմ է հաղորդում տեղի ունեցածին:

«Սա ապացուցում է, որ թուրք հանրույթը չի զղջում: Իսկ ադրբեջանցի թուրքը և Թուրքիայի թուրքը մեկը մյուսից շատ չեն տարբերվում»,- նկատեց Ջամալյանը:

Ապրիլի 25-ից 28-ը Երևանում Սանկտ Պետերբուրգի օրերի շրջանակում Երևանի քաղաքապետ Տարոն Մարգարյանը հանդիպել է Սանկտ Պետերբուրգի փոխնահանգապետ Օլգա Կազանսկայայի գլխավորած պաշտոնական պատվիրակության ներկայացուցիչների հետ:

Ըստ Երևանի քաղաքապետարանի տեղեկատվության և հասարակայնության հետ կապերի վարչության հաղորդագրության՝ ողջունելով հյուրերին, քաղաքապետը նախ նկատել է, որ Երևանում Սանկտ Պետերբուրգի օրերի անցկացումը մեկ անգամ ևս փաստում է երկու քաղաքների միջև ձևավորված հարաբերությունների բարձր մակարդակը:

Տարոն Մարգարյանը բարձր է գնահատել երկկողմ հարաբերությունների ամրապնդմանն ու ընդլայնմանն ուղղված Սանկտ Պետերբուրգի կառավարության ջանքերը, շեշտելով, որ Երևանը բաց և պատրաստակամ է քննարկելու մայրաքաղաքի զարգացմանն առնչվող բոլոր առաջարկություններն ու նախաձեռնությունները։

«Մեր փոխգործակցությունն այսօր զարգանում է 2011-2014թթ. համագործակցության ծրագրի շրջանակում, և հաշվի առնելով երկուստեք ստեղծված աշխատանքային խմբերի փոխհամաձայնեցված և արդյունավետ աշխատանքը, վստահ եմ, որ մենք կունենանք այն արդյունքները, որոնք նախանշել ենք»,- ընդգծել է Տարոն Մարգարյանը:Սանկտ Պետերբուրգի նահանգապետ Գեորգի Պոլտավչենկոյի և Սանկտ Պետերբուրգի կառավարության անունից ողջունելով քաղաքապետին, Օլգա Կազանսկայան նշել է, որ Երևանը ՌԴ Հյուսիսային մայրաքաղաքի համար կայուն և վստահելի գործընկեր է և ռուսական կողմը կարևորվում է Երևանի հետ փոխգործակցության ընդլայնումը։

«Վստահեցնում եմ, որ Երևանը մեզ համար հարազատ է ոչ միայն որպես բարեկամ այլ նաև որպես գործընկեր քաղաք և մենք բարձր ենք գնահատում կառուցողական գործընկերային այն մթնոլորտը, որն առկա է մեր հարաբերություններում»,- նշել է Սանկտ Պետերբուրգի փոխնահանգապետը:

Նկատի առնելով երկու քաղաքների պատմամշակութային հարուստ ժառանգությունը՝ կողմերը պայմանավորվել են առավել խորացնել և ընդլայնել այս ուղղությամբ փորձի փոխանակումը և երկուստեք խթանել զբոսաշրջության զարգացումը։

Մեկ անգամ ևս շնորհակալություն հայտնելով բարեկամական, ջերմ ընդունելության համար, հյուրերը հույս են հայտնել, որ չի ուշանա քաղաքապետ Տարոն Մարգարյանի գլխավորությամբ Երևանի պատվիրակությանը Սանկտ Պետերբուրգում հյուրընկալելու հնարավորությունը:

Պաշտոնական հանդիպումից հետո Երևանի քաղաքապետը և Սանկտ Պետերբուրգի փոխնահանգապետը պատասխանել են լրագրողների հարցերին:

Առավոտ. Թերթի գլխավոր խմբագիրն այսօրվա համարում գրում է. «Ընդդիմադիր գրեթե բոլոր կուսակցությունները այս ընտրարշավում պնդում են, որ ժողովուրդն ահաբեկված է: Երեկ այդ գնահատականը կրկնեց ՀԴԿ նախագահ Արամ Սարգսյանը` հիմնավորելով, թե ինչու պետք չէ հավատալ սոցիոլոգիական հարցումների արդյունքներին: Եթե խոսքը բուն սոցիոլոգիայի մասին է, ապա բարձր որակավորում ունեցող ընկերությունները հարցումների ժամանակ պարտադիր տալիս են «ստուգողական հարցեր»` պատասխանողների անկեղծությունը ճշտելու համար:
Բնականաբար, կարելի է կասկածներ ունենալ Gellap-ի կամ ВЦИОМ-ի որակի վերաբերյալ, կարելի է նաև ենթադրել, որ այդ երկու սոցիոլոգիական ընկերությունները կաշառված են ՀՀ իշխանությունների կողմից: Բայց նրանց տվյալները բերել որպես «վախի մթնոլորտի» ապացոյց, ինձ թվում է, այնքան էլ հիմնավոր չէ:
Կա՞, արդյոք, Հայաստանում վախի մթնոլորտ: Այդ հարցին պատասխանելու համար պետք է որոշել` արդյոք մեր երկրում իսկապե՞ս բռնապետական ռեժիմ է, ինչպես երբեմն պնդում են ընդդիմադիրները: Եթե այո, մենք ապրում ենք այնպիսի ռեժիմի պայմաններում, ինչպիսին Հյուսիսային Կորեայում է կամ Թուրքմենստանում, ապա, անշուշտ, մեր ժողովուրդը նույնպես վախեցած է և ահաբեկված ու ընտրությունների ինստիտուտ ընդհանրապես գոյություն չունի: Քաղաքացիներն ընդհանրապես հնարավորություն չունեն ոչ իրական, ոչ էլ վիրտուալ տարածքում արտահայտել իրենց կարծիքը, և այս պարագայում իսկապես ոչ մի իմաստ չկա սոցիոլոգիական հարցումներ անցկացնելու:
Բայց Հայաստանը, իմ տպավորությամբ, բռնապետություն չէ, այլ ավտորիտար, կոռումպացված ռեժիմով պետություն: Ավելի շուտ նման է Լատինական Ամերիկայի կամ ԱՊՀ-ի որոշ երկրների: Ընդ որում, 2011թ. կեսերից [քաղբանտարկյալներին ազատելուց և հավաքների ազատությունը չխոչընդոտելու կուրս բռնելուց հետո] Հայաստանը դրսևորում է մեղմ ավտորիտարիզմի նշաններ:
Այս պայմաններում ես դժվար եմ պատկերացնում, թե ինչպես են ժողովրդին ահաբեկում, վախեցնում և սպառնում: Եթե իմ գյուղապետը մտնի իմ կամ իմ հարևանների տուն և հորդորի քվեարկել իշխանության որևէ կուսակցության օգտին, ի՞նչ լծակներ է նա օգտագործելու մեզ վախեցնելու համար: «Ֆեյսբուքում» և այլ կայքերում ես կարդում եմ խիստ ընդդիմադիր կարծիքներ, որոնք արտահայտում են բուհերի դասախոսներ կամ պետական կառույցներում աշխատող չինովնիկներ: Նրանք բոլորը ներկայանում են իրենց անուն-ազգանուններով: Եթե նրանք վախենային իրենց աշխատատեղի համար, ապա հաստատ նման ձևով չէին արտահայտվի:
Երբեմն ասվում է, որ մեր քաղաքացիների մեծ մասը չի հավատում ընտրությունների գաղտնիությանը: Իբր շատ են մարդիկ, որոնք հավատում են, թե քվեախցիկում կա ինչ-որ հզոր անտեսանելի աչք, որը կֆիքսի, թե ինչպես են իրենք քվեարկել: Ինձ թվում է` նման մարդիկ Հայաստանում իրականում չկան: Իսկ եթե այդ հեքիաթներին հավատացող մարդիկ, այնուամենայնիվ, մեր երկրում որակ են կազմում, ուրեմն չարժե մեր երկրում անցկացնել ընտրություններ և խոսել ժողովրդավարության ու լեգիտիմության մասին»:

Հայաստանի կենտրոնական ընտրական հանձնաժողովի այսօրվա` ապրիլի 25-ի արտահերթ նիստբեղմնավոր է եղել. ներկայացվել է համացանցով էլեկտրոնային քվեարկության իրականացման եղանակն ու ժամկետները:

ԿԸՀ նիստում կայացրել է որոշում` 2012թ. մայիսի 6-ի Ազգային Ժողովի ընտրություններին դիտորդական առաքելություն իրականացնելու նպատակով հրավիրել «Ազատության եւ ժողովրդավարության նախաձեռնությունների աջակցություն» (ՍԻԼԲԱ) օտարերկրյա հասարակական կազմակերպությանը: Այս մասին հայտնում են ԿԸՀ մամուլի ծառայությունից:

Նիստում ՀՀ կենտրոնական ընտրական հանձնաժողովն ուժը կորցրած է ճանաչել Ազգային ժողովի մեծամասնական ընտրակարգով գրանցված պատգամավորի թեկնածուներ Գագիկ Պետրոսյանի (թիվ 8 ընտրատարածք), Թոռնիկ Գեւորգյանի (թիվ 19 ընտրատարածք), Ռոման Խաչատրյանի (թիվ 24 ընտրատարածք)և Մանուկ Վարդանյանի (թիվ 25 ընտրատարածք) գրանցումները` հաշվի առնելով վերջիններիս կողմից ներկայացրած, նոտարական կարգով վավերացված  ինքնաբացարկի մասին դիմումները:

Նշենք, որ բացի ՕԵԿ- ական  Մանուկ Վարդանյանից, որը Կապի և տրանսպորտի նախարարն է, մյուս երեքը անկուսակցական ինքնաառաջադրված թեկնածուներ էին:

Նպատակ ունենալով բացառել ՀՀ ընտրական օրենսգրքի 54-րդ հոդվածի 2-րդ մասի և 61-րդ հոդվածի տարաբնույթ ընկալումը` կենտրոնական ընտրական հանձնաժողովը ներկայացրել է պարզաբանում` շրջիկ արկղի միջոցով կազմակերպվող քվեարկությանը ներկա լինելու իրավունք ունեցող անձանց վերաբերյալ:

Քննարկվել են նաև «Իրավունքի Եվրոպա  Միավորում» իրավապաշտպան հասարակական կազմակերպության նախագահի և թիվ 12 ընտրատարածքում մեծամասնական ընտրակարգով պատգամավորի թեկնածու Լյովա Խաչատրյանի լիազոր անձի դիմումները:  Ինչպես նաև` թիվ 19 ընտրատարածքում մեծամասնական ընտրակարգով պատգամավորի թեկնածու Հակոբ Ռաֆիկի Հակոբյանի հայտարարությունները:

Մեր տեղեկություններն այն մասին, որ Մասիսի տարածաշրջանն ընդգրկող թիվ 16-րդ ընտրատարածքում, որտեղ առաջադրված են` ՀԱԿ-ից Գևորգ Գևորգյանը, ԲՀԿ-ից Տիգրան Ստեփանյանը, և ՀՀԿ –ից   Մուրադ Մուրադյանը, մթնոլորտը շիկացած է:

Հանրապետական կուսակցության թեկնածու Մուրադ Մուրադյանը չժխտեց, ավելին` նա ասաց, որ ստեղծվել է անհանդուրժողականության ու թշնամանքի մթնոլորտ. «Այն ինչ մեր ընտրատարածքում կատարվում է ինձ համար անընդունելի է: Ընտրությունը մեկ օր է և այսօրվա նման անցելու է, սակայն ասեմ, որ մեր կոալիցիոն գործընկերը շատ տեղերում խախտում է պայմանավորվածությունները: Թիվ 16 ընտրատարածքի պետական ողջ համակարգը իրենց ձեռքում է, (ի նկատի ունի ԲՀԿ-ն) բոլոր պետական աշխատողները առավոտից — իրիկուն պետական գործը թողած իրենց քարոզչությամբ են զբաղված: Պետական փողերը ծախսում են, գործ չեն անում: Պետական գործը թողած պետական փողերը իրենց անձնականի համար` նախընտրական նպատակներով են օգտագործում: Թեև ՀՀկ-ն ամեն ինչ անում է, որ արդար ընտրություն լինի, սակայն…

«Ժառանգությունը», կարելի է ասել, վաճառվել է «Բարգավաճ Հայաստան» կուսակցությանը, չկա էնտեղ մի հանձնաժողովի անդամ, որին ես ճանաչում եմ, որ «ժառանգության» անդամ լինի: «Ժառանգության» բոլոր հանձնաժողովների անդամները ԲՀԿ ականներ են:

Րաֆֆի Հովհաննիսյանն արդարությունից է խոսում, թող նայի, թե իր կուսակցության ներսում ինչ է կատարվում:

Շատ բաներ կան, որոնց կանդրադառնամ լրացուցիչ` ընտրություններից հետո:

Հայոց ցեղասպանութեան 100-ամեակի Լիբանանի կեդրոնական մարմնի նախաձեռնութեամբ տեղի ունեցաւ աննախընթաց տարողութեամբ բողոքի ցոյց թրքական դեսպանատան առջեւ, որուն մասնակցեցան 25.000 հայորդիներ։

Անթիլիասի նահատակաց  մատուռին  առջեւ ցեղասպանութեան զոհերու յիշատակին հոգեհանգստեան արարողութենէն եւ Արամ. Ա. Կաթողիկոսին պատգամը լսելէ ետք տասնեակ հազարաւոր ցուցարարներ քայլարշաւով մեկնեցան դէպի թրքական դեսպանատուն ,որուն առջեւ վեր բարձրացուցին հայ ժողովուրդի բոլոր իրաւունքներու վերականգնման պահանջը բողոքելով Անգարայի ժխտողական քաղաքականութեան դէմ։

Միջազգային, շրջանային եւ լիբանանեան լրատուամիջոցները  բողոքի գործողութեան տարողութիւնը նկատեցին աննախադէպ։

«Ժողովուրդ». Բանն այն է, որ Հովիկ Աբրահամյանի հրահանգով մարզում մի շարք ՀՀԿ-ականներ ուղղակի աշխատում են ԲՀԿ-ի օգտին: «Ժողովուրդ»-ի տեղեկություններով, վերջերս մարզում ԲՀԿ առաջնորդ Գագիկ Ծառուկյանը հանդիպել է Սևանի քաղաքապետ, ՀՀԿ-ական Գևորգ Մալխասյանին և նախկին մարզպետ, դարձյալ ՀՀԿ-ական Ռուդիկ Ղուկասյանին` Ուդոյին: Նրանք խոստացել են մեծամասնականով պաշտպանել ԲՀԿ-ական Էդուարդ Սահակյանին, իսկ համամասնականո՞վ… ԲՀԿ-ի համար աշխատելու հորդորներով Սևան է հասել նաև էրեբունու նախկին թաղապետ Մհեր Սեդրակյանը` Թոխմախի Մհերը, որը անձնական թշնամանք ունի Սերգեյ Մանուկյանի` Շինանյութի Սերգեյի հետ: Ու քանի որ տեղի ՀՀԿ-ականները, չունենալով սեփական թեկնածու, հիմնականում աշխատում են Սերգեյի փեսա Կարեն Բոթոյանի համար, դա դուր չի եկել ՀՀԿ շտաբի պետին ու իր կողմնակիցներին:

Ի դեպ, ԲՀԿ-ն այստեղ բավականին հետաքրքիր իրավիճակ է ձևավորել: Միանգամից երկու թեկնածուների է առաջադրել նույն 23 ընտրատարածքում, սևանցի էդուարդ Սահակյանը` պաշտոնապես ԲՀԿ-ի կողմից, իսկ վարդենիսցի Սմբատ Սիմոնյանը` ինքնաառաջադրմամբ, բայց դարձյալ «Կառուցենք բարգավաճ երկիր» կարգախոսով ու Ծառուկյանի հետ գովազդային պաստառներով: Երկակի խաղ է խաղում նաև Գեղարքունիքի մարզպետ Նվեր Պողոսյանը. նա Վարդենիսում հորդորում է ընտրել Սմբատին, իսկ Սևանում` էդուարդին:

Թերթը հիշեցնում է, որ թիվ 23 ընտրատարածքում պատգամավոր Հրանտ Մադաթյանին չթույլատրեցին առաջադրվել, դրա համար էլ նա իր վիրավորված ինքնասիրությունը փորձում է վերականգնել Էդուարդ Սահակյանի հաղթանակով` հընթացս պառակտելով հարազատ Ծովագյուղը: Թե ինչ կփոխի Սերժ Սարգսյանի այցը մարզում, կներկայացնենք հաջորդիվ:

«Հրապարակ».  Հրազդան քաղաքի հանրապետական քաղաքապետ Արամ Դանիելյանը, ով նաև ՀՀԿ տարածքային պատասխանատուն է, որոշել է սատարել Հրազդանում առաջադրված ԲՀԿ-ակսւն թեկնածու Դավիթ Քոչարյանին, թեև դա իր, ոչ թե ՀՀԿ-ի որոշումն է: Միևնույև ժամանակ թերթի խմբագրությունը բողոք է ստացել հրազդանցիներից, որ Հրազդանի փողոցները քանդված են: Քաղաքապետը հավաստիացնում է, որ «Հրազդանում դեռ ձյունը չի հալվել», որ իրենք սկսեն կառուցապատել քանդված փողոցները: Քաղաքապետի հետ թերթի զրույցից մի հատված ներկայացնում ենք ստորև`

-Պարոն Դանիելյան, Դուք Հրազդանում մեծամասնականով առաջադրված ո՞ր թեկնածուին քք սատարում: Ճի՞շտ է, որ չեք աջակցել Մանուկ Վարդանյանին:

-Մանուկ Վարդանյանը մեր լավ ընկերն ա: Եթե ինքը մնար, ես կաջակցեի իրան, բայց էսօր քանի որ ինքը ինքնաբացարկ է հայտնել, ես կաջակցեմ Դավիթ Քոչարյանին:

-Այսինքն` աջակցում եք ԲՀԿ-ի ներկայացուցչի՞ն:

-Ինքը իմ ընկերն ա, ընկերական հարաբերություններ ունենք: Արդեն այստեղ կուսակցական խնդիր չի: Եվ կոչ եմ անելու ձայն տալ Դավիթ Քոչարյանի օգտին:

-Մի քիչ անհասկանալի չէ՞ Ձեր դիրքորոշումը, քանի որ քաղաքապետի ընտրության ժամանակ ԲՀԿ-ն Ձեզ այդպես էլ պաշտոնապես չսատարեց:

-Ես որպես ԲՀԿ ներկայացուցիչ չեմ սատարում Դավիթ Քոչարյանին: Ես որպես անհատ եմ սատարում, որպես մեր ընկեր:

-Իսկ Հանրապետականում տեղյա՞կ են և համաձա՞յն են Ձեր որոշմանը:

-Դա իմ անձնական խնդիրն ա, մոտեցումն ա:

-Ասել է թե` տեղյակ չեք պահել Հանրապետականին, գտնում եք, որ դա Ձեր անձական մոտեցումն է:

-Այո:

-Կարծում եք խնդիր չե՞ք ունենա, եթե Հանրապետականում տարակարծություն լինի:

-Ոչ: