Սուրբ Աթոռ պաշտոնական այցի շրջանակներում Նախագահ Սերժ Սարգսյանն այսօր առանձնազրույց է ունեցել Նորին Սրբություն Հռոմի Պապ Ֆրանցիսկոսի հետ: Այս մասին հայտնում են  Նախագահի աշխատակազմի հասարակայնության և տեղեկատվության միջոցների հետ կապերի վարչությունից:

Հանրապետության ղեկավարը և Նորին Սրբությունը գոհունակությամբ են խոսել Հայաստանի և Վատիկանի միջև բարձր մակարդակի հարաբերությունների մասին՝ ընդգծելով, որ ամուր հիմքեր ունեցող այդ հարաբերությունները սերում են քրիստոնեական նույն արժեհամակարգից և գաղափարախոսությունից: Զրուցակիցները կարևորել են վերջին տարիներին հաճախակի դարձած բարձրաստիճան փոխայցելություններն ու շփումները, որոնք վկայում են երկկողմ հարաբերությունները մշտապես ուշադրության կենտրոնում պահելու փոխադարձ պատրաստակամության մասին: Սերժ Սարգսյանը և Նորին Սրբությունը մտքեր են փոխանակել Մայր Աթոռ Սուրբ Էջմիածնի և Կաթոլիկ եկեղեցու միջև հաստատված սերտ համագործակցության մասին: Հանդիպման ընթացքում Նախագահը Սրբազան Քահանայապետին պաշտոնապես հրավիրել է 2015թ. այցելել Հայաստան: Սրբազան Քահանայապետը սիրով ընդունել է հրավերը, վստահեցնելով, որ իր սրտի ցանկությունն է գալ Հայաստան:

Այնուհետև Նախագահ Սերժ Սարգսյանը հանդիպել է Սուրբ Աթոռի պետքարտուղար Կարդինալ Պիետրո Պարոլինի հետ: Զրուցակիցները քննարկել են հայ-վատիկանյան հարաբերությունների ներկան և զարգացման հեռանկարը: Կողմերը գոհունակությամբ են արձանագրել, որ վերջին ժամանակահատվածում այդ հարաբերությունները զարգանում են բարձր տեմպերով և գործակցության ամենատարբեր հարթություններում:

Հանդիպման ընթացքում քննարկվել են Մերձավոր Արևելքում քրիստոնիաներին և քրիստոնեական ժառանգությանն առնչվող արդի հիմնախնդիրները: Նախագահ Սերժ Սարգսյանը ներկայացրել է Հայաստանի պատրաստակամությունը մասնակցելու այս ուղղությամբ իրականացվող աշխատանքներին:

Անդրադարձ է եղել նաև ԼՂ հիմնախնդրի խաղաղ կարգավորմանն առնչվող հարցերին: Նախագահ Սերժ Սարգսյանը շնորհակալություն է հայտնել կարդինալ Պիետրո Պարոլինին Լեռնային Ղարաբաղի հիմնախնդրում Սուրբ Աթոռի հավասարակշռված դիրքորոշման համար:

Այցի շրջանակներում Սերժ Սարգսյանն այսօր հանդիպում է ունեցել նաև Սուրբ Աթոռի կուրիայի (վարչական մարմնի) կարդինալների հետ:

Երեկվա միջադեպը, երբ շփման գծի հարավային մասում ադրբեջանցի դիպուկահարը սպանել է ԼՂՀ ԶՈՒ ավագ լեյտենանտ, 1990թ.-ին ծնված Մհեր Հակոբյանին՝ Բաքվի պատասխանն է ԵԱՀԿ Մինսկի խմբի ամերկացի համանախագահ Ջեյմս Ուորլիքին:

Այս մասին «Հայկական ժամանակ» թերթի թղթակցին ասել է ԼՂՀ նախագահի մամուլի խոսնակ Դավիթ Բաբայանը:

Նախօրեին Երևանում Ջեյմս Ուորլիքը խոսել էր բանակցային նոր փուլ սկսելու մասին: «Բոլորը խոսում են բանակցային նոր պատուհանի բացման մասին: Պատուհանը բացվում է, բայց Ադրբեջանն այդ պատուհանին կրակում է: Մենք պետք է ամեն ինչ անենք, որ կա՛մ բաց պատուհանի վրա չկրակեն, կա՛մ այդ պատուհանները փակվեն»,-ասել է Բաբայանը:

Հայկական ժամանակ

Երեք երկրների կողմից արդեն հստակ համաձայնեցվել է ճանապարհային քարտեզը, որտեղ հաստատված է Հայաստանի անդամակցության հարցը և բանակցություններով մնում է միայն համաձայնության գալ որոշ տեխնիկական հարցերի շուրջ. այս մասին այսօր լրագրողների հետ հանդիպման ժամանակ նշել է բելառուսցի փորձագետ, «Ցիտադել» վերլուծական նախագծի ղեկավար Ալեքսանդր Շպակովսկին:

Այն հարցին, թե ի վերջո, հոկտեմբերի 10-ին կստորագրվի ՀՀ-ի անդամակցությունը հաստատող փաստաթուղթը, Շպակովսկին ընդգծել է. «Եթե նշված տեխնիկական հարցերում համաձայնություն չլինի, շատ հնարավոր է, որ հետաձգվի փաստաթղթի ստորագրումը, բայց դա լուրջ նշանակություն չի կարող ունենալ և մոտ ապագայում ՀՀ քաղաքացիները կարող են օգտվել բոլոր այն դրական ազդեցություններից, ինչ նախատեսում է ԵՏՄ-ն»:

Ռազմավարական հետազոտությունների ռուսական ինստիտուտի առաջատար գիտաշխատող Ալեքսանդր Սիտինն իր հերթին նշել է, որ իրականությանը չի համապատասխանում այն տեսակետը, թե ԵՏՄ անդամ պետությունների ներսում լուրջ տարաձայնություններ կան ՀՀ-ի անդամակցության հարցով: Նրա խոսքով,  բոլոր անդամ երկրներն էլ ողջունել են Հայաստանի անդամակցությունը:

Փորձագետների կարծիքով,  Հայաստանից հետո հաջորդ անդամակցող երկիրը կլինի Ղրղըզստանը:

ՀՅԴ-ն պատրաստվում է առաջիկայում կրկին իշխանության մաս կազմել: Ինչպես պնդում են «ՉԻ» լավատեղյակ աղբյուրները, այս անգամ ՀՀԿ-ն ու ՀՅԴ-ն կոալիցիա չեն կնքի, այլ դաշնակցականները կհայտարարեն, որ եկել են օգնելու կառավարությանը՝ իբր «լուծելու համար ժողովրդի առաջ ծառացած խնդիրները» և կստանձնեն 2-3 նախարարական պորտֆել:

Նույն աղբյուրների պնդմամբ, ՀՅԴ-ն Հովիկ Աբրահամյանի կառավարության պատրաստվում է օգնության հասնել հունվարին;

Չորրորդ ինքնիշխանություն

Ժամանակ առ ժամանակ լսում եմ, թե «որոշակի ուժեր» Հայաստանում ուզում են «մայդան» հասունացնել: Սովորաբար դա ասում են Ռուսասատանի ներկայացուցիչները կամ նրանց հայաստանյան երկրպագուները, հետևաբար նրանց ակնարկներն ուղղված են Արևմուտքին:

Երբեմն հակառակ կողմից էլ են նման բան ասում, բայց դա խելքին մոտիկ չէ՝ Ռուսաստանը «մայդաններ» չի կազմակերպում, եթե Հայաստանում իր համար անընդունելի իշխանություն լինի, նա «քսի» կտա Ադրբեջանին, և հնարավոր պատերազմի դեպքում կարող է այնպիսի քաոս ստեղծվել, որ շատ հնարավոր է, այստեղ իշխանափոխություն լինի:

«Մայդանական» կամ, ինչպես սիրում են ռուսաստանցի և ռուսամետ քաղաքագետներն ասել՝ «գունավոր հեղափոխություն» կարող է անել միայն Արևմուտքը: Ենթադրենք դա այս կամ այն պատճառով շատ պետք է: Բայց այդպիսի հեղափոխության համար պետք են հեղափոխական զանգվածներ: Հայաստանի Երրորդ հանրապետության պատմությունը ցույց է տալիս, որ դրանք ասպարեզ են դուրս գալիս միայն մի դեպքում՝ կեղծված նախագահական ընտրություններից հետո:

Ինչու է այդպես՝ ակնհայտ է: Մեր ժողովրդին պետք է «բարի թագավոր», որը հարազատ հոր նման իրեն՝ ժողովրդին «լավ կնայի»: 1996թվականի նախագահական ընտրություններից սկսած՝ ժողովուրդը համոզված էր, որ «բարի թագավորի» թեկնածուներ էին Վազգեն Մանուկյանը, Կարեն Դեմիրճյանը, Ստեփան Դեմիրճյանը, Լևոն Տեր-Պետրոսյանը, Րաֆֆի Հովհաննիսյանը,  որոնք գալիս էին փոխարինելու «ժողովրդին լավ չնայող» «չար թագավորներին»՝ Լևոն Տեր-Պետրոսյանին, Ռոբերտ Քոչարյանին և Սերժ Սարգսյանին:

Առավոտ

Ինչպես գիտենք, ԲՀԿ-ն, «Ժառանգությունը» և ՀԱԿ-ը հոկտեմբերի 10-ին պատրաստվում են հանրահավաք անցկացնել, իսկ ՀՅԴ-ն որոշել է չմիանալ նրանց: Արդյո՞ք քառյակը կվերածվի եռյակի, և ի՞նչ է նշանակում ՀՅԴ-ի նման պահվածքը: Այս հարցը ուղղեցինք մի շարք քաղաքական գործիչների և քաղաքագետների:

«Ժառանգություն» կուսակցության անդամ Ստյոպա Սաֆարյանը նշեց. «Քանի որ տարաձայնությունները սահմանադրական բարեփոխումների վերաբերյալ էին, կարելի է ենթադրել, թե ինչ է տեղի ունեցել: Հոկտեմբերին հրավիրվելիք հանրահավաքին, ՀԱԿ-ի և ԲՀԿ-ի թիվ մեկ խնդիրը սահամանադրական բարեփոխումներն են լինելու, պարզ է, որ մի կողմից կհնչեին քննադատություններ,իսկ մյուս կողմից ՀՅԴ-ն ելույթ կունենար հօգուտ դրա:

Եվ ինչքան թեմաները խորանային, այնքան այդ ուժերը հայտնվելու էին բարիկադի տարբեր կողմերում»:

Մեր այն հարցին, թե տեղյակ է՝ «Ժառանգությունը» մասնակցելո՞ւ է հանրահավաքին, Ստյոպա Սաֆարյանն ասաց.

«Ժառանգությունը» որևէ կերպ չի հայտնել իր տեսակետը պաշտոնապես, որովհետև հանրահավաքի մանրամասները Գագիկ Ծառուկյան և Լևոն Տեր-Պետրոսյան հանդիպման ժամանակ է քննարկվել, իսկ «Ժառանգության» մասնակցության մասին խոսելը դեռևս վաղ է»:

Հայ ազգային կոնգրեսի ներկայացուցիչ Զոյա Թադևոսյանը նախ նշեց, որ տեղյակ չէ, թե ինչ է տեղի ունեցել հանդիպման ժամանակ, քանի որ Վրաստանից հյուրեր ունի, և դեռ չի հասցրել մասնրամասներ ճշտել, մեր տեղեկացնելուց հետո միայն Զոյա Թադևոսյանը նշեց. «Դե, ինչ ասեմ, դա իրենց որոշումն է, սակայն լավ կլիներ, որ հանրահավաքի մասնակցությունը չկապվեր սահմանադրական բարեփոխումների հետ, առավել ևս, երբ հայտնի չէ, թե ինչ բարեփոխումների մասին է խոսքը, լինելու են դրանք, թե՝ ոչ: Որոշումը չեղած իրադրության, չեղած իրավիճակի հետ կապելը, ճիշտ չէ»:

«Նոր ժամանակներ» կուսակցության նախագահ Արամ Կարապետյանը երբեք չի պատկերացրել Դաշնակցության և Լևոն Տեր-Պետրոսյանի համագործակցությունը.

«Եվ ընդհանրապես այժմ Հայաստանում տեղի ունեցող քաղաքական գործընթացներին լրջությամբ չեմ վերաբերում»,- նշեց նա:

ԲՀԿ խմբակցության քարտուղար Նաիրա Զահրաբյանը տեղեկացրեց, որ Դաշնակցությունը և մյուս երեք կուսակցությունները լրջագույն անհամաձայնություն ունեին՝ կապված սահմանադրական փոփոխությունների հետ,իսկ հանրահավաքին այդ հարցերը չէին կարող չբարձրացվել:

«Ուստի Դաշնակցությունն ինքն է որոշել չմասնակցել հանրահավաքին: Ինչ վերաբերում է քառյակի եռյակ դառնալուն, ապա Դաշնակցությունը հավաստիացնում է,որ մնացած բոլոր հարցերում մեզ հետ համակարծիք է և կշարունակի համագործակցել մյուս երեք կուսակցությունների հետ»,-ընդգծեց Զոհրաբյանը:

ԲՀԿ-ն, «Ժառանգությունը» և ՀԱԿ-ը հոկտեմբերի 10-ին պատրաստվում են հանրահավաք անցկացնել, սակայն ՀՅԴ-ն չի միանա նրանց: Այս մասին քառյակի հանդիպման ավարտից հետո լրագրողներին տեղեկացրել է ԱԺ ԲՀԿ խմբակցության քարտուղար Նաիրա Զոհրաբյանը:

Նրա խոսքով, սահմանադրական բարեփոխումների վերաբերյալ ՀՅԴ-ի տեսակետը հակասում է քառյակի մյուս ուժերի տեսակետին, իսկ հանրահավաքի ընթացքում իրենք չեն կարող շրջանցել սահմանադրական բարեփոխումների հարցը:

«Դա իրենց որոշումն է, և մենք հարգում ենք այդ որոշումը: Ցանկալի կլիներ, որ նրանք մեզ հետ լինեին, մասնակցեին հանրահավաքին և մարզային այցելություններին, սակայն իրենք այդպես են որոշել»,-ընդգծել է Նաիրա Զոհրաբյանը՝ կոչ անելով այդ ամենի մեջ ինտրիգներ չփնտրել:

Վարչապետ Հովիկ Աբրահամյանը դեռ մայիսի հայտարարել էր «վարչապետների ակումբ» ստեղծելու մտադրության մասին՝ նշելով, որ ցանկություն ունի նախկին վարչապետներին ներգրավել տնտեսական, քաղաքական գործընթացները քննարկելու գործում:

Պարզվում է՝ ակումբը դեռևս չի գործում, որովհետև մշակվում է դրա կանոնակարգը:

Թերթի հետ զրույցում ԱԺ ՀՀԿ խմբակցության պատգամավոր Խոսրով Հարությունյանը, որը ևս մասնակցելու է նախկին վարչապետների հավաքներին, ասաց, թե հիմա ակումբի կանոնակարգի մշակումից հետո միայն կկազմակերպվեն քննարկումները:

Թե ի՞նչն են կանոնակարգելու, Հարությունյանն ասաց, որ այն լինելու է չպարտավորեցնող, վարքագծի կանոններ ենթադրող, փոխհարաբերությունները կարգավորող փաստաթուղթ:

Չորրորդ ինքնիշխանություն

«Ժառանգություն» խմբակցության ղեկավար Ռուբեն Հակոբյանը երեկ սահմանադրական բարեփոխումների մասին խորհրդաժողովի ժամանակ հայտարարեց 3 կետերից կազմված իրենց պայմանը՝ իշխանություններին, որը կատարելու դեպքում կհամաձայնեն մասնակցել քննարկումներին և փոխել Սահմանադրությունը: Այդ պայմաններն են՝ Ընտրական օրենսգրքում փոփոխություններ կատարել, ընդդիմությանը տալ վերահսկողական լուրջ լծակներ և 2016թ.-ի գարնանը համապետական ընտրություններ անել՝ բարեփոխված Սահմանադրությամբ:

Այս կետերը լսելուց հետո ԲՀԿ խմբակցության անդամ Վարդան Բոստանջյանը դուրս եկավ սրահից և ասաց, որ տրամադրությունն ընկել է: «Առավոտը» հարցրեց՝ դավաճանությո՞ւն եք համարում Ռուբեն Հակոբյանի այդ պայմանները, անակնկա՞լ էր սա ձեզ համար: նա պատասխանեց. «Հերթական անգամ ես տեսա, որ մեղկ ու կրակ է ազգս, քան որոշում կայացնողները»: Մեր հարցին՝ գործարքի կասկածնե՞ր ունեք՝ նա պատասխանեց. «Գործիչ կա, իշխանությունը վերարտադրում է, այդքան բան, ուրիշ ոչինչ»:

Մեզ հետ զրույցում իշխանության հետ գործարքի մասին Ռուբեն Հակոբյանն ասաց. «Եթե մենք հստակ, փաստարկված ներկայացնում ենք իրավիճակը, ասում ենք՝ պայմաններ կան, որոնք այսօր խոսում են այն մասին, որ քեզ՝ իշխանություն, չի կարելի վստահել, այս պայմաններն իրականացնես՝ մենք կմտնենք քննարկման դաշտ, եթե դրանով մենք նպաստում ենք իշխանության վերարտադրմանը՝ ես այստեղ ձեռնպահ կմնամ: Շատ-շատ եմ կասկածում, որ այս մեր առաջարկությունները իշխանությունը կանի»:

Առավոտ

Այսօր ժամը 11:00-ին Ազգային ժողովի ԲՀԿ խմբակցությունում տեղի կունենա ոչ իշխանական Քառյակի հանդիպումը, որի ընթացքում էլ կորոշվի համատեղ հանրահավաքի օրը:

Քառյակը պետք է բավական նուրբ մի հարց լուծի՝ առաջիկա հանրահավաքի հետ կապված: Բանն այն է, որ ՀՅԴ-ն կողմ է սահմանադրական փոփոխություններին, իսկ ՀԱԿ-ը քաղաքական պրոցեսի առանցքում տեսնում է սահմանադրական փոփոխությունների տապալումը: Այսօրվա քննարկման ընթացքում Քառյակի ուժերը պետք է փորձեն լուծում գտնել այս հարցին. ինչպե՞ս անել, որ հանրահավաքի հարթակը լինի միասնական և հնարավոր լինի գործողությունների միասնական-ռազմավարական հեռանկար գծագրել: Սա, իհարկե, դժվար, բայց և լուծելի խնդիր է:

Հայկական ժամանակ