Մայիսի 24-ին ոստիկանության Մարտունու բաժնում հաղորդում է ստացվել, որ  ժամը 09.45-ի սահմաններում 24-ամյա Միքայել Մ.-ի վարած «ԶԻԼ-130» մակնիշի ավտոմեքենան Սևան-Մարտունի-Գետափ ճանապարհի 81-րդ կմ-ին շրջվել է, ինչի հետևանքով ուղևորուհին` 34-ամյա  Մարինե Գրիգորյանը, տեղում մահացել է, իսկ մյուս ուղևորները` 46-ամյա  Գոհար Կ.-ն, 16-ամյա Կարեն Կ.-ն, 48-ամյա Ջիվան Մ.-ն և 36-ամյա Արփինե Ա.-ն  մարմնական վնասվածքներով տեղափոխվել են հիվանդանոց:

Մայիսի 24-ին ոստիկանության Ստեփանավանի բաժնում հաղորդում է ստացվել, որ ժամը 07.30-ի սահմաններում 51-ամյա Գագիկ Վարդանյանի վարած «ԵրԱԶ» մակնիշի ավտոմեքենան Ստեփանավան-Վանաձոր ճանապարհի 2-րդ կմ-ին բախվել է ծառին: Պատահարի հետևանքով վարորդը տեղում մահացել է:

Ս.թ  մայիսի 22-ին, “Զվարթնոց”  օդանավակայանի տեղեկատու ծառայություն անանուն հեռախոսազանգ  է ստացվել, որ նույն օրվա Երևան-Ամստերդամ չվերթի ինքնաթիռում ռումբ է տեղադրված:

Համապատասխան   ծառայությունների համատեղ  ստուգման արդյունքում  պարզվեց, որ ահազանգը կեղծ էր:

ՀՀ ԱԱԾ մարմինների կողմից իրականացված օպերատիվ-հետախուզական միջոցառումների արդյունքում, մայիսի 23-ին, հայտնաբերվել ու ձերբակալվել է կեղծ ահազանգի հեղինակ, Երևան քաղաքի բնակիչ, 1968թ. ծնված, նախկինում երեք անգամ դատապարտված Հայկ Սուրիկի Վարդանյանը:

Փաստի առթիվ ՀՀ ԱԱԾ քննչական վարչությունում կատարվում է նախաքննություն:

ՀՀ ԱԱԾ-ն ևս մեկ անգամ զգուշացնում է, որ  նմանատիպ  արարքների հեղինակները կբացահայտվեն և կպատժվեն օրենքի ողջ խստությամբ:

ՀՀ ԱԱԾ Մամուլի կենտրոն

Հայտարարություն է տարածել ԱՆ Քրեակատարողական հիմնարկների վարչության Հասարակայնության հետ կապերի բաժանմունքի պետ Արսեն Բաբայանը.

ՀՀ ԱՆ «Էրեբունի» քրեակատարողական հիմնարկի դատապարտյալ, նախկինում 6 անգամ ազատազրկման դատապարտված Մխիթար Վարդանյանը (ՀՀ քրեական օրենսգրքի 175-րդ հոդվածի 2-րդ մասի 2-րդ և 3-րդ կետերով 8 տարի ազատազրկման դատապարտված) ս.թ. մայիսի 22-ին, ժամը 17:10-ի սահմաններում, կախվելու միջոցով ինքնասպանություն  է գործել:

Դիակի զննությամբ հայտնաբերվել է գրություն, որով դատապարտյալը խնդրել է իր արարքի համար չմեղադրել այլ անձանց:

Տեղեկացնում ենք, որ քրեակատարողական հիմնարկներում ինքնասպանության յուրաքանչյուր դեպքով, որպես ընդունված կարգ, հարուցվում է քրեական գործ` անձին ինքնասպանության հասցնելու հնարավոր վարկածը ստուգելու նպատակով:

Նախաքննությունը շարունակվում է:

«Ըստ ԼՂՀ պաշտպանության բանակից ստացված տեղեկությունների` վերջին օրերին կտրուկ ավելացել են հակառակորդի կողմից հրադադարի ռեժիմի խախտման դեպքերը, իսկ այսօր դիպուկահար և այլ զինատեսակներից հակառակորդն արձակել է ավելի քան 300 կրակոց»,- ասել է ՊՆ խոսնակ Դավիթ Կարապետյանը, արձագանքելով ադրբեջանական կողմի այն հայտարարությանը, որ շփման գծում ադրբեջանցի զինվորներ են զոհվել:

Ըստ նրա, Հայկական զինված ուժերը պատասխան գործողություններով լռեցրել են հակառակորդի կրակակետերը: Հայկական կողմից տուժածներ չկան:

Այսօր Հայաստանի ԱԳ փոխնախարար Արման Կիրակոսյանը Ժնևի կենտրոնի ներկայացուցիչների հետ  միասին քննարկել են Հայաստանի հետ համագործակցությունն առավել ընդլայնելու և սերտացնելու հնարավորությունները: Միաժամանակ   Արման Կիրակոսյանը  Երևանում Զինված ուժերի ժողովրդավարական վերահսկման Ժնևի կենտրոնի փոխտնօրեն Ֆիլիպ Ֆյուրիին է ներկայացրել զինված ուժերի նկատմամբ ժողովրդավարական վերահսկողության Հայաստանում գործող մեխանիզմները, որոնք,  ըստ  ԱԳ փոխնախարարի,  աստիճանաբար ավելի են ընդլայնվում ու կատարելագործվում և հանդիսանում են պաշտպանական բարեփոխումների կարևորագույն ուղղություններից մեկը:

Նշենք, որ Զինված ուժերի ժողովրդական վերահսկման Ժնևի կենտրոնին անդամակցում է 58 պետություն` որոնց թվում է նաև Հայստանը,որը միացել է կազմակերպության խորհրդին 2002թ. նոյեմբերի 14-ին: Հիշեցնենք նաև, որ Ժնևի կենտրոնը հիմնվել է 2000 թվականին:

Հայաստանում ԱՄՆ արտակարգ և լիազոր դեսպան Մարի Յովանովիչին` դիվանագիտական առաքելության ավարտի կապակցությամբ այսօր ընդունել է փոխվարչապետ, տարածքային կառավարման նախարար Արմեն Գևորգյանը:

Փոխվարչապետը նշել է, որ Յովանովիչի պաշտոնավարման ընթացքում ԱՄՆ աջակցությամբ տարբեր ոլորտներում մի շարք ծրագրեր են իրականացվել: Նա մասնավորապես առանձնացրել է «Հազարամյակի մարտահրավեր» կորպորացիայի ծրագրերը` հատկապես ընդգծելով ոռոգման ենթակառուցվածքների վերականգնման բաղադրիչը:

Գևորգյանը բարձր է գնահատել նաև դեսպանի ջանքերը` թրաֆիկինգի դեմ պայքարի ոլորտում աջակցության և համագործակցության համար:
Հաջողված են համարվել նաև մարզերում և տեղական ինքնակառավարման մարմիններում ԱՄՆ ՄԶԳ կողմից իրականացված տարբեր ծրագրերը:

Դեսպանն իր հերթին Հայաստանում պաշտոնավարման տարիները հետաքրքիր և արդյունավետ է համարել` նշելով, որ հեռանում է լավագույն տպավորություններով: Նա վստահություն է հայտնել, որ փոխշահավետ համագործակցությունը հետագայում ևս կշարունակվի` ավելացնելով, որ ԱՄՆ-ը մեծ նշանակություն է տալիս Հայաստանի հետ հարաբերությունների խորացմանը:

Կողմերը մտքեր են փոխանակել նաև երկկողմ համագործակցության զարգացման և մի շարք այլ հարցերի շուրջ:

Նախագահ Սերժ Սարգսյանը ստորագրել է «ՀՀ տոների և հիշատակի օրերի մասին» ՀՀ օրենքում լրացում կատարելու մասին, «Հողի հարկի մասին» ՀՀ օրենքում լրացում և փոփոխություններ կատարելու մասին, «Գույքահարկի մասին» ՀՀ օրենքում լրացում և փոփոխություններ կատարելու մասին ՀՀ օրենքները:

Ըստ «ՌԻԱ Նովոստի»- գործակալության ՌԴ նախագահի աշխատակազմից  հաստատել են այն տեղեկությունը, թե Ռուսաստանի նախագահ Դմիտրի Մեդվեդեւը ծրագրում է հանդիպել Միացյալ Նահանգների նախագահ Բարաք Օբամային: Հանդիպումը նախատեսվում է Ֆրանսիայում մայիսի 26-27-ին կայանալիք «Մեծ ութնյակի» գագաթաժողովի շրջանակներում:

Այսօր`  Քիչ առաջ անհայտ քաղաքացուց ահազանգ է ստացվել ոստիկանության Էրեբունու բաժին: Որը հայտնել է, թե Սարի թաղի 23  փողոցին հարակից լճակում դիակ կա:

Փրկարարները հանել են  դիակը: Նախնական տեղեկություններով, բռնության հետքեր չեն արձանագրվել:

Պարզվել է, որ մահացածը Սարի թաղի բնակիչ, 84-ամյա Արտաշես Հակոբյանն է: