Այսօր առավոտյան մահացել է բանաստեղծ Դավիթ Հովհաննեսը:  Բանաստեղծ Դավիթ Հովհաննեսը 71 տարեկան էր: Գրել սկսել էր վաղ պատանեկան տարիքից և 1965 թվականից տպագրվել:

Նա հեղինակել է շուրջ 25 բանաստեղծական, մանկական և թարգմանական ժողովածուներ, հրապարակախոսական և քննադատական հոդվածներ, էսսեներ, ռադիոպիես (ռուսերեն), թարգմանական գրքեր (ռուսերենից և անգլերենից): Հայտնի են «Մեզանից հետո ուժեղ ու հաղթանդամ», «Քաղաքային ձմեռ», «Հավերժական հայը» և այլ բանաստեղծություններ: Դավիթ Հովհաննեսը թարգմանել է աֆրո-ասիական, մերձբալթյան, ռուս, ուկրաինացի, ամերիկյան դասական բանաստեղծներից:

Դավիթ Հովհաննեսը նաև հասարական-քաղաքական գործունեությամբ է զբաղվել և 1999-2003 թթ եղել է ՀՀ Ազգային Ժողովի 2-րդ գումարման պատգամավոր:

Թուրքական ռազմական ուղղաթիռը, որի մեջ եղել է 8 մարդ, վայրէջք է կատարել հունական Ալեքսանդրուպոլիսում, հաղորդում է ՏԱՍՍ-ը:

Բոլոր ուղեւորները քաղաքական ապաստան են խնդրել Հունաստանից:

Ուղղաթիռի անձնակազմը վթարային վայրէջքի թույլտվություն է խնդրել: Հաղորդվում է, որ տրանսպորտային միջոցը պատկանում է թուրքական ոստիկանությանը: Հունական օդուժի 2 կործանիչներ վայրէջքի պահին ուղեկցել են թուրքական ուղղաթիռին, որի ուղեւորներն առանց տարբերանշանի հագուստներով զինվորականներ են եղել:

Նշվում է, որ թուրք զինվորականները, ովքեր ժամանել են Հունաստան, հեղաշրջման կողմնակիցներ են:

Պաշտոնական Անկարան արդեն իսկ խնդրանքով դիմել է հունական կողմին՝ վերադարձնել հեղաշրջման կողմնակիցներին: Այդ մասին հայտնել է Թուրքիայի ԱԳ նախարար Մեւլութ Չավուշօղլուն:

«Խնդրում ենք անհապաղ վերադարձնել 8 դավաճաններին, ովքեր ուղղաթիռով փախել են Հունաստան»,-հայտարարել է նախարարը:

Սյունիքի մարզի Դարպաս համայնքի արտահերթ ընտրություններում (գյուղապետը զոհվել էր արցախյան քառօրյա պատերազմի ժամանակ) ՀՀԿ- ն առաջադրել էր նախկին բազմամյա գյուղապետ Ռոբերտ Խաչատրյանի թեկնածությունը: ԲՀԿ -ն՝ Սաշա Ստեփանյանի, վերջինս Սիսիանի քաղաքապետ Աղասի Հակոբջանյանի սեփականությունը հանդիսացող հեկ-ի օպերատորն է:

Չնայած Սիսիանի քաղաքապետը հայտարարել է, որ դուրս է եկել ԲՀԿ -ից , սակայն փաստն այն է, որ նա իր խնամու ( ԲՀԿ տարածքային կառույցի նախագահն է) միջոցով աշխատում է հօգուտ ԲՀԿ-ի: Իսկ ԲՀԿ-ն, ի դեմս Աղասու, այս անգամ ևս ավելի ակտիվ էր և հանրապետական թեկնածուի հանդեպ հասավ հաղթանակի:

1in.am լրատվական կայքը հայտարարում է աշխատանքը դադարեցնելու մասին:

«Հասել է պահը, երբ առաջ շարժվելու համար անհրաժեշտ մոտիվացիան, ուժը, ավյունը այս պահին չկան։ Մենք դադարեցնում ենք մեր աշխատանքը՝ մինչև դրանք հնարավոր լինի վերագտնել և վերակազմավորվել»:

«2010թ. ի վեր 1in.am-ը ջանացել է լինել առաջին ու անկողմնակալ լրատվական միջոցը Հայաստանում և նրա սահմաններից դուրս։ Տարիների ընթացքում մեզ հաջողվեց դառնալ Հայաստանի առաջատար լրատվամիջոցներից մեկը ցանցային տիրույթում։ Մեր հաջողությունները «Ժամանակ» օրաթերթում, www.1in.am կայքում և «Առաջին լուրեր» լրատվական-վերլուծական կենտրոնում հնարավոր եղավ ապահովել մեր նախկին և ներկա աշխատակիցների շնորհիվ, ում հայտնում ենք մեր երախտագիտությունը։ Իհարկե այսպիսի արդյունքի մասին մենք չէինք էլ կարող երազել առանց մեր անդավաճան ընթերցողների, հեռուստադիտողների և սոցցանցերում հարյուր հազարավոր հետևորդների։ Շնորհակալություն», — ասված է կայքում հրապարակված հայտարարությունում:

Հանրապետության տարածքում`

Հուլիսի 10-11-ը՝ շրջանների մեծ մասում գիշերը և օրվա երկրորդ կեսին, սպասվում է կարճատև անձրև և ամպրոպ, առանձին հատվածներում հնարավոր է կարկուտ:

Հուլիսի 12-14-ը սպասվում է առավելապես առանց տեղումների եղանակ:
Քամին՝ հարավ-արևմտյան՝ 2-7 մ/վրկ արագությամբ, ամպրոպի ժամանակ հնարավոր է քամու ուժգնացում‵ 20-25 մ/վրկ:
Օդի ջերմաստիճանն 13-14-ը կբարձրանա 2-4 աստիճանով:Այս մասին տեղեկանում ենք ՀՀ ԱԻ նախարության մամուլի ծառայությունից:

Երևանում՝

Հուլիսի 10-11-ը՝ երեկոյան ժամերին, առանձին հատվածներում հնարավոր է կարճատև անձրև և ամպրոպ:
Ամպրոպի ժամանակ սպասվում է քամու ուժգնացում‵ 15-20 մ/վրկ արագությամբ:
Հուլիսի 12-14-ը սպասվում է առանց տեղումների եղանակ:

ՀՀ գլխավոր դատախազի հրամանով արդարադատության երկրորդ դասի խորհրդական Րաֆֆի Վորոնցովի Ասլանյանը նշանակվել է Երևան քաղաքի դատախազ՝ ազատվելով Շիրակի մարզի դատախազի պաշտոնից, տեղեկացնում է դատախազության կայքը:
ՀՀ գլխավոր դատախազ Գևորգ Կոստանյանը Դատախազության Կոլեգիայի անդամներին է ներկայացրել Երևան քաղաքի նորանշանակ դատախազին:

Գլխավոր դատախազը բարձր է գնահատել Րաֆֆի Ասլանյանի պրոֆեսիոնալիզմը և իրավական համակարգում երկարամյա աշխատանքային փորձը՝ վստահություն հայտնելով, որ դատախազական համակարգում նրա գործունեությունը ուղղված կլինի ՀՀ իրավական համակարգի ամրապնդմանը:

Թուրքիան, Ադրբեջանը, Իրանը, Ղրղզստանը և Ղազախստանը միասին հայտ են ներկայացրել ՅՈՒՆԵՍԿՕ՝ լավաշը ոչ նյութական մշակութային ժառանգության ցանկում ներառելու համար։

«Բարակ հացի պատրաստման մշակույթը» անունը կրող հայտի վերաբերյալ որոշումը պարզ կդառնա ՅՈՒՆԵՍԿՕ-ի ոչ նյութական մշակութային ժառանգության պաշտպանության մասին կոնվենցիայի 11-րդ միջակառավարական կոմիտեի ժողովի ժամանակ, որը տեղի կունենա Եթովպիայում նոյեմբերի 28-ից դեկտեմբերի 2-ն ընկած ժամանակահատվածում, հաղորդում է Ermenihaber-ը:

Թուրքիայի մշակույթի և զբոսաշրջության նախարարության պաշտոնյանները նշել են, որ լավաշը սերտորեն կապված է տեղական ավանդույթների հետ և օգտագործվում է մշակութային ծեսերում։

Ցերեկը մոտ ժամը մեկին ադրբեջանական զինուժը հրաձգային զենքերից կրակ է բացել Հայաստան-Վրաստան միջպետական ավտոճանապարհի մաս կազմող Ոսկեպար-Բաղանիս ճանապարհի վրա. Tert.am-ի հետ զրույցում պատմել է  Ոսկեպարի գյուղապետ Երվանդ Եգանյանը:

«Մոտ կես ժամ դադարներով կրակեցին ու վերջ: Հրաձգության պահին երթևեկությունը խաթարվել էր, վախեցնում էին, սակայն ոչ մի վնաս ու խնդիր չառաջացավ»,- ասել է գյուղապետը:

Ամբողջությամբ՝ սկզբնաղբյուր կայքում:

Ճանապարհատրանսպորտային պատահարների հետևանքով տուժած անձանց շտապ և անհետաձգելի բժշկական օգնությունն ու սպասարկումը պատշաճ և արագ կազմակերպելու նպատակով ՀՀ առողջապահության նախարարի հրամանով հուլիսի 7-ից սեպտեմբերի 25-ն ընկած ժամանակահատվածում` ուրբաթ օրերին ժամը 16:00-ից 22:00-ը, իսկ շաբաթ և կիրակի օրերին ժամը 08:00-ից 22:00-ը, մայրուղու Երևան-Սևանհատվածում սահմանվել է լրացուցիչ հերթապահություն:

Աշխատանքներին ներգրավված են Կոտայքի մարզի Աբովյանի, Չարենցավանի, Հրազդանի և Գեղարքունիքի մարզի Սևանի բժշկական կենտրոնների շտապօգնության ծառայությունները, հայտնում է առողջապահության նախարարությունը:

Շտապ բժշկական օգնության ծառայության աշխատանքն արդյունավետ և անխափան կազմակերպելու նպատակով մշակվել է հերթապահության ժամանակացույց, սահմանվել են բժշկական կենտրոնների հերթապահության օրերը, շտապ բժշկական օգնության բրիգադների տեղակայումը մայրուղում:

Արձանագրված յուրաքանչյուր դեպքի մասին հաղորդվելու է ՀՀ առողջապահության նախարարության «թեժ գիծ» ծառայությանը: