«Վրացական երկաթուղի» ընկերությունը հուլիսի 11-ից անցնում է աշխատանքային արտակարգ ռեժիմի: Դա պայմանավորված է հանգստյան սեզոնով, Այս մասին ընկերությունը մամլո հաղորդագրություն է տարածել:

Ուղևորների պահանջները բավարարելու համար Թբիլիսի-Բաթումի և Բաթումի-Թբիլիսի ուղղությամբ երթևեկելու է չորս գնացք՝ մեկական առավոտյան և երեկոյան և երկուսը գիշերը։ Բացի այդ, ընկերությունը ավելացնելու է վագոնների քանակը:

Փոխվելու է նաև տոմսերի վաճառքի կարգը. հուլիսի 11-ից տոմսերը կարելի է գնել 40 օր շուտ։ Այս փոփոխությունը պայմանավորված է նախորդ տարիներին սեզոնին տոմսերի արհեստական դեֆիցիտով:

Կատարվել է նաև տոմսերի գների փոփոխություն` կախված կարգից՝ դրանց գինը տատանվում է 2,5 — 20 դոլարի սահմաններում:

Այսօր` հուլիսի 8-ի առավոտյան ինֆարկտից մահացել է ԼՂՀ նախագահի հատուկ հանձնարարություններով ներկայացուցիչ Կարեն Բաբուրյանը:

ԼՂՀ նախագահի մամուլի քարտուղար Դավիթ Բաբայանը հայտնել է, որ  Բաբուրյանը Երեւանից Ստեփանակերտ գնալու ճանապարհին, Արարատ քաղաքի մոտ իրեն վատ է զգացել: Երբ նրան հասցրել են տեղի հիվանդանոց, բժիշկներն այլեւս ոչնչով օգնել չեն կարողացել:

Հուլիսի 8-ին «ՆԱՍԴԱՔ ՕԷՄԷՔՍ ԱՐՄԵՆԻԱ» ԲԲԸ-ում կայացել է 2450000 ԱՄՆ դոլարի առք և վաճառք՝ 367.54 դրամ մեկ ԱՄՆ դոլարի դիմաց միջին կշռված փոխարժեքով: Փակման գինը կազմել է 367.49 դրամ:

ՀՀ ԱԺ նախագահ Հովիկ Աբրահամյանի հրավերով   հուլիսի 11-ին երկօրյա պաշտոնական այցով Հայաստան կժամանի Ուկրաինայի Գերագույն Ռադայի նախագահ Վլադիմիր Լիտվինի գլխավորած պատվիրակությունը:

Նախատեսվում են  Վլադիմիր Լիտվինի հանդիպումները ՀՀ  Նախագահ Սերժ Սարգսյանի, ԱԺ նախագահ Հովիկ Աբրահամյանի, վարչապետ Տիգրան Սարգսյանի, Ամենայն Հայոց Կաթողիկոս Ն.Ս.Օ. Տ.Տ. Գարեգին Բ-ի, ՀՀ Գիտությունների ազգային ակադեմիայի ղեկավարության հետ:

Ուկրաինայի Գերագույն Ռադայի նախագահի գլխավորած պատիրակության անդ‎ամները  խորհրդարանում կհանդիպեն ՀՀ ԱԺ մշտական հանձնաժողովների նախագահների, ՀՀ ԱԺ խմբակցությունների ղեկավարների, ԱԺ «Հայաստան – Ուկրաինա» բարեկամական խմբի անդամների հետ:

Այցի ընթացքում Ուկրաինայի Գերագույն Ռադայի նախագահ Վլադիմիր Լիտվինի գլխավորած պատվիրակությունը կայցելի Ծիծեռնակաբերդի հուշահամալիր:

Հայաստանի պաշտպանության նախարար Սեյրան Օհանյանը հուլիսի 8-ին ընդունել է Լեհաստանի ռազմարդյունաբերական պալատի նախագահ Սլավոմիր Կուլակովսկիի գլխավորած պատվիրակությանը:

Հանդիպման ընթացքում քննարկվել են ռազմարդյունաբերության ոլորտում համագործակցության հեռանկարները:

Կողմերը գոհունակությամբ արձանագրել են, որ լեհական և հայկական ռազմարդյունաբերական ձեռնարկությունների միջեւ համագործակցությունը զարգանում է արդյունավետ կերպով:

Երևան‑Սևան ճանապարհին

Հուլիսի 7‑ին ոստիկանության Հրազդանի բաժնում հաղորդում է ստացվել, որ ժամը 14.30-ի սահմաններում Երևան-Սևան ճանապարհի 39-րդ կմ-ին իրար են բախվել «Միցուբիշի» մակնիշի բեռնատար, «Նիսան Պատֆայնդեր», «ՎԱԶ-2121» և «ՈւԱԶ-396201» մակնիշի ավտոմեքենաներ:

Պատահարի հետևանքով «Միցուբիշի»-ի վարորդը մարմնական վնասվածքներով տեղափոխվել է հիվանդանոց:

Վրաերթ` մահվան ելքով

Հուլիսի 7-ին ոստիկանության Մալաթիայի բաժնում հաղորդում է ստացվել, որ ժամը 09.50-ի սահմաններում 1980 թ. ծնված Աշոտ Մ.-ն «ՎԱԶ-21214» մակնիշի ավտոմեքենայով Ծովակալ Իսակովի պողոտայում վրաերթի է ենթարկել 1991 թ. ծնված Մարիամ Զ.-ին և նույն թվականին ծնված Անի Միքայելյանին:

Պատահարի հետևանքով Անի Միքայելյանը տեղում մահացել է, իսկ Մարիամ Զաքարյանը մարմնական վնասվածքներով տեղափոխվել է հիվանդանոց:

Ապարան‑Աշտարակ ճանապարհին

Հուլիսի 7-ին ոստիկանության Ապարանի բաժնում հաղորդում է ստացվել, որ ժամը 20.00-ի սահմաններում Ապարան-Աշտարակ ճանապարհի 21-րդ կմ-ին իրար են բախվել «ՎԱԶ-2106» և «ՈւԱԶ-452» մակնիշի ավտոմեքենաներ, ինչի հետևանքով «ՎԱԶ-2106»-ի երեք ուղևորներ մարմնական վնասվածքներով տեղափոխվել են հիվանդանոց:

Վրաերթ Արարատում

Հուլիսի 7-ին ոստիկանության Արարատի բաժնի ծառայողները, վրաերթ կատարելու կասկածանքով, բերման են ենթարկել 1987 թ. ծնված Գարիկ Մ.-ին:

Պարզվել է, որ նա հուլիսի 3-ին, ժամը 20.00-ի սահմաններում, «ՎԱԶ-2109» մակնիշի ավտոմեքենայով վրաերթի է ենթարկել 2-րդ դասարանի մի աշակերտի, ինչի հետևանքով երեխան ստացել է գլխի վնասվածք:

Opel Vektra-ն գլորվել է ձորը

Վանաձոր-Գյումրի ճանապաարհին այսօր`հուլիսի 8-ի առավոտյան ժամը 10-ի սահմաններում ավտովթար է տեղի ունեցել:

Ջաջուռ գյուղից 6-7 կմ հեռավորության վրա («Ավետիքի հուշաղբյուր» չհասած) Վանաձորից դեպի Գյումրի շարժվող Opel Vektra մակնիշի ավտոմեքենան գլորվել է ձորը: Թե ինչպես, ինչ պայմաններում, կամ ինչ պատճառով է մեքենան հայտնվել ձորում, դեռ պարզ չէ:

Դեպքի վայրում աշխատել են ճանապարհային ոստիկանության ու ոստիկանության Շիրամի մարզային վարչության քննչական բաժնի աշխատակիցները:

Ճանապարհային ոստիկանների փոխանցմամբ` մեքենայում եղել է միայն երիտասարդ վարորդը, ում դեպքից անմիջապես հետո Գյումրիի շտապ բուժօգնության աշխատակիցները տեղափոխել են Գյումրիի Գ. Գյուլբենկյանի անվան վիրաբուժական հիվանդանոց:

Հուլիսի 7-ին Նախագահ Բակո Սահակյանը ստորագրել է հրամանագիր Գեորգի Պետրոսյանին, իր դիմումի համաձայն, Արցախի Հանրապետության արտաքին գործերի նախարարի պաշտոնից ազատելու մասին:

Արցախի հանրապետության նախագահի աշխատակազմի տեղեկատվության վարչությունից հաղորդում են, արտաքին գործերի նախարարի պարտականությունները ժամանակավորապես կկատարի ԼՂՀ արտաքին գործերի նախարարի տեղակալ Վասիլի Աթաջանյանը:

Նախագահի` նույն օրը ստորագրած մեկ այլ հրամանով` Գեորգի Պետրոսյանը նշանակվել է Արցախի Հանրապետության Նախագահի խորհրդականի պաշտոնում:

Տուժողին տեղափոխել է հիվանդանոց

Հուլիսի 6-ին ոստիկանության Նոր Նորքի բաժնում հաղորդում է ստացվել, որ ժամը 00.10-ին 1937 թ. ծնված Յուրիկ Ա.-ն «Սուզուկի Գրանդ Վիտարա» մակնիշի ավտոմեքենայով Գայի պողոտայում վրաերթի է ենթարկել 1987 թ. ծնված Աննա Ա.-ին  և նույն ավտոմեքենայով նրան տեղափոխել հիվանդանոց:

«ՎԱԶ-2121»-ը և «ԿամԱԶ»-ը բախվել են

Հուլիսի 6-ին ոստիկանության Վաղարշապատի բաժնում հաղորդում է ստացվել, որ ժամը 16.00-ի սահմաններում Գայ գյուղի վերջնամասում իրար են բախվել 1975 թ. ծնված Կարեն Ք.-ի վարած «ՎԱԶ-2121» և 1955 թ. ծնված Սպարտակ Ս.-ի վարած «ԿամԱԶ» մակնիշի ավտոմեքենաները:

Պատահարի հետևանքով Կարեն Ք.-ն մարմնական վնասվածքներով տեղափոխվել է հիվանդանոց:

Դալարիկ‑Քարակերտ ճանապարհին

Հուլիսի 6-ին ոստիկանության Բաղրամյանի բաժնում հաղորդում է ստացվել, որ ժամը 08.40-ի սահմաններում 1987 թ. ծնված Սամվել Հ.-ի վարած «ԶԻԼ-130» մակնիշի ավտոմեքենան Դալարիկ-Քարակերտ ճանապարհի 1-ին կմ-ին շրջվել է, ինչի հետևանքով ուղևորը մարմնական վնասվածքներով տեղափոխվել է հիվանդանոց:

Պատահար Թբիլիսյան խճուղում

Հուլիսի 6-ին ոստիկանության Արաբկիրի բաժնում հաղորդում է ստացվել, որ ժամը 23.00-ի սահմաններում Թբիլիսյան խճուղում իրար են բախվել 1980 թ. ծնված Գարիկ Գ.-ի վարած «Ֆոլքսվագեն Գոլֆ» և 1982 թ. ծնված Արամ Ա.-ի վարած «Միցուբիշի Մոնտեռո» մակնիշի ավտոմեքենաները:

Պատահարի հետևանքով «Ֆոլքսվագեն Գոլֆ»-ի երկու ուղևորները մարմնական վնասվածքներով տեղափոխվել են հիվանդանոց:

Բախվել է պատին

Հուլիսի 6-ին ոստիկանության Էրեբունու բաժնում հաղորդում է ստացվել, որ ժամը 22.30-ին 1994 թ. ծնված Նելսոն Ս.-ի վարած «Մերսեդես-Բենց» մակնիշի ավտոմեքենան Այվազովսկու և Աթոյան փողոցների խաչմերուկում դուրս է եկել երթևեկելի մասից և բախվել պատին:

Պատահարի հետևանքով վարորդը մարմնական վնասվածքներով տեղափոխվել է հիվանդանոց:

Վրաերթ խաչմերուկում

Հուլիսի 6-ին ոստիկանության Մաշտոցի բաժնում հաղորդում է ստացվել, որ ժամը 18.00-ին 1971 թ. ծնված Արթուր Ա.-ն «Ֆորդ Ֆոկուս» մակնիշի ավտոմեքենայով Սիլիկյան թաղամասի 4-րդ և 10-րդ փողոցների խաչմերուկում վրաերթի է ենթարկել 10-րդ դասարանի  մի աշակերտուհու, որը մարմնական վնասվածքներով տեղափոխվել է հիվանդանոց: