Հայաստանի կառավարության այսօրվա` սեպտեմբերի 8-ի նիստում Շահեն Շահինյանը նշանակվել է «Երեւանի Կոմիտասի անվան պետական կոնսերվատորիա» պետական ոչ առեւտրային կազմակերպության ռեկտորի պաշտոնում, իսկ Արա Ավետիսյանը` «Հայաստանի պետական ճարտարագիտական համալսարան (Պոլիտեխնիկ)» պետական ոչ առեւտրային կազմակերպության ռեկտորի պաշտոնում:

Նրանց հետ կկնքվի 5 տարվա աշխատանքային պայմանագիր:

Երեւանի մի շարք փողոցներում սեպտեմբերի 11-ին, ժամը 06.00-ից 11.00-ն, Հայաստանի 20-րդ տարեդարձին նվիրված զորահանդեսի  փորձի կապակցությամբ, դադարեցվելու է քաղաքացիական տրանսպորտի շարժը:

Ոստիկանության մամուլի ծառայությունից հայտնում են, որ դադարեցվելու է Մոսկովյան, Սարյան, Ամիրյան փողոցների, Հանրապետության հրապարակ, Տիգրան Մեծի պողոտա, Երվանդ Քոչարի փողոց, Ալեք Մանուկյան փողոց, Սայաթ-Նովայի պողոտայի երթևեկությունը:

Ոստիկանությունը հայցում է մայրաքաղաքի բնակիչների եւ հյուրերի ներողամտությունը պատճառված անհարմարության համար:

Սերժ Սարգսյանն այսօր ներկա է գտնվել Համահայկական բանկի բացման արարողությանը, ծանոթացել բանկի աշխատանքային պայմաններին:

Համահայկական բանկի խորհրդի նախագահ և գլխավոր գործադիր տնօրեն Վահրամ Ներսիսյանցը նշել է, որ Համահայկական բանկը զարգացման բանկ է և հիմնադրվել է որպես բաց բաժնետիրական ընկերություն:

Այն նպատակ ունի միջազգային ֆինանսական կազմակերպություններից և զարգացմանն ուղղորդված այլ մասնավոր աղբյուրներից հավաքագրել երկարաժամկետ ֆինանսական միջոցներ` Հայաստանի Հանրապետությունում գրանցված և գործող մրցունակ արտադրական ձեռնարկություններին երկարաժամկետ զարգացման ֆինանսավորում ապահովելու համար:

Համահայկական բանկն այդպիսով կնպաստի Հայաստանում հավելյալ տնտեսական աճին և կխթանի ապրանքների և ծառայությունների արտահանումը:

Նշվել է, որ Համահայկական բանկը չի մրցակցելու առևտրային բանկերի հետ, քանի որ չի ընդունելու ավանդներ կամ չի տրամադրելու առևտրային վարկեր: Համահայկական բանկն իր ուղղակի վարկային գործունեությունից բացի, կարող է համագործակցել առևտրային բանկերի հետ` ձեռնարկություններին ներկայացնելով ֆինանսավորման փաթեթներ, որտեղ Համահայկական բանկը կտրամադրի երկարատև ֆինանսական ռեսուրսներ, իսկ առևտրային բանկերը Համահայկական բանկի հետ համատեղ կապահովեն այդ ձեռնարկությունների ավելի կարճաժամկետ, աշխատանքային կապիտալի և առևտրային ֆինանսավորման կողմը: Համահայկական բանկի գործունեությունը կանոնակարգվելու է ՀՀ կենտրոնական բանկի կողմից՝ ՀՀ օրենսդրությանը համապատասխան:

Փոխվարչապետ, հայ-քուվեյթական տնտեսական և տեխնիկական համագործակցության միջկառավարական հանձնաժողովի համանախագահ Արմեն Գևորգյանի մոտ այսօր տեղի է ունեցել հանձնաժողովի հայկական կազմի նիստը:

Քննարկվել են հոկտեմբերին Երևանում անցկացվելիք միջկառավարական հանձնաժողովի առաջին նիստի հետ կապված հարցեր:

Փոխվարչապետը նշել է, որ պաշտոնական հանդիպումների և բարձր մակարդակով այցելությունների ընթացքում քուվեյթական կողմը Հայաստանի հետ հարաբերությունները զարգացնելու և կառուցողական համագործակցություն հաստատելու պատրաստակամություն է հայտնել: Դրա համար առկա են անհրաժեշտ նախադրյալներ. Քուվեյթում ՀՀ դեսպանատունն արդեն լիարժեք գործում է, իսկ առաջիկայում Հայաստանում նախատեսվում է Քուվեյթի դեսպանատան բացումը, ինչը նոր որակ կհաղորդի երկկողմ հարաբերությունների զարգացմանը:

Նիստի շրջանակում հյուրերը հնարավորություն կունենան ծանոթանալ գործարար և ներդրումային միջավայրին, հայկական վերամշակող արտադրությանը: Քուվեյթը համարվում է ներմուծող երկիր, և վերջինիս շուկան բաց է նաև հայկական արտադրատեսակների համար:

Հանձնաժողովի անդամներին հանձնարարվել է առաջարկներ ներկայացնել հանձնաժողովի առաջին նիստի ծրագրի վերաբերյալ:

Ոսկու գինն այսօր միջազգային շուկայում սահմանել է հերթական ռեկորդը: Լոնդոնի բորսայում այն, մասնավորապես, կազմել է 1,920.25 դոլար 1 տրոյական ունցիայի դիմաց: Այս մասին հաղորդում է Bloomberg-ը:

Իսկ Նյու Յորքի բորսայում ոսկու ֆյուչերսային գինը` դեկտեմբերյան մատակարարմամբ,  աճել է 2.5%-ով ` կազմելով 1,923.1 դոլար 1 տրոյական ունցիայի համար:

Միջազգային տնտեսության վերաբերյալ ստացված բացասական կանխատեսումներն ի նկատի ունենալով, ներդրողները ոսկի են գնում:

Սպասվում է, որ մինչեւ տարեվերջ ոսկու գինը կհասնի 2,000 դոլար/ունցիայի:

Սեպտեմբերի 5-ին, ժամը 13.00-ին, Լենինգրադյան փողոցում իրար են բախվել «ԲՄՎ», «ԿԻԱ»  և «ԳԱԶ-32213» մակնիշի ավտոմեքենաներ. «ԳԱԶ-32213»-ն այնուհետև  բախվել է մայթեզրին կայանված  «Օպել» մակնիշի ավտոմեքենային:

Պատահարի հետևանքով «ԳԱԶ-32213»-ի ուղևորուհին վնասվածքներով տեղափոխվել է հիվանդանոց:

Կատարվում է քննություն:

Վրայերթ Դավիթ Անհաղթի փողոցում

Սեպտեմբերի 6-ին, ժամը 01.00-ին, Դավիթ Անհաղթի փողոցում «Մերսեդես» մակնիշի ավտոմեքենայի վարորդը վրաերթի է ենթարկել 21-ամյա մի երիտասարդի, որը մարմնական վնասվածքներով տեղափոխվել է հիվանդանոց:Կատարվում է քննություն:

Պատահար  Երևան‑Աշտարակ  ճանապարհին

Սեպտեմբերի 5-ին, ժամը 11.00-ի սահմաններում, Երևան-Աշտարակ ճանապարհի 14-րդ կմ-ին իրար են բախվել «Ֆոլքսվագեն Գոլֆ», «Ռենո» և «Մերսեդես» մակնիշի ավտոմեքենաներ:

Վթարի հետևանքով «Ֆոլքսվագեն Գոլֆ»-ի 56-ամյա վարորդը և «Մերսեդես»-ի 3-ամյա  ուղևորուհին մարմնական վնասվածքներով տեղափոխվել են հիվանդանոց: Կատարվում է նախաքննություն:

Վեդի ‑Ոսկետափ  ճանապարհին

Սեպտեմբերի 5-ին, ժամը 16.35-ի սահմաններում, Վեդի-Ոսկետափ ճանապարհի 5-րդ կմ-ին «ՎԱԶ-2110» մակնիշի ավտոմեքենա է բախվել «ԳԱԶ-24» մակնիշի ավտոմեքենայի: Վթարի հետևանքով «ՎԱԶ-2110»-ի ուղևորուհին մարմնական վնասվածքներով տեղափոխվել է հիվանդանոց: Կատարվում է քննություն:

ՀՀ նախագահ Սերժ Սարգսյանը սեպտեմբերի 2-ին աշխատանքային այցով կմեկնի Տաջիկստանի Հանրապետություն:

Նախագահի մամուլի գրասենյակից հայտնում են, որ Հանրապետության ղեկավարը Դուշանբեում կմասնակցի սեպտեմբերի 2-3-ին անցկացվող ԱՊՀ անդամ երկրների ղեկավարների 20-րդ գագաթնաժողովին:

Ոստիկանության Կենտրոնականի բաժնի եւ ԱԱԾ աշխատակիցների համատեղ միջոցառումների շնորհիվ՝ ահաբեկչության մասին սուտ հաղորդում տալու համար բերման է ենթարկվել 25-ամյա Գոռ Հարությունյանը: Հայտնում են ոստիկանության լրատվության վարչությունից:

Հիշեցնենք, որ այսօր առավոտյան ժամը 7-ի սահմաններում ոստիկանություն ահազանգ է ստացվել, որ Օպերայի եւ բալետի թատրոնում ռումբ է տեղադրված։ Ժամը 9-ի դրությամբ պարզվել էր, որ ահազանգը կեղծ է եղել: