Սեպտեմբերի 15-ին, Արուճ գյուղի գյուղապետարանի մոտ «ՎԱԶ-21011» մակնիշի ավտոմեքենան դուրս է եկել ճանապարհից և շրջվել:

Ուղևորը` 18-ամյա Լևիկ Վահանյանը, տեղում մահացել է։ Մեքենայում եղել է մեկ այլ ուղևոր, որը մարմնական վնասվածքներով տեղափոխվել է հիվանդանոց:
Փաստի առթիվ հարուցվել է քրեական գործ:
Կատարվում է քննություն:

Երիտասարդին դանակահարել են

Սեպտեմբերի 15-ին ոստիկանության Կենտրոնականի բաժնում հաղորդում է ստացվել, որ մարմնական վնասվածքներով հիվանդանոց է տեղափոխվել իրենց 17-ամյա մի երիտասարդ, որը ի վիճակի չի եղել հաղորդում տալու:

Պարզվել է, որ նույն օրը, ժամը 14.00-ին, Պուշկինի անվան միջնակարգ դպրոցի հետնամասում, վիճաբանության ժամանակ, նրան սուր գործիքով հարվածել և վնասվածքներ է պատճառել տարեկից մի երիտասարդ, որը նույն օրը, երեկոյան, ինքնակամ ներկայացել է բաժին:

Նշանակվել է դատաբժշկական փորձաքննություն:
Հանգամանքները պարզվում են: Կատարվում է հետաքննություն:

Վրաերթ Գավառում

Սեպտեմբերի 15-ին, ժամը 21.10-ին, «ՈւԱԶ-469» մակնիշի ավտոմեքենայի վարորդը Գավառ քաղաքի Սայադյան փողոցում վրաերթի է ենթարկել անձը չպարզված 50-55 տարեկան տղամարդու, որին անգիտակից վիճակում տեղափոխել են հիվանդանոց:

«ՈւԱԶ»-ի վարորդը բերման է ենթարկվել բաժին:
Կատարվում է քննություն:

Բռնվել է բջջայինների գողը

Սեպտեմբերի 13-ին, 27-ամյա մի երիտասարդ ոստիկանության Երևան քաղաքի վարչությունում հաղորդում էր տվել, որ ժամը 11.30-ի սահմաններում Էրեբունու փողոցում գտնվող գյուղմթերքների շուկայի դիմաց ոմն Հրայր ձեռքերով հարվածել է իր գլխին, հափշտակել երկու բջջային հեռախոս ու դիմել փախուստի:

Ոստիկանության ծառայողների ձեռնարկած օպերատիվ միջոցառումների շնորհիվ պարզվել է, որ Հրայրը նույն ինքը՝ 42-ամյա Հրանտ Բաղրամյանն է, որին շատ արագ գտել ու երկու օրից՝ սեպտեմբերի 15-ին բերման են ենթարկել Երևան քաղաքի վարչություն: Կատարվում է նախաքննություն:

Կարմիր խաչի միջազգային կոմիտեի (ԿԽՄԿ) ներկայացուցիչները հերթական անգամ այցելել են Ադրբեջանում գտնվող հայ գերիներին։ Այս մասին, ինչպես տեղեկացնում է ԱՊԱ գործակալությունը, ասել է Ադրբեջանում ԿԽՄԿ–ի ներկայացուցչության մամուլի քարտուղար Շալա Գահրամանովան։

ԿԽՄԿ–ի ներկայացուցիչները տեսակցել են ադրբեջանական գերության մեջ գտնվող 3 հայ զինծառայողներին և 5 անդամից բաղկացած հայկական ընտանիքին, հետաքրքրվել են վերջիններիս առողջական վիճակով և նրանց փոխանցել նամակներ և լուսանկարներ։ Հայ գերիները ԿԽՄԿ–ի ներկայացուցիչներին են հանձնել 6 նամակ։

Հանրապետության տարածքում եղանակը կպայմանավորվի հյուսիս-արևմուտքից համեմատաբար ցուրտ հոսանքների ներթափանցմամբ: Այս գիշեր և սեպտեմբերի 16-ին օրվա առաջին կեսին սպասվում է անձրև և ամպրոպ:

Ըստ «Meteo-tv»-ի, առանձին շրջաններում հնարավոր են առատ տեղումներ: Երեկոյան հնարավոր է քամու ուժգնացում 18-20 մ/վրկ:

Օդի ջերմաստիճանը կնվազի 3-5 աստիճանով: Երեկոյան տեղումները կդադարեն:

Երևանում առավոտյան և ցերեկը հնարավոր է անձրև, երեկոյան տեղումները կդադարեն, հնարավոր է քամու ուժգնացում մինչև 18մ/վրկ: Օդի ջերմաստիճանը կնվազի` գիշերը +13+15, ցերեկային ժամերին +25+27, երեկոյան +22:

ՀՀ կենտրոնական բանկից տեղեկացնում են, որ այսօր` սեպտեմբերի 15-ին, ՀՀ Կենտրոնական բանկի կողմից թանկարժեք մետաղների համար սահմանվել են հետևյալ գները`

Ոսկու գինը նվազել է 14.57 դրամով և կազմել 21921.29 դրամ մեկ գրամի դիմաց: Արծաթի գինն աճել է 14.66 դրամով և կազմել 497.01 դրամ մեկ գրամի դիմաց: Պլատինի գինը նվազել է 74.84 դրամով և կազմել 21885.13 դրամ մեկ գրամի դիմաց:

Սեպտեմբերի 21-ին, ժամը 21:00-ին Հանրապետության հրապարակում տոնական համերգ կանցկացվի։ Անկախության տոնին նվիրված «Հերոսական բալլադ» 1 ժամ 20 րոպե տևողությամբ համերգ-ներկայացման ընթացքում հայ կոմպոզիտորների մեծարժեք դասական ստեղծագործություններից ընտրված հատվածների ուղեկցությամբ հանդիսատեսին կներկայացվեն հայոց պատմության առանցքային դրվագները: Կենդանի հնչողությամբ ստեղծագործությունները կկատարեն Հայաստանի պետական ակադեմիական երգչախումբը (գեղ. ղեկավար ԽՍՀՄ ժողովրդական արտիստ Հովհաննես Չեքիջյան), Հայաստանի Հանրապետության նախագահի պատվո պահակախմբի փողային նվագախումբը (գեղ. ղեկավար Արմեն Պողոսյան), իսկ Հայաստանի պետական «Բարեկամություն» անսամբլը (գեղ. ղեկավար ՀՀ ժողովրդական արտիստ Նորայր Մեհրաբյան) և Թաթուլ Ալթունյանի անվան Հայաստանի երգի-պարի պետական անսամբլը (գեղ. ղեկավար ՀՀ արվեստի վաստակավոր գործիչ Ժիրայր Ալթունյան) կկատարեն խորեոգրաֆիկ համարները: «Հերոսական բալլադ» համերգ-ներկայացման բեմադրող ռեժիսորն է Արամ Սուքիասյանը:

Համերգ-ներկայացումը ուղեկցվի եռաչափ գրաֆիկայով: Հրապարակը եզերող շենքերը պարբերաբար կվերածվեն էկրանների և դասական երաժշտության հնչյունների ներքո կցուցադրվեն դրվագներ հայ ժողովրդի և անկախ պետականության 20 տարիների պատմությունից, իսկ պատմական մի շարք անցքեր հանդիսատեսին կներկայացվեն եռաչափ գրաֆիկայի միջոցով:
Համերգ-ներկայացումն ուղեկցվելու է նաև շատրվանների ցուցադրությամբ: Շատրվանները ծառայելու են որպես ջրային էկրաններ, տեղադրվելու են նոր, շարժական շատրվաններ:

Համերգի կազմակերպիչներն են հայկական «Ինվիտրո փրոդաքշն» եւ «Պրոլայթինգ» ընկերությունները, տեխնիկական սպասարկումն իրականացնում է ֆրանսիական «Աժանս պաբլիկ» և «Աքվատիկ շոու» ընկերությունները:

«Հերոսական բալլադ» համերգ-ներկայացումից հետո կկազմակերպվի տոնական դիսկոտեկ և հրավառություն:

Այսօր ԱԳ նախարար Էդվարդ Նալբանդյանն   ընդունել է ԵԱՀԿ հակամարտությունների կանխարգելման կենտրոնի տնօրեն Ադամ Կոբերացկիին:

Ինչպես հայտնում են ԱԳՆ-ից, հանդիպման ընթացքում Էդվարդ Նալբանդյանն ու Ադամ Կոբերացկին քննարկել են ԵԱՀԿ տարածաշրջանային հակամարտությունների կանխարգելմանն առնչվող մի շարք հարցեր:

Հյուրի խնդրանքով արտգործնախարարը ներկայացրել է արցախյան հիմնախնդրի կարգավորման գործընթացի վերջին զարգացումները` նշելով, որ Հայաստանը հավատարիմ է Մինսկի խմբի համանախագահների միջնորդությամբ խնդրի բացառապես խաղաղ կարգավորմանը:

Wikileaks-ի հրապարակված ԱՄՆ Պետքարտուղարությանը պատկանող գաղտնի փաստաթղթերից մեկում անդրադարձ է կատարվում հայ–թուրքական հարաբերությունների կարգավորման գործընթացին և Ադրբեջանի նախագահ Իլհամ Ալիևի՝ Երևան–Անկարա իբր մերձեցման գործընթացի նկատմամբ ունեցած բացասական վերաբերմունքին։

2009թ. ապրիլի 7-ին թվագրված փաստաթղթում ներկայացվում են Բաքվում այն ժամանակվա ԱՄՆ դեսպան Էնն Դերսիի և Ադրբեջանում Թուրքիայի դեսպան Հուլուսի Քըլըչի միջև տեղի ուենցած հանդիպման մանրամասները։

Հանդիպմանը թուրք դեսպանն ամերիկյան կողմին խնդրել է համոզել պաշտոնական Բաքվին, որ հայ–թուրքական սահմանի բացումից հետո Հայաստանը շարունակելու է ղարաբաղյան հիմնախնդրի կարգավորման բանակցային գործընթացը։

Քըլըչը նշել է, որ Ադրբեջանի իշխանությունները հստակ հայտարարել են, որ եթե Թուրքիան սահմանների բացման հարցում ցանկանում է ստանալ Բաքվի համաձայնությունը, պետք է Հայաստանից պահանջի ընդունել հիմնարար սկզբունքները:

Մեկնաբանելով Ալիևի՝ Ստամբուլի գագաթնաժողովին չմասնակցելու որոշումը` Քըլըչը դա որակել է որպես երկու երկրների միջև աճող հակամարտություն և Ադրբեջանի անկախության պատմության ընթացքում ամենախոր ճգնաժամ։ Որից հետո, թուրք դեսպանը հույս է հայտնել, որ ԱՄՆ նախագահ Բարաք Օբամայի անձնական միջամտությունը կօգնի սառեցումից փրկել թուրք–ադրբեջանական հարաբերությունները։

«Մենք ցանկանում են խնդիրը լուծել Հայաստանի հետ, սակայն դա չի նշանակում Ադրբեջանի կորուստ։ Մենք պետք է հավասարակշռություն գտնենք»,– ասել է Քըլըչը։

Քըլըչը տեղեկացրել է, որ հակառակ Բարաք Օբամայի և Հիլարի Քլինթոնի հեռախոսազանգերին, Ալիևը հրաժարվել է մեկնել Ստամբուլ։ Բացի այդ, նրան զանգահարել են Թուրքիայի նախագահ Աբդուլլահ Գյուլն ու վարչապետ Ռեջեփ Թայիփ Էրդողանը։ Սակայն բոլոր երաշխիքներն այն մասին, թե Թուրքիան չի բացի սահմանը, քանի դեռ չի կարգավորվել ղարաբաղյան հիմնախնդիրը, չկարողացան ստիպել Ալիևին փոխել իր որոշումն ու մեկնել Ստամբուլ։

Քըլըչն ուղղակի սարսափած է եղել ադրբեջանական կողմի բոլոր մակարդակներով հակազդեցությունից, ներառյալ խորհրդարանն ու ընդդիմությունը, ինչպես նաև ադրբեջանական ԶԼՄ–ները։ Բացի այդ, Բաքվում ապրող Թուրքիայի քաղաքացիները բողոքել են ադրբեջանցիների` իրենց նկատմամբ բացասական վերաբերմունքից։

Հուլուսի Քըլըչը նաև նշել է, որ Ռուսաստանը, Իրանն ու հենց Հայաստանն են Թուրքիային դրդում հաշտեցման։ Նրանք շահագրգռված են թուրք–ադրբեջանական բախմամբ, որը կամրապնդի Երևանի, Մոսկվայի և Թեհրանի աշխարհաքաղաքական դիրքերը։ Քըլըչը խնդրել է ճնշումներ գործադրել Հայաստանի վրա և ԱՄՆ–ում և Եվրոպայում զսպել հայկական լոբբիին։

Իր մեկնաբանություններում դեսպան Էնն Դերսին գրում է, որ հանդիպմանն իրազեկել է թուրք դեսպանին Իլհամ Ալիևի հետ ունեցած հանդիպման մանրամասների մասին։ Ապրիլի 3-ին նա և Պետքարտուղարի տեղակալի այն ժամանակվա օգնական Մեթյու Բրայզան Իլհամ Ալիևի և արտգործնախարար Էլմար Մամեդյարովի հետ հայ–թուրքական սահմանի հնարավոր բացման ֆոնին քննարկել են թուրք–ադրբեջանական հարաբերությունները։

Դերսին Վաշինգտոն ուղարկած հեռագրում գրում է, որ պետքարտուղար Քլինթոնի կողմից ուղարկված Բրայզան հանդիպմանը վստահեցրել է, որ Վաշինգտոնը ձգտում է հասնել այն բանին, որ հայ–թուրքական սահմանի բացումը ուղեկցվի ղարաբաղյան հիմնախնդրում առաջընթացով։ Բրայզան նաև նշել է, որ նախագահ Օբաման ցանկանում է Ստամբուլում հանդիպել Ալիևի հետ։

Բրայզայի խոսքերին Ալիևը պատասխանել է Անկարայի հասցեին երկար քննադատությամբ և Թուրքիային ներկայացրել է որպես «խաբեբա և դավաճան»։

«Մեր մտքովն անգամ չի ացել, որ Թուրքիան մեզ այդքան էժան կվաճառի։ Նախագահ Գյուլը խոստացել էր ինձ, որ առանց ղարաբաղյան հիմնախնդրի կարգավորման սահմանները չեն բացվելու։ Նա ստել է ինձ, և ես նրան այլևս չեմ հավատում»,– ասել է Ալիևը։

Այնուհետև Իլհամ Ալիևն ամերիկացի դիվանագետներին պատմել է Էրդողանի հանձնարարականով Թուրքիայի արտգործնախարար Ալի Բաբաջանի՝ Ադրբեջան կատարած այցի մասին, որը Բաքվին պետք է համոզեր սահմանների բացման հարցում։ Իր հերթին Բաքուն Անկարա էր ուղարկել փոխարտգործնախարար Արազ Ազիմովին՝ այս հարցում համատեղ ռազմավարություն մշակելու համար։ Սակայն Ազիմովն Անկարայից երկու անգամ վերադարձել է ձեռնունայն։

«Թուրքիան պատմական սխալ էգործում, որը երբեք չի մոռացվի։ Մեր հարաբերությունները երբեք նախկինի պես չեն լինելու։ Մենք այլևս մեկ ազգ չենք և երբեք այդպիսին չենք լինի»,– ասել է Ալիևը՝ ընդգծելով, որ երկու երկրների միջև կավարտվի էներգետիկ համագործակցությունը, և Թուրքիան կկորցնի թյուրքական աշխարհի համերաշխությունը։

Ալիևն ասել է, որ դավաճանություն է զգում Գյուլի և Էրդողանի կողմից և անիմաստ է նման պայմաններում այցելել Ստամբուլ։ Իսկ ի պատասխան Բրայզայի՝ բոլոր այդ հարցերը ԱՄՆ–ի բարձր ղեկավարության հետ քննարկելու առաջարկությանը, Ալիևն ասել է, որ Բաքուն կհամաձայնի սահմանների բացմանը միայն մեկ պայմանով, եթե Հայաստանը որպես բարի կամքի դրսևորում ազատի Լեռնային Ղարաբաղին հարակից 5 շրջանները, խնդրի կարգավորմանը գործընթացը շարունակվի։

Իր հերթին, Բրայզան նշել է, որ կողմերը շատ դժվար և երկար են համաձայնեցնում թեմաներն ու օրակարգը, և շատ բարդ է նման իրավիճակում հասնել 5 շրջանների ազատմանը։

Վաշինգտոն ուղարկված հեռագրում նշվում է նաև, որ Բաքվում Ադրբեջանի դեսպան Հուլուսի Քըլըչը շատ է վշտացել՝ տեղեկանալով Ալիևի՝ հայ–թուրքական հարաբերությունները ղարաբաղյան հիմնախնդրին շաղկապելու պահանջի և Ստամբուլ չմեկնելու որոշման վերահաստատման մասին