Հայաստանի Հանրապետության անկախության 20-րդ տարեդարձին նվիրված զորահանդեսի կապակցությամբ, սեպտեմբերի 21-ին, ժամը 05.00-ից 14.00-ն դադարեցվելու է տրանսպորտի շարժը մայրաքաղաքի հետևյալ փողոցներում.

Կորյունի փողոց, Մեսրոպ Մաշտոցի պողոտա, Մարշալ Բաղրամյան պողոտա` Պռոշյան փողոցից մինչև Մոսկովյան փողոցն ընկած հատվածը, Մոսկովյան փողոց, Սարյան փողոց, Ամիրյան փողոց, Հանրապետության հրապարակ, Տիգրան Մեծի պողոտա, Երվանդ Քոչարի փողոց, Ալեք Մանուկյան փողոց, Սայաթ Նովայի պողոտա, Թումանյան փողոց:
Խնդրում ենք բոլոր վարորդներին նշված ժամանակահատվածում նշված վայրերից դուրս բերել կայանված տրանսպորտային միջոցները, այլապես դրանք կտարհանվեն:

Տեղեկացնենք նաև, որ տոնական միջոցառումների կապակցությամբ սեպտեմբերի 21-ին, ժամը 05.00-ից մինչև ժամը 24.00-ն, Հանրապետության հրապարակի մուտքերը փակ են լինելու:

Հայցում ենք մայրաքաղաքի բնակիչների և հյուրերի ներողամտությունը պատճառված անհարմարության համար:

Այսօր Ազգային Ժողովի բակում տեղի ունեցավ 20 ամյա Հայաստանի բոլոր գումարումների խորհրդարանների պատգամավորների ընդունելություն:

Սերժ Սարգսյանը շնորհավորեց ներկաներին անկախության հոբելյանի առիթով ու ցավով նկատեց, որ տոնում ենք անկախության 20 ամյակը, բայց կան նաեւ դատարկ աթոռներ: Նա նկատի ուներ, առաջին նախագահին ու այն մարդկանց, ովքեր մերժել էին մասնակցել տոնական միջոցառմանը:

ՀՀ Ազգային ժողովում կազամակերպված տոնական ընդունելության ժամանակ Սերժ Սարգսյանը հանձնել է նաեւ պետական բարձր պարգևներ:

ՀՀ ԱԺ պատգամավոր Դավիթ Հարությունյանը պարգևատրվել է «Հայրենիքին մատուցած ծառայությունների համար» 1-ին աստիճանի մեդալով: Մխիթար Գոշի մեդալով են պարգևատրվել ՀՀ ԱԺ պատգամավորներ Վարդան Այվազյանը, Ռուզաննա Առաքելյանը, Վոլոդյա Բադալյանը, Անահիտ Բախշյանը, Հեղինե Բիշարյանը, Ռուստամ Գասպարյանը, Ռուբեն Գևորգյանը, Նաիրա Զոհրաբյանը, Վազգեն Կարախանյանը, Հերմինե Նաղդալյանը, Արտյուշ Շահբազյանը, Գալուստ Սահակյանը, Միքայել Վարդանյանը, Գագիկ Մինասյանը և ՀՀ ԱԺ աշխատակազմի ղեկավար Գեղամ Տիրանի Ղարիբջանյանը:

ՀՀ ֆինանսների նախարարությունը  տեղեկացնում է, որ այս շաբաթ «Թանկարժեք մետաղների և թանկարժեք քարերի պետական գանձարան»-ը մեկ գրամ քիմիապես մաքուր մետաղի պետական գնման և բացթողնման համար սահմանել է՝

ՈՍԿԻ` գնման գին` 20108.63 (-453.21), բացթողնման գին` 21857.21 (-492.62), ԱՐԾԱԹ` գնման գին` 449.27 (-11.78), բացթողնման գին` 488.34 (-12.8), ՊԼԱՏԻՆ` գնման գին` 20084.46 (-357.31), բացթողնման գին` 21830.94 (-388.38), ՊԱԼԱԴԻՈՒՄ` գնման գին` 8032.4 (-341.22), բացթողնման գին` 8730.87 (-370.89):

Երևանում այսօր մեկնարկեց «Ֆրութֆուլ Արմենիա» հերթական միջազգային 7-րդ համաժողովը, որի ընթացքում կքննարկվեն ֆերմերների, գինեգործների կիրառելի «գործիքները» և կրթական ծրագրերն ու մոդելները։ Համաժողովի մասնակիցներին ողջունեց փոխվարչապետ, տարածքային կառավարման նախարար Արմեն Գևորգյանը՝ ներկայնացնելով գյուղոլորտում պետության կողմից կատարված աշխատանքները սերմնաբուծության և սերմարտադրության, գյուղական կոոպերացիայի, գյուղտեխնիկայով ապահովվածության, կենսապարարտանյութերով ապահովվածության, ոռոգման և մասնավոր և պետական հատվածների միջև համագործակցության ոլորտներում։

Պետական ծրագրերի շրջանակում գյուղացիներին հասանելի է դարձել ցորենի 2,950 տոննա սերմացու, 2000 տոննա գարնանացան ցորենի սերմացու և 60 տոննա եգիպտացորենի սերմացու, ինչի շնորհիվ հացահատիկի բերքատվությունը հասցվել է 1 հեկտարից 35-40 ցենտների։

Համաշխարհային բանկի հատկացրած 1,3 մլն դոլար միջոցներով Հայաստանի 55 համայքներում իրականացվում է արոտավայրերի բարելավման ծրագիր, որը կխթանի նաև գյուղատնտեսական կոոպերացիան։ Գևորգյանը նշեց, որ դեռևս խնդիրներ կան գյուղտեխնիկայով ապահովման առումով, սակայն գյուղացիներին հասանելի են արդեն Հայաստանում արտադրվող կենսապարարտանյութերը, որոնք կօգտագործվեն հատկապես օրգանական գյուղմթերքի արտադրության ոլորտում։

Ըստ նրա՝ վերջին տարիներին Հայաստանում բացվել է գինու և պահածոների 61 արտադրություն։ Փոխվարչապետը բարձր գնահատեց ՀԲ-ի և «Հազարամյակի մարտահրավեր-Հայաստան» հիմնադրամի ֆինանսավորմամբ իրականացվող ոռոգման համնակարգերի արդիականացման աշխատանքները։ Նրա խոսքով՝ Հայաստանում դեռևս կա գինեգործական ոլորտի զարգացման մեծ ներուժ, ինչի իրացմանը կնպաստի այս տարի հիմնված Հայկական կոնյակ արտադրողների ասոցիացիան։ Նա գյուղոլորտում մասնավոր և պետական հատվածների համագործակցության լավ օրինակ համարեց այս տարվա մայիսին «Զվարթնոց» օդանավակայանի սառնարանային տնտեսության հիմնման մասին համաձայնության ձեռքբերումը և Էդուարդո Էռնեկյանի գործունեությունը Հայաստանում ընդհանրապես։

Ողջույնի խոսքով հանդես եկան նաև գյուղնախարար Սերգո Կարախետյանը՝ անդրադառնալով Հայաստանում գիկնեգործության պատմությանը, ներկա վիճակին ու զարգացման հեռանկարներին։

Համաժողովի շրջանակում համագործակցության համաձայնագիր ստորագրեցին Հայաստանի արդյունաբերողների և գործարարների միության նախագահ Արսեն Ղազարյանը և Արգենտինայի արդյունաբերողների և գործարարների միության նախագահ Խոսե Իգնասիո դե Մենդիգուրեն։

Հայրենիք-Սփյուռք միասնությունը շարժուն ու մշտապես գործող համակարգ է, որի ճկունությունն ու արդյունավետությունը պահպանելու համար անհրաժեշտ է հաշվի առնել միջազգային ասպարեզում և տարբեր երկրներում տեղի ունեցող փոփոխություններն ու զարգացումները: Այս համոզմունքն է հայտնել  ԼՂՀ նախագահ Բակո Սահակյանը` Սփյուռքի կազմակերպությունների ղեկավարների ու ներկայացուցիչների համահայկական համաժողովում ունեցած ելույթում,որը մեկնարկել է այսօր:Նա իր խոսքում մաասնավորապես ասել է.«Ողջունում և ի սրտե շնորհավորում եմ բոլորիդ մեկնարկի կապակցությամբ: Հայրենիք-Սփյուռք միասնությունը հանդիսանում է ինչպես հայոց անկախ պետականության գոյատևման ու զորացման, այնպես էլ աշխարհի տարբեր ծայրերում ապրող մեր հայրենակիցների ազգային ինքնության պահպանման հիմնասյուներից մեկը: Հենց այս միասնության շնորհիվ մենք կարողացանք դիմակայել ամենածանր իսկ փորձություններին եւ կանգնել կայուն զարգացման ուղու վրա: Այն դինամիկ համակարգ է, որի ճկունությունն ու արդյունավետությունը պահպանելու համար անհրաժեշտ է հաշվի առնել միջազգային ասպարեզում եւ տարբեր երկրներում տեղի ունեցող փոփոխություններն ու զարգացումները: Դա պահանջում է Հայրենիքի եւ Սփյուռքի պետական, քաղաքական, հասարակական, գիտակրթական, մշակութային եւ այլ շրջանակների միջեւ համագործակցության սերտացում, փոխգործակցության նոր եզրերի որոնում ու նախանշում»:

Սփյուռքում այս գործընթացի առանցքային օղակ է հանդիսանում տարբեր կազմակերպությունների ղեկավարների ինստիտուտը,մի օղակ, որը գուցե ավելի իրազեկ է սփյուռքահայերի կյանքին, համայնքներում առկա խնդիրներին եւ նրանց լուծման ուղիներին: Այս տեսանկյունից կարևոր եմ համարում ՀՀ Սփյուռքի նախարարության կողմից կազմակերպված համաժողովը, որը կարող է դառնալ մեր ժողովրդի և երկու հայկական պետությունների համար կարեւորություն ունեցող թեմաների քննարկման հարթակ: Համագործակցության նման ձևաչափը ավելի քան պահանջված է  և  աշխատանքների իրականացման համար հանդիսանում է թերևս ամենաարդյունավետ տարբերակներից մեկը:

Արցախը շահագրգռված է ու պատրաստակամ այս ձևաչափով աշխատել` այն դիտարկելով որպես Հայաստան-Արցախ-Սփյուռք եռամիասնության ամրապնդման գործնական  մեխանիզմ:

Համաժողավին ներկա էին նաև ՀՀ նախագահ Սերժ Սարգսյանը, Հայոց կաթողիկոս Գարեգին Բ-ն, Մեծի Տանն Կիլիկիո կաթողիկոս Արամ Ա-ն, ՀՀ եւ ԼՂՀ բարձրաստիճան պաշտոնյաներ, բազմաթիվ հյուրեր արտերկրից:

ԵՊՀ ռուսաց լեզվի եւ գրականության դասախոս Արմինե Հովվյանին սպանել են:

Սկզբնական տեղեկատվությունը, որ տարածվեց, ծխահարման արդյունքում մահանալու վարկածն էր: Հիշեցնենք, որ սեպտեմբերի 17-ին, ժամը 17-ի սահմաններում Նալբանդյան 25/14 շենքի 4 -րդ հարկում հրդեհ էր բռնկվել:

Բնակարանից հրշեջներին հաջողվել էր փրկել մի տղամարդու, իսկ տանտիրուհու դին հայտնաբերվել էր արդեն կրակը մարելուց հետո:

Հետագայում պարզվել է, որ փրկված տղամարդը` 43-ամյա Կարեն Պետրոսյանն է, որը ըստ մեր ունեցած տեղեկությունների՝ տանտիրուհու քրոջ որդու ընկերն է եւ մի քանի անգամ եղել է նշված բնակարանում:

Այդ օրը եւս նա ինչ-որ խնդրով այցելել է 64-ամյա Արմինե Հովվյանին, որն անգամ հյուրասիրել է հյուրին: Ապա մուրճով հարվածել է գլխին եւ հափշտակել 40000 դրամ եւ ոսկյա զարդերը։ Սպանության հետքերը թաքցնելու նպատակով հրդեհել է բնակարանը, սակայն չի հասցրել հեռանալ վառվող տնից:

Փրկարարները նրան տարահանել են անմիջապես շտապօգնության մեքենայով տեղափոխել են ճառագայթային բժշկության և այրվածքների գիտական կենտրոն, որտեղից նա դիմել է փախուստի, սակայն շատ արագ ոստիկանները կարողացել են Մարգարյան-Հալաբյան փողոցների խաչմերուկում հայտնաբերել և բերման  ենթարկել բաժին: Գողոնն առգրավված է:
Հարուցված է քրեական գործ: Ընթանում է նախաքննություն:

Փաստի առթիվ սեպտեմբերի 18-ին ՀՀ քրեական օրենսգրքի 104 հոդվածի (սպանություն) 2-րդ մասի, 175 հոդվածի (ավազակություն) 2-րդ մասի և 185 հոդվածի (գույքը դիտավորությամբ ոչնչացնելը կամ վնասելը) 2-րդ մասի հատկանիշներով հարուցվել է քրեական գործ:

Ի դեպ, Արմինե Հովվյանը ժամանակին եղել է ԵՊՀ ռուսական բանասիրության ֆակուլտետի տարիներ առաջ սպանված դեկան Կարեն Մկրտչյանի տեղակալը։

Լեռնային Ղարաբաղի տարածքում ոչնչացված անօդաչու թռչող սարքը պատկանում է Իսրայելի Զինված ուժերին։ Այս մասին SalamNews–ին ասել է թուրքական դիվանագիտական մարմիններին մոտ կանգնած աղբյուրը:

«Լեռնային Ղարաբաղի տարածքում, իրոք, ոչնչացվել է անօդաչու թռչող սարք։ Սակայն դա Ադրբեջանի Զինված ուժերին չի պատկանում»,– ասել է աղբյուրը՝ նշելով. «Դա եղել է իսրայելական անօդաչու սարք և պատկանել Իսրայելի զինված ուժերին։ Այդ սարքն օդ է բարձրացվել Հայստանի կամ հնարավոր է Լեռնային Ղարաբաղի հայկական ռազմաբազաներից։ Սարքը թռիչքներ է իրականացրել Իրանի վերաբերյալ հետախուզական տվյալներ հավաքելու համար»:

Հոկտեմբերի 20-21-ին Երևանում Մետանադարանի նորակառույց շենքում, կայանալու է Միջազգային եվրոպական շարժման կոնգրեսը, որին նախատեսվում են Հայաստանի նախագահ Սերժ Սարգսյանի, Հայաստանում եվրոպական շարժման պատվավոր նախագահ Գագիկ Ծառուկյանի մասնակցությունը: Այս մասին այսօր լրագրողների հետ հանդիպման ժամանակ հայտնեց Հայաստանում եվրոպական շարժման նախագահ Վիկտոր Ենգիբարյանը՝ հավելելով, որ երևանյան համաժողավին մասնակցելու է նաև Եվրամիության արտաքին քաղաքական ու անվտանգության հարցերով հանձնակատար Քեթրին Էշթոնը:

Ըստ Ենգիբարյանի՝ Երևանում կայանալիք կոնգրեսի թեման է «Քաղաքացիական հասարակության դերի բարձրացումը Արևելյան գործընկերության ծրագրի շրջանակներում»: Նրա խոսքով՝ կոնգրեսը Երևանում անցկացնելու առաջարկն իրենք են արել, որն էլ ընդունվել է միջազգային եվրոպական շարժման խորհրդի կողմից: Նա հավելեց, որ կոնգրեսի ընթացքում երեք հիմնական աշխատանքային խմբերը կքննարկեն քաղաքացիական հասարակության դերի բարձրացման, վիզային ռեժիմի դյուրացման, ազգային բարեփոխումներին վերաբերող մի շարք հարցեր: Կոնգրեսին ներկա կլինի նաև ադրբեջանական պատվիրակությունը: Համաժողովի վերջում ընդունվելու է «Երևանյան հռչակագիր»:

Միջազգային եվրոպական շարժման գլխավոր քարտուղար Դիոգո Պինտոն էլ նշեց, որ իր այցը Երևան նախապատրաստական բնույթ է կրում: Նրա կարծիքով երկրի կայացման համար կարևոր է երկու հանգամանք՝ քաղաքացիական հասարակության ներկայություն ու քաղաքական իշխանության բաց լինելը հասարակության առջև: «Հայաստանում առաջին պայմանը կա, այստեղ քաղաքացիական հասարակությունն ակտիվ է, իսկ թե որքանով են բաց իշխանությունները, ցույց կտա կոնգրեսի ընթացքը»,- հայտարարեց Դիոգո Պինտոն:

Իսկ վերջում ընդգծեց, որ իրենց կանոնադրության համաձայն՝ անկախ նրանից՝ երկիրը ճանաչված է, թե ոչ, նրա քաղաքացիական հասարակությունը ներկայացնող կազմակերպությունները կարող են մասնակցել այս կոնգրեսին: Պինտոյի խոսքով, սա վերաբերում է նաև Լեռնային Ղարաբաղի քաղաքացիական հասարակությունը ներկայացնող կազմակերպություններին:

Նախագահ Սերժ Սարգսյանն այսօր այցելել է մայրաքաղաքի «Արաբկիր» մանկական բժշկական հաստատություն, որտեղ նրան ներկայացվել են «Արաբկիր» բժշկական համալիր-Երեխաների և դեռահասների առողջության ինստիտուտի 2007-2011թթ. զարգացման ծրագրի արդյունքները՝ ուղղված մանկաբուժական ծառայության բարելավմանն ու պոլիկլինիկական մասի ստեղծմանը: Բժշկական համալիրում նա ծանոթացել է վերանորոգված և ժամանակակից սարքավորումներով վերազինված հիվանդանոցային պոլիկլինիկայի ու մանկաբուժական բաժանմունքները ներառող նորակառույց եռահարկ մասնաշենքի պայմաններին:

Շրջայցի ժամանակ նախագահին ներկայացվել է, որ նախկինում ամբողջովին խարխլված և կիսավեր մանկաբուժական մասնաշենքն անցած հինգ տարիներին ամբողջությամբ արդիականացվել է և ծառայելու է որպես հիվանդանոցային պոլիկլինիկա, իսկ մանկաբուժական բաժանմունքները տեղափոխվել են հիմնովին կառուցված նոր մասնաշենք:

«Արաբկիր» բժշկական համալիրը ներառում է երեք հիմնական ստորաբաժանումներ` «Արաբկիր» բժշկական կենտրոնը, «ԱրԲեՍ» առողջության կենտրոնը, Երեխաների և դեռահասների առողջության ինստիտուտը Երևանում, ինչպես նաև ութ մանկական վերականգնողական կենտրոններ` մարզերում:

Բժշկական համալիրը հիվանդանոցային բուժօգնություն է մատուցում տարեկան ավելի քան ինը հազար, իսկ արտահիվանդանոցային՝ ավելի քան քսան հազար երեխաների, դեռահասների, ինչպես նաև մեծահասակների:

Սեպտեմբերի 19-ին մեկնարկելու է ՅՈՒՆԵՍԿՕ-ի գործերով Հայաստանի ազգային հանձնաժողովի «Ճանաչիր աշխարհի մշակույթներն ու երկրները» ծրագիրը:

Այն իրականացվելու է ՅՈՒՆԵՍԿՕ-ի Ասոցացված դպրոցների ծրագրի /ԱԴԾ/ ցանցում ներառված Հայաստանի 11 դպրոցներում` Հայաստանում հավատարմագրված օտարերկրյա դեսպանությունների ներգրավմամբ:

«Ճանաչիր աշխարհի մշակույթներն ու երկրները» ծրագիրը աշակերտներին հնարավորություն է ընձեռում տարբեր երկրների դեսպանների հետ անմիջական շփման միջոցով հաղորդակից դառնալ այդ երկրների պատմությանը, մշակույթին, ավանդույթներին եւ արժեքներին, ինչպես նաեւ պատասխաններ ստանալ իրենց հետաքրքրող բազմաթիվ հարցերին: Ծրագիրը ընդլայնում է աշակերտների մտահորիզոնը, նպաստում ժողովրդների միջեւ փոխըմբռնման, փոխադարձ հարգանքի, բարեկամության խորացմանը:

Ծրագրի մեկնարկի պաշտոնական արարողությունը տեղի է ունենալու սեպտեմբերի 19-ին Ալեքսանդր Բլոկի անվան թիվ 122 դպրոցում Հայաստանում ՌԴ արտակարգ եւ լիազոր դեսպան Վյաչեսլավ Կովալենկոյի հյուրընկալմամբ: Արարողությանը ներկա են գտնվելու ՀՀ Կրթության եւ գիտության նախարարը, ԱԳՆ փոխնախարարը, ՀՀ-ումն հավատարմագրված դիվանագիտական ներկայացուցչությունների աշխատակիցներ եւ այլ բարձրաստիճան այրեր:

Այս մասին տեղեկացնում է ԱԳՆ մամլո ծառայությունը։