Վաղը հանրապետության տարածքում ջերմաստիճանը էականորեն կնվազի: Հանրապետության գրեթե ամբողջ տարածքում ցերեկը սպասվում են տեղումներ:Այս մասին տեղեկանում ենք «Մետեո TV»-ից: Իսկ մինչ այդ, այսօր կդիտվի առանց տեղումների եղանակ: Օդի ջերմաստիճանը գիշերը կլինի +8+10, ցերեկային ժամերին +22+25:

Հոկտեմբերի 17-ին, ժամը 12.30-ին, «ԲՄՎ» մակնիշի ավտոմեքենայի վարորդը Մաշտոցի պողոտայի և Իսահակյան փողոցի խաչմերուկում վրաերթի է ենթարկել 15-ամյա մի աղջկա և իր ավտոմեքենայով տեղափոխել նրան հիվանդանոց: Կատարվում է քննություն:

Նույն օրը, ժամը 13.20-ին, անհայտ ավտոմեքենայի վարորդը Աբովյան փողոցում` Վիկտոր Համբարձումյանի հուշարձանի մոտ, վրաերթի է ենթարկել 73-ամյա մի տղամարդու, պատճառել վնասվածքներ և թողնելով դեպքի վայրը` հեռացել: Տուժածը տեղափոխվել է հիվանդանոց: Կատարվում է քննություն:

Ժամը 18.00-ին, «ԲՄՎ» մակնիշի ավտոմեքենայի վարորդը Խաչիկ Դաշտենցի փողոցի թիվ 8 հասցեի մոտ վրաերթի է ենթարկել 45-ամյա մի տղամարդու, ապա բախվել ծառին: Եվ վարորդը, և վրաերթի ենթարկվածը մարմնական վնասվածքներով տեղափոխվել են հիվանդանոց: Կատարվում է քննություն:

Դանիայում` հոկտեմբերի 14-ին, Ֆրեդենսբորգ պալատում, Դանիայի Թագավորությունում ՀՀ դեսպան Հրաչյա Աղաջանյանն իր հավատարմագրերն է հանձնել Դանիայի թագուհի Մարգրեթ Երկրորդին:

ԱԳՆ մամուլի ծառայությունից հայտնում են, որ թագուհին, շնորհավորելով դեսպանին նշանակման կապակցությամբ եւ հաջողություններ մաղթելով աշխատանքում, հույս է հայտնել, որ Դանիայում Հայաստանի դեսպանության հիմնումը կնպաստի հայ-դանիական հարաբերությունների զարգացմանը եւ ընդլայնմանը: Դանիայի թագուհին խնդրել է իր բարեմաղթանքները փոխանցել Հայաստանի նախագահ Սերժ Սարգսյանին եւ հայ ժողովրդին:

Պաշտոնական արարողությանը հետեւած առանձնազրույցի ժամանակ անդրադարձ է կատարվել մի շարք միջազգային եւ տարածաշրջանային հարցերի:

Հոկտեմբերի 15-ին, ժամը 18.30-ին, «Մերսեդես-Բենց»  մակնիշի ավտոմեքենան Թբիլիսյան խճուղում բախվել է «ԳԱԶ-24» մակնիշի ավտոմեքենայի:

«ԳԱԶ-24»-ի վարորդը և 2  ուղևորները մարմնական վնասվածքներով տեղափոխվել են հիվանդանոց:

Սևան-Երևան ճանապարհին

Հոկտեմբերի 16-ին, ժամը 20.00-ի սահմաններում, Սևան-Երևան ճանապարհի 41-րդ կմ-ին «ՎԱԶ-21102» մակնիշի մի ավտոմեքենա բախվելով  ճամփեզրի արգելապատնեշին` շրջվել և գլորվել է ձորը:

Վարորդը և 2 ուղևորները մարմնական վնասվածքներով տեղափոխվել են հիվանդանոց, որտեղ ուղևորներից մեկը մահացել է:

Նախագահ Սերժ Սարգսյանն ստորագրել է Ազգային ժողովի ընդունած «Մարդու իմունային անբավարարության վիրուսից առաջացած հիվանդության կանխարգելման մասին» և «Մարդուն օրգաններ և (կամ) հյուսվածքներ փոխպատվաստելու մասին» ՀՀ օրենքներում փոփոխություն կատարելու մասին օրենքները:

Նախագահ Սերժ Սարգսյանն այսօր մայրաքաղաքում այցելել է Հայաստանի դեղարտադրության առաջատարը համարվող «Լիկվոր» ՓԲԸ–ի նորակառույց գործարան:

Նա ներկա է գտնվել գործարանի բացման արարողությանը, շրջայց կատարել գործարանում և ծանոթացել «Լիկվորի» արտադրական հնարավորություններին ու ծրագրերին: 2008թ. հոկտեմբերին մեկնարկած այս գործարանի կառուցման նախագծի մասնակիցներն են 2005 թվականից ընկերության բաժնետեր դարձած Վերակառուցման և զարգացման եվրոպական բանկը և ՀՀ կառավարությունը: Այն ավարտին է հասցվել ՀՀ կառավարության հակաճգնաժամային ծրագրի շրջանակում: 2009թ. Սերժ Սարգսյանը, այցելելով դեռևս «Արմենիա» հանրապետական բժշկական կենտրոնի մասնաշենքում վարձակալական հիմունքներով գործունեություն ծավալող «Լիկվոր» ընկերություն, ընկերության ղեկավարության հետ քննարկել է ՀՀ կառավարության օպերատիվ հակաճգնաժամային շտաբի օժանդակությամբ նոր գործարանի շինարարությունն ավարտին հասցնելու հնարավորություններն ու դեղագործական այս ընկերության զարգացման հեռանկարը: «Լիկվոր»-ն օպերատիվ հակաճգնաժամային շտաբ է ներկայացրել իր բիզնես ծրագիրը, որը քննարկվել և նույն թվականին հաստատվել է՝ ընկերությանը հնարավորություն ընձեռելով ստացված օժանդակությամբ ընդլայնել գործունեությունը:

Իր ենթակառուցվածքներով ամբողջությամբ նոր այս արտադրական շենքի կառուցման և ժամանակակից սարքավորումների ու համակարգերի ձեռքբերման, տեղադրման համար ներդրվել է շուրջ 4.5 մլն ԱՄՆ դոլար: Նշվել է, որ արտադրությունն իրականացվում է իտալական, գերմանական և ավստրիական առաջատար տեխնոլոգիաներով: Նոր գործարանը տարածաշրջանում կգործի եվրոպական GMP ստանդարտի պահանջներին համապատասխան, ինչը հնարավորություն կտա ընդլայնել արտահանվող երկրների շրջանակը, մեծացնել արտադրանքի ծավալը, ավելացնել աշխատակիցների թիվը, ինչպես նաև շարունակել հետազոտական աշխատանքները նոր դեղամիջոցների արտադրության բնագավառում: Դեռևս 1991թ. հիմնադրված «Լիկվոր» ընկերությունն արտադրում է ներերակային, ակնաբուժական և ներարկման ստերիլ դեղամիջոցներ: Ընկերության կողմից առաջարկվող դեղերի անվանացանկը պարունակում է 70 անուն դեղորայք, որոնք ընդգրկում են շուրջ 27 դեղագիտական խմբեր: Հայաստանի արտոնագրային վարչությունում գրանցված է ընկերության 25 ապրանքանիշ:

Նախագահը շնորհավորել է գործարանի բացման կապակցությամբ և հաջողություն մաղթել «Լիկվոր» ընկերությանը՝ հետագա զարգացման ծրագրերում:

«ՆԱՍԴԱՔՕԷՄԷՔՍ Արմենիա» բորսայում ամերիկյան դոլարի միջին փոխարժեքն այսօր` հոկտեմբերի 14-ին կազմել է 375.25 դրամ: Այսպիսով` դոլարը մի քանիօրյա ետընթացից հետո կրկին սկսում է թանկանալ:

Ընդհանուր առմամբ, բորսայում վաճառվել է 2.4 մլն դոլար:

Բորսայում տեղի ունեցած ոչ մեծ փոփոխությունը կանխիկ արտարժույթի շուկայում էական փոփոխությունների չի հանգեցրել: Դոլարի առքուվաճառքի փոխարժեքը տատանվում է 374-377 դրամի միջակայքում:

Երեւանում, հոկտեմբերի 12-ի երեկոյան, Հրազդանի կիրճում` «Ֆլորենց» ռեստորանի հարակից տարածքում, մեքենա է ընկել Հրազդան գետը, կան տուժածներ:

Հայաստանի ԱԻՆ փրկարար ծառայությունիցն հայտնում են, որ դեպքի վայր է մեկնել փրկարարական ուժերի վարչության հատուկ փրկարական ջոկատի հերթապահ խումբը:

Պարզվել է, որ «Մերսեդես Ե-240» մակնիշի 14 ՍՍ 141 համարանիշի ավտոմեքենան դուրս է եկել ճանապարհի երթեւեկելի մասից եւ ընկել գետը: Մինչեւ փրկարարների կանչի վայր հասնելը տեղի ուժերով ավտոմեքենայից դուս են բերվել 27-ամյա Հայկ Հովհաննիսյանը եւ 37-ամյա Արման Պռոյանը, որոնք այնուհետեւ տեղափոխվել են «Արմենիա» բժշկական կենտրոն:

Տուժածների առողջական վիճակը գնահատվել է միջին ծանրության:

Ականատեսների խոսքով, դիմացից ընթացել է տաքսի մեքենա, եւ «Մերսեդես Բենցի» վարորդը փորձելով խուսափել բախումից, դուրս է եկել երթեւեկելի մասից եւ արդյունքում հայտնվել գետում: