Վարչապետ Տիգրան Սարգսյանն այսօր երկօրյա աշխատանքային այցով կմեկնի Բրյուսել: Կառավարության ղեկավարը երեկոյան կմասնակցի Euro Crisis խորագրով Եվրոպայի ժողովրդական կուսակցության կոնֆերանսին, որից հետո կընթրի Եվրոպական խորհրդարանում ԵԺԿ խմբի փոխնախագահ Խայմե Մայոր Օրեխայի հետ:
Նոյեմբերի 8-ին Եվրոպական խորհրդարանում Տիգրան Սարգսյանը կմասնակցի ԵԺԿ քաղաքական վեհաժողովին և հանդիպում կունենա Հայաստանի եվրոպական բարեկամներ կազմակերպության ներկայացուցիչների հետ:
Վարչապետի գլխավորած կառավարական պատվիրակության կազմում են ՀՀ կառավարության աշխատակազմի ղեկավար Դավիթ Սարգսյանը, ՀՀ կրթության և գիտության նախարար Արմեն Աշոտյանը, ՀՀ Ազգային ժողովի Հանրապետական խմբակցության պատգամավոր Արտակ Զաքարյանը և այլ պաշտոնատար անձինք:

Նոյեմբերի 4-ին, ժամը 16.30-ին, «ԳԱԶ-32213» մակնիշի միկրոավտոբուսը Արշակունյաց պողոտայում վրաերթի է ենթարկել 53-ամյա մի կնոջ: Վարորդը տուժողին ավտոմեքենայով տեղափոխել է հիվանդանոց: Կատարվում է քննություն:

Նոյեմբերի 7-ին աշխատանքային այցով Հայաստան կժամանի Վրաստանի ԱԳ նախարար Գրիգոլ Վաշաձեն:
Այցի ընթացքում Վրաստանի արտգործնախարարին կընդունի նախագահ Սերժ Սարգսյանը: Գրիգոլ Վաշաձեն հանդիպում կունենա նաև ԱԳ նախարար Էդվարդ Նալբանդյանի հետ:

Երկուշաբթի` նոյեմբերի 7-ին Լոռիում, Տավուշում, Սյունիքում և Արցախում սպասվում է ձյուն: Այս մասին հայտնեցին ԱԻՆ Հայպետհիդրոմետ ծառայությունից:
Սյունիքում և Արցախում` ինտենսիվ, լեռնային շրջաններում և լեռնանցքներում` բուք, ճանապարհներին` մերկասառույց:

Հանրապետության մյուս շրջաններում էական տեղումներ չեն սպասվում: Օդի ջերմաստիճանը նոյեմբերի 7-ին նշված մարզերում կնվազի 13-15 աստիճանով, իսկ մյուս շրջաններում՝ 6-8 աստիճանով: Նոյեմբերի 8-ի գիշերը ջերմաստիճանը հանրապետության ողջ տարածքում կրկին կնվազի 3-5 աստիճանով:

Արագածոտնի մարզի Ոսկեւազ գյուղում, նոյեմբերի 3-ին`ժամը 18.30-ի սահմաններում, տեղի է ունեցել վրաերթ:

Հայաստանի ԱԻՆ փրկարար ծառայությունից հայտնում են, որ դեռեւս չպարզված հանգամանքներում «ՎԱԶ-2106» մակնիշի 21 ՍՏ 140 համարանիշի ավտոմեքենան (վարորդ` Խաչիկ Կոշեթյան) վրաերթի է ենթարկել 55-ամյա Գրիգոր Հովհաննիսյանին:

Տուժածը տեղափոխվել է «Արմենիա» բժշկական կենտրոն: Նրա առողջական վիճակը գնահատվել է ծայրահեղ ծանր:

«ՆԱՍԴԱՔՕԷՄԷՔՍ Արմենիա» բորսայում ամերիկյան դոլարն այսօր` նոյեմբերի 3-ին, շարունակեց թանկանալ հայկական դրամի նկատմամբ: Գործարքների արդյունքում դոլարի միջին փոխարժեքը կազմել է 379.42 դրամ, երեկվա համեմատ արժեւորումը կազմում է 0.06 տոկոս:

Սակայն հարկ է նշել, որ բորսայում թանկացող դոլարի նկատմամբ պահանջարկը մեծ չի եղել. ընդհանուր առմամբ վաճառվել է 850 հազ. դոլար:

Կանխիկ արտարժույթի շուկայում փոխարժեքի էական փոփոխություն տեղի չի ունեցել` դոլարի առուվաճառքի առավել տարածված միջակայքն է 378-380-ը:

ՀՀ փոխվարչապետ, տարածքային կառավարման նախարար Արմեն Գեւորգյանն աշխատանքային այցով այսօր մեկնեց Լեհաստան` մասնակցելու Պրահյան գործընթացի «Միգրացիոն գործընկերության կառուցում» նախարարական երկրորդ համաժողովին: Պրահյան գործընթացի անդամ են Եվրամիության, Հարավարեւելյան եւ Արեւելյան Եվրոպայի, Կենտրոնական Ասիայի երկրները:

Համաժողովի լիագումար նիստում փոխվարչապետը հանդես կգա ելույթով:

Համաժողովի արդյունքներով հավանության կարժանանա Պրահյան գործընթացի 2012-2016թթ. գործողության ծրագիրը, տեղեկացնում են փոխվարչապետի գրասենյակից:

Նոյեմբերի 2-ին, ժամը 23.48-ին ահազանգ է ստացվել, որ Երևան-Արտաշատ ավտոճանապարհին` Այնթապ գյուղի սկզբնամասում, տեղի է ունեցել ավտոպատահար, կա տուժած. անհրաժեշտ է փրկարարների օգնությունը:

Դեպքի վայր է մեկնել փրկարարական ուժերի վարչության հատուկ փրկարարական ջոկատի հերթապահ խումբը:

Դեռևս չպարզված հանգամանքներում` քարե կրպակին է բախվել ‘’Օպել Վեկտրա Բ’’ մակնիշի 15 ՕՕ 374 պետհամարանիշի ավտոմեքենան: Փրկարարները ավտոմեքենայից դուրս են բերել և շտապօգնության աշխատակիցներին հանձնել վարորդ,1973 թվականին ծնված Սուրեն Զատևոսյանի դին: