Նոյեմբերի 23-ին, ժամը 2.30-ի սահմաններում, «Օպել» մակնիշի ավտոմեքենան Երևանի Արշակունյաց պողոտայի և Բագրատունյաց փողոցի խաչմերուկում բախվել է մայթեզրին կայանված մեկ այլ ավտոմեքենայի և գլխիվայր շրջվել:«Օպել»-ի վարորդը ենթարկվել է բժշկական հետազոտության. պարզվել է, որ նա եղել է ոչ սթափ վիճակում:

«Ոսկե ծիրանն անիվների վրա» կինոփառատոնը, նոյեմբերի 19-21-ին,  5-րդ անգամ այցելել է Արցախ՝ կինոցուցադրություններ կազմակերպելով Ստեփանակերտում եւ Շուշիում:

Ֆիլմացանկում ընդգրկված էին «Ոսկե ծիրան» 8-րդ կինոփառատոնի ֆիլմերից լավագույնները եւ մրցանակակիրները: Ցուցադրվեցին 9 ֆիլմ՝ խաղարկային, վավերագրական եւ կարճամետրաժ: Փառատոնի բացումը միաժամանակ տեղի ունեցավ Ստեփանակերտի Մշակույթի եւ երիտասարդության պալատում եւ Շուշիի «Նարեկացի» արվեստի կենտրոնում:

«Ոսկե ծիրանն անիվների վրա» կինոփառատոնը Արցախում իրականացվեց ԼՂՀ Մշակույթի եւ Երիտասարդության հարցերի նախարարության, «Փյունիկ» մարդկային ռեսուրսների զարգացման հիմնադրամի, «Արցախ Բրենդի Կոմպանի»-ի աջակցությամբ:

Նոյեմբերի 22-ին`ժամը 23.05-ին ահազանգ է ստացվել, որ «ԲՄՎ» մակնիշի 02 ՍՕ 070 պետհամարանիշի ավտոմեքենան Աշոցքի ՀՓՋ-ից մոտ 100 մ հեռավորության վրա, դուրս է եկել ճանապարհի երթևեկելի մասից և շրջվել:

Դեպքի վայր մեկնած հրշեջ փրկարարները կանխել են ավտոմեքենայի գազաբալոնից գազի արտահոսքը և ավտոմեքենայից դուրս բերել վարորդ,1969 թվականին ծնված Ոսկան Ոսկանյանին, ուղևոր` 1970 թվականին ծնված Արմեն Բաղդասարյանին` երկուսն էլ Աշոցք գյուղի բնակիչներ, որոնց «1-03» ծառայության աշխատակիցները տեղափոխել են Աշոցք գյուղի հիվանդանոց:

Ո.Ոսկանյանի առողջական վիճակը գնահատվել է միջին ծանրության, իսկ Ա.Բաղդասարյանինը` բավարար:

Նոյեմբերի 22-ին, ժամը 02.30-ի սահմաններում, «Ֆոլքսվագեն Պասսատ» մակնիշի ավտոմեքենան Աշտարակ-Բյուրական ճանապարհի 4-րդ կմ-ին բախվել է ծառին. վարորդը և ուղևորը մարմնական վնասվածքներով տեղափոխվել են հիվանդանոց, իսկ մյուս ուղևորը ստացել է մարմնական վնասվածք, սակայն բուժօգնության չի դիմել: Կատարվում է քննություն:

Հայաստանի ֆինանսների նախարարության «Թանկարժեք մետաղների եւ թանկարժեք քարերի պետական գանձարան» գործակալության կողմից նոյեմբերի 21-28-ի համար սահմանվել են թանկարժեք մետաղների մեկ գրամ քիմիապես մաքուր մետաղի (պետական ստանդարտ ձուլակտորի համար) պետական գնման եւ բացթողնման հետևյալ գները` արտահայտված ՀՀ դրամով.

ՈՍԿԻ` գնման գին` 19968.31 (-205.17), բացթողնման գին` 21704.69 (-223.01),

ԱՐԾԱԹ` գնման գին` 382.55 (-6.5), բացթողնման գին` 415.82 (-7.06),

ՊԼԱՏԻՆ` գնման գին`18428.22 (-194), բացթողնման գին`  20030.67 (-210.87),

ՊԱԼԱԴԻՈՒՄ`  գնման  գին`  7319.00 (-144.02),     բացթողնման գին`  7955.44 (-156.54):

Նոյեմբերի 19-ին, ժամը 04.00-ի սահմաններում, «Հոնդա» մակնիշի ավտոմեքենան Երևան-Մեղրի ճանապարհի 150-րդ կմ-ին բախվել է ճամփեզրի բետոնե պատին: Վարորդը մարմնական վնասվածքներով տեղափոխվել է հիվանդանոց: Կատարվում է քննություն: