Դեկտեմբերի 5-ին` ժամը 15.13-ին, տեղեկատվություն է ստացվել, որ Արմավիրի մարզում` «Տիեռաս դե Արմենիա» ՓԲԸ-ի տարածքում ական է հայտնաբերվել:
Դեպքի վայր է մեկնել մարզային փրկարարական վարչության օպերատիվ խումբը և փրկարարական ջակատը:

Դեպքի վայր ժամանած ՊՆ ինժեներասակրավորային խումբը զինամթերքի զննության արդյունքում պարզել է, որ դրանք 3 հրետանային արկեր են, որից 2-ը` 100մմ տրամաչափի (մարտական վիճակում), 1-ը` 120մմ (չգործարկված):

Հայտնաբերած զինամթերքը տեղափոխվել է զորամաս:

Հայաստանի ֆինանսների նախարարության «Թանկարժեք մետաղների եւ թանկարժեք քարերի պետական գանձարան» գործակալության կողմից դեկտեմբերի 5-11-ի համար սահմանվել են թանկարժեք մետաղների մեկ գրամ քիմիապես մաքուր մետաղի (պետական ստանդարտ ձուլակտորի համար) պետական գնման եւ բացթողնման հետևյալ գները` արտահայտված ՀՀ դրամով`

ՈՍԿԻ` գնման գին` 19521.21 (+324.75), բացթողնման գին` 21218.71 (+352.99),

ԱՐԾԱԹ` գնման գին` 364.75 (+7.77), բացթողնման գին` 396.47 (+8.45),

ՊԼԱՏԻՆ`  գնման գին` 17476.49 (-122.02), բացթողնման գին` 18996.19 (-132.63),

ՊԱԼԱԴԻՈՒՄ` գնման գին` 6881.18 (+235.44), բացթողնման գին` 7479.54 (+255.91)

Հանրապետության տարածքում եղանակը կպայմանավորվի բարձր ճնշման դաշտով: Առաջիկա օրերին ամբողջ տարածաշրջանում կդիտվի առանց տեղումների եղանակ: Քամին` հյուսիս-արևմտյան 1-6մ/վրկ, առանձին վայրերում հնարավոր է ուժգնացում 12-15մ/վրկ, լեռնանցքներում հնարավոր է բուք: Թեև տեղումներ չեն դիտվի, քամու պատճառով առանձին հատվածներում հնարավոր է ցածր տեսանելիություն: Օդի ջերմաստիճանն առաջիկա 2 օրերին մի փոքր էլ կբարձրանա: Ճանապարհների առանձին հատվածներում հնարավոր է մառախուղ, մերկասառույց:Meteo-tv-ի հաղորդմամբ, մայրաքաղաքում սպասվում է առանց տեղումների, պարզ եղանակ: Օդի ջերմաստիճանը ցերեկային ժամերին կլինի +5+7, երեկոյան -1+1:

Ինչպես տեղեկացրել էինք՝ դեկտեմբերի 1-ի գիշերը, ժամը 1-ի սահմաններում, Մխիթար Հերացու փողոցից դեպի Խանջյան փողոց տանող ստորգետնյա ճանապարհին իրար էին բախվել «ԶԱԶ-ՍԵՆՍ» և «Մերսեդես-Բենց» մակնիշի ավտոմեքենաներ:

«ԶԱԶ-ՍԵՆՍ» մակնիշի տաքսի ավտոմեքենայի վարորդը և 3 ուղևորները մարմնական վնասվածքներով տեղափոխվել էին հիվանդանոց, իսկ «Մերսեդես-Բենց»-ի վարորդը, թողնելով ավտոմեքենան՝  դեպքի վայրից դիմել էր փախուստի:Նույն օրը հիվանդանոցից ոստիկանությունում հաղորդում էր ստացվել, որ «ԶԱԶ-ՍԵՆՍ»-ի վարորդը՝ 58-ամյա Ռազմիկ Սուքիասյանը, հիվանդանոցի  վերակենդանացման բաժնում, գիտակցության չգալով, մահացել է:

Ոստիկանության Մարաշի բաժանմունքի ծառայողները պարզել են փախուստի դիմած վարորդի ինքնությունը՝ Երևանի բնակիչ, 39-ամյա Արտակ Խաչատրյան, որը ներկայացել է ոստիկանություն և խոստովանական ցուցմունք տվել:

Կատարվում է քննություն:

Սեւան-Մարտունի-Գետափ ճանապարհի 57-րդ կմ-ին, դեկտեմբերի 1-ին, ժամը 11.00-ի սահմաններում, «Միցուբիշի-Պաջերո» մակնիշի ավտոմեքենան բախվել  է «ՎԱԶ-21140»  մակնիշի ավտոմեքենային:

Ոստիկանության մամուլի ծառայությունից  հայտնում են, որ վթարի հետեւանքով վերջինիս ուղեւորուհին մարմնական վնասվածքներով տեղափոխվել է հիվանդանոց:

Նույն օրը, ժամը 20.30-ին, «ՎԱԶ-2106» մակնիշի ավտոմեքենայի վարորդը Մարտունի-Վարդենիս ճանապարհի 1-ին կմ-ին վրաերթի է ենթարկել 56-ամյա մի կնոջ, որը մարմնական վնասվածքներով տեղափոխվել է հիվանդանոց:

ՀՀ Ազգային Ժողովի մշտական հանձնաժողովներից ու պատգամավորներից, 2012 թ. բյուջեի նախագծում փոփոխություն կատարելու վերաբերյալ Հայաստանի կառավարությունը ստացել է մոտ 500 առաջարկություն, որոնցից 135-ը լրիվ կամ մասնակի ընդունվել են:

Այսօր կառավարության նիստի ընթացքում տեղեկացրեց ՀՀ ֆինանսների նախարար Վաչե Գաբրիելյանը, նշելով, որ առաջարկներ են ստացել բոլոր քաղաքական կուսակցություններից ու խմբավորումներից:

Ըստ Վ. Գաբրիելյանի` պատգամավորները ներկայացրել են եկամտային մասն ավելացնելու 1.1 տրլն դրամի առաջարկություն, որոնք սակայն հիմնավորված չեն եղել և մերժվել են: Չնայած նրան, որ մերժվել են բոլոր այն առաջարկները, որոնք վերաբերում են բյուջեի եկամտային մասի ավելացմանը, փոխարժեքի փոփոխության հետ կապված` 1.6 մլրդ դրամի ավելացում բյուջեի եկամտային մասում կատարվել է:

Այսպիսով` կառավարությունը պետական բյուջեն խորհրդարանի հաստատմանը կներկայացնի հետեւյալ հիմնական ցուցանիշներով. եկամուտներ` 911.6 մլրդ դրամ, ծախսեր` 1 տրլն 41.1 մլրդ դրամ, դեֆիցիտ` 132.5 մլրդ դրամ:

Նշենք, որ 1.6 մլրդ դրամով ավելացվել է նաեւ բյուջեի ծախսային մասը:

Այսօր երեկոյան Ազգային Ժողովի նոր նախագահի եւ փոխնախագահի թեկնածությունները քննարկվելու նպատակով կուսակցության գործադիր մարմնի եւ խորհրդի նիստեր է գումարելու Հայաստանի հանրապետական կուսակցությունը: Նիստը նախագահելու է Սերժ Սարգսյանը:

ՀՀԿ-ում որոշում է կայացվել, Սամվել Նիկոյանը կգլխավորի խորհրդարանը, իսկ փոխնախագահ է նշանակվելու ՀՀԿ խմբակցության քարտուղար Էդուարդ Շարմազանովը:

Ոստիկանությունից  հաղորդում են, որ նոյեմբերի 29-ին՝ ժամը 18.45-ին, ոստիկանության Մալաթիայի բաժնի ծառայողները, գողություն կատարելու կասկածանքով բերման են ենթարկել 57 տարեկան երկու կանանց:

Պարզվել է, որ նրանք սեպտեմբերի 28-ին Օգանովի փողոցում գտնվող հագուստի խանութում գնումներ կատարող մի կնոջ պայուսակից գողացել են վերջինիս դրամապանակը, որի մեջ եղել է 53.000 դրամ, բանալիներ, բանկի անդորրագիր և այցեքարտեր:

Շինարարական աշխատանքների հետ կապված, ս.թ. դեկտեմբերի 1-ին ժամը 8.00- ից մինչև դեկտեմբերի 2-ը ժամը 8.00-ն կդադարեցվի Էրեբունի վարչական շրջանի Էրեբունի, Ռոստոմյան, Ս.Դավիթ, Այվազովսկի, Տիտոգրադյան, Ավանեսով, Խաղաղ Դոն, Ազատամարտիկներ, Աթոյան, Մուրացան, Բելինսկու, Բուռնազյան, Գ.Մահարի, Նուբարաշեն, Դաշտենց, Գաջեգործներ, Սուվորովի, Լ.Մելիքով, Չեռնիշևսկի, Լոմոնոսով, Թորամանյան, Կռիլով, Սոֆիայի փողոցների, Նոր Արեշ 1-50 փողոցների ու նրբանցքների, Վարդաշեն 1-12 փողոցների, Արեշ 2 ենթակայանի ու հարակից արտադրական տարածքների, Նոր Խարբերդի այգեգործական թաղամասի, Էրեբունի բժշկական կենտրոնի ու հարակից տարածքների ջրամատակարարումը: