Ընդդիմադիր Հայ ազգային կոնգրեսն այսօր` մարտի 22-ին, ժամը 16:50-ին-ին Կենտրոնական ընտրական հանձնաժողով է ներկայացրել իր համամասնական ընտրացուցակը: Այն ԿԸՀ է ներկայացրել Հայ ազգային կոնգրեսի լիազոր ներկայացուցիչ Մանուշակ Պետրոսյանը: Նրա խոսքով, իրենց համամասնական ցուցակում կա 120 անուն: 120-րդ տեղում ՀԺԿ-ական Գրիգոր Հարությունյանն է:

Հայ ազգային կոնգրեսի ընտրացուցակը գլխավորում է Հայաստանի առաջին նախագահ Լևոն Տեր-Պետրոսյանը: Առաջին հնգյակում ընդգրկված են նաև ՀԺԿ նախագահ Ստեփան Դեմիրճյանը, «Հանրապետություն» կուսակցության քաղխորհրդի նախագահ Արամ Սարգսյանը, ՀՀՇ վարչության նախագահ Արամ Մանուկյանը, ՀԱԿ գրասենյակի համակարգող Լևոն Զուրաբյանը:

Հայ ազգային կոնգրեսը թեկնածուներ է ներկայացրել նաև մեծամասնական ընտրակարգով: Մասնավորապես առաջադրվել են Վլադիմիր Կարապետյանը (թիվ 2 ընտրատարածք), Արամ Մանուկյանը (թիվ 4), Վահագն Խաչատրյանը (թիվ 8), Լևոն Զուրաբյանը (թիվ 9), Ռազմիկ Պետրոսյանը (թիվ 14), Մկրտիչ Սափեյանը (թիվ 15), Սասուն Միքայելյանը (թիվ 25) և այլք:

«Բարգավաճ Հայաստան» կուսակցությունն, այսօր` մարտի 22-ին, Հայաստանի Կենտրոնական ընտրական հանձնաժողով է ներկայացրել համամասնական կարգով պատգամավորների թեկնածուների ցուցակը, որով մասնակցելու է մայիսի 6-ին կայանալիք խորհրդարանական ընտրություններին:

ԲՀԿ համամասնական ցուցակը ԿԸՀ ներկայացրեց կուսակցության նախընտրական շտաբի քարտուղար Ռուբեն Մանուկյանը:

Կուսակցության քաղխորհուրդը դեռ մարտի 20-ի երեկոյան հաստատել է իր համամասնական ցուցակը, որի առաջին 5-յակն ունի հետեւյալ տեսքը.

1 Գագիկ Ծառուկյան

2. Վարդան Օսկանյան

3. Վարդան Վարդանյան

4. Գուրգեն Արսենյան

5. Սամվել Բալասանյան

ԲՀԿ համամասնական ցուցակում ընդգրկված է 165 մարդ:

ԲՀԿ-ն ՀՀԿ-ի ու ՕԵԿ-ի հետ միասին իշխող կոալիցիայի կազմում է: Կուսակցության առաջնորդը հայտնի գործարար Գագիկ Ծառուկյանն է:

ԲՀԿ-ի նախընտրական կարգախոսն է. «Հավատա, վստահիր, պահանջիր»:

ԲՀԿ-ն մեծամասնական ընտրակարգով եւս թեկնածուներ կառաջադրի տարբեր ընտրատարածքներում:

Ներկա խորհրդարանում ԲՀԿ-ն ունի 29 պատգամավոր: Կուսակցությունն ունի 3 նախարարական պորտֆել եւ ԱԺ փոխխոսնակի պաշտոնը:

Մարտի 20-ին, ժամը 15-ի սահմաններում, թիվ 33 երթուղու «Գազել» մակնիշի ավտոմեքենան Երևանի Ազատության պողոտայում բախվել է «ՎԱԶ-2107» և «ԲՄՎ-500» մակնիշի ավտոմեքենաների:Բախման հետևանքով երթուղայինը կողաշրջվել է. 3 ուղևորներ ստացել են մարմնական վնասվածքներ: Կատարվում է քննություն:

Ինչպես հայտնում է RIA Novosti-ի գործակալությունը,   «Ռոսավիացիայի» ղեկավար Ալեքսանդր Ներադկոն հայտարարել է, որ «Արմավիա» ավիաընկերությունն ամբողջությամբ փակել է «Ռոսավիացիային» ունեցած դեկտեմբեր ամսվա պարտքը` կապված աերոնավիգացիոն ծառայության հետ:

Ընդհանուր առմամաբ «Արմավիան» վճարել է 178 հազար դոլար:

Ներադկոյը նաև ասել է, որ  «Արմավիան» մարելով պարտքը հնարավորություն է ստանում այսուհետ ևս իրականացնել թռիչքներ դեպի Ռուսաստան: Նա նաև նկատել է, որ հայկական ավիափոխադրող ընկերության ընթացիկ պարտքը ներկայում՝ կազմում է 354 հազար դոլար: Այս մասին հայտնում է Intetfax-ը:

Հիշեցնենք, որ մարտի 6-ից «Ռոսավիացիան» աերոնավիգացիոն ծառայության պարտքերի պատճառով ընկերությունը  «Արմավիային» արգելել էր թռիչքներ իրականացնել դեպի Ռուսաստան: Իսկ  «Արմավիան» ռուսական ավիագերատեսչությանը նամակ է հղել` խոստանալով վճարել դեկտեմբերյան պարտքը մինչև մայիսի 20-ը:

Դրանից հետո «Ռոսավիացիան» վերսկսել էր ընկերությանը ծառայությունների մատուցումը և թույլատրել էր մինչև մարտի 20-ը իրականացնել թռիչքներ դեպի Ռուսաստան:

Մարտի 20-ի գիշերը ոստիկանության Երևան քաղաքի վարչության հերթապահ մասում ահազանգ էր ստացվել, որ Աբովյան փողոցի թիվ 3 հասցեում գտնվող «Ալեն-Էլեն» դիսկո-ակումբում նռնակ են պայթեցրել:Նույն օրը, ժամը 02.50-ին, հիվանդանոցից հաղորդում է ստացվել, որ շնչուղիների այրվածքներով բուժօգնության են տեղափոխվել 7 անձինք:Ոստիկանության ծառայողների ձեռնարկած օպերատիվ-հետախուզական միջոցառումներով պարզվել է, որ ակումբի հաճախորդ Վարդան Դեմիրճյանը ժամը 01.30-ի սահմաններում  իր մոտ եղած նռնակը նետել է ակումբի մուտքի ուղղությամբ, ինչի հետևանքով տեղի է ունեցել պայթյունը:Նույն օրը, ժամը 08.00-ի սահմաներում, ոստիկանության ծառայողները Արգավանդ գյուղի «Օջախ» ռեստորանային համալիրի մոտից  ոստիկանության Կենտրոնականի բաժին բերման են ենթարկել 1983 թ. ծնված Վարդան Դեմիրճյանին, որի մոտից հայտնաբերվել է գաղտնի փականով դանակ:Վարդան Դեմիրճյանը ձերբակալված է:Հարուցվել է քրեական գործ ՀՀ քրեական օրենսգրքի 34-104 հոդվածի 2-րդ մասի 2-րդ և 6-րդ կետերի, 185 հոդվածի 2-րդ մասի 1-ին կետի, 235 հոդվածի 1-ին մասի հատկանիշներով:Դեպքի հանգամանքները պարզվում են: Քննությունը վարում է ոստիկանության Կենտրոնի քննչական բաժինը:

Թերթը գրում է, որ մինչ բոլոր կուսակցությունները զբաղված են իրենց համամասնական ցուցակների կազմմամբ, «Օրինաց երկիր» կուսակցությունը պատրաստվում է մեծ շուքով նշել իր 15-ամյակը: «Եվ որոշել է խորհրդանշական թվով` 15 հազար ՕԵԿ-ականներ հրավիրել միջոցառմանը, որը կայանալու է Մարզահամերգային համալիրում, եւ որին մասնակցելու է նաեւ Սերժ Սարգսյանը: Իսկ նախօրեին կայացած քաղխորհրդի նիստում ՕԵԿ-ն ավելացրել է փոխնախագահների թիվը` 2-ից 4-ի: Հեղինե Բիշարյանին եւ Մհեր Շահգելդյանին ավելացել են նաեւ Արմեն Երիցյանն եւ Հովհաննես Մարգարյանը: Ի դեպ, ՕԵԿ ցուցակը կազմված է լինելու հետեւյալ հաջորդականությամբ. Արթուր Բաղդասարյան, Հեղինե Բիշարյան, Արմեն Երիցյան, Սերգո Կարապետյան եւ Խաչիկ Հարությունյան»,- գրում է «Հրապարակ»-ը:

ԱԺ պատգամավոր Հովհաննես Սահակյանը հայտնել է, որ  ՀՀԿ խորհուրդը Մուշեղ Լալայանին ընտրել է կուսակցության փոխնախագահի պաշտոնում:  Մարտի 18-ին կայացած խորհրդի նիստում որոշում է կայացվել ավելացնել ՀՀԿ փոխնախագահների թիվը և  հասցնել 6-ի:

Հիշեցնենք, որ մարտի 11-ին կայացած ՀՀԿ 132 հոգանոց խորհուրդը կառավարության տան նիստերի դահլիճում ընտրել էր փոխնախագահներ և  հանձնաժողովների նախագահներ: Մուշեղ Լալայանն այդ ժամանակ ընտրվել էր գաղափարական հանձնաժողովի նախագահ:

Հայաստանի նախագահ Սերժ Սարգսյանը մի շարք օրենքներ է ստորագրել:

Մասնավորապես, Ազգային ժողովի ընդունած «Ավիացիայի մասին» ՀՀ օրենքում լրացումներ եւ փոփոխություններ կատարելու մասին, «Ավտոմոբիլային տրանսպորտով վտանգավոր բեռներ եւ չվնասազերծված տարաներ փոխադրելու մասին», «Հողի հարկի մասին» ՀՀ օրենքում լրացում կատարելու մասին, «ՀՀ քաղաքացիական օրենսգրքում լրացում կատարելու մասին», «ՀՀ հողային օրենսգրքում լրացումներ եւ փոփոխություններ կատարելու մասին» ՀՀ օրենքները: