Երևանի քաղաքապետ Տարոն Մարգարյանը և Խորհրդային Միության ու Հայաստանի Հանրապետության ժողովրդական արտիստուհի Վարդուհի Վարդերեսյանը հանդիսավորությամբ մայիսի 2-ին բացել են Վահրամ Փափազյանի կիսանդրին:
Կիսանդրու բացմանը ներկա են եղել դերասաններ, արվեստագետներ, երևացիներ:
Կիսանդրու հեղինակ Լևոն Թոքմաջյանը շնորհակալություն է հայտնել քաղաքապետին մեծ աջակցության համար: Քանդակագործն ընդգծել է, որ կիսանդրին կերտել է որպես արտիստի երկրպագու և հավելել, որ Փափազյանի հուշարձանը ստեղծելը իր վաղեմի մտադրություն է եղել, որը այսօր իրականացավ քաղաքային իշխանությունների անմիջական աջակցության շնորհիվ:
Վահրամ Փափազյանի կիսնդրին կանգնեցվել է Փափազյան և Կոմիտաս փողոցների խաչմերուկում:

Այսօր կառավարության  տեղի է ունեցել ՀՀ կառավարության հերթական նիստը, որը վարել է ՀՀ վարչապետ Տիգրան Սարգսյանը։

Ի կատարումն ՀՀ Նախագահի` 2012 թ. ապրիլի 23-ի «2012 թ. գարնանային զորակոչ անցկացնելու և զորացրում կատարելու մասին» հրամանագրի կառավարությունը որոշել է զորակոչի ընդհանուր ղեկավարումն ապահովելու նպատակով ստեղծել հանրապետական զորակոչային հանձնաժողով, զորակոչի անցկացման աշխատանքի համակարգման նպատակով` մարզային (Երևանի քաղաքային) զորակոչային հանձնաժողովներ, հաստատել կենտրոնական բժշկական հանձնաժողովի կազմը։

Կհիմնվեն այգիներ, կստեղծվի գինու և կոնյակի արտադրություն

ՀՀ կառավարության որոշմամբ «Գոլդն գրեյպ Արմաս» ՍՊԸ կողմից 300 մլն դրամը գերազանցող ապրանքների ներմուծման դեպքում հաշվարկված ԱԱՀ գումարի վճարման ժամկետը հետաձգվել է մինչև 2013 թ. փետրվարի 1-ը։ Ժամանակացույցի վերանայման պատճառ են դարձել ինչպես եղանակային պայմանները, այնպես էլ ներմուծվելիք ապրանքների ցանկի փոփոխությունը։ 6.6 մլրդ դրամ ներդրումային ծրագրով նախատեսվում է Արագածոտնի մարզի մոտ 180 հա տարածքում ստեղծել խաղողի աճեցման և վերամշակման, գինու և կոնյակի արտադրություն, ինչպես նաև ագրոտուրիզմի զարգացման ենթակառուցվածքներ, մոտ 80 աշխատատեղ։«Իսկապես տպավորիչ ծրագիր է, — այս առնչությամբ ասել է կառավարության ղեկավարը։ — Այսօր մեծ թափով կառուցվում է ժամանակակից գործարանը։ Այն օրինակելի է լինելու այլ տնտեսությունների համար, որոնք տեսնելու են, թե ինչ մշակույթ է ներդրվում գինեգործության ոլորտում։ Կարծում եմ, որ այս փորձը կտարածվի գինեգործական այլ ընկերություններում ևս, որովհետև բարձրացվում է արտադրության որակը։ Իհարկե, շատոյի սկզբունքով գինու արտադրությունը հնարավորություն է տալու, որպեսզի այդ գինին ամբողջությամբ իրացվի։ Սա մեր հաջողված ծրագրերից է»։
«Հայաստանի կույրերի միավորում» հաշմանդամների հասարակական կազմակերպության անդամ հանդիսացող ընկերությունների կանոնադրական գործունեության իրականացման արդյունքում հաշվարկված (հաշվարկվելիք) ԱԱՀ-ի և սոցապահովության վճարի գծով մուծված գումարները փոխհատուցելու նպատակով գործադիրը հատկացրել է ավելի քան 55 մլն դրամ։
Նախկինում ընդունած իր երեք որոշումներում կատարելով փոփոխություններ, կառավարությունը նախատեսում է կարգավորել միջազգային բեռնափոխադրում իրականացնող ավտոտրանսպորտային միջոցների թվային տախոգրաֆի քարտերի տրամադրման համար պետական տուրքի վճարի գանձման գործընթացը, մեկ տեղում կենտրոնացնել տնտեսվարողներին մատուցվող միանման ծառայությունները։
Կառավարությունն իր նիստում որոշել է ՀՀ օրենսդրությամբ սահմանված կարգով և «Հազարամյակի Մարտահրավեր Հիմնադրամ-Հայաստան» ծրագրի փակման պլանի համաձայն լուծարել «ՀՄՀ-Հայաստան» ՊՈԱԿ-ը։
Հավանություն է տրվում ներդրումային ծրագրին

Այսօր ՀՀ  կառավարության հերթական նիստի ժամանակ  գործադիրը

հավանություն է տվել «Հայկական բերքի առաջմղման կենտրոն» ՓԲԸ կողմից ներկայացված Նորագավիթ թաղամասին հարող տարածքում ջերմատների կառուցման և զարգացման ներդրումային ծրագրին։ Հաջորդ որոշմամբ, հիմք ընդունելով «Հայկական բերքի առաջմղման կենտրոն» ՓԲԸ ներկայացրած նշված ներդրումային ծրագիրը, գործադիրը համաձայնություն է տվել Երևանի քաղաքապետի` Նորագավիթ թաղամասին հարող տարածքում ժամանակակից տեխնոլոգիայով ջերմատների կառուցման նպատակով Երևան համայնքի սեփականությունը հանդիսացող ընդհանուր 69.83 հա հողամասի առանձին հողակտորների ուղղակի վաճառքի ձևով օտարման առաջարկությանը։ Սահմանվել է, որ ներդրումային ծրագրի պատասխանատուն և կառավարիչն է «Հայկական բերքի առաջմղման կենտրոն» ՓԲԸ-ն, որը կարող է ներդրողներ ընտրել մինչև 2014 թ. դեկտեմբերի 1-ը։ Երեք տարվա ընթացքում նախատեսվում է կատարել շուրջ 35-40 մլրդ դրամի ներդրում, ստեղծել 1500-2000 աշխատատեղ։ «Սա որակապես նոր ծրագիր է՝ նոր մոտեցումներով և ֆինանսական մեխանիզմներով, — ասել է վարչապետ Տիգրան Սարգսյանը։ — Պետություն-մասնավոր համագործակցությամբ մենք ստեղծում ենք հնարավորություն, որպեսզի տարբեր մասնավոր ընկերություններ ներդրում կատարեն և մասնակցեն Հայաստանի Հանրապետության ջերմոցային տնտեսության զարգացմանը։ Կան միջազգային գործընկերներ, որոնք Հայաստան են բերելու եվրոպական լավագույն փորձը։ Դա էլ հնարավորություն է տալու, որ այդ ծրագրի դրական փորձը տարածենք մարզերում` ստեղծելով լրացուցիչ հազարավոր աշխատատեղեր»։ 
ՀՀ կառավարությունը փոփոխություններ և լրացումներ է կատարել բարձրաստիճան պաշտոնատար անձի և իր ընտանիքի անդամների եկամուտների հայտարարագրմանը վերաբերող ավելի վաղ ընդունած որոշման մեջ, ինչի շնորհիվ հստակեցվել և կոնկրետացվել են հայտարարագրման ենթակա տվյալների ցանկն ու դրանց բովանդակությունը, ընդլայնվել հրապարակման ենթակա հայտարարագրերի շրջանակը։
Գործադիրը ՀՀ ԿԱ պետգույքի կառավարման վարչությանը թույլատրել է Երևան քաղաքի Արցախի 4-րդ նրբանցքի N10/2 հանրակացարանային մասնաշենքի սենյակներից մեկը սեփականաշնորհել 1988-1992 թթ. Ադրբեջանի Հանրապետությունից բռնագաղթած և ՀՀ քաղաքացիություն ստացած Սեդա Բաբայանցին։

Բարելավվում է իրավական դաշտը

ՀՀ կառավարությունը հավանություն է տվել «Բյուջետային համակարգի մասին» և «Գանձապետական համակարգի մասին» ՀՀ օրենքներում փոփոխություններ և լրացումներ կատարելու օրենքների նախագծերի փաթեթին, որի հիմնական նպատակը պետական ֆինանսական ռեսուրսների արդյունավետության բարձրացումն է` այդ միջոցների օգտագործման հասցեականության, նպատակայնության, ինչպես նաև տնօրինվող միջոցների և դրանց հաշվին կատարվող ծախսումների համապատասխան բյուջեներում ամբողջական արտացոլման ճանապարհով։
Նիստում հավանություն է տրվել Պետական գույքի մասնավորեցման 2006-2007 թթ. ծրագրի կատարման 2011 թ. տարեկան հաշվետվությունը հաստատելու ՀՀ օրենքի նախագծին։
Նշված օրինագծերը սահմանված կարգով կներկայացվեն ՀՀ Ազգային ժողով։
Այլ որոշումներ

ՀՀ կառավարությունը համաձայնություն է տվել Հայաստանի Հանրապետության և Ավստրիայի Հանրապետության կառավարությունների միջև զարգացմանն ուղղված համագործակցության համաձայնագրի կնքման առաջարկությանը։ Փաստաթուղթը ֆինանսավորվելու է դրամաշնորհային հիմունքով` իբրև զարգացմանն ուղղված պաշտոնական օժանդակություն։
Գործադիրն ընդունել է Արմավիրի մարզի Գրիբոյեդովի համայնքի ղեկավարի լիազորությունը վաղաժամկետ դադարեցնելու, համայնքի ղեկավարի արտահերթ ընտրություն նշանակելու, անցկացնելու և ընտրության նախապատրաստման ու անցկացման ծախսը ֆինանսավորելու որոշում։
Կառավարությունն այլ կատեգորիա է փոխադրել Տավուշ մարզի Աչաջուրի, Կոտայքի մարզի Գողթի գյուղական համայնքների հողերի մի մասը` համապատասխանաբար հասարակական կառուցապատման (հյուրանոցային համալիր) և ջերմոցային տնտեսության կառուցման համար։

«Առաջին լրատվական» կայքը հաքերային հարձակման է ենթարկվել, որի վերաբերյալ կայքի խմբագրակազմը հայտարարություն է տարածել:

«Հարգելի գործընկերներ եւ www.1in.am «Առաջին լրատվական»-ի հարգելի ընթերցողներ,

Երեկ` մայիսի 2-ին, ժամը 15:00-ից հետո մեր կայքը աննախադեպ հակերային հարձակման է ենթարկվել, որի արդյունքում պաշտպանող համակարգը արգելափակել է կայքի հասանելիությունը` անվտանգության նկատառումներից ելնելով:

Մեր քաղաքական ուրույն գիծը համառորեն հետապնդելու ճանապարհին ո՛չ անթաքույց սպառնալիքները եւ ո՛չ իսկ գործադրված ֆիզիկական բռնությունները չկարողացան մեզ լռեցնել: Մնում էր վերջին քստմնելի միջոցը` 1in.am-ը ենթարկել աննախընթաց հարձակման: Առաջիկա շատ կարճ ժամանակահատվածում մեր մասնագետները Հայաստանում եւ Միացյալ Նահանգներում կվերականգնեն կայքի բնականոն աշխատանքը:

Շնորհակալություն ենք հայտնում մեր մշտական ընթերցողներին հոգատարության համար, չլռող հեռախոսազանգերի եւ քաջալերանքների համար:

Հատկանշական է, որ հայաստանյան առաջատար լրատվամիջոցների առաջին եռյակում գտնվող լրատվական կայքի նկատմամբ հակերային հարձակումը իրականացվեց խորհրդարանական ընտրություններից երեք օր առաջ եւ մամուլի ազատության նախօրեին»,-ասված է տարածված հայտարարության մեջ:

Ապրիլի 28-ին Իջևան քաղաքում տեղի ունեցավ Տավուշի մարզի ընդհանուր իրավասության դատարանի Իջևանի նստավայրի նոր վարչական շենքի հանդիսավոր բացումը: Բացման արարողությանը մասնակցում էին ՀՀ փոխվարչապետ, տարածքային կառավարման նախարար Արմեն Գևորգյանը, Վճռաբեկ դատարանի նախագահ Արման Մկրտումյանը, Արդարադատության նախարարի առաջին տեղակալ Գրիգոր Մուրադյանը, Տավուշի մարզպետ Արմեն Ղուլարյանը, ՀՀ դատարանների նախագահները և այլ բարձրաստիճան պաշտոնյաներ:

ՀՀ վճռաբեկ դատարանի նախագահ Արման Մկրտումյանն իր ողջույնի խոսքում ասաց . «Բոլոր ներկաները քաջատեղյակ են, որ անկախ դատական իշխանության կայացման խնդիրը գտնվում է Հայաստանի Հանրապետության Նախագահի ամենօրյա ուշադրության և հոգատարության ներքո` անգամ համաշխարհային ֆինանսական ճգնաժամի ներկա պայմաններում, դատարանների համար նոր շենքեր կառուցելու համար տրամադրվում են զգալի ֆինանսական միջոցներ: Դատարանի նորակառույց շենքի բացումը դրա վառ ապացույցն է: Այսօր մենք արեցինք ևս մեկ հետևողական քայլ անկախ դատական իշխանության կայացման ճանապարհին»:

Ողջույնի խոսքով հանդես եկան նաև Տավուշի մարզպետ Արմեն Ղուլարյանն ու Տավուշի մարզի ընդհանուր իրավասության դատարանի նախագահ Սամվել Մարդանյանը: Նորակառույցը համապատասխանում է դատարանների անվտանգության և նախագծման ժամանակակից չափանիշներին: Դատարանի մակերեսը նախատեսված է երեք դատավորի համար: Ունի կահավորված երեք դատական դահլիճ: Վարկային ծրագրի շրջանակներում ձեռք են բերվել ու տեղադրվել դատական դահլիճների կահավորանքը, գրասենյակային կահույքը, մուտքերի հսկման համակարգը, համակարգչային տեխնիկան և համակարգչային ցանցը:

Հիշեցնենք, որ Տավուշի մարզի ընդհանուր իրավասության դատարանի Իջևանի նստավայրի նախկին վարչական շենքը չէր համապատասխանում տեխնիկական և անվտանգության պահանջներին: Անբավարար մակերես ունեցող այդ շենքի վերակառուցման անհնարինության պատճառով Համաշխարհային բանկի հետ պայմանավորվածություն էր ձեռք բերվել հնի փոխարեն կառուցել նորը: Շինարարական աշխատանքներն սկսվել են 2011 թվականին  և տևել են շուրջ ութ ամիս: Շինարարության համար ընդհանուր առմամբ ծախսվել է 599.263.000 ՀՀ դրամ:

Մինչ այսօր դատական իշխանության համար կառուցվել կամ վերակառուցվել է 37 նոր շենք, որոնցից 30-ը` Համաշխարհային բանկի և պետբյուջեի միջոցներով, իսկ 7-ը` ՀՀ դատական դեպարտամենտի կողմից` պետբյուջեի միջոցներով:

Ներկայումս կառուցվում են դատարանի երկու նոր շենքերը:

Ապրիլի 30-ին, ժամը 20.00-ի սահմաններում, «Մերսեդես-Բենց C-280» մակնիշի ավտոմեքենան Ագարակ-Մեղրի ճանապարհի 11-րդ կմ-ին  դուրս է եկել ճանապարհի բանուկ մասից և ընկել Մեղրի գետը:

Վարորդը մարմնական վնասվածքներով տեղափոխվել է հիվանդանոց:

Կատարվում է քննություն:

Լույս է տեսել Հայոց ցեղասպանության թանգարան – ինստիտուտի և Բեյրութում լույս տեսնող «Ազդակ» օրաթերթի համատեղ պատրաստած «Ազդակ բացառիկ» հոդվածների ժողովածուն՝ նվիրված Մեծ Եղեռնի 97-րդ տարելիցին:

«Ազդակ բացառիկ»-ում տեղ են գտել նաև ՀՑԹԻ գիտաշխատողներ՝ պ.գ.թ Սուրեն Մանուկյանի «Հայոց ցեղասպանությունը ռուս զինվորի աչքերով», պ.գ.թ. Արամ Միրզոյանի «Ֆրիտյոֆ Նանսենի գործունեությունը հայ գաղթականներին Խորհրդային Հայաստան հայրենադարձելու ուղղությամբ», պ.գ.թ. Թեհմինե Մարտոյանի «Զմյուռնիայի տարագիրների զանգվածային վերաբնակեցումը Հունաստանում», պ.գ.թ. Նարինե Մարգարյանի «Հայ տարագիրների ինտեգրումը Սիրիայի սոցիալ-տնտեսական կյանքում Հայոց ցեղասպանությունից հետո (1915-1925թթ.)», պ.գ.թ. Գևորգ Վարդանյանի «Օսմանյան տիրապետության դեմ հայ-հունական հանագործակցության փորձերը» և ՀՑԹԻ հայցորդ Հասմիկ Գրիգորյանի «Մշակութային մոդելները որպես ամբոխի վարքի կազմակերպման ազդակներ Հայոց ցեղասպանության համատեքստում» հոդվածները:

Պարարվեստի միջազգային օրվա նախօրյակին Երևանի քաղաքապետ Տարոն Մարգարյանը հյուրընկալել է Հաայստանի պարարվեստի գործիչների:

Ինչպես տեղեկանում ենք Երևանի քաղաքապետարանի տեղեկատվության և հասարակայնության հետ կապերի վարչությունից, քաղաքապետը շնորհավորել է հյուրերին մասնագիտական օրվա կապակցությամբ և հայտնել քաղաքապետարանի աջակցության պատրաստակամությունը:

«Ձեր վաստակն իրապես բարձր գնահատանքի է արժանի: Քաղաքապետարանը պատրաստ է իր հնարավորւթյունների սահմանում օժանդակել ոչ միայն համաքաղաքային ու համապետական միջոցառումների շրջանակում, այլ նաև ձեր նախաձեռնություններում: Մեր հնարավոր համագործակցության արդյունքում վստահ եմ Երևանի մշակութային կյանքում տպավորիչ փոփոխություններ կունենանք: Շնորհավորում եմ ձեզ ու նաև շնորհակալություն հայտնում այն պատրաստակամության համար, որ վերջերս դրսևորեցիք՝ Երևանը գրքի համաշխարհային մայրաքաղաք հռչակվելու տոնակատարություններին տպավորիչ մասնակցությամբ»,- նշել է քաղաքապետ Տարոն Մարգարյանը:

Հյուրերը իրենց հերթին շնորհակալություն են հայտնել քաղաքապետին հյուրընկալության, ինչպես նաև պարարվեստ հանդեպ դրսևորած ուշադրության համար:

ՀՀ կրթության և գիտության նախարար Արմեն Աշոտյանի գլխավորած պատվիրակությունը պաշտոնական այցով գտնվում է Բուխարեստում՝ մասնակցելու Բոլոնիայի գործընթացին անդամակից երկրների նախարարական գագաթաժողովին:

Ապրիլի 26-ին նախարար Արմեն Աշոտյանը պաշտոնապես ընդունել է Բոլոնիայի գործընթացի քարտուղարությունը՝ 2012-2015 թվականների համար: Բոլոնիայի գործընթացին անդամակից երկրների նախարարական գագաթաժողովը 2015 թվականին կանցկացվի Երևանում:

Արտակարգ իրավիճակների նախարարություն այսօր ժամը 01.19-ին ահազանգ է ստացվել, որ Սևան-Գավառ ավտոճանապարհի 8-րդ կմ-ում` Լճաշեն գյուղի մոտ տեղի է ունեցել ավտոպատահար, կան տուժածներ և անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ: Դեռևս չպարզված հանգամանքներում «ԳԱԶ-24» մակնիշի 27 ԼԼ 328 ավտոմեքենան դուրս է եկել ճանապարհի երթևեկելի մասից և կողաշրջվել:

Մինչ հրշեջ-փրկարարների և «1-03» ծառայության աշխատակիցների ժամանումը` տեղի ուժերով Սևանի կենտրոնական հիվանդանոց են տեղափոխվել Գեղարքունիքի մարզի Կարճաղբյուր գյուղի բնակիչներ` 1986 թ. ծնված Լևոն Գևորգյանը և 1989 թ. ծնված Մայիս Գևորգյանը:

Ըստ բժիշկների` տուժածների առողջական վիճակը բավարար է:

Այսօր՝ ապրիլի 26-ին, ժամը 16։30-ի սահմաններում ավտովթար է տեղի ունեցել Արագածոտնի մարզում։ Ինչպես դեպքի վայրից Tert.am–ին հայտնում է ֆոտոլրագրող Գագիկ Շամշյանը, «Ռենջ Ռովեր» մակնիշի 08 ՏՏ 990 համարանիշի ավտոմեքենայի վարորդը Երևան-Գյումրի ավտոճանապարհի 84 կմ հատվածում դուրս է եկել ճանապարհի երթևեկելի գոտուց և հայտնվել ձորակում։

Դեպքի վայրում հավաքվածները ֆոտոլրագրող Գագիկ Շամշյանին հայտնել են, որ մինչև ձորում հայտնվելը «Ռենջ Ռովերի» վարորդը բախվել է Զարզանդ Հոլիկյանի վարած «ՎԱԶ 2109» մակնիշի 06 ՍՕ 988 համարանիշի ավտոմեքենային։

Վթարի հետևանքով «ՎԱԶ 2109»–ի ուղևոր 22–ամյա Հասմիկ Մարտիրոսյանը առաջին բժշկական հետազոտման նպատակով դիմել է Գյումրիի Գյուլբենկյանի անվան բժկական կենտրոն։

Հավաքվածները Գ. Շամշյանին նաև պատմել են, որ «Ռենջ Ռովերը» պատկանում է ԱԺ պատգամավոր ՀՀԿ–ական Աշոտ Աղաբաբյանին, ով այդ պահին եղել է ավտոմեքենայում։

Ակայն մեքենան վարել է նրա վարորդը։ Դեպքի վայրում են Ճանապարհային ոստիկանության 2-րդ սպայական գումարտակի 2–րդ վաշտի 1-ին դասակի աշխատակիցները՝ հրամանատար Կարեն Աբրահամյանի և դասակի հրամանատարի տեղակալ Սուքիաս Գրիգորյանի գլխավորությամբ։

Տեղում է նաև Ոստիկանության քննչական գլխավոր վարչության Արագածոտնի մարզի քննչական բաժնի Թալինի քննչական բաժանմունքի քննիչը։

Tert.am