ՀՀ արտակարգ իրավիճակների նախարարությունը տեղեկացնում է, որ Հայաստանում սպասվող ուժեղ երկրաշարժի մասին տարածվող լուրերը իրականությանը չեն համապատասխանում։ Կոչ ենք անում մարդկանց պահպանել հանգստություն և ուշադրություն չդարձնել խուճապարարների տարածած ստահոդ լուրերին:

ՀՀ ԱԻՆ ՍՊԱԾ գործակալության պետ Հրաչյա Պետրոսյանի խոսքերով` աշխարհի լավագույն սեյսմոլոգիական կենտրոններում, այդ թվում նաև` Հայաստանի ՍՊԱԾ համակարգում, իրականցվում են հետազոտություններ` ուժեղ երկրաշարժերի կարճաժամկետ կանխատեսումներ անելու ուղղությամբ, սակայն որպես բարդագույն գիտական խնդիր, այն դեռ լիարժեք լուծում չունի։ Այսինքն` այսօրվա դրությամբ ամբողջ աշխարհում ուժեղ երկրաշարժերի կարճաժամկետ կանխատեսում (վայրի, ժամանակի, ուժգնության և այլ տվյալների հստակ նշումով) չի արվում։

Հունիսի 16-ին առանձին շրջաններում, 17-ից 20-ը շրջանների զգալի մասում  առավելապես գիշերվա առաջին կեսին և օրվա երկրորդ կեսին սպասվում է կարճատև անձրև և ամպրոպ, ամպրոպի ժամանակ քամու ուժգնացում 15-20 մ/վրկ, առանձին շրջաններում հնարավոր է կարկուտ: Քամին հարավ-արևմտյան 2-7 մ/վրկ: Օդի ջերմաստիճանը 16-ից 19-ը  աստիճանաբար կնվազի 4-ից 6 աստիճանով:

Հունիսի 13-ին, ժամը 12.00-ին, ոստիկանության Արմավիրի բաժնի ծառայողները Շենավան գյուղի մի բնակաչի տան բակում կայանված չշահագործվող, «ԳԱԶ-21» մակնիշի ավտոմեքենայի զննությամբ բեռնախցիկից հայտնաբերել են պոլիէթիլենային պարկի մեջ լցված կանեփանման, սուր հոտ ունեցող, չորացված և մանրացված զանգված` մոտ 159.6 գ կշռով:
Ըստ տանտիրոջ հայտարարության՝ հիշյալ զանգվածը պատկանում է իրեն, պատրաստել է իր օգտագործման համար:
Հայտնաբերվածն ուղարկվել է փորձաքննության:
Կատարվում է հետաքննություն:

Հունիսի 15-ին ժամը 13:00-ին Մաշտոցի անվան պուրակում կկայանա անվանի ռեժիսոր  Գենադի Մելքոնյանի հուշատախտակի բացման արարողությունը:

Հայ կինոռեժիսոր,  սցենարիստ  Գենադի Իշխանի Մելքոնյանը  ծնվել է  1944թ.  օգոստոսի 12-ին   և  մահացել 2002թ. մայիսի 30-ին Երևանում:  1969թ. ավարտել է գեղարվեստաթատերական ինստիտուտը Վարդան Աճեմյանի ղեկավարությամբ:

Գենադի Մելքոնյան  արվեստագետին  բնորոշ  են   մեծ մարդասիրությունն, ազնվությունն  ու պատասխանատվության  զգացումը:

Գենադի Մելքոնյանի ֆիլմերում լսում ենք նախնիների կանչը, զգում անսահման սերն առ հայրենիք  և անշուշտ հարստանում նրա թողած բարության, սիրո անսպառ պաշարով: Ֆիլմերն առանձնանում են պատկերման հստակությամբ և ճշմարտացիությամբ, ազգային  ինքնատիպությամբ  և նուրբ հումորով:

1. “Թթենի” – Մոսֆիլմ,  Հայֆիլմ  1979թ.  (բազմաթիվ մրցանակներ միջազգային և համամիութենական փառատոներում)
2.  “Մոր տունը”  — կարճամետրաժ,  Հայֆիլմ- 1980թ.
3. “Անսպասելիորեն” – Մոսֆիլմ  1982թ.
4. “Կիրակի” – Հայֆիլմ 1985թ.
5. “Օդապարիկի օրը”  — Հայֆիլմ  1986թ.
6. “Խոսք” (կարճամետրաժ) – 1987թ.
7. “Բումերանգ”  երգիծական  ժողովածուում — Հայֆիլմ  1988-1990թթ.
8. “Արտիստը”, “Փորձ”, “Անակնկալ”, “Կտոր մը շաքար” — կարճամետրաժ ֆիլմերը
9. ”Արվեստը  կալանավայրում”, Լույս  կինոընկերություն 1998թ.
10.  “Հպում” – 2001թ.  Ստարտ և Բրևիս  կինոընկերություն
11. “Կորցված  որմնանկարների որոնումներում”   2002թ.  Լույս  կինոընկերություն

Գենադի Մելքոնյան — ռեժիսորի  վարպետությունն ասես յուրօրինակ  դաս լինի ժամանակակից  կինոմատոգրաֆիստների համար, իսկ հանդիսատեսի  համար`ամենապարզ ճշմարտության գիտակցման  ևս մի հնարավորություն` սեր առ մարդ արարած:

Գենադի Մելքոնյանի  ֆիլմերը հայ կինոարվեստի հարստությունն  են:

Ռեժիսորի տաղանդը,  ոգին և անհատականությունը պաշտողների, հանդիսատեսի և ընկերների մտքում և սրտերում  նրա արվեստը ապրում է հավերժ:

Հունիսի 15-ի առավոտյան ժամը 8:00-ից, ասֆալտապատման աշխատանքներով պայմանավորված, մինչև հունիսի 17-ի ժամը 20-ը երթևեկության համար փակ կլինի Մյասնիկյան պողոտայի մինչև Հերացի փողոց իջնող ճանապարհահատվածը:

Որպես այլընտրանքային ավտոճանապարհ վարորդներին առաջարկվում է  Նոր Նորք վարչական շրջանից դեպի փոքր կենտրոն երթևեկել  Դավիթ Բեկի ու Դավիթ Անհաղթի փողոցներով կամ Նորք-Մարաշ վարչական շրջանով անցնող ավտոճանապարհով:

Պատճառած ժամանակավոր անհարմարությունների համար հայցում ենք ձեր ներողամտությունը։

Երևանի քաղքապետարան

«Երևան Ջուր» ընկերությունը տեղեկացնում է իր հաճախորդներին և սպառողներին, որ վթարի վերացման աշխատանքների հետ կապված, ս.թ. հունիսի 14-ին ժամը 11.00-24.00 կդադարեցվի Կենտրոն վարչական շրջանի Սարյան փող. 2-24 զույգ համարների, Արաբկիր վարչական շրջանի Կոնդ թաղամասի, Կոմիտաս պող. 1-12, Բաղրամյան պող. 21-89, Քոչար փող. 1-10 համարների, Ջեյմս Բրայսի, Գյուլբենկյան, Գուլակյան, Կիևյան, Օրբելի, Երզնկյան, Պռոշյան, Ֆրիկ, Պարոնյան, Դեմիրճյան, Անտառային, Սարմեն, Քեռու, Բարբյուս, Սևաստոպոլյան, Կալենց, Սունդուկյան, Ա.Ավետիսյան, Այգեձոր, Սոսե փողոցների և հարակից տարածքների ջրամատակարարումը:

Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:

Հունիսի 11-ին, ժամը 18.00-ին, անհայտ ավտոմեքենայի վարորդը Ֆրիկի փողոցի թիվ 33 շենքի դիմաց վրաերթի է ենթարկել 54-ամյա մի կնոջ, որը հաջորդ օրը բուժօգնության է դիմել հիվանդանոց:Վարորդը դիմել է փախուստի: Կատարվում է քննություն:

…….

Հունիսի 12-ին, ժամը 18.00-ին, «Դեու»  մակնիշի ավտոմեքենայի վարորդը Մարգարյան փողոցի թիվ 23 հասցեի մոտ վրաերթի է ենթարկել Սեյրան Մարգարյանին, որը մարմնական վնասվածքներով տեղափոխվել է հիվանդանոց:

Հունիսի 11-ին, ժամը 22.20-ին, ոստիկանության Նաիրիի բաժնում  հաղորդում է ստացվել, որ «Աբովյան»  բժշկական կենտրոն է տեղափոխվել 27-ամյա Դավիթ Առաքելյանի դիակը:

Պարզվել է, որ նույն օրը, ժամը 21.50-ի սահմաններում, անհայտ մակնիշի  ավտոմեքենայի վարորդը Արգել-Նոր Գեղի ճանապարհի 5-րդ կմ-ին վրաերթի է ենթարկել Դ. Առաքելյանին  եւ դեպքի վայրից դիմել փախուստի:

Ձեռնարկվում են միջոցառումներ անհայտ մակնիշի ավտոմեքենան հայտնաբերելու ուղղությամբ, կատարվում է նախաքննություն:

Այսօր`  հունիսի 12-ին, ժամը 13 00-ին «Վարկած» մամուլի ակումբում՝ հասցեն Արշակունյաց 2, 4 հարկ, տեղի կունենա մամուլի ասուլիս.

Վճռաբեկ դատարանի նախագահի խորհրդական Սերգեյ Մարաբյանը կխոսի փաստաբանների գործադուլի և նրանց բարձրացրած հարցերի շուրջ:

«Մայրաքաղաքի բակերի բարեկարգումը անընդհատ աշխատանք է և պետք է խիստ հետևողականությամբ իրականացվի բոլոր վարչական շրջաններում»,- հերթական աշխատանքային խորհրդակցության ժամանակ շեշտել է Երևանի քաղաքապետ Տարոն Մարգարյանը: Ինչպես տեղեկանում ենք Երևանի քաղաքապետարանի տեղեկատվության և հասարակայնության հետ կապերի վարչության տարածած հաղորդագրությունից, քաղաքապետն այս համատեքստում հանձնարարել է ավարտել բակերի բարեկարգման աշխատանքներն ու օր առաջ բակերը հանձնել բնակիչներին. «Մենք հայտարարել ենք, որ առաջիկա տարիների ընթացքում պետք է հասնենք նրան, որ մայրաքաղաքի բոլոր բակերը լինեն բարեկարգ և, ծառայեն փոքրերին որպես խաղահրապարակ, իսկ մեծերի համար էլ լինեն հաճելի հանգստի գոտի: Բակային տարածքների բարեկարգումը պետք է լինի վարչական շրջանների ղեկավարների ամենօրյա ուշադրության կենտրոնում»,- նշել է Տարոն Մարգարյանը:

Զեկուցվել է, որ 2011 թվականի ընթացքում մայրաքաղաքի փողոցներում իրականացված ճաքալցման և ասֆալտբետոնե ծածկույթի վերականգնման աշխատանքներն անորակ և թերի կատարած կազմակերպությունները շարունակում են սեփական միջոցներով վերացնել ասֆալտբետոնե ծածկի թերությունները:

Քաղաքապետը հանձնարարել է ամենօրյա հսկողություն իրականացնել ասֆալտապատման աշխատանքների կատարման ընթացքին` խստորեն հետևելով սահմանված ժամանակացույցի պահպանմանն ու աշխատանքների որակին:

Մայրաքաղաքի վարչական շրջաններում շարունակվում են բազմաբնակարան շենքերի շքամուտքերի վերանորոգման աշխատանքները, որոնք իրականացվում են վարչական շրջաններ –համատիրություն համատեղ ծրագրի շրջանակում. «Խստորեն հետևեք կատարվող աշխատանքների ինչպես ծավալներին այնպես էլ որակին: Չստացվի այնպես, որ մի փոքրիկ անկյուն ներկելով համարեն, թե շքամուտք են վերանորոգել: Այս հարցում համագործակցեք նաև «Հայաստանի Էլեկտրական Ցանցեր» ընկերության հետ, որպեսզի նրանք էլ իրենց հերթին շքամուտքերում իրականացնեն մալուխային տնտեսության կարգավորման աշխատանքները: Կատարված աշխատանքի արդյունքը պետք է լիարժեք լինի»,-նշել է Տարոն Մարգարյանը:

Քաղաքապետի հանձնարարությամբ առաջիկայում կմեկնարկեն Հյուսիսային պողոտայի բարեկարգման, կանաչապատման և արտաքին լուսավորության ցանցի նորացման աշխատանքները, ինչի արդյունքում պողոտայում մոտ երեք անգամ կավելանան կանաչ տարածքները, կփոխարինվեն սալիկներն ու նոր լուծումներ կտրվի արտաքին լուսավորությանը: Հանձնարարվել է ծրագրին մասնակից դարձնել նաև պողոտայի տարածքում գտնվող օբյեկտների սեփականատերերին:

Այգիներում և պուրակներում գիշերային լուսավորություն ապահովելու նպատակով ևս հանձնարարվել է աշխատանքներին մասնակից դարձնել նաև տարածքները վարձակալած տնտեսվարողներին:

Զեկուցվել է, որ համապատասխան իրավական քայլեր են ձեռնարկվել պարտադիր բարեկարգման նորմերը չպահպանող մի շարք տնտեսավարող սուբյեկտների հետ վարձակալական պայմանագրերը դադարեցնելու ուղղությամբ:

Քաղաքապետը հանձնարարել է շարունակել հետևողական աշխատանքը մասնավոր այն ընկերությունների հետ, որոնք պատրաստակամություն են հայտնել ներդրումային ծրագրերի շրջանակում աջակցել մայրաքաղաքում գույքագրված և վերագործարկման ենթակա շատրվանների վերանորոգման հարցում:

Վարչական շրջանների տարածքներում իրականացվող ոռոգման համակարգի գույքագրման արդյունքում վարչական շրջաններից առաջարկություններ են ներկայացվել ինչպես կապիտալ, այնպես էլ ընթացիկ վերականգնման աշխատանքներ իրականացնելու ուղղությամբ: Խնդրին համապարփակ լուծում տալու նպատակով քաղաքապետը հանձնարարել է շարունակել գույքագրման աշխատանքները: Զեկուցվել է, որ նոր պոմպակայանի տեղադրման և մետրոպոլիտենի կայարաններում կուտակվող ջրային պաշարների օգտագործման միջոցով լուծվել է Տիգրան Մեծ պողոտայի կանաչ գոտիների ոռոգման հարցը:

Տրանսպորտի վարչության պետը զեկուցել է, որ շարունակվում է հասարակական տրանսպորտի սպասարկման որակի նկատմամբ ամենօրյա վերահսկողությունը: Արձանագրված խախտումների մասով կազմվել են վարչական արձանագրություններ: Նաև զեկուցվել է, որ մայրաքաղաքի երթուղիներում գործող ավտոբուսներում քաղաքապետի հանձնարարությամբ շարունակվում են WiFi կապով ապահովելու ուղղությամբ աշխատանքները:Տարոն Մարգարյանը հանձնարարել է WiFi կապով ապահովել նաև մայրաքաղաքի մարդաշատ վայրերը, այգիներն ու պուրակները:

Զեկուցվել է, որ գեղարվեստական խորհրուրդը հավանություն է տվել Կարա Բալայի արձանը Աբովյան փողոցում վերատեղադրելու հարցին: