ՀՀ վճռաբեկ դատարանի նախագահ Արման Մկրտումյանը, որը մեկնել է կարճատև արձակուրդի, այլևս չի վերադառնա իր պաշտոնին:

ՎԴ նա­խագահի ամենահավանական թեկնածուն Կենտրոնական ընտրական հանձնաժողվի նախագահ Տիգրան Մուկուչյանն է:

«Հայկական Վարկածի» տեղեկություններով, հենց Մուկուչյանն էլ կփոխարինի Արման Մկրտումյանին:

Ոստիկանությունում խոշտանգումների վերաբերյալ գործով ամբաստանյալներ, Երևանի վարչության Կենտրոնականի բաժնի քրեական հետախուզության բաժանմունքի օպերլիազորներ Խաչիկ Բախբուդարյանը և Արտակ Բարսեղյանը դատապարտվեցին 3 տարվա ազատազրկման՝նույնքան ժամանակով զրկվելով որոշակի պաշտոններ զբաղեցնելու իրավունքից:   Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի՝ դատավոր Մնացական Մարտիրոսյանի նախագահությամբ,այսօր հրապարկված դատավճռով նրանք մեղավոր ճանաչվեցին ՀՀ քր.օր.-ի  309-րդ հոդվածի 2 մասով և 314-րդ  հոդվածով՝ նախաքննությամբ ձեռք բերված ու դատաքննությամբ հետազոտված ապացույցներով հիմնավորված պաշտոնեական լիազորություններն անցնելը՝ մասնավորապես, խոշտանգումներ  և պաշտոնեական կեղծիք կատարելը:

Դատարանը միաժամանակ,կիրառելով համաներման մասին վերջերս ընդունված որոշումը, ամբաստանյալներին ազատեց հիմնական պատիժը՝ ազատազրկումը կրելուց, և նրանք ազատ արձակվեցին դատարանի դահլիճից:

«Փաստինֆո»-ի թղթակցի հետ զրույցում ամբաստանյալների պաշտպան, փաստաբան Լիպարիտ Սիմոնյանը հնարավոր համարեց դատավճռի բողոքարկումը վերաքննիչ դատարան:

Հիշեցնենք, որ ամբաստանյալների պաշտպաններ Լիպարիտ Սիմոնյանն ու Արայիկ Ալվանդյանը, պաշտպանական ճառում գտել էին, որ մեղադրանքն ապացուցված չէ, ամբաստանյալների գործողություններում բացակայում է հանցակազմը, ուստի պետք է կայացվի արդարացման դատավճիռ, իսկ մեղադրող կողմը՝ հակառակը, գտել էր, որ մեղադրանքը հինավորված է և միջնորդել էր ամբաստանյալներին դատապարտել 4-ական տարվա ազատազրկման՝ 2 տարով զրկելով  որոշակի պաշտոններ զբաղեցնելու իրավունքից:

Փաստինֆո

ՀՀ գլխավոր դատախազի` 2013 թվականի հոկտեմբերի 11-ի հրամանով Արդարադատության երկրորդ դասի խորհրդական Արթուր Դավթյանը նշանակվել է Երևան քաղաքի դատախազ՝ ազատվելով Երևան քաղաքի Շենգավիթ վարչական շրջանի դատախազի պաշտոնից, այս մասին տեղեկացնում է Գլխավոր դատախազության լրատվական ծառայությունը։

ՀՀ դատախազությունում շարունակվում են կադրային փոփոխությունները: «Փաստինֆո»-ի տեղեկությունների համաձայն` ՀՀ գլխավոր դատախազության կոռուպցիոն և կազմակերպված հանցագործությունների գործերով վարչության պետ է նշանակվել Գագիկ Խաչիկյանը, ով մինչ նոր նշանակումը զբաղեցնում էր մարդու դեմ ուղղված հանցագործությունների գործերով վարչության պետի պաշտոնը:

Իսկ նշված վարչության պետ նշանակվել է Արտակ Հարությունյանը` ազատվելով ՀՀ ազգային անվտանգության մարմիններում քննվող և կիբերհանցագործությունների գործերով վարչության պետի տեղակալի պաշտոնից:

Ի դեպ նշենք, որ Ա.Հարությունյանը ՀՀ Սահմանադրական դատարանի նախագահ Գագիկ Հարությունյանի որդին է և վարչության պետի տեղակալ էր նշանակվել  վերջերս:

Կայքի աղբյուրների հավաստմամբ` վերջնական է նաև Երևան քաղաքի դատախազի թեկնածուի հարցը, և այդ պաշտոնին նշանակվել է Շենգավիթի վարչական շրջանի դատախազ Արթուր Դավթյանը:

Հիշեցնենք, որ նա վերջերս էր նշանակվել նշված վարչական շրջանի դատախազ` ՀՀ նախկին դլխավոր դատախազ Աղվան Հովսեփյանի հրամանով:

Երևան քաղաքի նախկին դատախազ Հրաչյա Բադալյանը ՀՀ Նախագահի` հոկտեմբերի 10-ի հրամանագրով նշանակվել է ՀՀ գլխավոր դատախազի տեղակալ:

Հայաստանի գլխավոր դատախազության կոռուպցիոն և կազմակերպված հանցագործությունների գործերով վարչության պետ Կորյուն Փիլոյանն այսօր իր դիմումի համաձայն ազատվել է աշխատանքից: Այդ մասին Panorama.am-ին տեղեկացրել է գլխավոր դատախազության աշխատակազմի հանրային կապերի վարչության պետ Շահեն Տոնոյանը:

Հայաստանի Հանրապետության Ազգային ժողովի հոկտեմբերի 3-ի «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» որոշման համաձայն՝ ՀՀ արդարադատության նախարարության քրեակատարողական հիմնարկներից ս.թ. հոկտեմբերի 9-ին, ժամը 21:00-ի դրությամբ, ազատ է արձակվել 114 դատապարտյալ, այս մասին տեղեկացնում են Արդարադատության նախարարության լրատվական ծառայությունից:

«Նուբարաշեն» ՔԿՀ — 7,

«Արթիկ» ՔԿՀ — 2,

«Վանաձոր» ՔԿՀ — 2,

«Էրեբունի» ՔԿՀ — 56,

«Կոշ» ՔԿՀ — 44,

«Վարդաշեն» ՔԿՀ — 3,

Հոկտեմբերի 8-ին և 9-ին համաներման կիրառմամբ ՀՀ ԱՆ քրեակատարողական հիմնարկներից ազատ է արձակվել 392 դատապարտյալ:

Թերթն արդեն գրել էր, որ ՀՀ նորանշանակ գլխավոր դատախազ Գևորգ Կոստանյանը մտադիր է կադրային լուրջ փոփոխություններ իրականացնել: Ու քանի որ դատախազության համակարգում աշ­խատելը ոչ միայն ազդեցություն Է, այլև ֆինանսական վիճակի բարելավման հնարավորություն, ուստի համա­կարգի շատ աշխատակիցներ այս օրերին զբաղված են Կոստանյանի մտերիմներ փնտրելով:

«Ժողովուրդ»-ին  հասած տե­ղեկությունների համաձայն՝ դատախազության մի քանի աշխատակիցներ արդեն տարբեր խողովակներով Կոստանյանին փորձում են բացատրել, թե իրենք ինչպիսի լարված հարաբերություններ են ունեցել նախկին դատա­խազ Աղվան Հովսեփյանի հետ, և թե ինչպես է Հովսեփյանն «ընկած եղել իրենց հետևից»: Հետաքրքիրն այն Է, որ այսպիսի «փոխանցումներ» արել են նաև Հովսեփյանի համար վստահելի մարդիկ:

Հոդվածն ամբողջությամբ՝ կարդացեք «ժողովուրդ» օրաթերթի այսօրվա համարում:

Այսօր վերաքննիչ քրեական դատարանում դատավոր Եվա Դարբինյանի նախագահությամբ շարունակվել է ՀԱԿ ակտիվիստ Տիգրան Առաքելյանի գործով դատավարությունը, որի ընթացքում հարցաքննության է ենթարկվել գործով վկա ոստիկան Շահեն Հարությունյանը, սակայն վերջինս հարցաքննության ընթացքում տված յուրաքանչյուր հարցին պատասխանել է, որ ոչինչ չի հիշում դեպքի վայրում կատարված իրադարձություններից, փոխանցում է ԳԱԼԱ-ն:

Հիշեցնենք, որ Շահեն Հարությունյանը հանդիսանում է այն ոստիկանը, ում հեռախոսը կորել էր դեպքի վայրում, սակայն նախաքննական վարույթում պարզվել է հակառակը. այն է, որ նրա տված ցուցմունքներից հետո էլ այդ հեռախոսահամարից կատարվել են բազմաթիվ զանգեր:

Դատական փուլի ընթացքում ծագած վիճաբանության ընթացքում Տիգրան Առաքելյանը հայտարարել է, որ ինքը պաշտոնապես հրաժարվում է համաներման մասին օրենքից և պահանջում է, որ դատարանը կայացնի արդար վճիռ: Տիգրան Առաքելյանի փաստաբան Մուշեղ Շուշանյանը միջնորդություն է ներկայացրել, որպեսզի փոխվի իր պաշտպանյալի խափանման միջոցը` կալանքը, ինչպես նաև ժամանակ է խնդրել դատարանից դատական ճառին նախապատրաստվելու համար:

Ծագած վիճաբանության հետևանքով Տիգրան Առաքելյանին բռնի կերպով հեռացրել են դատարանի դահլիճից:

Դատավորն առանց որևէ բան հայտնելու հեռացել է նիստերի դահլիճից:

Տեսանյութը՝ civilnet-ի

Հատուկ քննչական ծառայությունում հարուցվել է քրեական գործ` ՀՀ ՔՕ-ի 308-րդ հոդվածի 1-ին մասով և 314-րդ հոդվածով` իշխանության ներկայացուցիչ հանդիսացող, ՀՀ Արտակարգ իրավիճակների նախարարության ՓԾ փրկարարական ուժերի վարչության կարևորագույն օբյեկտների պահպանության բաժնի նախկին պետի կողմից պաշտոնեական լիազորությունները չարաշահելու և պաշտոնեական կեղծիք կատարելու դեպքի առթիվ:
Նախաքննությամբ պարզվել է, որ նա, մշտապես իրականացնելով իշխանության ներկայացուցչի լիազորությունները, իր անմիջական ենթակա, հրշեջ հրահանգիչ Է. Ա.-ի խնդրանքը չմերժելու և այդ կերպ նրա հետ ունեցած մտերիմ փոխհարաբերությունները չվատթարացնելու անձնական շահագրգռվածությունից ելնելով, իր պաշտոնեական դիրքն օգտագործել է ծառայության շահերին հակառակ: Վերջինիս թույլատրել է, որ Է. Ա.-ն 2012թ. մայիսի 25-ից սեպտեմբերի 28-ը, այնուհետև` 2013թ. մայիսի 23-ից հուլիսի 31-ը չներկայանա աշխատանքի: Այնուհետև ՓԾ փրկարարական ուժերի վարչության կարևորագույն օբյեկտների պահպանության բաժնի նախկին պետը պաշտոնական փաստաթուղթ համարվող` աշխատաժամանակի հաշվարկի վերաբերյալ տեղեկագրում ակնհայտ կեղծ տեղեկություններ է մտցրել` իբր Է. Ա.-ն հիշյալ ժամանակահատվածում ներկայացել է ծառայության, և այն իր ստորագրությամբ հաստատելով` հանձնել է ՀՀ ԱԻՆ ՓԾ ֆինանսատնտեսագիտական վարչություն, որի հիման վրա ստացել է վարձատրություն` պետության օրինական շահերին պատճառելով էական վնաս:

ՀՔԾ լրատվական ծառայությունից հայտնում են, որ նախաքննությունը շարունակվում է:

Հայաստանի Հանրապետության Ազգային ժողովի հոկտեմբերի 3-ի  «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» որոշման համաձայն՝ ՀՀ արդարադատության նախարարության քրեակատարողական հիմնարկներից ս.թ. հոկտեմբերի 8-ին, ժամը 20:00-ի դրությամբ, ազատ է արձակվել 278 անձ, այս մասին հայտնում են ՀՀ արդարադատության նախարարության Քրեակատարողական վարչության հանրային կապերի բաժնից:

«Նուբարաշեն» ՔԿՀ — 42,

«Արթիկ» ՔԿՀ — 31,

«Վանաձոր» ՔԿՀ — 11,

«Գորիս» ՔԿՀ — 12,

«Էրեբունի» ՔԿՀ — 23,

«Սևան» ՔԿՀ — 36,

«Երևան-Կենտրոն» ՔԿՀ — 1,

«Կոշ» ՔԿՀ — 57,

«Վարդաշեն» ՔԿՀ — 33,

«Դատապարտյալների հիվանդանոց» ՔԿՀ — 7,

«Աբովյան» ՔԿՀ — 11,  կին — 10,  անչափահաս — 1,

«Հրազդան» ՔԿՀ — 14: