Փաստինֆո

Հատուկ քննչական ծառայությունում քաղաքացի Գ. Ս.-ի հաղորդման հիման վրա նախապատրաստված նյութերով ՀՀ ՔՕ 311-րդ հոդվածի 4-րդ մասի 2-րդ կետի հատկանիշներով հարուցվել է քրեական գործ:

Ըստ Գ. Ս.-ի հաղորդման, 2010 թվականի նոյեմբերի 5-ին Գյումրի քաղաքում տեղի ունեցած ավտովթարի հետևանքով վերջինիս որդու` Հ. Կ.-ի մահվան դեպքի առթիվ ոստիկանության Շիրակի մարզի քննչական բաժնում քննված քրեական գործով, դեպքի փաստական հանգամանքներն աղավաղելու և թաքցնելու, խեղաթյուրված արձանագրություններ կազմելու և մեղադրյալ Ա. Վ.-ին քրեական պատասխանատվությունից զերծ պահելու համար ՀՀ ոստիկանության Շիրակի մարզային վարչության նախկին պետը, մեղադրյալի հորից, մեղադրյալի մորեղբոր` Ս. Ա.-ի միջոցով ստացել է 50.000 ԱՄՆ դոլար կաշառք:

Կատարվում է նախաքննություն:

Սյունիքի նախկին մարզպետ Սուրեն Խաչատրյանի մոտ տեղի ունեցած արյունալի միջադեպը ներկայացնող նոր կադրերը պարունակում են մի շարք հարցերի պատասխաններ, մասնավորապես երևում է, թե առաջինը ով է կրակել և ում վրա է կրակել։ Այս մասին այսօր՝ հոկտեմբերի 30-ին, լրագրողների հետ հանդիպմանն ասաց Բուդաղյանների փաստաբան Հայկ Ալումյանը։

Նա ուշադրությունը հրավիրեց այն հանգամանքի վրա, թե մինչև Տիգրան Խաչատրյանի կողմից արձակված երեք կրակոցները զոհված Ավետիք Բուդաղյանը ինչ է արել։

«Նա գալիս է, որ տեսնի եղբայրը եկել է, թե ոչ, նույնիսկ ավտոմեքենայից դուրս չի գալիս, Խաչատրյանի կողմնակիցները մոտենում են նրան, պարզ երևում է, որ անելիք չունի, ուզում է գնալ, գալիս են, ինչ-որ խոսակցությունների են բռնվում, գալիս է Արտակ Բուդաղյանի մեքենան, և Ավետիքն իր մեքենայով փակում է ճանապարհը։ Ավետիքը մեքենայից դուրս չի գալիս, կոնֆլիկտ է առաջանում Արտակի և Սուրեն Խաչատրյանի կողմնակիցների միջև, և Ավետիք Բուդաղյանը առաջին անգամ մեքենայից դուրս է գալիս և իր եղբորը՝ Արտակին հրելով իջեցնում է ներքև։

Տնեցիներից երկու կին են դուրս գալիս, որից մեկը Լորետա Բարսեղյանն է, Տիգրան Խաչատրյանը դիրքավորվեց մեքենայի հետևը և երեք անգամ կրակեց, պարզ են Ավետիք Բուդաղյանի գործողությունները։ Ավետիք Բուդաղյանի գործողությունների մեջ ոչ մի ագրեսիա չի եղել, եղել է հաշտարարի դերում։ Երեք կրակոցից երկուսը ուղղված է եղել Ավետիքի վրա, և այսօր մեզ ուզում են ասել, որ Ավետիք Բուդաղյանին սպանելով Տիգրան Խաչատրյանը գործել է անհրաժեշտ պաշտպանության սահմաններում։

Դրանից հետո Ավետիք Բուդաղյանը, երբ տեսնում է, որ եղբայրը ընկած է, վերցնում է զենքը, սկսվում է  հրաձգություն, երկու կրակոց է ասվում, որ ինքն է կատարել, մնացածը մյուս կողմն է կատարել։ Ավետիք Բուդաղյանը կրակոցների ժամանակ որևէ վտանգ չի ներկայացրել Սուրեն Խաչատրյանի և նրա կողմնակիցների համար, այլ ընդհակառակը ինքը եղբորը հեռացրել է տեսնելով, որ վիճաբանության մեջ է մտել։ Միջադեպի մոնտաժված հոլովակում, որտեղ ձայն չկա, սլաքներ կան, այն պահը, երբ Տիգրան Խաչատրյանը դիրքավորվում և կրակում է, այս կադրերը լղոզված են, Արտակ Բուդաղյանը երբ գալիս է, սլաքներ կան, թե իբր հնչել են կրակոցներ, մինչդեռ կրակոց չի հնչել»,- ներկայացնելով կադրերն՝ ասաց փաստաբանը։

Հայկ Ալումյանի փոխանցմամբ՝  Ավետիք Բուդաղյանի մարմնի վրա հայտնաբերվել է վնասվածք, որն ունի վերևից ներքև ուղղություն և դրանից հետո նա չէր կարող նպատակաուղղված գործողություն կատարել, դա եղել է վերջին կրակոցը, քննիչը չի կարողանում բացատրել, թե ինչպես է նա դա ստացել, չէ՞ որ բոլորը կանգնած են կամ վազվզում են նույն հարթության վրա։

«Գնդակի արտացոլումը և վերևից ներքև ուղղությամբ Ավետիքի վնասվածքներից մեկը ամրապնդում են կարծիքը, որ վերևից՝ շենքից, ինչ-որ մեկը կրակել է։ Կա մեկ կրակոցի ձայն, որը զգալիորեն տարբերվում է մյուս կրակոցների ձայներից։ Փորձագետները հնարամիտ պատասխան տվեցին՝ ասելով, թե այն տարբերվում է, որովհետև երկու ձայն համընկել է իրեն, եթե համընկել է իրար, պետք է բացատրվի, թե ով է կրակել երկրորդը, ըստ պարկուճների՝ այդտեղ եղել է մեկ կրակոց, եթե համընկել է, որտեղ է այդ  երկրորդ պարկուճը, այդ հարցի պատասխանը նույնպես քննիչի մոտ չկա»,- ասաց փաստաբանը։

Հայկ Ալումյանը նշեց նաև, որ իր պաշտպանյալ Արտակ Բուդաղյանը պնդում է, որ ինքը տեսել է տնից կրակոց, այդ ցուցմունքը հաստատվում է նաև իր ներկայացրած փաստերով, ըստ Սուրիկ Խաչատրյանի կողմնակիցների ցուցմունքների՝ տանը ուրիշ մարդ չի եղել։ Ի դեպ, նախկին մարզպետի կնոջ՝ Լորետա Բարսեղյանի՝ «Սուրիկ, էս ինչ արեցիր» արտահայտությունը ոչ հերքվել, ոչ հաստատվել է, բնականաբար մյուս կողմը դա ժխտում է:

Նա նշեց, որ զավեշտ է նաև դեպքի վայրում հայտնաբերված ինքնաշեն զենքը օրինական համարելը, և նախաքննության մարմինը մի հատ էլ նույն զենքից է հայտնաբերել, և դա փորձում են վերագրել Ավետիք Բուդաղյանին, մինչդեռ պարզ է, որ դա Խաչատրյանների զենքերից է։

Հիշեցնենք, որ «Լրագրողներ հանուն մարդու իրավունքների»  իրավական, լրատվական կայքը ներկայացրել է հունիսի 1-ին Սյունիքի նախկին մարզպետ Սուրեն Խաչատրյանի տան մոտ տեղի ունեցած միջադեպը ներկայացնող նոր տեսանյութ՝ ձայնի առկայությամբ:

news.am

Օրաթերթի՝ ՀՀ գլխավոր դատախա­զության աղբյուրները հայտնում են, որ դատա­խազության կուլիսներում քննարկվում է Հ1-ի «Աոա­ջին լրատվականի» հաղորդավարուհի Քրիստինե Մելքոնյանին ՀՀ գլխավոր դատախազի մամուլի խոս­նակ նշանակելու հարցը:

Գևորգ Կոստանյանը շուրջ մեկ ամիս է, առանց մամուլի խոսնակի էր աշխատում: Մինչ այդ սույն պաշտոնը զբաղեցնում Էր Սոնա Տոուզյանը:

Հոդվածն ամբողջությամբ՝  «Հայկական ժամանակ»-ի այսօրվա համարում:

 Գլխավոր դատախազի հրամանով աշխատանքից ազատվել է Լոռու մարզի դատախազ Հակոբ Ղարախանյանը։

ՀՀ գլխավոր դատախազության աշխատակազմի հանրային կապերի վարչության պետ Շահեն Տոնոյանի տեղեկացմամբ,   Հակոբ Ղարախանյանը աշխատանքից ազատվել է սեփական դիմումի համաձայն:

Պետական պաշտոններ զբաղեցնող անձանց վարձատրության մասին» օրինագիծը, որը մշակել է կառավարության աշխատակազմը, ԱԺ-ում քննարկման փուլում է, իսկ  արդարադատության նախարարության առաջարկած «ՀՀ դատական օրենսգրքում փոփոխություններ եւ լրացումներ կատարելու մասին» օրենքի նախագիծն այժմ թարգմանվում է, որպեսզի ուղարկվի Վենետիկի հանձնաժողով:

Օրերս նոր օրինագծերը հնչեղ քննադատութան ենթարկվեցին օմբուդսմենի եւ ՀՀ դատավորների միության կողմից: Վերջինը նույնիսկ հայտարարություն տարածեց, որում պաշտոնյաների աշխատավարձերին վերաբերող օրինագիծը բնորոշեց որպես դատավորների իրավական վիճակը վատթարացնող օրենք: Իսկ օմբուդսմեն Կարեն Անդրեասյանը, որ հազվադեպ է բացասական գնահատականներ տալիս արդարադատության նախարարության գործունեությանը, Դատական օրենսգրքի փոփոխությունների նախագիծը որակեց որպես «ավելի վատ կամ նույնքան վատ օրենք՝ շատ վատի փոխարեն»:

«Հրապարակի» հարցերին պատասխանեց Հայաստանի դատավորների միության նախագահ Հրաչիկ Սարգսյանը:

— Ի՞նչ հաշվարկի են դեմ դատավորները, ինչո՞ւ են համարում, որ «Պետական պաշտոններ զբաղեցնող անձանց վարձատրության մասին» օրինագիծն իրենց իրավական վիճակը վատթարացնում է:

— Օրինագծով նախատեսվում է դատավորներին հավելավճարների վճարման այնպիսի կարգ, որի համաձայն, դրանք կազմելու են տարեկան 2 տոկոսի չափով, իսկ որպես դրա առավելագույն սահման՝ նախատեսված է դատավորի հիմնական աշխատավարձի 30 տոկոսը: Այսինքն, ըստ առաջարկվող տարբերակի, դատավորների հավելավճարը սահմանվում է առավելագույնը 15 տարի ժամկետով. յուրաքանչյուր տարի՝ 2 տոկոսի չափով: Մինչդեռ, գործող կարգավորմամբ, դատավորների հավելավճար ստանալու իրավունքը նախ որեւէ ժամկետային սահմանափակմամբ պայմանավորված չէ, ավելին` 2 տոկոս սահմանված է միայն առաջին 5 տարիների համար, իսկ 6-րդ եւ դրան հաջորդող յուրաքանչյուր տարվա համար սահմանված է 5-ական տոկոսի չափով հավելավճար ստանալու իրավունք:

Կարգավորման վատթարացնող բնույթն առավել ակնհայտ է դառնում այն հանգամանքի հաշվառմամբ, որ այս պահի դրությամբ ՀՀ-ում պաշտոնավարող դատավորներից 27 դատավոր ունի 6-10 տարվա աշխատանքային ստաժ, 68 դատավոր` 11-15 տարվա, իսկ 61 դատավոր` 16-ից բարձր աշխատանքային ստաժ: Նշված դատավորների յուրաքանչյուր տարվա համար 5 տոկոս հավելավճար ստանալու իրավունքը ծագել է, եւ այդ հավելավճարներն իրենց պաշտոնավարման ընթացքում չփոփոխելու նորմ-երաշխիքի ուժով (ՀՀ դատական օրենսգիրք, հոդված 75, մաս 3) նրանք գտնվում են օրենսդիրի կողմից հստակ կանխորոշված ՈՐՈՇԱԿԻ իրավական վիճակում: Հետեւաբար, նախագծով նախատեսված սահմանափակումներն ուղղակիորեն նրանց իրավական վիճակը վատթարացնող նորմեր են:

— Որքա՞ն է կազմում նրանց աշխատավարձը հիմա:

 — Պատասխանեմ օրինակների միջոցով: Գործող իրավակարգավորմամբ՝ 7 տարվա աշխատանքային ստաժ ունեցող դատավորն ստանում է հավելավճար իր պաշտոնական դրույքաչափի 20 տոկոսի չափով, իսկ օրինագծի կարգավորման դեպքում կստանա 14 տոկոս հավելավճար: 11 տարվա ստաժ ունեցող դատավորը, ով ստանում է 40 տոկոսի չափով հավելավճար, կստանա 22 տոկոս հավելավճար: 16 տարվա աշխատանքային ստաժ ունեցողը, ով ստանում է 65 տոկոս հավելավճար, կստանա 30 տոկոս:  Ընդ որում՝ առկա կարգավորման դեպքում, ի տարբերություն օրինագծի, ժամկետային սահմանափակում չի նախատեսվում հավելավճարների չափի աճման առումով (0-5 տարի՝ 2 տոկոս, 6-րդ տարվանից սկսած յուրաքանչյուր տարի` 5 տոկոս): Մինչդեռ, ըստ օրինագծի, հավելավճարների աճը հնարավոր է միայն 15 տարիների ընթացքում, յուրաքանչյուր տարի՝ 2 տոկոսի չափով:

— Ո՞ւմ էր ուղղված Դատավորների միության խորհրդի հայտարարությունը: Արձագանքե՞լ է արդյոք արդարադատության նախարարությունը միության հայտարարության մեջ շարադրված պահանջներին: Կա՞ն այլ մարմիններից արձագանքներ:

— Դատավորների միության խորհրդի հայտարարությունն ուղղված էր բոլոր իրավասու մարմիններին, իսկ արձագանքի մասին մենք տեղեկանում ենք մամուլի հրապարակումների միջոցով: Մասնավորապես, մամուլի հրապարակումներից տեղեկացանք, որ դատավորների գնահատմանը եւ կարգապահական հիմքերին վերաբերող նախագիծն ուղարկվել է միջազգային փորձաքննության:

— Նախագծերը՝ նախքան ԱԺ օրակարգ մտնելը, քննարկվե՞լ են Դատավորների միության հետ, թե՞ ոչ:

— Ոչ, չեն քննարկվել, ի հեճուկս Եվրոպայի խորհրդի կողմից 1998 թվականին ընդունված «Դատավորների կարգավիճակի մասին» խարտիայի 1.8-րդ կետի այն պահանջի, որ դատավորների վերաբերյալ օրենքի փոփոխման ծրագրերի եւ պարգեւատրման ու սոցիալական ապահովման սահմանման կապակցությամբ դատավորների հետ պետք է իրականացվեն խորհրդակցություններ:

— Ինչպե՞ս եք մեկնաբանում ՄԻ պաշտպան Կարեն Անդրեասյանի գնահատականը, որ առաջարկվող փոփոխությունները տարբերակված մոտեցում են ենթադրում վճռաբեկի դատավորների եւ նախագահի նկատմամբ, քանի որ բացառում են նրանց պատասխանատվության ենթարկելը նույն հիմքերով, որոնցով պատասխանատվության պետք է ենթարկվեն  առաջին ատյանի դատավորները:

 — ՄԻ պաշտպան Կարեն Անդրեասյանի գնահատականը մեկնաբանելուց ձեռնպահ կմնանք` դատավորների վարքագծի կանոնների տեսանկյունից համապատասխան իրավասություն չունենալով:

Սյուզան Սիմոնյան

Hraparak.am

Հատուկ քննչական ծառայությունում ՀՀ ՔՕ 242-րդ հոդվածի 1-ին մասով հարուցվել է քրեական գործ` ոստիկանության աշխատակցի կողմից վրաերթի հետևանքով անչափահաս Զ. Հ.-ին մարմնական վնասվածք պատճառվելու դեպքի առթիվ:
Նախաքննությամբ պարզվել է, որ ՀՀ ոստիկանության Մասիսի բաժնի տեղամասային տեսուչ Արման Եփրեմյանը 2013 թվականի հոկտեմբերի 12-ին՝ ժամը 09:30-ի սահմաններում, Արևշատ-Դիտակ գյուղամիջյան ավտոճանապարհի 1-ին կիլոմետրի հատվածում իր վարած ավտոմեքենայով վրաերթի է ենթարկել Արևշատ գյուղի բնակիչ 2004 թվականին ծնված Զ. Հ.-ին, ինչի հետևանքով վերջինս գանգուղեղային վնասվածքներով տեղափոխվել է «Սուրբ Աստվածամայր» բժշկական կենտրոն:
Նախաքննությունը շարունակվում է:

Հոկտեմբերի 28-ին, ժամը 13.40-ին, ոստիկանության Էրեբունու բաժնի և ճանապարհային ոստիկանության ծառայողները Երևանի «Սուրմալու» առևտրի կենտրոնի մոտակայքից հայտնաբերել և Էրեբունու բաժին բերման են ենթարկել 1992 թ. ծնված Սերոբ Մ.-ին, որը նույն բաժնի կողմից հետախուզվում էր ՀՀ քրեական օրենսգրքի 355 հոդվածի (Փախուստն ազատազրկման վայրից, կալանավորվածներին պահելու վայրից կամ ձերբակալվածներին պահելու վայրից) 2-րդ մասի հատկանիշներով:
Խափանման միջոցը` կալանք:

Ինչպես տեղեկացնում են Ոստիկանության լրատվական ծառայությունից, Սերոբ Մ.-ն տեղափոխվել է ՀՀ ԱՆ «Նուբարաշեն» ՔԿՀ:

Մամուլի միջոցներով հրապարակվել են տարբեր քաղաքացիների դժգոհություններ` կապված Վերաքննիչ քրեական դատարանի դատավոր Աիդա Հովհաննիսյանի կողմից քաղաքացիների հետ տարբեր քաղաքացիաիրավական վեճեր ունենալու և դրանց շրջանակում Աիդա Հովհաննիսյանի կողմից դատավորին արգելված վարքագիծ դրսևորելու մասին:
Դատական դեպարտամենտն ուսումնասիրել է մամուլի միջոցներում տեղ գտած հրապարակումները, դրանց մանրամասները և արդյունքները ներկայացրել ՀՀ վճռաբեկ դատարանի նախագահին:
Վճռաբեկ դատարանի նախագահ Արման Մկրտումյանն ուսումնասիրությունների արդյունքերով դիմել է ՀՀ դատարանների նախագահների խորհրդի էթիկայի հանձնաժողով` դատավոր Աիդա Հովհաննիսյանի հարցը քննարկելու և համապատասխան որոշում ընդունելու միջնորդությամբ:
Հանձնաժողովի կողմից իրականացվող քննության և ընդունած որոշման մասին ՀՀ դատական դեպարտամենտը հետագայում կտրամադրի լրացուցիչ և սպառիչ տեղեկություններ:

ՀՀ դատական դեպարտամենտ

Հայաստանի Հանրապետության Ազգային ժողովի հոկտեմբերի 3-ի «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» որոշման համաձայն ՀՀ արդարադատության նախարարության քրեակատարողական հիմնարկներից ս.թ. հոկտեմբերի 25-ին, ժամը 18.00-ի դրությամբ, ազատ են արձակվել 580 դատապարտյալ:

«Էրեբունի» ՔԿՀ – 174

«Կոշ» ՔԿՀ -114

«Նուբարաշեն» ՔԿՀ-68

«Վարդաշեն» ՔԿՀ — 47

«Արթիկ» ՔԿՀ — 33

«Սևան» ՔԿՀ — 52

«Աբովյան» ՔԿՀ – 18

«Վանաձոր» ՔԿՀ-14

«Հրազդան» ՔԿՀ – 23

«Գորիս» ՔԿՀ-12

«Դատապարտյալների հիվանդանոց»-24

«Երևան Կենտրոն» ՔԿՀ-1