Ապիրլի 14-ին, ժամը 18.05-ին, հիվանդանոցից ոստիկանության Կոտայքի բաժնում հաղորդում է ստացվել, որ Կոտայքի մարզի Բյուրեղավան քաղաքի շտապօգնության խումբը իրենց մոտ է տեղափոխել 1986 թ. ծնված Վաղինակ Սիմոնյանի դիակը:

Ձեռնարկաված օպերատիվ-հետախուզական միջոցառումների շնորհիվ պարզվել է, որ նույն օրը, ժամը 17.00-ի սահմաններում, Կոտայքի մարզի Արզնի գյուղի տարածքում գտնվող ընկերության անասնագոմին կից տնակում, վիճաբանության ժամանակ, Վ. Սիմոնյանին դանակով հարվածել է 1952 թ. ծնված Միշա Ս.-ն, ինչի հետևանքով Վ. Սիմոնյանը հիվանդանոց տեղափոխվելու ճանապարհին մահացել է:
Նույն օրը, ժամը 19.05-ին, Միշա Ս.-ն բերման է ենթարկվել ոստիկանության Կոտայքի բաժին:
Փաստի առթիվ ՀՀ քրեական օրենսգրքի 104 հոդվածի 1-ին մասի հատկանիշներով հարուցվել է քրեական գործ:
Միշա Ս.-ն ձերբակալված է:
Կատարվում է նախաքննություն:

Օմբուդսմեն Կարեն Անդրեասյանի առաջարկով ԱԱԾ տնօրեն Գորիկ Հակոբյանը հանձնարարել է հրատապ քայլեր ձեռնարկել ձերբակալված անձանց պահման վայրում առկա թերությունները շտկելու ուղղությամբ: Շուրջ 20 օրերի ընթացքում արվել են հետևյալ բարեփոխումները.

1. Այսուհետ համապատասխան մատյանում պարտադիր կերպով կնշվի ձերբակալվածների ընդունման ժամը` բացառելով ձերբակալվածներին սահմանված ժամից ավել պահելու հավանականությունը:

2. Խցում եղած անբարեկարգ վիճակը շտկելու համար կատարվել են համապատասխան վերանորոգման աշխատանքներ:

3. Նախկինում կարգավորված չի եղել ձերբակալված անձանց զանգերի իրավունքի ապահովման հարցը, այժմ արդեն տեղադրված հեռախոս-ավտոմատի միջոցով ձերբակալվածները կկարողանան զանգել:

4. Ձերբակալվածների տեսակցությունները իրենց հարազատների հետ կկանոնակարգվեն և դրանց օրերն ու ժամերը ֆիքսելու համար կլինեն հաշվառման մատյաններ:

5. Պաշտպանը մտահոգություն է հայտնել ձերբակալված անձանց՝ 72-ժամից ավել պահելու հավանականության վերաբերյալ, որի արդյունքում ԱԱԾ տնօրենի կողմից հանձնարարվել է, ԱԱԾ քննչական վարչության հետ համագործակցությամբ, խստագույնս բացառել դրա հնարավորությունը:

6. Իրականացվել է խցերի սանհանգույցների ամբողջական մեկուսացումը խցի բնակելի մասից:

7. Զբոսանքի վայրում տեղադրվել է նստարան:

8. Նախկինում ձերբակալված անձանց համար չի նախատեսվել ճաշացանկ, այսուհետ այն կփակցվի համապատասխան վայրում:

9. Խցում եղել է 2 մահճակալ, որից մեկը դուրս է բերվել՝ ապահովելու համար Օրենսդրությամբ սահմանված մեկ անձի համար նախատեսված 4 քմ պահանջը:

10. Բռնության հնարավոր դեպքերը բացահայտելու և կանխելու նպատակով այսուհետ կարձանագրվեն հարցաքննությունից հետո ձերբակալվածների մոտ մարմնական վնասվածքների առկայությունը կամ բացակայությունը:

Նշված խնդիրներն արձանագրվել են Մարդու իրավունքների պաշտպանի բռնությունների կանխարգելման ազգային մեխանիզմի (ԲԿԱՄ) կողմից: Օմբուդսմենը կարևորում և բարձր է գնահատում Ազգային անվտանգության ծառայության հետ կառուցողական համագործակցությունը՝ ոլորտում առկա խնդիրները վեր հանելու և համատեղ ուժերով դրանց արդյունավետ լուծումներ տալու գործում:

Ըստ ՀՀ ոստիկանության օպերատիվ հաղորդագրությունների ամփոփագրերի` ապրիլի 11-ից 14-ն ընկած ժամանակահատվածում հանրապետությունում արձանագրված մարմնական վնասվածք հասցնելու 33 դեպքից բացահայտվել է 25-ը, խարդախության 7 դեպքից` 6-ը, ավազակային հարձակման` 2, խուլիգանության 1 և մաքսանենգության 9 դեպքերը բացահայտվել են:
Բացահայտվել է գողության 7 դեպք:
Նախկինում կատարված հանցագործություններից բացահայտվել է գողության 1 և մարմնական վնասվածք հասցնելու 6 դեպք:
Անցած 3 օրերի ընթացքում հանրապետությունում արձանագրվել է ճանապարհատրանսպորտային 20 պատահար. 2 մարդ զոհվել է, 28-ը` ստացել տարբեր աստիճանի մարմնական վնասվածքներ:

ՀՀ հատուկ քննչական ծառայության վարույթում ավարտվել է ՀՀ ոստիկանության ՊՊԾ գնդի ոստիկան Հայկ Ղարագյոզյանի կողմից քաղաքացի Ռիփսիկ Մանուկյանին ծեծելու դեպքի առթիվ` ՀՀ ՔՕ 118-րդ հոդվածի հատկանիշներով հարուցված քրեական գործի նախաքննությունը:
Նախաքննությամբ հիմնավորվել է, որ 2014թ. հունվարի 25-ին Երևան քաղաքի Նոր Նորքի զանգվածի շենքերից մեկի մոտ կենցաղային հարցերի շուրջ ծագած վիճաբանության ժամանակ ՀՀ ոստիկանության աշխատակից Հայկ Ղարագյոզյանը բռունցքով հարվածել է Ռ. Մանուկյանի կրծքավանդակի հատվածին, այնուհետև ոտքով հարվածել է վերջինիս մարմնի տարբեր մասերին` պատճառելով նրան առողջության թեթև վնասի հատկանիշներ չպարունակող մարմնական վնասվածքներ:
Հիշեցնենք, որ Հայկ Ղարագյոզյանին մեղադրանք էր առաջադրվել ՀՀ ՔՕ 118-րդ հոդվածի հատկանիշներով:
Նախաքննությունն ավարտած քննիչը քրեական գործը մեղադրական եզրակացությամբ հանձնել է դատավարական ղեկավարում իրականացնող դատախազին՝ այն հաստատելու և դատարան ուղարկելու համար:

ՀՀ հատուկ քննչական ծառայության վարույթում քննվող քրեական գործի նյութերով` անձի նկատմամբ բռնություն գործադրելու զուգորդմամբ խուլիգանություն կատարելու դեպքի առթիվ` ՀՀ ՔՕ 258-րդ հոդվածի 2-րդ մասի հատկանիշներով հարուցվել է նոր քրեական գործ և առանձնացվել առանձին վարույթում:

Հիշեցնենք, որ ՀՀ հատուկ քննչական ծառայության վարույթում հարուցված քրեական գործի նախաքննությամբ պարզվել է, որ ոստիկան Կարեն Պետրոսյանը 2014թ. հունվարի 8-ին` ժամը 18:45-ի սահմաններում, Երևան քաղաքի «Անգլիական» կոչվող այգում` Գ.Սունդուկյանի անվան թատրոնի դիմաց, խաղալիքների մանրածախ առևտրով զբաղվող իր մորից` Մ. Բ.-ից, գումարներ պահանջելու հարցի շուրջ ծագած վիճաբանության, ապա նաև ծեծկռտուքի մեջ էր մտել Գևորգ Մնջոյանի հետ, որի ընթացքում դանակով երկու անգամ հարվածել է վերջինիս` դիտավորությամբ պատճառելով կյանքին վտանգ սպառնացող ծանր վնաս: Կարեն Պետրոսյանին մեղադրանք էր առաջադրվել ՀՀ ՔՕ 112-րդ հոդվածի 1-ին մասի հատկանիշներով և նրա նկատմամբ որպես խափանման միջոց ընտրվել էր կալանավորումը:

Նախաքննության ընթացում քրեական գործով մեղադրյալ Կարեն Պետրոսյանին վերագրվող հանցագործությունից բացի, բացահայտվել է առաջինի հետ չկապված այլ հանցագործություն, որն առանց մեղադրյալի մասնակցության կատարել է մեկ այլ անձ:
Պարզվել է, որ նույն օրը` 18:45-ի սահմաններում, Գևորգ Մնջոյանը, տեղեկանալով Մ. Բ.-ի կողմից այգու բարեկարգման համար նախապես պայմանավորված գումարը չտալու մասին, գնացել է այգի և պահանջել վճարել, հակառակ դեպքում` հեռանալ այգու տարածքից` միաժամանակ տալով անհասցե հայհոյանքներ:

Նույն պահին, Մ. Բ.-ի որդին` Կարեն Պետրոսյանը, նկատողություն անելով Գ. Մնջոյանին, փորձել է նրան կարգի հրավիրել, սակայն վերջինս, իր գերազանցությունը ցույց տալու ցանկությամբ, այնտեղ հավաքված անձանց հասցեին տվել է հայհոյանքներ` դրանով իսկ դիտավորությամբ կոպիտ կերպով խախտելով հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունք դրսևորելով և զուգորդվել Կարեն Պետրոսյանի նկատմամբ բռնություն գործադրելով, միաժամանակ` չի ենթարկվել իր խուլիգանական գործողությունները խափանող Կարեն Պետրոսյանի մոր և հավաքված կանանց պահանջներին:

ՀՀ հատուկ քննչական ծառայությունում` անձի նկատմամբ բռնություն գործադրելու զուգորդմամբ խուլիգանություն կատարելու դեպքի առթիվ` ՀՀ ՔՕ 258-րդ հոդվածի 2-րդ մասի հատկանիշներով հարուցված նոր քրեական գործն ըստ քննչական ենթակայության ուղարկվել է այլ մարմին` նախաքննությունը շարունակելու համար:

Քաղաքացիներ Ս. Շ.-ի, Ռ. Մ.-ի և Ե. Ս.-ի հաղորդումների հիման վրա ՀՀ հատուկ քննչական ծառայությունում նախապատրաստված նյութերով` ՀՀ ՔՕ 333-րդ հոդվածի 2-րդ մասի 1-ին կետի հատկանիշներով հարուցվել է քրեական գործ:
Քաղաքացիներ Ս. Շ.-ն, Ռ. Մ.-ն և Ե. Ս.-ն, նախազգուշացված լինելով սուտ մատնություն կատարելու համար ՀՀ ՔՕ 333-րդ հոդվածով նախատեսված պատասխանատվության մասին, ՀՀ ոստիկանության Քանաքեռ-Զեյթունի բաժնի հետաքննության բաժանմունքում գրավոր հաղորդումներ են ներկայացրել և գիտակցելով, որ իրենց տրամադրած տեղեկատվությունը կեղծ է, հայտնել են, որ 2014թ. մարտի 20-ին՝ ժամը 16:00-ին, Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում իրենց որդիների մասնակցությամբ տեղի ունեցած դատական նիստի ավարտից հետո, իբր, ՀՀ ոստիկանության ուղեկցող գումարտակի աշխատակիցները վերջիններիս ծեծի են ենթարկել:
Կատարվում է նախաքննություն:

ՀՀ գլխավոր դատախազությունը հայտարարություն է տարածել, որում ասվում է.

«2014 թվականի ապրիլի 9-ին, «Դ!ԵՄ ԵՄ» շարժման կազմակերպած բողոքի ակցիայի մասնակիցների նստացույցի հետևանքով տևական ժամանակով փակվել էր Երևան քաղաքի Նալբանդյան փողոցը, ինչի արդյունքում կաթվածահար էր եղել Նալբանդյան և հարակից փողոցների երթևեկությունը:

Հիշեցնենք, որ ճանապարհ փակելը և երթևեկությանը խոչընդոտելը առաջ են բերում քրեական և վարչական պատասխանատվություն: Կրկնվելու դեպքում կազմակերպիչների և մասնակիցների նկատմամբ կիրառվելու են օրենքով սահմանված պատասխանատվության միջոցներ:

ՀՀ գլխավոր դատախազությունն ընդգծում է, որ հավաքներ և երթեր անցկացնելու քաղաքացիների իրավունքի իրացումը չպետք է զուգորդվի հասարակական կարգի և այլոց սահմանադրական իրավունքների և ազատությունների կոպիտ և միտումնավոր խախտումներով: Առավել ևս անթույլատրելի է, երբ հասարակական կարգի կոպիտ խախտումը և այլոց իրավունքների ոտնահարումը ինքնին դառնում է բողոքի ակցիայի հիմնական նպատակը:

ՀՀ օրենսդրությունը ցանկացած բողոքի ակցիայի կամ հավաքի մասնակիցներին և կազմակերպիչներին ընձեռում է բավարար հնարավորություններ՝ կազմակերպելու իրենց հավաքներ անցկացնելու սահմանադրական իրավունքների իրացումը առանց հասարակական կարգը կոպիտ խախտելու և այլոց սահմանադրական իրավունքները սահմանափակելու»: