Բնակարանների հետ կապված խաբեության գործով ամբաստանյալ Սիմոն Աղազարյանի դատին այսօր Կենտրոն և Նորք-Մարաշ շրջանների ընդհանուր իրչավասության դատարանում մեղադրող Վիգեն Միլիտոնյանը կարդաց իր մեղադրական ճառը: Ըստ ճառի` մեղադրող կողմը մեղադրանք էր առաջադրում ամբաստանյալին ՀՀ քրեական օրեսնգրքի 178 հոդվածի երրորդ մասի առաջին կետով: Պահանջում էր 8 տարով ազատազրկում և գույքի բռնագրավում:

Սոնիկ Մաղաքյանը, որը տվյալ գործով և’ տուժող է, և’ տուժողներից մեկի ներկայացուցիչը, նույնպես հանդես եկավ ճառով`  ասելով, որ մեղադրողը իր մեղադրական ճառում ամեն ինչ չէ, որ ներառել է. մոռացել է նշել ՀՀ Քրեական օրենսգրքի 214 հոդվածը, քանի որ Ս. Աղազարյանը, լինելով քաղաքապետարանի աշխատաքկից, չարաշահել է իր իրավունքները:

Ճառով հանդես եկավ նաև Աղազարյանի պաշտպան Հովիկ Արսենյանը, որը շեշտեց, որ իր պաշտպանյալը նախկինում արատավորված չի եղել, ունի երեք հիվանդություն, որոնք եթե առանձին-առանձին դիտարկենք, ապա ամբաստանյալը ազատության մեջ պետք է լինի: Արսենյանը նշեց նաև, որ գործողություններն ուղղորդվել են Գագիկ Պապոյանի կողմից:

<<Պատիժը խիստ է ու դաժան, հաշվի չի առնվել Սիմոնի կատարած հանցագործության բնույթն ու առանձնահատկությունները>>,- անդրադառնալով մեղադրողի ճառին` նշեց պաշտպանը:

Լսելով կողմերի ճառերը` դատավոր Արշակ Վարդանյանը հետաձգեց նիստ: Հաջորդ դատական նիստը տեղի կունենա հոկտեմբերի 16-ին, որի ընթացքում դատավոր Վարդանյանը կհրապարակի ամբաստանյալ Սիմոն Աղազարյանի դատավճիռը:

Հիշեցնենք, որ բնակարանների հետ կապված խաբեության մեջ Սիմոն Աղազարյանին մեղադրանք է առաջադրվել այն բանի համար, որ նա, հանդիսանալով «Գապբնակշին» ՍՊԸ-ի փոխտնօրեն, նույն ընկերության տնօրեն Գագիկ Պապոյանի հետ նախնական համաձայնությամբ, Արամի փողոցի 72-80 հասցեում հիշյալ ընկերությանը հատկացված 3850 քմ մակերեսով հողատարածքում կառուցվող բազմաբնակարան շենքում բնակարաններ վաճառելու պատրվակով, 2005-2011թթ ընթացքում, բազմաթիվ քաղաքացիների վստահությունը չարաշահելով, միասնական դիտավորությամբ հափշտակել են 1.253.891.550 ՀՀ դրամ:

Աղազարյանը շուրջ 65 քաղաքացիների հետ կնքել է անշարժ գույքի նախնական առքուվաճառքի մասին պայմանագրեր, սակայն մինչ օրս նրանցից և ոչ մեկին բնակարանով չի ապահովել:

Սեպտեմբերի 20-ին, ժամը 19.30-ին, հիվանդանոցից ոստիկանության Վարդենիսի բաժնում հաղորդում էր ստացվել, որ ժամը 19.00-ին «գանգուղեղային տրավմա» ախտորոշմամբ իրենց մոտ է տեղափոխվել 1970 թ. ծնված Հրավարդ Սարգսյանը:

Նույն օրը, ժամը 21.15-ին, ոստիկանության Մարտունու բաժնից հեռախոսագիր էր ստացվել, որ Հրավարդ Սարգսյանը «կրծքավանդակի սալջարդ, ուղեղի ցնցում» ախտորոշմամբ տեղափոխվել է Մարտունու բժշկական կենտրոն, որտեղ նրա հարազատները հայտնել են, որ վնասվածքները ստացել է ծեծի հետևանքով:
Հրավարդ Սարգսյանն անգիտակից վիճակում տեղափոխվել էր Երևան` նեղ մասնագիտական բուժօգնության:

Ոստիկանության Վարդենիսի բաժնի ծառայողների ձեռնարկած օպերատիվ-հետախուզական միջոցառումների շնորհիվ տեղեկություններ են ստացվել, որ նույն օրը, ժամը 18.30-ի սահմաններում, Վարդենիս-Երևան ճանապարհի 1-ին կմ-ին, վիճաբանության ժամանակ, 1976 թ. ծնված Մարտին Հ.-ն, 1987 թ. ծնված Զոհրաբ Կ.-ն և 1987 թ. ծնված Հրանտ Շ.-ն ծեծի են ենթարկել Հ. Սարգսյանին և պատճառել վնասվածքները:
Նշանակվել էր դատաբժշկական փորձաքննություն:

Ոստիկանության Գեղարքունիքի մարզային վարչության, Վարդենիսի և Գավառի բաժինների ծառայողների բացատրական աշխատանքների շնորհիվ՝ սեպտեմբերի 22-ին, ժամը 20.00-ին, Հրանտ Շ.-ն կամավոր ներկայացել էր Գավառի բաժին և հայտնել, որ մասնակցել է սեպտեմբերի 20-ին Վարդենիս-Երևան ճանապարհին տեղի ունեցած վիճաբանությանը:

Նույն օրը, ժամը 21.00-ին, նա ձերբակալվել էր ՀՀ քրեական օրենսգրքի 112-րդ հոդվածի 1-ին մասի հատկանիշներով:

Սեպտեմբերի 24-ին, ժամը 17.00-ին, Հրավարդ Սարգսյանը, հիվանդանոցում գիտակցության չգալով՝ մահացել է:
Սեպտեմբերի 29-ին, ժամը 18.20-ին, Մարտին Հ.-ն կամավոր ներկայացել է ոստիկանության Գավառի բաժին և հայտնել, որ մասնակցել է սեպտեմբերի 20-ին Վարդենիս-Երևան ճանապարհին տեղի ունեցած վիճաբանությանը:

Հոկտեմբերի 2-ին, ժամը 18.30-ին, Զոհրաբ Կ.-ն ներկայացել է ոստիկանության Մարտունու բաժին: Նույն օրը նա ձերբակալվել է ՀՀ քրեական օրենսգրքի 112 հոդվածի 2-րդ մասի 6-րդ և 14-րդ կետերի հատկանիշներով:

Ինչպես հայտնում են Ոստիկանության լրատվական ծառայությունից, նախաքննությունը շարունակվում է:

Հրապարակավ հասցված վիրավորանքը ապաքրեականացված է, ինչը  վիճաբանող կողմերին հաճախ թույլ է տալիս դիմել ինքնապաշտպանության՝ ծայրահեղ արարքների:

Վիրավորանքի և զրպարտության ապաքրեականացման վերաբերյալ «Հայկական վարկած»—ը զրուցեց իրավաբան Արա Ղազարյանի հետ:

Ըստ նրա, այդ հոդվածների ապաքրեականացումն արվել է, որպեսզի մարդիկ հարցը լուծեն ավելի քաղաքակիրթ միջավայրում՝ դատարանում, բայց եթե դա վերաճում է խուլիգանության, արդեն քրեականացվում է:

«Ամբողջ աշխարհը գնում է ապաքրեականացման, ավելի ու ավելի շատ նվազ հանրային վտանգավորություն ներկայացնող գործողություններն ապաքրեականացվել են և տեղափոխվել են վարչական կամ քաղաքացիաիրավական տիրույթ»,-նկատեց նա:

«Հանրային միջավայրում վիրավորանք արտահայտելն անթաքույց վերաբերմունք է հասարակության նկատմամբ: Ասենք՝ փողոցում վիճում ես, ինչ-որ մեկը քեզ վիրավորում է, ասելով՝ ինձ չի հետաքրքրում, ես կարող եմ բոլորին էլ հայհոյել. դա անթաքույց վերաբերմունք է, արհամարհանք հասարակության նկատմամբ, նա այդ կերպ ուզում է իր անձի գերազանցությունը ֆիքսել»,-ընդգծեց իրավաբանը:

Իրավաբանը կողմ է՝ վեճերի նման կերպ լուծմանը, նրա խոսքով, դա շատ ավելի քաղաքակիրթ մոտեցում է ՝վարչական դատարանը,ֆինանսական պատիժը, որը մարդուն զերծ է պահում կործանման վտանգից, և Արա Ղազարյանը բերում է բանակի օրինակը.

«Տղան, բռունցքով հարվածելու համար, բանակից գալիս է արդեն դատված, իսկ առաջ դա անում էին կարգապահական ձևով. տանում էին կարգապահական գումարտակ, մի 10 օր խելքը գլուխն էր հավաքում, ու շարունակում էր ծառայել: Հարց. արդյո՞ք դա անհրաժեշտ է ժողովրդավարական հասարակությանը, արդյո՞ք անհրաժեշտ է մեր համայնքին»:

Չնայած նախականխումը քրեական  իրավունքի ամենակարևոր տարրերից է, սակայն Արա Ղազարյանը կողմ է, որ վեճերն ավելի քիչ քրեական ճանապարհով լուծվեն, որովհետև կալանավայրում անձը հետագայում շատ դժվար է ինտեգրվում հասարակությանը:

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր  Վազգեն Խաչիկյանի և մյուսների գործով դատական նիստում մեղադրողը հրապարակեց մեղադրական ճառը:

Նա հայտնեց, որ ամբաստանյալների՝ պետությանն ունեցած պարտքը կազմում է 267մլն. 583 հազար 336 ՀՀ դրամ:

Մեղադրողը Վազգեն Խաչիկյանի համար միջնորդեց  13 տարի ժամկետով ազատազրկում ՝ գույքի բռնագրավմամբ:

Գործով ամբաստանյալներ Աշոտ Աբրահամյանի համար դատավարական ղեկավարում իրականացնող դատախազը պահանջեց դատապարտել ազատազրկման 6 տարի 6 ամիս, Հովհաննես Գրիգորյանին՝ 6 տարի 2 ամիս, Սամվել Էլբակյանին՝ 5 տարի, Վիգեն Գևորգյանին և Արթուր Սուքիասյանին՝ 4 տարի 6 ամիս, Վահագն Խաչատրյանին և Հովհաննես Հովհաննիսյանին՝ 5 տարի 6 ամիս,  իսկ Համլետ Մարտիրոսյանին, Բագրատ Մուրադյանին, Արմեն Խաչատրյանին և Հրանուշ Դանիելյանին՝ 4-ական տարի ժամկետով ազատազրկման:

Մեղադրողը միջնորդեց  Հրանուշ Դանիելյանի նկատմամբ պատիժը պայմանականորեն չկիրառել՝ սահմանելով փորձաշրջան՝ 1 տարի ժամկետով:

Հաջորդ դատական նիստին պաշտպանական կողմը հանդես կգա ճառերով:

2014 թվականի հոկտեմբերի 1-ին՝ ժամը 21։15-ի սահմաններում, ԼՂՀ ՊԲ N զորամասի մարտական դիրքերից մեկում հակառակորդի կողմից արձակված կրակոցի հետևանքով գլխի շրջանում ստացած հրազենային վնասվածքից մահացել է պայմանագրային զինծառայող Դավիթ Վիկտորի Նավասարդյանը: Այս մասին հայտնում են ՀՀ քննչական կոմիտեի տեղեկատվության և հասարակայնության հետ կապերի բաժնից:

Փաստի առթիվ ՀՀ Քննչական կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 104–րդ հոդվածի 2–րդ մասի 13–րդ կետով՝ ազգային ատելության շարժառիթով դիտավորությամբ սպանության հատկանիշներով, կատարվում է նախաքննություն:

Հատուկ քննչական ծառայության մամուլի քարտուղար Լուսինե Մարգարյանը երեկ ազատվել է զբաղեցրած պաշտոնից:

Նշենք, որ նա բոլորովին վերջերս էր նշանակվել այդ պաշտոնում:

ՀՀ գլխավոր դատախազությունը տեղեկացնում է, որ սեպտեմբերի 25-ին «Ոսկու շուկայում» տեղի ունեցած միջադեպի վերաբերյալ մամուլի հրապարակումները «Կենտրոն և Նորք-Մարաշ վարչական շրջանների դատախազության» կողմից ուղարկվել են ՀՀ Ոստիկանության Երևան քաղաքի վարչության Կենտրոնական բաժին՝ ՀՀ քրեական դատավարության օրենսգրքի 180-181-րդ հոդվածների կարգով ընթացքը լուծելու համար:

Երևան քաղաքի Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ 2014 թվականի մայիսի 17-ին տեղի ունեցած զինված միջադեպի առթիվ Երևան քաղաքի քննչական վարչության Կենտրոնի քննչական բաժնում քննվող քրեական գործի շրջանակներում լրացվել է գործով որպես մեղադրյալ ներգրավված Գոռ Առաքելյանի մեղադրանքը, և նրան այսօր նոր մեղադրանք է առաջադրվել։

Մինչդատական վարույթում ձեռք բերված ապացույցների համաձայն՝ 2014թ. մայիսի 17-ին՝ ժամը 13:20-ի սահմաններում, Երևան քաղաքի Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ առերևույթ հանցագործություն կատարելու մեջ մեղադրվող Գ.Առաքելյանը շատերի կյանքի համար վտանգավոր եղանակով փորձել է դիտավորությամբ կյանքից զրկել Վալերիկ Հովհաննիսյանին և Ներսես Մելքոնյանին, ինչպես նաև՝ անուղղակի դիտավորությամբ կյանքին վտանգ սպառնացող ծանր մարմնական վնասվածքներ հասցրել Մնացական Սուքիասյանին ու Մյասնիկ Հայրապետյանին, իսկ Ալվինա Բադալյանին՝ միջին ծանրության վնաս՝ առողջության տևական քայքայումով:

Ձեռք բերված ապացույցների հիման վրա Գ.Առաքելյանին նախկինում առաջադրված մեղադրանքը լրացվել է ևս 2 մեղադրանքով։

Ի լրումն սպանության փորձի և ապօրինի զենք-ռազմամթերք պահելու համար ՀՀ քրեական օրենսգրքի 34-104-րդ հոդվածի 2-րդ մասի 1-ին, 6-րդ և 10-րդ կետերով և 235-րդ հոդվածի 1-ին մասով նախկինում առաջադրված մեղադրանքի՝ այսօր նրան մեղադրանք է առաջադրվել նաև երկու և ավել անձանց առողջությանը ծանր, մեկ անձի՝ միջին ծանրության վնաս պատճառելու համար՝ ՀՀ քրեական օրենսգրքի 112-րդ հոդվածի 2-րդ մասի 1-ին, 5-րդ և 9-րդ կետերով, 113-րդ հոդվածի 2-րդ մասի 6-րդ կետով: