Վանաձորի ծննդատանը հոկտեմբերի 18-ի գիշերը ծննդկան է մահացել: Վանաձորում NEWS.am-ի թղթակիցը հայտնում է, որ հոկտեմբերի 17-ին ժամը 18:40-ի սահմաններում Վանաձորի բժշկական կենտրոնի մանկաբարձագինեկոլոգիական բաժանմունքում ծննդաբերած 32-ամյա Հռիփսիմե Նազլուխանյանը ժամեր անց մահացել է:

Մեր տեղեկություններով ծննաբերությունը անցել է նորմալ, ծնվել է հասուն արական սեռի երեխա 3 կգ քաշով: Ծնունդն ընդունել է գինեկոլոգ Արսեն Բալայանը: Ծննդաբերությունունից մոտ 3 ժամ անց կնոջ վիճակը կտրուկ վատացել է, սկսվել է ուժեղ արյունահոսություն: Կնոջն անմիջապես տեղափոխել են վիրահատարան:

Չնայած բժիշկների ջանքերին, նրա կյանքը փրկել չի հաջողվել: Սա եղել է կնոջ առաջին ծննդաբերությունը:

Երեխայի վիճակը նորմալ է, առողջական որևէ խնդիր չունի:

Դեպքի առթիվ ոստիկանության Լոռու մարզի քննչական բաժնում նախապատրաստվում են նյութեր:

NEWS.am

ՀՔԱ Վանաձորի գրասենյակն ստանձնել է ՀՀ ՊՆ Իջևանի զորամասում այս տարվա ապրիլի 25-ին գլխի շրջանում հրազենային վիրավորումից մահացած Հովհ. Պետրոսյանի իրավունքների պաշտպանությունը:

Դեպքի առթիվ հարուցված քրեական գործի շրջանակում Հովհ. Պետրոսյանի իրավահաջորդի շահերը ներկայացնում են ՀՔԱ Վանաձորի գրասենյակի նախագահ Արթուր Սաքունցը և Կազմակերպության փաստաբան Անի Չատինյանը: Վերջիններս մասնակցում են քրեական գործի շրջանակում իրականացվող քննչական գործողություններին: Տուժողի իրավահաջորդի ներկայացուցիչների կողմից ներկայացվել են նաև որոշ քննչական գործողություններ իրականացնելու մասին միջնորդություններ, որոնց վերաբերյալ, սակայն, վարույթն իրականացնող մարմինը դեռևս որոշում չի կայացրել:

Գործով ներգրավված կարևոր վկան՝ Վաչագան Հայրապետյանը, որը Հովհ.Պետրոսյանի անմիջական հրամանատարն էր, 2016 թ. հոկտեմբերի 10-ին՝ տուժողի իրավահաջորդի` մահացած զինծառայողի հոր՝ Վաչագան Պետրոսյանի  հետ առերեսումից օրեր անց մահացել է ավտովթարի հետևանքով: Այս մասին տեղեկանում ենք shamshyan.com լրատվական կայքից:

Հաշվի առնելով առերեսման ժամանակ վաշտի հրամանատար Վաչագան Հայրապետյանի տված՝ գործի համար կարևոր նշանակություն ունեցող ցուցմունքները, մեր՝ տուժողի իրավահաջորդի և նրա ներկայացուցիչների մոտ լուրջ մտահոգություն է առաջացրել Վ. Հայրապետյանի մահվան փաստը, և իրավապահ մարմիններից ակնկալում ենք բազմակողմանի, լրիվ և օբյեկտիվ քննություն` Վ. Հայրապետյանի մասնակցությամբ տեղի ունեցած ավտովթարի հանգամանքները պարզելու և Հովհ. Պետրոսյանի մահվան դեպքի առթիվ հարուցված քրեական գործի հետ դրա ունեցած հնարավոր առնչությունը բացահայտելու ուղղությամբ:

 Հելսինկյան Քաղաքացիական Ասամբլեայի Վանաձորի գրասենյակ

Հայաստանի քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում քննվող քրեական գործով պարզվել է, որ մի խումբ անձինք իրացրել են Վանուշ Խանամիրյանի հիշատակին նվիրված երեկոյի կեղծ տոմսեր։

Քննչական կոմիտեի լրատվական ծառայութունից տեղեկացնում են, որ նախնական քննության տվյալներով՝ մի խումբ անձինք, չարաշահելով քաղաքացիների վստահությունը, իրացրել են Վանուշ Խանամիրյանի հիշատակին նվիրված երեկոյի կեղծ տոմսեր, որը, իբր, պետք է տեղի ունենար Ա. Սպենդիարյանի անվան օպերայի և բալետի պետական ակադեմիական թատրոնում՝ երկու տարբեր օրերի։ Մինչդեռ՝ թատրոնում նման երեկո նշված օրերին ընդհանրապես նախատեսված չի եղել։

Քննությամբ բավարար ապացույցներ են ձեռք բերվել, որ քաղաքացիներին իրացվել են չնախատեսված միջոցառման տոմսեր։

Նշվում է, որ ձեռնարկվում են անհրաժեշտ քննչական գործողություններ՝ առերևույթ հանցագործություն կատարած անձի (անձանց) ինքնությունը պարզելու ուղղությամբ։

Վարույթն իրականացնող մարմինը դիմում է մեր համաքաղաքացիներին՝ եթե կան անձինք, ովքեր տուժել են  նշված գործողությունների հետևանքով և գնել են Վանուշ Խանամիրյանի հիշատակին նվիրված երեկոյի կեղծ տոմսեր, խնդրում ենք դիմել ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին  (հասցե` ՀՀ, քաղաք Երևան,Կոմիտասի 51ա) կամ զանգահարել 077 90 99 90 հեռախոսահամարով:

Շախմատի աշխարհի գավաթակիր, գրոստմայստեր Լևոն Արոնյանը և նրա կինը` Արիանա Կաոլին, ArmLur.am-ի տեղեկություններով` գնացել են մեր հարևան Իրանի Հանրապետություն` բարձրանալու Դամավանդ լեռը:

ArmLur.am-ի տեղեկություններով` նրանց այնտեղ գտնվելու ժամանակ բուք է սկսվել: Իրենք կապից դուրս են եկել: Մեր տեղեկություններով` շաբաթ օրվանից նրանց մասին որևէ մեկը տեղեկություն չունի:

***

Քիչ անց armlur.am-ը  կապ հաստատեց Իրանում ՀՀ դեսպան Արտաշես Թումանյանի հետ, ով փոխանցեց, որ Արոնյանն ու իր տիկինն արդեն գտնվել են, նրանք իջել են սարերից, այժմ անվնաս են և գտնվում են Թեհրանում: Նրանց հետ որևէ բան չի պատահել և որևէ խնդիր չկա:

Ամբողջական հոդվածը կարող եք կարդալ armlur.am

Կոտայքի մարզում, այսօր՝ հոկտեմբերի 18-ի առավոտյան ժամը 08.30-ի սահմաններում խոշոր ու ողբերգական ավտովթար է տեղի ունեցել. Երեւան-Սեւան ավտոճանապարհի 44-րդ կմ հատվածում բախվել են «Օպել» մակնիշի եւ Mercedes Benz Sprinter մակնիշի ավտոմեքենաները։ Վթարի հետեւանքով մահացել է մեկ, վիրավորվել՝ 7 մարդ:

Shamshyan.com-ի փոխանցմամբ՝ ճանապարհային ոստիկանների ու քաղաքացիների օգնությամբ 8 մարդ դուրս է բերվել ավտոմեքենաներից եւ տեղափոխվել Հրազդանի բժշկական կենտրոն։ Նրանցից երիտասարդ մի աղջիկ՝ 18-ամյա Հռիփսիմե Գասպարյանը հիվանդանոցում մահացել է։

Ըստ նախնական տեղեկությունների՝ Mercedes-ը ուսանողների տեղափոխելիս է եղել Երեւան, երբ ճանապարհին մերկասառույցի պատճառով դուրս է եկել հանդիպակաց երթեւեկելի գոտի եւ բախվել դեպի Սեւան ընթացող «Opel»-ին։

Մանրամասները` սկզբնաղբյուր կայքում:

lurer.com

Անվտանգության ուժային խնդիր Հայաստանում

Ռուսական «Նեզավիսիմայա գազետա» պարբերականը գրում է, որ Ռուսաստանի ֆինանսների նախարարությունը քննարկում է ուժային կառույցների ներկայացուցիչների համար կենսաթոշակային ռեֆորմի հարցը, որն ավելի շուտ կնշանակի կենսաթոշակային օպտիմալացում:

ՌԴ ֆիննախին ենթակա գիտատեխնիկական ֆինանսական ինստիտուտը փորձում է մշակել այդ ռեֆորմի հիմնավորումը: Ռեֆորմը, ըստ թերթի, ենթադրում է ուժային կառույցների թոշակի տարիքի հասած աշխատակիցների կենսաթոշակի կրճատում: Խոսքը պաշտպանության նախարարության, ՆԳՆ, ԱԻՆ, Անվտանգության դաշնային ծառայության եւ այլ ուժային կառույցների աշխատակիցների մասին է, որոնք ստանում են այսպես ասած «զինվորական կենսաթոշակ»: Ռուսաստանի տնտեսական ծանր վիճակով պայմանավորված բյուջետային խնդիրները բերել են այդ թոշակներից հրաժարվելու որոշման քննարկման, որ տեղի է ունենում ՌԴ ֆիննախում:

Իբրեւ լուծում դիտարկվում է օրինակ որոշակի ֆինանսական փոխհատուցումը` երկամյա ժամկետով, որի ընթացքում նաեւ տվյալ աշխատակիցը կանցնի վերապատրաստման դասընթաց եւ կկարողանա դրանից հետո ապրել՝ այլ ոլորտում աշխատելով:

Ռեֆորմի ճակատագիրն իհարկե անորոշ է, հստակ չէ, թե ինչ վերջնական եզրակացություն կտա Պուտինը, ինչպես կարձագանքեն ուժային կառույցների ղեկավարները եւ անձնակազմերը: Նրանք իհարկե խիստ կդժգոհեն, եւ քիչ է հավանականությունը, որ Կրեմլը հավանության կարժանացնի այդպիսի դժգոհության առիթ հանդիսացող որոշումը:

Ընդ որում, խոսքը ոչ թե ներկայում արդեն թոշակ ստացողների թոշակը կրճատելու մասին է, այլ նրանց, ովքեր այժմ աշխատում են այդ համակարգերում եւ պետք է թոշակի անցնեն որոշ ժամանակ անց: ՌԴ ֆիննախը դիտարկում է այդպիսով տարեկան մի քանի հարյուր միլիարդ ռուբլի խնայելու տարբերակը: Ըստ տարբեր հաշվարկների` 200-ից մինչեւ 700 միլիարդ, կախված այն բանից, թե ինչ շրջանակներ կներառի թոշակի չեղարկումը: Բոլոր դեպքերում, այդ տեղեկությունը կարող է նաեւ բավական դժկամություն եւ դժգոհություն առաջացնել Հայաստանում, քանի որ հայտնի է, որ Հայաստանի ուժային կառույցների շատ ներկայացուցիչներ էլ պաշտոնավարումից հետո «թոշակավորվում» են Ռուսաստանում:

Այդ տեսանկյունից, իրավիճակը սակայն հարաբերական կլինի, եւ Ռուսաստանում կատարվելիք այդ ռեֆորմը կարող է էական նշանակություն ունենալ Հայաստանի ինքնիշխանության համար: Ավելորդ է նկարագրել, թե Հայաստանի ուժային կառույցների աշխատակիցների գործունեության համար ինչ ազդեցություն է այն, որ նրանք կարող են ակնկալել հետպաշտոնեական «թոշակավորում» Ռուսաստանում, առավել եւս, որ խոսքը բարձր թոշակի մասին է: Պարզ է, որ ուժայինը, ով ակնկալում է բարձր թոշակ ստանալ Ռուսաստանից, իր գործունեության ընթացքում ավելի շատ մտածելու է անել քայլեր, որոնք կարժանանան Ռուսաստանի խրախուսմանը: Այսինքն, ըստ էության ստացվում է, որ միայն այդ հանգամանքը կարող է Հայաստանի ուժային որոշ կառույցների որոշ աշխատակիցների մղել աշխատել ավելի շատ Ռուսաստանի, քան Հայաստանի համար:

Եթե Ռուսաստանում իրականություն դառնա ուժայինների թոշակների կրճատման այդ նախագիծը, ապա դա կարող է նշանակել, որ Հայաստանի ուժային կառույցների աշխատակիցների զգալի մասի մոտ կարող է ինքնաբերաբար նվազել «ռուսական մոտիվացիան»: Դա կունենա իր դրական ազդեցությունը նրանց աշխատանքում Հայաստանի նշանակության աստիճանի զգալի բարձրացման համար:

Ինչ խոսք, ինքնին անհեթեթ եւ նոնսենս է, երբ մի պետության ուժային կառույցի որեւէ աշխատակից կարող է աշխատանքային կարիերայից հետո «թոշակավորվել» այլ պետությունում: Դա սակայն մի իրողություն է, որը Հայաստանը քառորդ դար ղեկավարած «էլիտայի» սկզբունքային բացթողումներից մեկն է, որը փաստացի սպառնալիք է ինքնիշխանությանն ու ազգային անվտանգությանը: Եվ այդ իմաստով, խնդրի լուծումը իհարկե պետք է լինի Հայաստանում, Հայաստանի իշխանության որոշման մեջ, որով նախ պետք է բացառվի այլ պետությունում «թոշակավորումը», եւ միաժամանակ իհարկե պետք է Հայաստանի ուժային կառույցների աշխատակիցների համար ապահովվի սեփական պետությունում հանուն պետական շահի եւ անվտանգության աշխատանքի բարձր վարձատրությունն ու հետագա կենսաթոշակը: Դա իսկապես ազգային անվտանգության հարց է բոլոր առումներով:

Բայց Հայաստանի «էլիտան» կառավարում է «պրիմիտիվ գողությունների» սկզբունքով, իսկ այդ կառավարումը բացահայտող ուժային-իրավապահ համակարգ չկա, քանի որ չկա հայկական պետականության հետ կապված գաղափարա-արժեքային գերակա մոտիվացիա` մոտիվացիաները կապված են ռուսական պետականության հետ:

Այսօր՝ հոկտեմբերի 17-ին, խոշոր ավտովթար է տեղի ունեցել Երևանում, տեղեկացնում է Shamshyan.com-ը:

Ժամը14։20-ի սահմաններում Թբիլիսյան խճուղում բախվել են Hyundai  և Mercedes մակնիշի ավտոմեքենաները։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով, ըստ նախնական տեղեկությունների, 3 հոգի տեղափոխվել են հիվանդանոց։ Դեպքի վայր են ժամանել Արտակարգ իրավիճակների նախարարության փրկարար ծառայության Ավանի թիվ 11 և Արաբկիրի թիվ 5 հրշեջ-փրկարարական ջոկատները, ովքեր հոսանքազրկել են ավտոմեքենաները, փակել գազաբալոնները։

Նախնական տեղեկություններով՝ վթարի մեղավորը եղել է Hyundai-ի վարորդը, ով բախվել է Mercedes-ի հետնամասին, այնուհետև առաջ ընթանալով՝ կողաշրջվել։ Նշված ավտոբուսը սպասարկում է թիվ 46 երթուղին։

Ոստիկանությունն ու քննչական բաժինը պարզում են վարորդների և վիրավորների ինքնությունը։

168.am-ը գրում է.

Զինվորական քննչական գլխավոր վարչության երկրորդ կայազորային քննչական բաժնում քննվող քրեական գործով ձեռնարկված քննչական գործողությունների արդյունքում պարզվել են ժամկետային զինծառայող Վահագն Գագիկի Վիրաբյանի սպանության մի շարք հանգամանքներ, առերևույթ հանցագործություն կատարած անձի ինքնությունը։

Նախնական տվյալներով՝ 15.10.2016թ.՝ ժամը 08:40-ի սահմաններում, N զորամասի պահպանության տեղամասի մարտական դիրքում հերթապահության նշանակված ժամկետային զինծառայող, շարքային Վահագն Գագիկի Վիրաբյանի ուղղությամբ՝ արձակվել են կրակոցներ՝ վերջինիս պատճառելով մահացու հրազենային վիրավորումներ:

Դեպքի առթիվ երկրորդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով (սպանություն), կատարվում է նախաքննություն:

Կատարվել է դեպքի վայրի, դիակի արտաքին զննություններ, վերցվել են նմուշներ, նշանակվել է դիակի դատաբժշկական և այլ փորձաքննություններ: Ձեռնարկված անհետաձգելի քննչական գործողությունների արդյունքում պարզվել են մի շարք հանգամանքներ, այդ թվում հայտնաբերվել է հրազենը, որով զինծառայողի ուղղությամբ արձակվել են կրակոցները եւ թե ում է եղել այն ամրակցված։

Քննության արդյունքների մասին տեղեկություն կտրամադրենք լրացուցիչ։

ՀՀ առողջապահության նախարարության աշխատակազմի հիվանդանոցային բժշկական օգնության քաղաքականության բաժնի պետ Վարդան Վարդազարյանը Վլադիկովկասից տեղեկացնում է, որ տեղի 3 կլինիկայում այս պահի դրությամբ բուժվում է 8 տուժած։ Նրանցից 4­ը՝ Ռուսաստանի Դաշնության քաղաքացի, ազգությամբ ռուս տղաներ, ովքեր Հայաստան էին գալիս կարատեի մրցումներին մասնակցելու համար։ Մյուս 4-ը՝ երեք տղամարդ և մեկ կին, Հայաստանի Հանրապետության քաղաքացի են։ Նրանցից երեքը գտնվում է վերակենդանացման բաժանմունքում, իսկ մեկն այսօր է տեղափոխվել հիվանդասենյակ։ Որևէ մեկի կյանքին վտանգ չի սպառնում։

Վարդան Վարդազարյանը հեռախոսով հայտնեց, որ երեկ երեկոյան Վլադիկովկաս հասնելուն պես առաջինն այցելել են Մանկական հանրապետական կլինիկայում բուժվող տղաներին և ծանոթացել նրանց առողջական վիճակին, բուժման ընթացքին։
Այնուհետև ՀՀ ԱՆ արտակարգ իրավիճակների և զորահավաքային նախապատրաստության բաժնի պետ Գաբրիել Թեփելիկյանի հետ եղել են Վլադիկովկասի Հանրապետական կլինիկական հիվանդանոցում, որտեղ բուժվող ՀՀ քաղաքացի երկու տղամարդն էլ ունեն բազմակի կոտրվածքներ, այդ իսկ պատճառով գտնվում են մշտական անզգայացման տակ։ Երկուսի վիճակն էլ գնահատվում է ծանր։
Շտապօգնության կլինիկական հիվանդանոցում Մոսկվա¬-Երևան ավտոբուսի վթարից տուժած ՀՀ 2 քաղաքացիներից 1­ը պետք է վիրահատվի, իսկ մյուսը լրացուցիչ համակարգչային տոմոգրաֆիական հետազոտություն է անցնելու։

Վարդան Վարդազարյանը շեշտեց, որ բոլոր տուժածներն ամբողջ ծավալով ստանում են անհրաժեշտ բժշկական օգնությունը։ Նախարարության աշխատակիցները Հյուսիսային Օսեթիայի առողջապահության նախարարության և հիվանդանոցների մասնագետների հետ քննարկել են մեր հայրենակիցների բուժման ընթացքը և հետագա տեղափոխման հարցերը։

Տեղեկությունը՝ Առողջապահության նախարարի մամուլի քարտուղար Անահիտ Հայթայանի ֆեյսբուքյան էջից։