Համաձայն Կենտրոնական ընտրական հանձնաժողովի հրապարակած արդյունքների՝ ռեյտինգային ցուցակներով 40 հազարից ավելի ձայներ ստացած պատգամավորները երեքն են, ընդ որում՝ 3-ն էլ Հանրապետական կուսակցությունից: Արայիկ Գրիգորյանը հավաքել է ավելի քան 45 հազար ձայն, Կարեն Կարապետյանը՝ ավելի քան 44 հազար ձայն, Սամվել Ալեքսանյանը՝ ավելի քան 42 հազար ձայն:

Հաջորդ եռյակում՝ 30 հազարից ավելի ձայն հավաքել է նախկին վարչապետ Հովիկ Աբրահամյանի որդին՝ Արգամ Աբրահամյանը «Ծառուկյան» դաշինք: Նրա օգտին քվեարկել է ավելի քան 34 հազար քաղաքացի: 27 հազար ձայն հավաքել է ՀՀԿ-ական Ռոբերտ Սարգսյանը, 26 հազարից ավելի ձայն՝  ՀՀԿ-ական Հակոբ Բեգլարյանը:

13 ընտրատարածքներից յուրաքանչյուրում առանձնացրել ենք ամենաշատ ձայներ հավաքած 5 թեկնածուներին, որոնք միայն 3 կուսակցություն-դաշինքների ներկայացուցիչներ են՝ ՀՀԿ, «Ծառուկյան» դաշինք և «Ելք»:

Աշխարհահռչակ շանսոնիե Շառլ Ազնավուրն այս օրերին գտնվում է Ռուսաստանի Դաշնությունում և պատրաստվում է այնտեղ անցկացվելիք առաջիկա համերգին: Այսօր լրագրողների հետ հանդիպման ընթացքում շանսոնիեն պատասխանեց երեկ ՀՀ-ում տեղի ունեցած Ազգային ժողովի ընտրություններին առնչվող հարցին: Նա, մասնավորապես, ասաց հետևյալը.

«Ես երբեք չեմ խոսում քաղաքականությունից չնայած, որ քաղաքականության մեջ ունեմ բազմաթիվ ընկերներ, և նույնիսկ նրանց հետ հանդիպումների ընթացքում մենք զրուցում ենք արվեստից՝ գրականությունից, ճարտարապետությունից, երաժշտությունից: Ինչ վերաբերում է հայաստանյան ընտրությունների արդյունքներին, ապա ես ընդունում և ողջունում եմ ցանկացած ընտրության արդյունքներ, որ տեղի են ունեցել ժողովրդի կամքի ազատ դրսևորումով: Ես ուրախ եմ նրա համար, ով ընտրվել է ժողովրդի քվեարկության արդյունքում: Չեմ ցանկանում խոսել քաղաքական հարցերի մասին, սակայն եթե այդ մարդն ընտրվել է իմ ժողովրդի կողմից, ուրեմն նա իմ նախագահն է:

Եվ հետո, ես առանձնապես չեմ համակրում այն մարդկանց, ովքեր դուրս են գալիս երկրից և սկսում են քննադատել քաղաքականությունն ու երկիրը»:

iLur.am-ը հրապարակել է ՀՀ առաջին նախագահ Լևոն Տեր-Պետրոսյանը նախնական արձագանքը ապրիլի 2-ին տեղի ունեցած խորհրդարանական ընտրությունների վերաբերյալ.

Երկրում, որտեղ ազգային հարստության առյուծի բաժինը օրինական, թե անօրինական ճանապարհով կուտակված է մի քանի տասնյակ ընտանիքների ձեռքում, իսկ ժողովուրդը՝ դատապարտված կատարյալ թշվառության, ընտրությունների այլ արդյունք ակնկալելը քաղաքագիտական անգրագիտություն կլիներ։ Մեզ մնում է սպասել, թե ՀՀԿ-ն, ԲՀԿ-ն, ՀՅԴ-ն ու Ելքը ինչպես են վագրի թռիչքներով զարգացնելու Հայաստանի տնտեսությունը, միլիարդավոր դոլարի ներդրումների հոսք ապահովելու, հզորացնելու Հայոց բանակը, կանխելու հարաճուն արտագաղթը և կարգավորելու մեր ժողովրդի առջև կանգնած գլխավոր խնդիրը՝ Ղարաբաղյան հակամարտությունը։

Անկախ ընտրությունների արդյունքից, սակայն, անհրաժեշտ եմ համարում կատարել հետևյալ երկու անառարկելի արձանագրումները. Առաջին՝ Հայ Ազգային Կոնգրեսին հաջողվեց Ղարաբաղյան կարգավորման խնդիրը դարձնել Հայաստանի քաղաքական օրակարգի հրատապ հարց, ինչը մեր հակառակորդներն անգամ չեն ժխտում. և երկրորդ՝ կարճ ժամանակում ստեղծվեց «Խաղաղություն, հաշտություն, բարիդրացիություն» նշանաբանի շուրջ ձևավորված, թեկուզ առայժմ ոչ զանգվածային, հասարակական շարժում, որի հետագա ծավալմանը ես ամենևին չեմ կասկածում։ Դա հավատավորների շարժում է, որը Հայաստանին և Ղարաբաղին սպառնացող վերահաս աղետը կանխելուց բացի, այլ նպատակ չի հետապնդում։

Եթե Խորհրդարանում ներկայացված քաղաքական ուժերն ի զորու են այդ աղետը կանխել Ղարաբաղի գոյության պահպանման և ոչ մի թիզ հող չզիջելու ճանապարհով, մենք միայն երախտապարտ կլինենք նրանց։

Դիմելով, արդ, Հայ Ազգային Կոնգրեսի անդամներին ու համակիրներին, հարկ եմ համարում նշել, որ մեր օրակարգն ընտրությունների արդյունքներից ամենևին չի փոխվել։

Մենք հսկայական անելիք ունենք խաղաղության գաղափարը հասարակության լայն շրջանակների հավատամքը դարձնելու ուղղությամբ։ Հայաստանի և Ղարաբաղի գոյության, ապահովության ու բարգավաճման այլ երաշխիք գոյություն չունի, քան հարևանների հետ խաղաղության, հաշտության ու բարիդրացիության հաստատումը։

Խաղաղություն հիմա՛, և ոչ թե աղետից ու նոր, անիմաստ զոհերից հետո։ Սահմաններին զոհվող յուրաքանչյուր զինվորի արյունը այսուհետև նստելու է Խորհրդարանում ներկայացված քաղաքական ուժերի խղճին։

SHAMSHYAN.com-ի տեղեկություններով՝ քիչ առաջ արտակարգ դեպք է տեղի ունեցել Երևանում:

Ժամը 15:45-ի սահմաններում ահազանգ է ստացվել ոստիկանության Մաշտոցի բաժին, որ Հասրաթյան 16 շենքում գործող ընկերություններից մեկում կնոջ դի կա: Նշված հասցե են մեկնել ոստիկանության Մաշտոցի բաժնի օպերատիվ խումբը՝ բաժնի պետ Գրիշա Ամիրխանյանի գլխավորությամբ:

Ժամանել են նաև Հայաստանի քննչական կոմիտեի Երևան քաղաքի քննչական վարչության Աջափնյակ և Դավիթաշեն վարչական շրջանների քննչական բաժնի քննիչնեը: Ոստիկաններն ու քննիչերը այնտեղ հայտնաբերել են 77-ամյա Սուսաննա Հարությունյանի դին: Դատաբժշկի նախանական եզրակացության համաձայն ՝ դիակի վրա դռնության հետքեր չեն հայտնաբերվել:

Նշված վայրը օգտաործվում է ինչ-որ տուրիստական ընկերության կողմից , սակայն այս օրերին գործել է որպես ռեյտինգային ցուցակով ԱԺ պատգամավորի թեկնածու Արման Սահակյանի նախնըտրական շտաբ: Քաղաքացիներն սում էին, որ երբ մահացածի դին, ով, ըստ դատաբժշկի նախնական եզրակացության համաձայն, հանկարծամահ է եղել, տեղափոխել են շտաբականները՝ ողջ Ա. Սահակյանի նկարներով պաստառները հեռացրել են շենքի վրայից:

Փաստի առթիվ քննչական բաժնում նյութեր են նախապատրաստվում:

Ժամը11:40-14։00 րոպեին «Ելք» դաշինքի վստահված անձինք արձանագրել են հետևալ ընտրախախտումները և կասկածելի գործողությունները։

• 36/14 ընտրատեղամասում(թիվ 12 ընտրատարածք, Վայոց Ձոր, Եղեգնաձոր) կանխվել է քվեաթերթիկների գողության դեպք։ Ոստիկանությունը արձանագրել է։

• 34/38 ընտրատեղամասում (թիվ 12 ընտրատարածք, Սյունիք, Գորիս) նկատվել է զինծառայողների շարունակական կուտակումներ։

• 4/19 ընտրատեղամասում (թիվ2 ընտրատարածք, Արաբկիր) հանձանժողովի անդամները սպառնացել են «Ելք» դաշինքի վստահված անձանց։

• 24/4 ընտրատեղամասում (թիվ 9 ընտրատարածք, Լոռի, Շահումյան) քաղաքացիները քվեարկել են 100-ից ավել չկնքած կտրոններով։ Երբ «Ելք» դաշինքի վստահված անձը միջամտել է, հանձնաժողովի անդամները նրան սպառնացել են։

• 22/29 ընտրատեղամասում (թիվ 9 ընտրատարածք, Լոռի, Ղուրսալ) ոստիկանները քաղաքացուն բերման են ենթարկել «կարուսել» կոչվող ընտրախախտում կատարելու համար։

• 23/13 ընտրատեղամասում (թիվ 9ընտրատարածք, Լոռի) քաղաքացին հայտնաբերել է, որ «Ելք» դաշինքի քվեաթերթիկի 2-րդ էջում բացակայում է ռեյտինգային թեկնածուների ցուցակը։

• Թիվ 9 ընտրատարածքների տեղամասերից մեկում քաղաքացին ներկայացել է օգնող անձի հետ միասին։ Վերջինս գրպանից հանել է արդեն իսկ քվեարկած թիվ 4 քվեաթերթիկը և տվել ընտրողին, որպեսզի վերջինս դնի ծրարի մեջ։

• 18/29 ընտրատեղամասում (թիվ 7 ընտրատարածք, Արագածոտն, Աշնակ) քաղաքացիներին բաժանել են կարմիր գրիչներ։

• 29/48 ընտրատեղամասում (թիվ 10 ընտրատարածք, Կոտայք, Ջրվեժ)    քվեաթերթիկների համար նախատեսված ակցիզները դրել են միայն քաղաքացիների պահանջից հետո։

• 35/59 ընտրատեղամասում (թիվ 12 ընտրատարածք, Սյունիք, Քաջարան) Պղնձամոլիբդենային կոմբինատի աշխատակիցները հանձնաժողովի նախագահի պահանջով բաց են քվեարկել։

• 23/36 ընտրատեղամասում (թիվ 9 ընտրատարածք, Լոռու մարզ Վանաձոր) «Ելք» դաշինքի վստահված անձը հայտնաբերել է, որ ընտրողների ցուցակում որոշ մարդկանց անվան դիմաց կատարվում են մատիտով նշումներ, որից հետո հանձնաժողովը որոշում է կայացրել հեռացնել «Ելք» դաշինքի վստահված անձին և չի ցանկանում տրամադրել հեռացման արձանագրությունը։

• Ահազանգ է ստացվել, որ Բյուրական համայնքի ղեկավար Զարզանդ Բաբայանը պոկել է վստահված անձերի բեյջերը և իրականացնում է ցուցակներով ուղղորդված քվեարկություն։

• «Ելք» դաշինքի վստահված անձինք նկատել են, որ ԳԵՏԱ՝ «Գեղամա երիտասարդական տարածքային ասոցիացիա» դիտորդական առաքելություն իրականացնող կազմակերպությունը հստակ ուղղորդել է ընտրողներին։

• 31/39 ընտրատեղամասում (թիվ 11 ընտրատարածք, Շիրակ, Գյումրի) դիտորդական առաելություն իրականացնող անձը ուղղորդել է ընտրողներին քվեարկել Ծառուկյան դաշինքի համար։ Հանձնաժողովը հեռացրել է դիտորդին, սակայն որոշ ժամանակ անց վերջինս նորից գրանցվել է ընտրատեղամասում։

Այսօր՝ ապրիլի 2-ին, Երևանի ճանապարհային ոստիկանության պետ, ոստիկանության փոխգնդապետ Արման Հակոբյանի կարգադրությամբ Երևանի ՃՈ պահապնավող հատուկ տարածք են տեղափոխվել Mercedes G500 մակնիշի 09 US 999 համարանիշի և Mercedes G500 մակնիշի 99 OF 699 համարանիշի ավտոմեքենաները:

Ւնչպես հայտնում է ֆոտոլրագրող Գագիկ Շամշյանը, նշված ավտոմեքենաները «ԳԱԻ պլաշչադկա» են տեղափոխվել Բաշինջաղյան փողոցի ընտրական տեղամասերից մեկի տարածքից, այն դեպքում, երբ օրենքով արգելվում է տրանսպորտային միջոցների մուտքը ըտնրատեղամաս:

Գ. Շամշյանը հայտնում է նաև, որ ավտոմեքենաների վրայից հանված են եղել համարանիշները, որոնք ճանապարհային ոստիկանության աշխատակիցները հայտնաբերել են բեռնախցիկում:

Ճանապարհային ոստիկանությունը կրկին անգամ հորդորում է վարորդներին, որպեսզի ընտրատեղամասի տարածքում իրենց երկաթյա նժույգները չկայանեն: Հակառակ դեպքում օրինախախտների նկատմամբ կազմվելու են վարչական ակտեր, իսկ տրանսպորտային միջոցները տեղափոխվելու են ՃՈ պահպանվող հատուկ տարածքներ:

shamshyan.com

Ժամը 08։00-09։30 րոպեին ԵԼՔ դաշինքի վստահված անձինք արձանագրել են հետևալ ընտրախախտումները։

• Արձանագրվել են մասսայական դեպքեր, որ կտրոնի համարը չի համապատասխանել մատյանում նշված համարին։ Ահազանգերը ստացվել են Վանաձորից և Երևանից (մասնավորապես՝ ընտրատեղամաս 8/12, թիվ 3 ընտրատարածք, Մալաթիա-Սեբաստիա համայնք)։

• Արձանագրվել են քվեախցիկում գտնվող աղբարկղի դատարկման մասսայական դեպքեր։ Քաղաքացիները չօգտագործված քվեաթերթիկները դուրս են հանում։ Ահազանգերը ստացվել են Վանաձորից, Երևանից, Վայքից։

• Չի պահպանվում քվեաթերթիկների դասավորության 1-9 համարակալման հերթականությունը։

• Հանձնաժողովների նախագահները հրաժարվում են արձանագրություն կազմել տեխնիկական սարքերի շեղումների վերաբերյալ։ Սարքի չաշխատելու պարագայում մատյանում չեն գրանցում քաղաքացու անձնագրի տվյալները (մասնավորապես՝ 16/1, թիվ 5 ընտրատարածք, Արարատի մարզ)։

• Քաղաքացիները ներկայացել են օգնականներով, այնինչ դրա անհրաժեշտությունը չի եղել, իսկ հանձնաժողովի նախագահը հրաժարվել է արձանագրել (մասնավորապես 15/7 ընտրատեղամասում, թիվ 7 ընտրատարածք, Արագածոտնի մարզ)։

• Հայտնաբերվել է, որ Հայաստանի Հանրապետական կուսակցության և Հայաստանի կոմունիստական կուսակցության քվեաթերթիկների անկյունները սևացրած են եղել։

2016 թվականի տարեկան զեկույցում Մարդու իրավունքների պաշտպանը հայտնում է, որ Հայաստանի քրեակատարողական հիմնարկներում գերբնակեցման խնդիրը շարունակում է մնալ չլուծված:

2016 թվականին Արդարադատության նախարարության կողմից քայլեր են ձեռնարկվել ՔԿՀ-ների գերբնակեցման խնդիրը լուծելու համար, սակայն այդ քայլերը չեն ենթադրել համաներման, ներման կամ պրոբացիոն ծառայությունների կիրառման տեսքով լուծել խնդիրը, այլ միակ ձևը, որ կարող էր թեթևացնել կալանավայրերը 2016-ին դիտվել է «Արմավիր» քրեակատարողական հիմնարկը շահագործման հանձնելը, ինչը չի լուծել խնդիրը:

ՄԻՊ-ն անդարարձել է, որ 2016 –ին ևս «Նուբարաշեն» քրեակատարողական հիմնարկի ծանրաբեռնվածության խնդրիը չի լուծվել. գրանցվել են դեպքեր, երբ 30-35 քմ մակերեսով խցերում 10 մարդ է բնակվել:

Գերբնակեցման խնդիր է արձանագրվել նաև «Վարդաշեն» քրեակատարողական հիմնարկում: Չեն պահպանվել մեկ անձին բաժին հասնող բնակելի տարածության նորմերը:

ՄԻՊ-ի զեկույցում անդրադարձ է եղել ՔԿՀ-երում տարբեր ՝ բժշկական օգնության ապահովման, սանիտարահիգիենիկ, պահման պայմանների և այլնի վերաբերյալ խախտումների դեպքերին:

Արման Թաթոյանը իր զեկույցում նշել է, որ մտահոգիչ է մնում կալանքը որպես խափանման միջոց կիրառելու հարցը:

Ուսումնասիրելով 2011-2016 թվականների դատարանների գործունեության վերաբերյալ հաշվետվությունը՝ պարզել է, որ 2011 թվականին կալանավորման վերաբերյալ միջնորդությունների ընդհանուր թիվը կազմել է 3262, 2013 թվականին այդ ցուցանիշը կազմել է 3172, 2016 թվականին՝ 2563:

«Կարծում ենք, որ միջնորդությունների բավարարման այսպիսի բարձր շեմն ինքնին վկայում է դատարանների կողմից կալանքի կիրառության հիմնավորվածության կանխավարկածով առաջնորդվելու և կալանքը բացառիկ դեպքերում, այսինքն՝ որպես «վերջին միջոց» կիրառելու կայուն պրակտիկայի բացակայության մասին»,- արձանագրված է զեկույցում:

Անհամեմատ ցածր են կալանավորման միջնորդությունների մասնակի բավարարման դեպքերը (2015 թվականին՝ 11, իսկ 2016 թվականին` 13 դեպք) կալանքի կիրառության պրակտիկայի ընդհանուր պատկերը փոփոխելու առումով:

Ըստ ՄԻՊ-ի զեկույցի մտահոգիչ են նաև կալանքի ժամկետը երկարացնելու մասին միջնորդությունների և դրանց բավարարման քանակական ցուցանիշները:

2016 թվականին ներկայացվել են այդպիսի 1795 միջնորդություն, որոնցից բավարարվել է 1691-ը (միջնորդությունների ընդհանուր թվի 94.2 տոկոսը):

ՄիՊ-ի արձանագրած փաստերը և թվերը բերում են այն համոզման, որ համակարգում իրական բարեփոխումները անհրաժեշտ են:

Աննա Գրիգորյան

Ի կատարումն ՀՀ ընտրական օրենսգրքի 8-րդ հոդվածի 7-րդ մասի՝ Ազգային ժողովի ընտրությունների ժամանակ` քվեարկության նախորդ օրը, լիազոր մարմինը հրապարակում է ՀՀ ընտրողների ռեգիստրում ընդգրկված ընտրողների ընդհանուր թիվը` նշելով նաև ըստ գտնվելու վայրի ընտրողների, հաշվառում չունեցող ընտրողների, ընտրական տեղամասեր գործուղվող ոստիկանության ծառայողների, ստացիոնար բուժում իրականացնող բժշկական հաստատությունում գտնվող ընտրողների ընդհանուր թիվը:

Քվեարկության նախորդ օրը ՀՀ ընտրողների ռեգիստրում ընդգրկված ՀՀ Ազգային ժողովի ընտրությունների ընտրողների ընդհանուր թիվն է` 2.564.195, որից ըստ գտնվելու վայրի ընտրողների և ըստ գտնվելու վայրի ընտրական տեղամասում՝ տեղամասային ընտրական հանձնաժողովի անդամների թիվը 28.277 է։

Հաշվառում չունեցող ընտրողների թիվը ` 915, ընտրական տեղամասեր գործուղվող ոստիկանության ծառայողների թիվը՝ 197, ստացիոնար բուժում իրականացնող բժշկական հաստատությունում գտնվող ընտրողների թիվը՝ 2001:

Ոստիկանությունը հաղորդագրություն է տարածել, ըստ որի՝ մարտի 31-ին, ժամը 23.15-ին, ոստիկանության Երևան քաղաքի վարչության օպերատիվ կառավարման կենտրոնից ոստիկանության Մալաթիայի բաժնում հաղորդում է ստացվել, որ իրենց է զանգահարել ԱԺ պատգամավոր Նիկոլ Փաշինյանը և հայտնել, որ Սվաճյան և Անդրանիկի փողոցների խաչմերուկում իրենց վստահված անձանց վրա զինված հարձակում է տեղի ունեցել և գողացել են դրոշները:

Ապրիլի 1-ին, ժամը 1-ին, 1992 թ. ծնված Հայկ Ս.-ն հաղորդում է տվել, որ մարտի 31-ին, ժամը 22.50-ին, Անդրանիկի և Սվաճյան փողոցների խաչմերուկի մոտ, վիճաբանության ժամանակ, անհայտ անձը հարվածել է իրեն՝ պատճառելով վնասվածքներ, ինչպես նաև հանել է ատրճանակը և ուղղել իր վրա, սակայն վնասազերծվել է 1994 թ. ծնված Գառնիկ Վ.-ի կողմից:

Ահազանգը ստանալուն պես դեպքի վայր են մեկնել ոստիկանության ծառայողներ՝ ոստիկանության Երևան քաղաքի վարչության պետ, ոստիկանության գնդապետ Սարգիս Մարտիրոսյանի գլխավորությամբ:

Կատարվել են անհետաձգելի մի շարք միջոցառումներ և կարճ ժամանակ անց ոստիկանության ծառայողները պարզել են հանցագործությունը կատարողի ինքնությունը՝ 1977 թ. ծնված Արթուր Ա.:

Հարուցվել է քրեական գործ ՀՀ քրեական օրենսգրքի 258 հոդվածի 2-րդ մասի հատկանիշներով:

Արթուր Ա.-ն ձերբակալված է: Ատրճանակը ոստիկանություն է ներկայացվել Ն. Փաշինյանի կողմից:

Նշանակվել են համապատասխան փորձաքննություններ:

Կատարվում է քննություն:

Հ.Գ. Արթուր  Ա.-ն Արթուր Այվազյանն է(Մանախ) մականունով, որը վերջերս էր դուրս եկել կալանավայրից, նա եղել է Շմայսիհորեղբորրդու՝ Միհրան Մովսիսյանի անվտանգության աշխատակիցը և սպանության համար դատապարտվել երկարատև ազատազրկման: