Թուրքիան աջակցելու է ղարաբաղյան հակամարտության կարգավորման ցանկացած բանաձևին, որը հարմար կլինի Ադրբեջանի համար:

Tass-ի փոխանցմամբ՝ այս մասին հայտարարել է այդ երկրի արտգործնախարար Մևլութ Չավուշօղլուն՝ հանդես գալով Բաքվում՝ Ադրբեջանի, Պակիստանի և Թուրքիայի արտգործնախարարների միջև կայացած եռակողմ հանդիպումից հետո տեղի ունեցած մամուլի ասուլիսի ժամանակ:

«Թուրքիան ջանքեր է գործադրում ղարաբաղյան հակամարտությունը կարգավորելու և ադրբեջանական հողերն ազատագրելու ուղղությամբ: Մենք հավանություն կտանք ցանկացած բանաձևի, որը կգոհացնի Ադրբեջանին»,- ասել է նա:

Չավուշօղլուի խոսքերով՝ ԵԱՀԿ Մինսկի խմբի համանախագահների հետ ունեցած հանդիպմանը, ինքը կոչ է արել միջազգային միջնորդներին գործել ավելի ակտիվ, վճռական և անկեղծ:

Թուրքիայի արտգործնախարարը նաև ընդգծել է, որ իր երկիրն աջակցում է նաև Ռուսաստանի ջանքներին ուղղված ղարաբաղյան հակամարտության կարգավորմանը:

NewsBook-ի տեղեկություններով՝ ՀՀ պաշտպանության նախարարության ղեկավարությունը որոշում է կայացրել զբաղեցրած պաշտոնից ազատել ՀՀ ԶՈւ Գլխավոր շտաբի պետի տեղակալ, գեներալ-լեյտենանտ Հայկազ Բաղմանյանին։ Նրա հետ միասին ԶՈՒ գլխավոր շտաբի պետի տեղակալի պաշտոնը կլքի նաև Ստեփան Գալստյանը:

Եթե Հայկազ Բաղմանյանի դեպքում ամեն ինչ կարծես թե սպասելի ու բնական էր, ապա Ստեփան Գալստյանի պարագան փոքր ինչ այլ է: Վերջինս համակարգի հնաբնակներից է և բավականին լուրջ անուն ու հեղինակություն ունի: Ի տարբերություն Հայկազ Բաղմանյանի՝ նրա անունը երբեք չի շրջանառվել բիզնես կամ կրիմինալ պատմությունների շրջանակներում: Նրան պատկանող դղյակների ու բիզնեսների մասին որևէ տեղեկություն չկա, ճիշտ հակառակը՝ ասում են, որ Գալստյանն  իր գործի գիտակն էր ու համակարգը լավ իմացողներից մեկը:

Ի դեպ, խոսակցություններն այն մասին, թե Ստեփան Գալստյանը (ինչպես նաև Հայկազ Բաղմանյանը) խնդիրներ ունեին ԶՈՒ գլխավոր շտաբի պետ Մովսես Հակոբյանի հետ, ինչ խոսք, ճշմարտություն են: Բայց խնդիրն այն է, որ միայն Մովսես Հակոբյանի կամքով այս մարդկանց պաշտոններից ազատելը իրատեսակ չէր կարող համարվել: Կոնկրետ այս պարագայում խնդիրն ավելի հեռուն է գնում:

Մեր տեղեկություններով՝ ՀՀ պաշտպանության նախարար Վիգեն Սարգսյանն էլ իր հերթին է նպատակադրվել համակարգից հեռացնել հին դեմքերին, նաև նրանց, որոնք հեշտ կառավարելի չեն: Ոչ վաղ անցյալում (ինչու ոչ՝ նաև այսօր) Բաղմանյանն ինքն էր շատերին ենթարկում ու ենթարկում է իր կամքին՝ օգտագործելով իր ձեռքի տակ եղած բոլոր լծակները: Ստեփան Գալստյանին ճանաչողներն էլ պնդում են, որ այս մարդու պրոֆեսիոնալիզմը իրեն թույլ էր տալիս ներկայացնելու սեփական մոտեցումն ու կարծիքը, ասել է թե՝ հենց այնպես չտրվել ազդեցությունների:

Մանրամասն՝ սկզբնաղբյուր կայքում

Խոշտանգման դեպքի վերաբերյալ ՀՀ հատուկ քննչական ծառայությունում քննված քրեական գործի նախաքննության ընթացքում ձեռք բերված բավարար ապացույցներով հիմնավորվել է, որ ՀՀ ոստիկանության Տավուշի մարզային վարչության Իջևանի բաժնի քրեական հետախուզության բաժանմունքի պետը 2017 թվականի հոկտեմբերի 4-ին խոշտանգել է Տավուշի մարզի բնակիչ Ժորա Սիմոնյանին: Այս մասին հայտնում է ՀՔԾ լրատվական ծառայությունը:

Այսպես, ՀՀ ոստիկանության Տավուշի մարզային վարչության Իջևանի բաժնի ծառայողները 2017 թվականի հոկտեմբերի 4-ին Տավուշի մարզի Այգեհովիտ գյուղի բնակիչ Վահրամ Սիմոնյանին ապօրինի ծառահատում կատարելու կասկածանքով բերման են ենթարկել ոստիկանության Իջևանի բաժին:

Ոստիկանության աշխատակիցների պահանջով Վ. Սիմոնյանի եղբայրը՝ Ժորա Սիմոնյանը, ՀՀ ոստիկանության Իջևանի բաժին է տեղափոխել եղբոր վարած ավտոմեքենան, որից հետո ոստիկանները նրան ուղեկցել են Իջևանի բաժնի աշխատասենյակներից մեկը:

Այնուհետև աշխատասենյակ է մտել հիշյալ բաժնի քրեական հետախուզության բաժանմունքի պետ Գերասիմ Մարդանյանը և ենթադրելով, որ Ժորա Սիմոնյանը նույնպես մասնակցել է ապօրինի ծառահատմանը, եղբոր հետ գտնվել է նույն ավտոմեքենայում ու չի ենթարկվել ավտոմեքենան կանգնեցնելու` ոստիկանների պահանջին, այդ արարքի համար պատժելու նպատակով խոշտանգել է վերջինիս. ապտակել է դեմքին, ոտքերով հարվածել որովայնին և ոտքերին՝ պատճառելով մարմնական վնասվածքներ:

Հիշյալ հանցավոր արարքի կատարման համար Գերասիմ Մարդանյանին մեղադրանք է առաջադրվել ՀՀ քրեական օրենսգրքի 309.1 հոդվածի 1-ին մասով:

Քրեական գործի նախաքննությունն ավարտվել է: Գործը մեղադրական եզրակացությամբ հանձնվել է դատավարական հսկողություն իրականացնող դատախազին` այն հաստատելու և դատարան ուղարկելու համար:

ՀՀ նախագահ Սերժ Սարգսյանի հրամանագրով Արմեն Գևորգյանը նշանակվել է Հայաստանի Հանրապետության վերահսկիչ պալատի խորհրդի անդամ։ Այս մասին տեղեկացնում է ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունը։  «Ղեկավարվելով 2005 թվականի փոփոխություններով Հայաստանի Հանրապետության Սահմանադրության 55-րդ հոդվածի 5-րդ կետով և հիմք ընդունելով «Վերահսկիչ պալատի մասին» Հայաստանի Հանրապետության օրենքի 10-րդ հոդվածի 1-ին մասը` որոշում եմ.  Արմեն Գևորգյանին նշանակել Հայաստանի Հանրապետության վերահսկիչ պալատի խորհրդի անդամ` վեց տարի պաշտոնավարման ժամկետով»,-ասվում է նախագահի հրամանագրում:

Այսօր՝ նոյեմբերի 29-ին, սպանություն է տեղի ունեցել Լոռու մարզում: Ժամը 01:10-ի սահմաններում Ալավերդու բժշկական կենտրոնից Ոստիկանության Թումանյանի բաժին ահազանգ է ստացվել, որ հերթապահ բժիշկների խումբը Սանահին Սարահարթի 3/5 շենքի բակում՝ ավտոտնակի հարևանությամբ գտնվող հատվածից, ձախ ազդրի և հետույքային շրջանի, աջ գոտկային շրջանի, աջից կրծքավանդակի հետին մակերեսի և վզի շրջանի կտրած-ծակած վերք, մահացած վիճակում հիվանդանոց է տեղափոխել մի քաղաքացու, իսկ մի քաղաքացու էլ՝ որովայնի շրջանում սուր կտրող-ծակող գործիքից ստացած մարմնական վնասվածքներով՝ անգիտակից վիճակում:

Ինչպես հայտնում է ֆոտոլրագրող Գագիկ Շամշյանը, հիվանդանոց են մեկնել Ոստիկանության Լոռու մարզային վարչութան օպերատիվ խումբը՝ մարզի ոստիկանապետ, Ոստիկանության գնդապետ Արամ Ղազարյանի գլխավորությամբ: Ժամանել են նաև Հայաստանի քննչական կոմիտեի Լոոռւ մարզային քննչական վարչության խումբը՝ վարչության պետ Արդարադատության գնդապետ Թաթուլ Շուշանյանի գլխավորությամբ: Ոստիկաններն ու քննիչները պարզել են, որ մահացածը Ալավերդի քաղաքի Սանահին Սարահարթ 3/6 շենքի բնակիչ, 30-ամյա Հայկ Սիրադեղյանն էր, իսկ վիրավորը Սանահին Սարահարթ թաղամասում հաշվառված, սակայն Լոռու մարզի Շնող գյուղում բնակվող, 26-ամյա Արմեն Մակոյանն է: Փաստի առթիվ Լոռու մարզային քննչական վարչության պետ Թաթուլ Շուշանյանի որոշմամբ ստեղծվել է քննչական խումբ՝ Թումանյանի քննչական բաժնի պետ Էդվարդ Կարապետյանի գլխավորությամբ: Մինչ ոստիկանների մի խումբը հիվանդանոցում որոշ փաստեր էին պարզում, դեպքի վայրում աշխատում էին Ոստիկանության Թումանյանի բաժնի օպերատիվ խումբը՝ Թումանյանի ոստիկանպետ Արտակ Գուրջանյանի և քննչական բաժնի պետի գլխավորությամբ: Փաստի առթիվ քննչական բաժնում հարուցվել է քրեական գործ՝ ՀՀ քր. օր-ի 104 հոդվածի 1-ի մասի /սպանություն/ և 112 հոդվածի 1-ին մասի /դիտավորությամբ առողջությանը ծանր վնաս պատճառելը/ հատկանիշներով: Ոստիկանությունն ու քննչական բաժինը ձեռնարկելով անհրաժեշտ օպերատիրվ-հետախուզական և քննչական համատեղ գործողություններ՝ հանցագործություն կատարելու կասկածանքով Ոստիկանության Թումանյանի բաժի են բերման ենթարկել Ալավերդի քաղաքի բնակիկչ, 28-ամյա Գարիկ Դ.-ին, ով քննիչի որոշմամբ ձերբակալվել է: Գ. Շամշյանի տեղեկություններով՝ սպանված Հ. Սիրադեղյանը աշխատում էր «Թեղուտ» ՓԲԸ-ում:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

ՀՀ հատուկ քննչական ծառայությունում դեռևս 09.06.2012թ.-ին քրեական գործ է հարուցվել փաստաթղթեր կեղծելու, խաբեությամբ ուրիշի գույքը հափշտակելու և հափշտակության փորձ կատարելու, ինչպես նաև դատախազի կողմից կաշառք ստանալու դեպքերի առթիվ:

Այս մասին հայտնում են ՀՀ հատուկ քննչական կոմիտեի լրատվական ծառայությունից։

Հիշյալ գործով պարզվել է, որ 40.000 ԱՄՆ դոլար վարկ ստանալու համար ՀՀ քաղաքացի Սերգեյ Ափոյանի կողմից կեղծ սեփականության վկայական ներկայացնելու վերաբերյալ հաղորդմանն օրենքով սահմանված կարգով ընթացք չտալու համար Արաբկիր և Քանաքեռ-Զեյթուն վարչական շրջանների դատախազության նախկին ավագ դատախազ Խաչատուր Բաղդասարյանը միջնորդ Արթուր Ղուկասյանի միջոցով 9.000 ԱՄՆ դոլար կաշառք է պահանջել Ս. Ափոյանից:

Մասնավորապես, 2012 թվականի սեպտեմբերի 3-ին և 4-ին ավագ դատախազն անձամբ` միջնորդի միջոցով Ս. Ափոյանից մաս-մաս ստացել է համապատասխանաբար 8.000 և 1.000 ԱՄՆ դոլար կաշառք:

Հիշյալ ծանր հանցանքը կատարելու` առանձնապես խոշոր չափերով կաշառք ստանալու համար Խ. Բաղդասարյանը 10.09.2012թ.-ին ներգրավվել է որպես մեղադրյալ, սակայն քննությունից թաքնվելու հիմքով վերջինիս նկատմամբ հայտարարվել է հետախուզում: Նույն օրը դատարանի որոշմամբ նրա նկատմամբ որպես խափանման միջոց է ընտրվել կալանավորումը, որից հետո նշված քրեական գործով վարույթը կասեցվել է մինչև հետախուզվող մեղադրյալի հայտնաբերումը:

Խ. Բաղդասարյանը հայտնաբերվել է Ուկրաինայի իրավապահ մարմինների կողմից և 2017 թվականի նոյեմբերի 24-ին ՀՀ ոստիկանության աշխատակիցների կողմից տեղափոխվել Հայաստան: Նույն օրը ՀՀ հատուկ քննչական ծառայությունում որոշում է կայացվել  հետախուզվողին հայտնաբերելու հիմքով քրեական գործի վարույթը վերսկսելու մասին: Նրան մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով նախատեսված` առանձնապես խոշոր չափերով կաշառք ստանալու համար: 25.11.2017թ.-ին ավագ դատախազի նկատմամբ ընտրված խափանման միջոց կալանավորումը Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի կողմից վերահաստատվել է:

Օրերս մամուլում տեղեկություն կար, որ ծեծկռտուք է տեղի ունեցել ավագ քննիչ, 26-ամյա Սուրեն Նազարյանի, Կենտրոն և Նորք-Մարաշ վարչական շրջանների դատախազության դատախազ, 32-ամյա Նարեկ Խաչատրյանի, նույն դատախազության ավագ դատախազ, 32-ամյա Հայկ Խաչատրյանի միջև:

Ավելի կոնկրետ, Երևան քաղաքի Կենտրոն և Նորք-Մարաշ վարչական շրջանների քննչական բաժնի պետ Վիգեն Մեսրոպյանի ներկայությամբ դատախազներ Հայկ և Նարեկ Խաչատրյանները ծեծի են ենթարկել ավագ քննիչ Սուրեն Նազարյանին:

NEWSPRESS.am-ի տեղեկություններով՝ ծեծկռտուքը տեղի է ունեցել հենց Վիգեն Մեսրոպյանի ներկայությամբ և նրա աշխատասենյակում:

Ըստ մեզ հասած տեղեկությունների` երկու դատախազ եղբայրները պարզապես ծեծել են ավագ քննիչին, երբ քննչական բաժնի պետի հետ քննարկվել է հերթական քրեական գործը, և բանը հասել է քննիչին ծեծելուն, իսկ Վիգեն Մեսրոպյանը չի միջամտել և թույլ է տվել ծեծեն իր աշխատակցին:

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր հրապարակվեց ԼՂՀ ՊԲ նախկին հրամանատար Սամվել Բաբայանի և մյուսների գործով դատավճիռը։

«Մենք գործ ունենք ենթադրության վրա հիմնված նախաքննության եզրակացության հետ: Չներկայացվեց ենթադրյալ հանցագործության, այսպես կոչված, մոտիվը: Այսինքն` ամբողջ շղթան պետք է բացահայտվեր մեղադրողի կողմից, բայց հասկանալի չդարձավ, որ եթե, ենթադրենք ինչ-որ գործողություն արել են, ապա ինչի համար են արել: Իսկ դա պարտադիր պայման է դատական գործընթացի համար»,- այսօր Կենտրոն և Նորք Մարաշ վարչական շրջանների ընդհանուր իրավասության դատարանում Արցախի պաշտպանության նախկին նախարար Սամվել Բաբայանի դատավճռի հրապարակումից հետո լրագրողների հետ զրույցում ասել է «Համախմբում» կուսակցության ներկայացուցիչ Անդրանիկ Թևանյանը:
Նա նշել է, որ Բաբայանի գործը հասնելու է մինչև Եվրոդատարան:

Սամվել Բաբայանը դատապարտվեց 6 տարվա ազատազրկման, Սանասար Գաբրիելյանը` 3 տարվա ազատազրկման, Անդրանիկ Քոչարյանը՝ 2 տարվա ազատազրկման (պայմանականորեն չկիրառել), Կարեն Քոչարյանը՝ 2,6 տարվա ազատազրկման (պայմանականորեն չկիրառել), Ժորա Զաքարյանը՝ 2 տարվա ազատազրկման (պայմանականորեն չկիրառել), Արմեն Պողոսյանը` 2 տարվա ազատազրկման, Դավիթ Հարությունյանը՝ 2 տարվա ազատազրկման (պայմանականորեն չկիրառել):

Վճիռը մեկնաբանեց քաղաքագետ Անդրանիկ Թևանյանը:

Պաշտոնեական դիրքի չարաշահման փաստերով ՀՀ հատուկ քննչական ծառայությունում քննված քրեական գործով կատարված նախաքննության արդյունքում բացահայտվել է, որ ՀՀ ոստիկանության Կոտայքի մարզային վարչության Նաիրիի բաժնի համայնքային ոստիկանության բաժանմունքի տեսուչը, նույն բաժանմունքի պետն ու Նաիրիի բաժնի պետի տեղակալը, նախնական համաձայնությամբ, հանցագործությունների բացահայտման ցուցանիշները բարձր ներկայացնելու անձնական շահագրգռվածությունից ելնելով, չարաշահել են պաշտոնեական դիրքն ու թաքցրել իրենց կողմից սպասարկվող տարածքում կատարված հանցագործության դեպքը:

Այսպես, Եղվարդ քաղաքի բնակիչ Սրբուհի Մեսրոպյանը 27.02.2017թ.-ին ՀՀ ոստիկանության Կոտայքի մարզային վարչության Նաիրիի բաժնի ՀՈԲ տեսուչ Գևորգ Հակոբյանին հաղորդում է տվել նախկին ամուսնու կողմից ապօրինի թմրամիջոց պահելու մասին: Մասնավորապես, իր բնակարան այցելած հիշյալ ոստիկանին ցույց է տվել նախկին ամուսնու կողմից թաքցրած` պոլիէթիլենային տոպրակով փաթեթավորված թմրամիջոցը: Սակայն ոստիկանը, հանցագործության մասին հաղորդում ընդունելու, այդ ուղղությամբ անհրաժեշտ միջոցառումներ ձեռնարկելու՝ դեպքի վայրը զննելու և առկա փաստերն արձանագրելու փոխարեն, իր բջջային հեռախոսով լուսանկարել է թմրամիջոցը և Ս. Մեսրոպյանին հավաստիացրել, որ դեպքին օրենքով սահմանված կարգով ընթացք կտրվի:

Նույն օրը Գ. Հակոբյանը հանցագործության դեպքի մանրամասների մասին անձամբ զեկուցել է իր վերադասներին` Նաիրիի բաժնի համայնքային ոստիկանության բաժանմունքի պետ Էմիլ Մովսիսյանին և նույն բաժնի պետի տեղակալ Սարգիս Բաղդասարյանին: Սակայն վերջիններս, իրենց հերթին, հիշյալ հանցագործության մասին հաղորդում չեն ընդունել և սահմանված կարգով միջոցառումներ չեն ձեռնարկել հանցագործության բացահայտման ուղղությամբ:

Հիշյալ դեպքից 10 օր հետո Ս. Մեսրոպյանը կրկին զանգահարել է տեսուչ Գ. Հակոբյանին և տեղեկացրել, որ ամուսինը վերցրել է թմրամիջոցի փաթեթը և դուրս եկել բակ: Ս. Մեսրոպյանը ոստիկանության աշխատակցին խնդրել է գալ և տեղում բացահայտել հանցագործության դեպքը: Գ. Հակոբյանն այդ մասին կրկին տեղեկացրել է իր ղեկավարներին, այդ թվում՝ Է. Մովսիսյանին և Ս. Բաղդասարյանին, սակայն վերջիններս, թմրամիջոցի ձեռք բերման աղբյուրը պարզելու ուղղությամբ լրացուցիչ աշխատանքներ չկատարելու և թմրամիջոցի իրացման վերաբերյալ իրենց կողմից սպասարկվող տարածքում բացահայտման բացասական ցուցանիշներ չունենալու անձնական շահագրգռվածությունից ելնելով, նախնական համաձայնությամբ, չեն կատարել իրենց ծառայողական պարտականությունները՝ սահմանված կարգով ընթացք չեն տվել քաղաքացու կողմից ապօրինի թմրամիջոց պահելու դեպքին, չեն կանխել դրա հնարավոր իրացումը և միջոցներ չեն ձեռնարկել հանցագործություն կատարած անձին տեղում բռնելու ուղղությամբ:

Ոստիկանության վերը նշված պաշտոնյաների գործողությունների հետևանքով հանցագործության դեպքը չի բացահայտվել, ինչպես նաև էական վնաս է պատճառվել պետության օրինական շահերին` հեղինակազրկվել է պետական իշխանության մարմինը՝ ՀՀ ոստիկանությունը:

Այսպիսով, վերը նկարագրված հանցավոր արարքները կատարելու համար ՀՀ ոստիկանության Կոտայքի մարզային վարչության Նաիրիի բաժնի համայնքային ոստիկանության բաժանմունքի տեսուչ Գ. Հակոբյանին, նույն բաժանմունքի պետ Է. Մովսիսյանին և բաժնի պետի տեղակալ Ս. Բաղդասարյանին մեղադրանքներ են առաջադրվել ՀՀ քրեական օրենսգրքի 308-րդ հոդվածի 1-ին մասով: Է. Մովսիսյանի և Ս. Բաղդասարյանի նկատմամբ որպես խափանման միջոց է ընտրվել կալանավորումը:

Քրեական գործի նախաքննությունն ավարտվել է: Գործը մեղադրական եզրակացությամբ ուղարկվել է դատավարական հսկողություն իրականացնող դատախազին՝ այն հաստատելու և դատարան ուղարկելու համար: