Իրանը թողարկել է սեփական արտադրության առաջին նավթային aframax տանկերը, որ պատրաստվել է Վենեսուելայի պատվերով, հայտնում է Reuters-ը` հղում անելով իրանական Fars գործակալությանը:

«Aframax-ի արտադրությունն ու վաճառքը երկրի համար առաջինն է իր տեսակի մեջ, ուստի մենք պետք է շարունակենք ավելի շատ հաճախորդներ գրավել»,- նշել է Իրանի SADRA ծովային արդյունաբերական ընկերության տնօրեն Մեհդի Էտեսամը:

Aframax-ը տեղավորում է մինչև 700 հազար բարել նավթ: Դեռևս հայտնի չէ, թե արդյոք Իրանը նման տանկերների պատրաստաման այլ պատվերներ էլ է ստացել, թե` ոչ:

Հուլիսի 23-ին, ԱՄՆ  նախագահ Բարաք Օբաման, ելույթ ունենալով վետերանների  հետ հանդիպման ժամանակ ասել է,  թե սիրիական իշխանությունները պատասխանատու կլինեն, եթե  փորձեն քիմիական զենք օգտագործել:

«Քիմիական զենքի օգտագործումը Բաշար ալ — Ասադի կողմից կբերի  ողբերգական թյուրիմացության, — ասել է նա: — Այսօր մենք աշխատում ենք ապահովել, որ սիրիական ժողովուրդը ստանա էլ  ավելի լավ ապագա, ազատվելով  Ասադի ռեժիմից», հաղորդում է ԻՏԱՌ – ՏԱՍՍ գործակալությունը, մեջբերելով  ԱՄՆ ղեկավարի խոսքերը:

«Ի նկատի ունենալով, որ Սիրիայում առկա է քիմիական զենքի պաշարներ, մենք հասկացնել կտանք Ասադին  և իր ամբողջ շրջապատին,  որ միջազգային հանրությունը հետևում է իրավիճակին, և այդ զենքը օգտագործելու դեպքում, նրանք  պատասխանատվության կենթարկվեն: Սիրիայի իշխանությունների այդ գործողությունը կլինի ողբերգական սխալ », — ասել է Օբաման:

Այս տարվա մայիսին Վաշինգտոն Փոստ-ը հայտնել է, որ Սիրիան ունի առնվազն հինգ լավ պահպանվող պահեստներ, որտեղ թաքցնում է քիմիական զենք. Ըստ որոշ աղբյուրների, Դամասկոսի տրամադրության տակ կա, մասնավորապես, մի քանի տոննա նյարդապարալիզացնող գազ:

Ինչպես նախօրեին տեղեկացվել է, Սիրիայի արտաքին գործերի նախարարության պաշտոնական ներկայացուցիչ Ջիհադ Մագդիսինը  հայտարարել է, թե քիմիական զենքի բոլոր պահեստները Սիրիայում իշխանական ուժերի վերահսկողության տակ են, և Դամասկոսն այն կօգտագործի միայն արտաքին ագրեսիայի դեպքում:

Այս հայտարարությունը  առաջին պաշտոնական հաստատումն է այն բանի, որ Սիրիան ունի քիմիական զենք, որի արգելման կոնվենցիան Դամասկոսը չի ստորագրել:

Ջիհադ Մագդիսիի խոստովանությունն առաջացրել է քննադատության ալիք Արևմուտքում: ԶԼՄ – ները   դուրս քաշելով համատեքստից մի դրվագ, գրել են այն մասին, որ Սիրիան ընդդիմությանը սպառնում  է քիմիական զենքով: Ներկայումս փորձագետները մանրամասն հետազոտում են, թե ինչ է նշանակում սիրիական իշխանությունների այդ հայտարարությունը: Նրանցից ոմանք այն կարծիքին են, որ սա մի քայլ է, որ արևմտյան տերությունները երկրին  ստիպել  են կատարել, իսկ մյուսները հակված են նրան, որ Սիրիան կարող է այդ խոսքերով ուղղակի հրահրել ռազմական գործողությունների, որին երկար ժամանակ ձգտում են ԱՄՆ-ը և իր դաշնակիցները:

BBC-ի ռուսական ծառայության հաղորդմամբ, Իսպանիայի հյուսիս-արևելքում գտնվող Կատալոնիայի նահանգում անտառային հրդեհների հետևանքով զոհվել է 4 մարդ, այդ թվում 15-ամյա մի աղջիկ, ևս 17-ը տարբեր աստիճանի այրվածքներ են ստացել:

Ինչպես Associated Press-ին վկայակոչելով հաղորդում է rbc-ն, մի դեպքում մահվան պատճառ է դարձել հրդեհը հանգցնելիս տեղի ունեցած սրտի կաթվածը, իսկ մյուս 2-ն էլ մահացել են` կրակից փրկվելու համար օվկիանոս նետվելիս:  Ուժեղ հրդեհները  նաև տրանսպորտային խնդիրներ են ստեղծել:

Իսպանիան Ֆրանսիային կապող հիմնական  ավտոճանապարհային մայրուղին փակ է:

Տեղի իշխանությունները հայտարարել են, որ անտառային հրդեհները բռնկված են  7 հազար հա տարածքում: Բնակիչներին և զբոսաշրջիկներին հորդորվում է  մնալ տներում` մինչև իրադրության  կարգավորումը: Հրդեհների դեմ պայքարի համար ուղարկվել է  ավելի քան 80 հրշեջ-փրկարարական ջոկատ:

Ըստ Կատալոնիայի ՆԳ նախարար Ֆելիպ Պյուիգիի` հրդեհները տեղայնացնել չի հաջողվում ուժեղ քամու պատճառով, որը հասնում է 90 կմ/ժամի: Ալտ-Էմպորդա շրջանի բոլոր բնակիչներին, իսկ նրանց թիվը 100 հազարի է հասնում, հրհանգվել է դուրս չգալ տներից: Այդ տեղանքով անցնում է հիմնական երթուղին, որով իսպանացիները հաճախ են գնում Ֆրանսիա` հանգստանալու, իսկ ֆրանսիացիները` հակառակ ուղղությամբ:

Հրդեհն սկսվել է կիրակի Խերոնա նահանգում, Ֆրանսիայի հետ սահմանից 500 մետր հեռավորության վրա: Այն ուժեղ քամու հետևանքով արագ տարածվել է:

Թեև հրդեհաշիջման աշխատանքներում ներգրավել են 200 օդանավեր և ուղղաթիռներ, բանակային ստորաբաժանումներ և ֆրանսիացի հրշեջներ, կրակի տարածումը դեռ չի հաջողվում կանխել:

Պարզվել է, որ 4 զոհերից երեքը Ֆրանսիայի քաղաքացիներ են: Նրանց շարքում են 60-ամյա տղամարդն ու նրա 15-ամյա դուստրը:

CNNturk-ի փոխանցմամբ, Թուրքիայում ռազմական ուղղաթիռի վթարի արդյունքում 5 զինծառայող զոհվել է, 6-ը` վիրավորվել:

Ավիավթարը տեղի է ունեցել գիշերը` Հաքքարի նահանգում: Նախնական տեղեկություններով` ուղղաթիռի վթարի պատճառը տեխնիկական խնդիրներն են:  Թուրքիայի զինված ուժերի գլխավոր շտաբից պարզաբանել են, որ S-70 Sikorsky տիպի ուղղաթիռը վթարի է ենթարկվել վայրէջքի ընթացքում:

Երկրի նախագահ Աբդուլլահ Գյուլը, վարչապետ Ռեջեփ Թայիփ Էրդողանը և Խորհրդարանի խոսնակ Ջեմիլ Չիչեքը ցավակցական հեռագրեր են հղել գլխավոր շտաբին և զոհերի հարազատներին:

Արաբական Լիգայի նախարարների խորհուրդը Սիրիայի հարցով արտահերթ նիստ է գումարել Կատարի մայրաքաղաք Դոհայում: Նիստի ընթացքում նրանք հանդես են եկել հայտարարությամբ և  կոչ են արել Սիրիայի նախագահ Բաշար ալ Ասադին հնարավորինս շուտ իշխանությունը փոխանցել ժամանակավոր կառավարությանը:

«Ֆրանս պրեսս» գործակալության փոխանցմամբ, նախարարների խորհրդի հայտարարության մեջ ասվել է, որ Ասադի հեռանալը կօգնի երկրում դադարեցնել արյունահեղությունը: Նրանք նաև խոստացել են օգնել Ասադին` ապահովելով նրա ընտանիքի անվտանգությանը:

«Նման տղամարդկային քայլը կօգնի երկրում դադարեցնել ավերածություններն ու մահերը»,-ասել է Կատարի վարչապետ Համադ մեն Ջեսեմ ալ Թանին, որը նաև ասել է, որ անցումային կառավարության կազմում պետք է լինեն ընդդիմության ներկայացուցիչները` մասնավորապես «Սիրիայի ազատ բանակից»:

Արտահերթ նիստի մասնակիցները կարծում են, որ Սիրիայում ՄԱԿ-ի դիտորդները պետք է կենտրոնացնեն ջանքերը` խաղաղ իշխանափոխության համար: Նրանք նաև նշել են «անվտանգության գոտիներ» և «հումանիտար միջանցքներ» բացելու անհրաժեշտության մասին:

Ակնկալվում է, որ ալ Թանին և Արաբական Լիգայի գլխավոր քարտուղար Նամիբ ալ Արաբին կայցելեն Մոսկվա և Պեկին, որպեսզի երկու երկրներ ղեկավարներին ներկայացնեն նիստի արդյունքները:

Սիրիայում արդեն մեկ տարուց ավելի շարունակվում են հակակառավարական ակցիաները, որոնք արդեն վերածվել են զինված բախումների` զինյալ ընդդիմության և կառավարական զորքերի միջև:

Ըստ ՄԱԿ-ի տվյալների` Սիրիայում զոհերի թիվն անցնում է 16.000-ը, փախստական են դարձել շուրջ 230.000 մարդ, իսկ շուրջ մեկ միլիոն մարդ հումանիտար օգնության կարիք ունի:

Մեծ Բրիտանիայում 3.5 տարի ազատազրկման է դատապարտվել զենքի առևտրով զբաղվող Մայքլ Ռենջերը:

«Ինտերֆաքս» գործակալությունը` հղում անելով բիրտանական մամուլին, հայնտնում է, որ բրիտանացին փորձել է Հյուսիսային Կորեայից «երկիր-երկինք» դասի հրթիռներ գնել և դրանք վաճառել Ադրբեջանին:

«Ռենջերի հարաբերությունները Ադրբեջանի հետ ոչ միայն անօրինական էին, այլ նաև պոտենցիալ վտանգավոր», — նշվում է բրիտանական դատախազության հայտարարության մեջ:

Ըստ Բրիտանացի իրավապահների` Ռենջերը միջազգային մակարդակի զինավաճառ է, որը զենքի մաքսանենգության համար գործածել է Հոնգկոնգում իր ընկերուհու անունով գրանցված ընկերությունը:

Դատարանում ներկայացվել է բրիտանացու էլեկտրոնային նամակագրությունը, որում նա պարծենում է իր հյուսիսկորեական զենքի մատակարարին, թե ինչպես են զենքի վաճառքի հարցով Ադրբեջանում այցի ժամանակ իրեն ընդունել երկրի ղեկավար շրջանակները, նույնիսկ իրեն տրամադրել են շքեղ լիմուզին անձնական վարորդով:

Թուրքական «Անադոլու» գործակալությունը տեղեկացնում է, որ Թուրքիայի Մարդին քաղաքի մոտակայքում պայթեցվել է Քիրքուկ-Յումուրթալըք նավթամուղը:

Ինչի հետևանքով նավթի արտահոսք է եղել և հրդեհ է բռնկվել:

Մարդինի նահանգապետ Թուրհան Այվազը տեղեկացրել է, որ պայթյունն ահաբեկչության արդյունք է:

«Նավթի արտահոսքը դադարեցրել ենք: Զոհեր և վիրավորներ չկան»,- ասել է նա:

Թուրքական կողմը պնդում է, որ ահաբեկչության հետևում Քրդական աշխատավորական կուսակցությունն է (PKK):

 Մեծ Բրիտանիան հանցագործության բացահայտման նոր՝ օրիգինալ մեթոդ է մշակել. հանցագործներին որոնելու համար Բրիտանիայի ոստիկանական շների վրա այսուհետ կարող են տեղադրել տեսախցիկներ: Նախաձեռնությունը Անգլիայի կենտրոնական  հատվածի՝ Ստաֆորդշիրի դքսության իրավապահ առաջին ստորաբաժանմանն է:
«Այդ սարքավորումները զարմանահրաշ  են` դրանք ամրացվում են շան գլխի վրա, և մենք կարող ենք էկրանի վրա ամեն ինչ տեսնել: Եթե մենք որոնում ենք վտանգավոր հանցագործի, ապա կարող ենք տեսախցիկով զինված շանը ուղարկել անհրաժեշտ վայրը` նրան գտնելու համար»,- ոգևորված են ոստիկանությունում:

Քիչ առաջ Բաքվում հրդեհ է առաջացել Հեյդար Ալիևի անվան կենտրոնում : Շինությունից բարձրացող ծուխը նկատելի է շատ մեծ տարածությունից, հայտնում է «ԱՊԱ»-ն:

Դեպքի վայր է ժամանել հրշեջ ավելի քան 50 խումբ, ինչպես նաև հրշեջ ուղղաթիռ. տարածքը շրջափակված է:

Ադրբեջանի արտակարգ իրավիճակների նախարարությունից տեղեկացնում են, որ չնայած հրդեհը տեղայնացվել է, սակայն այն շարունակում է մեծանալ:

Չորեքշաբթի` հուլիսի-18-ի  երեկոյան, Բուլղարիայի Բուրգաս քաղաքի «Սառաֆովո» օդանավակայանում տեղի է ունեցել զբոսաշրջային ավտոբուսի պայթյուն: Այստեղ՝ առողջարանում հանգստանալու էին ժամանել  իսրայելցիների մի մեծ խումբ:   Ըստ  հիմնական վարկածի, պայթուցիկ սարքը գործադրել է ահաբեկիչ -մահապարտը: Այս մասին հաղորդում է Reuters գործակալությունը:

Վիրավորվել է 35 անձ, զոհվել են 7 հոգի, որոնցից 5-ը իսրայելցիներ են, զոհվել են նաև վարորդը և մահապարտը:  Վիրավորներին անհրաժեշտ օգնություն են ցուցաբերել Բուլղարիայի մայրաքաղաք Սոֆիայի հիվանդանոցներում: Իրենց օգնություն են առաջարկել նաև իսրայելցի մասնագետները:

Իսրայելի վարչապետ Բենիամին Նեթանյահուն ահաբեկչության պատասխանատվությունը դրել է Իրանի վրա, և խոստացել,  պատասխանել ողջ հզորությամբ: