Այսօր հրապարակվել են Հայաստանի երիտասարդական հիմնադրամի և ԿԳՆ-ի հայտարարած դրամաշնորհների բաց մրցույթի արդյունքները։ Մրցույթը կազմակերպվել էր կրթության ոլորտում ծրագրեր իրականացնող կազմակերպությունների համար:

Հայաստանի երիտասարդական հիմնադրամի հոգաբարձուների խորհրդի համակարգող, ԱԺ պատգամավոր Կարեն Ավագյանի ներկայացմամբ, նախապես հայտարարված 10 անվանակարգերից բարձրագույն կրթության բնագավառում ոչ մի հայտ չի ներկայացվել, և այս ոլորտին նախատեսված գումարը կուղղորդվի երիտասարդ գիտնականների ստեղծած` «Պահանջում ենք գիտության ֆինանսավորման ավելացում» շարժման կողմից իրականացվելիք ծրագրերին։

Մրցույթին մասնակցելու համար ընդունվել է 26 հայտ, հաղթող է ճանաչվել 8 կազմակերպություն։ Մրցույթի արդյունքում ընտրված կազմակերպությունները կստանան առավելագույնը 500 հազար դրամի չափով դրամաշնորհ՝ հանրակրթության, նախադպրոցական կրթության, միջին մասնագիտական կրթության, գիտության, լրացուցիչ կրթության բնագավառներում և գիտելիքի արժեվորմանն ուղղված ծրագրեր իրականացնելու համար։

Ըստ Կարեն Ավագյանի, ծրագրի շրջանակներում հիմնական ուշադրությունը դարձվել է մարզային հասարակական կազմակերպությունների վրա՝ փորձելով նրանց ակտիվացնել կրթական համակարգում։ Հասարակական կազմակերպությունների կողմից ծրագրերի հիմնական մասը կիրականացվի ՀՀ մարզերում, Արցախում և Ջավախքում։

Օրերս Հանրային հեռուստաընկերության լրագրող, «Բանաձև» ստեղծագործական խմբի ղեկավար Արտակ Ալեքսանյանն իր ամբողջ թիմով տեղափոխվել է Հ-1-ի մրցակից՝ «Արմենիա» հեռուստատեսությանը պատկանող «Արմնյուզ»։ Հավանաբար, այստեղ Ալեքսանյանին ավելի մեծ գումար ու նաև պաշտոն են խոստացել։ Չնայած, Հանրայինում էլ նրա գործերը վատ չէին։ Նա ամենաիշխանական և նախագահականին մոտ կանգնած լրագրողների խմբից է և Հ-1-ում էլ էր մեծ գումարներ ստանում։

Մոտ երեք օր առաջ Երևանի քաղաքաշինական խորհուրդը հաստատեց ՀՀ կառավարության բակում «թմբուկ» կոչվող կառույցի նախագիծը: «Թմբուկի» պատճառով հրաժարական տվեց Կարեն Կարապետյանի քաղաքապետարան բերած Երևանի գլխավոր ճարտարապետ Միքայել Հասրաթյանը: Ըստ երևույթին, պարտադրանք  չընդունեց Հասրաթյանը, չցանկացավ իր անունն արատավորել «թմբուկով» և հրաժարական տվեց: Արդյունքում Երևանի գլխավոր ճարտարապետ նստեց նման կառույցներ իրացնելու հետ որևէ խնդիր չունեցող Նարեկ Սարգսյանը, և մեկ ամիս անց գործը գլուխ եկավ. փողը կա, շինության ի կատար ածումն էլ խոստանում է էլ ավելի մեծ եկամուտներ բերել: Մնացել է շինարարությունը:

Նախատեսված է այս նորակառույց տեղափոխել Սփյուռքի նախարարությունը (Հրանուշ Հակոբյանի համար նախարարություն բացեցին` քիչ էր, հիմա էլ հատուկ շենք են կառուցում` Հանրապետության հրապարակի տեսքը գցելու հաշվին), Էկոնոմիկայի նախարարությունը, էլի ինչ-որ գերատեսչություններ, որոնց շենքերը կառավարությունը պատրաստվում է վաճառել: Բնականաբար, այդ շենքերի վաճառքից սպասվող եկամուտը չի կարող չգայթակղել` գումարած շինարարության համար նախատեսված միլիոններից ակնկալվող ատկատները: Սա նախ մի փոքր տարօրինակ է, քանի որ, ինչպես մենք արդեն տեղեկացրել ենք, Սամվել Կարապետյանին` Կալուգայի Սամոյին, տարածք են հատկացրել Վերնիսաժ կոչվող տարածքում, որտեղ նա պետք է բարձրակարկ շենք կառուցեր մի շարք վարչական հիմնարկներ տեղավորելու պայմանով. փոխարենը նրան տվել են Շահումյանի հրապարակում արդարադատության նախարարության նախկին տարածքը իր շրջակայքով: Ճիշտ է, այս պահին շինության ավարտը դեռ չի երևում, բայց դա այլ թեմա է:

Դատելով այն ամենից, ինչ լսեցինք քաղաքապետարանում, թմբուկը կառուցվելու է անկախ ամեն ինչից, ու դա կապ չունի ոչ անհրաժեշտության, ոչ էլ Թամանյանի նախագծի հետ:

Երևանի ավագանու խորհրդի նիստի ավարտից հետո, մասնագիտությամբ ճարտարապետ Լևոն Իգիթյանը և ռեժիսոր Միքայել Դովլաթյանը կանգնած զրուցում էին: Հետաքրքիր էր իմանալ ավագանու այս անդամների կարծիքը հիշյալ թմբուկի վերաբերյալ: Զրույցից մի երկու րոպե անց մեզ միացավ նաև Արա Երնջակյանը, մի երկու րոպեով` նաև ճարտարապետ Հրաչիկ Պողոսյանը, թեև վերջինս որևէ կարծիք չհայտնեց: Հարցս ուղղեցի նախ Իգիթյանին.

— Ձեզ թմբուկ կոչվածը, որ պետք է կառուցվի, դու՞ր է եկել:

— Դուր գալը ո՞րն է: Ճարտարապետության մեջ չեն ասում դուր գալ կամ չգալ,- միանգամից փորձեց հակագրոհի անցնել Լևոն Իգիթյանը:

— Դե, հարցնում եմ որպես ճարտարապետի, Ձեր ճաշակո՞վ է:

— Դուք թեթև տեղեկություններով կարծիք եք կազմում, ճարտարապետական խնդիրները այլ կերպ են գնահատվում:

— Դուք իմ կարծիքն եք ուզում` հա՞, իմ դուրը գալիս ա, չգիտեմ` Լևոն Իգիթյանի դուրը գալիս ա, թե չէ,- սա մասնագիտությամբ ռեժիսոր Միքայել Դովլաթյանի պատասխանն էր:

— Ասում են` հրապարակի տեսքը կարող է փոխվել:

— Ի՞նչ եք խոսում…

— Դե, ճարտարապետներն են ասում, մի քանիսը, իհարկե վախվորած, արդեն դեմ են արտահայտվել, Ճարտարապետների  միության նախագահը` Մկրտիչ Մինասյանն էլ է ոչ դրական կարծիք արտահայտել:

— Իսկ երբ որ Մկրտիչ Մինասյանը նման կարծիքներ է հայտնում` մեր միության նախագահը, Դուք իրան հարցրեք` Ամիրյանի վրա էն ահավոր յաշիկը որ դրել ա, դա ճարտարապետության հետ կապ ունի՞,- սա էլ մասնագիտությամբ ճարտարապետ Իգիթյանն էր:

— Ամիրյանի կողքի ահավոր յաշի՞կը :

— Գրադարանի շենքի ճակատն է մնացել ընդամենը, հետևում մի հատ մոնստր ա բուսնել, իսկ նրա կողքի ա՛յ էդ յաշիկի հեղինակը…

— Ձեր ասելով` ինքն իրավունք չունի նման բան ասելու, որովհետև յաշիկի հարցում մեղավո՞ր է:

— Այո, որովհետև սա Թամանյանի նախագծածն է և ոչ թե Մինասյանի:

— Թամանյանի գործերն անքննելի՞ են, Թամանյանը կարող է խմած է եղել այդ օրը ու… Ի՞նչ է, օպերայի շենքը ամբողջությամբ Թամանյանի գծագրածով կառուցեցի՞ք, որ հիմա թամանյանական ամեն ինչը պետք է ի կատար ածվի:

— Դե, փող չունեինք, դրա համար չենք արել:

-Ինչու՞ եք Թամանյանին հարմարեցնում Ձեր գրպանին:

— Ինչքան էլ խմած լիներ, էսօրվա շատ օյաղներից ավելի լավը գծած կլիներ հաստատ,- միջամտեց Արա Երնջակյանը:- Իր ասածը գիտե՞ք որն ա. Տոլստոյը ժամանակին մի հատ խելոք միտք էր արտահայտել: Ինքը Շեքսպիրին դեմ էր, չէր ընդունում Շեքսպիրին… բայց դրա համար առնվազն պետք է  Տոլստոյ լինես: Կարելի է էդ գմբեթը չընդունել, բայց էդ գմբեթը չընդունելուց առաջ պետք է էնքան բագաժ ունենաս, էնքան պատկերացում ունենաս, որ ասես` ա´յ, սա, էս հարցը պետք չէ:

Դե, քանի որ մենք տոլստոյներ չենք, հարցնում ենք մասնագետից, ի վերջո հանրությունն իրավունք ունի տեղեկանալու, թե ինչ են մոգոնել հերթական անգամ:

Որ Թամանյանն իսկապես անգամ ամենահարբած ժամանակ էսօրվա օյաղներից շատ ավելի լավ նախագիծ կաներ, ժխտել չի կարելի: Իսկ Թամանյանով քողարկվողներին կարելի է ընդամենը խորհուրդ տալ` բացել հենց Թամանյանի գծագրած թմբուկը և տեսնել, թե իրականում ինչ է նախագծել մեծ ճարտարապետը, իսկ փոխարենը` ինչ են կապում մեր գլխին այսօր:

Այսօր Երևանում մեկնարկել է ՀՅԴ 31-րդ Ընդհանուր ժողովը:

Վաղուց հասարակության մի ստվար մասը սպասելիքներ չունի այս կուսակցության հրապարակային և ծպտյալ ժողովներից:

ՀՅԴ-ն երկու տարի առաջ լքեց իշխանությունը, սակայն այդպես էլ չի կարողանում ադապտացվել ընդդիմադիր կարգավիճակին: Այս ժողովում դարձյալ մի կուշտ կքննադատեն իշխանությանը, նույնիսկ վերջնագրային ելույթներ կհնչեն նրանց հասցեին` արտաքին քաղաքականության ձախողումների վերաբերյալ, բայց իշխանությանն անվստահության չի հայտնվի, նրա հրաժարականը չի պահանջվի: Գուցե դաշնակցական համարձակության նշաձողը մի փոքր բարձրանա, և արտգործնախարար Էդվարդ Նալբանդյանի հրաժարականի փոխարեն` պահանջվի ամբողջ կառավարության պաշտոնանկությունը: Բայց սոցիալիստական շարքերում հանգրվանած փողատեր ընկերները հենց նրա համար են, որ բանը Սերժ Սարգսյանի հրաժարականի պահանջին չհասնի:

Ի դեպ, անկեղծորեն կարելի է հասկանալ, թե ինչո՞ւ դաշնակցականներին ձեռնտու չէ իշխանափոխությունը` գոնե այս պահին: «Մի ուրիշ բանում էլ են մեզ մեղադրում, ինչո՞ւ ընդդիմությունը միասնական չէ, ինչո՞ւ միասնական ճակատ չի ձևավորվում: Միանանք, որ ի՞նչ լինի: Միանանք, Սերժ Սարգսյանին փոխարինենք Լևոն Տեր-Պետրոսյանո՞վ: Որ վերադառնան ներազգային անհանդուրժողականության, ցինիզմի, ազգային հարցերում զիջելու պատրաստ մթնոլորտն ու տարինե՞րը: Որ ընդամենը անձը անձով փոխարինվի՞: Ուզում են պարտադրել` Սերժ Սարգսյան կամ Լևոն Տեր-Պետրոսյան: Ո՞րն է նրանց տարբերությունը, իսկ եթե կա տարբերություն, որ կա` ո՞ւմ օգտին է այն: Եւ վերջապես ինչո՞ւ ենք հարկադրված ընտրություն կատարել այս համեմատության մեջ: Այնուամենայնիվ` այստեղ տեղին եմ համարում հայտարարել, որ ցանկացած հարցով պատրաստ ենք գործակցելու ցանկացած ուժի հետ, եթե հստակ է նպատակը, օրակարգը, գործելաոճը և ղեկավարման բնույթը»,-այսօր Ընդհանուր ժողովի բացմանն ասել է ՀՅԴ Բյուրոյի ներկայացուցիչ Հրանտ Մարգարյանը:

Ընկեր Մարգարյանը երբեք այսք ան շիտակ ու անկեղծ չէր եղել: Դաշնակցականները Սերժ Սարգսյանին չեն սիրում, որովհետև նրա պաշտոնավարման տարիներին զրկվեցին նախարարական եկամտաբեր պորտֆելներից: Սակայն այս պահին դաշնակցականները նաև իշխանափոխություն չեն ուզում, որովհետև գործող նախագահին կարող է փոխարինել Լևոն Տեր-Պետրոսյանը, որի անունը շատ դաշնակցականներ նույնացնում են ոչ թե պաշտոնաթողության, այլ` բանտի հետ:

Բայց իշխանափոխությունը մի օր կարող է ՀՅԴ-ի համար օրակարգային դառնալ, եթե, ասենք, այդ պրոցեսը նույնանա Ռոբերտ Քոչարյանի հետ: Ընկեր Հրանտն ու մյուս ընկերները երանությամբ են հիշում նրա կառավարման «ոսկետասնամյակը»:

Թե որ արժանիքների համար Արման Սահակյանը նշանակվեց Պետական գույքի կառավարման վարչության պետի պաշտոնում, այդպես էլ մնաց անհայտ: Արմանի միակ` հանրությանը հայտնի արժանիքը Գալուստ Սահակյանի որդի լինելն է, գումարած` Աշոտ Աղաբաբյան անունով  քեռի ունենալը:

Երբ փորձեցինք հենց իրենից` Արման Գալուստիչից ճշտել նրա նշանակման դրդապատճառները, պարզվեց, որ անգամ ինքը դեռ չի հասկացել, թե որ արժանիքների  համար են իրեն տվել այդ պաշտոնը: Պարզվեց` Գալուստիչին հարկավոր է 100 օր հասունանալու համար, որպեսզի կարողանա պատրաստել այդ հարցի պատասխանը: Իսկ մինչ այդ նա մեր հարցերին արձագանքեց ինչպես զտարյուն չինովնիկ:

— Պարո´ն Սահակյան, ինչո՞վ կբացատրեք Ձեր նշանակումը: Ձեր պատգամավորական արդյունավետ գործունեությո՞ւնը հիմք հանդիսացավ նման նշանակման, թե՞ սա Հայաստանի` որպես կլանային համակարգ ունեցող երկրի, ևս մեկ հաստատումն էր:
— Սովորաբար կա այդպիսի ավանդույթ, որ նոր պաշտոնատար անձը շփվում է լրատվամիջոցների հետ 100 օր անց. ես խնդրում եմ, որպեսզի սպասեք այդ 100 օրվան, նոր շփվենք:

Սակայն Արմանի բախտը այս առումով բերել է. նրա նշանակումներից  հարյուր օր էլ չանցած, հանրությունը մոռանում է նրա մասին:

Ի տարբերություն Արմանի, պարզվեց նրա խարիզմատիկ քեռին ավելի քան կողմնորոշված է և մտքով չէր էլ անցնում, թե որևէ մեկը կարող էր կասկածի տակ առնել իր Արմանին պաշտոն տալու արժանավորության հարցը: «Արմանիս բան չասես, հա~»,- նախազգուշացրեց Բուռնաշը:

— Պարոն Աղաբաբյան, ինչո՞վ էր պայմանավորված այս նշանակումը:
— Ոնց` ինչո՞վ, շատ լավ կադր ա:
— Բայց առերևույթ տպավորություն է ստեղծվում, թե կլան է ստեղծված ինչ որ… միայն Ձեր երեխաներն են առաջ գնում` քեռի, պապա ունեցողները:
— Ի՞նչ կլան, ա´յ քեզ բան, վաստակ ունենք, ա´յ բալա ջան:
— Ուրիշները վաստակ չունե՞ն, թե դուք յոթ պորտի համար եք վաստակել:
— Կան, ո՞վ ա բան ասում, հերթով կտան, ամենքը իրա վաստակով պիտի լինի, հո: Օրինակ՝ ո՞ր լավերին, խի մենք վատն ե՞նք: Դե գնա` էնքա~ն վատ կա` վատին հարցրա, մեր լավին խի՞ ես հարցնում:
— Բայց ինքը «անգույն» սուսուփուս պատգամավոր էր:
— Ո՞վ ա սուսուփուս, Արմանն ա՞ սուսուփուս: Տես ինչ եմ ասում` ամեն պաշտոն էշի բեռ ա, մենք մեր վրա էշի բեռ ենք վերցնում, ոչ թե եսիմ ինչ ա:

Հետաքրքիր է, ստացվում է, որ մեր պաշտոնատարները էշի բեռ են տանում, մեր երկրում օլիգարխները, նրանց մտերիմները բեռնակիր կենդանիներ են, իսկ հասարակ մահկանացուները պարզապես վայելում են կյանքը:

Հիսուսն ասում է` իրար բեռներ կրեք: Մեր խաչ ու Քրիստոս հարգող բեռնակիրներին կոչ ենք անում իրենց բեռներից մի քիչ էլ մյուսներին բաժին հանեն, համ իրենց բեռը կթեթևանա, համ էլ արմանսահակյանները քիչ կլինեն:

Ազգային ժողովի մեկ տասնյակից ավելի պատգամավորներ ապրիլ և մայիս ամիսների իրենց բացակայության համար աշխատավարձի որոշակի մասից զրկվել են: Նրանցից, ովքեր  բյուլետեններ չեն բերել, պահումներ են արվել բացակա օրերի համար: Եթե բժշկից հիվանդության մասին տեղեկանք բերվի` կհամարվի հարգելի, և աշխատավարձերի  պահումները կվերադարձվեն բացակայած պատգամավորներին:

Հովիկ Աբրահամյանի նախաձեռնությունը կարծես հաջողությամբ չի պսակվում: Նա էր, որ մշտապես բացակայող պատգամավորների «սանձերը ձգելու», թե խայտառակ բացակայությունները արդարացնելու  համար հայտարարեց. «Ես ասել եմ, որ այն պատգամավորները, ովքեր անհարգելի բացակայում են ԱԺ նիստերից, իրենք աշխատավարձից բացակա օրերի համար զրկվելու են: Դե հիմա, եթե բժշկի թուղթ են բերում, ես չեմ կարող ստուգել` դա իրականությանը համապատասխանում է, թե ոչ: Ես հակված եմ հավատալու, որ ճիշտ, օբյեկտիվ թուղթ է»:

Բայց դե` օրենսդիրի նախագահն էլ լավ գիտի իր «հոտի» հնարավորությունները. ո՞ր մի «ազգընտիրի» համար է բժշկի թուղթ բերելը պրոբլեմ:

ԱԱԽ քարտուղար Արթուր Բաղդասարյանն ընդունել է Հարավային Կովկասում սահմանների համալիր կառավարման Եվրոպական Միության ծրագրի տարածաշրջանային ղեկավարի տեղակալ Րիշառ Մարտինեսի գլխավորած պատվիրակությունը, որը Հայաստանում է գտնվում վերոնշյալ ծրագրի իրականացման արդյունքների գնահատման առաքելությամբ:

Րիշառ Մարտինեսը ընդգծել է սահմանային անվտանգության ապահովման հարցերում ծրագրի շրջանակներում Հայաստանում արձանագրված զգալի առաջընթացը,  կարևորել  ԱԱԽ կողմից ոլորտը կանոնակարգող հիմնարար փաստաթղթերի ընդունումը և ոլորտում իրականացվող գործընթացների համակողմանի համակարգումը:

Անդրադառնալով ոլորտում իրականացվող բարեփոխումների ընթացքին, փորձագետները կարևորել են սահմանային անվտանգությանն առնչվող պետական մարմինների գործունեության համակարգման հետագա ինստիտուցիոնալիզացման անհրաժեշտությունը, սահմանային խնդիրներում ներգրավված պետական մարմինների գործունեության վերանայումը և գործառույթների հստակեցումը, պետական սահմանի միասնական և ինտեգրված կառավարման մեխանիզմների ներդրումը և այլն:

Պատվիրակության գնահատմամբ, ոլորտում գրանցված բարեփոխումները թույլ են տալիս Հայաստանը համարել առաջատար երկիր այս ոլորտում գրանցված արդյունքների հիման վրա:

Վաղը Կազան քաղաքում Ռուսաստանի նախագահի միջնորդությամբ տեղի ունենալիք Հայաստանի և Ադրբեջանի նախագահների հանդիպումից առաջ կրկին ակտիվացել են ղարաբաղյան հարցում այսպես կոչված «փոխզիջումների» մասին խոսակցությունները: «Ճանաչիր քո երկիրը» երիտասարդական նախաձեռնությունը, ներկայացնելով հայ երիտասարդության մի ստվար զանգվածի տրամադրվածությունը նման սցենարի հանդեպ, հայտարարում է, որ վերամիավորված տարածքների ցանկացած սակարկում համահայկական խռովության այնպիսի մի ալիք է բարձրացնելու, որի հետևանքներն անկանխատեսելի են լինելու: Վերամիավորված պապենական հողերի զիջումն Ադրբեջանին այն եզակի հարցերից է, որն ի զորու է ոտքի հանել համայն աշխարհի հայությանը:

Մեր օրերում ընդունված է խոսել այն մասին, որ երիտասարդության մի ստվար շերտ զրկված է ազգային մտածողությունից: Որքան էլ պարադոկսալ է, բայց «Ճանաչիր քո երկիրը»-ի անցկացրած ուսումնասիրությունը ցույց է տվել, որ այս խավի ներկայացուցիչները ազատագրված տարածքների ամենափոքր զիջման դեպքում առաջինն են ոտքի ելնելու: Ազատագրված Արցախն ու դրա հարակից շրջանները այդպիսի երիտասարդների ենթագիտակցության մեջ արմատավորված են «իրենց հայրերի արյունով ազատված հայկական հողեր» կարծրատիպում, ուստի, զարմանալի է, բայց երիտասարդության հենց ա՛յդ շերտն է լինելու համազգային խռովության առաջին դիրքերում:

Տարածքների փաստացի զիջման վերաբերյալ որևէ փաստաթղթի տակ ստորագրած անձը հասարակության կողմից մեխանիկորեն սկսելու է ընկալվել ոչ թե որպես ազգի դավաճան, այլ իբրև ազգի թշնամի` դրանից բխող բոլոր հետևանքներով: Առանձին դեպքերում հնարավոր են նաև ազգի թշնամիների նկատմամբ միջնադարում ընդունված որոշ ավանդույթների վերածննդի փորձեր:

Հայկական ազատագրված տարածքների զիջումը հանգեցնելու է ողջ զինվորականության բունտին: Չնայած հայկական բանակում երբեմն հանդիպող անառողջ մթնոլորտի դրսևորումներին, անհնար է ժխտել, որ Արցախն ու ազատագրված տարածքները զինվորականության կողմից ընկալվում են որպես սրբություն: Անգամ եթե հաջողվի «համոզել» բարձրագույն սպայակազմին «համաձայնվել Արցախի կարգավիճակի դիմաց զիջել որոշ տարածքներ», նրանց ենթակաների մեծ մասը պարզապես կհրաժարվի կատարել «ազգադավ վերադասի» հրամանները:

«Ճանաչիր քո երկիրը» նախաձեռնության անդամները հաճախ հայրենաճանաչողական արշավների են մեկնում ազատագրված տարածքներ: Այնտեղ ազգի դավաճանի պիտակ ձեռք բերելու համար բավական է արցախցիների հետ զրույցում միայն բացել իրենց հայրենիքի «փոխզիջման» մասին խոսակցությունը: Նախաձեռնության անդամ երիտասարդները շփվել են ազատագրված տարածքների հարյուրավոր բնակիչների հետ: Նրանց մեջ չկա գեթ մեկը, որը ղեկավարվեր «ամեն ինչի պատրաստ ենք, միայն թե պատերազմ չլինի» սկզբունքով: Արցախցիները պատրա՛ստ են տեր կանգնել իրենց հայրենիքին: XX դարավերջի պատմությունը նրանց մի անբացատրելի, գերբնական ուժով է կապել սեփական հողի հետ: Ցանկացած արցախցի պատրաստ է ջնջել երկրի երեսից յուրաքանչյուրին, ով կփորձի «զիջել» (տեղական տերմինաբանությամբ` ծախել) իր կամ իր հայրերի արյունով ազատագրված հողերը:

Վաղը` կազանյան հանդիպմանը զուգահեռ, «Ճանաչիր քո երկիրը» նախաձեռնության անդամ 50 երևանցի երիտասարդ արշավի է մեկնելու հայկական ազատագրված տարածներ` Քաշաթաղի և Շահումյանի շրջաններ: Նրանք քաղցր հյուրասիրություն են տանելու արցախցիներին:

Ազգային ժողովն ընդունեց «Աղբահանության և սանիտարական մաքրման մասին» կառավարության բերած և մեծ աղմուկ հանած օրինագիծը, որով նոր հարկատեսակ է սահմանվելու հայ ժողովրդի գլխին` աղբի վճար` ներկա վարձավճարից շատ ավելի բարձր, որի ուշացման դեպքում նաև որպես տույժ տոկոսային հավելումներ են գալու` 0,15 տոկոսի չափով: Օրինագիծը պատգամավորներն ընդունեցին առաջին ընթերցմամբ, որով իբր իրականացվելու է ավելի լավ աղբահանություն և սանմաքրում:

Հանրությանը մաքրության համար վճարել պահանջող  քաղաքապետի աչքը, չգիտես ինչու, չի տեսնում փողոցների` այս դեպքում հենց քաղաքապետարանի քթի տակ կուտակված աղբակույտերը (այս լուսանկարներն արվել են կեսօրին` քաղաքապետարանից մի քանի քայլ հեռավորության վրա, Սունդուկյան թատրոնի դիմաց). հետաքրքիր է` քանի տոկոս տուգանք է նախատեսված քաղաքապետարանի սանմաքրման ծառայությանը:

Մեկ ուրիշ օրինակ: Հենց երեկ Բաղրամյան պողոտայի` Ազգային ժողովին կից կանգառում կեղտի մի մեծ, թարմ կույտ էր. ինչ-որ մեկը, հավանաբար գիշերը կամ գուցեև առավոտյան, իր բնական կարիքներն էր հոգացել: Վայրը մարդաշատ էր, իսկ կույտը միանգամից  աչքի էր զարնում` սրտխառնոց առաջացնելով:

Այսօր կեղտի կույտը դեռ տեղում էր: Ինչ-որ մեկը փորձել էր ծածկել թղթով, բայց թուղթը մի մասն էր փակել. այդ մասում մայթի հատվածը նեղ է, ու կույտը սպառնում էր ոտքի տակ ընկնել: Թե ինչպես է Երևանի քաղաքապետարանն իր դրայվոտ քաղաքապետի հետ իրականացնում քաղաքի մաքրությունը, կարելի է դատել այս` «աննշան», բայց մեր իրականության մաս կազմող փաստից: Չի բացառվում, որ կույտն այնքան մնա իր տեղում` քաղաքի կենտրոնում` օրենսդիր մարմնի հարևանությամբ, մինչև չորանա, ու քամին քշի տանի: Միևնույն է, հարգարժան պատգամավորները տրանսպորտով չեն երթևեկում, իսկ հանրությունը այլ տարբերակ չունի` նման դեպքերում միակ ելքը աչքերը փակելն է:

Վարչապետ Տիգրան Սարգսյանն այսօր ՀՀ կառավարությանն առընթեր պետական գույքի կառավարման վարչության աշխատակազմին է ներկայացրել վարչության նորանշանակ պետ Արման Սահակյանին:

Կառավարության ղեկավարը նշել է, որ չնայած երիտասարդ տարիքին, Արման Սահակյանը փորձառու գործիչ է, ունի կառավարման հարուստ փորձ, տարբեր գերատեսչություններում զբաղեցրել է ղեկավար պաշտոններ, և դա այն բանի գրավականն է, որ նոր պաշտոնում նա կկարողանա արդյունավետ կազմակերպել և իրականացնել աշխատանքները: «Այդ տեսակետից ես ցանկանում եմ շնորհավորել Արման Սահակյանին այս պաշտոնն զբաղեցնելու կապակցությամբ և մաղթել նրան բեղմնավոր աշխատանք: Համոզված եմ, որ աշխատանքային կոլեկտիվը կստեղծի այն մթնոլորտը, որը հնարավորություն կտա պարոն Սահակյանին միանգամից անցնել իր պարտականությունների կատարմանը: Միևնույն ժամանակ ցանկանում եմ շնորհակալություն հայտնել տիկին Կիրակոսյանին այս տարիների ընթացքում կատարած աշխատանքի համար: Բավական մեծ բեռ էր դրված տիկին Կիրակոսյանի ուսերին, և մենք կարողացանք համատեղ ջանքերով բավական լուրջ բարեփոխումներ իրականացնել այս ոլորտում: Մենք հարգել ենք տիկին Կիրակոսյանի աշխատանքից ազատվելու դիմումը և ցանկանում եմ կառավարության և իմ անունից շնորհակալություն հայտնել նրան համագործակցության և կատարված աշխատանքների համար»,— նշել է վարչապետ Սարգսյանը:

Կարինե Կիրակոսյանը շնորհակալություն է հայտնել կառավարության ղեկավարին համատեղ աշխատանքի համար և հաջողություններ մաղթել Արման Սահակյանին:

Շնորհակալություն հայտնելով վստահության համար՝ ՀՀ կառավարությանն առընթեր պետական գույքի կառավարման վարչության նորանշանակ պետ Արման Սահակյանը նշել է, որ իրականացնելու է  բոլոր ծրագրերը և կառավարության կողմից կատարվող բարեփոխումները, ինչպես նաև ջանքեր է գործադրելու ոլորտում աշխատանքների արդյունավետության բարձրացման ուղղությամբ: