«Կոնկրետ ինձ համար տհաճ է ՀԱԿ-ի հետ երկխոսության նստելը, որովհետև էդ մարդկանց ճանաչում եմ»,-  այսօր ասուլիսում ասաց ՀՀԿ փոխնախագահ, ՀՀԿ խմբակցության ղեկավար Գալուստ Սահակյանը։ Թե ինչի պետք է քաղաքական երկխոսությունը Գալուստ Գրիգորիչին հաճույք պատճառեր հասկանալի չէր: Սակայն նա համոզված է, որ երկխոսությունն ամենից շատ շահեկան էր ՀԱԿ-ի համար. «Նախ սա իրենց կարողացավ հանել քաղաքական ճահճից, քան թե խնդիրներ լուծել կոալիցիայի համար։ Երբեք չի եղել, որ կոալիցիան որևէ քաղաքական ուժի հետ չցանկանա խոսել։ Նա (ՀԱԿ-ը) փորձեց մտնել քաղաքական դաշտ և ցիվիլ մասնակցել ընտրություններին»:

Իսկ եթե նույն ֆորմատով երկխոսություն չվերսկսվի՞ հարցին նա ասաց. «Եթե չերկխոսեն, ՀԱԿ-ը նորից դուրս կմնա քաղաքական դաշտից ու կհայտնվի լուսանցքում։ ՀԱԿ-ը բավականին մեծախոսությամբ մի կերպ համաձայնեց երկխոսել իշխանության հետ, բայց այլ քաղաքական ուժերի հետ երկխոսել չի համաձայնի, քանի որ ինքը ամենաուժեղն է, ինքը զորեղ է, երկնքից է իջել…»:

Ըստ Սահակյանի՝ երկխոսության համաձայնող քաղաքական ուժը պիտի հաշվի առներ, որ իր ներկայացրած բոլոր պահանջները չեն ընդունվելու: Իշխանություններն էլ ի սկզբանե ասել են, որ արտահերթ ընտրություններ չեն լինելու, բայց պատրաստ են քննարկել այդ հարցը, քանի որ հնարավոր է հասարակությանը հետաքրքիր լինի:

Պարզվում է` ինչ անում են անում են ժողովրդի համար.Սահակյանի կարծիքով՝ երկխոսությունն անհրաժեշտ էր նաև ժողովրդին, որպեսզի «ինքն էլ մասնակցություն ունենա քաղաքական կյանքին»:

Ինչ վերաբերվում է. ՀԱԿ ակտիվիստների եւ իրավապահների միջեւ տեղի ունեցած հայտնի միջադեպին, Սահակյանը կրկնեց իր կուսակիցների տեսակետը. «Իհարկե, մենք էլ ենք մտածում, որ երիտասարդներ են, փորձության ճանապարհով են անցել, օրենքի առանձին հոդվածներ կան, որոնք հնարավորինս մեղմ դրսեւորումներ կարող են ունենալ։ Սակայն դա դատարանի խնդիրն է եւ ոչ թե կոալիցիայի կամ ՀԱԿ-ի։ Սակայն մենք ինքներս էլ բազմիցս հայտարարել ենք, որ որեւէ խտրականություն չի լինելու»:

«Այսօր հնչում է, թե երկխոսությունն էլ առաջ չի գնում, ես կարծում եմ, եթե քաղաքական ուժեր են, ուրեմն գործընթացն ընթանում է. պարզապես ձևն է փոխված, միջավայրն է փոխված, բայց միևնույնն է, մարդիկ փորձում են իրենց դրսևորել:Հիմա երկխոսությունը շարունակվում է մամուլի և հրապարակային ելույթների միջոցով», ամփոփեց Գալուստ Սահակյանը:

Միջինարեւելեան կամ յատկապէս արաբական երկիրներու մէջ տեղի ունեցող իշխանափոխութիւնները հայկական հայեցակէտներէ դիտուած կրնան տեղի տալ տարաբնոյթ մեկնաբանութիւններու եւ վերլուծումներու: Մէկ կողմէ եթէ Միջին Արեւելքի հայկական գաղութներու գոյութիւնը, անվտանգութիւնն ու կայունութիւնն են հայկական հայեցակէտի դիտարկումներուն առանցքային մտահոգութիւնները, միւս կողմէ անպայման պետական դիրքերէ մշակուած տեսադաշտի սահմաններն են: Արաբական երկիրներու պարագային անոնք կրնան համընկնիլ իրարու հայկական գործօնը այս բոլորին մէջ առաջին գիծի վրայ չտեսնելու առումով:
Խնդիրը այս պարագային տարբեր բովանդակութիւն կրնայ ունենալ, եթէ փորձենք մեր երկրի երկու դրացիներուն նկատմամբ այս բոլոր գործընթացներուն ունենալիք հաւանական ազդեցութիւններու տարողութեան մասին խորհրդածութեան փորձ կատարել: Միջին Արեւելքի նոր սահմանագծումի հրամայականը հետզհետէ աւելի շօշափելի պատկերացումներ սկսած է ուրուագծել դիպաշարին հետեւողներուն համար: Իշխանափոխութիւններ, քաղաքացիական ընդհարումներ, իրողական բաժանումներ, նոր ուժերու կայացումներ եւ մասամբ նորին կու գան հիմնաւորելու շարժումներու տարերայնութեան ետին կանգնող ծրագիրներու առկայութիւնը:
Արագակշռոյթ այս վերիվայրումներուն նկատմամբ անհանգիստ կացութեան մէջ է Թուրքիան, որուն ներքին եւ արտաքին խնդիրները, թէեւ յայտարարողական մակարդակի վրայ անմիջական վտանգ ստեղծած ըլլալու տպաւորութիւն չեն ձգեր,  այսուհանդերձ թէժ օրակարգի վերածուած ըլլալու հանգամանքը ստացած են: Անմիջական դրացիներ Իրաքի եւ Սուրիոյ հետ ստեղծուած քաղաքական տագնապները, յայտարարողական մակարդակէն անդին անցնող նոյնիսկ զինուորական միջամտութիւնը Իրաքի պարագային, կամ` դէպի Սուրիա թրքական ուժերու ներխուժման մասին անվերջ կրկնուող սպառնալիքները ցուցանիշ են, որ Թուրքիան խորապէս անհանգիստ վիճակի մէջ է քրտական գործօնի յանկարծակի եւ համընդհանուր աշխուժացման վտանգին ի տես: Շատ են ցուցանիշները այս ուղղութեամբ մտածողութիւն զարգացնելու: Աննկատ պէտք չէ մնայ այս բոլորին մէջ Լիբանանի մէջ թրքական դեսպանատան աշխատանքներու առկախման անորոշ լրատուութիւնը, որուն առաջին տարբերակը որեւէ պատճառ չէր նշեր, մինչ երկրորդը որոշումը յստակօրէն կ՛առնչէր Սուրիոյ հարցերուն:
Ներթրքական հարթութիւնը անկանխատեսելի հակազդեցութիւն կրնայ ունենալ, եթէ յայտարարողական մակարդակի վրայ լարուածութիւնը զինուորական դրսեւորումներ ունենայ եւ շրջանային մակարդակի վրայ ցնցումներ յառաջացնելու կացութեան մէջ գտնուի: Գերարժեւորումի մօտեցումով չէ, որ պէտք է խօսիլ Թուրքիոյ անդամահատման կարելիութիւններուն մասին` նկատի ունենալով մանաւանդ քրտական շարժումներուն նկատմամբ որոշ ժամանակներէ ի վեր ցոյց տրուող կարեւոր կեդրոններու օժանդակութիւնները: Նոր սահմանագծումներու ծրագիրներէն դուրս կրնայ չմնալ Թուրքիան: Յիշենք ու անցնինք պարզապէս, որ մինչ օրս չէ հերքուած ռուսական կարեւոր լրատուամիջոցին հրապարակած այն լրատուութիւնը, որուն համաձայն, Միացեալ Նահանգներու արտաքին գործոց նախարարը թուրք պաշտօնատարներուն յիշեցում կատարած էր հայերուն նկատմամբ Թուրքիոյ եւ Միացեալ Նահանգներու ունեցած սեւծովեան ելքով բնորոշուող պարտքին մասին:
Այս օրերուն շատցած են նաեւ վերլուծական զուգահեռները արաբական գարունին եւ Ազրպէյճանի մէջ ուշացող գարնան միջեւ: Զուգահեռները հիմնուած են երկարատեւ ընտանեկան իշխանութիւններու, հակաժողովրդավարական կարգերու, ընդդիմութեան փոշիացումին, հալածանքներուն եւ նման իրողութիւններու վրայ: Ալիեւն ու Քազզաֆին իրենց ունեցած պայմանային տարբերութիւններով հանդերձ նոյն նժարին վրայ կանգնեցնելու փորձերը շատ են: Ազրպէյճանական ձմեռ է առայժմ:
Քաղաքական եւ հասարակական այս արժեչափերը նկատի ունենալով հաւանաբար զուգահեռները արդարացուած են: Այս պարագային սակայն, արցախահայութիւնը ի տարբերութիւն արտաքին ներշնչումներէ թելադրուած արաբական գարուններու տեսակներուն, ազգային ինքնորոշման մարդկային եւ ազգային սկզբունքներուն վրայ իրողական նոր սահմանագծումը պարտադրած է բոլորին: Ինչպէս գարունը, այնպէս ալ ձմեռը կամ միւս եղանակները որեւէ փոփոխութիւն չեն կրնար բերել ինքնորոշուած Արցախին:

Շահան Գանտահարեան
«Ազդակ»ի գլխաւոր խմբագիր

Նախագահ Սերժ Սարգսյանն այսօր Կ.Դեմիրճյանի անվան մարզահամերգային համալիրում մասնակցել է օգոստոսի 30-31-ին անցկացվող ՀՀ արտաքին գործերի նախարարության կենտրոնական ապարատի և արտերկրում ՀՀ դիվանագիտական ներկայացուցչությունների ղեկավարների խորհրդակցությանը:

«Խորհրդային Հայաստանը ևս ուներ արտաքին գործերի նախարարություն, որտեղ ծառայող դիվանագետներից շատերը հայրենասերների վառ օրինակ կարող են հանդիսանալ երիտասարդ սերնդի համար. մարդիկ, ովքեր անգամ խորհրդային հասարակարգի պայմաններում շարունակում էին փայփայել ու առաջ տանել ազգային իդեալները, հոգու խորքում հավատալով, որ մի օր այդ իղձերը դառնալու են անկախ Հայաստանի արտաքին քաղաքական օրակարգը:

Այսօր անհրաժեշտ է հետադարձ հայացք ձգել Հայաստանի Հանրապետության դիվանագիտական ծառայության անցած ուղուն: Պատերազմի, սոցիալ-տնտեսական ճգնաժամի պայմաններում է ձևավորվել Հայաստանի դիվանագիտական ծառայությունը: Ձեզնից շատերը հիշում են, թե ինչպիսի ծանր պայմաններում էին աշխատում մեր առաջին դեսպանությունները:

Մենք պատվով ենք բռնել ժամանակի քննությունը: Դիմակայել ենք բազում ճնշումների ու մարտահրավերների, որոնք հաճախ բխել են արտաքին քաղաքական միջավայրի և միջազգային իրադրության փոփոխություններից, երբեմն նաև մեր իսկ բացթողումներից: Այո՛, մենք հաղթահարել ենք այդ ճնշումներն ու մարտահրավերները՝ չվտանգելով մեր անկախությունն ու մեր անվտանգությունը, մեր ինքնիշխանությունն ու մեր ձեռքբերումները: Ավելին, այդ ճնշումներից դուրս ենք եկել կոփված՝ աշխարհին ներկայանալով որպես վստահելի գործընկեր, որի խոսքն ու գործը չեն տարբերվում, որը միջազգային և տարածաշրջանային խնդիրների լուծման պատասխանատվության իր բաժինը երբեք չի փորձում դնել ուրիշի ուսերին:

Մեր առջև դրված շատ խնդիրներ դեռևս լուծված չեն: Սակայն ես համոզված եմ, որ մեր դիվանագիտությունը, ի վերջո, հաջողությամբ է ավարտելու մեր հաղթանակներով սկսած գործը: Ասել եմ, հիմա էլ կրկնում եմ. միշտ հիշեք, որ դուք էլ զինվորներ եք՝ կանգնած առաջին գծում: Հայ ժողովուրդը սպասում է ձեր հաջողություններին:

Նախորդ հանդիպումից հետո անցած ժամանակահատվածը կրկին բուռն զարգացումների շրջան է եղել մեր արտաքին քաղաքականության համար:

Առանցքային դերակատարում ունեցող երկրների և կառույցների հետ պահպանվել է քաղաքական երկխոսության բարձր ինտենսիվությունը: Բազմաթիվ, այդ թվում նաև ՄԱԿ-ի Անվտանգության խորհրդի մշտական անդամ երկրների ղեկավարների հետ շփումներն ու փոխայցելությունները կրել են պարբերական բնույթ: Բարեկամ մի շարք երկրների հետ հարաբերություններին ու կապերին հաջողվել է հաղորդել նոր որակ և բովանդակություն: Հայաստաննակտիվորեն է մասնակցում միջազգային անվտանգության ապահովմանն ուղղված կարևորագույն գործընթացներին: Միջազգային ասպարեզում մեր դիրքերն ամրապնդվել են, մեր ձայնն առավել լսելի է դարձել, և, ամենակարևորը, մեր տեսակետներն ու դիրքորոշումները համահունչ են միջազգային հանրության դիրքորոշումներին թե՛ մեր տարածաշրջանին առնչվող հարցերի, թե՛ միջազգային օրակարգի կարևոր խնդիրների վերաբերյալ:

Եվ այդ ամենն արդյունք է ոչ միայն մեր կողմից վարվող նախաձեռնողական և սկզբունքային արտաքին քաղաքականության, այլև երկրի ներսում ժողովրդավարական բարեփոխումների հաջող ընթացքի, այդ բարեփոխումներն իրականացնելու մեր վճռականության և հետևողականության:

Հարգելի՛ տիկնայք և պարոնայք,

Այս տարի ականատես եղանք, թե ինչպես Հարավային Սուդանը, տասնամյակներ տևած պայքարից հետո, ձեռք բերեց իր անկախությունը՝ հարստացնելով ինքնորոշման իրավունքի իրագործման համաշխարհային փորձը ևս մեկ նախադեպով: Արցախի պարագայում այդօրինակ ելքը նույնպես անխուսափելի է, չնայած այսօր դեռևս չեմ կարող խոսել ղարաբաղյան հակամարտության կարգավորման բանակցային գործընթացում Ադրբեջանի դիրքորոշման մեղմացման մասին:

Վստահ եմ՝ քաջատեղյակ եք այդ գործընթացից և ձեր աշխատանքային առօրյայում կանոնավոր կերպով առնչվում եք այդ հիմնախնդիրներից բխող տարբեր դրսևորումների հետ: Երբ մենք այսօր ասում ենք, որ ղարաբաղյան հակամարտության կարգավորման վերաբերյալ միջազգային հանրության մոտեցումները համահունչ են Հայաստանի պաշտոնական մոտեցումներին, որոնք մենք բազմիցս և տարիներ շարունակ արտահայտել ենք, դա ամենևին էլ քարոզչական հնարք չէ: Մեր հստակ դիրքորոշմամբ և վստահելի կեցվածքով, մեր մտահոգությունների պատճառաբանվածությամբ և անհրաժեշտ պատասխանատվություն ստանձնելու պատրաստակամությամբ մենք հասել ենք նրան, որ միջազգային հանրությունը ընդունում է մեր մոտեցումները՝ որպես առավել իրատեսական և խաղաղությանը նպաստող: Դրա մասին են վկայում վերջին շրջանում Լեռնային Ղարաբաղի վերաբերյալ արված բարձր մակարդակի հայտարարությունները: Հստակ է նաև, թե ում են հասցեագրված դրանցում պարունակվող ուղերձները:

Ամռանը հասել էինք մի կարևոր հանգրվանի, երբ թե՛ միջնորդ երկրները, և թե՛ միջազգային հանրությունն ակնկալում էին, որ խնդրի կարգավորման առնվազն հիմնական սկզբունքների շուրջ համաձայնության ձեռքբերումը մոտ է: Այդ առումով կազանյան հանդիպումը յուրատեսակ փորձաքար էր հակամարտությունը խաղաղ բանակցային ճանապարհով և հնարավորինս արագ կարգավորելու կողմերի անկեղծությունն ու հաստատակամությունը գնահատելու համար: Ինչպես տեսանք, Ադրբեջանը Կազանում հետքայլ կատարեց՝ հրաժարվելով ընդհանուր հայտարարի գալուց և նոր խոչընդոտներ ստեղծելով հետագա համաձայնության համար:

Այժմ, համոզված եմ, որ բոլորիդ հուզում է այն հարցը, թե ո՞րն է հաջորդ քայլը, և ի՞նչ ակնկալիքներ կան: Անկախ Ադրբեջանի ապակառուցողական վարքագծից, Հայաստանը, ինչպես և նախկինում, շարունակելու է իր ջանքերը ղարաբաղյան հիմնախնդրի բացառապես խաղաղ, միջազգային իրավունքի, ՄԱԿ-ի կանոնադրության մեջ արտացոլված սկզբունքների հիման վրա կարգավորելու ուղղությամբ: Այդուհանդերձ, թող ոչ ոք չկասկածի մեր դիրքորոշման հաստատակամությանը և հստակությանը. մենք ունենք կարմիր գիծ, որ չենք կարող երբեք հատել: Դրա մասին խոսել ենք թե՛ հրապարակավ, թե՛ մեր գործընկերների հետ հանդիպումներում, այն արտացոլված է իմ նախընտրական ծրագրում և բազմաթիվ անգամներ արված հայտարարություններում:

Համոզված եմ, որ շատերդ եք կիսում այն եզրահանգումը, որ Բաքուն պատրաստ չէ խաղաղության, քանի որ հնարավոր չէ խաղաղություն հաստատել՝ պատերազմ քարոզելով, հաշտեցնել հասարակություններին՝ հայատյացություն սերմանելով, վստահություն կառուցել՝ սպառազինության մրցավազք հրահրելով: Ադրբեջանի նման վարքագիծն անընդունելի է, և մեր քայլերը կլինեն համարժեք: Համոզված եղեք՝ նոր ռազմական արկածախնդրության պարագայում Հայաստանը չի վարանելու կրկին հակառակորդին խաղաղություն պարտադրել:

Անցյալ մեր հանդիպմանը խոսում էինք նաև Թուրքիայի հետ հարաբերությունների կարգավորման գործընթացում մեր անելիքների մասին: Շատերին կարող է թվալ, թե մենք պետք է ափսոսանք Հայաստան-Թուրքիա հարաբերությունները կարգավորելու նախաձեռնություն դրսևորելու համար, քանի որ Թուրքիան հրաժարվեց իր պարտավորություններից, իսկ մենք հսկայական քաղաքական կապիտալ ծախսեցինք: Կարծում եմ՝ այս լսարանում ներկաները հասկանում են, որ այդ նախաձեռնությունը բարձրացրեց Հայաստանի միջազգային հեղինակությունը և ցրեց նոր ու ժամանակակից Թուրքիայի մասին մեր գործընկերների պատրանքները՝ բացահայտելով հայերիս համար պատմական փորձով ճանաչելի քաղաքականության արդի դրսևորումները:

Այդուհանդերձ, մենք հավատարիմ ենք Հայաստան-Թուրքիա հարաբերություններն առանց նախապայմանների կարգավորելու մեր ուղուն և դիրքորոշմանը: Թուրքիան պետք է իր մեջ ուժ գտնի հարգելու իր իսկ կողմից ստանձնած պարտավորությունները՝ տուրք չտալով իրեն ժամանակակից տարածաշրջանային պետություն համարողին պատիվ չբերող պահանջներին:

Բայց թուրքական կողմը պետք է հասկանա նաև, որ այս արձանագրությունները բաց, անժամկետ հնարավորություն չեն: Մեր բարեկամներից շատերը մեզ խորհուրդ էին տալիս սպասել մինչև Թուրքիայի խորհրդարանական ընտրությունները: Այնպես որ առաջիկա մի քանի ամիսների ընթացքում մենք կտեսնենք՝ արդյո՞ք խորհրդարանական ընտրություններից հետո Թուրքիայում առկա է մոտեցումների փոփոխություն, թեև անկեղծորեն ասած՝ անցած երկու ամիսները լավատեսության հիմքեր չեն տվել: Ըստ այդ դիտարկումների՝ մենք կորոշենք նաև արձանագրությունների ուղղությամբ մեր հետագա քայլերը»,- ասել է Նախագահ Սերժ Սարգսյանը:

Հանրապետության ղեկավարն իր խոսքում անդրադարձել է նաև Հայաստանի արտաքին քաղաքական օրակարգի առաջնահերթություն¬ներին, տարբեր երկրների և կազմակերպություն¬ների հետ մեր երկրի համագործակցության ներկա մակարդակին ու զարգացման հեռանկարներին, մի շարք ոլորտներում ՀՀ դիվանագիտական ներկայա¬ցուց¬չություններից ակտիվ, նպատակասլաց ու նախաձեռնողական աշխատանքի ակնկալիքներին, առկա մարտահրավերներին, նաև՝ սփյուռքի հետ աշխատանքին:

Ամփոփելով խոսքը՝ ՀՀ Նախագահն ասել է. «Ցանկանում եմ, որ դուք՝ մեր անկախ պետության դիվանագիտության շարժիչ ուժը, զգաք ձեզ ավելի վստահ, ավյունով լի, եռանդուն և նպատակասլաց, պատրաստ նոր դիվանագիտական մարտերի և հաղթանակների:

Ձեզանից յուրաքանչյուրին նշանակելիս ես հավատացել եմ, որ հենց դուք կարող եք լավագույնս ներկայացնել և պաշտպանել մեր երկրի շահերը կոնկրետ պետությունում կամ կազմակերպությունում: Հետևաբար ակնկալում եմ նաև բարձր պատասխանատվության դրսևորում Ձեզ վստահված պատվաբեր առաքելության հանդեպ:

Մաղթում եմ բոլորիդ և տարեկան հավաքին արդյունավետ աշխատանք»:

Սյունիքի մարզում գտնվող  «Տաթևի թևեր» ճոպանուղին անցնում է ձմեռային ռեժիմի։ Սակայն տնօրինությունը ուշացում է տեղեկացրել այդ մասին, որի հետևանքով անցած շաբաթ և կիրակի օրերին զբոսաշրջիկների մի խում որը հասել էր Տաթև, աշխարհի ամենաերկար ճոպանուղին տեսնելու նպատակով կանգնել է փաստի առջև: Տնօրինությունը, ուշացումով է հրապարակավ ներողություն  խնդրել այցելուներից։  Այդուհետ միայն Տեղեկացրել, որ մինչև սեպտեմբերի 15-ը ճոպանուղին չի աշխատելու:Այն անցնում է աշնանային ռեժիմի, և կառավարման էլեկտրոնային ու մեխանիկական համակարգերը հարմարեցվելու են Սյունիքի եղանակային պայմաններին։

Հ.Գ. «Տաթևի թևեր» ճոպանուղին 2011թ. հունվարի 1-ից առայսօր սպասարկել է ավելի քան 51 հազար ուղևորի։ Նրանցից ավելի քան 3000-ը, տնօրինության փոխանցմամբ եղել են հարակից Խոտ, Շինուհայր, Հալիձոր, Տաթև, Սվարանց և Տանձատափ համայնքների բնակիչներ, որոնք, ինչպես տեղեկացնում է ճոպանուղու տնօրենը`ճոպանուղու ծառայություններից օգտվել են անվճար:

Վարչապետ Տիգրան Սարգսյանն օգոստոսի 27-ին Ծաղկաձորում հանդիպել է ՀՀ վարչապետին առընթեր ազգային երիտասարդական քաղաքականության խորհրդի հասարակական սեկտորը ներկայացնող անդամներին, երիտասարդական և ուսանողական կազմակերպությունների ներկայացուցիչներին: Վարչապետը փորձել է բացատրել երկրում տիրող վիճակի պատճառները.

Երիտասարդներից մեկը հետաքրքրվել է. Թե` ըստ Հայաստանի ազգային վիճակագրական ծառայության տվյալների՝ նախորդ տարի մեր երկրում աղքատության մակարդակը 34,1 տոկոս է կազմել, 2008 թ.՝ մոտավորապես 23,5 տոկոս: Այսինքն, եթե 2008թ. յուրաքանչյուր 4-րդ մարդն էր աղքատ, ապա 2010թ.` յուրաքանչյուր երրորդը: Սա այն դեպքում, երբ այդ ժամանակահատվածում Հայաստանն ունեցել է տնտեսական աճ: Ինչո՞վ է պայմանավորված կենսամակարդակի նման անկումը:

Տիգրան Սարգսյանը պատասխանը, որ ավելի շուտ հիշեցնում է բաց դաս  կարծես արդարացում է փնտրում, սակայն այն ինչին դատապարտված է մեր երիտասարդությունը, իր ապաշնորհ կառավարման արդյունքում որևէ արդարացում չունի:

«Մենք այդ տարիներին տնտեսական անկում ենք ունեցել: Աղքատությունը չափվում է տարբեր մեթոդներով: Մենք ունենք աղքատության հաղթահարման ռազմավարություն և ծրագիր: Արդեն շուրջ 10 տարի է՝ այս խնդիրը մեր երկրի առջև ծառացած թիվ մեկ մարտահրավերն է, որովհետև 21-րդ դարում աղքատություն ունենալն անթույլատրելի է: Վերջին 10 տարիների ընթացքում մենք արձանագրել էինք լուրջ առաջընթաց, բայց ցավոք սրտի, 2009-2010 թթ. ունեցանք նահանջ, քանի որ տեղի ունեցավ լրջագույն տնտեսական անկում, ինչի պատճառով մեր բնակչության եկամուտները նվազեցին, իսկ դրա հետ զուգահեռաբար սոցիալական վիճակը վատթարացավ:

Մեր հակաճգնաժամային ծրագրի բովանդակությունը հետևյալն է. չնայած այն հանգամանքին, որ ունեցանք տնտեսական անկում և պետական եկամուտների կտրուկ նվազում, մենք ոչ միայն չպետք է կրճատեինք պետության սոցիալական ծրագրերը, այլ հակառակը՝ պետք է ավելացնեինք դրանք: Չնայած 14 տոկոսանոց տնտեսական անկմանը՝ բարձրացրեցինք թոշակները, անապահով խավերի սոցիալական նպաստները, որպեսզի ավելացնենք նրանց դիմադրողականությունը, որպեսզի նրանք կարողանան այդ ճգնաժամային իրավիճակն ավելի հեշտությամբ հաղթահարել:

Գնաճը 2009-2010 թթ. Հայաստանի Հանրապետությունում աղքատության խորացման երկրորդ պատճառն էր: Մենք ունեցանք գների աննախադեպ բարձր մակարդակ: Մեզ համար մշտապես թիրախային ցուցանիշը եղել է 3 տոկոսանոց գնաճը, իսկ ճգնաժամային տարիներին ունեցանք գնաճի երեք անգամ ավելի բարձր ցուցանիշ, որը հասավ մինչև 10 տոկոսի:
Այսօր իրականացնում ենք մի քաղաքականություն, որի նպատակն է խթանել տնտեսական աճը, դիվերսիֆիկացնել տնտեսությունը, իսկ մյուս կողմից՝ զսպել գնաճը: Արդեն իսկ ունենք այս տարվա առաջին յոթ ամիսների ինֆլյացիոն ցուցանիշները, որոնք վկայում են, որ մենք արդեն բարձր գնաճային փուլից տեղափոխվում ենք միջին գնաճային փուլ և մեզ կհաջողվի այս տարի ունենալ 5 տոկոսանոց գնաճ, որը երկու անգամ ավելի ցածր կլինի նախորդ տարվա գնաճից, ավելի բարենպաստ պայմաններ կստեղծի՝ 2012թ. գնաճի դեմ պայքարելու համար: Մյուս կողմից, այս տարի կանխատեսում ենք 4,6 տոկոսանոց տնտեսական աճ և, բնականաբար, այն ավելի բարենպաստ պայմաններ կստեղծի աղքատության կրճատման համար», — ասել է վարչապետ Սարգսյանը:

Նա նաև խոսել է երիտասարդների կենցաղային պայմանների բարելավման անհրաժեշտության մասին. Ըստ վարչապետի կառավարությունն աշխատանքներ է տանում, որպեսզի երիտասարդների համար կենցաղային ապրանքների, այդ թվում` ավտոմեքենաների ձեռքբերումը հեշտացտացված տարբերակով արվի:  Նա նշել է, որ այսօր այդ ուղղությամբ աշխատանքներ են կատարվում Կենտրոնական բանկի կողմից, որն էլ շուտով կներկայացնի հայեցակարգը:

«Ցանկացած մարդ Հայաստանի Հանրապետությունում պետք է գիտակցի, որ եթե նա ունի աշխատանք, եթե նա կարողանում է իր ինտելեկտուալ կարողություններն իրացնել Հայաստանի Հանրապետությունում, ապա նա չպետք է ունենա կենցաղային խնդիրներ: Իհարկե, խոսքն առաջին հերթին վերաբերում է բնակարանին, ավտոմեքենային, բնակարանը կահավորելուն, պատշաճ ձեւով վերանորոգելուն եւ այլն»,- ասել է Տ. Սարգսյանը, հիշեցնելով, որ պետությունն արդեն իսկ սուբսիդավորում է երիտասարդ ընտանիքների հիփոթեքային վարկավորումը:

Հ.Գ. Եւ սա այն դեպքում, երբ երեկ Ծաղկաձորում հավաքված երիտասարդ գիտնականները, կամ ավելի ստույգ` գիտությամբ զբաղվող երիտասարդները, ովքեր ունեն և աշխատանք, և ինտելեկտուալ կարողություններ, և դրանք իրացնում են ամսական 35 -40 հազար դրամով, դառնացած պատմում էին, որ չեն կարող երազել անգամ ամենաբնական պահանջի` ամուսնանալու մասին, չնայած վաղուց արդեն հատել են այդ տարիքը, ուր մնաց մտածեն սեփական բնակարանի, այն պատշաճ վերանորոգելու,  ավտոմեքենայի, ու այլ առաջնահերթությունների մասին:

Այսօր «Ժառանգություն» խմբակցության պատգամավոր Անահիտ Բախշյանը պետական բյուջեի միջոցները փոշիացնելու խնդրի վերաբերյալ ահազանգով հարցում է հղել ՀՀ վարչապետին.

«Կրկին Ձեզ եմ ներկայացնում փաստեր` պետական բյուջեի միջոցները փոշիացնելու մասին, որից հերթական անգամ ձմռանը տուժելու են դպրոցների աշակերտները:

Վերահսկիչ պալատի կողմից իրականացված ստուգումների մասին 2008թ. հրապարակումներում արձանագրված են Արմավիրի մարզի Երվանդաշատ, Բագարան, Կողբավան, Շենիկ եւ Արագածոտնի մարզի Արեգ, Արտենի, Արագածավան, Արտամետ գյուղերի գազատարների շինմոնտաժային աշխատանքների ժամանակ «Մանշին», «Ման-Նախ» կազմակերպությունների կողմից թույլ տրված չարաշահումների եւ «Տեդաս» ՍՊԸ-ի նկատմամբ հարուցված քրեական գործի մասին, որը գտնվում է դատախազության վարույթում:

Նշեմ, որ ՎՊ-ի 2008-ի հաշվետվության մեջ գրված է, որ վերոնշյալ գյուղերի գազաֆիկացման աշխատանքները պետք է ավարտված լինեին 2009-ին:

Սույն թվականի օգոստոսի 17-ին անձամբ եղել եմ վերոնշյալ բոլոր գյուղերում եւ համոզվել, որ Արտենին, Արագածավանը եւ Շենիկը գազաֆիկացված չեն, որի մասին օգոստոսի 22-ին տեղյակ եմ պահել Վերահսկիչ պալատի նախագահ պարոն Իշխան Զաքարյանին:

Օգոստոսի 25-ին ՎՊ-ից արդեն ստացել եմ պատասխան: Պարզվում է, որ Շենիկում «Մանշին» ՍՊԸ-ն խոստումը չի կատարել, իսկ Արեգ-Արտենի-Արագածավան գազատարի մոնտաժումը «Ման-Նախ» ՍՊԸ-ի մասով կատարվել է, սակայն չի ներկվել: Գործը պետք է շարունակեր ու ավարտեր ԻՖԱԴ ՍՊԸ-ն, որի կողմից մոնտաժման ենթակա 4300մ-ից 2270մ-ը դեռեւս չի անցկացվել եւ գյուղերը չեն գազաֆիկացվել: Ակնհայտ է, որ թե Շենիկի, թե Արեգ-Արտենի-Արագածավան գազատարների 2-3 տարի առաջ անցկացված խողովակներն առանց ներկելու եւ օգտագործելու կփտեն, կամ, ինչպես հաճախ լինում է մեզանում, կգողացվեն եւ պետական բյուջեին կրկին կհասցվի հսկայական վնաս: Հանրապետությունում նման անարդյունավետ ծախսերի շատ փաստեր կան, հետո էլ ասում են` փող չկա: Ոչ թե փող չկա, այլ պետական բյուջեն գողացողի ձեռքը չեք բռնում նույնիսկ այն դեպքում, երբ այն հայտնաբերում է Վերահսկիչ պալատը:

Բացի նշածս վնասներից, հսկայական վնաս կհասցվի վերոնշյալ գյուղերի դպրոցներին, որտեղ այս տարի վերանորոգվել են դուռ, պատուհանները, եւ քանի որ գյուղերը գազաֆիկացված չեն, իսկ դպրոցները չունեն ջեռուցման կենտրոնացված համակարգ, կնշանակի ձմռանը ջեռուցվելու են կամ էլեկտրական սալիկներով, որը շատ թանկ է լինելու կամ դիզելային վառելիքի վառարաններով: Տնօրենները խիստ մտահոգված են:

Խնդրում եմ «ԱԺ կանոնակարգ» ՀՀ օրենքի 7-րդ հոդվածի համաձայն տրամադրել 10-օրյա ժամկետում հետեւյալ տեղեկությունները.

1. Վերահսկիչ պալատի կողմից, դեռեւս 2008-ին արձանագրած, «Մանշին», «Ման-Նախ», «Տեդաս» ՍՊԸ-ների կողմից պետական բյուջեից հատկացված միջոցները վատնելու փաստի հետ կապված ի՞նչ քայլեր է ձեռնարկել կառավարությունը: Ի՞նչ է անում, որպեսզի վերոնշյալ կազմակերպությունները կատարեն կառավարության նկատմամբ ստանձնած իրենց պարտականությունները, իսկ պետբյուջեն` արդյունավետ ծախսվի:

2. Ինչո՞ւ կոնկրետ Արեգ-Արտենի-Արագածավան գազատարի կառուցման նկատմամբ «Ման-Նախ» ու ԻՖԱԴ ՍՊԸ-ները չեն կատարում իրենց ստանձնած պարտավորությունները:

3. Ինչո՞ւ «Մանշին»-ը չի ավարտում Շենիկ գյուղի գազաֆիկացումը, որտեղ դպրոցը «Հայաստանի մանուկների հիմնադրամ» կազմակերպության շնորհիվ ունի կենտրոնացված ջեռուցում դիզելային վառելիքով, որը շատ ավելի թանկ է նստում պետության վրա:

4. Ո՞ւր են Կողբավան, Երվանդաշատ, Բագարան գյուղապետերի գրությունների համաձայն վերադարձված գումարները եւ ինչի՞ են ծառայել,

5. Արդյո՞ք ձմռանը Երվանդաշատ, Բագարան գյուղերի դպրոցների տնօրեններին առաջարկվելու է եվրոպատուհանների ապակիները փոխարինել թիթեղով` վառարանների խողովակներն անցկացնելու համար:

6. Քարակերտ, Շենիկ, Լեռնագոգ համայնքներում բնակիչները խմելու ջուրը գնում են, իսկ դպրոցները՞ :

7. Արդյո՞ք տարածքային կառավարման նախարարությունը տեղյակ է այս ամենին, ի՞նչ է արվում եւ ո՞վ է վերահսկում վերոնշյալ գյուղերի բնակիչների ու դպրոցների բնականոն կենսագործունեությունը»:

Օրերս հանրությանը տեղեկացվեց Կառավարության որոշման մասին, ըստ որի թույլատրվել է Հանրապետության հրապարակի մետրոյի կայարանի վերին հատվածում հյուրանոց կառուցելու: «Քաղաքի կենտրոնում այլևս բաց տարածքներ չկան»,-  այսօր անդրադառնալով այդ թեմային հայտարարել է  Ճարտարապետների միության նախագահ Մկրտիչ Մինասյանը, նշեցլով, որ այդ ծրագրի մասին ինքն իմացել է ընդամենը մեկ շաբաթ առաջ, թեև կարծում է, որ պետք է ավելի շուտ իմանար:

Գլխավոր ճարտարապետն առաջարկել է այդ տեղում յոթ հարկից բաղկացած, չորս աստղանի հյուրանոց կառուցել: Մինասյանը դեմ է: Նա ասաց,որ ինքը միշտ եղել է այն համոզմանը, թե տվյալ վայրում չպետք է որևէ կառույց լինի, մինչդեռ….

«Կարծում եմ, որ չորս աստղանի հյուրանոցին այդ տեղը չի բավականացնի, այլ փորձ կարվի Հանրապետության հրապարակի բակն իր շատրվաններով նույնպես մտցնել այդ կառույցի շրջանակում»,- հայտարարեց Մինասյանը: Նա նշեց, որ ինքը ողջունում է բոլոր այն ներդրումները, որոնք արվում են գործարարների` մասնավորապես Սամվել Կարապետյանի կողմից, սակայն կարծում է, որ ներդրումներ անողներին խորհուրդ տվողները պետք է զգույշ խորհուրդներ տան, քանի որ այս քաղաքի միջավայրը բոլորիս համար է:

Ըստ Ճարտարապետների միության նախագահի,  հյուրանոց կառուցելը քաղաքի բյուջեին նպաստելու և ներդրումներ անելու առումով լավ գաղափար է, սակայն այդ ամենը պետք է արվի հիմնվելով առողջ դատողության վրա: Նա ասաց, որ Ճարտարապետների միության բոլոր անդամները դեմ են այս նախագծին, հիմա մտածում են՝ ինչ քայլեր ձեռնարկեն, թեև դեմ են նաև առճակատմանը:

Ճարտարապետների միության նախագահը կարծում է, որ մետրոյի կայարանի վայրում հյուրանոց կառուցելու թույլտվության մասին կառավարության որոշումը նույնպես անընդունելի է, քանի որ նման որոշումից առաջ, պետք էր բազմաթիվ հաշվարկներ անել՝ կանգառների տեղեր որոշել, մարդկանց և հյուրանոցում ապրողների համար բոլորովին ուրիշ ռեժիմներ ապահովվել: «Բայց այս փոքրիկ կտորում տեղավորելն անլուծելի խնդիր է, եթե իհարկե մետրոյի այդ բակը չվերցնեն, իսկ մեկը քանդել, մյուսը կառուցելը, ճիշտ պրակտիկա չէ»,- համոզված է Մինասյանը:

Քաղաքը չի շնչում, ամեն քայլափոխի քարե շինություններ են, այգիներն էլ քարապատեցին. Երկաթբետոնե մայրքաղաք դարձավ Երևանը, մեր այս դիտարկմանը պրն Մինասյանը համամիտ է. «Հյուրը միայն հյուրանոցի իր համարից չի նայում….Եթե այդքան հյուրանոցներ ենք կառուցում, տուրիստ ենք բերում, մեր քաղաքը նաև պետք է այլ գրավչություններ ունենա»:

Ի՞նչ է նշանակում հյուրանոց, որի տակ մետրոյի գնացքները 10 րոպեն մեկ դղրդոցով սուրում են, հարցադրմանը Մինասյանը համաձայն է` այդ վայրում միանշանակ չպետք է նման կառույց ունենալ:

ՀԱԿ ակտիվիստների և ոստիկանների միջև տեղի ունեցած միջադեպով խաթարված երկխոսությունը վերադարձվել էր նորմալ հուն. քննարկման առարկա էին դարձել օրակարգային հարցերը: Կողմերը պայմանավորվել էին հանդիպել այսօր , սակայն չգիտես ինչու, ՀԱԿ պատվիրակության անդամ Սամվել Աբրահամյանը մոտեցել է լրագրողներին և տեղեկացրել, որ հանդիպումը չի կայանալու: Ապա հայտնել, որ պատճառների և մանրամասների մասին կտեղեկացնի Լևոն Զուրաբյանը,  ՀԱԿ գրասենյակում ժամը 13:00-ին հրավիրած ասուլիսում:

Պատվիրակության անդամ Դավիթ Հարությունյանը այս մասին ասաց. «Մինչ այս ձևավորված մեր աշխատանքային հարաբերություններն ամենևին այնպիսին չէին, որ պետք է ներկայանար մեկ մարդ կամ եթե պատվիրակությունը չի գալու, ապա դրա մասին հնարավորություն չունի մեզ հայտնելու: Սա քաղաքական դեմարշ է: Շատ ցավում եմ այս դեմարշի համար: Կարծում եմ, որ դա էթիկայից դուրս է, մենք մինչև հիմա մեզ թույլ չենք տվել այդպես վարվել»,-ասաց: Ըստ Հարությունյանի`ՀԱԿ-ը որևէ լրացուցիչ տեղեկություն չի հայտնել:

Հանդիպման չկայանալու և Տիգրան Առաքելյանի գործի միջև կապի մասին Հարությունյանը խորհուրդ տվեց լսել ՀԱԿ-ի կարծիքը. «Մենք անցած անգամ շատ հստակ ներկայացրել էինք մեր դիրքորոշումը` սա քաղաքական գործընթաց է, և ճիշտ չենք համարում իրավական գործընթացներին մասնակցելը: Միաժամանակ, մեր տպավորությունն այն է, որ քաղաքական համակարգը գործում է ոչ խտրական»:

«Տանգո պարելու համար միշտ երկու մարդ է պետք: Երկխոսությունը չի լինում միակողմանի: Այն միշտ կախված է յուրաքանչյուր կողմի կամքից: Երկխոսությունը համատեղ կամք է, և դա չի նշանակում, որ ՀԱԿ-ն է թելադրում պայմանները:Այս պահին ՀԱԿ-ը չունի քաղաքական կամք` պատշաճ շարունակելու այս քաղաքական գործընթացը: Դեռ պարզ չէ իրավիճակը, մենք դեռ կլսենք պատճառաբանությունը, սակայն չեմ կարծում, որ պետք է այս ձևով վարվեր. եթե մենք ներկայացել էինք, պետք է տեղեկացված լինեինք պատճառների մասին կամ պետք է իրազեկ լինեինք մինչ հանդիպման գալը», — դժգոհեց կոալիցիայի աշխատանքային խմբի ղեկավարը:

«Բանդիտների մեջ կարող են լինել համակարգի նախկին կամ ներկա աշխատակիցներ»

Այսօր ՀՀ ոստիկանապետ Ալիկ Սարգսյանը լրագրողների հետ ճեպազրույցում ասաց, թե իրենց վերլուծությունները չեն բացառում, որ ավազակային հարձակումներ կատարած խմբավորման մեջ ներառված են իրավապահ համակարգի նախկին կամ ներկա աշխատակիցներ: Ոստիկանապետի համոզմունքը իրատեսական է, քանի որ նախկինում նմանատիպ հանցագործություններ`ավազակային հարձակումներ կատարած խմբավորումների մեջ մի քանի բարձրաստիճան իրավապահներ են ներգրավված եղել:

Ոստիկանապետը համակարծիք է գլխավոր դատախազության այն որակման հետ. «Իհարկե դա բանդիտիզմ է, ես համաձայն եմ: Ամիսներ շարունակ կրկնվող հանցագործություն է, որը մինչ այդ որակվել է որպես ավազակային հարձակում: Բայց քանի որ կրկնվում է, արդեն գործող բանդիտական խմբին հատուկ հանցագործություն է իր բոլոր հատկանիշներով` բնակարան մուտք գործելուց սկսած»: Իսկ դրանք լինելով միանգամայն տարբեր հոդվածներ, ենթադրում են տարբեր պատժաչափեր. Բանդիտիզմի դեպքում դատապարտվում են նաև ցմահ ազատազրկման:

Ստեղծվել է օպերատիվ քննչական խումբ, որում ընդգրկվել են համակարգի լավագույն աշխատակիցները. «Ուղղակի ուզում եմ հավատացնել ձեզ, չասեմ հավաստիացնել, որ կարճ ժամանակում այս գործը բացահայտելու ենք: Քանի որ այն հղի է շատ ավելի բարդ եւ վտանգավոր հետեւանքներով, հակառակ դեպքում կունենանք ավելի խայտառակ պատկեր, եւ մեր քաղաքացիներին դժվար կլինի պատասխան տալ: Ունենք որոշակի տվյալներ, որը լուրջ մշակման կարիք ունեն»,- տեղեկացրեց ոստիկանապետը, ապա անկեղծացավ. «Այնպիսի հմտություններ են դրսեւորում, որ ենթադրում ենք նախկին հատուկ ջոտատների, հատուկ խմբավորումների անդամներ են, ինչու չէ` մեր համակարգի, կամ մյուս համակարգերի, ովքեր ունեն այդ փորձը: Նրանք աշխատում են բացառել բոլոր այն սխալները, որ հանցագործները թույլ են տալիս դեպքի վայրում»:

Հիշեցնենք, որ, ավելի վաղ նույն ձեռագրով կողոպտել էին Մալաթիա-Սեբաստիայի նախկին թաղապետ Աղվան Գրիգորյանի եւ «Ճանապարհաշինություն» ԾԻԳ-ի ղեկավար Էդուարդ Բեզոյանի առանձնատները, իսկ օգոստոսի 21-ինթալանել էին ԱԺ նախկին պատգամավոր Նապոլեոն Ազիզյանի կիլիկյայում գտնվող առանձնատունը:

«Ժառանգություն» կուսակցության հաղորդագրությունը.

«Սույն թվականի հունիսի 9-ին ՀՀ մշակույթի նախարար Հասմիկ Պողոսյանը պատգամավոր Ա. Բախշյանին էր տրամադրել Երևան քաղաքի պատմության և մշակույթի անշարժ հուշարձանների պետական ցուցակը` հաստատված 2004 թվականի հոկտեմբերի 7-ի Կառավարության N 1616-Ն որոշմամբ: Դրանց մեջ են Արամի փողոցի 36 բնակելի տունը, Քաղաքային ակումբը (Ջանփոլադյանի թատրոն) և այնտեղ գտնվող որմնանկարները, Գիլանյանի լիմոնադի գործարանը, իսկ Աֆրիկյանների տունը, որը պատրաստվում են քանդել, ըստ վերոնշյալ որոշման պետական ցուցակի, ենթակա է տեղափոխման:

Ոչ միայն այս, այլև նման շատ դեպքերում ակնհայտ է, որ, ինչպես ընդունված է մեզանում, որևէ օրենք կամ Կառավարության որոշում անզոր են կասեցնել այն սրիկայի ձեռքը, ով, առաջնորդվելով միայն սեփական շահույթով ու ընչաքաղցությամբ, շարունակում է քանդել պետության կողմից պահպանվող հուշարձանները: Այդ ձեռքը գործում է մինչ օրս, և հայտնի չէ, թե մինչև երբ է ավերելու մեր երկիրը և ագահորեն ու անօրեն հարստանալու ժողովրդի ու պետության հաշվին:

Վերոնշյալ խնդիրներով պատգամավորը ՀՀ մշակույթի նախարարին և Երևանի քաղաքապետին դիմել է հետևյալ հարցերով, որոնց պատասխանները, ԱԺ կանոնակարգ ՀՀ օրենքի 7-րդ հոդվածի համաձայն, ակնկալում է ստանալ 10-օրյա ժամկետում.

1. Ինչո՞ւ են ոչնչացվել պետական պաշտպանության ենթակա հուշարձանները:

2. Կառավարության ո՞ր որոշման հիման վրա են քանդվել այդ հուշարձանները,

3. Արդյոք առկա՞ է պայմանագիր կառուցապատում իրականացնող կազմակերպությունների հետ. եթե այո` խնդրում եմ տրամադրել պայմանագրերի պատճեները,

4. Արդյո՞ք ՀՀ Մշակույթի նախարարության և կառուցապատողների միջև կան պայմանագրեր և պարտավորագրեր` ուսումնասիրման, չափագրման և երեսաքարերի համարակալման և պահպանողական աշխատանքների վերաբերյալ. եթե այո` խնդրում եմ տրամադրել այդ փաստաթղթերի պատճեները:

Ինչ վերաբերում է Աֆրիկյանների բնակելի հուշարձան-տան ապամոնտաժմանը, ապա պարզվում է, որ այն իրականացնող կազմակերպությունները պարտադրել են նախկին սեփականատերերին քանդել իրենց բնակարանները:

1. Արդյո՞ք նախկին սեփականատերերի վրա նման պարտավորություն դնելը բխում է տեղափոխման ենթակա հուշարձանի պահպանության շահերից:

2. Ո՞ւմ վրա է դրված ապամոնտաժման ժամանակ հուշարձանի պահպանության հոգսերը, և ինչո՞ւ է դա պարտադրվել քաղաքացիներին»: