Վերջին օրերին ոստիկանությունում կատարվող կադրային փոփոխությունները որոշակի ասեկոսեների ու բամբասանքների տեղիք են տվել, որոնք խանգարում են ոստիկանության բնականոն աշխատանքին եւ ազդում անձնակազմի բարոյահոգեբանական մթնոլորտի վրա:
Հայտնում ենք, որ համակարգում ընթացող կադրային փոփոխությունները ինքնանպատակ չեն եւ աշխատանքի կատարելագործման ու արդյունավետության բարձրացման նպատակ են հետապնդում:
Ոստիկանությունը գործում է հրապարակային ու թափանցիկ եւ շարունակելու է հավաստի ու լիարժեք տեղեկատվություն տրամադրել համակարգում ընթացող գործընթացների վերաբերյալ:
Զանգվածային լրատվամիջոցներին կոչ ենք անում իրենց գործունեությամբ աջակցել ոստիկանությունում ընթացող բարեփոխումներին եւ զերծ մնալ չճշտված տեղեկատվության հրապարակումից:

Տրանսպորտի և կապի նախարար Մանուկ Վարդանյանի գլխավորած պավիրակությունը կմասնակցի նոյեմբերի 10-11-ը Թբիլիսիում Համաշխարհային բանկի կողմից կազմակերպված` Հարավային Կովկասի տրանսպորտի ոլորտի հեռանկարներին նվիրված բարձրաստիճան ներկայացուցիչների համակարգման տարածաշրջանային ժողովին:

Ժողովի նպատակն է առավելագույնի հասցնել դոնորների ծրագրերի ազդեցությունը տնտեսության զարգացման վրա` դրանք համապատասխանեցնելով ազգային ծրագրերին և ամրապնդել դոնորների համակարգումը:

Ժողովը հնարավորություն կընձեռի ներկայացնել ազգային ծրագրերը, հստակեցնել ներդրումային առաջնահերթությունները և առաջ քաշել դոնորների օժանդակության կարիք ունեցող նոր ծրագրերի գաղափարները:

Հայաստանի ոստիկանապետ, գեներալ լեյտենանտ Վլադիմիր Գասպարյանը լուրջ վերադասավորումներ է իրականացրել ոստիկանական համակարգում:

Հայաստանի ոստիկանության հասարակայնության հետ կապերի եւ լրատվության վարչությունից տեղեկացնում են, որ ոստիկանապետի հրամանով ոստիկանության գնդապետ Արմեն Գաբուզյանը ազատվել է ոստիկանության ներքին անվտանգության վարչության պետի պաշտոնից եւ նշանակվել է կազմակերպված հանցավորության դեմ պայքարի գլխավոր վարչության առաջին վարչության (միգրացիայի) պետ: Ներքին անվտանգության վարչության պետ է նշանակվել Արմեն Հակոբյանը, ով մինչ այդ աշխատում էր Հատուկ քննչական ծառայությունում:

Ոստիկանապետի հրամաններով աշխատանքից ազատվել եւ կադրերի ռեզերվ են տեղափոխվել Ճանապարհային ոստիկանության 1-ին հաշվառման քննական բաժնի պետ, ոստիկանության գնդապետ Արթուր Մարգարյանը, Ճանապարհային ոստիկանության Երեւան քաղաքի 2-րդ հաշվառման քննական բաժնի պետ, ոստիկանության գնդապետ Մանվել Մամիկոնյանը, ոստիկանության տնտեսական վարչության պետի ժամանակավոր պաշտոնակատար Գրիշա Մարտիրոսյանը:

Ոստիկանության տնտեսական վարչության պետ է նշանակվել Ռազմիկ Խանզրադյանը, ՃՈ Երեւան քաղաքի 2-րդ հաշվառման քննական բաժնի պետ` Արմեն Դավթյանը:

ՊԵԿ նախագահ Գագիկ Խաչատրյանը կասկած էր հայտնել բյուջեի  իրատեսական լինելու վերաբերյալ: Այն բուռն քննարկումների պատճառ է դարձել:

Կառավարության կողմից մշակված հարկային փոփոխությունների փաթեթի «արժեքը» մոտ 14 մլրդ դրամ է, «Չենք ասում, որ անլուծելի է, բայց ասում ենք` կան մտահոգություններ, ստվերի, տարբեր ճյուղերի հետ կապված»,- այսօր` Ազգային Ժողովում լրագրողների հետ ճեպազրույցում հայտարարեց ՀՀ կառավարությանն առընթեր պետեկամուտների կոմիտեի պետի տեղակալ Արմեն Ալավերդյանը:

Հիշեցնենք, որ 2012 թ. պետական բյուջեի նախագծում հարկային եկամուտների պլանը ավելացվել է 101 մլրդ դրամով.«Եթե դրան ավելացնենք վարչարարության գործոնը, ապա ստացվում է, որ այդ 101 մլրդ դրամ ավելացումի կեսից ավելին պետք է ստացվի տնտեսական աճի հաշվին: Աստված տա` այդպես լինի»,- ասաց Ալավերդյանը:

Արդեն քննարկվել է, որ հատկապես էական փոփոխությունների կենթարկվի հանքարդյունահանող ընկերությունների հարկումը` ընդերքի շահագործման հետ կապված: Ըստ Ա. Ալավերդյանի` ընդերքի հարկման փոփոխությունը նույնիսկ ուշացած միջոցառում է:

Հայաստանի կառավարությունը ժողովրդին սխալ է ներկայացնում եկող տարվա բյուջեի նախագիծը: Այդ մասին, նոյեմբերի 8-ին, լրագրողների հետ հանդիպմանը հայտարարել է «Ժառանգություն» խմբակցության պատգամավոր Արմեն Մարտիրոսյանը` խիստ բացասաբար գնահատելով կառավարության վարմունքը:

«Կառավարությունն ասում է զարգացման բյուջե, բայց անգամ կայունացման չենք հասել, ուր մնաց զարգացման: Առանց աշխատավարձի բարձրացման մենք խնդիրներ կարող ենք ունենալ: Այս բյուջեն կարելի է անվանել՝ «եղունգ ունես գլուխդ քորի»,- նկատեց Մարտիրոսյանը:

Վերջինիս խոսքով շատ ավելի ազնիվ կլիներ, եթե կառավարությունը հետեւեր 90-ականների սկզբին Վազգեն Մանուկյանի գլխավորած կառավարությանը եւ ասեր, որ պահածոներ ավելի շատ պատրաստեն:

Ըստ պատգամավորի` Հայաստանը գտնվում է տնտեսական առումով շատ ծանր վիճակում եւ ճգնաժամի լուրջ վտանգի տակ: «Ճգնաժամի առաջին ալիքի ժամանակ մենք լուրջ պարտքեր վերցրինք, եթե կրկին ճգնաժամ լինի, անցանկալի իրավիճակում կլինենք, մոտ կլինենք Հունաստանին, որին դեֆոլտ է սպառնում»,- նշեց Արմեն Մարտիրոսյանը` հավելելով, որ, ցավոք, չի տեսնում անվտանգության բարձիկները նոր բյուջեում: «Սա անկարող բյուջե է, եւ սոցիալական որեւէ ուղղվածություն չի կարող ունենալ»,- բնութագրեց նա:

Ի դեպ, նրա խոսքով, առայժմ հայտնի չէ, թե ինչպես է բյուջեի 2012թ. նախագծին քվեարկելու «Ժառանգություն» խմբակցությունը: «Դեռ քննարկում չի եղել, թե ինչպես է քվեարկելու Ժառանգությունը: Մենք կտեսնենք, թե ինչ դրական քայլեր են արվում: Այս պահի դրությամբ, որեւէ դրական քայլ չենք տեսնում»,- ամփոփեց պատգամավորը:

ՀՀ կառավարությանն առընթեր պետեկամուտների կոմիտեն հրապարակել է Հայաստանի խոշորագույն հարկատուների ցանկը, որտեղ 2011-ի  9 ամսվա արդյունքներով առաջին տեղում Զանգեզուրի պղնձամոլիբդենային կոմբինատն է ` պետբյուջեին  վճարած  22.5 մլրդ դրամով:

Երկրորդ խոշորագույն հարկատուն «Հայռուսգազարդն» է`  մոտ 16 մլրդ դրամի հարկով:

3-րդ տեղում  12.2 մլրդ դրամով «Ղ-Տելեկոմն» է, որին  հաջորդում է Սամվել Ալեքսանյանին պատկանող «Ալեքս Գրիգը»` 11.9 մլրդ դրամ ցուցանիշով:

Հինգերորդ ցուցանիշը պատկանում է «Արմենթելին»` 9.7 մլրդ դրամ:

Վառելիքի ներմուծմամբ զբաղվող «Սիթի Պետրոլ Գրուպ» ընկերությունը, որն  9 ամսում վճարել է 7.8 մլրդ դրամ,  զբաղեցնում է 6-րդ հորիզոնականը:

7-րդ տեղում՝ «Հայաստանի էլեկտրական ցանցերն» է, իսկ «Ֆլեշը»,  7.2 մլրդ դրամ ցուցանիշով, 8-րդ հորիզոնականում է:

«Արմենիա միջազգային օդանավակայաններ» 5.5 մլրդ դրամ ցուցանիշով զբաղեցնում է 9-րդ հորիզոնականը:

Տասնյակը եզրափակում է «Հայկական ատոմակայանը»` 3.7 մլրդ դրամ:

asekose.am

Հայաստանի ԱԳ նախարար Էդվարդ Նալբանդյանի հրավերով, նոյեմբերի 8-10-ին, պաշտոնական այցով Հայաստան է այցելելու Նորվեգիայի Թագավորության ԱԳ նախարար Յոնաս Գահր Շտյորեն:

ԱԳՆ մամուլի ծառայությունից հայտնում են, որ այցի ընթացքում Նորվեգիայի արտգործնախարարին կընդունեն Հայաստանի նախագահ Սերժ Սարգսյանը եւ Գարեգին Բ-ն:

Երեւանում Նորվեգիայի ԱԳ նախարար Յոնաս Գահր Շտյորեն հանդիպում կունենա արտաքին գործերի նախարար Էդվարդ Նալբանդյանի հետ, դասախոսություն կկարդա ԵՊՀ-ում, ինչպես նաեւ կայցելի Հայոց ցեղասպանության զոհերի հուշահամալիր:

Նորվեգիայի արտաքին քաղաքական գերատեսչության ղեկավարի` Հայաստան կատարելիք պաշտոնական այցի շրջանակներում Նորվեգիայի եւ Հայաստանի ԱԳ նախարարները կմասնակցեն «Էներգետիկ անվտանգությանն ուղղված փոքր հիդրոէներգետիկայի կայուն զարգացման նորվեգա-հայկական համագործակցության ծրագրի» մեկնարկի միջոցառմանը, Ֆրիտյոֆ Նանսենի հուշարձանի բացման արարողությանը, ինչպես նաեւ Ֆրիտյոֆ Նանսենի 150-ամյակին նվիրված համերգին:

Հայտարարություն է տարածել ԱԺ պատգամավոր Սպարտակ Մելիքյանը. Ա. Մկրտումյանը և Դ. Ավետիսյանն արդեն իսկ հաստատում են իմ հնչեցրած քննադատության իսկությունը: Ս.թ. հոկտեմբերի 4-ին Ազգային Ժողովի քառօրյա նիստի հայտարարությունների ժամին, առաջնորդվելով ԱԺ կանոնակարգով, նաև հիմք ընդունելով քաղաքացիներից ստացված համապատասխան բազմաթիվ ահազանգերը, ես իմ ելույթում անկեղծ մտահոգություն էի հայտնել ՀՀ դատական համակարգում տիրող որոշ խիստ մտահոգիչ իրողությունների վերաբերյալ` դրանք որակելով որպես մեր երկրի և ժողովրդի ապագան վտանգող երևույթներ: Իբրև հիմնավորում` ես հասցեական քննադատություն էի ուղղել ՀՀ Վճռաբեկ դատարանի նախագահ Արման Մկրտումյանին և նույն դատարանի քրեական գործերով պալատի նախագահ Դավիթ Ավետիսյանին` կոնկրետ ընդգծելով, որ ՀՀ դատական համակարգի կոռուպցիոն լծակներն իրենց ձեռքում կենտրոնացրած սույն պաշտոնյաների անձնական շահադիտությամբ և կոնկրետ հրահանգով են կայացվում գրեթե բոլոր դատական որոշումներն ու վճիռները, որ նաև այդպիսով շարքային դատավորների մեծամասնությունն այսօր զրկված է որևէ ինքնուրույն, արդար վճիռ կայացնելու հնարավորությունից, իսկ չենթարկվողները պարզապես հեռացվում են աշխատանքից…

Նույն օրը ԶԼՄ-ներն անդրադարձան իմ հայտարարությանը, հետո, բնականաբար, իրար հաջորդեցին տարաբնույթ մեկնաբանություններն ու վերլուծականները: Տրամաբանորեն` պետք է չուշանային նաև անձամբ պարոնայք Ա. Մկրտումյանի և Դ. Ավետիսյանի պաշտոնական արձագանքները` ԱԺ ամբիոնից պաշտոնապես, անձամբ իրենց հասցեագրված իմ քննադատության առնչությամբ: Սակայն նրանցից որևէ կոնկրետ, պաշտոնական պատասխան չի ստացվել մինչ օրս, թեպետ` նոյեմբերի 4-ին լրացել է նման դեպքերի համար օրենքով սահմանված 1-ամսյա ժամկետը` ինձ պատասխանատվության կանչելու առումով:

Միաժամանակ հարկ է հատուկ շեշտել, որ ակնկալվող պատասխանների փոխարեն, իմ ելույթից երկու օր անց` ս.թ. հոկտեմբերի 6-ին, անշուշտ, պարոնայք Ա. Մկրտումյանի և Դ. Ավետիսյանի գիտությամբ, ՀՀ դատական համակարգի պաշտոնական կայք-էջում զետեղվել, ապա տպագիր և էլեկտրոնային մամուլում վերատպվել է մի երկիմաստ, գրեթե տարօրինակ գրություն, որը, ամենամեծ ցանկության դեպքում անգամ, դժվար է ընկալել որպես անձամբ պարոնայք Ա. Մկրտումյանի և Դ. Ավետիսյանի պաշտոնական, կոմպետենտ պատասխանն` իմ հնչեցրած քննադատությանը: Այն, ըստ իս, ոչ այլ ինչ է, քան բարձրաստիճան պաշտոնյաների ոչ կոմպետենտության, հոռի ինքնավստահության, պաշտոնական և զուտ մարդկային վարքականոններից ի սպառ անտեղյակության և …սեփական մեղքերի ակամա, անուղղակի խոստովանության մի «օրինակելի» նմուշ:

Նախ, դատելով ամենից, հիշյալ կայք-էջում զետեղված գրության տեքստը անձամբ չեն հեղինակել պարոնայք Ա. Մկրտումյանն ու Դ. Ավետիսյանը. նյութին կից պարզապես չկա նրանցից որևէ մեկի անուն—ազգանունը: Ասել կուզի` խուսափելով հանվանե ներկայանալուց, պարոնայք Ա. Մկրտումյանը և Դ. Ավետիսյանը այդպիսով ուղղակի մանկամտորեն փորձել են իրենց §վրայից գցել¦-հեռացնել կոնկրետ իրենց հասցեագրված քննադատությունը, և, խեղաթյուրելով իրականությունը, այդ քննադատության սլաքը, հնարավորինս աննկատ, թեքել դեպի ՀՀ դատական ողջ համակարգը: Զուր ջանքեր. իմ ելույթը գեթ մեկ անգամ լսած կամ ընթերցած յուրաքանչյուր ոք կհաստատի, որ քննադատությանս թիրախ է եղել ոչ թե ՀՀ դատական համակարգը` իր հիմնականում բարեխիղճ և արհեստավարժ դատավորներով ու այլ աշխատակիցներով հանդերձ, այլև` բացառապես այդ համակարգը բռնազավթած Մկրտումյան-Ավետիսյան խայտառակ տանդեմը: Ավելին, այդ առումով ես հատուկ շեշտել եմ, որ հենց նրանց քմահաճույքով են համակարգից հեռացվել և հեռացվում իսկապես բարեխիղճ, ազնիվ և արհեստավարժ բազմաթիվ դատավորներ:

Հաջորդը: Ցանկացած անկողմնակալ ընթերցող կհաստատի, որ ՀՀ դատական համակարգի պաշտոնական կայք-էջում զետեղված գրությունը, բովանդակային առումով որևէ, նույնիսկ` հեռակա աղերս չունի ԱԺ ամբիոնից իմ հնչեցրած քննադատության հետ: Մատնանշված լրջագույն խախտումներին կամ բացթողումներին անդրադառնալու, ասվածը հերքելու փոխարեն, հոդվածագիրը, գրության իրական պատվիրատուների հրահանգով, անհասկանալի հետևողականությամբ շարադրել է ինձ վերաբերող, ներկայումս դեռ ընթացող դատական գործի մանրամասները: Իրականում ի՞նչ նպատակ է այդ քայլով հետապնդել հեղինակը` ցույց կտա ժամանակը: Սակայն առաջին հայացքից թերևս այն տպավորությունն է ստեղծվում, որ այդ հիրավի ցինիկ «հնարքով» նա փորձել է հենց ի սկզբանե շրջանցել, մոռացության մատնել պարոնայք Ա. Մկրտումյանի և Դ. Ավետիսյանի կամայականությունների և ապօրինությունների թեման, ապա անցնելով «հակահարձակման»` իմ նկատմամբ գործադրել հոգեբանական ճնշման տխրահռչակ, էժանագին մեթոդներից մեկը, երբ, պաշտպանության լավագույն ձև է դառնում նախահարձակումը: Ասվածի լավագույն ապացույցն է գրության մեջ տեղ գտած ակնհայտ անհեթեթ, բայց միաժամանակ սպառնալից այս միտքը. «Փաստորեն, Սպարտակ Մելիքյանը, հանդիսանալով դատարանում քննվող քրեական գործով դատավարության մասնակից, դատական համակարգի հանդեպ ունեցած իր կարծեցյալ մտահոգություններն արտահայտելու նպատակով, օգտագործելով ՀՀ Ազգային ժողովի ամբիոնը, փորձել է ճնշում գործադրել դատարանի վրա, որը, ըստ էության, արդարադատությանն ուղղված միջամտություն է»: Համաձայնենք` սրանից լավ ինքնաբացահայտում կամ ինքնախոստովանություն դժվար է պատկերացնել. քիչ է, որ սույն մտքի` անտակտության սահմանն անցած հեղինակը իմ ` Ազգային ժողովի պատգամավորիս, արտահայտած անկեղծ մտահոգությունները, որտեղ ակնարկ անգամ չկա ինձ վերաբերող վերոհիշյալ դատական գործի մասին, որակում է §կարծեցյալ¦, նա նաև իրեն, դարձյալ իր շեֆերի դրդմամբ, իրավունք է վերապահում անհիմն կերպով ինձ ամբաստանել դատարանի վրա իբր ճնշում գործադրելու համար: Ավելին, ուղղակի սպառնում է ՀՀ քրեական օրենսգրքի 332–րդ հոդվածով` հավանաբար հույս փայփայելով, թե իբր այսուհետ կգերադասեմ լռել կամ գոնե մեղմել իմ քննադատությունը պարոնայք Ա. Մկրտումյանի և Դ. Ավետիսյանի նկատմամբ…

Այսքանից հետո կարելի է միայն եզրակացնել, որ գրության հեղինակը, կամ ավելի ճիշտ` նրա թիկունքում վարպետորեն թաքնված պարոնայք Ա. Մկրտումյանը և Դ. Ավետիսյանը, իրենց ամոթալի վարքագծով և հայ պաշտոնյայի պատիվն արատավորող աշխատաոճով արդեն իսկ հաստատում են իմ հնչեցրած քննադատության իսկությունը:

Ասվածն ամփոփելուց առաջ, հարկ է նաև հնարավորինս հակիրճ անդրադառնալ պատգամավորական աշխատավարձս Ա. Մկրտումյանին փոխանցելու մասին` ԱԺ նախագահին ուղղված իմ խնդրանքին, որի բուն էությունը խեղաթյուրելու համար ևս, պարզվում է, ջանք ու եռանդ չեն խնայել պարոնայք Ա. Մկրտումյանը և Դ. Ավետիսյանը: Այսպես: Բարոյականություն բառը առաջին անգամ հավանաբար հեռուստասերիալներից լսած սույն պարոնները, վերոհիշյալ գրության մեջ, գրեթե բացահայտորեն ստանձնելով ինձ վերաբերող դատական գործով պատասխանող կողմի շահերի պաշտպանությունը, փորձել են, միայն իրենց հատուկ նենգությամբ, ինձ հորդոր կարդալ առ այն, թե իբր էլ ինչու եմ պատասխանող կողմից պահանջել խոշոր չափի դրամական փոխհատուցում, եթե մյուս կողմից պատրաստ եմ նաև աշխատավարձս նվիրաբերել Ա. Մկրտումյանին: Համաձայնենք` սա արդեն չլսված բան է, ուղղակի նոն սենս` ՀՀ ողջ դատական պրակտիկայում: Մի՞թե այսքանից հետո չի ստացվում, որ մեր դատական համակարգի սույն պարագլուխները, ի վիճակի չլինելով անգամ տարբերակել իմ, պատասխանող կողմի և իրենց քաղաքացիական իրավունքներն ու պարտականությունները, այդպիսով իսկ հերքում են իրենց անկողմնակալությունը, անուղղակի միջամտում են ինձ վերաբերող դատական գործին և ճնշում գործադրում դատարանի վրա…

Ինչ վերաբերում է դատարանում պատասխանող կողմից իմ պահանջած փոխհատուցման գումարի ենթադրվող ճակատագրին, ապա պատասխանող կողմի` մարդասպանների, դատապաշտպանի պարտավորությունները ստանձնած պարոնայք Ա. Մկրտումյանին և Դ. Ավետիսյանին խորհուրդ կտայի ևս մեկ անգամ, առանց ավելորդ հույզերի, ծանոթանալ իմ հայցադիմումին, որտեղ բառացի գրված է, որ տուժողի իրավահաջորդը փոխհատուցման գումարը «…որպես իր ծնողի հիշատակի հավերժացման մի յուրօրինակ միջոց, մտադիր է ամբողջությամբ տրամադրել ՀՀ-ում գործող ծերանոցների, մանկատների, անապահով այլ խավերի պաշտպանությանը կոչված կազմակերպությունների նյութական ապահովության բարելավման, ինչպես նաև սահմանամերձ դպրոցների և մանկապարտեզների վերանորոգման համապատասխան հաշվեհամարներին և ծրագրերին»: Ի դեպ, նշված խմբի շահառուների ցանկում նպատակ է եղել ընդգրկելու նաև պարոն Արման Մկրտումյանի հորը, որը, ինչպես հայտնի է մամուլի հրապարակումներից, իր իսկ սեփական բնակարանից վտարվել է դատավոր որդու «օգնությամբ» և ներկայում գոյություն է քարշ տալիս ծայրաստիճան չքավորության մեջ:

Հ.Գ. Ի գիտություն Ա. Մկրտումյանի և Դ. Ավետիսյանի հայտնում եմ, որ այսօր արդեն քաղաքացիական հայցով դիմել եմ դատարան, որտեղ ՀՀ Վճռաբեկ դատարանը` հանձինս նշված պաշտոնյաների, պատասխանատվության կկանչվի իմ` ԱԺ պատգամավորիս, անձն ու արժանապատվությունը հրապարակավ վիրավորելու, ինձ սպառնալու և զրպարտելու համար:

ՀՀ Ազգային Ժողովի պատգամավոր Սպարտակ Մելիքյան

ԱԳ նախարար Էդվարդ Նալբանդյանի հրավերով վաղը Հայաստան կժամանի Իրանի արտգործնախարար Ալի Աքբար Սալեհին:

Այցի ընթացքում Իրանի արտգործնախարարին կընդունի նախագահ Սերժ Սարգսյանը:

Երևանում Իրանի ԱԳ նախարարը հանդիպումներ կունենա նաև Ազգային ժողովի նախագահ Հովիկ Աբրահամյանի, արտաքին գործերի նախարար Էդվարդ Նալբանդյանի և էներգետիկայի և բնական պաշարների նախարար Արմեն Մովսիսյանի հետ:

Մարդու իրավունքների պաշտպան Կարեն Անդրեասյանն իր http://pashtpan.am/main/am/0/27/2533 www.pashtpan.am կայքում ներկայացրել է օրենսդրական փոփոխության երկու առաջարկ, որոնք ուղղարկել է վարչապետ Սարգսյանին, Ազգային ժողովի «Ժառանգություն» խմբակցության ղեկավար Ստեփան Սաֆարյանին, «Հայ Յեղափոխական դաշնակցություն» խմբակցության ղեկավար Վահան Հովհաննիսյանին, «Օրինաց երկիր» խմբակցության ղեկավար Հեղինե Բիշարյանին, «Բարգավաճ Հայաստան» խմբակցության ղեկավար Գագիկ Ծառուկյանին և «Հայաստանի Հանրապետական կուսակցություն» խմբակցության ղեկավար Գալուստ Սահակյանին:

Մարդու իրավունքների պաշտպանն առանձնացրել է իրեն ուղղված բողոքներից երկու խումբ. Ըստ նրա` դրանք վկայում են այն մասին, որ բժշկասոցիալական փորձաքննության արդյունքում հաշմանդամություն ունեցող մարդիկ համապատասխան հանձնաժողովի կողմից չեն ճանաչվում հաշմանդամ: Որոշ դեպքերում էլ օրենքով նախատեսված հերթական փորձաքննության ընթացքում հաշմանդամության խումբ ունեցող մարդկանց զրկում են խմբից կամ փոխում դեպի դրական խումբ, երբ նրանց առողջական վիճակը ոչ թե բարելավվել է, այլ հակառակը՝ վատթարացել: Ունենալով լուրջ առողջական խնդիրներ և դրանք վկայող բժշկական եզրակացություններ՝ մարդը հաճախ չի ճանաչվում հաշմանդամ այն պատճառաբանությամբ, որ իր ունեցած հիվանդությունը, վնասվածքը կամ խեղումը չեն առաջացնում հաշմանդամության սահմանման համար անհրաժեշտ կենսագործունեության սահմանափակում: Դրա պատճառը օրենքով նախատեսված հաշմանդամության սահմանման չափանիշների անորոշությունն է, ինչը գնահատման հայեցողության բավականին լայն շրջանակ է նախատեսում բժշկասոցիալական փորձաքննության հանձնաժողովների համար, արդյունքում` փորձաքննությունները որոշ դեպքերում իրականացվում են ոչ օբյեկտիվ ու կամայական:

Երկրորդը`հասարակության և պետության կարիքների համար օտարված գոտիներում գտնվող գույքի սեփականատերերի բողոքները հաճախ վերաբերում են փոխհատուցման խնդիրներին և պետության կողմից կառուցապատողների նկատմամբ պատշաճ հսկողության բացակայությանը: Օրենքով նախատեսվում է, որ օտարվող սեփականության դիմաց սեփականատիրոջը վճարվում է համարժեք փոխհատուցում, այն է՝ օտարվող գույքի շուկայական արժեքից տասնհինգ տոկոս ավելի գումար: Այս դեպքում հաշվի չի առնվում այն հանգամանքը, որ օտարումը կատարվում է սեփականատիրոջ կամքին հակառակ, հետևաբար օտարվող սեփականության փոխհատուցման չափը որոշելիս շուկայական արժեքին զուգահեռ անհրաժեշտ է կիրառել նաև այլ չափանիշներ, օրինակ՝ սեփականատիրոջ համար նույնանման պայմաններ այլ վայրում ապահովելու հնարավորությունը: Մտահոգիչ է նաև այն հանգամանքը, որ պետությունը սահմանափակվում է միայն տարածքի նկատմամբ բացառիկ` գերակա հանրային շահ ճանաչելով, իսկ օտարված գոտիներում գտնվող գույքի սեփականատերերի նկատմամբ պարտավորությունների կատարումը լիովին թողնված է օտարվող սեփականությունը ձեռք բերող կազմակերպություններին, որոնց գործունեության համար պետությունը որևէ պատասխանատվություն չի կրում և որևէ կերպ չի վերահսկում հետագա գործընթացը:

Հ.Գ. Պաշտպանը ներկայացրել է այս խնդիրների լուծման իր տարբերակները և առաջարկել հանդես գալ օրենսդրական փոփոխություններ կատարելու նախաձեռնությամբ: