Հայաստանի փոխվարչապետ, տարածքային կառավարման նախարար Արմեն Գեւորգյանն այսօր` նոյեմբերի 11-ին, այցելել է Արմավիրի մարզ: Տարածքային կառավարման նախարարության տեղեկատվության եւ հասարակայնության հետ կապերի վարչությունից հայտնեցին, որ փոխվարչապետը մարզպետ Աշոտ Ղահրամանյանի  ուղեկցությամբ մասնակցել է Մյասնիկյան համայնքի դպրոցի բացման արարողությանը: Նշենք, որ դպրոցը հիմնանորոգվել է «Հայաստանի մանուկներ»  հիմնադրամի  (COAF) «Բաղրամյանի տարածաշրջանի համայնքների զարգացման ծրագրի» շրջանակում, նախատեսված է  600 աշակերտի համար: Հաստատությունն  ունի ժամանակակից պահանջներին համապատասխան գրադարան եւ մեդիա կենտրոն, վերապատրաստման կենտրոն, բացօթյա դասասենյակ։ Դպրոցի վերանորոգման եւ կահավորման համար ծախսվել է 1,5 մլն դոլար: Սա հիմնադրամի կողմից Արմավիրի մարզում հիմնանորոգվող հինգերորդ դպրոցն է` Քարակերտ, Շենիկ, Դալարիկ եւ  Լեռնագոգ գյուղերի դպրոցներից հետո։

Ա. Գեւորգյանը կառավարության անունից շնորհակալություն է հայտնել  հիմնադրամի հիմնադիր Գարո Արմենին` հույս հայտնելով, որ համայնքային ենթակառուցվածքների զարգացմանն ուղղված  ծրագրերը շարունակական կլինեն: Փոխվարչապետն այցելել է նաեւ Արմավիրի թիվ 10 դպրոց, որն ընդգրկված է մարզերի առաջնահերթ լուծում պահանջող հիմնախնդիրների լուծման երկրորդ ծրագրում, ծանոթացել նախապատրաստական աշխատանքներին: Ծրագրով հատկացվել է 50 միլիոն դրամ: Համապատասխան պայմանագրերի կնքումից հետո կմեկնարկեն վերանորոգման աշխատանքները: Այնուհետեւ Ա. Գեւորգյանը ծանոթացել է նույն ծրագրում ընդգրկված  Արմավիրի թիվ 5 դպրոցում իրականացված աշխատանքներին: Դպրոցին առաջին հրատապ ծրագրով հատկացվել էր 90 մլն  դրամ, որով հիմնանորոգվել են երեք մասնաշենքերը: Երկրորդ ծրագրով հատկացվել է  79 մլն 483 հազար դրամ` մյուս երկու մասնաշենքերի նորոգման համար: Դրանով ավարտին կհասցվի 1141 աշակերտի համար նախատեսված հաստատության  վերանորոգումը:

Նոյեմբերի 10-ին, Թաթա Սիմոնյանի համերգին, որը նվիրված էր Երիտասարդության համաշխարհային օրվան եւ Ուսանողության միջազգային օրվան, ներկա է եղել Հայաստանի վարչապետ Տիգրան Սարգսյանը: Համերգը կազմակերպել էին Հայաստանի երիտասարդական հիմնադրամը եւ ՀՀԿ  երիտասարդական կազմակերպությունը։

Տիգրան Սարգսյանը ՀՀ նախագահի, ՀՀԿ-ի եւ իր անունից շնորհավորել է երիտասարդներին տոների առթիվ՝ նշելով, որ երիտասարդները մեծ ուժ են, եւ այդ ուժի համախմբումը մեր երկրին կբերի մեծ նվաճումներ։

ՀՀԿ երիտասարդական կազմակերպության ղեկավար, պատգամավոր Կարեն Ավագյանն իր հերթին նշել է. «Մեզ անհրաժեշտ է խելացիների հասարակություն, որպեսզի կառուցենք մեր երազած պետությունը»։

Անդրադառնալով մարզաբնակ երիտասարդների հիմնախնդիրներին՝ Կարեն Ավագյանն ընդգծել է, որ դրանց լուծումը պետական երիտասարդական քաղաքականության առաջնահերթություններից է։

ՀՀԿ երիտասարդական կազմակերպության եւ Հայաստանի երիտասարդական հիմնադրամի կազմակերպած համերգների շարքը կշարունակվի նոյեմբերի 15-ին. Գաբրիել Սունդուկյանի անվան թատրոնում ռոքի սիրահարները կարող են ունկնդրել «Դեղ», «Բամբիռ», «Դորիանս», «Ռեինկարնացիա» խմբերին։ Նոյեմբերի 17-ին՝ Ուսանողների միջազգային օրը, «Արամ Խաչատրյան» համերգասրահում կհնչի Արամ Խաչատրյանի Ջութակի կոնցերտը՝ Հայաստանի պետական երիտասարդական նվագախմբի կատարմամբ (մենակատար՝ Նիկոլայ Մադոյան, խմբավար՝ Սերգեյ Սմբատյան)։ Իսկ նոյեմբերի 20-ին Կոմիտասի անվան կամերային երաժշտության տանը տեղի կունենա հեղինակային երգի երեկո։

Նոյեմբերի 11-ին,  ժամը 13:00 ին, «Վարկած»  (նախկին Ընտրություն.Տիգրան Մեծ հրատարակչություն 4-րդ հարկ,422 սենյակ) ակումբի  Հյուրն է քաղաքագետ-վերլուծաբան Աշոտ Մանուչարյանը:

Թեման` Ներքաղաքական վերադասավորումներ և ապագա զարգացումներ:

Ներքին գործերի նախկին նախարար, Հայաստանի առաջին նախագահի ազգային անվտանգության գծով խորհրդական Աշոտ Մանուչարյանը կխոսի վերջին աղմկալի պաշտոնանկությունների, նոր վերադասավորումների, Հայաստանում պայմանավորված ու թելադրված մի շարք երևույթների, ինչպես նաև հարևան երկրներում կատարվող հետաքրքիր իրադարձությունների մասին:

Հայաստանի տեղական ինքնակառավարման մարմինների 15-ամյա հոբելյանի կապակցությամբ կազմակերպված միջոցառումների շրջանակում այսօր Մատենադարանում տեղի է ունեցել մրցանակաբաշխություն, որին ներկա է եղել նաև վարչապետ Տիգրան Սարգսյանը: Տարբեր անվանակարգերում լավագույնը ճանաչված համայնքների ղեկավարներին մրցանակները հանձնել է անձամբ կառավարության ղեկավարը:
2011 թվականի լավագույն քաղաքային համայնք է ճանաչվել Շիրակի մարզի Արթիկ քաղաքը, իսկ լավագույն գյուղական համայնք՝ Արարատի մարզի Մխչյան համայնքը: «Մաքուր համայնք 2011»-ին արժանացել են Արագածոտնի մարզի Թալին քաղաքը և Շիրակի մարզի Ամասիայի գյուղական համայնքը: «Լավագույն կանաչապատ համայնք» կոչումն ստացել է Գեղարքունիքի մարզի Լճաշեն համայնքը: «Համայնքային կյանքի լավագույն լուսաբանում» մրցանակին է արժանացել «Հետք» ինտերնետային թերթը, իսկ «Մշակութային լավագույն քաղաքային համայնք»՝ Գյումրի քաղաքը:
ՀՀ տարածքային կառավարման նախարարութան և «Հայաստանի համայնքների միության» կողմից համատեղ անցկացվող «Տարվա լավագույն համայնք» մրցանակաբաշխությունն ամենամյա է, ավանդական բնույթ ունի և կազմակերպվում է սկսած 2006 թվականից։
Մրցանակաբաշխության նպատակն է ավելի թափանցիկ ու հրապարակային դարձնել համայնքների գործունեությունը, ինչպես նաև ձևավորել առողջ մրցակցություն՝ խթանելով տեղական ինքնակառավարման մարմինների գործունեության արդյունավետության բարձրացմանը։ Մրցանակաբաշխությունը նաև ընթացիկ տարում հաջողություններ արձանագրող համայնքների աշխատանքի գնահատման միջոց է։

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Տիգրան Սարգսյանը։ Նիստից առաջ նա խոսք է ասել նոյեմբերի 10-ին նշվող երիտասարդության համաշխարհային օրվա առթիվ. «Ցանկանում եմ Հայաստանի Հանրապետության կառավարության անունից շնորհավորել մեր երիտասարդներին, ցանկանալ նրանց հաջողություն, երջանկություն և եռանդ, որպեսզի, դիմագրավելով ժամանակակից աշխարհի մարտահրավերները, նրանք մեր ազգի համար ապահովեն բարեկեցիկ ապագա։ Այս գեղեցիկ տոնն իր ավանդույթներով գնում է դեպի 1945 թվական։ Երկրորդ համաշխարհային պատերազմից հետո 63 ազգեր ներկայացնող երիտասարդներ հավաքվեցին Լոնդոնում և հիմնադրեցին երիտասարդական ֆեդերացիա։ Հենց այդ օրն էլ ապագայում դարձավ երիտասարդության համաշխարհային օր։ Այն նաև ունի խորհուրդ, որի համաձայն երիտասարդները պատասխանատվություն են ստանձնում ապագայի նկատմամբ։
Մենք նույնպես պետք է ստեղծենք այնպիսի միջավայր, որ մեր երիտասարդները գործի լծվեն այդ պատասխանատվությամբ։ Կարծում եմ՝ ժամանակակից աշխարհում այդ պատասխանատվությունն առաջին հերթին ենթադրում է երիտասարդների համար լավ կրթության ապահովումը։ Եթե ունենանք կրթված երիտասարդություն՝ մեր ազգը կունենա նաև պայծառ ապագա»։

Երեկ երեկոյան Երևանում տարադրամի փոխանակման կետի մոտ ավազակային հարձակման ենթարկված երկու քաղաքացիներն ի վիճակի չեն ցուցմունք տալու, քանի որ գտնվում են վերակենդանացման բաժանմունքում:

Հիշեցնենք, որ երեկոյան Թումանյան-2 շենքում գտնվող փոխանակման կետի վրա են հարձակվել երկու մարդ, զենքի սպառնալիքով գանձապահից գումար են հափշտակել ու դիմել փախուստի` կրակոցներ արձակելով: Մանրամասները՝ հարակից հրապարակումներում:

Գործարարներն սկսել են իրենց հարցերը լուծելիս ապավինել մամուլին: Սա խոսում է երկրում ամենաթողության մասին: Ճիշտ չէ մտածել, որ այն` ինչ այսօր լրագրողներին ներկայացրեց Հայաստանում հանքավայրի շահագործմամբ զբաղվող կին գործարար և խոշոր ներդրող Սիլվա Համբարձումյանը, չգիտեն այնտեղ, որտեղ տիկինը ակնկալում էր ասելիքը հասանելի դարձնել:
Ուղղակի խնդիրն այն է, որ այլ ելք չի մնացել, ու մարդիկ, լինեն նրանք գործարար – միլիոնատեր, թե շարքային քաղաքացի ինչ որ տեղ հույս ունեն, որ եթե «վերևում» իմանան, ինչ որ բան կփոխվի, կամ էլ, սա հանրության կարծիքի միջոցով ինչ որ բանի հասնելու ցանկություն է. այն հանրության` որին ըստ կարիքի չափի օգտագործում են բոլորը, և առաջին հերթին գործարարները:
Սիլվա Համբարձումյանն այսօր ասաց, որ իր իրավունքները պաշտպանելու է մինչև վերջ։ Որ ավելի վաղ այս հարցով դիմել է Գլխավոր դատախազությանը, իսկ այժմ էլ պատրաստվում է դիմել Եվրոդատարան՝ հույս ունենալով հետ ստանալ հանքավայրում ներդրած իր 3,5 մլն դոլարը, որն ինչպես ինքն է պնդում, կորցրել է ապօրինությունների պատճառով: Հետո ինչ, որ գործարարն ունի մեկ տասնյակից ավելի հանքավայրերի ուսումնասիրման և շահագործման լիցենզիաներ: Նա մեր ունեցած տեղեկություններով, մի այդքան էլ հարուցված գործեր ունի իրավապահ գրեթե բոլոր ատյաններում:
Տիկինը հույսը կտրելով հայրենի արդարադատությունից պատրաստվում է պայքարել. Եվրոպական դատարանի միջոցով հետ ստանալ «Լիճվազք Թեյի» ոսկու հանքավայրում ներդրած 3,5 մլն դոլարը: Նա պատմեց, որ հանքավայրի շահագործման թույլտվությունն իրենից ապօրինաբար են խլել, և դրա հետևում կանգնած է Սյունիքի մարզպետ Սուրեն Խաչատրյանը: Ըստ գործարարի` վերջինս «Լիճվազք Թեյի» հանքավայրից յուրացրել է 102 մլն դրամի սարքավորում` իրեն պատկանող «Գեղվա ձոր» հանքավայրում օգտագործելու նպատակով, իսկ 2010 թվականի դեկտեմբերի 3-ին վերոնշյալ հանքի շահագործման իրավունքը «աճուրդով» փոխանցվել է «Սագամար» ընկերությանը, որը, նրա խոսքով, պատկանում է վարչապետի նախկին խորհրդական, Սերոբ Տեր-Պողոսյանին, որին հետո մեղադրեցին մանկապղծության մեջ:
«Բողոքս ուղղված է Էներգետիկայի և բնական պաշարների նախարար Արմեն Մովսիսյանին և դատական համակարգին. հրամաններից մեկը Վճռաբեկ դատարանը համարել է անօրինական, իսկ նախարար Մովսիսյանը նույն` ապօրինի ճանաչված հրամանն արձակել է երկրորդ անգամ, պատճառաբանելով, թե «վերևից են ասել», անօրինական աճուրդ է կայացվել հենց այդ անարդար դատական պրոցեսի ժամանակ»,- ասաց Համբարձումյանը:
Ի դեպ նրան են պատկանում նաև Արաբկիրի նախկին թաղապետ Ալբերտ Երիցյանի հացի երեք գործարանները ու էլի մի շարք օբյեկտներ:
Սիլվա Համբարձումյանն ասաց, որ հույս ունի, որ իր բարձրացրած հարցին ուշադրություն կդարձնի ՀՀ նախագահը և ինչ-որ կերպ կմեղմի այդ անարդարությունը: Ինչպես վերևում նշեցինք` խեղդվողը փրփուրներից է կախվում:

Հայաստանի նախագահ Սերժ Սարգսյանն այսօր` նոյեմբերի 9-ին, մասնակցել է մայրաքաղաքի կենտրոնում Ֆրիտյոֆ Նանսենի հուշարձանի բացման արարողությանը: Նորվեգացի նշանավոր բեւեռախույզ, մեծ մարդասեր, Խաղաղության Նոբելյան մրցանակի դափնեկիր, հայ ժողովրդի բարեկամ Ֆրիտյոֆ Նանսենի հուշարձանի բացումն իրականացվում է նրա 150-ամյակի նվիրված հոբելյանական միջոցառումների շրջանակում:

Նախագահի մամուլի գրասենյակից հայտնում են, որ բացման արարողությանը մասնակցել են նաեւ Նորվեգիայի Թագավորության արտաքին գործերի նախարար Յոնաս Գահր Շտյորեն եւ Նանսենի թոռնուհի Մարիտ Գրեւը:

Հուշարձանի բացումից հետո Սերժ Սարգսյանը տիկին Մարիտ Գրեւին է հանձնել Հայաստանում հատուկ կացության կարգավիճակը հավաստող անձնագիր եւ իր ու ամբողջ հայ ժողովրդի անունից շնորհակալություն հայտնել, որ Ֆրիտյոֆ Նանսենը հազարավոր հայերի այսպիսի անձնագրով աշխարհում իրենց տեղը գտնելու հնարավորություն է տվել:

Ձերբակալվել է Հայաստանի պաշտպանության նախարարության զինված ուժերի փոխգնդապետ կաշառք վերցնելու կասկածանքով:
ՀՀ ՊՆ մամուլի քարտուղար Դավիթ Կարապետյանը հաստատել է տեղեկությունը` Ռազմական ոստիկանությունը փոխգնդապետին ձերբակալել է ժամկետային զինծառայողի ծնողներից գումար պահանջելու համար: Նա խոստացել է զինվորին ուսումնական զորամասից մեկ այլ`ավելի լավ զորամաս տեղափոխել:
Ձերբակալման գործողությունն իրականացվել է ՊՆ-ում կոռուպցիայի դեմ պայքարի շրջանակներում, ռազմական ոստիկանության եւ ՊՆ քննչական ծառայության օպերատիվ համագործակցության շնորհիվ, տեղեկացնում է Կարապետյանը: Ելնելով նախաքննության շահերից, ձերբակալվածի անունն առայժմ չի հրապարակվում:
`: