Արարատի մարզպետ Էդիկ Բարսեղյանը բավականին ակտիվորեն է մասնակցում քարոզարշավին: Նա պարբերաբար այցելում է  իր մարզի դպրոց — մանկապարտեզներ և բուժհիմնարկներ ու աշխատակիցներին  հորդորում, որ ընտրեն Հանրապետական կուսակցությանն, անգամ մատ թափ տալիս, թե՝ եթե հանկարծ ՀՀԿ –ն մարզում չհաղթանակեց, իրենք կկորցնեն  աշխատանքը:

Նրա Քարոզչությունը  հատկապես ծավալուն է Մասիսում, որտեղ Բարսեղյանը մեծ ակտիվություն է ցուցաբերում օգտագործելով կոնկրետ վարչական լծակներ: Սակայն սա ավելի ընդգրկուն թեմա է , որին կանդրադառնանք առաջիկայում:

Հանրապետության տարածքում ապրիլի 21-ից 23-ին առավելապես հյուսիսային շրջաններում, 24-ին, 25-ի գիշերը և երեկոյան ժամերին շրջանների զգալի մասում սպասվում է կարճատևանձրև և ամպրոպ,
Քամին կլինի հարավ-արևմտյան` 2-ից 7 մ/վրկ,ամպրոպի ժամանակ քամու ուժգնացում` 15-20 մ/վրկ: Օդիջերմաստիճանը 21-ից 22-ին կբարձրանա1-ից 3 աստիճանով: Տեղեկացնում է Արտակարգ իրավիճակների նախարարության կայքը:

Երևանը գրքի համաշխարհային մայրաքաղաք հռչակելու առիթով կազմակերպված միջոցառումների անցկացմամբ է պայմանավորված քաղաքապետարանի կողմից ապրիլի 22-ին Երևանի մի շարք հատվածներում որոշակի ժամանակահատվածներով տրանսպորտի երթևեկության դադարեցումը:

Քաղաքապետարանի մամուլի ծառայությունից հայտնում են, որ երթևեկությունը կդադարեցվի, մասնավորապես.

ժամը 15:00 – 19:00

Հանրապետության Հրապարակում

ժամը 17:30 – 19:30

Մաշտոցի պողոտայի՝ Ամիրյան փողոցից մինչև Իսահակյան փողոցն ընկած հատվածում

ժամը 17:00 – 21:00

Շահումյան հրապարակում

ժամը 17:00 – 22:00

• Սայաթ Նովայի պողոտայի՝ Մաշտոցի պողոտայից մինչև Տերյան փողոցն ընկած հատվածում

• Տերյան փողոցի՝ Սայաթ Նովայի պողոտայից մինչև Թումանյան փողոցն ընկած հատվածում

• Թումանյան փողոցի՝ Աբովյան փողոցից մինչև Մաշտոցի պողոտա ընկած հատվածում

• Հյուսիսային պողոտայում

ժամը 22:00 – 24:00

Մաշտոցի պողոտայի՝ Մոսկովյան փողոցից մինչև Կորյունի փողոցն ընկած հատվածում

Նշված ժամերին տրանսպորտային միջոցների՝ այդ թվում նաև  հասարակական տրանսպորտի երթևեկությունը կկազմակերպվի հարակից փողոցներով։

Պատճառած անհարմարության համար, քաղաքապետարանը հայցում է քաղաքացիների ներողամտությունը։

Մոտ մեկ ժամ առաջ Երևանի Մալաթիա Սեբաստիա համայնքում թոռը կացնահարել է տատին, ով հիվանդանոցում մահացել է: Ոստիկանության լրատվության և հասարակայնության հետ կապերի վարչությունից հաստատել են այս լուրը:

Կասկածյալը ներկայումս գտնվում է Ոստիկանության Մալաթիայի բաժնում:

Ոստիկանության լրատվական ծառայությունից հայտնում են , որ  այսօր Երևանի Մալաթիա-Սեբաստիա վարչական շրջանում կատարված սպանության հեղինակը 29-ամյա Արամ Սուքիասյանն է:

Ժամը 16:00-ի սահմաններում թոռը կացնահարել է հարազատ տատին` 83-ամյա Ռոզա Գրիգորյանին: Վերջինը մահացել է հիվանդանոց տեղափոխելու ճանապարհին:

Այժմ Արամ Սուքիասյանը գտնվում է Ոստիկանության Մալաթիա-Սեբաստիայի բաժնում:

Բրյուսովի անվան Երեւանի պետական լեզվաբանական համալսարանում իրավիճակը շարունակում է լարված մնալ: ԿԳ նախարար Արմեն Աշոտյանի հետ հանդիպման ընթացքում ոստիկանությունը բերման է ենթարկել համալսարանի երրորդ կուրսի քաղաքագիտական բաժնի ուսանող Նարեկ Սամսոնյանին, ով առանձնապես ակտիվ էր նախարարի դեմ բողոքի ակցիայի ժամանակ:

Դրանից հետո  «Բոլորս դեպի ոստիկանություն, պաշտպանե՛նք Նարեկին»,- բացականչություններով ուսանողները  այս անգամ   ճանապարհ ընկան ոստիկանների ետևից:
Ուսանողները նշում են նաև, որ Արմեն Աշոտյանի հետ բուհ եկած թիկնապահներից մեկը հարվածել է իրենց ֆիզկուլտուրայի դասախոսին։

Համալսարանի շրջանում տասնյակ ոստիկաններ են շրջում:

Ապրիլի 18-ին , ժամը 22։00–ի սահմաններում Ոստիկանության կենտրոնականի բաժին ահազանգ է ստացվել անհայտ քաղաքացուց, որ Երևանի «Հաղթանակ» կամրջից մարդ է ցած նետվել։

Այս մասին  tert.am–ին տեղեկացրել է  ֆոտոլրագրող Գագիկ Շամշյանը, ով նաև ասել  է, որ   ինքնասպանություն գործած քաղաքացին Երևանի Բաբաջանկյան 21 շենքի բնակիչ 33–ամյա Արման Մ.–ն է։

Գ. Շամշյանը հայտնել է նաև, որ իրեն հայտնի է դարձել, որ ինքնասպանություն գործելուց առաջ Արմանը, ով ըստ դեպքի վայրում ներկաների պատմածների աշխատում էր Ֆինանսների նախարարությունում որպես վերահսկիչ, sms է ուղարկել իր եղբորը՝ Արտակին, որտեղ գրել է, որ գնում է իր կյանքին վերջ տա։ Արմանի եղբայրը այդ մասին տեղեկացրել է ոստիկանության Էրեբունու բաժին, և մինչ ոստիկանները և հարազատները կփնտրեին Արմանին, արդեն տեղի էր ունեցել այս ցավալի դեպքը։

Փաստի առթիվ Ոստիկանության Կենտրոնականի քննչական բաժնում նյութեր են նախապատրաստվում։

Այսօր Տավուշի մարզի Չինարի գյուղում տեղակայված «Մեհրաբներ» զորամասում հրազենային վնասվածքից մահացել է 22-ամյա ժամկետային զինծառայող Զորիկ Մերուժանի Մարգարյանը:

Մամուլում շրջանառվող  լուրերի համաձայն  ևս մեկ ժամկետային զինծառայող` 22-ամյա Կարեն Մովսիսյանը ծանր վիրավորվել է: Նրանք երկուսն էլ զորակոչվել էին Արաբկիրի զինկոմիսարիատից 2010թ. գարնանը և  առաջիկայում պետք է զորացրվեին:

Առայժմ հայտնի չէ  զինվորի մահվան ստույգ պատճառը:

«Հրապարակ».  Սերժ Սարգսյանի հրամանագրով ձևավորված Բարձրաստիճան պաշտոնատար անձանց էթիկայի հանձնաժողովը վերջապես պատասխանել է թերթի գրավոր հարցերին: Թերթը գրում է. «Իսկ ստացած պատասխանից ակնհայտ է դառնում, որ այս կառույցը, ինչպես և կանխատեսում էինք, ամբողջությամբ ձևական է, իր գործառույթների մեջ մտնող որևէ հարց չի քննել և ոչ մի պատասխան չի տվել: Ասել է թե ստեղծման օրվանից` 2012-ի հունվարի 10-ից, անելիք չունի: Մինչդեռ Սերժ Սարգսյանը հանձնաժողովի ձևավորման ժամանակ բոլորովին այլ կերպ էր նկարագրում վերջինիս առաքելությունը: «Հանձնաժողովի ստեղծման ու գործունեության հետ կապված հարցերն այսուհետ, բնականաբար, լինելու են հանրային հատուկ ուշադրության օբյեկտ: Իսկ հանձնաժողովի գործունեության արդյունքներն ըստ էության պետք է դառնան կոռուպցիայի կանխարգելման համար համակարգային փոփոխությունների, կոռուպցիոն գործելակերպի դեմ պայքարի ավելի լավ հնարավորությունների, ինչպես նաև կոռուպցիայի դեմ պայքարի վերաբերյալ սոցիալական մոտեցումներն ու վարքագիծը փոխելու չափանիշներ»: Եվ իսկապես, օրենքը նախատեսում է, որ այս հանձնաժողովը պետք է զբաղվի առավել բարձր պաշտոններ զբաղեցնող մոտ 500 պաշտոնյաների գործունեությամբ` հետևի նրանց եկամուտների շարժին, վարքին, կոռուպցիայի և էթիկայի խախտումների դեպքում ուսումնասիրի ու արձագանքի դրանց: Բայց, ինչպես երևում է հանձնաժողովի գործունեությունից, նրանք «կոռուպցիայի կանխարգելման» կամ «համակարգային փոփոխությունների» ուղղությամբ ոչինչ չեն արել, սակայն այդ ոչինչ չանելու դիմաց հսկայական աշխատավարձեր են ստանում: Հիշյալ հանձնաժողովի նախագահը` էմիլ Բաբայանը, ում թեկնածությունն առաջարկել էր վճռաբեկ դատարանի նախագահ Արման Մկրտումյանը, ամսական ստանում է 680 հազար դրամ աշխատավարձ, նրա տեղակալը` Արեգ Շուշանյանը, 640 հազար դրամ, մյուս անդամները` 600 հազարական դրամ: Այս հանձնաժողովի անդամներն ավելի բարձր աշխատավարձ են ստանում, քան ՀՀ նախագահը (480 հազար դրամ), նախարարները (300 հազար) կամ Աժ պատգամավորները (300 հազար դրամ): Արդյունքում ստացվում է, որ ոչինչ չանելու կամ մի քանի դիմում այլ գերատեսչություններին վերահասցեագրելու համար, որը հասարակ գործավարուհու աշխատանք է, հանձնաժողովի անդամներին ամսական 37 միլիոն դրամից ավելիդ գումար է վճարվում պետբյուջեից»:

«Ժողովուրդ»-ն իր երեկվա համարում անդրադարձել էր Րաֆֆի Հովհաննիսյանի և Սերժ Սարգսյանի միջև Մեծ Բրիտանիայի դեսպանի միջոցով տեղի ունեցած գաղտնի հանդիպմանը: Երեկ թերթի աղբյուրները որոշ մանրամասներ են փոխանցել. Ըստ նրանց` հանդիպումը կայացել է այն բանից հետո, երբ «Ժառանգություն»-ը Քաղաքագետների միությունում ստորագրել էր միասնական շտաբի ձևավորման փաստաթղթի տակ: Ու դա էր պատճառը, որ «Ժառանգություն»-ը հանկարծ սկսեց խոսել նախապայմանների լեզվով` փորձելով վիժեցնել նախաձեռնությունը: Աժ պատգամավոր, «Ժառանգություն» կուսակցության անդամ Անահիտ Բախշյանը, սակայն, հերքել է այս լուրերը` ասելով. «Նման բան չկա: Լրագրողներն են հորինել այս ամենը»: Ի դեպ, երեկ, ՀՀԿ-ի նախընտրական համերգը չվերջացած, Սիսիանի հրապարակ է մտել «Ժառանգության» ղեկավար Րաֆֆի Հովհաննիսյանը, որը ՀՀԿ-ի «Հավատանք, որ փոխենք» պաստառի ներքո ՀՀԿ-ի բարձրախոսով սկսել է իր նախընտրական ելույթը:

Երևանի Կենտրոն և  Նորք-Մարաշ վարչական շրջանների ընդհանուր իրավասության դատարանում այսօր` ապրիլի 17-ին հետաձգվել է ճանապարհային ոստիկանության նախկին պետ Մարգար Օհանյանի դատավարությունը: Դատական նիստին չէին ներկայացել ՃՈ ներկայացուցիչն ու Մագար Օհանյանի պաշտպան Մկրտիչ Վասակյանը:

Ճանապարհային ոստիկանության ներկայացուցիչ Ժիրայր Կարապետյանը տեղեկացրել էր, որ չի կարող ներկայանալ դատարան և  խնդրել էր նիստն առանց իրեն անցկացնել, իսկ Մարգար Օհանյանի պաշտպանը նշել էր, թե վատառողջ է և  լիովին ապաքինվելու համար անհրաժեշտ է երկու շաբաթ:

Դատավոր Մխիթար Պապոյանը հետաձգեց նիստը և  նշանակեց մայիսի 14-ին: