Թիվ 14՝ Արագած, Ապարան, Աշտարակ բնակավայրերն ընդգրկող ընտրատարածքում  իրենց թեկնածությունն են առաջադրել ՀԱԿ-ից Ռազմիկ Պետրոսյանը, ՀՀԿ –ից  «Տիգրան Մեծ» հրատարակչության տնօրեն Վրեժ Մարկոսյանը, և ԲՀԿ-ի թեկնածու Բազմասեր Առաքելյանը: 33 ամյա թեկնածուն Արագածոտնի փոխմարզպետի որդին է, ծնունդով Փարպի գյուղից, և նրա ընտանիքը բավականին մեծ հարգանք է վայելում Աշտարակի ու նրա հարակից շրջաններում: Մյուս՝ երկու թեկնածուները գրեթե նրա կրկնակի տարիքին են, մարդիկ՝ որոնք երկար ճանապարհ են անցել:

—  Ձեզ բաժին հասած մրցակիցները բավականին հասուն ու ճանաչված մարդիկ են: Դուք երիտասարդ եք, չե՞ք վախենում մրցել նման հեղինակությունների հետ:

— Այո երիտասարդ եմ, ես շատ հարգում եմ իմ մրցակիցներին, ոչ ոքի  վրա ցեխ չեմ շպրտում: Ամեն մարդ իր չափով էս ազգի համար ինչ որ արած բան ունի: Ես լսում եմ իմ հասցեին ասում են՝ ինչպես դուք եք ասում՝ երիտասարդ է, ի՞նչ պիտի անի: Ուրեմն ասեմ ՝ ես երիտասարդ չեմ, իրենք են շատ մեծ: Միևնույնն է մեր ժողովուրդը մի օր պետք է համակերպվի էն մտքի հետ, որ սերնդափոխություն է լինելու:

—   Իսկ ի՞նչ է նախատեսում նոր սերունդն, ի դեմս Ձեզ:

—   Քաղաքականություն մտնելուս պատՃառը եղել է պրն.  Ծառուկյանը: Ճիշտն ասած, հեշտ չեմ համոզվել, հիմա, երբ արդեն առաջադրվել եմ,  անելու եմ ամեն ինչ, որ տարածաշրջանը զարգանա, դա կլինի սպորտի, երիտասարդության գյուղատնտեսության, մշակույթի, թե մյուս ոլորտների հետ կապված:

Մենք պայմանավորվել ենք, որ աշխատելու ենք միասին: Գագիկ Ծառուկյանի օգնությամբ, միշտ ամեն ինչ անելու եմ, որ ԱԺ ում տարածաշրջանը լինի ուշադրության կենտրոնում:

Ուրեմն ասեմ, ունենք մեծ բարերար, կուսակցության ղեկավար, որը նաև իմ ընկերն է: Եւ մենք «Գագիկ Ծառուկյան» հիմնադրամն օգտագործելու ենք տարածաշրջանի առաջընթացն ապահովելու համար:

-Իսկ Ձե՞ր մրցակիցները, նրանք  նույն  խոստումները  չե՞ն տալիս:

— Ցեխ շպրտելով իմ հեղինակությունը չի բարձրանալու: Ես էս տարածաշրջանի բնակիչ եմ ու պայքարելու եմ: Իմ  մրցակիցների քաղաքական հայացքները հարգում եմ, ով հաղթի՝ առաջինը ես կշնորհավորեմ: Բայց նաև ասեմ՝ էդ մարդիկ, որ մինչև հիմա ոչ մի բան չեն արել, էս ազգի, էս տարածաշրջանի համար, հիմա էլ չեն անելու:

«Չորրորդ ինքնիշխանություն». ՀՀ Սյունյաց մարզպետ Սուրեն Խաչատրյանը, ով ընդամենը երկու օր առաջ Ջերմուկ քաղաքում տեղի ունեցած միջոցառումներից մեկի ժամանակ ՀՀԿ բարձրագույն ղեկավարությանը, իր լեզվով ասած` «ժելեզնի» ձևով խոստացել է, որ ՀՀԿ-ի պատվին այլևս սկանդալներ չի սարքելու և որ «մեռած» 70 տոկոս ձայն է ապահովելու իր կուսակցության համար, բանից պարզվում է, երկար ժամանակ իր խոստմանը հավատարիմ չմնաց…
Եվ ընդամենը երկու օր առաջ, «ՉԻ»-ին հասած տեղեկությունների համաձայն, էս երկրի տեր ու տիրական մարզպետը լրիվ հավատացած ու փոխված տրամադրությունների մեջ Գորիսի իր նստավայր է կանչել մարզի գյուղական համայնքների մի զգալի հատվածի ղեկավարներին ու նրանց ներկայությամբ «կատոկի» է ենթարկել իր աչքին «ալաբուլա» երևացող գյուղապետերից մեկին` հաթաթա տալով. «Իմ մոտ խաղեր տվողներին գիտեք, թե ինչ է սպասվում: Ընենց չըլնի, որ մի քանիսը գնան ուրիշ հասցեով, չլնեմ-չիմանամ, որ մեկն ու մեկդ համայնքում աչբ դնեք զիզի-բիզի բաների ու փչացած հեռախոսների վրա»: Իսկ թե հատուկ որ քաղաքական ուժին է նվիրված եղել Սուրեն Խաչատրյանի հերթական այս «ասուլիսը», «կարծում եմ` մեկնաբանությաններն ավելորդ են…»:

«Այս պահին համամասնականին օգնության գալիս է մեծամասնական ընտրակարգը և խորհրդարանում պատգամավորներ ունենալու հույսը շատ անգամ ընկնում է մեծամասնականի վրա»,- այսօր լրագրողների հետ հանդիպմա ժամանակ ասաց  ասաց «Սոցիոմետր» սոցիոլոգիական կենտրոնի տնօրեն Ահարոն Ադիբեկյանը` ավելացնելով, որ համամասնական ընտրակարգով առաջադրված ինը կուսակցություններից և ոչ մեկը չի կարողանա հավաքել այնքան ձայն, որ նոր ձևավորվելիք խորհրդարանում ունենա 66 տեղ և դառնա բացարձակ մեծամասնություն:

Սոցիոմետրի կանխատեսմամբ  Հայ ազգային կոնգրեսը մեծամասնական ընտրակարգով չի կարող ոչ մի տեղ գրավել: Նա նշեց, որ խոսքը վերաբերում է նաև Հրազդանում մեծամասնական ընտրակարգով առաջադրված ՀԱԿ անդամ Սասուն Միքայելյանին. «Այն ժամանակ Սասուն Միքայելյանը պայքարում էր ընդամենը քաղաքապետի դեմ, իսկ այսօր նրա պայքարը մի ամբողջ քաղաքական ուժի դեմ է, այսինքն՝ ՀՀԿ ներկայացուցչի դեմ»,- ասաց նա և ավելացրեց, որ ամենաակտիվ ընտրատարածքներից մեկում՝ թիվ 7-ում առաջադրված ՀԱԿ ներկայացուցիչ Նիկոլ Փաշինյանը ևս շանսեր չունի, քանի որ նրա կարգավիճակը չի համապատասխանում պատգամավորի կարգավիճակին:

Ահարոն Ադիբեկյանը նաև նկատեց, որ մեծամասնական ընտրատարածքներում ընտրությունները ունեն ուրույն բնույթ. «Այստեղ, մի դեպքում կուսակցության բարձր վարկանիշն օգնում է մեծամասնականով առաջադրված թեկնածուին, մյուս դեպքում՝ թեկնածուի վարկանիշն է օգնում կուսակցությանը»,- ասաց սոցիոլոգը:

ՀՀ ԱԺ փոխնախագահ Էդուարդ Շարմազանովն այսօր անդրադառնալով Թուրքիայի ԱԳՆ-ի քննադատական գնահատականներին, որոնք ուղղված են ԱՄՆ նախագահ Բարաք Օբամայի, Ֆրանսիայի նախագահ Նիկոլա Սարկոզիի և Ֆրանսիայի նախագահության թեկնածու Ֆրանսուա Օլանդի` Հայոց Ցեղասպանության 97-րդ տարելիցի կապակցությամբ արված հայտարարություններին  ասել է.

«Հայաստանը ողջունում է Հայոց Ցեղասպանության միջազգային ճանաչումը, մարդկության դեմ ուղղված ոճիրների դատապարտումը և դրանց ժխտման քրեականացումը: Ինչ վերաբերում է Հայոց Ցեղասպանության փաստի քննարկման Թուրքիայի առաջարկին, ապա ևս մեկ անգամ նշեմ, որ Հայոց Ցեղասպանության փաստը որևէ պարագայում երբեք քննարկման առարկա չի կարող դառնալ: Հայ-թուրքական բնականոն հարաբերությունների հաստատման համար միակ խոչընդոտը Թուրքիան է, որը շարունակում է շրջափակման մեջ պահել Հայաստանի Հանրապետությունը, նախապայմաններով խոսել իր հարևանի հետ և շարունակաբար ժխտել Հայոց Ցեղասպանության փաստը: Հայ-թուրքական կարգավորում հնարավոր է միայն այն դեպքում, երբ Թուրքիան վերջ դնի վերոնշյալ կեցվածքին և կատարի իր ստանձնած միջազգային պարտավորությունները»:

Համաձայն ԵՊԼՀ գիտական խորհրդի կանոնակարգի 17-րդ կետի՝ գիտական խորհրդի համաձայնությամբ, այսօր` ապրիլի 26-ին, ժամը 10:00-ին պետք է կայանար գիտական խորհրդի այդ արտահերթ նիստը, սակայն, ԿԳ նախարարության կողմից ԵՊԼՀ ռեկտորի նոր ժամանակավոր պաշտոնակատար Գայանե Գասպարյանը, գերազանցելով իր լիազորությունները և  խուսափելով քննարկումներից, հրահանգել է այն հետաձգել:

Հիշեցնենք , որ  ԵՊԼՀ-ից, համալսարանի գիտական խորհրդի 49 անդամներից 31 անդամների (1/3-ի չափով) գրավոր համաձայնությամբ պահանջվել է հրավիրել գիտական խորհրդի արտահերթ նիստ, որի օրակարգում պետք է լիներ ԿԳ նախարար Արմեն Աշոտյանի կողմից Երեւանի Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանի լիազորությունները դադարեցնելու եւ պայմանագիրը լուծելու մասին հրամանը եւ դրա առնչությամբ ստեղծված իրավիճակը:

Երևանի Վ. Բրյուսովի անվան պետական լեզվաբանական ինստիտուտում գիտխորհրդի նիստը տապալվել է` ռեկտորի նոր ժամանակավոր պաշտոնակատար Գայանե Գասպարյանի միջամտությամբ:

Նախագահ Սերժ Սարգսյանն այսօր ընդունել է ՀՀ գլխավոր դատախազ Աղվան Հովսեփյանին և քննարկել ընտրական գործընթացներով պայմանավորված վերջին շաբաթների ընթացքում առավել հաճախակի դարձած ընտրակաշառքների վերաբերյալ հնչող հանրության մտահոգություններն ու համապատասխան հանձնարարականներ տվել:

«Անշուշտ, այս բացասական երևույթը լրջորեն ստվերում է ցանկացած ընտրության օրինականությունը, և ժողովրդավարական ու իրավական յուրաքանչյուր պետության կարևորագույն խնդիրն է չեզոքացնել նման անցանկալի ազդեցությունն ու ապահովել ազատ և արդար ընտրությունների կազմակերպումն ու անցկացումը»,-ըստ նախագահական գրասենյակի տարածած հաղորդագրության, ասել է նախագահը:

Սերժ Սարգսյանն ընդգծել է, որ թեև գործող օրենսդրությունը թույլ է տալիս հավուր պատշաճի կանխել կամ բացահայտել այս հանցագործությունը և պատժել այն կատարած անձանց, սակայն խնդրի կարևորությունից ելնելով և օրենքի պահանջների առավել արդյունավետ կիրառումն ապահովելու նպատակով անհրաժեշտ է օբյեկտիվորեն սեղմ ժամկետներում ձեռնարկել իրավիճակից թելադրվող լրացուցիչ միջոցներ:

Սերժ Սարգսյանն ասել է, որ իր համոզմամբ, առկա իրավական կարգավորումների շրջանակներում իրավասու մարմինների գործունեության առաջնայնություններից մեկը պետք է լինի ընտրակաշառք ստացած անձանց քրեական պատասխանատվությունից ազատելը այն դեպքերում, երբ նրանք իրավապահպան մարմիններին կամովին հայտնել են այդպիսի փաստերի մասին և աջակցել հանցագործության բացահայտմանը:

Նախագահի խոսքով, նման երաշխիքի պայմաններում մեկ անգամ սխալված քաղաքացին հնարավորություն կստանա աջակցել «ընտրակաշառքի» դեմ պայքարի գործընթացին՝ դրանով իսկ զերծ մնալով անխուսափելի պատժից:

Այսօր ապրիլի 24-ին ժամը  13-ի սահմաններում Դիլիջան–Վանաձոր ավտոճանապարհի Թեժ լեռ կոչվող դաշտամիջյան ճանապարհի 6-րդ կմ հատվածում տեղ է ունեցել ավտովթար։ Ինչպես տեղեկացնում է Tert.am–ը   ՀՀ ՊՆ պայմանագրային զինծառայող 42-ամյա Արսեն Աքելյանը վարելով ց մակնիշի ՊՆ–2181–Տ համարանիշի ավտոմեքենան նշված հատվածում շրջվել է։ Վիրավոր վիճակում նրան տեղափոխել են զինվորական հոսպիտալ, որտեղ էլ մահացել է։ Փաստի առթիվ քննությունը վարում է Զինվորական դատախազությունը։

«Հայկական ժամանակ». Երեկ ինքնաբացարկի դիմում է ներկայացրել Կոտայքի մարզի թիվ 25 ԸՏ պատգամավորի թեկնածու, կապի և տրանսպորտի ՕԵԿ-ա-ան նախարար Մանուկ Վարդանյանը: Թերթի աղբյուրները պնդում են, սակայն, որ սա «Օրինաց երկիր» կուսակցության շուրջ տեղի ունեցող լուրջ խմորումների արդյունք է: Խմորումները ծայր են առել այն պատճառով, որ համընդհանուր տպավորությամբ` Սերժ Սարգսյանը «քցում է» կոալիցիոն գործընկերոջը, որին դեռ շաբաթներ առաջ համարում էր բարոյականության տիպար: Այս տպավորությունը ամրապնդվեց նախորդ շաբաթ Շենգավիթում Սերժ Սարգսյանի ելույթից հետո: Ըստ հավաստի տեղեկությունների, Մանուկ Վարդանյանն արժանանալու էր նույն ճակատագրին, դրա համար էլ որոշել է ինքնաբացարկի դիմում ներկայացնել: Չի բացառվում, որ Վարդանյանը լքի նաև ՕԵԿ-ը, քանի որ հասկանում է` կուսակցության լիդեր Արթուր Բաղդասարյանն այլևս չի կարողանում Սերժ Սարգսյանի հովանավորությունն ապահովել իրենց համար:

Ըստ իշխանական թերթի աղբյուրների, ՕԵԿ-ի ու նրա առաջնորդի հետ խնդիրներ ունի նաև գյուղատնտեսության ՕԵԿ-ական նախարար Սերգո Կարապետյանը: Դեռ շաբաթներ առաջ այդ աղբյուրները վստահեցնում էին, որ Վարդանյանի հետ ՕԵԿ-ից դուրս է գալու նաև Կարապետյանը, որը կուսակցության համամասնական ցուցակում 4-րդ համարն է: Իսկ ահա անցյալ շաբաթ լուր տարածվեց, որ փոխնախագահ Հեղինե Բիշարյանը նույնպես մտադիր է հանել թեկնածությունը Երևանի թիվ 11 ԸՏ-ից: Ի դեպ, որ Բիշարյանը, որն ամենուր ուղեկցում էր Արթուր Բաղդասարյանին, ապրիլի 21-ին Նոր Նորքում բնակիչների հետ հանդիպմանը չի մասնակցել: Երեկ ևս, երբ ԱԽՔ-ը հանդիպում էր Զեյթունի բնակիչների հետ, Բիշարյանը ներկա չէր: Մոտ մեկ ամիս առաջ թերթի իշխանական աղբյուրները վստահեցնում էին, որ Սերժ Սարգսյանն ՕԵԿ-ին չի օգնելու խորհրդարան անցնելու համար. ՀՀԿ-ն հազիվ փորձելու է իր գլխի ճարը տեսնել:

Նույն աղբյուրները պնդում էին, որ Սարգսյանը մտադիր է Արթուր Բաղդասարյանին պաշտոն տալ, պահպանել նրա բիզնես հնարավորությունները է, գուցե մի երկու պաշտոն էլ նրա մերձավորների համար է նախատեսել: Սերժ Սարգսյանի պլանով` Աժ րնտրութաւններիգ հետո ՕԵԿ-ը կվերանա որպես քաղաքական ուժ, բայց ԱԽՔ-ը կպահպանի ներկայիս պաշտոնը, իսկ արդեն 2013-ին, երբ կլրանա ՀՀ գլխավոր դատախազ Աղվան Հովսեփյանի պաշտոնավարման ժամկետը, այդ պաշտոնում կնշանակվի Արթուր Բաղդասարյանը (եթե, իհարկե, Սերժ Սարգսյանին հաջողվի պահպանել ներկայիս պաշտոնը):

Կոտայքի մարզի թիվ 25 ընտրատարածքում «Օրինաց երկիր» կուսակցության կողմից առաջադրված Տրանսպորտի և կապի նախարար Մանուկ Վարդանյանը ապրիլի 20-ին ինքաբացարկ է ներկայացրել: Այդ մասին Panorama.am-ին տեղեկացրել է  թիվ 25 ընտրատարածքային ընտրական հանձնաժողովի նախագահ Արմեն Բադալյանը:

Նշենք, որ Մանուկ Վարդանյանի ինքնաբացարկի մասին լուրերը ավելի վաղ համառորեն տարածվել էին, սական դրանք պաշտոնապես չէին հաստատվում:

Այս ընտրատարածքում առաջադրված մյուս թեկնածուներն են Հայ Ազգային կոնգրեսից` Սասուն Միքայելյանը, անկուսակցականներ Մուշեղ Հարությունյանը և Հովսեփ Գալստյանը, ինչպես նաև` «Բարգավաճ Հայաստան» կուսակցությունից Դավիթ Քոչարյանը:

Ապօրինի հրաման կատարող ոստիկանները չեն կարող խոչընդոտել ՀՀ քաղաքացիների՝ երկրում օրինականությունը վերականգնելու գործողություններին։ Նման բովանդակությամբ հայտարարություն է տարածել Մաշտոցի պուրակում ինքնակամ շինությունների ապամոնտաժման նախաձեռնող խումբը:

Հայտարարությունում, մասնավորապես, ասվում է.

«Մենք` Երեւան քաղաքի Մաշտոցի պողոտային հարող այգում կառուցված ինքնակամ շինությունների ապոմոնտաժումը նախաձեռնած բրիգադների անդամներս, կրկին հրապարակավ հայտարարում ենք, որ անտեսելու ենք առանց օրինական հիմքերի այդ շինությունների պաշտպանության նպատակով տեղադրված երկաթյա արգելապատնեշները, չենք ենթարկվելու ոստիկանության անօրինական հրամաններին եւ ապամոնտաժելու ենք ինքնակամ շինությունները։

Մեզ համար ակնհայտ է, որ Մաշտոցի այգում մինչ օրս ոստիկանության կատարած բոլոր գործողությունները` ներառյալ 2012 թվականի ապրիլի 15-ին այգում տեղի ունեցած դեպքի կապակցությամբ հարուցված եւ իրականացվող վարչական իրավախախտումների վերաբերյալ վարույթը, չեն համապատասխանում այդ իրավապահ մարմնի` օրենքով սահմանված լիազորություններին։

Ստիպված ենք հիշեցնելու ոստիկանությանը, որ Հայաստանի գործող օրենսդրության համաձայն վարչական պատասխանատվության ենթակա չէ այն անձը, որը թեեւ վարչական իրավախախտումների համար վարչական պատասխանատվություն սահմանող նորմատիվ ակտերով նախատեսված գործողություն է կատարել, սակայն գործել է`

1. այնպիսի մի վտանգ վերացնելու համար, որը սպառնացել է պետական կամ հասարակական կարգին, հանրային սեփականությանը, քաղաքացիների իրավունքներին ու ազատություններին, կառավարման սահմանված կարգին, երբ այդ վտանգը տվյալ հանգամանքներում չէր կարելի վերացնել այլ միջոցներով եւ եթե հասցված վնասը կանխված վնասի համեմատությամբ ավելի նվազ կարեւորություն ունի,

2. ի պաշտպանություն հակաիրավական ոտնձգությունից պետական կամ հասարակական կարգի, հանրային սեփականության, քաղաքացիների իրավունքների ու ազատությունների, կառավարման սահմանված կարգի ոտնձգություն կատարողին վնաս պատճառելու ճանապարհով, ընդ որում` թույլ չտալով անհրաժեշտ պաշտպանության սահմանների անցում:

Կրկին հայտնում ենք, որ մեզանից յուրաքանչյուրը, ով նախապես գրավոր տեղեկացրել է ոստիկանությանը իր քաղաքացիական անհնազանդության մասին եւ ցուցաբերել է այդ անհնազանդությունը փաստացի կատարված գործողություններով, խորին համոզմունք ունի, որ, չենթարկվելով պետության ներկայացուցիչների անօրինական հրամաններին, կատարում է իր քաղաքացիական պարտքը եւ, անտեսելով պետության կողմից պատժիչ եւ/կամ ռեպրեսիվ գործողությունների կիրառման հնարավորությունը, պատրաստ է առանց բռնության իրականացնել իր առջեւ դրված նպատակը։

Ուստի ոստիկանությանը տեղեկացնում ենք, որ սույն թվականի ապրիլի 15-ին Մաշտոցի այգում տեղի ունեցած իրադարձություններին մասնակցել է քառասունից ավել քաղաքացի, որոնք բոլորը` հեռացնելով տեղադրված երկաթյա արգելապատնեշները, իրենց եւ հանրության իրավունքների իրացման նպատակով մտել են ոստիկանների կողմից անօրինական հիմքերով պահպանվող տարածք եւ փորձել ապոմոնտաժել այնտեղ գտնվող ինքնակամ շինությունը: Այդ փաստից ելնելով համոզմունք ենք հայտնում, որ ոստիկանության կողմից իր ենթադրյալ լիազորությունների շրջանակում ապամոնտաժող բրիգադների չորս անդամների նկատմամբ հարուցված եւ իրականացվող վարչական իրավախախտումների վերաբերյալ վարույթը ոչ միայն անօրինական է, այլեւ ձեւական բնույթ ունի։ Եթե ոստիկանությունը ի զորու չէ իր վարույթում ընդգրկելու տվյալ դեպքին մասնակցած բոլոր ապամոնտաժողներին, ապա մենք պատրաստ ենք այդ գործում առկա ձեւականությունը վերացնելու նպատակով ոստիկանությանը ցուցաբերել անհրաժեշտ օժանդակություն։

Միեւնույն ժամանակ տեղյակ ենք պահում, որ պետության որեւէ պատժիչ եւ/կամ ռեպրեսիվ գործողության կիրառումը որեւէ կերպ չի կարող մեր հայտարարած նպատակներին հասնելու համար անհրաժեշտ գործողություններից հրաժարվելու հիմք դառնալ»: