Եվրոպական հեռարձակողների միության (ԵՀՄ) Հայաստանին տուգանել է «Եվրատեսիլ-2012» երգի միջազգային մրցույթին մասնակցելուց հրաժարվելու համար: Այն պետք է կայանա Բաքվում ապրիլի վերջին: Հաղորդում է «ԻՏԱՐ-ՏԱՍՍ» գործակալությունը` հղում կատարելով ԵՀՄ մամուլի հետ աշխատանքի վարչության տնօրեն Աննա Նիբերգ-Ֆրանկենհաուզերին:

Նա ասել է որ, որոշումը  կայացվել է Հեռուստատեսային կոմիտեի և ԵՀՄ խորհրդականների խմբի կողմից հարցի ուսումնասիրությունից հետո, ինչի արդյունքում Հայաստանը պետք է մուծի մրցույթի մասնակցավճարը, ինչպես նաև պետք է վճարի այդ վճարի 50%-ը՝ որպես տուգանք:

Հայաստանի Հանրային հեռուստատեսությունը պետք է նաև մրցույթի եզրափակիչը հեռարձակի ուղիղ եթերով և առանց ընդհատումների: Հրաժարվելու դեպքում Հայաստանը կարող է զրկվել 2013թ. մրցույթի մասնակցելու իրավունքից:

Նիբերգ-Ֆրանկենհաուզերը չի կարողացել հայտնել Հայաստանի մասնակցավճարի չափը: Նա պարզաբանել է, որ որոշումը կայացնելիս հաշվի չեն առնվել այն դրդապատճառները, որոնց պատճառով երկիրը որոշում է կայացրել իր մասնակիցներին Բաքու չուղարկել:

«Կա օրակարգ, և որոշված ժամկետից հետո երկիրը, որը մրցույթին մասնակցելու հայտ է ներկայացրել, չի կարող փոխել իր որոշումը», — նշել է նա՝ պարզաբանելով, որ հենց այդ իրավիճակն է տեղի ունեցել Հայաստանի պարագայում: Հրաժարվելու մասին հայտարարվել է, երբ հրաժարվելու համար նախատեսված բոլոր ժամկետները անցած էին:

ԵՀՄ գլխավոր տնօրեն Ինգրիդ Դելտոնեն այսօր՝ մամուլի ասուլիսի ժամանակ նշել է, որ Երևանի նման քայլը «Խորհրդի կանոններին չի համապատասխանում»:

Հ.Գ.Ինչո՞ւ են «Եվրատեսիլ-2012»-ին չմասնակցելու որոշումը հայտնել ժամկետի ավարտից հետո: Ի վերջո ո՞վ պետք է պատասխան տա ցանկացած հարցի մեր անկազմակերպ ու փնթի մոտեցման համար, որը  մեր երկրի վրա շատ թանկ է նստում:

Հայաստանի Հանրապետության արդարադատության նախարարությունը իր տարակուսանքն է հայտնում առանձին լրատվամիջոցներով տարածված` ԵՊԼՀ ռեկտոր Ս. Զոլյանի հարցով նախարարության այսպես կոչված “մեկնաբանության” առթիվ:

ՀՀ նախագահ, Հանրապետական կուսակցության առաջնորդ Սերժ Սարգսյանն այսօր նախընտրական քարոզարշավի շրջանակներում այցելել է Կոտայքի մարզ և եղել է նաև Աբովյան քաղաքում։ Աբովյանում Սերժ Սարգսյանը բավական ծավալուն ելույթ է ունեցել խոսելով ինչպես երկրին վերաբերող ընդհանուր, այնպես էլ նախընտրական խնդիրներից։

«Բոլորիդ խորհուրդ եմ տալիս թշնամանքը չավելացնել: Մայիսի 6-ին հաջորդելու է մայիսի 7, 8, 9-ը, այսինքն կյանքը շարունակվելու է: Եվ ցանկալի է, որպեսզի մենք ընտրություններից հետո լինենք ավելի միասնական, որպեսզի կարողանանք մեր ջանքերը համադրել և ունենալ, կառուցել ավելի լավ Հայաստան»,-ասել է նա:

«Ես հասկանում եմ, որ Կոտայքի մարզում քաղաքական պայքարը թեժ է: Ես հասկանում եմ՝ շատ մարդիկ արդեն իրենց դիրքորոշումն ունեն, բայց, այդուհանդերձ, կոչ եմ անում նաև քվեարկել խղճի մտոք, կոչ եմ անում քվեարկել այնպես, որ ձեր քվեարկերությունը ձեր իսկ դուրը գա: Բնականաբար, ես եկել եմ այստեղ նաև կոչ անելու ձեզ քվեարկելու Հանրապետական կուսակցության օգտին: Մենք բավականաչափ փորձ ենք ձեռք բերել և վստահ ենք, որ այդ փորձը մեզ հնարավորություն է տալու գալիք հինգ տարիներին ավելի լավ աշխատելու:

Երբ ես ասում եմ քվեարկեք ՀՀԿ-ի օգտին, ես, բնականաբար, նկատի ունեմ ոչ միայն համամասնական ցուցակը, ես նկատի ունեմ նաև մեծամասնական ընտրակարգով առաջադրված պատգամավորներին: Դուք գիտեք, որ այս տարածաշրջանում ՀՀԿ-ն առաջադրել է և պաշտպանում է պարոն Համլետ Հայրապետյանին, ով ձեր դիմաց կանգնած է և ով կարող է արժանապատվորեն ներկայացնել Կոտայքի տարածաշրջանը Հայաստանի Ազգային Ժողովում: Նա սկզբունքային մարդ է, ունի քաղաքական փորձ և այդ փորձը ծառայեցնելու է հենց իր ընտրողների շահերին:

Եվ մի բան էլ պետք է ասեմ. մենք այնտեղ, որտեղ պատգամավորի թեկնածու չենք առաջադրել, պաշտպանում ենք մեր կոալիցիոն գործընկերներին: Եվ այստեղ մենք, բնականաբար, պաշտպանում ենք պարոն Գագիկ Ծառուկյանի թեկնածությունը: Բոլորիդ կոչ եմ անում քվեարկել մեր պատգամավորների օգտին»,-ընդգծել է ՀՀԿ ղեկավարը:

Հիշեցնենք, որ թիվ 28 ընտրատարածքում առաջադրված է միայն մեկ թեկնածու` Գագիկ Ծառուկյանը:

Մի քանի օր արաջ «Հրապարակը» գրել էր, որ Վայոց ձորում, հատկապես Վայք քաղաքում և հարակից գյուղերում ԲՀԿ-ն ակտիվորեն ցուցակագրում է իր պոտենցիալ ընտրողներին` յուրաքանչյուր անձնագրային տվյալի դիմաց խոստանալով 25 կիլոգրամ այլուր: ԲՀԿ Վայքի գրասենյակում նախապես անձնագրերը հավաքվել էին, քաղաքացիներին կտրոններ էին բաժանվել, որոնք ներկայացնելով` մի քանի օր անց վերջիններս պետք է ստանային իրենց հասանելիք ալյուրը: Արդյունքում երեկ և նախորդ օրը քաղաքացիներն ակտիվորեն ստացել են իրենց «հասանելիքը», սակայն ցուցակագրվածներից ոչ բոլորին է ալյուր բաժին հասել: Մի քանիսին է հասել, իսկ մնացածներին համատարած բաժանվել է 5 հազարական դրամ: Ի դեպ, վայքեցիները դժգոհ չեն մնացել, քանի որ բաժանված 25 կիլոգրամ 1-ին տեսակի ալյուրը համարժեք է 5 հազար դրամին:

Այս տարի լրացավ Հայոց Մեծ Եղեռնի 97 տարելիցը:
Հայող մեծ ողբերգության 100-ամյա տարելիցին ընդառաջ՝ մեր կորստի ցավը մի կողմ թողնելով, պետք լուրջ քաղաքականություն մշակենք, որով կարողանաք հասնել այս անժխտելի փաստի միջազգային ճանաչմանը:
Հիշեցնենք, որ սկսած 1915 թվականից տարբեր պետություններ ընդունել են բանաձևեր, որոնք քննադատում են հայերի կոտորածը։
ԱՄՆ-ը երեք անգամ (1916, 1919, 1920) ընդունել է նմանատիպ բանաձևեր, սակայն դրանք չեն կարողացել կանգնեցնել Օսմանյան կայսրության գործողությունները։ 1915 թ. Ֆրանսիան, Մեծ Բրիտանիան և Ռուսաստանը հանդես են եկել համատեղ դեկլարացիայով, որը նույնպես քննադատում էր այդ կոտորածները։
Հայոց ցեղասպանությունն ընդունել են այնպիսի կազմակերպություններ, ինչպիսիք են Եվրոպայի Խորհուրդը (1998, 2001), Եվրախորհրդարանը (1987, 2000, 2002), ՄԱԿ-ի մի քանի հանձնաժողովներ, Եկեղեցիների համաշխարհային միությունը և այլն։
Հայոց Ցեղասպանությունը ճանաչել են շատ պետություններ և միջազգային կազմակերպություններ։ Պաշտոնապես առաջինն ընդունել է Ուրուգվայը 1965 թ։ Հայ ժողովրդի կոտորածը պաշտոնապես քննադատել և ճանաչել են որպես ցեղասպանություն ըստ միջազգային իրավունքի հետևյալ երկրները՝
Ֆրանսիա, Գերմանիա, Իտալիա, Բելգիա, Նիդեռլանդներ, Շվեյցարիա, Շվեդիա, Ռուսաստան, Լեհաստան, Լիտվա, Հունաստան, Սլովակիա, Կիպրոսի Հանրապետություն, Լիբանան, Ուրուգվայ, Արգենտինա, Վենեսուելա, Չիլի, Կանադա, Վատիկան, Ավստրալիա:

Այսօր աշխարհում գոյություն ունի ցեղասպանագիտական հարցերին նվիրված ինդեքսավորվող և գրախոսվող միջազգային 3 պարբերական՝ Journal of Genocide Research, Holocaust and Genocide Studies և Genocide Studies and Prevention: Հայաստանի և ոչ մի ներկայացուցիչ այս պարբերականներում տպագրած գիտական հոդված չունի:
Այսօր, մենք մեր պատմությունը լուրջ գիտականորեն հիմնավորված հոդվածներով պետք ներկայացնենք միջազգային հանրությանը:

Սակայն այստեղ պետք է կանգ առնեք՝ հասկանալու համար, թե այդ ինպե՞ս ստացվեց, որ ցեղասպանության ընդունումը մեր պետության արտաքին քաղաքականության վեկտոր է դիտվում, բայց այդ թեմայով ոչ մի միջազգային կարգի հրապարակում չունենք:

Սա խոսում է գիտության հումանիտար ոլորտում տիրող բարձիթողի վիճակի, մասնավորապես այս թեմայի անտեսման, ինչպես նաև գիտությունն ազգային խնդիրներին չծառայեցնելու մասին: Ի վերջո պետք է աշխատենք բոլոր ուղղություններով և նպատակային օգտագործել մեր ունեցած ներուժը:
Արդյո՞ք կեղծ հայրենասիրություն չէ՝ սգալ ապրիլի 24- ը, պահանջել օտարներից հարգանք, սակայն լուրջ տպագրությունների համար գումար չհատկացնել:
Հայոց Ցեղասպանության ճանաչման գործընթացին նպաստելու համար մեծ նշանակություն ունի հնարավոր բոլոր միջոցներն օգտագործելը: Խնդրի կարևորությունը լավ գիտակցվել է ՊԳՖԱ-ի կողմից, ընդգրկվելով 30 առաջարկների ցանկում։
Իսկ ու՞ր էր այսքան ժամանակ պետությունը:
«Որոշ չափով իրավիճակը շտկելու և միջազգային պարբերականներում ՀՀ քաղաքացիների կողմից տպագրությունների առկայությունը ապահովելու նպատակով «Նուշիկյան ասոցիացիա»-ն կտրամադրի 500,000 ՀՀ դրամի խրախուսավճար ՀՀ քաղաքացի այն գիտնականներին, ովքեր նշյալ միջազգային ցեղասպանագիտական պարբերականներից որևէ մեկում կտպագրեն առնվազն 5000 բառ պարունակող համապատասխան հոդվածներ»- «Նուշիկյան ասոցիացիայի» անունից տարածվել է հայտարարություն:

Եթե նույնիսկ Նուշիկյանները այս քայլն անում են` ելնելով քաղաքական զարգացումների շրջանից և նախընտրական քրոզչությունից, պահն օգտագործելով որպես քաղաքական փիառ, (քանի որ իրապես մտահոգվելու դեպքում այն կարելի էր ավելի շուտ նախաձեռնել), այնուհանդերձ այս քայլը ողջունելի է, և կարող է սթափեցնել մեր մյուս գործարարներին ու քաղաքական գործիչներին և ի վերջո մեր պետությանը:

Շուշան Գալստյան

ՀՀ Պաշտպանության նախարարության մամուլի ծառայությունը հաղորդագրություն է տարածել, որով կոչ է անում լրատվամիջոցներին և անհատներին՝ հայ–ադրբեջանական սահմանագոտու միջադեպերի վերաբերյալ ոչ հավաստի տեղեկություններ չտարածել։

«Հղումներ անելով սեփական աղբյուրների և տեղեկությունների` որոշ լրատվամիջոցներով և սոցցանցերով ապատեղեկատվություն է տարածվում հայ-ադրբեջանական սահմանագոտու տարբեր հատվածներում փոխհրաձգության, հրադադարի ռեժիմը խախտելու, հայկական դիրքերը և բնակավայրերը գնդակոծելու հեևանքով զոհերի և վիրավորների վերաբերյալ: Նման լուրեր տարածողներին խորհուրդ ենք տալիս ճշտել իրենց հասած տեղեկությունների հավաստիությունը ՀՀ ՊՆ տեղեկատվության և հասարակայնության հետ կապերի վարչությունում, չտարածել չստուգված լուրեր և արհեստականորեն չսրել իրավիճակը հայ-ադրբեջանական շփման գոտում»,– մասնավորապես ասվում է ՊՆ կոչում:

ՊՆ–ից տեղեկացնում են նաև ՀՀ զինված ուժերը վերահսկում են սահմանային իրավիճակը շփման գծի ամբողջ երկայնքով: «ՀՀ պաշտպանության նախարարությունը մեկ անգամ ևս հայտարարում է, որ հայկական կողմը խստորեն հետևում է հրադադարի ռեժիմի պահպանմանը և իրավիճակին համարժեք գործողությունների է դիմում միայն հակառակորդի կողմից արձանագրվող խախտումների դեպքում«– ասված է ՊՆ հաղորդագրության մեջ:

Վերջին օրերին շփման գծում ադրբեջանական կողմի ակտիվությանը, որի արդյունքում հայկական կողմն ունի երեք զոհ, վիրավոր: ՀՀ պաշտպանության նախարարությունն արձագանքել է տարածելով հաղորդագրություն. 

«Հայաստանի պաշտպանության նախարարության արձագանքը մեկն է. ՀՀ զինված ուժերի Գերագույն գլխավոր հրամանատարն արդեն հավաստիացրել է, որ  հակառակորդն անպատիժ չի մնալու: ՀՀ զինված ուժերը շփման գծի ամբողջ երկայնքով, չենթակվելով հակառակորդի սադրանքներին, իրականացնելու են իրավիճակին համարժեք գործողություններ»:

Ավելի վաղ տեղեկացրել էինք, որ ապրիլի 25-ին ադրբեջանական կողմը մի քանի ժամ շարունակ կրակի տակ է պահել Տավուշի մարզի Դովեղ գյուղը: Թշնամին Կրակի տակ է առել, գյուղի մանկապարտեզը: Կրակահերթի տակ բնակիչները տարհանել են մանկապարտեզի ու դպրոցի սաներին, բարեբախտաբար զոհեր և վիրավորներ չկան:

Դրան հաջորդել է, Այգեպար-Մովսես գյուղերի միջև ընկած ճանապարահատվածում  «ՎԱԶ 2107» մակնիշի ավտոմեքենայի գնդակոծումը, որում երեք պայմանագրային զինծառայողներ են եղել: Նրանց կյանքը հնարավոր չի եղել փրկել՝ երկու պայմանագրային զինծառայողներ մահացել են, Բերդի զինհոսպիտալ տեղափոխելու ճանապարհին, իսկ մեկը՝ Բերդի զինհոսպիտալում:Ականատեսների փոխանցմամբ, կրակահերթը եղել է մեծ տրամաչափի զենքերից` ԴՇԿ-ից:

«Առավոտ». Թերթը գրում է, որ ապրիլի 25-ին Նոյեմբերյան քաղաքում Սերժ Սարգսյանի նախընտրական հանդիպման ժամանակ նախագահի թիկնապահների անդամներից մեկը հրել է կողբեցի հաշմանդամ ազատամարտիկ Վովա Երկնափեշյանին:

Վերջինս թերթի թղթակցին ասել է, որ ընկնավորությամբ հիվանդ է, ցանկացած պահի կարող է մահանալ, նա իր առողջության հարցով նախագահից օգնություն էր հայցում: Նոյեմբերյանցի մի  ազատամարտիկ էլ վեճի  բռնվեց Սերժ Սարգսյանի անվտանգության ծառայության աշխատակցի  հետ այն պատճառով, որ թիկնապահը նրան  կարգադրում էր  «հեռու քաշվել»: Ազատամարտիկն ասել է, որ այս հողը, սահմանն իրենք են պաշտպանել, եւ ոչ ոք իրավունք չունի այնտեղից  իրեն  հեռու վանելու: Իր ելույթից հետո  երկրի նախագահը համբերատար   լսում էր առողջական եւ այլ խնդիրներ ունեցող մարդկանց, ովքեր կարողացել  էին  հայտնվել Սերժ Սարգսյանի ճանապարհին:

ՀՀ անկախության տարիներին երկրի նախագահի թիկնազորի անդամների թիվը բազմապատկվել է: Ժողովրդի հետ հանդիպումների ժամանակ Լեւոն Տեր-Պետրոսյանի թիկնապահները գրեթե չէին երեւում, Ռոբերտ Քոչարյանի օրոք նրանց թիվն ավելացավ, սակայն նրանք աչք չէին ծակում: Սերժ Սարգսյանի թիկնազորը բազմամարդ է, նախագահին լուսանկարելու ժամանակ միշտ կադրում հայտնվում են նրա թիկնապահները: Վերջիններիս թիվը,ժողովրդի հետ նրանց պահվածքը, ինչպես նաեւ նախագահական ավտոշարասյան մեծ երկարությունը  հարուցում է տավուշցիների դժգոհությունը, գրում է թերթը:

Այսօր «Ժողովրդական կուսակցության» նախագահ, թիվ 17 ընտրատարածքում մեծամասնական ընտրակարգով առաջադրված Տիգրան Կարապետյանը, անդրադառնալով կուսակցություններիծավալած ընտրապայքարին ասաց, որ  «Ժառանգություն» կուսակցությունը խաղում է Հանրապետականի, իսկ ընդդիմադիր «Հայ ազգային կոնգրեսը»՝ «Բարգավաճ Հայաստան» կուսակցության հետ. «Վերջինը, ա~յ, հետաքրքիր ա, ձեռ ա տալիս Լևոն Տեր-Պետրոսյանին. ԲՀԿ-ի հետ խառնվել ա էն առումով, որ պայմանավորվել են, ձայները՝ «մենք՝ ձեզ, դուք՝ մեզ»: ԲՀԿ-ն էլ բոլորին է ը’տենց ասում, օրինակ, ՀԱԿ-ին ասում ա՝ «որտեղ մեծամասնականով մենք չկանք` դուք կաք, ձեզ տանք», ու հակառակը: Էհ, ձեռ ա տալիս…»,- ասաց Կարապետյանը` հույս  հայտնելով, որ իրականում ժողովուրդը բոլորին էլ ճանաչում է, թե «ով՝ ով է»:

ԺԿ նախագահը չի կասկածում, որ ընտրողն իր ձայնը կտա ԲՀԿ-ին, բայց եթե հաջորդ տարի Գագիկ Ծառուկյանը հայտարարի, որ նախագահական ընտրություններում սատարում է Սերժ Սարգսյանին՝ կկորցնի այդ ձայները:
Անդրադառնալով «Ընտրությունների վերահսկողություն իրականացնող միասնական շտաբին», ինչին միացել են «Բարգավաճ Հայաստան», Հայ հեղափոխական դաշնակցություն կուսակցությունները և «Հայ ազգային կոնգրես» դաշինքը, Տիգրան Կարապետյանը նկատեց՝ «ո՞նց կարող ա էշն ու ձին միավորվեն»: Կարապետիչի մեկնաբանությամբ, այս կերպ հիշյալ քաղաքական ուժերը խոստովանում են, որ գաղափարախոսություն չունեն:

Չնայած Կարապետիչը հիմնականում «Ժառանգության» նախագահ Հովհաննիսյանին համարում է ազնիվ ու գնահատում նրա ինտելեկտուալ կարողությունները. «Րաֆֆի Հովհաննիսյանը խորհրդարանի մասին չի մտածում, նա դրսի ուժերի կողմից դիտվում է որպես նախագահական ընտրությունների թեկնածու: Ինքը, որ հիմա ուզում է խորհրդարան անցնի, կապ չունի՝ հի՞նգ հոգով անցնի, յո՞թ, դա պլատֆորմ է, ինքը կառաջադրվի նախագահական ընտրություններին»:

Ընտրություններին մասնակցից մյուս քաղաքական ուժի՝ «Հայ ազգային կոնգրեսի» մասին Տիգրան Կարապետյանն ասաց՝ «իրանց սրած բիզը …», նկատի ունենալով թիվ յոթ ընտրատարածքում Մալաթիա-Սեբաստիա համայնքի կանանց ագրեսիվ պահվածքը թեկնածու Նիկոլ Փաշինյանի նկատմամբ:

Կատարվածն էլ զուգահեռեց իր հետ տեղի ունեցածի հետ, հիշեցնելով, երբ ինքը՝ Կարապետիչը, ժամանակին հայտարարում էր, թե «ՀՀՇ բետեէռ կանայք» իր հանրահավաքի ժամանակ հարձակվում են իր վրա, ապա հիմա էլ այլ «բետեէռներ» են հարձակվում իրենց վրա:

Տիգրան Կարապետյանը նկատում է՝ ՀԱԿ-ը գնաց իրեն փոշիացնելու ճանապարհով, հիմա էլ ինքն է փոշիանում, որովհետև ԺԿ նախագահը նկատել է, թե որքան սակավամարդ են դարձել ՀԱԿ-ի նախընտրական հանդիպումները:
Անդրադառնալով  կուսակցությունների կարգախոսներին` Կարապետյանը նկատեց, որ դրանք ուղղակի ծիծաղելի են իր համար. «Հավատանք, որ փոխենք», ո՞վ փոխի: Իրանք են փոխողը, իրանք էլ պետք է փոխվեն»:

«Ժառանգության»՝ «Միասին սարեր ենք շարժելու» կարգախոսի կարապետյանական մեկնաբանությունը հետևյալն էր.«Եթե երկրաշարժի նախարարություն ունեն, թող շարժեն»:

ՀԱԿ առաջնորդ Լևոն Տեր-Պետրոսյանը ճնշման տատանում ունի: Նա առողջական խնդիրների պատճառով չի կարողացել այսօր շարունակել քարոզարշավը:

ՀԱԿ-ից հայտնում են որ, առաջին նախագահի առողջական վիճակը վատացել էր երեկ Կապանում հանրահավաքից հետո: ՀԱԿ-ը քարոզարշավը շարունակելու էր Մեղրիում:  Իսկ Տեր-Պետրոսյանը ճնշման տատանում է ունեցել և բժիշկների խորհրդով վերադարձել է Երևան: