2015 թվականի նոյեմբերի 25-ին ՀՀ ազգային անվտանգության ծառայության կողմից վնասազերծված զինված խմբին ֆինանսավորողը, որին ԱԱԾ-ն տևական ժամանակ գաղտնի էր պահում, հայտնի է:

Armtimes.com-ին հաջողվել է պարզել, որ զինված խմբին և մասնավորապես խմբի պարագլուխ հանդիսացող Արթուր Վարդանյանին ֆինանսավորել է  «Ռադիո Մարիամ»-ի Գյումրու մասնաճյուղի հիմնադիր հայր Անտոն ծայրագույն վարդապետ Թոթոնջյանը: Վերջինս խմբին վնասազերծելուց հետո ձերբակալվեց, կալանավորվեց, ապա մի քանի ամիս անց ազատ արձակվեց. նրա նկատմամբ որպես խափանման միջոց ընտրվեց երկրից չհեռանալու մասին ստորագրությունը:

Հայր Անտոնը Արթուր Վարդանյանի հետ ծանոթացել է «Ռադիո Մարիամ»-ի Գյումրու մասնաճյուղի լրագրող, գործով մեղադրյալ Լիլիթ Թորոսյանի միջոցով, վերջինս էլ Վարդանյանի հետ ծանոթացել է սոցիալական ցանցի միջոցով: Մեր հավաստի տեղեկություններով, Թոթոնջյանը 70 հազար ԱՄՆ դոլար կանխիկ տվել է Արթուր Վարդանյանին՝ հստակ իմանալով, որ այդ գումարը տալիս է զինված հեղաշրջում սկսելու համար: Հայ Անտոնը ցուցմունքներում չի հերքել, որ ինքն է խմբին ֆինանսավորել: Մեր տեղեկություններով, 70 հազար ԱՄՆ դոլարը Հայ Անտոնին տվել էին Գյումրիում ինչ-որ շենք կառուցելու համար:

ԱԱԾ քննչական վարչության պետ, սույն գործով քննչական խմբի ղեկավար Միքայել Համբարձումյանը մի քանի ամիս առաջ լրագրողների հետ զրույցում հայտարարել էր, որ զինված հեղաշրջում իրականացնելու նպատակ հետապնդած խմբին ֆինանսավորողը հայտնի է, բնակվում և գործում է Հայաստանում: Համբարձումյանը այդպես էլ հրաժարվել էր ասել, թե ով էր այդ անձը՝ նախաքննության գաղտնիությունից ելնելով: Նա միայն նշել էր, որ ֆինանսավորողը կալանավորված չէ: Ֆինանսավորողի՝ կալանավորված չլինելու հանգամանքը Արթուր Վարդանյանի պաշտպան Լևոն Բաղդասարյանը տարօրինակ էր համարել: Հայր Անտոնը հիշեցնենք, ազատ էր արձակվել սույն թվականի հունվարի 28-ին, նույն ժամանակահատվածում ազատ արձակվեց նաև լրագրող Լիլիթ Թորոսյանը:

Վարդապետ Թոթոնջյանը ծանոթ է եղել նաև այս գործով կալանավորված ՀՀ պաշտպանության նախկին փոխնախարար Վահան Շիրխանյանի հետ: Մեր տեղեկություններով, նրանք ծանոթացել են 2015 թվականի ապրիլի 26-ին ՌԴ-ում՝ Հայոց ցեղասպանության 100-րդ տարելիցին նվիրված միջոցառման ժամանակ: Այնուհետև կրկին հանդիպել են, որի ժամանակ էլ հայր Անտոնը պատմել է Արթուր Վարդանյանի մասին: Այսպիսով՝ Վահան Շիրխանյանը Արթուր Վարդանյանի հետ ծանոթացել է վարդապետ Անտոն Թոթոնջյանի միջնորդությամբ: Նախաքննության ընթացքում Շիրխանյանն ու հայր Անտոնը առերեսվել են՝ ծանոթությունների ժամանակի, այդ շրջանակներում տեղի ունեցած խոսակցությունների և այդ ծանոթություններին ներկա անձանց շուրջ տեղի ունեցած հակասությունների վերաբերյալ: Թե ինչ հակասություններ են եղել իրականում, կփորձենք ճշտել Վահան Շիրխանյանից, որը պատրաստվում է վաղը հանդես գալ ասուլիսով:

Հայկական ժամանակ

Մանրամասները՝ այսօրվա համարում։

«Հայկական Ժամանակ»-ի թղթակիցը զրուցել է ՏՄՊՊՀ նախագահ ատակ Շաբոյանի հետ

– Պարոն Շաբոյան, վարչապետ Կա­րեն Կարապետյանը հայտարարեց, որպետք է հաստատվեն հավասար խաղի կանոններ, և որ այսուհետցանկացողները կարող են բենզին կամ բանան ներկրել։ Իսկ սա նշա­նակում է,որ մինչ հիմա դա հնարա­վոր չի եղել։ Այղպիսով կարո՞ղ ենք պաշտոնապեսարձանագրել, որ Հայաստանում ազատ մրցակցու­թյան չի եղել։

– Ձեր սուբյեկտիվ վերաբերմունքն է, թե մրցակցություն չի եղել։ Իհարկե, մրցակցության ոլորտում խնդիրներ կան, մենք չենք ասում, թե ամեն ինչ իդեալական Է։ Ամեն դեպքում այն խնդիրները, որոնք գտնվում են հանձնաժողովի տիրույթում, ուսում­նասիրության շրջանակներում մենք հետևողական ենք եղել, որ դրանք լուծվեն։ Իհարկե, պարբերաբար խն­դիրներ են առաջանում, եւ մենք չենք կարող ասել, թե դրանք ամբողջու­թյամբ լուծում-ավարտում ենք, եւ դրանք այլեւս չկան։ Խնդիրները լուծ­վում են, բայց ժամանակի ընթաց­քում կարող են նոր խնդիրներ առա­ջանալ։ Մենք պետք Է առարկայա­կան քննարկենք։

–   Օրինակ՝ բանանի ներկրման շուկան, որտեղ եթե չասենք մոնո­պոլ, ապագեր-գերիշխող դիրք գրա­վող ընկերություն կա՝ «Քեթրինը», որն իր այդհնարավորության արդ­յունքում գին է թելադրում։ Ադրբեջա նում վերջերսազատականացվեց այդ շուկան, ու բանանի գինը կրկնա­կի իջավ։ Ինչո՞ւՀայաստանում հնա­րավոր չէ նման պայմաններ ունենալ։

–  Ես ձեր ասածների հետ համա­ձայն չեմ, այս տարիների ընթացքում մենք մշտապես ուշադրության կենտրոնում ենք պահել այդ ոլորտը, որովհետեւ, այո, այդտեղ կա գերիշ­խող դիրք զբաղեցնող ընկերություն, բայց մեր ուսումնասիրությունները ցույց են տալիս, որ դրանից բացի այսօր բազմաթիվ ընկերություններ ոչ միայն երրորդ երկրներից, այլեւ ԵՏՄ երկրներից բանան են ներկրում։ Միգուցե, այո, փոքր ընկերություններ են, բայց ուսումնասիրությունները ցույց են տալիս, որ շուկայում մուտքի խոչընդոտներ չկան։ Իսկ մեր հանձ­նաժողովի խնդիրը մուտքի խոչըն­դոտները բացառելն Է։ Եվ ցանկա­ցած տնտեսվարող եթե շահավետ Է համարում նման գործունեությամբ զբաղվելը, զբաղվի ղրանով։

–   Մամուլում հրապարակումներ եղան, որ «Քեթրին» ընկերությանսեփականատեր Միհրան Պողոսյանը մաքսազերծումից հետո կանգնեցրել էբանան ներկրող մեքենան եւ մարդ­կանց զգուշացրել, որ այլևս նման բանչանեն։ Փորձե՞լ եք պարզել, թե դա ինչ խնդիր է:

–  Տեղյակ չեմ։ Ամեն դեպքում մեր ուսումնասիրությունները փաստերի վրա են հիմնվում։

– Նույնն էլ կարող ենք ասել բենզի­նի շուկայում, որտեղ նորից նման գե­րիշխող դիրք զբաղեցնող երկու ըն­կերություններ կան՝ «Ֆլեշը» և «CPS»֊ը,որոնք ունեն իշխանություն­ների հովանավորությունը եւ գին են թելադրում։

– Ես մշտապես ասել եմ, որ բենզի­նի ոլորտը գտնվում Է մեր ուշադրու­թյան ներքո։ Այո, վերջին մի քանի տարիներին այնտեղ երկու խոշոր ներմուծողներ են եղել, հոկտեմբերից նոր ընկերություն է հայտնվել «Մաքս պետրոլը» որը սկսել է Ռուսաստա­նից ու Ռումինիայից մեծ քանակու­թյամբ բենզին ներկրել, ինչը փաս­տում է այն մասին, որ շուկայում խո­չընդոտներ չկան։

Ամբողջությամբ կարող եք կարդալ «Հայկական Ժամանակ» թերթի այսօրվահամարում:

«Չորրորդ իշխանություն» թերթի տեղեկություններով՝ Սուրիկ Խաչատրյանը՝ Լիսկան, նեղսրտած է: Նրան զայրացրել է այն հանգամանքը, որ ոտքը չքաշած. համայնքի ղեկավարները, քաղաքապետներն ու գյուղապետները առիթը բաց չեն թողնում նոր մարզպետի աչքը մտնելու համար: «Սուրիկ Խաչատրյանը հատկապես զայրացած է Կապանի քաղաքապետ Աշոտ Հայրապետյանի վրա, որը նոր մարզպետից պոկ չի գալիս:

Հիմա արդեն նա հեռվից հետևում է իրեն դավաճանածներին ու մտմտում, թե ինչպես պատժի նրանց՝ ասելով, ոչինչ, ճտերին աշնանն են հաշվում»:

Ամբողջությամբ կարող եք կարդալ  թերթի այսօրվա համարում:

«Հրապարակ»-ի աղբյուրների փոխանցմամբ` հուլիսին «Սասնա ծռերի» կողմից ՊՊԾ-ի գրավումից հետո ՀՀ-ում ամերիկյան դեսպանատունը դիմել էր հայաստանյան պատկան մարմիններին, որպեսզի իրենց տրամադրեն ՊՊԾ գունդը գրաված «ծռերի» հարազատների անունները՝ ԱՄՆ մուտք գործելու համար վերջիններիս վիզա չտրամադրելու նպատակով:

Անկախ նրանից, որ «Սասնա ծռերը» ժողովրդի դժգոհությունից ծնված շարժում էր եւ հասարակության շրջանում համակրանք էր վայելում, իսկ ամերիկյան իշխանությունն էլ շատ զուսպ արտահայտվեց նրանց մասով, զինյալ ապստամբներն ԱՄՆ իշխանությունների համար ասոցացվում են ահաբեկչության հետ:

Մանրամասները՝ թերթի այսօրվա համարում։

«Մինչ ոստիկանապետն ազդեցիկ դեմքով խորհրդակցություններ է անում և կարգադրում ոստիկաններին մնալ օրինականության սահմաններում, մինչ նրանց կրծքին տեսախցիկներ են փակցնում, որ կոռուպցիան վերացնեն, Երևան-Գյումրի միջպետական ճանապարհի Պռոշյան գյուղի հատվածում անընդհատ վերուվար է անում պետավտոտեսչության մի ավտոմեքենա, մյուսը դարանակալված է գյուղի վերջում, թփերի մեջ՝ «աչքն» Աշտարակի կողմից եկող մեքենաներին, որոնք Պռոշյան են հասնում նոր կառուցված մայրուղով, որը գյուղի մուտքի մոտ ավարտվում է:

Իսկ այդտեղ սահմանված արագությունը ժամում 60 կիլոմետր է, որը վարորդներից շատերը գերազանցում են: Իհարկե, արդարացված չէ արագության գերազանցումը, սակայն արդարացված չէ նաև պետավտոտեսուչների թաքնվելը, որոնք թփերի միջից միանգամից հայտնվում են խախտում արած մեքենաների դեմ դիմաց, հանկարծակիի բերում վարորդին ու հետևից գնալով՝ կանգնեցնում: Սա մեկ կամ երկու օրվա «ներկայացում» չէ: Այն սկսվել է երկու-երեք տարի առաջ, նոր կառուցվող ճանապարհի «ցրցամի» հետ, ու գուցե շարունակվի այնքան, մինչև իրենց դարանակալման տեղում նույնպես ճանապարհ կառուցվի»:

«Հրապարակ»

«Տխուր տեղեկություններ են ստացվում ՀՀ մաքսային ծառայության գործունեության նոր ոճի մասին։ Հայաստան ներմուծվող այն ապրանքները, որոնք ենթակա են մաքսային զննման, ենթարկվում են այնպիսի «զննման», որ ապրանքների մի զգալի մասը վնասվում է։

Խոսքը վերաբերվում է հատկապես «փոքր» ներկրողներին, որոնց ներկրած բեռներով արկղերը դեսուդեն են շպրտվում ու եթե դրանց մեջ կան ջարդվող ապրանքներ, դրանք վնասվում են։ Ինչպես ահազանգում են տնտեսվարողները, դա արվում է սահմանին «խիստ վերահսկողություն» սահմանելու անվան տակ։

Թե ինչ նպատակ է հետապնդում մաքսայինի նոր աշխատաոճը, տնտեսվարողները դեռ չեն հասկացել։ Նրանց կարծիքով, մաքսավորները կամ փորձում են բարձրացնել կաշառքների «ստավկաները» կամ ուզում են արհեստական դժգոհություն առաջացնել ՊԵԿ նոր ղեկավարի նկատմամբ»:

Մանրամասները՝ թերթի այսօրվա համարում։

«Հայկական ժամանակ» թերթը գրում է. «Երեւանի հասարակական տրանսպորտը, ամենայն հավանականությամբ, կենթարկվի արմատական փոփոխությունների։ Երեւանի փողոցներից կվերանան «գազելները» եւ դրանց կփոխարինեն մեծ, միջին եւ փոքր ավտոբուսները։ Իսկ տրանսպորտի ամբողջ կառավարումը կիրականացնի մեկ օպերատոր։

«Հայկական ժամանակ»-ի թղթակցի հետ զրույցում այսպես է նկարագրել հասարակական տրանսպորտի սպասվող ապագան Երեւանի փոխքաղաքապետ Վահե Նիկոյանը։ Այդ փոփոխությունները իրականացնելու համար խորհրդատու գտնելու նպատակով հայտարարվել էր մրցույթ, որի հաղթողն արդեն հայտնի է։

Փոխքաղաքապետը չի նշել, թե որ ընկերությունն է տրամադրելու այդ խորհրդատվությունը, պարզաբանելով որ խորհրդատուին կբացահայտեն մրցույթի արդյունքները վերջնական ամփոփելուց եւ պայմանագիրը կնքելուց հետո։ Ըստ փոխքաղաքապետի մոտավոր հաշվարկների նշված փոփոխություններն իրականացնելու համար կարող է պահանջվել 80-100 միլիոն դոլար»:

«ՀԺ»

Առավել մանրամասն՝ թերթի այսօրվա համարում։

«Կառավարությունը երեկ հաստատեց, թե սոցիալական որ խումբն է գազի համար վճարելու ամենաէժան սակագնով՝ խորանարդ մետրը 100 դրամով։ Կարիքավորների այս խումբը ներառում է այն նպաստառու սպառողներին, որոնք «Փարոս» համակարգում են, ունեն 20-ից բարձր միավոր։

Աշխատանքի և սոցիալական հարցերի նախարար Արտեմ Ասատրյանը մեզ հայտնեց, որ որոշումը վերաբերելու է շուրջ 130 հազար ընտանիքի։ Ոչ կարիքավոր խավը՝ այսինքն, սովորական սպառողները, գազը գնելու են 139 դրամով։ Անապահովներին գազն էժան գնով տալու փորձեր նախկինում էլ են եղել․ 2014 թ․, երբ գազը թանկացավ՝ խմ-ի դիմաց հասնելով 156 դրամի, Տիգրան Սարգսյանի կառավարությունը փոխհատուցում սահմանեց անապահովների համար՝ իր վրա վերցնելով 56 դրամը»։

«Հրապարակ»

«Ժամանակ» թերթը գրում է. «Օրերս պատասխանելով Սերժ Սարգսյանի վարչապետական հեռանկարի մասին լրագրողների հարցին, որի առիթ հանդիսացել էր արաբական Ալ Ջազերա հեռուստաընկերությանը տված Սերժ Սարգսյանի հարցազրույցը՝ ՀՀԿ խոսնակ, ԱԺ փոխնախագահ Էդուարդ Շարմազանովը արել էր բավականին հետաքրքրական հայտարարություն, բավական նուրբ երանգներով:

Սերժ Սարգսյանը, ինչպես հայտնի է, արաբական հեռուստաալիքին ասել էր, թե դեռ վաղ է խոսել նախագահի պաշտոնից հետո վարչապետ առաջադրվելու հավանականության մասին, քանի որ ամեն ինչ կախված է 2017 թվականի ընտրությունից, եւ այդպիսի հեռանկարի վերաբերյալ արտահայտվելու համար պետք է, որ ՀՀԿ-ն «շատ լավ քվե» ստանա այդ ընտրությանը: ՀՀԿ խոսնակը, ի պատասխան դրա վերաբերյալ լրագրողների հարցի, հայտարարել էր. «Մեր խնդիրը 2017թ. ժողովրդավարական ընտրություններ կազմակերպելն ու վստահության քվե ստանալն է: Դրանից հետո, եթե հաղթի ՀՀԿ-ն՝ կոալիցիայով, թե առանց, Սերժ Սարգսյանը կանդրադառնա դրան, կուսակցությունը կորոշի նոր կառավարության կազմը, ծրագիրը: Այդքան պրիմիտիվ մի նայեք այս հարցին»:

Հանրապետական կուսակցության խոսնակը չի ասում, որ ՀՀԿ-ն ունի վարչապետի թեկնածու, եւ ընտրությանը հաջողության հասնելու դեպքում իրենք հնարավորություն են տալու այդ թեկնածուին շարունակելու իր աշխատանքը: Բանն այն է, որ Սերժ Սարգսյանի այդ հայտարարությունների բուն խորքից որքան հասարակությունն է անտեղյակ, նույնքան էլ անտեղյակ են նաեւ ՀՀԿ-ականները: Եվ այս իմաստով, Սերժ Սարգսյանի հայտարարությունը ՀՀԿ-ում առաջացրել է երկակի իրավիճակ:

Մի կողմից նա, ներկայացնելով Կարեն Կարապետյանին, ստեղծում է տպավորություն, որ Կարապետյանը վարչապետական երկարաժամկետ նախագիծ է եւ իրականացնելու է ՀՀԿ նոր ոգու առաքելություն, լինելու է փոփոխությունների խորհրդանիշ, մյուս կողմից Սարգսյանը հարցազրույց է տալիս Ալ Ջազերա հեռուստաընկերությանը եւ փաստացի ակնարկում, որ Կարեն Կարապետյանը փոփոխության ենթակա է եւ ըստ էության՝ կարող է ստացվել այնպես, որ Կարապետյանն ընդամենը նախապատրաստելու է Սերժ Սարգսյանի վարչապետությունը:

Դա էապես փոխում է ներկայիս իրավիճակի ընկալումը ՀՀԿ-ի ներսում: Բանն այն է, որ մի բան է Կարեն Կարապետյան նախագիծը Սերժ Սարգսյանի իշխանությունից հեռանալու դեպքում, մեկ այլ բան է Կարապետյան նախագիծը որպես Սերժ Սարգսյանի իշխանական տրանսֆորմացիայի եւ նախագահի պաշտոնից վարչապետի պաշտոնի անցման միջոց:

Եթե Կարապետյանը Սարգսյանի սահուն հեռանալու նախագիծն է, ապա այստեղ ՀՀԿ-ում ներկայումս առկա ստատուս-քվոյի սուբյեկտների համար խնդիր է դառնում այդ նախագծի հանդեպ վերաբերմունքի ձեւավորումը եւ դիրքավորումը, հարկ եղած դեպքում արդեն դիմակայության կազմակերպման համատեքստում, նաեւ Սերժ Սարգսյանի խնդիրներից ելնելով: Որովհետեւ ՀՀԿ-ի մեծամասնության, հավակնոտ խմբերի համար առաջանում է հաջորդ հարցը` իսկ Սերժ Սարգսյանն ուզո՞ւմ է հեռանալ, թե՞ ստիպված է հեռանում:

Այսինքն՝ նա Կարապետյանի հետ շահերի խորքային բախման մեջ է, թե ոչ, այդ հարցում նրան օգնել պետք է, թե նրան պետք չէ խանգարել: Իսկ եթե օգնության կարիք կա, իսկ իրենք հապաղեն, կամ ինչ որ մեկն անցնի առաջ: Բայց եթե փորձեն օգնել, բայց իրականում պարզվի, որ խանգարում են Սարգսյանին սահուն հեռանալ: Եվ առավել եւս, եթե Կարապետյանը Սարգսյանի սահուն մնալու նախագիծն է, ապա այստեղ Կարապետյանի հետ չլինելը կարող է ստացվել չլինել Սերժ Սարգսյանի հետ` խանգարել Սարգսյանին սահուն մնալ: Արաբական հեռուստաալիքին Սարգսյանի արած ակնարկը բավականին բարդացրել է Հանրապետական կուսակցության ներկայիս ստատուս-քվոն կազմող սեգմենտների հոգեբանական վիճակը կամ կառավարության փոփոխությամբ բացված ներկուսակցական քաղաքական վերքի վրա ավելացրել հոգեբանական բավականաչափ աղ: Սարգսյանն այդ վերքը բաց կպահի այնքան ժամանակ, քանի դեռ բաց կմնա իր հետնախագահական կարգավիճակի հարցը: Իսկ այդ հարցը Սարգսյանը դեռ նոր է բացում»:

«Ժամանակ»

Առավել մանրամասն՝ թերթի այսօրվա համարում։