«Ժառանգություն» խմբակցության պատգամավոր Զարուհի Փոստանջյանն «Առավոտ» օրաթերթի հետ զրույցում հայտնել է, որ իր եղբորը`Տիգրան Փոստանջյանին հունիսի 3-ին համաներմամբ ազատ արձակելու որոշումը «բողոքարկվելու է վերաքննիչ դատարանում»:

Օրաթերթի դիտարկմանը, թե Տիգրան Փոստանջյանը դատավարության ընթացքում ի վերջո չառարկեց, որ իր նկատմամբ կիրառվի համաներում`«Ժառանգության» պատգամավորն այսպես է պատասխանել. «Սա ճնշման ներքո ընդունված որոշում էր: Եվ այստեղ միանշանակ է օրենքի պահանջների խախտումը: Եթե հատկապես կար համաներման ակտ կիրառելու հնարավորություն, ապա պետք է շարունակվեր դատաքննությունը, և նրան անհապաղ կալանքից ազատեին: Մինչդեռ դատարանն այդ միջնորդությունը չբավարարեց ու որոշեց, որ ավելի լավ է`այս ճանապարհն ընտրեն»…

Թոխմախի Մհերը վարչապետին չի մտահոգում

Մայրաքաղաքի Էրեբունի համայնքի նախկին թաղապետ Մհեր Սեդրակյանը լրատվամիջոցներից մեկի հետ զրույցում երեկ հայտարարել էր, թե ինքը չի ճանաչում վարչապետ Տիգրան Սարգսյանին: Այս առթիվ Տիգրան Սարգսյանի մտերիմ շրջապատից մեկը «Առավոտ»-ի հետ զրույցում ասել է, որ իրենք առանձնապես չեն մտահոգվում այդ փաստի առթիվ, քանի որ կառավարության ղեկավարն ու Թոխմախի Մհերը գտնվում են այլ արժեքային հարթություններում:

«Շախմատը այնպիսի խաղ է, որ ամեն քայլից  հետո  մտածելու ժամանակ է պահանջում, ու եթե ձեռք ես տվել`պիտի խաղաս»,-  «Ժամանակ» օրաթերթի թղթակցի հետ զրույցում ասել է «Հանրապետություն»  կուսակցության առաջնորդ Արամ Սարգսյանը:

-Պարոն Սարգսյան, Սերժ  Սարգսյանի աշխատակազմի  ղեկավար Կարեն  Կարապետյանն  այսօր հայտարարել է, թե  երկխոսությունը վաղուց է սկսվել, ապա նշել է, թե` «ինչ վերաբերում  է պատվիրակություն  ձևավորելու և արտահերթ ընտրությունների շուրջ բանակցելու առաջարկին, ապա  այստեղ թե՛ առաջադրվող  ձևաչափը, թե՛ դրվող հարցը, մեծ  հաշվով,  ուղղակի ինքնանպատակ են և, ինչպես դժվար չէր կռահել, անընդունելի»:  Նախ՝ ինչպե՞ս եք գնահատում այս հայտարարությունը:

-«Նման դեպքում հայտնի ֆիլմի հերոսն ասում էր. «Հարսնացուն կգոռա, քացի կտա…, ուշադրություն մի դարձրեք, դա հին կովկասյան սովորություն է»: Իսկ եթե ավելի լուրջ, ապա ասեմ, որ շախմատը այնպիսի խաղ է, որ ամեն քայլից հետո մտածելու ժամանակ է պահանջում, ու եթե ձեռք ես տվել` պիտի խաղաս: Հիմա հասել ենք մի փուլի, որ իշխանությունն ասում է` էլ չեմ խաղում: Մենք քայլն արել ենք` ինքը հրաժարվում է այդ քայլը կատարելուց: Նման դեպքում կամ որակազրկում են, կամ պատժում են:

Մենք շախ ենք հայտարարել, և իրենք պարտավոր են քայլ կատարել, և հուսով եմ, որ իրենք հետևություն կանեն, որովհետև հակառակ դեպքում իրենք հասկացված չեն լինի ոչ միայն մեր կողմից, իրենք  հասկացված չեն լինի թե՛ ներքաղաքական դաշտում գտնվող բոլոր ուժերի կողմից, թե՛ արտաքին քաղաքական ուժերի կողմից, ինչը չափից ավելի կարևոր է: Այն դեպքում, երբ ընդդիմությունը փորձում է խաղաղ ճանապարհով երկիրը այս ծանր իրավիճակից էվոլյուցիոն ճանապարհով դուրս հանել, իսկ իշխանությունը հրաժարվում է, իշխանությունը չպիտի մոռանա, որ բազմաթիվ միջազգային կազմակերպություններ ու երկրներ ողջունեցին երկխոսությունը և երկխոսության գաղափարը, իշխանությունը դա չպիտի մոռանա ու իր հանդեպ վերջին շրջանի ձևավորված վերաբերմունքի նուրբ նոտաները հենց դրա հետևանքն են, մեր աշխատանքի հետևանքն են. ինքը պիտի հետևություն անի ու պիտի գնա ավելի մեղմ ճանապարհով: Եթե իշխանությունը կնախընտրի կոշտ ճանապարհը` դա արդեն իր խնդիրն է, բայց ինքը հանգստանալու ոչ մի հնարավորություն չունի, որովհետև ինքը կարող էր ինքնավստահ լինել, եթե երկրում բոլոր խնդիրները լուծված լինեին, ժողովուրդը ապրեր բարվոք, բարգավաճ և օրինական երկրում, այս դեպքում ինքը կարող էր ասել ամեն ինչ…

Ոստիկանությանը կից հասարակական խորհուրդը, որը կազմալուծվեց, երբ բացահայտվեց այդ խորհրդի անդամ Սերոբ Տեր-Պողոսյանի «նախասիրությունն» անչափահաս տղաների նկատմամբ, ու նրան մանկապղծության մեղադրանք առաջադրվեց, առաջիկա օրերին կվերակազմավորվի, գրում է «Հրապարակ»-ը։ Ըստ թերթի տեղեկությունների՝ խորհրդի անդամներն ընտրվելու են նոր ստանդարտներով, անդամների կենսագրությունների մանրակրկիտ ուսումնասիրմամբ։ Խորհրդի նախկին նախագահ Ֆելիքս Բախչինյանը, որը հասցրել էր բոլոր բարձրաստիճան պաշտոնյաներին Ֆրիտյոֆ Նանսենի անվան մեդալ տալ, այլևս չի լինի, որոշ նախկին անդամներ՝ ևս։ Սակայն նոր անդամների անունները գաղտնի են պահվում։

Հովիկ Շահինյանը տեղյակ չէ՞, որ զենք ունի

Երեկ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում շարունակվել է Արաբկիրում անցյալ տարվա մայիսի 12-ին կատարված 23-ամյա Խաչիկ Մկրտչյանի սպանության գործով դատական նիստը, գրում է թերթը:

Այս նիստում որպես վկա ցուցմունք է տվել ՀՀԿ Արաբկիրի տարածքային կառույցի նախագահ, Արաբկիրի նախկին թաղապետ Հովիկ Շահինյանը: Նույն գործով որպես մեղադրյալ է ներգրավված նաև Հովհաննես Շահինյանի քրոջ որդին, որն սկզբում ընդունել էր իր մեղքը, որով նրան սպանության մեղադրանք էր առաջադրվել, սակայն հետո հրաժարվել էր իր ցուցմունքներից: Դրա արդյունքում գործում շրջադարձ է եղել. մեղադրանք է առաջադրվել միջադեպի այլ մասնակցի` Վռամ Բաղդասարյանին, որը չի ընդունում մեղադրանքը և հրաժարվում է ցուցմունք տալ: Գործը հասարակական և քաղաքական հնչեղություն է ստացել, քանի որ քննության ժամանակ պաշտոնեական լիազորությունները չարաշահելու միջոցով տվյալների ու ապացույցների խեղաթյուրում թույլ տալու համար ոստիկանության քրեական հետախուզության գլխավոր վարչության նախկին պետ Հովհաննես Թամամյանն ազատվել է պաշտոնից և կալանավորվել:

Հովիկ Շահինյանը նախաքննության ժամանակ ցուցմունք էր տվել, որ միջադեպի մասնակից Վռամ Բաղդասարյանն իրեն ասել է, թե ինքն է սպանել: Նախորդ շաբաթ «Հրապարակ»-ի խմբագրություն դիմած Բաղդասարյանի ծնողները պնդել են, որ իրենց որդու վրա ուզում են բարդել սպանությունը, որ Վռամը թեև մասնակցել է «ռազբորկային», սակայն ինքը չի կատարել սպանությունը, քանի որ իր մոտ չի եղել այն զենքը, որի կրակոցից մահացել է 23-ամյա երիտասարդը:

Թերթը գրում է, որ գործում կատարված շրջադարձից ու սպանության մեղադրյալի փոփոխությունից հետո Վռամ Բաղդասարյանին մեղադրանք է առաջադրվել ՀՀ քրեական օրենսգրքի 104 հոդվածի 2-րդ մասով` սպանություն, որը պատժվում է ազատազրկմամբ  8-15 տարի ժամկետով կամ ցմահ բանտարկությամբ:

Երեկ դատարանում Հովիկ Շահինյանը կրկնել է, թե միջադեպի մասնակից Վռամ Բաղդասարյանն իրեն ասել է, որ ինքն է կրակել, ու Շահինյանը հորդորել է հանձնվել:

Օրաթերթի փոխանցմամբ, դատարանում պարզվել է, որ կրակոցները հնչել են Հովիկ Շահինյանին պատկանող մեքենայից: Դատավորի հարցին՝ հնարավո՞ր է Ձեր մեքենայի մեջ զենք է եղել, Շահինյանը պատասխանել է` ոչ, դա անհնար է: Դատապաշտպաններից մեկը հիշեցրել է, որ ամբաստանյալներն ասել են, թե այդ մեքենայի «բարդաչոկից» զենք են հանել` «երեք ատրճանակ ցելոֆանի մեջ», և դրանցով կրակել: Հովիկ Շահինյանն ի պատասխան ասել է, թե տեղյակ չէ դրա մասին…

Նախօրեին «Ազատ դեմոկրատներ» անվանումով  կուսակցության անունից հաղորդագրություն էր տարածվել, թե  ՀՀ-ում ԱՄՆ արտակարգ և լիազոր դեսպան Մարի Յովանովիչն այցելել է իրենց գրասենյակ ու հանդիպում ունեցել կուսակցության ղեկավարության հետ: ՀՀ արդարադատության նախարարության պետական ռեգիստրից, սակայն, «Հայկական ժամանակ» օրաթերթին պաշտոնապես տեղեկացրել են, որ «Ազատ դեմոկրատներ» անունով կուսակցություն Հայաստանում գոյություն չունի`գրանցված չէ: «Գրանցման համար հայտ էլ ներկայացված չէ: Կուսակցության գրանցման համար առաջին հերթին հարկավոր է, որպեսզի նախաձեռնող խումբը կուսակցության հիմնադիր համագումարից առնվազն մեկ ամիս առաջ  հայտարարություն տա այն մասին, թե որտեղ է տեղի ունենալու  կուսակցության հիմնադիր համագումարը, որ ժամին, որ վայրում: Էդ համագումարում պետք է որոշում ընդունվի, թե էսինչ անվանումով կուսակցություն է հիմնադրվում, որից հետո պետք է հաստատվի կուսակցության կանոնադրությունը, ընդունվի ծրագիրը, ընտրվեն ղեկավար և վերահսկող  մարմիններ,  լիազորված անձ, որը  պետք  է 90 օրվա  ընթացքում փաստաթղթերը ներկայացնի ռեգիստր`գրանցման»,- թերթին ասել է ՀՀ արդարադատության  նախարարության պետական ռեգիստրի հասարակական միավորումների և ոչ առևտրային իրավաբանական անձանց  գրանցման և լրատվական միջոցների հաշվառման բաժնի պետ  Էդիկ Պողոսյանը:

Արարատի մարզի Մասիս քաղաքի թիվ 1 մանկապարտեզը ղեկավարում է երկու անգամ դատապարտված անձը, որին էլ, փաստորեն, վստահված է մատաղ սերնդի դաստիարակության գործը։ Այս հանգամանքը հատկապես աբսուրդի է նմանվում, երբ հաշվի ես առնում, որ մանկապարտեզի տնօրենը ժամանակին զրկված է եղել իր իսկ երեխաներին խնամելու և դաստիարակելու իրավունքից։

Օրերս ահա այդպիսի բովանդակությամբ ահազանգ էր ստացվել մեր թերթի խմբագրություն, որի հետքերով էլ երեկ գնացինք։ Մեր այցելության պահին մանկապարտեզի տնօրեն Աննա Սարգսյանը պատրաստվում էր դուրս գալ, սակայն տեղեկանալով, որ «Հայկական ժամանակ»–ից ենք, սիրով համաձայնեց զրուցել մեզ հետ։ Բայց իրավիճակը կտրուկ փոխվեց, երբ իմացավ մեր այցելության դրդապատճառը։ Նա նախ հետաքրքրվեց, թե ով է ահազանգողը, այնուհետև, այդ մասին ոչինչ չիմանալով, ոչ ավելի, ոչ պակաս հայտարարեց՝ «Մենք փաստաբանի ներկայությամբ կխոսենք»։ «Ես հիմա շտապում եմ Երևան, ցանկալի կլինի վաղը, երևի թե։ Ես չգիտեմ դրա հեղինակը ով է։ Դուք էդպես արագ արձագանքում եք, հա՞, էդ նամակներին։ Եթե դուք էդպես արձագանքում եք, ինչ ես տնօրեն եմ աշխատում, մեր տարածքի հետ կապված խնդիր ունենք։ Ես բազմիցս ահազանգել եմ, ինչո՞ւ նման արձագանք չի եղել։ Ինչևիցե, ես ուշանում եմ, ինձ ներող կլինեք, պատեհ առիթի դեպքում համեցեք կզրուցենք»,– մեզ հանդիմանեց ու հրաժեշտ տվեց Աննա Սարգսյանը։ Իսկ ահա մասաիսի քաղաքապետարանում  վստահեցնում էին, որ  թիվ մեկ մանկապարտեզի տնօրենի  կենսագրության` վերը նշված  դրվագի մասին  իրենք ոչինչ  չգիտեն: Այս մասին էր պնդում  քաղաքապետ  Դմիտրի  Նազարյանը, նույնն  էր հայտարարում նաև  քաղաքապետարանի  կրթության և  սպորտի  բաժնի  պետ  Պավել  Աթանյանը…

Արաբկիրի նախկին թաղապետ Հովհաննես Շահինյանը երեկ Արաբկիրի դատարանում վկայություն է տվել իր քրոջ որդու` Արսեն Ահարոնյանի, նրա ընկերոջ` Պետրոս Գրիգորյանի և վերջերս ձերբակալված Վռամ Բաղդասարյանի գործով դատաքննության շրջանակներում:

Դատարանի դահլիճից դուրս գալուց հետո «ՉԻ» թղթակիցը զրուցել է Շահինյանի հետ և հետաքրքրվել, թե չի՞ պատրաստվում առաջադրվել Արաբկիր վարչական շրջանում` որպես պատգամավորի թեկնածու: Ի պատասխան` Շահինյանն ասել է, որ մտադրություն ունի առաջադրվելու թիվ 5 ընտրատարածքում: «Եթե իմ կուսակցությունն ու նրա նախագահը հարմար գտնեն` կառաջադրվեմ 5-րդ ընտրատարածքում մեծամասնական ընտրակարգով, եթե ոչ, ապա կլինեմ ՀՀԿ համամասնական ցուցակում և բոլորի նման ու բոլորի հետ միասին կաշխատեմ մեր ցուցակի համար»,- ասել է Շահինյանը:

«ՉԻ»-ն հիշեցնում է, որ թիվ 5 ընտրատարածքից մեծամասնական ընտրակարգով այս խորհրդարանում պատգամավոր է «նշանակվել» ՀՀԿ-ական Լևոն Սարգսյանը` Ալրաղացի Լյովը:

«Եթե Հայաստանը, Վրաստանը, Ադրբեջանը, Թուրքիան, Ուկրաինան դառնան Եվրոպական միության անդամ, ԵՄ-ն կդառնա ավելի վատը: Կդառնա Եվրոպայի խորհրդի  նման, որտեղ կան բազմաթիվ ազգեր, ներկայացված են բազմաթիվ  երկրներ, բայց, ցավոք, չկա իսկական համագործակցություն: Եթե հանկարծ ստացվի այնպես, որ նշած երկրները դառնան ԵՄ անդամ, հույս ունեմ, որ Գերմանիան, Ֆրանսիան, Չեխիան  և  միության իրական այլ անդամները  կստեղծեն  նոր Եվրոպական  միություն»,- «Առավոտին» տված բացառիկ հարցազրույցում, խոսելով  ԵՄ-ի «Արևելյան  գործընկերության» ծրագրում ներգրավված երկրների`ԵՄ-ին անդամակցելու հնարավոր հեռանկարների մասին, կարծիք է հայտնել չեխ փորձագետ, Միջազգային հարաբերությունների ասոցիացիայի  խորհրդի անդամ Վացլավ Նեկվապիլը:

Հարցազրուցավարի դիտարկմանը` այդ դեպքում մի տեսակ անհեթեթ չե՞ն ստացվում «Արևելյան գործընկերության» ծրագրերը, փորձագետը արձագանքել է. «Այս ծրագրերը, ընդհանրապես, ուղղված չեն ԵՄ անդամ դառնալուն, դրանց նպատակը կայուն և կանխատեսելի հարևաններ ունենալն է, որտեղ պատերազմի վտանգ չի լինի: Այս ծրագրերի շրջանակներում համագործակցող պետություններին պաշտոնապես ասվել է, որ սրանք անդամության նախապատրաստման ծրագրեր չեն: Այս ծրագրերով, եթե, իհարկե, տվյալ պետությունները և քաղաքացիները ցանկություն ունեն, կդառնան եվրոպացի, բայց ոչ երբեք` ԵՄ անդամ»…

«Ժամանակ» օրաթերթը զրուցել է Բրյուսելում գործող Եվրոպական քաղաքականության կենտրոնի (European Policy Centre) քաղաքագետ Ամանդա Փոլի հետ: Ներկայացնում ենք զրույցից մի հատված:

Տիկին Փոլ, ինչպե՞ս եք գնահատում Դովիլում Ռուսաստանի, Ֆրանսիայի և ԱՄՆ նախագահների հայտարարությունը Լեռնային Ղարաբաղի խնդրի կարգավորման առնչությամբ:

Կարծում եմ` դա շատ կարևոր հայտարարություն է, հավանաբար վերջերս արված հայտարարություններից ամենաբեկումնայինը` նաև այն պատճառով, որ արվել է հենց նախագահների կողմից, ինչը խորհրդանշական է և ցույց է տալիս Լեռնային Ղարաբաղի հարցի լուծման կարևորությունը:

Ինչո՞ւ եք հայտարարությունը բեկումնային համարում:

Բեկումնային է, որովհետև Օբամայի և մյուս երկու նախագահների կողմից միասնական հայտարարություն վաղուց չէր արվել… Կարևոր է նաև հայտարարություն անելու ժամանակը, որովհետև մենք հիմա թևակոխում ենք նախընտրական փուլ, ուստի ես կարծում եմ` հիանալի ժամանակ է հենց հիմա հիմնարար սկզբունքների շուրջ համաձայնության գալու և հաջորդ փուլ թևակոխելու համար:

Որքանո՞վ արդյունավետ կարող է լինել Ռուսաստանի միջնորդությամբ Հայաստանի և Ադրբեջանի նախագահների առաջիկա հանդիպումը Կազանում:

Երանի ասեի՝ այո, բայց այսքան ժամանակ այս գործընթացին հետևելով՝ ես միայն վերապահումներով լավատես կարող եմ լինել… Ես շատ կասկածում եմ, որ կողմերը կհանգեն որևէ համաձայնության սկզբունքների կետերի շուրջ, բայց համոզված եմ, որ որոշ առաջընթաց հաստատ կլինի այդ հանդիպման արդյունքում:

Ստացվում է` լիահո՞ւյս եք, որ կողմերը պատրաստ են հիմնարար սկզբունքների շուրջ համաձայնության հասնելու համար:

Շատ դժվար է այդ հարցին պատասխանելը, քանի որ երբ կողմերին

«Ստիպված եմ հիշեցնել, որ 1998-2007 թթ. Հայաստանի Հանրապետությունում ոչ մի քաղբանտարկյալ չի եղել»,- հայտարարել է Ռոբերտ Քոչարյանի գրասենյակի ղեկավար Վիկտոր Սողոմոնյանը։

«ՉԻ»-ն հակադարձում է. «Հին աշխարհի իմաստուններն ասում էին. «Իմ լեզուն իմ թշնամին է», և փաստորեն ճիշտ էին ասում։ Բանն այն է, որ Վիկտոր Սողոմոնյանի վերոհիշյալ հայտարարությունն ուղղակիորեն նշանակում է, որ 2007-ից հետո Հայաստանում եղե´լ են քաղբանտարկյալներ (հակառակ դեպքում ինչո՞ւ պիտի ասեր, որ մինչև 2007-ը չեն եղել)։ Բայց մյուս կողմից էլ բոլոր այն քաղբանտարկյալները, ովքեր Սերժ Սարգսյանի օրոք բանտերում էին, կալանավորվել են կամ մինչև 2008 թ. մարտի 1-ը, կամ դրան հաջորդած մի քանի օրերին, այսինքն՝ Ռոբերտ Քոչարյանի իշխանության օրոք։ Պարզ ասած՝ քաղբանտարկյալների առկայության թիվ մեկ պատասխանատուն հենց Ռոբերտ Քոչարյանն է։ Եվ այնուամենայնիվ՝ ակնհայտ առաջընթաց է, որ Քոչարյանի գրասենյակը վերջին երեք տարիներին Հայաստանի բանտերում գտնվող ընդդիմադիրներին ճանաչում է որպես քաղբանտարկյալ։ Պարզապես հետաքրքիր է՝ ինչո՞ւ ավելի վաղ չէր անում դա։ Ըստ երևույթին, ապագայի որոշ կանխատեսումներ ստիպում են նրան ավելի գորովանքով խոսել քաղբանտարկյալի կարգավիճակի մասին»։

«Մինչև բարեհաճում են գալ` բանը բանից անցած է լինում»

Երեկ «Նուբարաշեն» ՔԿՀ-ում 53 տարեկան հասակում մահացել է բանտարկյալ Գագիկ Սաֆարյանը, տեղեկացնում է «Չորրորդ ինքնիշխանություն» օրաթերթը և ներկայացնում «Նուբարաշեն» ՔԿՀ-ի աշխատակիցներից մեկի պատմածը դեպքի մասին: Աշխատակցի անունը օրաթերթը չի հրապարակել:

«Այստեղ շտապօգնությունը գրեթե չի արձագանքում կանչերին: Բժիշկ կանչելն իսկական պատմություն է դառնում: Մինչև բարեհաճում են գալ` բանը բանից անցած է լինում: Անգամ գալու դեպքում միայն մի բան են անում` ցավազրկում են. էն էլ երկար պետք է համոզես, որ մարդն իսկապես վատ է զգում: Մահացողն իրեն երեկվանից վատ էր զգում, մինչև հասկացան, որ մարդն իսկապես վատ է, մինչև եկան-տարան, մահացավ»:

Շաբաթ օրը կայացած ՌԴ-ՀՀ ֆուտբոլային հանդիպումից առաջ կտրուկ վատացել է մեր թիմի ավագ Սարգիս Հովսեփյանի առողջական վիճակը. նա սննդային ծանր թունավորում է ստացել և նախորդ գիշերն անցկացրել է բժիշկների հսկողության տակ, գրում է «ՀԺ»-ն: Ծանր գիշեր անցկացրած Հովսեփյանը արթնացել է հանդիպումից մոտ չորս ժամ առաջ, արագ ճաշել ու հայտարարել, թե լիովին պատրաստ է խաղին: Սակայն պարզվել է, որ նա արդեն դուրս է մնացել հայտացուցակից:

Ըստ թերթի տեղեկությունների, 38-ամյա Սարգիս Հովսեփյանը հուզված և լացակումած դիմել է մարզչին` խնդրելով հնարավոր ամեն ինչ անել իրեն մեկնարկային կազմում ընդգրկելու համար: «Ես պիտի խաղամ, կարող եմ»,- վստահ ասել է մեր թիմի ավագը: ՈՒԵՖԱ-ի հետ բանակցություններից հետո հնարավոր է եղել փոխել հայտացուցակը, ու Սարգիս Հովսեփյանը 120-րդ հանդիպումն է անցկացրել Հայաստանի հավաքականի կազմում:

Խուսափում են երկխոսել, որ հանկարծ «չփլուզվեն»

Երբ մայիսի 31-ի հանրահավաքից 1 օր անց ԱԺ նախագահ Հովիկ Աբրահամյանը հայտարարեց, թե Սերժ Սարգսյանը ընդդիմության հետ կմտնի երկխոսության մեջ, իշխանական շրջանակներում դա ընդունվեց որպես պարտվողականության դրսևորում, գրում է «Հայկական ժամանակը»:

Նման գնահատականի պատճառն այն է, որ մինչ այդ ընդդիմությունը հայտարարել էր, թե երկխոսության օրակարգում տեսնում է միայն արտահերթ նախագահական և խորհրդարանական ընտրությունների հարցը: Եվ արդեն ուրբաթ օրը Հայ ազգային կոնգրեսի կողմից իշխանությունների հետ բանակցող պատվիրակության կազմի ձևավորումը և այդ կազմի հրապարակայնացումը իշխանական որոշակի շրջանակներում գնահատվել է որպես իշխանափոխության արագընթաց գործընթացի մեկնարկ: Այսօրինակ տրամադրությունների մասին ահազանգերը արագ զեկուցվել են Սերժ Սարգսյանին, և վերջինիս վերլուծական թիմը հանգել է եզրակացության, որ երկխոսության հնարավորությանը իշխանության պոզիտիվ արձագանքը կարող է փլուզումներ հարուցել իշխանության ներսում: Ըստ այդմ, Սերժ Սարգսյանի թիմը որոշել է երկխոսությանն առայժմ ցուցաբերել «ցրողական» վերաբերմունք», գրում է թերթը:

Սերժ Սարգսյանի` կոռուպցիայի դեմ նախընտրական պայքարը շարունակվելու է նաև բանակում, գրում է «Հրապարակ» օրաթերթը:

Պաշտպանության նախարարությանը մոտ կանգնած թերթի աղբյուրների փոխանցմամբ` առաջիկայում պաշտոնանկ կլինեն մի շարք բարձրաստիճան զինվորականներ և գեներալներ: Առայժմ հայտնի է ՊՆ ինժեներական զորքերի պետ, գեներալ Ոստանիկ Ադոյանի անունը: «Փուռն» են տալու մանր-մունր «չեպեներ» ունեցողներին, իսկ հիմնական կոռուպցիոներները կշարունակեն պաշտոնավարել: Թերթի աղբյուրների փոխանցմամբ` այս պաշտոնանկություններն  իրարանցում են առաջացրել ոլորտում, բարձր պաշտոնների  հավակնություն ունեցողներն արդեն սկսել են ինքնառաջադրվել: