Թերթը գրում  է, որ Թռչկանի ջրվեժի մոտ ծանր տեխնիկա է բերվել: Բնապահպանության նախարար Արամ Հարությունյանի մամլո քարտուղար Հասմիկ Մկրտչյանը «Ժամանակի» հետ զրույցում հաստատեց այս տեղեկությունը` ավելացնելով. «Տվյալ շահագործողը` «Ռոբին-շինը», արդեն ունի բոլոր փաստաթղթերը աշխատանքներ իրականացնելու համար: Վերջերս էլ նախարարն այցելել է Թռչկան, ուսումնասիրել եւ եկել այն եզրահանգման, որ ամեն դեպքում բնության այդ հրաշքը պետք է պահպանվի: Այսինքն` ՀԷԿ-ը կկառուցվի, բայց չպետք է վնասի ջրվեժին: Արդյունքում ջրվեժից պետք է վերցվի ավելորդ ջուրջ: Խիստ հսկողություն է սահմանվելու  տվյալ դեպքում եւ ամառային սեզոնին, երբ ջուրը քչանում է, ՀԷԿ-ը չի աշխատելու: Միայն  կաշխատի այն դեպքում, երբ ջուրը սեզոնի հետ կապված կավելանա, եւ կազմակերպությունը ավել ջուրը կվերցնի շահագործելու համար»:

Թերթը գրում է, որ գործող նախարարներն աջուձախ բողոքում են, թե իրենք լիովին զրկված են աշխատելու, իրենց ղեկավարած ոլորտում ինչ-որ բան անելու հնարավորությունից: «Բոլոր հարցերը վճռում են կամ իրենց նշանակած կուսակցությունների ղեկավարները, կամ վարչապետը: Իրենց գլխավորած նախարարություններում իրենք անգամ մի գլխավոր մասնագետ չեն կարող նշանակել՝ առանց կուսղեկավարի կամ վարչապետի: Թերեւս դա է նաեւ պատճառը, որ նրանց մեծ մասին բացառապես հետաքրքրում է, թե ինչքան փող է հնարավոր աշխատել իրենց պաշտոնավարման ընթացքում: Մանավանդ` վստահ են, որ դա երկար չի տեւելու»,-  գրում է  «Հրապարակ»-ը:

Գեղարքունիքի մարզպետարանից թերթը տեղեկացել է, որ Սևանի Մեսրոպ Մաշտոցի անվան թիվ 1 հիմական դպրոցի տնօրեն Մարիետտա Միրզոյանը մեղադրվում է ՄԱԿ-ի Պարենի համաշխարհային ծրագրի «Դպրոցական սնունդ» ծրագրով 1-4-րդ դասարանների աշակերտներին տրամադրված պարենամթերքից ալյուրի որոշակի քանակություն վաճառելու մեջ: Դեպքի առիթով նախապատրաստվում են նյութեր: Գեղարքունիքի մարզպետի մոտ քննարկվել է այդ խնդիրը: Ըստ մարզպետարանի, եթե իրավապահ մարմինները հիմնավորեն, որ հավաքած նյութերում առկա փաստերը համապատասխանում են իրականությանը, ապա Գեղարքունիքի մարզպետի որոշմամբ Սևանի թիվ 1 հիմնական դպրոցի տնօրենը կազատվի զբաղեցրած պաշտոնից: Իսկ մնացած խնդիրներով կզբաղվեն իրավապահ մարմինները:

Թերթը գրում է, որ իր տեղեկություններով` օրերս Մյասնիկյան պողոտայում վնասազերծված բանդայի հերթական թիրախը եղել է Առողջության պահպանման եւ ընտանիքի պլանավորման կենտրոնի վերարտադրողականության բաժնի ղեկավար, դոցենտ Գեորգի Պողոսյանի եւ դերասանուհի Լուիզա Ղամբարյանի՝ Այգեստանում գտնվող առանձնատունը:

«Սակայն հանցագործներին չի հաջողվել իրականացնել իրենց մտադրությունը: Գեորգի Կիմիչը մեզ ասաց, որ ինքն էլ է լսել նման բան, սակայն թիրախը, ըստ բժշկի, ոչ թե իր տունն է եղել, այլ ուրիշի:

«Հանցագործները գիտեին, որ իմ տան վրա գրոհեին, ռիսկն ավելի շատ էր, փողը՝ քիչ, համարյա»,- գրում է «Հրապարակ»-ը:

Թերթը գրում է, որ Ախթալայի լեռնահարստացման կոմբինատի սեփականատեր, մանկապղծության մեջ մեղադրվող Սերոբ Տեր-Պողոսյանը  դատական վերջին նիստի ընթացքում, ի հեճուկս տարածված լուրերի, իրեն մեղավոր չի ճանաչել եւ մեղադրանքը չի ընդունել:

«Այս մասին մեր թղթակցին ասել է Տեր-Պողոսյանի պաշտպան Գիվի Հովհաննիսյանը, նշելով, որ պաշպանական կողմի կարծիքով, վերաորակված մեղադրանքը (ՀՀ ՔՕ 139 հոդվածի 2-րդ, 3-րդ մասեր), որ նախատեսում է 8-15 տարվա ազատազրկում, ապօրինի է: Նախնական մեղադրանքով (ՔՕ 141 հոդված) սահմանվում է տուգանքից մինչեւ 2 տարվա ազատազրկում, եւ հնարավոր էր Տեր-Պողոսյանի նկատմամբ համաներման կիրառում»,- գրում է «Հայկական ժամանակ»-ը:

Թերթը գրում է, որ Անժելա Սարգսյանի «տղամարդը» լրջագույն խնդիրների առջեւ է կանգնել հանցագործ աշխարհում: «Մեր աղբյուրները հայտնում են, որ մինչեւ 2011թ. հոկտեմբերի 7-ին խափանման միջոց ընտրվելը, Կարեն Արեյանին հանդիպել են քրեական հեղինակություններ եւ բացատրություն պահանջել իր արարքի համար:

Հիշեցնենք, որ վերջինս լրատվամիջոցներից մեկին տված հարցազրույցում ասել էր, որ իր եւ Անժելա Սարգսյանի պոռնոգրաֆիկ նկարները մի քանի վայրկյանով տեղադրել է ինտերնետում, որպեսզի անազատության մեջ գտնվող իր ընկերները, որոնց Անժելա Սարգսյանն իբր ասել է, թե Կարենը բռնաբարել է իրեն, հավատան, որ նման բան տեղի չի ունեցել, եւ իր ու Անժելա Սարգսյանի կապը եղել է փոխադարձ համաձայնությամբ:

Լինելով նախկինում «օրենքով գող» Շուրայի որդին՝ Կարեն Արեյանը մինչեւ վերջերս մտադիր է եղել ապրել «հանցագործ» կյանքով, ինչը ենթադրում է կենսակերպի հատուկ կանոններ, որոնք եւ խախտվել են այս միջադեպով: Կարեն Արեյանի խնդիրներն ավելի են շատացել «Նուբարաշեն» քրեակատարողական հիմնարկում, որտեղ նա պահվում է՝ մեղադրվելով ՀՀ Քրեական օրենսգրքի 144 (անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը) եւ 263 (պոռնոգրաֆիկ նյութեր կամ առարկաներ ապօրինի տարածելը) հոդվածների հատկանիշներով»,- գրում է «Ժամանակ»-ը:

Որոշ տեղեկությունների համաձայն՝ Հայ ազգային կոնգրեսն առաջիկա խորհրդարանական ընտրություններում պատրաստվում է բոլոր մեծամասնական ընտրատարածքներում առաջադրել իր թեկնածուներին և պայքարել հանրապետականների օլիգարխ թեկնածուների դեմ։ ՀԱԿ քաղխորհրդի անդամ Նիկոլ Փաշինյանից թերթը հետաքրքրվել է, թե ճի՞շտ է արդյոք այդ տեղեկությունը, քննարկե՞լ են այդ հարցը, և եթե այո, ապա ովքե՞ր են այդ թեկնածուները։ «Հայ ազգային կոնգրեսում նման հարց չի քննարկվել, որովհետև այսօր ուրիշ ունենք օրակարգում»,- ասել է Փաշինյանը և, տեղեկանալով, որ խոսքն առավել ևս հերթական ընտրությունների մասին է, հավելել է. «Չգիտեմ այդ լուրերը որտեղից են ծնվում, բայց ես ձեզ կարող եմ երաշխավորել, և դուք կարող եք հաստատ համոզված լինել, որ նման քննարկում չի եղել»։

Այսօր մեր բոլորիս հայացքները, միտքն ու հոգիները ուղղված են լինելու Դուբլին, որտեղ մի քանի ժամ անց խաղադաշտ է դուրս գալու Հայաստանի ազգային հավաքականը: Մեր տղաները հյուրընկալվելով Իռլանդիայի հավաքականին, «Եվրո-2012»-ի նախընտրական մրցաշարի վերջին տուրում պայքարելու են Բ ենթախմբում երկրորդ տեղը գրավելու համար: Երկրորդ տեղը գրաված թիմը հնարավորություն կստանա անցումային երկու խաղ անցկացնել մեկ այլ ենթախմբում երկրորդ տեղ գրաված հավաքականի հետ և այդ անցումային խաղերում վիճարկել «Եվրո-2012»-ի ուղեգիրը:

Հայաստանի հավաքականի համար արդեն իսկ աննախադեպ և անսպասելի հաջողություն է պայքարել խմբում երկրորդ տեղը գրավելու և անցումային փուլի ուղեգիր նվաճելու համար: Մեր տղաներին այդ խնդիրը լուծելու համար անհրաժեշտ է անպայման հաղթել Իռլանդիայի հավաքականին: Իռլանդացիներին բավարար է ոչ-ոքին, և նրանք կպահպանեն իրենց ներկայիս երկրորդ տեղը: Հիշեցնենք, որ մեր ենթախմբում առաջինը ռուսներն են, որոնք ամենայն հավանականությամբ կպահպանեն այդ տեղը` այսօր հաղթելով Անդորրային:

Հայաստանի հավաքականը բոլորիս համար անակնկալ կերպով հիանալի նախընտրական մրցաշար անցկացրեց և նույնիսկ որոշակի դասավորության դեպքում նախավերջին տուրից առաջ պահպանում էր նաև առաջին տեղի շանսը: Սակայն, անկախ դրանից, անկախ անգամ այսօր Իռլանդիայի հավաքականի հետ տեղի ունենալիք հանդիպման ելքից, մենք պետք է արձանագրենք, որ Հայաստանի հավաքականն իսկապես տպավորիչ, գեղեցիկ նախընտրական մրցաշար անցկացրեց` ուրախության և հպարտության բազմաթիվ պահեր պարգևելով հայ ֆուտբոլասերին: Հայաստանի հավաքականի տղաները ցույց տվեցին, որ իրենք են Հայաստանը, այն Հայաստանը, որ հավատով, համատեղ աշխատանքով, համառությամբ և նվիրվածությամբ պայքարում և հասնում է ցանկալի արդյունքի:

Պարզապես հիանալի ընթացքի փայլուն եզրափակում կլինի Իռլանդիայի հավաքականի հանդեպ հաղթանակը, որին հավատում և սպասում ենք բոլորս` վստահ, որ այդ հաղթանակի համար մեր հավաքականի տղաները կներդնեն իրենց ամբողջ հոգեբանական, ֆիզիկական և տեխնիկա-տակտիկական կարողությունները: Անգամ եթե մեզ վիճակված չէ հաղթահարել անցումային փուլը, ինչը, սակայն, մեր ներկայիս հավաքականի ուժերից ամենևին էլ վեր չէ, քանի որ մեր տղաները ցուցադրում են իսկապես բարձր մակարդակի էներգետիկ ֆուտբոլ, այնուհանդերձ թեկուզ անցումային փուլում հայտնվելն իսկ մեծագույն հաջողություն կլինի մեր երիտասարդ և հեռանկարային թիմի համար: Եվ ուրեմն, մենք բոլորս այսօր մեր ամբողջ մտքով և հոգով Իռլանդիայում ենք` սպասելով հաղթանակի:

Եթե ստացվի, մենք կլինենք գրեթե երջանիկ, իսկ եթե ոչ, ապա մենք իհարկե կտխրենք, կտխրենք այն պարզ պատճառով, որ եթե մեր ենթախմբում կար մի թիմ, որն իր ցուցադրած խաղով արժանի է «Եվրո-2012»-ի ուղեգրի, դա Հայաստանի հավաքականն է: Բայց, տխրելով էլ մենք, միևնույն է, շնորհակալություն կհայտնենք մեր հավաքականի բոլոր ֆուտբոլիստներին և մարզիչներին, այն հիանալի ամիսների, ժամերի և պահերի համար, որ մենք ունեցանք «Եվրո-2012»-ի ընտրական մրցաշարում` վերապրելով երկրպագուների համար այնքան թանկ և ջերմ բերկրանքը, որ մոռացել էինք արդեն տարիներ շարունակ:

Մենք ի սրտե հաջողություն և հաղթանակ ենք մաղթում մեր ֆուտբոլիստներին Իռլանդիայի հետ այսօր տեղի ունենալիք խաղում, սպասում և հավատում ենք այդ հաղթանակին ու հավատում ենք, որ առնվազն հաջողությունն այսօր մեր տղաների կողմն է լինելու, որովհետև նրանք լիովին վաստակել են վճռորոշ պահին հաջողությունը վայելելու իրավունքը: Մնացյալն արդեն տղաներն իրենք կանեն. հաղթանակ, Հայաստան:

Թերթը գրում է, որ վաղվանից մինչե հեկտեմբերի 21-ը Հայաստանի ողջ տարածքում կանցկացվի մարդահամար: «Մեր տեղեկություններով, իշխանությունները որոշել են, անկախ մարդահամարի արդյունքներից, ՀՀ բնակչության թիվը հայտարարել  3 մլն եւ ավելի: ԱՎԾ-ի պաշտոնական տվյալներով, ՀՀ-ում առկա բնակչության թիվը 2008-ին 3 միլիոնից մի փոքր պակաս է եղել, իսկ 2009-ին դարձել է 3 մլն 35 հազար: Մինչդեռ, նույնիսկ պաշտոնական տվյալներով 2008-ին եւ դրանից հետո Հայաստանից մի քանի տասնյակ հազար մարդ է արտագաղթել»,- գրում է «Հայակական ժամանակ»-ը:

Թերթը գրում  է, որ  շաբաթ օրը «Ֆլորենց» ռեստորանային համալիրում կայացել է Երգի պետական թատրոնի ղեկավար, երգահան Արթուր Գրիգորյանի դստեր հարսանիքը։

«Հարսանիքին ներկա են եղել գրեթե բոլոր երգիչ-երգչուհիները, ասել է թե՝ Գրիգորիչի նախկին  եւ ներկա սաները։ Տարօրինակ է, բայց հարսանիքին չեն մասնակցել պալատական երգչի համբավ ունեցող Հայկոն եւ նրա երգչուհի կինը՝ Անահիտ Սիմոնյանը. ի դեպ՝ նրանք եւս համարվում են Գրիգի սաները։ Կենդանի երաժշտությունը ապահովել են հարսանիքին հրավիրված տեղական շոու բիզնեսի աստղերը՝ երգելով երկու-երեքական երգ»,- գրում է  «Չորրորդ ինքնիշխանություն»-ը: