Թերթը գրում է, որ Հովիկ Աբրահամյանին շտաբի պետի պաշտոնը առաջարկվել էր դեռ ամիսներ առաջ, սակայն, թերթի տեղեկություններով, Աբրահամյանը չէր համաձայնել միանգամից գնալ շտաբ՝ փորձելով ճշտել, թե դրա դիմաց իրեն ի՞նչ է առաջարկվելու։

«Եվ ահա, մեր տեղեկություններով, այդ «բազարն» ավարտվել է նրանով, որ եթե ՀՀԿ-ն կարողանա քաղաքական մեծամասնություն ձեւավորել խորհրդարանում, ապա վարչապետի պաշտոնը Սերժ Սարգսյանը վստահելու է հենց Հովիկ Աբրահամյանին»,- գրում է «Չորրորդ ինքնիշխանություն»-ը։

«Առավոտ» օրաթերթը գրում է. ««Առավոտի» հետ բացառիկ զրույցում ԱԺ նախագահի խորհրդական Ալբերտ Հերոյանին խնդրեցինք մեկական նախադասությամբ բնութագրել մեր երկրի աոաջին, երկրորդ և այսօր գործող նախագահներին, «Ես չեմ կարող ինձ կեղծել. մենք շատ բան ենք կորցրել, շատ-շատ բան ենք կորցրել աոաջին նախագահի ժամանակահատվածում (ի պատասխան մեր դիտարկման, թե նաեւ գտել ենք` Ղարաբաղը, պարոն Հերոյանը ասաց. «Ղարաբաղը ժողովրդական հաղթանակ էր»,– Մ.Ե.), իմ եղբայրն էլ լինի, ես պիտի ճիշտը ասեմ։ Երկրորդի ժամանակ եղել եմ մարզպետ, եւ, ասեմ Ձեզ, ինչ ծրագրեր մարզում եղել են, ես կարողացել եմ իր միջոցով կարգավորել: Իսկ ինչ վերաբերում է այսօրվա նախագահին, սիրուն չի լինի, որ ես ճիշտը չասեմ, ես նրան սիրում եմ, սիրում եմ նրա համար, որ ինքը դիվանագիտական խնդիրներով ոչ մեկի հետ չի համեմատվի, ինքը ինձ համար անփոխարինելի մարդ է` որպես նախագահ, չորրորդը էլի ինքը կլինի, հետո հինգերորդը կգա. կասեմ, թե լավը որն է, վատը որն է»»։

Թերթը գրում է, որ ԱԺ պատգամավոր Վահե Էնֆիաջյանը նամակներ է գրել պետական բուհերի ռեկտորներին եւ խնդրել ներկայացնել սոցիալապես անապահով եւ բարձր առաջադիմություն ունեցող ուսանողների ցանկը, որոնց «Գագիկ Ծառուկյան» բարեգործական հիմնադրամը տալու է անվանական կրթաթոշակ: «Սակայն բուհերի ռեկտորները չեն շտապում պատասխանել  Էնֆիաջյանին: Մեր տեղեկություններով`կրթության եւ գիտության նախարարությունից ռեկտորներին հասկացրել են, որ եթե «Գագիկ Ծառուկյան» բարեգործական հիմնադրամը ցանկանում է անվանական կրթաթոշակ տալ ուսանողներին, պետք է դիմի նախարարությանը, քանի որ այդպես է կարգը: Բայց երեւի ԲՀԿ-ական պատգամավորը չի ցանկանում դիմել ՀՀԿ-ական նախարարին»,- գրում է «Հրապարակ»-ը:

Թերթը գրում է, որ երեկ տարածվեց հերթական հրաժարականի մասին տեղեկությունը, որը, սակայն, դեռ պաշտոնապես չի հաստատվել: «Իշխանական շրջանակներից արտահոսք եղավ, որ հրաժարական է տվել քրեակատարողական վարչության պետ Հայկ Հարությունյանը: ՀՀ նախկին ոստիկանապետը, ըստ նույն աղբյուրների, պետք է նշանակվի Գեղարքունիքի մարզպետ:  ՀՀ մի շարք մարզպետների պաշտոնանկությունների շարքում նշվում է նաեւ ԲՀԿ-ական երկու մարզպետների` Գեղարքունիքի մարզպետ Նվեր Պողոսյանի եւ Վայոց ձորի մարզպետ Սերգեյ Բագրատյանի անունները:

Արդարադատության նախարարի մամուլի խոսնակ Կարինե Քալանթարյանը Հայկ Հարությունյանի հրաժարականի լուրը ճշտելու համար առաջարկել է դիմել Սերժ Սարգսյանի խոսնակին: Վերջինս թերթի զանգերին չի պատասխանել, փոխարենը ՔԿՎ խոսնակ Գոռ Ղլեչյանը հերքել է լուրը:

Ըստ որոշ տեղեկությունների` հրաժարականների հաջորդ խմբաքանակի մասին հայտարարվելու է մի փոքր ուշ»,- գրում է «Հայկական ժամանակ»-ը:

«ՉԻ» տեղեկություններով` առաջիկայում Հայաստանում օլիգարխի համարում ունեցող ԱԺ ՀՀԿ-ական պատգամավոր Լևոն Սարգսյանը` Ալրաղացի Լյովը, պատրաստվում է լքել հանրապետությունը: Շրջանառվող խոսակցությունների համաձայն` նա այս օրերին զբաղված է իր ունեցվածքի, մասնավորապես, Հայաստանում եղած անշարժ գույքի վաճառքով: Ավելացնենք, որ վերջերս մենք տեղեկացրել էինք, որ Լևոն Սարգսյանը բանկերից մեծ վարկեր է վերցրել, և հիմա որոշակի դժվարություններ են առաջացել այդ վարկերը փակելու հետ: Ամենայն հավանականությամբ, Սերժ Սարգսյանը դադարել է առաջվա պես սիրել Լևոն Սարգսյանին, իսկ սա նվազագույնը նշանակում է, որ գալիք խորհրդարանում Ալրաղացի Լյովն այլևս ներկայացված չի լինի: Ինչ վերաբերում է նրա` Հայաստանը լքելու խոսակցություններին, ապա, մեր տեղեկություններով, նա պատրաստվում է հանգրվանել եվրոպական որևէ երկրում:

Գործադիրում տեղի ունեցող հրաժարական-փոխատեղումների ցանկը, ըստ շրջանառվող լուրերի, մեծանում է: Խոսակցություններ են պտտվում, որ առաջիկայում հրաժարականի դիմումներ կներկայացնեն նաև ԲՀԿ-ական պատգամավորները և ԲՀԿ-ամետ մարզպետները: Այդ ցանկում շրջանառվում է նաև Սյունիքի մարզպետ Սուրեն Խաչատրյանի անունը:

Թերթի հետ զրույցում Սյունիքի մարզպետարանի տեղեկատվության և հասարակայնության կապերի բաժնի պետ Աշոտ Քարամյանն այսպես է արձագանքել թղթակցի հարցին. «Սյունիքի մարզպետը հրաժարականի դիմում չի ներկայացրել: Մարզպետարանը` մարզպետի գլխավորությամբ, շարունակում է իր աշխատանքային գործունեությունը: Այդ առթիվ լուրերը հորինված ու մտացածին են և իրականությանը չեն համապատասխանում»: Թղթակիցը նկատել է` «չի ներկայացրելը» դեռ չի նշանակում, որ այդ տարբերակը բացառվում է, մանավանդ, որ իրադարձությունների տրամաբանությունը միանգամայն հնարավոր է դարձնում նաև այդ հրաժարականը, Աշոտ Քարամյանը կտրուկ պատասխանել է. «Այդպիսի բան չկա»:

Թերթի տեղեկություններով` նորանշանակ ոստիկանապետ Վլադիմիր Գասպարյանը բավականին կոպիտ մեթոդաբանությամբ է սկսել իր պաշտոնավարումը: «Բանն այն է, որ նա եկել եւ կոլեգիայի նիստ է նշանակել այն ժամանակ, երբ Ալիկ Սարգսյանն անգամ դեռեւս հասցրած չի եղել հավաքել իր իրերը ոսդտիկանապետի աշխատասենյակից: Վլադիմիր Գասպարյանը ոստիկաններին սկսել է հանձնարարականներ տալ, իսկ Ալիկ Սարգսյանը իր իրերն է այդ ժամանակ հավաքելիս եղել: Գասպարյանն այդ հավաքին հայտարարել է, թե երեք տարի խոսել եք, հիմա եկել է գործ անելու ժամանակը: «Էլ չենք խոսելու, գործ ենք անելու»,- իր հանդիպման առաջին օրն իսկ ընդգծել է Գասպարյանը: Համաձայնեք, որ սա անհարգալից վերաբերմունք է առաջին հերթին նրանց հանդեպ, ում հետ շարունակելու է աշխատել Վլադիմիր Գասպարյանը, եւ երկրորդ բացահայտ արհամարհանք առ Ալիկ Սերգեյիչը: Ստացվում է, որ Գասպարյանը սկսել է փնովել իր նախորդին ճիշտ այն պահին, երբ նա պաշտոնանյության լուրից անակնկալի եկած` սեփական իրերն է հավաքելիս եղել»,- գրում է «Չորրորդ ինքնիշխանություն»-ը:

ՀՀ նախագահի աշխատակազմի ղեկավարի տեղակալ Միքայել Մինասյանի հրաժարականը եւ նախընտրական շտաբում ընդգրկվելու լուրն անսպասելի է եղել նաեւ ԱԺ նախագահ Հովիկ Աբրահամյանի համար, որը պատրաստվում է թողնել ներկա պաշտոնը եւ ղեկավարել ՀՀԿ նախընտրական շտաբը: Թերթը զրուցել է պարոն Աբրահամյանի հետ, ներկայացնենք զրույցից մի հատված.

Պարոն Աբրահամյան, տեսակետ կա, որ Միքայել Մինասյանը գալիս է Ձեզ վերահսկելու,եւ իրականում ինքն է ղեկավարելու շտաբը: Դուք դրան ո՞նց կվերաբերվեք:

Դե, դրանք հերյուրանքներ են: Ոչ մի բան չկա շտաբի ղեկավարին վերահսկելու: Ընդհանրապես իմ աշխատանքները միշտ թափանցիկ են եղել: Համարում եմ, որ դա իրականությանը չի համապատասխանում, ուղղակի հերյուրանքներ են: Ես համոզված եմ, որ Մինասյանը գալիս է լավ մտքով, օգնելու, աջակցելու, եւ մենք շատ ջերմ հարաբերությունների մեջ ենք, եւ ես առաջարկելու եմ իրեն լինել շտաբի ղեկավարի առաջին տեղակալ: Այսինքն ես ի՞նչ եմ անում, որ մտահոգություն ունենամ, որ որեւէ մեկը ցանկություն ունի ինձ վերահսկելու:

Այսինքն, մտահոգություն չունե՞ք, որ գալիս են Ձեզ վերահսկելու:

Դե, ժողովրդական խոսք կա` եթե դուք արդար եք, ինչի՞ եք մտահոգվում, որ գալիս են ձեզ վերահսկելու: Բայց ես համոզված եմ, որ պարոն Մինասյանը գալիս է ինձ օգնելու:

Պարոն Աբրահամյան, անգամ ասում են, որ հրաժարականից հետո ավելի շուտ միգուցե համալրեք ԲՀԿ շարքերը, քան աշխատեք Միքայել Մինասյանի աչալուրջ հսկողության ներքո:

Դե հիմա: Դուք ինչ ուզեք` կասք, ես իմ պատկերացումը, մոտեցումը Ձեզ ասեցի, ոչինչ չունեմ ավելացնելու:

Թերթի հարցին, թե արդյոք հնարավոր է, որ ընդդիմությունը հանրահավաք հրավիրի պաշտոնապես հայտարարված նոյեմբերի 25-ի հանրահավաքից ավելի շուտ, ՀԱԿ համակարգող Լեւոն Զուրաբյանը պատասխանել է. «Նման հարց դեռ չի քննարկվել»: