Թերթն իր խմբագրականում գրում է.

Քանի որ Հայ ազգային կոնգրեսը վերջնականապես խորացել է «ռեալպոլիտիկի» մեջ, ես, որպես հավելյալ քաղաքագիտական վերլուծություն, առաջարկում եմ հետևյալ նկատառումները։ Իրականում քաղբանտարկյալ են ոչ միայն Տիգրան Առաքելյանը և ի նշան ավազակապետության դեմ բողոքի նախագահական նստավայրի ցանկապատի վրա վրաերթ կատարած Վաչագան Իսոյանը, այլև՝ Մարգար Օհանյանն ու Հովիկ Թամամյանը։ Հոգու ամենախորքում ազնիվ ոստիկաններ լինելով՝ նրանք չէին դիմանում մոնղոլ-թաթարական բարքերին և պատրաստ էին միանալ համաժողովրդական շարժմանը։ Եվ երբ իշխանությանը դա հայտնի դարձավ, ազգի այդ նվիրյալների դեմ շինծու գործեր սարքվեցին և նրանց մեկուսացրին հասարակությունից։ Այժմ այս երկու սպաների բոլոր հարազատների և ընկերների սրբազան պարտքն է համախմբվել ՀԱԿ–շուրջ և հասնել այս քաղբանտարկյալների ազատ արձակմանը, որպեսզի նրանք, ազատություն ստանալով, իրենց լուման ներդնեն կոռուպցիայի դեմ պայքարում։

Անշուշտ, քաղաքական հետապնդումների զոհ է նաև Սյունիքի մարզպետ Սուրիկ Խաչատրյանը։ Իշխանության գործակալ Սիլվա Համբարձումյանը պարզապես սադրել է, որ այդ անթերի ջենտլմենը ձեռքերով և ոտքերով իր էությանը հակառակ շարժումներ անի։ Պարոն Խաչատրյանը դեռ ժամանակ ունի վերահաստատելու բյուրեղյա գործչի իր վարկը և համալրելու քրեաօլիգարխիկ ռեժիմի դեմ անխոնջ պայքարողների շարքերը։

Ընդդիմության պոտենցիալ դաշնակիցներ են նաև Հեռուստատեսության և ռադիոյի ազգային հանձնաժողովի անդամները՝ Գրիգոր Ամալյանի ղեկավարությամբ։ Հայ մտավորականության լավագույն ներկայացուցիչներ լինելով՝ նրանք ջանք ու եռանդ չեն խնայել Հայաստանում բազմակարծությունը և խոսքի ազատությունը հաստատելու համար։ Սակայն իշխանության սև PR–ի պատճառով տպավորություն է ստեղծվել, որ նրանք ինը տարի եթեր չեն թողնում «Ա1 +»–ը։ Վստահ եմ, որ եկել է ժամանակը, երբ այդ ազատամիտ և ինքնուրույն գործիչները կթոթափեն իրենց վրայից իշխանության կողմից խորամանկորեն ստեղծված կեղծ իմիջը և հրապարակավ կհայտարարեն համաժողովրդական շարժմանն իրենց աջակցության մասին։

Դե, իսկ օլիգարխների մասին, բնականաբար, խոսելն իսկ ավելորդ է։ Նրանք պարզապես երազում են, թե երբ է գալու այն պահը, երբ իրենք ստիպված չեն լինելու թաքցնել իրենց եկամուտները և մուծելու են օրենքով նախատեսված բոլոր հարկերը։ Խոշոր գործարարները տենչում են նաև օր առաջ ազատվել իրենց մենաշնորհային դիրքերից՝ հնարավորություն տալով բոլոր մնացած բիզնեսմեններին իրականացնել իրենց գործառույթների մեծ մասը։ Մնում է, որ նրանք բացեիբաց դուրս գան ավազակապետական ռեժիմի դեմ՝ ցույց տալով սեփական բնածին ազնվությունը։

Վստահ եմ, որ այս վերլուծությունը կմեծացնի ռեժիմի ներսում գոյություն ունեցող ճաքերը և կմոտեցնի սահմանադրական կարգի վերականգնման բաղձալի պահը։

Հնարավոր է՝ առաջիկայում որոշում կայացվի մանկապղծության համար 15 տարի ազատազրկման դատապարտված Սերոբ Տեր–Պողոսյանին քաղաքացիական հիվանդանոց տեղափոխելու մասին։ Նա տառապում է աղիքային անանցանելիությամբ։

Ինչպես երեկ մեր թղթակցին փոխանցել է Տեր-Պողոսյանի փաստաբան Գիվի Հովհաննիսյանը, «Երևան Կենտրոն» ՔԿՀ-ի բանտարկյալին հետազոտում են տեղի բժիշկները։ «Ստուգում են, թե ինչքանով է բարդացած։ Բժիշկների հետազոտությունից հետո պարզ կլինի՝ կտեղափոխե՞ն այլ հիվանդանոց, թե՝ ոչ։ Բայց խնդիրը լուրջ է, և այդ հետազոտությունից հետո մենք կխնդրենք՝ նրան այլ հիվանդանոց տեղափոխել»,– մեր թղթակցին ասել է փաստաբանը։ Նկատենք, որ դեկտեմբերի 17-ին լրանում է ժամկետը, երբ Սերոբ Տեր-Պողոսյանը կարող է բողոքարկել Լոռու մարզի ընդհանուր իրավասության դատարանի որոշումը՝ իրեն 15 տարվա ազատազրկման դատապարտելու մասին։ Փաստաբան Գիվի Հովհաննիսյանն ավելի վաղ ասել էր, որ իր պաշտպանյալի հետ խորհրդակցելուց հետո կասի՝ բողոքով դիմելո՞ւ են Վերաքննիչ դատարան, թե՝ ոչ։ Երեկ նա ասաց, որ որոշվել է առաջիկայում վերաքննիչ բողոք ներկայացնել։

ԱԳ նախարար Էդվարդ Նալբանդյանի հետ հանդիպումից հետո երեկ համանախագահները հրաժարվել են լրագրողների հարցերին պատասխանել: «Ես ընդամենը կես րոպե ունեմ, որ ձեզ ասեմ` մենք արդեն ուշանում ենք ձեր նախագահի հետ հադիպումից: Մենք այսօր արդեն հանդիպեցինք ձեր նախարարի հետ: Վաղը պատրաստվում ենք հատել սահմանը Ղարաբաղի վերևի մասից, իսկ վաղը չէ մյուս օրը կհանդիպենք նախագահ Ալիևի հետ»,- ասել է Ֆասիեն: Ապա ներկայացնելով Ֆորին` Ֆասիեն ընդգծել է, որ նա «չքնաղ մորուքավոր մարդ է», և իրենք միասին վաղուց արդեն աշխատել են, ինչը նշանակում է, որ դեսպան Ժակ Ֆորը շատ փորձառու մարդ է: