«ՉԻ» տեղեկություններով, ՀՀ նախկին վարչապետ Հրանտ Բագրատյանի էլեկտրոնային հասցեն ջարդելն ու նրա անունից կեղծ` 4-րդ նամակն ուղարկելը Սերժ Սարգսյանին, ուղղորդված է եղել ՀՀ ներկա վարչապետ Տիգրան Սարգսյանի շրջապատից: Շրջանառվող խոսակցությունների համաձայն` հանցագործներն ամեն ինչ հաշվարկել են` նախ, որ Բագրատյանը հանրապետությունում չէ, և հենց այդ պատճառով դժվար թե ցանկություն ունենա պատասխանելու լրագրողների զանգերին: Երկրորդ` նամակի ոճը հնարավորինս նմանեցված է եղել Բագրատյանի ոճին: Չարագործների հաշվարկով` ահագին կլինի արձագանքը, եթե հրապարակումը թեկուզ մեկ ժամ աշխատի: Նրանց նպատակն է եղել նամակի հրապարակումից կարճ ժամանակ անց այն տարածել ֆեյսբուք սոցիալական ցանցում, և մինչև Բագրատյանը գլխի կընկնի, որ պետր է հերքել, շատերն արդեն կարդացած կլինեն կեղծ նամակը:
Ի դեպ` ծրագիրը տապալվել է, որովհետև լրատվություն թողարկող կայքերից մեկը նախ տեսել է, որ նամակը լատինատառ վերնագիր ունի, մինչդեռ Բագրատյանը երբեք չի վերնագրում իր նամակները: Երկրորդ տեքստում հայտնվել են ինչ-որ անհասկանալի կոդեր, որոնց առկայությունն արդեն հիմնավորել է կասկածները: Ֆեյսբուքում շատ ավելի արագ է տարածվել ինֆորմացիան, որ դա Բագրատյանի նամակը չէ, քան հանցագործները կհասցնեին դա տարածել: Մի խոսքով, վարչապետի շրջապատում այդպիսի «ծրագրեր» իրականացնողները հիմա խոր դեպրեսիայի մեջ են, որովհետև նկատողության են ստացել Բագրատյանին սևացնելու գործը տապալելու համար:

«Հրապարակ».  Երեկ Ազատության հրապարակում կազմակերպված ՀԱԿ հանրահավաքին մասնակցում էր դերասան, երգիծական հեռուստահաղորդումներից բոլորին հայտնի Հովհաննես Ազոյանը` Հովոն: Նա նույնիսկ հարթակ բարձրացավ և ջերմ բարևեց Խաչատուր Սուքիասյանին: Ազոյանը երևի որոշել է փորձել ընդդիմադիրի փշոտ ու դժվարություններով լեցուն դերը: Օրեր առաջ նա այցելել էր նաև Մաշտոցի պուրակ: Իսկ հեռուստատեսությունում չեն սիրում ակտիվ և հատկապես ընդդիմադիր հայացքներ ունեցողներին:

«Հայկական ժամանակ». Ի՞նչ հակասություններ էին առաջացել «Ազատ դեմոկրատներ» կուսակցությունում, ինչպե՞ս ստացվեց, որ նորաստեղծ այդ կուսակցության հիմնադիրներից ՀՀՇ վարչության նախկին նախագահ Արարատ Զուրաբյանը և Գառնիկ Գևորգյանը չհայտնվեցին «Ժառանգության» և «Ազատ դեմոկրատների» միասնական համամասնական ցուցակում, ի՞նչ են մտածում Զուրաբյանն ու Գևորգյանը, և ինչու՞ են բոլորն այս ամենի մասին համառորեն լռում:
Ըստ խիստ հավաստի տեղեկությունների, մինչև վերջին պահը «Ժառանգության» ու «Ագատ դեմոկրատների» միջև բանակցություններ են ընթացել ընտրություններին դաշինքով մասնակցելու ձևաչափի շուրջ: «Ավելին, ինչպես մեզ հաջողվեց պարզել, անգամ դաշինքի անունն է քննարկվել: Տարբերակները երկուսն են եղել` «Նոր Հայաստան» կամ «Րաֆֆի+»: «Ազատ դեմոկրատների» ներկայացուցիչները միայն մամուլից են տեղեկացել, որ որոշվել է ընտրություններին մասնակցել «Ժառանգության» ցուցակով: Այսինքն, որոշումը կայացվել է բոլորովին այլ մակարդակում, և դրա մասին իմացել է ընդամենը մի քանի հոգի: «Ժառանգության» ներկայացուցիչները դեռ մի քանի օր առաջ իմացել են, որ «Ազատ դեմոկրատները» մտնելու են իրենց ցուցակ, բայց «Ազատ դեմոկրատների» վարչության անդամները և հիմնադիր ներկայացուցիչները տեղյակ չեն եղել: Միասնական ցուցակի հրապարակումից հետո «Ազատ դեմոկրատների» վարչության անդամները, ըստ հավաստի տեղեկությունների, բացատրություն են պահանջել կուսակցության նախագահ Խաչատուր Քոքոբելյանից: Եղել է մեծ վեճ: Ինչպես հայտնում են մեր աղբյուրները, մասնավորապես Արարատ Զուրաբյանը և Գառնիկ Գևորգյանը շատ կտրուկ են դրել հարցը, որ այդ ձևաչափով ընտրություններին մասնակցել չի կարելի, ավելի լավ է` միայնակ գնալ և արժանապատիվ պարտություն կրել, քան մտնել Րաֆֆու ցուցակ: Բայց երբ հասկացել են, որ որոշումը վերջնական է, ու որևէ բան հնարավոր չէ փոխել, պահանջել են իրենց անունները հանել միասնական ցուցակից` դա համարելով անպատվաբեր: «Ազատ դեմոկրատների» վարչությունն այժմ, ըստ էության, պարալիզացված է: Արարատ Զուրաբյանը և Գառնիկ Գևորգյանը, թերևս, կլքեն կուսակցությունը, ըստ էության, այլ տարբերակ չկա էլ: Այսինքն, նորաստեղծ այդ կուսակցությունն արդեն լուրջ ճաքեր է տվել»,- գրել է թերթը:

«Ժամանակ». Թերթը գրում է, որ թիվ 19 ընտրատարածքում մեծամասնական ընտրակարգով պատգամավորի թեկնածու առաջադրված Հակոբ Հակոբյանը պատրաստվում է դիմել վարչական դատարան` բողոքարկելու ՀՀԿ-ի կողմից նույն ընտրատարածքում առաջադրված գեներալ- մայոր Սեդրակ Սարոյանի` վերջին 5 տարում Հայաստանում մշտապես բնակվելու վերաբերյալ տրամադրված տեղեկանքի իսկությունը: « Այդ մասին նա ասաց «Ժամանակ»-ի հետ զրույցում: Հիշեցնենք, որ թիվ 19 ԸԸՀ-ն նախօրեին Սեդրակ Սարոյանին գրանցել էր պատգամավորի թեկնածու»,- գրում է «Ժամանակ»-ը:

«Առավոտ».  Թերթի գլխավոր խմբագիրն այսօրվա համարում գրում է. «Փողոցում մարդիկ ինձ կանգնեցնում, հարցնում են` ո՞ւմ տանք ձայնը: Այդ հարցն ինձ շփոթեցնում է` իմ խառնվածքով ես չափազանց հեռու եմ կոչեր անելուց և նույնիսկ խորհուրդներ տալ դժվարանում եմ: Գոռոզները, փրկիչներն ու առաքյալները մեր կյանքում այնքան շատ են, որ, հաստատ, այդ զանգվածում իմ կարիքը չկա: Ես վարվում եմ այս կամ այն կերպ, բայց գիտակցում եմ, որ դա իմ անձնական ընտրությունն է, և ոչ մեկին` ոչ կնոջս, ոչ երեխաներիս, ոչ այն մարդկանց, ում հետ աշխատում եմ, ոչ էլ, առավել ևս, մնացածներին չեմ քարոզում, չեմ համոզում ինձ ընդօրինակել: Ընտրությունները դրա մասնավոր դեպքն են, այստեղ էլ ես կարող եմ ասել, թե ես ինչպես եմ վարվելու` որևէ մեկին չպարտադրելով նույնն անել:
Ես քվեարկելու եմ բոլորի դեմ, այսինքն` ինչ-որ մի ձևով անվավեր եմ դարձնելու իմ քվեաթերթիկը: 2007-ին և 2008-ին ես ձայնս տվել եմ, համապատասխանաբար, «Ժառանգությանն» ու Լևոն Տեր-Պետրոսյանին: Այս ցիկլում ես նույնը չեմ անի` շարունակելով բարձր գնահատել Հայաստանի առաջին նախագահի հսկայական ավանդը պետության կայացման և Արցախի ազատագրման գործում: Ավելացնեմ նաև, որ ՀԱԿ-ի` իշխանության հասցեին քննադատության 70 տոկոսի հետ ես համաձայն եմ: Բայց այս պահին Կոնգրեսի քարոզչության հիմքում հետևյալ թեզն է` կամ կանգնում եք ժողովրդի, կամ էլ ավազակապետության կողքին, իսկ ժողովուրդը, բնականաբար, ՀԱԿ-ն է մարմնավորում: Հենց այդ թեզով են առաջնորդվում ՀԱԿ-ի պատանի և ոչ այնքան պատանի «խունվեյբինները»: Կարող եմ կրկնել Վլադիմիր Նաբոկովի խոսքը` բոլշեւիկների (իմա` հարթակային հռետորների) հետ իմ հակասությունները գեղագիտական են:
Բոլշևիկյան պարանոյայի չափաբաժինն ամենաքիչն է «Ժառանգության» մեջ: Սակայն այդ կուսակցության ցուցակում անսպասելիորեն հայտնվեցին մարդիկ, որոնք չափազանց հեռու են ազատականության, ժողովրդավարության և, որն ինձ համար էական է, լրագրության մասին իմ պատկերացումներից: Հօգուտ այդպիսի ցուցակի ես չեմ կարող քվեարկել:
Դուք կհարցնեք, թե ինչու քաղաքական ուժի որոշ մասի իմ բացասական ընկալումը ես տարածում եմ այդ ամբողջ ուժի վրա: Բացատրեմ: Պատկերացրեք, ֆուտբոլային թիմ, որտեղ կենտրոնական հարձակվողը և հենակետային կիսապաշտպանը, ենթադրենք, ռասիստներ են` նրանք պարբերաբար ագրեսիվ հայտարարություններ են անում սևամորթների հասցեին: Եթե այդ թիմի մարզիչը, ակումբի ղեկավարությունը հրապարակավ չեն դատապարտում նման հայտարարությունները, կարո՞ղ եմ ես եզրակացնել, որ ռասիզմը այդ թիմում խրախուսվում է:
Ի տարբերություն «Ժառանգության» և ՀԱԿ-ի` նախընտրական պայքարի մնացած մասնակիցներն ինձ համար ընդհանրապես մերժելի են և իմ ձայնը տալու առումով քննարկման առարկա չեն կարող լինել: Հենց դրա համար էլ ես քվեարկելու եմ բոլորի դեմ»:

«Առավոտ».  Թերթի գլխավոր խմբագիրն այսօրվա համարում գրել է. «Վերջապես կառավարությունն իր արտագնա նիստում զբաղվեց իմ հարցով: Դե, ոչ թե անձամբ իմ, այլ մեր`Կոտայքի մարզի բնակիչներիս: Հավանաբար, վարչապետը համագործակցում է ինչ-որ սոցիոլոգիական ընկերության հետ [որի անունը երբևէ չի բացահայտում] և դրա միջոցով իմանում է, թե ինչ ենք մենք` քաղաքացիներս, մտածում այս կյանքի մասի: Օրինակ` պարզվեց, որ չնայած Կոտայքի մարզում են Գառնի-Գեղարդն ու Ծաղկաձորը, զբոսաշրջության զարգացումը մեզ առանձնապես չի հետաքրքրում: Եվ ինչպե՞ս հետաքրքրի, եթե գները Ծաղկաձորի և Աղվերանի ոչ այնքան բարձրակարգ «օբյեկտներում» նույնն են, ինչ որ Եվրոպայի 5 աստղանի հյուրանոցներում: Փոխարենը մեզ հետաքրքրում են աշխատատեղերի և ճանապարհների խնդիրները: Որպես մարդ, որն օրը առնվազն 4 անգամ անցնում է Եղվարդի խճուղով, հաստատում եմ վերջին պնդումը: Դավիթաշենի թաղապետը, որը ցանկանում է պատգամավոր դառնալ, լցրել է փոսերը ուղիղ մինչև Երևանի սահմանը, դրանից հետո առայժմ ոչ մի բարեգործ չի բացահայտվել: Այդ խճուղին, ի դեպ, ամենևին միջզյուղական ճանապարհ չէ, բայց եթե այսպես շարունակվի, միջգյուղականից բեթար կդառնա: Վարչապետն իր խոսքում անդրադարձել է ինքնանույնացման խնդրին` նշելով, որ «կոտայքցի» հասկացություն գոյություն չունի, ինչպես որ կա «լոռեցի» կամ «սյունեցի» ընդհանրականությունը: Պարոն Սարգսյանը դա բացատրում է նրանով, որ մարզի քաղաքներն իրարից հեռու են ու շատ տարբեր: Չգիտեմ, թե որքանով է նման բացատրությունը ճիշտ, բայց տեղայնական ինքնանույնացման բացակայությունը որպես բացասական գործոն հիշատակելը, իմ կարծիքով, սխալ է: Օրինակ` իմ նախնիների մեծ մասի արմատները Ղարաբաղից են, բայց դա ինձ համար ոչ ամաչելու, ոչ էլ պարծենալու աղբյուր է` պապեր են, Հայաստանի ինչ-որ մի գավառում պիտի ծնվեին: «Աշխարհագրական» նույնականացման միայն երկու նորմալ ձև կա` ազգությունը և քաղաքացիությունը. ես հայ եմ ու ես ՀՀ քաղաքացի եմ, և այդ երկու հանգամանքով էլ, անկախ ամեն ինչից, հպարտանում եմ: Մնացած բոլոր տեղայնական խմբավորումները շեշտելը մեզ միայն խանգարում է`ստեղ¬ծելով մեր միջև անիմաստ և անհասկանալի «բաժանարար գծեր»:
Կառավարության անցկացրած հարցման մեջ կան, իհարկե, նաև զավեշտական դրվագներ: Օրինակ, նշվում է, որ` չնայած այլ մարզերի համեմատ սոցիալ-տնտեսական ցուցանիշները բարվոք չեն (ուրեմն, ասենք, Շիրակի մարզում ավելի՞ բարվոք են], «մարզն ամենալավատեսն է, այսինքն` քաղաքացիները ապագայի նկատմամբ տրամադրված են լավատեսությամբ» [վարչապետի խոսքը մեջբերում եմ ըստ gov.am-ի]: Ինչ խոսք, հաճելի է ապրել լավատես մարդկանց շրջապատում: Սակայն կառավարության ղեկավարը, ցավոք, չպարզաբանեց, թե որն է այդ «մարզային» լավատեսության աղբյուրը: Ըստ երևությին, պատճառն այն է, որ մեր մարզպետը Կովալն է»:

«Հրապարակ».  Այս ընտրությունները ևս հավակնում են վերածվել փողի մրցավազքի: Երեկ թերթը ուշագրավ մանրամասներ է իմացել ընտրությունների ֆինանսական կողմի մասին: Պարզվում է` թեկնածուներից ոմանք հսկայական վարկեր են վերցրել նախընտրական ծախսերն անելու համար: Այս ընտրություններում մեկ թեկնածուի ծախսած գումարի չափը 500 հազար դոլարից մինչև 2 միլիոն դոլարի է հասնելու: Ասենք, «Դերժավա» ընկերության սեփականատեր Արկադի Համբարձումյանն ամենաբարձր պլանկան է դրել: Թեկնածուներից մեկը թերթին պատմել է, որ երբեմն իրենց ցանկությունից էլ չի կախված ծախսվող գումարի չափը` երբ տեսնում են, որ մրցակիցն իրենցից շատ է ծախսում, կամ տեսնում են, որ մրցակցի շանսերը մեծ են, արդեն ծախսած գումարը չկորցնելու համար ստիպված են լինում մի քանի հարյուր հազար ևս դնել սեղանին: Այս շրջանում բոլոր կուսակցություններում «փողի բազարներ» են գնում: Ասենք, ԲՀԿ-ում այսպիսի համաձայնության են եկել. Գագիկ Ծւսռուկյանը մեկական միլիոն դոլար է հատկացնում յուրաքանչյուր մեծամասնական թեկնածուի: Պայմանն այսպիսին է. Հաղթեցիր`քեզ նվեր, պարտվեցիր` վերադարձնում ես: Իսկ դա նշանակում է, որ ոչ միայն զրկվում ես պատգամավորի մանդատից, այլև ընկնում ես մեծ պարտքի տակ: Բայց, թերթին հասած տեղեկություններով, ԲՀԿ-ին չեն թողնելու անսահմանափակ ու անարգել փող ծախսի, իրավապահ մարմիններին հրահանգված է ընտրակաշառք տվողներին էլ, վերցնողներին էլ բռնել: Երբ մի քանի ցուցադրական ձերբակալություններ կլինեն, շատերը ետ կկանգնեն փողով պատգամավոր դառնալու մտադրությունից:

«Հայկական ժամանակ».  Երկար տարիներ շրջող լուրերն այն մասին, թե սերժանտական վարչախումբը Զավախքից մարդկանց բերում`Հայաստանում գրանցում և օգտագործում է որպես ընտրակեղծիքի հուսալի ռեսուրս, երեկ պաշտոնական հաստատում ստացան:
Երևանի թիվ 11 ընտրատարածքում հայտնաբերվել է բնակարան, որտեղ գրանցված շուրջ հարյուր Վրաստանի քաղաքացիներ Հայաստանում ընտրական իրավունք են ձեռք բերել: Ոստիկանությունը փաստը հաստատում է և դա բացատրում հայրենասիրական մոտիվներով: Լև Տոլստոյը այս սորտի հայրենասերների մասին ասել է ժամանակին:

«Առավոտ».  Թերթը գրում է, որ մոտ երկու շաբաթ է` հայաստանյան դեղատներում մի շարք կեղծ դեղեր են հայտնաբերվել: «Հայտնի չէ, թե այդ դեղերը որտեղ են արտադրվել, ինչ սերիական համար ունեն, ով է ներկրել մեր երկիր եւ այլն: Բայց փաստ է, որ հայտնաբերելուց հետո էլ այդ դեղերը մինչ օրս ազատ վաճառվում են դեղատներում, եւ որեւէ մեկը չի խոչընդոտում դրանց սպառմանը: Կեղծ դեղերը հայտնաբերել եւ մեր երկրի անվտանգության համար պատասխանատու մարմինների դատին են հանձնել դեղարտադրության մեջ հայտնի «Նիկոմեդ» ընկերության հայաստանյան ներկայացուցչության մասնագետները: «Նիկոմեդ» ընկերության պատասխանատուներն անմիջապես ահազանգել են ՀՀ ազգային անվտանգության ծառայություն եւ այլ պետական մարմինների: ՀՀ Դեղարտադրոդների եւ ներմուծողների միությունն էլ իր հերթին է մոնիթորինգ կատարել եւ կեղծ դեղերի վերաբերյալ իր ունեցած փաստերով դիմել ՀՀ վարչապետ Տիգրան Սարգսյանին, առողջապահության նախարարության պատասխանատուներին` հորդորելով միջոցներ ձեռնարկել այդ դեղերը վաճառքից հանելու: Սակայն ինչպես «Առավոտի» հետ զրույցում ասաց Դեղարտադրողների եւ ներմուծողների միության գործադիր տնօրեն Սամվել Զաքարյանը՝ որեւէ կառույց ջանք չի գործադրում «ինքնությունը» չպարզված դեղերը շրջանառությունից հանելու` մինչեւ որ կպարզեն, թե դա ինչպես է հայտնվել դեղատներում»,- գրում է «Առավոտ»-ը:

ԲՀԿ խմբակցության պատգամավոր Վարդան Բոստանջյանի անունը կուսակցության համամասնական ցուցակից ջնջել է անձամբ Ռոբերտ Քոչարյանը: «Ըստ մեր տեղեկությունների, Բոստանջյանը կուսակցության գրասենյակում համապատասխան դիմում է գրել, ստորագրել, նույնիսկ գույքի և եկամուտների հայտարարագիր ստորագրել: Այս ամենն ասում ենք այն պատճառով, որ սկզբնապես որոշված է եղել, որ Բոստանջյանը պետք է ընդգրկվի կուսակցության համամասնական ցուցակում: Եթե այդպիսի որոշում չլիներ, նրան ուղղակի կարող էին ասել, որ քեզ չենք ընդգրկելու ցուցակ, և իմաստ չունի զբաղվել ավելորդ թղթաբանությամբ: Բայց երբ կուսակցության նախագահ Գագիկ Ծառուկյանը համամասնական ցուցակի նախնական տարբերակը ներկայացրել է Ռոբերտ Քոչարյանի հաստատմանը, վերջինս ջնջել է Բոստանջյանի անունը:
Քոչարյանը Բոստանջյանին չի ներել փետրվարի սկզբին ասուլիսներից մեկում արված այն հայտարարության համար, ըստ որի ԲՀԿ-ն առիթ չունի չսատարելու նախագահին: «Մենք ունենք փաստաթուղթ, իսկ մենք միշտ հարազատ ենք մեր կողմից ստորագրված փաստաթղթին»,- ասելէր Բոստանջյանը` նկատի ունենալով մեկ տարի առաջ ստորագրված կոալիցիոն հուշագիրը:
Ւնչ վերաբերում է Վարդան Բոստանջյանին, ապա, մեր տեղեկություններով, նա խորհրդարանական ընտրություններից հետո կհայտարարի ԲՀԿ-ից դուրս գալու իր որոշման մասին: Ինչ իմաստ ունի լինել մի կուսակցությունում, որտեղ քեզ ոչ միայն չեն գնահատում, այլև ընդհակառակը` պատժում են դասը վատ սերտելու համար»,- գրել է թերթը: