«Հրապարակ». Իշխող Հանրապետական կուսակցությունը երեկ գործկոմի նիստ է գումարել, որին մասնակցել է նաև Սերժ Սարգսյանը: Քննարկվել են նախընտրական ընթացիկ հարցեր, թե ինչպիսին է լինելու ՀՀԿ մարտավարությունը: Այնուհետև ՀՀԿ-ականները մի թեթև նշել են ՀՀԿ գործկոմի անդամ, պատգամավոր Գագիկ Մինասյանի ծնունդը: Ի դեպ, որոշ տեղեկություններով, Գագիկ Մինասյանը կուսակցությանն իր ծառայության ու գործունեության դիմաց հիդրոէլեկտրակայան է խնդրել Սերժ Սարգսյանից: «Ես որևէ մեկից որևէ բան չեմ խնդրում»,- թերթի հետ զրույցում հայտարարել է Մինասյանը:

«Առավոտ».  Թերթը գրում է, որ ՀՖՖ նախագահ Ռուբեն Հայրապետյանը հրաժեշտի ասուլիս հրավիրեց, ասաց, որ պատգամավորական մանդատը վայր է դնում, սակայն ՀՀԿ-ն եւ մասնավորապես պատգամավոր Սամվել Ալեքսանյանը նրան համոզելով, նորից ընդգրկեցին ընտրապայքարում:

Թերթն այդ կապակցությամբ զրուցել է  «Ժառանգության» պատգամավոր Արմեն Մարտիրոսյանի հետ. «Ռուբեն Հայրապետյանը վերադարձավ քաղաքականություն` իմ գործընկեր Ստյոպա Սաֆարյանին արժանի մրցակից լինելու համար: Որովհետեւ հայտնի դարձավ, որ Ստյոպա Սաֆարյանն իր թեկնածությունը դնելու է այնտեղ՝ թիվ 1 ընտրատարածքում եւ հանրապետականի նախկին թեկնածուն ուղղակի ի զորու չէր պայքարելու գործընկերոջ դեմ: Դրա համար բերեցին, որ դառնա թեկնածու՝ 1-ին ընտրատարածքում»:

Հարցին` քաղաքականությունը շա՞տ բան կկորցներ, եթե Ռուբեն Հայրապետյանը զբաղվեր միայն ֆուտբոլով` պարոն Մարտիրոսյանը պատասխանել է. «Ես կարծում եմ` ֆուտբոլը շատ կշահեր, ինչպես ինքը ասել էր»:

Նշենք, որ թիվ 1 ընտրատարածքում Ստյոպա Սաֆարյանի եւ Ռուբեն Հայրապետյանի հետ պայքարում է նաեւ Գայանե Առուստամյանը:

«Առավոտի» տեղեկություններով` այս օրերին Հայաստանում են գտնվում ռուսական շուրջ մեկ տասնյակ առաջատար լրատվամիջոցների ներկայացուցիչներ, որոնք հանդիպումներ են ունենում Հայաստանի իշխանական վերնախավի հետ: Մասնավորապես, նրանց ընդունել է վարչապետ Տիզրան Սարգսյանը և պատասխանել վերջիններիս հետաքրքրող հարցերին: Ասում են, որ ռուս լրագրողների այցը Հայաստան կազմակերպվել է ՌԴ իշխանական վերնախավի անմիջական մտահղացմամբ: Վերջիններս այս կերպ փորձում են շնորհակալություն հայտնել Հայաստանի իշխանություններին` ի դեմս նախագահի և կառավարության, ՌԴ նախագահական ընտրություններին Վլադիմիր Պուտինին աջակցելու համար:

«Չորրորդ ինքնիշխանություն».  ԴԱՀԿ պետ Միհրան Պողոսյանի` Քեթրինի Միհրանի անունից Քանաքեռ-Զեյթուն համայնքում ՀՀԿ-ի օգտին «աշխատանքներ» է սկսել իրականացնել ոմն Վահե Սահակյան: Վերջինիս թիրախում են հայտնվել այս համայնքի թաղապետարանի աշխատակիցները: Վահե Սահակյանը թաղապետարանի աշխատակիցներին քարոզում է «աշխատել» Միհրան Պողոսյանի հովանավորյալ, պատգամավորության թեկնածու Արթուր Ստեփանյանի` Չախկալի համար` միաժամանակ հայտարարելով, որ խորհրդարանական ընտրություններից հետո ինքն է «նստելու» թաղապետ Արայիկ Քոթանջյանի տեղը: Իսկ դա ենթադրում է, որ Սահակյանը հաշվեհարդար է տեսնելու թաղապետարանի այն աշխատակիցների հետ, որոնք շրջանցել են իր կոչը, և ճիշտ հակառակը` «լավ աչքով է նայելու» նրանց, որոնք կկատարեն իր հանձնարարականները: Ի դեպ` թաղապետարանի ավագանու որոշ անդամներ «հեռուն են ուղարկել Սահակյանին` ակնարկելով, որ դեպքեր են եղել, երբ Սահակյանր խոստում է տվել ու հետո չի կատարել այն: Այսինքն` «քցել» է նրանց, որոնք միամտություն են ունեցել հավատալու Վահեին: «Մենք մեր անելիքներր գիտենք, և որոշողը մենք ենք` ում օգտին աշխատել», — Սահակյանին ասել են այս համայնքի ավագանու որոշ ազդեցիկ անդամներ:

Երեկ «Հայկական ժամանակ» թերթը հավաստի տեղեկություն է ստացել, որ նախօրեին Արմավիրում մի խայտառակ դեպք է կատարվել:
Բախում է տեղի ունեցել Արմավիրի ՀՀԿ շտաբի անդամների և Արմավիրի գլխավոր վիրաբույժ Սամվել Ֆրանկյանի միջև, ինչի հետևանքով բժիշկը մարմնական վնասվածքներով տեղափոխվել է հիվանդանոց: Երեկ թերթի հետ զրույցում բժիշկը նշված տեղեկությունը հերքել է, սակայն շտապել է Հանրապետական կուսակցության մասին դրական խոսքեր շռայլել: Հեռախոսով թղթակիցը զրուցել է Սամվել Ֆրանկյանի հետ: Զրույցից մի հատված ներկայացնում ենք ստորև.

-Պարոն Ֆրանկյան, արդեն լա՞վ եք:

-Այո, այո: Լավ եմ:

-Իսկ ի՞նչ էր եղել: Ի՞նչ միջադեպ էր տեղի ունեցել ձեր և Հանրապետական կուսակցության անդամների միջև:

-(ծիծաղում է) Չի եղել: Ես անձամբ վարչության անդամներից եմ, նման բան չի կարող ֆիզիկապես լինի:

-Դուք Հանրապետական կուսակցության անդա՞մ եք:

-Այո:

-Ո՞ր կառույցից եք:

-Արմավիրի:

-Իսկ ձեր կուսակցական ընկերների հետ տարաձայնություններ չունե՞ք:

-Իհարկե` չունեմ: Բժիշկ մարդ եմ: Բժիշկ մարդը իրա համար…ես իմ հիվանդների հետ եմ, իմ գործերով:

-Բժիշկ մարդ եք, բայց կուսակցական եք:

-Միանշանակ:

-Իսկ շուտվանի՞ց եք ՀՀԿ-ական:

-2006 թվից: Եթե ուզում եք, կարող ենք հանդիպենք էլ, որ տեսնեք… այդ լուրերը, որ ասում եք, շատ հետաքրքիր են:

-Ասում են, որ ձեզնից պահանջել են` առաջիկա խորհրդարանական ընտրությունների ժամանակ ՀՀԿ-ի համար ձայներ ապահովել, իսկ դուք հրաժարվել եք: Դրա պատճառով էլ միջադեպ է տեղի ունեցել, որի հետևանքով մարմնական վնասվածքներ եք ստացել:

-Միանշանակ դա ավելորդ ինչ-որ անկապ խոսակցություն է:

«Հայկական ժամանակ». Երեկ թերթի թղթակիցը տեսել է, թե ինչպես են ԵԿՄ նախագահ Մանվել Գրիգորյանը, ԵԿՄ փոխնախագահ Արա Կետիկյանը և Վերահսկիչ պալատի նախագահ Իշխան Զաքարյանը ԵԿՄ գրասենյակի ետնամասից դուրս եկել և քայլել դեպի գրասենյակի գլխավոր մուտքը: Տեսնելով թերթի լուսանկարող թղթակցին` Զաքարյանը բոլորից ետ է մնացել ու փակել դեմքը, իսկ նրան ուղեկցող անվտանգության աշխատակիցները մոտեցել են թղթակցին և պահանջել ջնջել լուսանկարները: «Գաղտնի հանդիպմա՞ն էիք մասնակցում, որ չեք ուզում ձեզ նկարեն»,- հարցրել է թերթի թղթակիցը, ինչին ի պատասխան` Զաքարյանը փորձել է կատակել, թե չի ցանկանում, որ իրեն լուսանկարեն, քանի որ «նկարները հետո չեն տալիս»: Քիչ անց ԵԿՄ մուտքի մոտ Զաքարյանին է մոտեցել Արա Կետիկյանը, ինչ-որ ցուցակ տվել` ասելով. «Ձեր ուզած ցուցակն է»: Զաքարյանը նստել է մեքենան ու հեռացել` չպատասխանելով հարցին, թե իրեն ինչ ցուցակ է տվել Կետիկյանը: Ըստ ամենայնի, Մանվել Գրիգորյանն ու Իշխան Զաքարյանը ԵԿՄ ետնաբակում ինչ-որ կարևոր խոսակցություն են ունեցել, և այդ խոսակցությունը շենքի ներսում չեն արել ենթադրելով, որ տարածքը գաղտնալսվում է: Իսկ թե ինչ անուններ են եղել ցուցակում, կարելի է կռահել: Խոսակցություններ կան, թե այն բանից հետո, երբ Մանվել Գրիգորյանը Սերժ Սարգսյանին սատարելու մասին հայտարարություն է արել, ԵԿՄ-ում քանդման պրոցեսներ են սկսվել, և կազմակերպությունը պահպանելու համար, ըստ ամենայնի, Մանվել Գրիգորյանին անհրաժեշտ է հարազատ Հանրապետական կուսակցության վարչական լծակների կիրառումը:
Թերթը տպել է նաև ՎՊ նախագահ Իշխան Զաքարյանի ավտոմեքենան, որի վրա ԱՊՊԱ կտրոն փակցված չէ: «Չհասկացանք, Իշխան, դու կարող ա՞ «Հայկական ժամանակ» չես կարդում: Կարող ա՞ ՍԴ նախագահից լավ տղա ես, չգիտեի՞ր, որ մի օր քեզ բռնելու ենք, ու կպցնելու ես: Չե՞ս կպցնելու: Լավ, տեսնենք: Եթե չկպցնես, ուրեմն` Գասպարյան Վովայից լավ տղա ես»,- եզրափակել է թերթը:

«Հրապարակ».  «Ազատ դեմոկրատներ» կուսակցության անդամ Արարատ Զուրաբյանը համառորեն հրաժարվում է խոսել այդ կուսակցությունում տեղի ունեցած իրադարձության մասին, որ արդյունքում ինքը հրաժարվեց մտնել «Ժառանգության» ցուցակ: Բայց թերթին հայտնի է դարձել, որ նա մի ընկերական միջավայրում ասել է, որ «Ազատ դեմոկրատներից» «Ժառանգություն» մտածները պետք է նկատի ունենան, որ «Ուղտը թքելու սովորույթ ունի»: Զուրաբյանը նկատի է ունեցել «Ժառանգության» ղեկավարի կողմից համամասնական ցուցակ ընդգրկվածների ստորագրած «Ուխտ նոր Հայաստանի» փաստաթուղթը, որով ստորագրողներն ընդունել էին Րաֆֆի Հովհաննիսյանի անվերապահ առաջնորդությունը:

«Ժամանակ». Թերթը գրում է, որ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում ապրիլի 5-ին կշարունակվի 8 տարբեր աղջիկների պոռնկությամբ շահագործած կանանց հանցախմբի դատավարությունը: «Հանցախմբի, ըստ երեւույթին, ղեկավար համարվողին` բանգլադեշցի Աղունիկ Այվազյանին, մեղադրանք է առաջադրվել այն բանի համար, որ նա թրաֆիքինգի` շահագործման նպատակով մարդկանց հավաքագրելու, տեղափոխելու, փոխանցելու, թաքցնելու, ստանալու, ինչպես նաեւ սեռական շահագործման ենթարկելու ու պահելու դիտավորությամբ, միավորվելով Արաբական Միացյալ Էմիրություններում բնակվող Նելլի Ներսիսյանի հետ եւ վերջինիս միջոցով նաեւ Ծովիկ Ավետիսյանի, Վահան Ավետիսյանի, Հասմիկ Առաքելյանի, Ազատուհի Հայրապետյանի, Աշոտ Ներսիսյանի, Սիլվա Հովսեփյանի, ոմն Նառայի, Սերինեի եւ քննությամբ դեռեւս չպարզված այլ անձանց հետ, ստեղծել է կազմակերպված հանցավոր խումբ եւ իր հանցավոր մտադրությունն իրականացնելու նպատակով հավաքագրված կանանցից վերցրել է անձնագրերը, ապա առողջության համար վտանգավոր բռնություն գործադրելու սպառնալիքով եւ ոչ վտանգավոր բռնության գործադրմամբ, վիճակի խոցելիությունը օգտագործելով, ներգրավել է նրանց մարմնավաճառության մեջ` տեւական ժամանակ դնելով եւ պահելով պոռնկության շահագործման վիճակի մեջ ու ստացել նրանց կողմից վաստակած գումարները:

Թրաֆիքինգի վերաբերյալ հերթական գործը Կենտրոնի դատարան ստացվել է 2011 թվականի հունիսին, իսկ գործն այժմ քննվում է դատավոր Գագիկ Պողոսյանի նախագահությամբ»,- գրում է «Ժամանակ»-ը:

ՀՀ ԿԸՀ նախագահ Տիգոսն Մուկուչյանը մարտի 31-ին բավական երկար ժամանակով եղել է նախագահական նստավայրում:
Այցելությունը գաղտնի բնույթ է կրել, բանի որ ԿԸՀ-ն դրա վերաբերյալ հաղորդագրություն չի տարածել: Նախագահական նստավայրից նույնպես ԿԸՀ նախագահի այցի վերաբերյալ հաղորդագրություն չի տարածվել: Ինքը Մուկուչյանն էլ, առանձնապես հակված չէ այդ մասին խոսել: «Երբ կիրակի օրը հետաքրքրվեցի, թե ո՞րն է եղել նախագահական այցելելու առիթը և նպատակը, Տիգրան Մուկուչյանը պատասխանեց. «Ես այդ հարցին չեմ պատասխանում ընդհանրապես, որովհետև կոռեկտ չեմ համարում ցանկացած նման հարց տալը»:
Որոշ ժամանակ անց Մուկուչյանը փոխեց իր որոշումը և մեզ առաջարկեց չօգտագործել մեկնաբանելուց հրաժարվելու իր պատասխանը` համաձայնելով խնդրի վերաբերյալ մեկնաբանություններ տալ: Երեկ, ըստ պայմանավորվածության, Մուկուչյանին կրկին ուղղեցի նույն հարցը: «Ընտրությունների նախապատրաստումը և կազմակերպումը համապետական միջոցառում է, որտեղ ինչպես ԿԸՀ-ն, այնպես էլ՜պետական տարբեր մարմիններ, ունեն օրենքով սահմանված գործառույթներ: Հետևաբար, պետական մարմինների հետ տարբեր խնդիրների քննարկումը, որոնք վերաբերվում են ընտրությունների պատշաճ կազմակերպմանը, արտառոց երևույթ չեն եւ օրինախախտում որակվել չեն կարող»,- ասաց ԿԸՀ նախագահը:
ՀՀ ընտրական օրենսգրքով ԿԸՀ-ն որևէ պետական մարմնի, այդ թվում` նախագահականին կամ կառավարությանը ենթակա չէ: ԸՕ-ում չկա որևէ դրույթ, որը ԿԸՀ նախագահին լիազորում է նախագահականում իր գործունեության կանոնները քննարկել, չկա ոչ մի դրույթ, որը նախագահականում գտնվող պաշտոնյաներին` Սերժ Սարգսյանից սկսած, իրավունք է տալիս ԿԸՀ նախագահին ցուցումներ տալ»,- գրել է «Հայկական ժամանակ» թերթը:

«Հրապարակ».  Թերթը գրում է, որ ԱԺ պատգամավորի թեկնածու Հակոբ Հակոբյանը` Ճոյտը, տեղեկացրել է, որ երեկ հանդիպել է ԵԱՀԿ/ԺՀՄԻԳ դիտորդական առաքելության ներկայացուցիչների հետ: «Հակոբյանը նրանց տեղեկացրել է, որ թիվ 19 ընտրատարածքում տիրում է վախի մթնոլորտ, քանի որ գեներալ Սեյրան Սարոյանն ահաբեկում է այլ դիրքորոշում ունեցող ընտրողներին: Հակոբյանն ասել է, որ իր նախընտրական հանդիպումները պատրաստվում է անցկացնել գիշերային ժամերին, որպեսզի Սարոյանը չիմանա, թե հատկապես ովքեր են եկել հանդիպելու իր հետ: ԺՀՄԻԳ դիտորդներին գիշերային հանդիպումների գաղափարը հետաքրքիր է թվացել, եւ նրանք ցանկություն են հայտնել մասնակցել դրանց: Ի դեպ, Հակոբյանը մեզ հայտնեց, որ հստակ ապացույցներ ունի, որ վերջին 5 տարվա ընթացքում Սարոյանն առնվազն 2 տարի 7 ամիս բացակայել է Հայաստանից, ինչը նշանակում է, որ մշտապես չի բնակվել երկրում: Սարոյանի գրանցումը չեղյալ ճանաչելու հայցով Հակոբյանը դիմել է վարչական դատարան: «Դիմելու եմ նաեւ ՍԴ, իսկ Հայաստանում մերժվելու դեպքում` նաեւ Եվրադատարան»,-տեղեկացրեց Հակոբյանը»,- գրում է «Հրապարակ»-ը: