«ՉԻ» տեղեկություններով, շաբաթ օրը` ապրիլի 7-ին, ՀՀԿ համամասնական ցուցակի 10-րդ հորիզոնականում գտնվող Գագիկ Բեգլարյանը Կենտրոն համայնքում գտնվող բոլոր դպրոցների տնօրեններին հավաքել է մի տեղ` նրանց հորդորելով ընտրել իր թեկնածուներին: Գագիկ Բեգլարյանը հանդիպմանը մենակ չի ներկայացել, վերջինիս հետ են եղել թիվ 9 ընտրատարածքում մեծամասնական ընտրակարգով առաջադրված ՀՀԿ թեկնածու Ռուբեն Սադոյանը և թիվ 10-ում մեծամասնականով առաջադրված Գարեգին Նուշիկյանը: Դպրոցի տնօրենների հետ հանդիպմանը հիմնականում խոսել է Բեգլարյանը` ներկայացնելով թեկնածուների արժանիքները:
Ի դեպ` երեկ էլ Էրեբունի համայնքի բոլոր դպրոցների ուսուցիչներին ու աշակերտներին` առանց տարիքային սահմանափակման, հրահանգված է եղել ներկա գտնվել Սասունցի Դավիթ հրապարակում տեղի ունենալիք Սերժ Սարգսյանի նախընտրական հանդիպմանը: Բոլոր դպրոցների մոտ երեկ տեղակայված էին ավտոբուսներ, որոնցով դպրոցի կոլեկտիվներն ու դպրոցականները տեղափոխվում էին «դեպքի վայր»:
Կարծում ենք` այսքանից հետո Արմեն Աշոտյանը պարզապես կփորձի լռել և վերջ տալ իր այն ցինիկ հայտարարություններին, որ կրթօջախները ապաքաղաքական հաստատություններ են, և իրենք թույլ չեն տալու, որ դրանք ներքաշվեն քաղաքական գործընթացների մեջ: Ինչ վերաբերվում է հայոց ուսուցիչներին և առհասարակ դպրոցում աշխատող մարդկանց, ապա մեկ անգամ ևս ամրագրենք` ապագա չունի այն սերունդը, որին կրթող մարդը պարզապես ձեռքի խաղալիք է դարձել թաղային հեղինակությունների և կրիմինալ տարրերի համար: Օգտագործված ուսուցչի կերպարը վտանգավոր է մատաղ սերնդի դաստիարակության համար, սա աքսիոմատիկ ճշմարտություն է, և ուրեմն` բոլոր ապացույցներն ավելորդ են:

«Առավոտ». Թերթի գլխավոր խմբագրի այսօրվա խմբագրականում կարդում ենք. «ՀՀԿ-ի և ԲՀԿ-ի ներկայացուցիչները լրատվամիջոցներին կիսապաշտոնապես տեղեկացրին, որ «այս փուլում» նրանք չեն մասնակցելու հեռուստատեսային բանավեճերին ոչ իրար, ոչ էլ խորհրդարանական ընտրություններին մասնակցող այլ քաղաքական ուժերի հետ: Թե որքան է տևելու «այս փուլը»` առայժմ հայտնի չէ: Չեմ կարող ասել նաև, թե ինչով է պայմանավորված նման մարտավարությունը. թվում է, թե երկու թիմերում էլ կան ճարտար լեզու ունեցող մարդիկ` Արտաշես Գեղամյան, Խոսրով Հարությունյան, Գուրգեն Արսենյան, Հմայակ Հովհաննիսյան: Ճիշտ է, նրանց մասնակցությամբ բանավեճերն ավելի շուտ կլինեն մենախոսությունների շարքեր, որովհետև շատ դժվար կլինի ընդհատել այդ գործիչների մտքերի հոսքը, բայց որ նրանք ցանկացած ընդդիմադիրի «խոսքի տակ չեն մնա»` դա ակնհայտ է: Օրինակ` երբ ինձ են առաջարկում մասնակցել որևէ բանավեճի, ես հրաժարվում եմ, որովհետև գիտեմ, որ պարտվելու եմ, որովհետև լեզվակռվում որևէ մեկին ջախջախելը, «ծնկի բերելը» և անարգանքի սյունին գամելը անլուրջ, մանկապարտեզային զբաղմունք եմ համարում: Բայց քաղաքական գործիչները պարտավոր են, բնականաբար, մտնել այդպիսի բանավեճերի մեջ` մանավանդ նախընտրական շրջանում:
Այսպիսով, իրենց կազմերում ունենալով կարկառուն բանախոսներ, իշխող կոալիցիայի անդամ երկու կուսակցությունները առայժմ հրաժարվում են դեբատներից: Նրանց բացակայությամբ բանավեճերն այնքան էլ հետաքրքիր չեն, որովհետև մնացածները հանդես են գալիս մեղադրողի դերում, իսկ արդարացողը չկա: Իհարկե, կարող են լինել նաև այլ կոնֆիգուրացիաներ. ՀԱԿ-ը, ՀՅԴ-ն և «Ժառանգությունը» կարող են վիճել, թե ով է նրանցից ավելի ընդդիմադիր և ավելի «վճռական տրամադրված», բայց նրանց միջև խորը հակասություններ չեն կարող լինել, որովհետև նրանբ պետք է արձանագրեն, որ վիճակը վատ է, արտագաղթ է, կոռուպցիա է, մենաշնորհներ են և այլն: Եթե այս հարցերում ոչ ոք չի հակադարձում, բանավեճ, ըստ էության, չկա:
Ճիշտ է, երեկ ես «Ա1+»-ով վարում էի մի բանավեճ, որը, իմ կարծիբով, շատ յուրահատուկ էր` մասնակցում էին ՀԱԿ-ի և ենթադրյալ աութսայդերներից մեկի` ՀԴԿ-ի ներկայացուցիչները: Կոնգրեսի անդամն ասում էր, որ իրավիճակը վատ է, իսկ դեմոկրատն էլ պնդում էր, որ` այո, վատ է, բայց դրա մեղավորը ոչ այնքան ներկայիս իշխանությունն է, որքան ՀՀՇ-ն, որը քանդեց գյոզալական սովետական երկիրը, փակեց գործարանները, ամեն ինչ թալանեց և, ղեկավարվելով արևմտյան կասկածելի դեղատոմսերով, Հայաստան ներմուծեց վայրի լիբերալիզմը: Պարզապես հիշեցնեմ, որ 1998 թվականից մինչև 2012 թվականը բավականին ժամանակահատված կար` այդ ամենը շտկելու, և ՀՀՇ-ի սխալների գնահատականներն այսօր ավելի շուտ պատմաբանների, ոչ թե քաղաքական գործիչների խնդիրն են:
Այդ բանավեճն ինձ համար, համենայնդեպս, ինֆորմատիվ էր. ես հասկացա, թե ինչու է ՀԴԿ-ն մասնակցում ընտրությունների»:

«Հայկական ժամանակ». Հայտնի կինոռեժիսոր Տիգրան Խզմալյանը, որի վերջին շրջանի քաղաքական և հանրային կրեդոն Հայ ազգային կոնգրեսին քննադատելն ու նրան անվճռականության մեջ մեղադրելն է, բավական վճռական և ոչ ստանդարտ վիճակում է հայտնվել:
Նրա կինը` Նարինե Միրզոյանը (Երևանի բժշկական համալսարանի կլինիկական ֆարմակալոգիայի ամբիոնի վարիչ, բժշկագիտության դոկտոր), ընդգրկվել է Սերժ Սարգսյանի Հանրապետական կուսակցության համամասնական ցուցակում: Ինքը` Խզմալյանը, թերթի թղթակցի հետ զրույցում հաստատել է այս տեղեկությունը և բավական տարօրինակ պարզաբանում տվել` ասելով, թե իր կնոջը ՀՀԿ համամասնական ցուցակում ընդգրկել են առանց նրա գիտության: Այդ բացատրությանը կարելի էր լուրջ վերաբերվել, եթե չլիներ մի «աննշան» հանգամանք. Նարինե Միրզոյանն այսօր էլ շարունակում է ընդգրկված մնալ ՀՀԿ համամասնական ցուցակում և ինքնաբացարկի դիմում չի ներկայացրել: Ի դեպ, տիկին Միրզոյանը բժշկական գիտությունների դոկտոր է դարձել 2010 թվականին, իսկ ամբիոնի վարիչ` 2011-ին: Այս տեղեկության աղբյուրը հենց ինքն է` Տիգրան Խզմալյանը:

«Չորրորդ ինքնիշխանություն». Թերթն անդրադառնում է ՀՀԿ-ականների երեկվա հարսնաքարյան հավաքին` գրելով. « Երեկ մեծ մեռելոցն էր: Գուցե նաև այս առիթով երեկ երեկոյան Ռուբեն Հայրապետյանին պատկանող Ավան համայնքում գտնվող «Հարսնաքար» հյուրանոցային համալիրում տեղի է ունեցել հավաք, որին մասնակցել են ՀՀԿ առաջնորդ Սերժ Սարգսյանը և ՀՀԿ համամասնական ցուցակի «կարկառուն» դեմքերը, այդ թվում` Շուշան Պետրոսյանը, Արտաշես Գեղամյանը` «պարի պետական» անսամբլով` ի դեմս Խոսրով Հարությունյանի և Հայկ Բարուխանյանի: «Քեֆն» անցել է «Հավատանք, որ փոխենք» կարգախոսի շրջանակներում:
«ՉԻ» տեղեկություններով` Սերժ Սարգսյանի ելույթին հետևել է Շուշան Պետրոսյանի պատասխան «կենացը», որի շրջանակներում երգչուհին իր ձայնի ողջ դիապազոնով ասել է, որ այս ընտրությունները հաղթանակներ են բերելու կուսակցությանը և երկրին` հավելելով, թե 2012 թվականի ընտրությունները ժողովրդավարության ծիծեռնակներն են լինելու:
Շուշան Պետրոսյանին ձայնակցել է «պարի պետականը», խմբավար Արտաշես Գեղամյանը պահը բաց չի թողել նորից ասելու, որ ինքը աջակցում է Սերժ Սարգսյանին և ինքն իրեն համարում է ՀՀԿ առաջնորդի գաղափարակիցն ու համախոհ ընկերը:
Վերոնշյալ անձանց ելույթը խանդի տեսարաններ է առաջացրել ՀՀԿ-ականների շրջանակներում: Նրանցից ոմանք իրենց վատ են զգացել, որ այդ քառյակը իրեն առանցքային դերակատարություն է վերագրել ՀՀԿ ընտրական գործընթացներում և առհասարակ կուսակցության գործունեության շրջանակներում:
Ավելացնենք նաև, որ այսօր Սերժ Սարգսյանը հյուրընկալվելու է էրեբանի համայնքում: Սասունցի Դավթի հրապարակում նախատեսված է հանդիպում այս համայնքում ՀՀԿ մեծամասնական թեկնածուի` Մհեր Սեդրակյանի` Թոխմախի Մհերի և ընտրողների միջև»:

«Հրապարակ». «Ես չունեմ ցանկություն ոչ գնահատականի, ոչ ասելու: Սուտ բաներ են բոլորը»,- երեկ թերթի թղթակցի հարցին ի պատասխան, թիվ 21 ընտրատարածքում տեղի ունեցած ծեծկռտուքի առթիվ հայտարարել է Աժ ՀՀԿ-ական պատգամավոր Նահապետ Գևորգյանը (Նովո), ում տղայի անունը շրջանառվում է ծեծկռտուքի կազմակերպիչների ցանկում: Թերթը հիշեցնում է, որ ծեծի ենթարկված անկուսակցական թեկնածուն ինքնաբացարկ է հայտնել: Թե ինչու է իր անունը շրջանառվում միջադեպի հետ կապված, Նահապետ Գևորգյանը հրաժարվել է պատասխանել` հորդորելով. «Մյուս անգամ ստեղ չզանգեք»:

Առավոտ թերթը գրում է, որ 2011թ. հոկտեմբերի 31-ին Իջեւանում 69-ամյա Սուսաննա Բեկնազարյանի նկատմամբ բռնաբարության փորձ կատարած 25-ամյա Վազգեն Օհանյանի նկատմամբ քրեական գործ էր հարուցվել ՀՀ քրեական օրենսգրքի 34-138 հոդվածի 1-ին մասով (բռնաբարության փորձ) եւ 147 հոդվածի 1-ին մասով (բնակարանի անձեռմխելիության խախտում): Վ. Օհանյանը ձերբակալված է: Նա նախկինում գողության համար դատապարտվել է եւ 2 տարի 3 ամիս անցկացրել ազատազրկման վայրում:

Տավուշի մարզի դատախազությունից տեղեկացրել են, որ նշանակված դատահոգեբուժական փորձաքննության արդյունքում Վազգեն Օհանյանը մեղսունակ է ճանաչվել: Առաջիկայում քրեական գործը կուղարկվի Տավուշի մարզի առաջին ատյանի դատարան:

Թերթը գրում է, որ ռազմական ոստիկանության պետի պաշտոնը Արմեն Սահակյանի պաշտոնանկությունից հետո դեռեւս շարունակում  է թափուր մնալ:

Թերթի տեղեկություններով, Բաղրամյան 26-ում դժվարանում են կողմնորոշվել ում նշանակել: «Հիշեցնենք, որ Վովա Գասպարյանի հեռանալուց հետո մեկուկես տարվա ընթացքում երկու պետ փոխվեց: Գասպարյանից հետո մեկ տարի ղեկավարեց Արամ Տեր-Սահակյանը: Սակայն այդ ամբողջ ընթացքում ոլորտի կուրացիան շարունակում էր իրականացնել Գասպարյանը: Իսկ Արմեն Սահակյանը, որի նշանակման պահից սկսած մարդիկ զգուշացնում էին, որ նա երկար չի պաշտոնավարելու, կարճ ժամանակ անց ընկավ ստուգումների թակարդը:

Տարածված տեղեկությունների համաձայն, նրան հեռացրել են բացահայտված խախտումների, մասնավորապես  կլորիկ գումարով որոշ զինվորների երկարատեւ արձակուրդ ուղարկելու համար: Մեզ հասած տեղեկություններով, այս բացահայտումից հետո Սեյրան Օհանյանը կոլեգաների մոտ ասել է, որ իր սխալը կուղղի: Սխալ ասելով՝ նկատի է ունեցել այն, որ ինքն է նախագահին ներկայացրել Արմեն Սահակյանին: Սեյրան Օհանյանը հատկապես նեղսրտել է, որ իր երկու որդիները ծառայում են իբրեւ Հայաստանի թեժ կետերում, իսկ ՌՈ պետն արտոնյալների մի բանակ է ձեւավորել:

Միաժամանակ ՊՆ-ում խոսում են, որ ի սկզբանե Արմեն Սահակյանը չի ընդունվել կոլեգաների կողմից: Նա նշանակվելու օրվանից սկսել է ինքնահաստատվել ու, այսպես ասած, Վովա Գասպարյանի «դվիժենին» անել, ինչն էլ դուր չի եկել վերադասին:

Առայժմ ՌՈ պետի թափուր պաշտոնում ժամանակավոր պաշտոնակատար է նշանակվել պետի տեղակալ  Սամվել Ղուկասյանը: Վերջինիս այդ պաշտոնում վերջնականապես նշանակվելը ՊՆ-ում այնքան էլ հավանական չեն համարում»,- գրում է «Հրապարակը»: