Stratfor վերլուծական կենտրոնը աղյուսակ է հրապարակել՝ ներկայացնելով Հայաստանի և աշխարհի երկու տասնյակ երկրների էլետրաէներգիայի սակագինը, և տվյալ երկրների միջին աշխատավարձի չափը: «Ազատության» փոխանցմամբ՝ սակագնի տվյալները վերաբերում են 2013-2014թթ…. Աղյուսակը կազմվել է Աշխատանքի միջազգային կազմակերպության ուսումնասիրությունների հիման վրա:

Ըստ աղյուսակի՝ՀՀ-ում մեկ կՎտ էլկտրաէներգիան 7 ցենտ է, իսկ միջին աշխատավարձը՝ 471 դոլար: Օրինակ՝ Կորեայում էլեկտրաէներգիայի մեկ կՎտ-ի սակագինը 10 ցենտ է, բայց միջին աշխատավարձը 2 հազար 903 դոլար է: ՀՀ-ին ամենամոտը Մեքսիկան է, այստեղ էլեկտրաէներգիայի մեկ կՎտ-ի գինը 9 ցենտ է, բայց միջին աշխատավարձը ՀՀ համեմատ գրեթե 50 տոկոսով բարձր է և կազմում է 609 դոլար:

Ժամանակ

Ռուսական «Կոմերսանտի» տեղեկացմամբ՝ ՀԷՑ-ի սեփականատեր «Ինտեր ՌԱՕ ԵէՍ» ընկերությունը կարող է վաճառքի հանել ՀԷՑ-ը, և որպես հնարավոր գնորդ կարող է հանդես գալ «Տաշիր» խմբի սեփականատեր Սամվել Կարապետյանը կամ մեկ այլ ռուսաստանցի հայ օլիգարխ:

Ըստ պարբերականի՝ նոր գնորդ գտնելն այնքան էլ հեշտ գործ չի լինի:

Սակայն իշխանությանը մոտ կանգնած մեր աղբյուրները նշում են, որ ՀԷՑ-ի գնորդների պակաս չկա, և կան շատ լուրջ հավակնորդներ, որոնք պատրաստ են ռուսական ընկերությունից գնել ՀԷՑ-ը: Ըստ մեր աղբյուրի՝ ՀԷՑ-ով հետաքրքրված են նաև ԱՄՆ և եվրոպական կապիտալով ընկերություններ, սակայն քանի դեռ ՀԷՑ-ի սեփականատերը «Ինտեր ՌԱՕ ԵԷՍ»-ն է, և իշխանությունները անկարող են որևէ որոշում կայացնել ընկերության վաճառքի հարցով:

Ժամանակ

Հունիսի 7-ին տեղի ունեցած Աբովյանի քաղաքապետի ընտրություններից հետո, քաղաքապետի թեկնածու Արթուր Հարությունյանը՝ Պալաչը բացակայում է ՀՀ-ից: Մեր տեղեկություններով՝ նրա բացակայությունը կարող է կապված լինել իր անվտանգության ապահովման հետ կապված մտահոգություններով: Բացի այդ, լուրջ ճնշման տակ են հայտնվել Հարությունյանին պատկանող բիզնես կառույցները, ինչը բնականաբար առանց իշխանությունների համաձայնության և հանձնարարության չէր կարող լինել:

Սա նշանակում է, որ իշխանությունը չի ցանկանում ներել Պալաչին ինքնագործունեության համար, այն բանի համար, որ չունենալով իշխանությունների աջակցությունը, պայքարեց Ծառուկյանի դրածո քաղաքապետի թեկնածուի հետ: Հարությունյանը իր մտադրությունից հետ չկանգնեց անգամ այն ժամանակ, երբ նրան հեռացրին ՀՀԿ շարքերից:

Ժամանակ

Գորիսի Սդղի գյոլում տեղի ունեցած միջադեպի փաստով հարուցված քրեական գործի շրջանակներում, ինչպես տեղեկացրել ենք, Մուշեղ Զաքարյանի նկատմամբ ֆիզիկական բռնություն գործադրելու կասկածանքով, ձերբակալվել էր Սյունիքի մարզպետի վարորդ Արագած Ղևոնդյանի որդին: Կա նաև երկրորդ ձերբակալված անձ, ով մարզպետի որդու՝ Տիգրան Խաչատրյանի ընկերն է: Վերջին ձերբակալությունը մարզպետի որդու շրջապատում խուճապ է առաջացրել: Որոշ լրատվամիջոցների տեղեկություններով՝ խուճապային տրամադրությունների արդյունքում արդեն նույնիսկ փախուստի դիմողներ են եղել:

Ժամանակ

«Ժառանգություն» կուսակցության լավատեղյակ աղբյուրը մեզ փոխանցեց, որ
կուսակցության նախագահ Րաֆֆի Հովհաննիսյանը գրեթե մեկ ամիս է՝ գտնվում է Արևմտյան Հայաստանում։ Ըստ ամենայնի, Հովհաննիսյանը Արևմտյան Հայաստանում կմնա դեռ երկար ժամանակ և հնարավոր է՝ նույնիսկ մշտական բնակություն հաստատի այնտեղ:

Մեր հարցին՝ ինչո՞վ է գբաղված Հովհաննիսյանը Արևմտյան Հայաստանում, մեր զրուցակիցը տարակուսած պատասխանեց. «Նա բազմաթիվ խնդիրներ ունի այնտեղ լուծելու, բայց առաջնահերթն, անշուշտ, Արևմտյան Հայաստանի ազատագրումն է, որը մեր ազգի երազանքն է»:

Ժամանակ

Աբովյանի քաղաքապետի թեկնածու, նախկին քաղաքապետ Կարո Իսրայելյանը բավականին նեղացած է Գագիկ Ծառուկյանից: Նա երեկ մեզ հայտնեց, որ օրերս մկրատով կտրել է 15 տարի շարունակ իրենց տան պատից կախված՝ իր ու Ծառուկյանի համատեղ լուսանկարը, Ծառուկյանի պատկերով հատվածը դրել է ծրարի մեջ ու մի շատ հուզիչ նամակի հետ պատրաստվում է ուղարկել նրան: Իսկ նամակում քաղաքապետի թեկնածուն ցավ է հայտնել որ որոշ մարդիկ փչացրեցին իրենց 15 տարվա բարեկամությունն ու ընկերությունը:

Ժամանակ

Արտաշատում երեկ մեկնարկեց քաղաքապետի ընտրությունների քարոզարշավը: Երեկ թերթի հետ զրույցում Արգամ Աբրահամյանը վստահեցրեց, որ ընտրություններին մասնակցելու է քաղաքակիրթ ձևով: «Մենք բիրտ մեթոդների չենք դիմելու, արդար ընտրություն է լինելու… Որ ընտրակաշառք բաժանենք, դուք կիմանաք, նման մտադրություն չունենք», — ասաց նա:

Անդրադառնալով մյուս թեկնածուի՝ Գազի Հովոյի թեկնածությանը՝ Արգամ Աբրահամյանն ասաց, որ նրան մրցակից է համարում: «Ով որ մասնակցում է, բոլորին էլ մրցակից եմ համարում», — ասաց նա հորեղբոր՝ Ջոնիկ Աբրահամյանի հուշումից հետո:

Ժամանակ

Սամվել Ալեքսանյանի «Երևան Սիթի»-ներում կազինոյի ապարատներ տեղադրելու մասին մեր հրապարակումից հետո սուպերմարկետներից հանվել են «էլ լոտո» կոչվող խաղային ապարատները: Այդ փաստը հաստատեց նաև «էլ լոտո»-ի աշխատակիցներից մեկը: Նշենք, սակայն, որ այդ ապարատները դեռ տեղադրված են և գործում են բոլոր Good win բուքմեյքերական գրասենյակներում և մի շարք գազալցակայաններում:

Ժամանակ

Տրանսպորտի և կապի նախարար Գագիկ Բեգլարյանը տաքսու վարորդների խնդիրներին պահանջվող լուծումներ առաջարկելու փոխարեն, փորձում է ավելի «կրեատիվ» մոտեցումներ ցուցաբերել:

Մեզ հայտնի է դարձել, որ վերջին բողոքի ակցիաների ժամանակ Բեգլարյանը իր հետ հանդիպած մի խումբ տաքսու վարորդների «շահեկան» առաջարկ է արել՝ բարեխոսել Տարոն Մարգարյանի հետ, որ հատուկ տաքսու վարորդների համար 1000 դրամ էժանացվի կարմիր գծերի կայանատեղիի ամսական վարձը, այն է՝ օգտվել ողջ տարվա գումարը՝ 12 հազար դրամ, միանգամից վճարելու զեղչային արտոնությունից: Իհարկե, այս «շուստրիությունը» չի անցել, և ոչ մեկը չի համաձայնել մի քանի հազար դրամանոց զեղչի դիմաց հրաժարվել պայքարից:

Ժամանակ

Աժ ՀՀԿ-ական գործարար պատգամավոր Սամվել Ալեքսանյանը հարստանալու նոր միջոց է գտել: Բոլորովին վերջերս նրան պատկանող «Երևան սիթի» սուպերմարկետների ցանցում տեղադրվել են խաղային ապարատներ, որոնք կոչվում են «էլլոտո»: Ապարատներն աշխատում են գումարով ինչպես նաև հայերեն մենյուով: Իսկ գումարը սկսում է 1000 դրամից, կոպեկների ներբեռնման տեղ չկա: Թղթադրամը ներբեռնում ես ու սկսում խաղալ:

Կայքի այցելության պահին Մաշտոցի պողոտայում գտնվող «Փակ շուկա»-ում, որտեղ ևս կա այդ ապարատից, մարդիկ հերթ էին կանգնել խաղալու համար:

Ժամանակ