«Վարչապետը դեռ որոշում չի կայացրել»,- երեկ այսպես պատասխանեցին կառավարության լրատվական ծառայությունից մեր հարցին՝ արդյոք վարչապետ Հովիկ Աբրահամյանը բնակության է տեղափոխվելու կառավարական ամառանոցներ։

Հիշեցնենք, Հովիկ Աբրահամյանը կառավարական ամառանոցներ չէր տեղափոխվել նաև ԱԺ նախագահ ընտրվելուց հետո։ Իսկ թե կոնկրետ որտեղ է նա բնակվում, իրականում դժվար է ասել։ Նա երբեմն գնում-գալիս է իր հայրենի Մխչյան գյուղի իրենց տուն։ Բացի դա, կա «Հաղթանակ» զբոսայգու հարևանությամբ գտնվող նրա հայտնի տունը՝ Ազգային ժողովի շենքի նմանությամբ։
Բացի այս, մայրաքաղաքում շրջող լուրերի համաձայն՝ Աբրահամյանը Երևանի կենտրոնում մոտ երկու տասնյակ բնակարաններ ունի։ Լուրեր կան, ի դեպ, որ նա կառավարական ամառանոցներ չի տեղափոխվում հատուկ ծառայությունների ուշադրությունից հնարավորինս դուրս լինելու համար։

Հայկական ժամանակ

Թերթի տեղեկություններով, «Հայաստանի էլեկտրական ցանցեր» ընկերությունը պատրաստվում է առաջիկայում դիմել Հանրային ծառայությունները կարգավորող հանձնաժողով՝ էլեկտրաէներգիայի սակագնի բարձրացման հայտով։

Ըստ այդ տեղեկությունների՝ սակագինը կարող է գործող 38 դրամից հասնել 45-ի։ Ներկայումս ՀԷՑ-ը ջերմաէլեկտրակայաններից ավելի թանկ գնով է ձեռք բերում էներգիան, քան նախատեսված է եղել ներկայիս սակագնով։ Արդյունքում սակագնի կառուցվածքում տեղի է ունեցել փոփոխություն, և ՀԷՑ-ը կուտակել է խոշոր պարտքեր՝ մի քանի տասնյակ միլիոն դոլար։ Սա ՀԷՑ-ից առայժմ ճշտել չհաջողվեց:

Հայկական ժամանակ

Քաղաքական շրջանակներում նոր ինտրիգ է հասունանում. մեր աղբյուրները հայտնում են, որ նորանշանակ վարչապետ Հովիկ Աբրահամյանը և «Բարգավաճ Հայաստան» կուսակցության նախագահ Գագիկ Ծառուկյանը ջանքեր են գործադրում ոստիկանության պետ Վլադիմիր Գասպարյանի պաշտոնանկությանը հասնելու համար։
Լուրեր կան, որ վարչապետ Հովիկ Աբրահամյանը մտադիր է այս թեմայով խոսակցություն ունենալ Սերժ Սարգսյանի հետ։
Այն, որ վարչապետ Հովիկ Աբրահամյանը, ինչպես նաև նրա խնամին՝ Գագիկ Ծառուկյանը, իրականում բարիդրացիական հարաբերություններ չունեն գործող ոստիկանապետ Վլադիմիր Գասպարյանի հետ, թերևս շատերին է հայտնի։ Իշխանական շրջանակներում խոսում են նաև, որ վարչապետ Հովիկ Աբրահամյանը ցանկանում է ոստիկանապետի պաշտոնում տեսնել փոխոստիկանապետ Հունան Պողոսյանին։ Վերջինս 2004–08թթ. եղել է ոստիկանության Արարատի մարզային վարչության պետ։ Սա կարևոր փաստ է, եթե հաշվի առնենք, որ Արարատը համարվում է Հովիկ Աբրահամյանի կալվածքը, իսկ Գագիկ Ծառուկյանը լայնածավալ բիզնես ունի այդ մարզում։

Ուշագրավ է, որ երեկ առավոտից խոսակցություններ էին պտտվում, թե Վլադիմիր Գասպարյանի թիկնազորի պետ Արշակ Հակոբյանը, ում անունը, ի դեպ, այս ընթացքում կապվել է զանազան աղմկոտ պատմությունների հետ, ձերբակալվել է։ Ոստիկանության լրատվական ծառայությունից, սակայն, մեզ հայտնեցին, թե նման բան չկա։ «Անհեթեթություն է»,– պատասխանեցին լրատվականից։

Մեր աղբյուրները պնդում են, սակայն, որ Ազգային անվտանգության ծառայությունը լրջորեն հետաքրքրվում է Արշակ Հակոբյանով և նրա աղմկահարույց գործունեությամբ:

Հայկական ժամանակ

ՀՀ ազգային վիճակագրական ծառայության հրապարակած պաշտոնական տվյալներով, այս տարվա առաջին եռամսյակում արդյունաբերության անկումը շարունակվել է։

Ընդ որում, նվազում է արձանագրվել այնպիսի ապրանքատեսակների արտադրության ծավալներում, որոնք կարելի է առանձնապես մտահոգիչ համարել։ Մասնավորապես՝ 75-50 տոկոսով նվազել է շարժիչների, ռելեների, ավտոգենային սարքավորումների, տրանսֆորմատորների արտադրությունը։

Սննդի արդյունաբերությունում 5-ից մինչև 50 տոկոս նվազում է արձանագրվել կաթնաշոռի, մածունի, թթվասերի, յոգուրտի, մայոնեզի արտադրությունում։

Նշենք, որ 1.3 տոկոսով նվազել է անգամ հացի արտադրությունը:

Հայկական ժամանակ

Կառավարությունում, դիտորդների կարծիքով՝ կտրուկ մեծացել է Ռոբերտ Քոչարյանի կադրերի քանակը. Դավիթ Հարությունյան, Արմեն Գևորգյան, առողջապահության նախարար Արմեն Մուրադյան, էկոնոմիկայի նախարար Կարեն Ճշմարիտյան, քաղաքաշինության նախարար Նարեկ Սարգսյան, հիմա էլ, ահա, Երվանդ Զախարյան։

Այս մարդկանց մեծ մասը Սերժ Սարգսյանի մերձակայքում էլ են եղել, բայց, այսպես ասած, ժառանգություն են մնացել Ռոբերտ Քոչարյանի իշխանությունից։

Երեկվա հաջորդ սենսացիան այն է. որ կառավարության ամենաերկարակյաց նախարարը՝ Արմեն Մովսիսյանը, որ կառավարության անդամ է 2001 թվից, հեռացավ այդ պաշտոնից։ Նա մեկն էր նրանցից, ովքեր վերջին շրջանում հեռակա բանավեճի մեջ էին մտել Ռոբերտ Քոչարյանի հետ վերջինիս մի հարցազրույցի առիթով։

Հրայր Թովմասյանն էլ, որ վերջերս հակադարձել էր Քոչարյանին, կրկին կառավարության կազմում չէ այլևս։ Կառավարության նոր կազմում, ի դեպ, Քոչարյանին հակադարձած ոչ մի պաշտոնյա այլևս չկա։

Եվս մեկ վիճակագրություն. երեկվա նշանակումներից հետո թափուր են մնացել միայն սպորտի և երիտասարդության ու գյուղատնտեսության նախարարի պաշտոնները։ Յուրի Վարդանյանը, գրեթե վստահաբար, չի վերանշանակվի սպորտի նախարարի պաշտոնում, իսկ Սերգո Կարապետյանը գյուղնախարար մնալու փոքր, բայց շանս ունի:

Հայկական ժամանակ

Երեկ ԱԺ-ում մի քանի հարց ուղղեցինք նորանշանակ քաղաքաշինության նախարար Նարեկ Սարգսյանին.

-Պարոն Սարգսյան, Դուք չկարողացաք Փակ շուկան հեռու պահել աղճատումից, ինչպե՞ս եք ղեկավարելու ամբողջ քաղաքաշինության ոլորտը։

-Ի՞նչ է նշանակում չկարողացաք հետ պահել։

-Փակ շուկան աղճատվեց ու դարձավ սուպերմարկետ։

-Բայց ես ո՞վ էի այդ ժամանակ, հիշո՞ւմ եք (Հիշեցնենք, որ վերջինս Ճարտարապետության պետական կոմիտեի նախագահն էր)։

Օրերս էլ Երևանում քանդվել է ճոպանուղու հարևանությամբ գտնվող հուշարձանը, Հր. Աճառյանի անվան նախկին դպրոցը։ Ի՞նչ եք անելու։

Շենքով մշակույթի նախարարն է զբաղվում և առանձին հայտարարություն կանի։ Դա պետք է պարտադիր վերականգնվի։

Հայկական ժամանակ

Քաղաքական և բիզնես շրջանակներում խոսվում է, որ ՀՀ նախկին վարչապետ, Մեծ Բրիտանիայում նախկին դեսպան Արմեն Սարգսյանը ձեռք է բերել ԱԺ ՀՀԿ-ական պատգամավոր Աշոտ Արսենյանին պատկանող «Ջերմուկ գրուպ» ընկերության 50 տոկոսը։

Երբ Արսենյանին հարցրեցինք՝ ճի՞շտ են այս տեղեկությունները, նա պատասխանեց. «Չկա նման բան»։ Այդուհանդերձ, նույն շրջանակները, ի դեպ՝ նաև «Ջերմուկ գրուպի» աշխատակիցները, նշում են, թե Արսենյանին նեղում են բիզնեսում, և նա անգամ իր ընտանիքին է Հայաստանից Գերմանիա տեղափոխվել։ Սույն տեղեկությունը ևս ՀՀԿ-ական պատգամավորը երեկ հերքեց։

Մոտ մեկ տարի առաջ մամուլում գրվել էր, որ նախկին վարչապետ Արմեն Սարգսյանը ձեռք էր բերել նաև «Պեպսի-կոլա» ընկերության բաժնետոմսերի խոշոր փաթեթ և Հարավային Կովկասում «Պեպսի-կոլայի» կառավարման իրավունքը։ Իսկ «Պեպսի-կոլայի» վաճառքը ՀՀ-ում կենտրոնացած էր Արսենյանի ձեռքում։ Երեկ, երբ նրան հարցրեցինք՝ Ճի՞շտ են սույն տեղեկությունները, նա, նախ, պատասխանեց. «Պեպսիի հետ ես կապ չունեմ»։ Հիշեցմանը՝ բայց նախկինում դուք էիք Հայաստանում իրականացնում դրա վաճառքը՝ Արսենյանը պատասխանեց. «Իմ տղան է, հիմա էլ կա»։ Սակայն Արմեն Սարգսյանը վերցրել է դրա մի մասը, այդպե՞ս է՝ հարցին պատգամավորը պատասխանեց. «Ոչ, ամբողջությամբ մերն է»։ Հիշեցնենք, բավական հաջողակ գործարար-պատգամավոր Աշոտ Արսենյանը տարիներ շարունակ համարվել է Սերժ Սարգսյանի մերձավորը, ով իր ամառային արձակուրդների մի մասը սովորաբար անցկացնում էր Արսենյանի՝ Բադեն-Բադենում գտնվող առանձնատանը»։

Հայկական ժամանակ

Նոր վարչապետի կաբինետի համալրման համար մնում է հինգ նշանակում՝ գյուղատնտեսության  նախարար, բնապահպանության նախարար, սպորտի նախարար, էներգետիկայի նախարար, արդարադատության նախարար։ Գյուղնախարարի պաշտոնի համար շրջանառվում է  Արարատի մարզպետ Արամայիս Գրիգորյանի անունը, բնապահպանության նախարարի պաշտոնի համար պայքարը շարունակում է ԱԺ տնտեսական հանձնաժողովի նախագահ Վարդան Այվազյանը, էներգետիկայի նախարարի պաշտոնի համար շրջանառվում է  կադաստրի պետական կոմիտեի նախագահ Երվանդ Զախարյանի անունը, բայց Արմեն Մովսիսյանը շարունակում է պայքարը։ Արդարադատության նախարարի ամենահավանական թեկնածուն դեռ շարունակում է մնալ Հրայր Թովմասյանը, իսկ սպորտի նախարարի պաշտոնակատար Յուրի Վարդանյանը համառորեն պայքարում է իր պոստը պահպանելու համար, թեև այդ պաշտոնի դեպքում շրջանառվում է  ՀԱՕԿ սպորտվարչության պետ Գաբրիել Ղազարյանի անունը:

Հայկական ժամանակ

Երեկ, ըստ էության, վերջին պահին Քննչական պետական կոմիտեի մասին օրենքի նախագիծը ընդգրկվել է Աժ առաջիկա քառօրյայի օրակարգ։ Խոսքը այն կառույցի մասին է որի ղեկավարի ամենահավանական թեկնածու է համարվում Աղվան Հովսեփյանը։

Օրենքի նախագծի քննարկումը անընդհատ հետաձգվում էր, և օրակարգում ընդգրկվելն ամենևին չի երաշխավորում, որ առաջիկա շաբաթում Աժ-ն կհասցնի այն քննարկել։

Բանն այն է, որ առաջիկա «քառօրյան» ըստ էության «եռօրյա» է լինելու, որովհետև հինգշաբթի մայիսի 1-ը, ոչ աշխատանքային օր է, և Աժ-ն նիստ չի կարող անել։ Բացի այդ նախատեսված է մի շարք հարցերի հրատապ քննարկում Սևանի մասին օրենք, պարտադիր կուտակային, Աժ նախագահի ընտրություն։

Էնպես որ. հավանական է, որ Աղվան Հովսեփյանը դեռ ստիպված լինի ահագին սպասել:

Հայկական ժամանակ

Ազգային ժողովի օրակարգում ընդգրկված նախագծերի մեջ է հայտնվել նաև Աժ պետաիրավական հանձնաժողովի նախագահի ընտրությունը։ Մինչ սույն հանձնաժողովի այլևս նախկին նախագահ Դավիթ Հարությանյանի կառավարության աշխատակազմի ղեկավար-նախարարի պաշտոնում նշանակվելը, խորհրդարանում արդեն այդ հանձնաժողովի նախագահի թեկնածու էին համարում ՀՀԿ խմբակցության քարտուղար Հովհաննես Սահակյանին։
Վերջինս, ի դեպ, այս պահին այդ հանձնաժողովի փոխնախագահն է։ Հովհաննես Սահակյանին, սակայն, մրցակից է հայտնվել։ Հանրապետական պատգամավորները մի քանի օր է, սույն հանձնաժողովի նախագահի թեկնածու են համարում նաև Խոսրով Հարությունյանին:
Վերջինս ֆինանսավարկային և բյուջետային հանձնաժողովի անդամ է։ Ու քանի որ Դավիթ Հարությունյանի դուրս գալուց հետո հանձնաժողովի ՀՀԿ-ական անդամների թիվը մեկով պակասել է, ՀՀԿ-ական պատգամավորների շրջանում քննարկվում է սույն հանձնաժողովում Խոսրով Հարությունյանի ընդգրկումը, որից հետո էլ նա կարող է ընտրվել հանձնաժողովի նախագահ»,–գրում է թերթը։

Երեկ, սակայն, թերթի հետ զրույցում Խոսրով Հարությունյանը ասել է, որ իր հետ նման խոսակցություն չի եղել։

Հայկական ժամանակ