ԿԲ նախագահ Արթուր Ջավադյանը, որ երեկ ԱԺ-ում հանդես էր գալիս որպես ԿԲ նախագահի թեկնածու, սենսացիոն, բայց սպասելի հայտարարություն է արել։

Երեկ Փաշինյանը հետաքրքրվել է, թե ՍԴ հայտնի որոշումից հետո, երբ կուտակային կենսաթոշակների մասին օրենքի մի շարք առանցքային դրույթներ և մասնավորապես՝ պարտադիր բաղադրիչը հակասահմանադրական են ճանաչվել, ո՞րն է Արթուր Ջավադյանի տեսլականը, ի՞նչ փոփոխությունների պետք է ենթարկվի կուտակային կենսաթոշակային համակարգը և արդյոք պարտադիր բաղադրիչը պետք է պահպանվի։

Ջավադյանը հարցին անսպասելիորեն ուղղակի պատասխան է տվել. «Ինչ վերաբերում է այն հարցին, թե արդյոք պարտադիր բաղադրիչը լինելու է, իհարկե լինելու է, ուրիշ բան, թե մենք ոնց ենք դա իրականացնելու։ Առանց այդ բաղադրիչի օրենքի ուժը կորում է։ Խոսքը չի գնում պարտադիր բաղադրիչի մասին, խոսքը գնում է վերանայման մասին։ Պետք է էնպես անենք, որ այդ օրենքի վերջնական դիզայնը համապատասխանի ՍԴ որոշմանը»,- ասել է նա։

Սա նման բարձր մակարդակից հնչած առաջին պաշտոնական հայտարարությունն է այն մասին, որ իշխանությունները չեն պատրաստվում հանել կուտակային կենսաթոշակների պարտադիր բաղադրիչը և նման դիրքորոշումն ունի կոնկրետ բացատրություն:

Հայկական ժամանակ

Եթե նախկինում ՀԿԿ-ի հայտնի «տատիկը»  իր ատելությունը արտահայտում էր միայն գոռգոռալով, ապա այս շաբաթ կառավարության շենքի առաջ նա եկավ արդեն ժամանակակից դիզայնով` հատուկ նյութի վրա տպագրված պաստառով (պաստառի բովանդակությունն է՝ «ՀՀ ազգի դավաճան «պատգամավոր» Նիկոլ Փաշինյան, որը ջրից միշտ չոր է դուրս գալիս, հեռացի՛ր քաղաքական դաշտից երկիրը թող հանգիստ»)։

«Տատի, էդ պլակատը տպելու փողը ով է տվել»,– հարցրել է մեր թղթակիցը։ «Հովհաննես Թումանյանը»,– առանց երկար մտածելու ասել է տատիկը։ Այդուհանդերձ, հետաքրքիր է, թե ինչու է ՀՀԿ-ի տատիկի սևեռվածությունը այդպիսի դրսևորումներ ստացել, որը նույնիսկ ֆինանսական ծախսերի հետ է կապված։ Այստեղ կարող է լինել երկու վարկած, առաջին վարկածն այն է, որ այսպիսով ՀՀԿ-ի տատիկը իր քաղաքացիական դիրքորոշումն է արտահայտում՝ ինչ-որ պատճառով դժգոհ լինելով պատգամավորի գործունեությունից։ Այս պարագայում, բնականաբար. նա իր սուղ թոշակից միջոցներ է հատկացրել նման պլակատ տպելու համար։ Սա չի բացառվում, որովհետև նման պլակատի տպագրությունն առանձնապես թանկ չէ։ Երկրորդ տարբերակն այն է, որ սա ՀՀԿ վերնախավի հոգու պոռթկումն է:

Հայկական ժամանակ

ՀՀԿ-ի ներսում ինչ-որ բան այն չէ։ Այս կուսակցության ներկայացուցիչները արդեն իսկ հրապարակային կծում, խոցում, քննադատում են իրար։

Երեկ ԱԺ նիստի ժամանակ նման երկու միջադեպ գրանցվեց։

ԱԺ սոցիալական հարցերի հանձնաժողովի նախագահ Հակոբ Հակոբյանը Քննչական կոմիտեի մասին նախագծի քննարկման ժամանակ այնպիսի կպնողական հարց տվեց արդարադատության փոխնախարար Գ. Մուրադյանին, որ ԱԺ փոխնախագահ Էդուարդ Շարմազանովը չդիմացավ. «Պարոն Հակոբյան, կեսկատակ-կեսլուրջ ասում եմ՝ էս վերջին շրջանում այնքան շփվեցիք մեր ընդդիմադիր գործիչների հետ, որ արդեն իրենց բառապաշարն եք օգտագործում»։ Իսկ Սամվել Ֆարմանյանը քլունգն առած քլնգում էր ՀՀԿ փոխնախագահ, ԿԳ նախարար Արմեն Աշոտյանի բերած «Զինապարտության մասին» օրենքի նախագիծը։ Սա տեղի ունեցավ այն բանից հետո, երբ ԱԺ ամբիոնից հարցերին պատասխանող Աշոտյանը դիտողություն արեց Ֆարմանյանին այլ պատգամավորների հետ զուգահեռ զրուցելու համար:

Հայկական ժամանակ

Գեղարքունիքի մարզի Կոթի գյուղում հունիսի 8-ին կայանալիք համայնքի ղեկավարի ընտրություններում իրենց թեկնածությունն էին առաջադրել Կոթի գյուղապետարանի 5 աշխատակիցներից 3-ը՝ գյուղապետը, նրա օգնականը և հաշվապահը:

Հաշվապահ Սիմա Չիտաչյանը, ընդ որում, ՀՀԿ-ական գյուղապետ Մերուժան Իսրայելյանի կինն է, Անդրանիկ Հախումյանը՝ հարկերի գծով օգնականը: Կինը ինքնաբացարկ է հայտնել և թեժ պայքարն ընթանալու է գյուղապետի և նրա օգնականի միջև:

Հայկական ժամանակ

Ականատեսները պատմում են, որ մի քանի օր առաջ ՀՀ ոստիկանության պետ Վլադիմիր Գասպարյանը արտակարգ իրավիճակի մեջ է ընկել: Երբ թիկնապահների հետ քայլելիս է եղել Երևանի Աբովյան փողոցով, նրա վրա վերևից կոշիկ է ընկել:

Աբովյան փողոցի երկայնքով, հիշեցնենք, բնակելի շենքեր են, որոնց պատուհանները բացվում են հենց փողոցի վրա: Ըստ ամենայնի, կոշիկի ծագման աղբյուրը այդ բնակարաններից մեկն է:

Մեր տեղեկություններով, Գասպարյանն արագ հեռացել է դեպքի վայրից, որից հետո տասնյակ օպերատիվ աշխատողներ լցվել են այդ տարածք և օպերատիվ հետախուզական աշխատանքներ իրականացրել կոշիկի ծագման աղբյուր հանդիսացած շենքում:

Մեր տեղեկություններով, սակայն, ոստիկաններին որևէ բան պարզել չի հաջողվել չնայած կասկածյալ բնակարանների թիվը մեծ չէ: Առայժմ անհայտ է նաև, թե տեղի ունեցածը պատահականությա՞ն արդյունք է, թե դիտավորության:

Հայկական ժամանակ

ՀՀ գլխավոր դատախազ Գևորգ Կոստանյանի հայրը՝ Շենգավիթ համայնքի ընդհանուր իրավասության դատարանի նախագահ Սուրիկ Կոստանյանը, ըստ «ՀԺ»-ի հավաստի տեղեկությունների, առաջիկայում նշանակվելու է Սահմանադրական դատարանի անդամ:

ՍԴ անդամ դառնալու համար պայքարում է նաև արդարադատության նախկին նախարար, ՍԴ նախագահի խորհրդական Գևորգ Դանիելյանը, ով նաև Սերժ Սարգսյանին կից սահմանադրական փոփոխությունների հանձնաժողովի անդամ է: ՍԴ-ում, ինչպես ժամանակին տեղեկացրել էինք, դատավորի 2 թափուր տեղ է առաջանում, քանի որ թոշակի են գնում ՍԴ անդամների Վալերի Պողոսյանը և Մանուկ Թոփուզյանը։ Այդ տեղերից մեկին հավակնում է նաև ՄԻԵԴ-ում Հայաստանի դատավոր Ալվինա Գյուլումյանը:

Հայկական ժամանակ

Գյուղատնտեսության նախկին նախարար, դաշնակցական Դավիթ Լոքյանի որդին՝ Սերգեյ Լոքյանը, ով Հովիկ Աբրահամյանի խորհրդականն էր և աջ ձեռքը ԱԺ-ում, կադրային վերջին փոփոխություններից հետո խաղից դուրս է հայտնվել ու անգործ մնացել։

Աբրահամյանի երբեմնի հավատարիմ անձը համարվող կրտսեր Լոքյանը Աբրահամյանի կառավարություն գնալուց հետո շտապեց աշխատանքից ազատվելու դիմում գրել և ակնկալում էր, որ նախկին ղեկավարը իրեն էլ կտանի կառավարություն։ Նոր կառավարություն ձևավորման օրերին, երբ ՀՅԴ-ն չէր բացառում իր՝ կոալիցիայի մաս դառնալը, քննարկվում էր նաև ավագ Լոքյանի փոխվարչապետ նշանակվելու տարբերակը, ինչը կրտսեր Լոքյանին ավելի էր ոգևորել։ Բայց նրա սպասումները չարդարացան։

Ավելին՝ ընդամենը մեկ ամիս առաջ Մոսկովյան 31 հասցեում բացված կրտսեր Լոքյանի «Լուբրանո» ռեստորանից նախօրեին հանում էին իրերը, անջատել էին նաև հեռախոսները։ Այս օրերին Սերգեյ Լոքյանը տխուր-տրտում նստում է «Մարիոթի» բացօթյա սրճարանում և անվերջ նայում կառավարության շենքին:

Հայկական ժամանակ

Գուրգեն Դումանյանը երեկ երեկոյան հրաժեշտ էր տալիս Աժ աշխատակազմի ներկայացուցիչներին, նա աշխատանքի է տեղափոխվելու կառավարություն՝ աշխատակազմի ղեկավար-նախարարի տեղակալի կարգավիճակով:

Անցյալ շաբաթ իշխանական շրջանակներում խոսվում էր, որ Դումանյանի փոխարեն Աժ աշխատակազմի ղեկավար կարող է նշանակվել արդարադատության նախկին նախարար Հրայր Թովմասյանը: Այս հեռանկարը, սակայն, խուճապ էր առաջացրել աշխատակազմի և պատգամավորների մի մասի մոտ:

Երեկ մեզ հայտնի դարձավ, որ Թովմասյանը հրաժարվել է Աժ գործուղվել՝ նշելով, որ չի գնա մի տեղ, որտեղ իրեն չեն սպասում: Թե ով կարող է նշանակվել այդ պաշտոնում, դեոևս որոշված չէ: Մինչ այդ երեկ ժամանակավոր պաշտոնակատար է նշանակվել աշխատակազմի ղեկավարի տեղակալ Էրիկ Մինասյանը:

Հայկական ժամանակ

Մաշտոցի պողոտայի «Բեսթ» սուպերմարկետը արդեն 2 օր է, չի գործում: Դիմապակուն փակցված է պաստառ, որ տարածքը տրվում է վարձով: Կապ հաստատեցինք սուպերմարկետի ղեկավարներից մեկի հետ, ով հրաժարվեց խոսել պատճառների մասին:

Հիշեցնենք, որ դեռևս անցած տարվա հոկտեմբերին մենք շրջայց Էինք կատարել մի շարք խանութներ պարզելու, թե ՀՀԿ-ական պատգամավոր Սամվել Ալեքսանյանին (Լֆիկ Սամո) պատկանող նորաբաց «Փակ շուկա» սուպերմարկետը ինչպես Է անդրա-դարձել իրենց սպառման վրա: «Բեստ» սուպերմարկետի ղեկավարությունից մեգ հայտնել Էին, որ նոր սուպերմարկետի բացման հետ մեկտեղ իրենց սպա¬ռումը նվագել Է, ու նույն տեմպերով շարունակվելու դեպքում, այլևս չեն աշխատի: Այդպես Էլ եղավ:

Հայկական ժամանակ

Արդեն մի քանի օր Հայաստանում դեսպաններ հայհոյելու գործընթաց է սկսվել։ Առիթը ՀՀ-ում ՌԴ և ԱՄՆ դեսպանների վերջին օրերին արած հայտարարություններն են։ Դեսպաններին հայհոյողները, զարմանալի զուգադիպությամբ, հստակ երկու խմբի են բաժանվում։ Առաջին խումբը հայհոյում է ՀՀ-ում ՌԴ դեսպանին և ոչինչ չի ասում ԱՄՆ դեսպանի մասին, իսկ երկրորդ մասը հայհոյում է ԱՄՆ դեսպանին և ոչինչ չի ասում Ռուսաստանի դեսպանի մասին։

Հայ-ռուսական հարաբերությունների մասին Հայաստանում երկու պատկերացում կա. առաջինի համաձայն՝ մենք պետք է պառկենք Ռուսաստանի տակ, իսկ երկրորդի համաձայն՝ կռիվ տանք Ռուսաստանի դեմ։ Երկու տեսակետներն էլ հավասարապես վտանգավոր են, որովհետև երկուսն էլ խորքում կրում են հակապետական տրամաբանություն։ Առաջին դեպքում պետականության անկումը ենթադրվում է Ռուսաստանի մեջ ներծծվելու, երկրորդ դեպքում՝ Ռուսաստանի դրբի տակ մնալու տարբերակով։ Իսկ արդյունքը, մեծ հաշվով, նույնն է։

Ընդ որում, Ռուսաստանը առաջին տարբերակի կողմնակիցներին չի ուզում լսել, որովհետև նրանց համարում է սեփական փալասը, իսկ երկրորդ տարբերակի կողմնակիցներին չի ուզում լսել, որովհետև նրանց համարում է ամերիկյան շպիոն ու թշնամի։ Այսօրինակ իրարանցումները կանխելու համար պետք է ոչ թե հայհոյել ՀՀ-ում ՌԴ դեսպանին, այլ հստակ և հասկանալի ձևակերպել, թե ինչ ենք մենք ակնկալում հայ-ռուսական հարաբերություններից, որն է այդ հարաբերությունների մասին մեր այլընտրանքային պատկերացումը, որ տարբերվում է թե պրոռուսական և թե պրոամերիկյան սցենարից

Հայկական ժամանակ